Oʻzbekiston Respublikasi Hukumati va Qozogʻiston Respublikasi Hukumati, keyingi oʻrinlarda “Tomonlar” deb ataluvchilar,

Oʻzbekiston Respublikasi bilan Qozogʻiston Respublikasi oʻrtasida strategik sherikchilik toʻgʻrisida 2013-yil 14-iyunda imzolangan Shartnomaga amal qilib,

ikki mamlakat mintaqalari oʻrtasida savdo-iqtisodiy, ilmiy-texnikaviy, madaniy-gumanitar va boshqa sohalarda hamkorlikni keng qamrovli rivojlantirish zaruriyatini tan olib,

hamkorlikning dolzarb masalalarini mahalliy darajada tezkor hal qilishda hamda tarixan shakllangan aloqalarni chuqurlashtirishda mintaqalararo hamkorlikning amaliy ahamiyati va salohiyatini eʼtirof etgan holda,

ikki mamlakat mintaqalari oʻrtasida faoliyatning turli sohalarida hamkorlikni taʼminlash hamda xoʻjalik yurituvchi subyektlarning rivojlanayotgan aloqalarini faollashtirishga qodir boʻlgan mintaqalararo hamkorlik uchun qulay shart-sharoitlar yaratish va huquqiy asoslarini mustahkamlashga intilib, quyidagilar toʻgʻrisida kelishib oldilar:

Tomonlar oʻz davlatlarining milliy qonunchiligiga hamda davlatlari ishtirokchi boʻlgan xalqaro shartnomalarga muvofiq tenglik va oʻzaro manfaatdorlik asosida savdo-iqtisodiy va madaniy-gumanitar sohalarda, qishloq xoʻjaligi, sogʻliqni saqlash, aholi bandligiga koʻmaklashish, turizm va atrof muhitni himoya qilish sohalarida, shuningdek oʻzaro qiziqish uygʻotadigan boshqa yoʻnalishlarda oʻzaro manfaatli boʻlgan mintaqalararo hamkorlikni kengaytirish va rivojlantirishga koʻmaklashadilar.

Mazkur Bitim maqsadlari uchun qoʻllaniladigan atamalar quyidagilarni anglatadi:

“mintaqalar” — Oʻzbekistan tomonidan: Oʻzbekistan Respublikasining maʼmuriy-hududiy birliklari; Qozogʻiston tomonidan: milliy qonunchilikka muvofiq belgilanadigan mintaqalar.

“vakolatli organlar” — Tomonlar davlatlarining mazkur Bitimni amalga oshirish bilan bogʻliq masalalarni hal qilish boʻyicha mintaqalararo hamkorlikni rivojlantirish sohasida vakolat berilgan hokimiyat organlari.

Tomonlar, shuningdek vakolatli organlar mintaqalararo hamkorlikni amalga oshirish va muvofiqlashtirish maqsadida quyidagilarga koʻmaklashadilar:

mintaqalar oʻrtasida aloqalar oʻrnatish va rivojlantirishga; mazkur Bitimni amalga tatbiq qilishga yoʻnaltirilgan qoʻshma tadbirlar rejalari, harakat dasturlari va “yoʻl xaritalari”ni ishlab chiqish hamda amalga oshirishga;

mintaqalararo hamkorlikning joriy holati hamda uni takomillashtirish istiqbollarini muhokama qilish boʻyicha zaruriyat boʻlganda qoʻshma ishchi guruhlar tuzish va mintaqalar darajasida muntazam maslahatlashuvlar mexanizmini yoʻlga qoʻyishga;

hamkorlikning oʻzaro manfaatli boʻlgan boshqa shakllariga.

Vakolatli organlar mintaqalarning korxona va tashkilotlari oʻrtasida oʻzaro manfaatli savdo aloqalarini rivojlantirishga koʻmaklashadilar. Mazkur maqsadlarda ular oʻz vakolatlari doirasida va oʻz davlatlari qonunchiligiga muvofiq:

korxona va tashkilotlar oʻrtasida bevosita aloqalarni oʻrnatish, qoʻshma korxonalar tashkil etish, tovar va xizmatlar yetkazib berish boʻyicha oʻzaro manfaatli kontraktlar tuzishda tadbirkorlik tuzilmalarini har tomonlama qoʻllab-quvvatlash tashabbusi bilan chiqadilar;

tadbirkor va ishbilarmon doiralar vakillari ishtirokida uchrashuvlar, forumlar, biznes-seminarlar, konferensiyalar, simpoziumlar, koʻrgazma va yarmarkalar tashkil etadilar;

oʻz mintaqalarini iqtisodiy rivojlantirishning ustuvor loyihalarini amalga oshirishda, shu jumladan, xoʻjalik yurituvchi subyektlari saʼy-harakatlarini muvofiqlashtirish orqali bir-birlarini qoʻllab-kuvvatlaydilar;

oʻz davlatlari qonunchiligidagi oʻzgarishlar va amalga oshirilayotgan iqtisodiy islohotlar haqida bir-birlarini muntazam xabardor qiladilar;

oʻzaro savdoni tashkil etishda vujudga kelayotgan qiyinchiliklarni tahlil qiladilar va tegishli takliflar ishlab chiqadilar.

Vakolatli organlar mintaqalar oʻrtasida bevosita turist almashinuvini tashkil qilish, mintaqalar jozibadorligini oshirishga qaratilgan turizm sohasidagi qoʻshma dastur va loyihalarni amalga oshirishga koʻmaklashadilar.

Vakolatli organlar ishbilarmonlik faolligini oshirish va mintaqaga turistik oqimni koʻpaytirish maqsadida transport qatnovini yaxshilash hamda infratuzilmani rivojlantirishga koʻmaklashadilar.

Vakolatli organlar shaharlar maʼmuriyatlari oʻrtasida kasb aloqalarining rivojlanishiga hamda mahalliy boshqaruvning mintaqalardagi samaradorligini oshirish maqsadida mahalliy boshqaruvning ilgʻor tajribalarini tarqatishga, shuningdek ularning oldilarida turgan oʻxshash vazifalarni hal qilishda tajriba almashishga koʻmaklashadilar.

Vakolatli organlar shaharsozlik hamda ulkan shaharsozlik loyihalarini rejalashtirish va moliyalashtirish amaliyoti boʻyicha axborot almashish sohasidagi hamkorlikni rivojlantiradilar.

Vakolatli organlar atrof-muhitni himoya qilish, tabiiy resurslardan oqilona foydalanish masalalarida hamkorlik qiladilar va tabiatni muhofaza qilish masalalarini boshqarish sohasida ilgʻor tajribani joriy etishga koʻmaklashadilar.

Vakolatli organlar suv va energiya taʼminoti, oqindi suvlarni tozalash, xoʻjalik va sanoat chiqindilarini utilizatsiya qilish, shuningdek energiya tejovchi texnologiyalar sohasida hamkorlikni rivojlantiradilar.

Vakolatli organlar yaxshiroq tushinish, hamkorlik va doʻstlikni mustahkamlashga erishish uchun tarix va madaniyat bilan oʻzaro tanishish maqsadida turli darajalarda muntazam aloqalarni taʼminlaydilar.

Vakolatli organlar mintaqalarning ijtimoiy-madaniy va xoʻjalik-iqtisodiy hayotini ommaviy axborot vositalarida xolisona yoritishga koʻmaklashadilar.

Vakolatli organlar millatlararo muomala, dinlararo va madaniyatlararo muloqot, shuningdek etnik-madaniy rivojlanish madaniyatini mustahkamlash sohasida mintaqalar hamkorligini rivojlantirishga qaratilgan loyihalar va boshqa tadbirlarni amalga oshirishga koʻmaklashadilar.

Tomonlar mazkur Bitim qoidalarini talqin qilish va qoʻllashda vujudga kelishi mumkin boʻlgan har qanday nizo va kelishmovchiliklarni muzokaralar va maslahatlashuvlar orqali hal etadilar.

Tomonlar oʻzaro kelishuvga muvofiq mazkur Bitimga alohida bayonnomalar bilan rasmiylashtiriladigan hamda uning ajralmas qismi hisoblanadigan oʻzgartish va qoʻshimchalar kiritishlari mumkin.

Mazkur Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari haqida soʻnggi yozma xabarnoma diplomatik kanallar orqali olingan sanadan boshlab kuchga kiradi.

Mazkur Bitim nomuayyan muddatga tuziladi va Bitimning amal qilishi Tomonlardan biri boshqa Tomonning Bitim amal qilishini tugatish niyati toʻgʻrisidagi tegishli yozma xabarnomasini diplomatik kanallar orqali olgan sanadan boshlab olti oydan soʻng tugatiladi.

Mazkur Bitim amal qilishining tugatilishi u amal qilgan paytda bajarilishi boshlangan va uning amal qilishi tugatilgunga qadar bajarilmagan loyihalar boʻyicha Tomonlarning majburiyatlariga daxl qilmaydi.

Ostona shahrida 2017-yil 23-martda har biri oʻzbek, qozoq va rus tillarida boʻlgan ikki asl nusxada tuzildi, bunda barcha matnlar bir xil kuchga ega.

Mazkur Bitim qoidalarini talqin qilish maqsadida Tomonlar rus tilidagi matnga murojaat qiladilar.