O‘zbekiston Respublikasi hamda Qozog‘iston Respublikasi o‘rtasida savdo-iqtisodiy va madaniy-gumanitar sohalarda, qishloq xo‘jaligi, sog‘liqni saqlash, aholi bandligiga ko‘maklashish, turizm va atrof muhitni muhofaza qilishda, shuningdek, o‘zaro qiziqish uyg‘otayotgan boshqa yo‘nalishlarda hududlararo manfaatli hamkorlikni yanada kengaytirish va rivojlantirish maqsadida:

1. O‘zbekiston Respublikasi Hukumati va Qozog‘iston Respublikasi Hukumati o‘rtasida 2017-yil 23-martda Ostona shahrida imzolangan hududlararo hamkorlik to‘g‘risidagi Bitim tasdiqlansin.

2. O‘zbekiston Respublikasi Tashqi ishlar vazirligi O‘zbekiston Respublikasi mazkur xalqaro shartnoma kuchga kirishi uchun zarur bo‘lgan ichki davlat tartib-taomillarini bajargani haqida Qozog‘iston tomoniga tegishli bildirishnoma yo‘llasin.

3. O‘zbekiston Respublikasi Vazirlar Mahkamasi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari hamda tegishli vazirlik va idoralar rahbarlari ushbu xalqaro shartnoma kuchga kirgandan keyin belgilangan tartibda O‘zbekiston Respublikasining majburiyatlari bajarilishi ustidan nazoratni ta’minlasinlar.

4. Mazkur qarorning ijrosini nazorat qilish O‘zbekiston Respublikasining Bosh vaziri A. Aripov zimmasiga yuklansin.