Oʻzbekiston Respublikasi Prezidentining “Jizzax va Sirdaryo viloyatlari qishloq xoʻjaligining texnik jihozlanishini yanada oshirishga doir qoʻshimcha chora-tadbirlar toʻgʻrisida” 2017-yil 16-maydagi PQ-2969-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — “Oʻzavtosanoat” AJ boshqaruvi raisi U.U. Rozukulov zimmasiga yuklansin.

1. Vazirlar Mahkamasining “Qishloqni lizing shartlarida qishloq xoʻjaligi texnikasi bilan taʼminlash chora-tadbirlari toʻgʻrisida” 2000-yil 2-noyabrdagi 424-son qarorida (Oʻzbekiston Respublikasi QT, 2000-y., 11-son, 70-modda):

a) 2-bandga quyidagi tahrirdagi xatboshi qoʻshilsin:

“Jamgʻarma bilan tuzilgan har bir qarz shartnomasi boʻyicha ajratilgan mablagʻlarning hisobini oʻz vaqtida yuritish va ularni jadvalga asosan har chorakda qaytarish”;

b) 4-bandga quyidagi tahrirdagi xatboshi qoʻshilsin:

“Bunda, qishloq xoʻjaligi texnikasi ishlab chiqaruvchi mahalliy korxonalar va “Oʻzagrolizing” AJ texnika qiymatining 70 foizi miqdorida avans toʻlovlarini olganidan soʻng lizing oluvchilarga qishloq xoʻjaligi texnikasining uch oy muddatda yetkazib berilishini taʼminlaydilar”;

v) 5-bandning toʻrtinchi xatboshi quyidagi tahrirda bayon qilinsin:

“fermer xoʻjaliklari uchun lizing muddati — 10 yil, 2017-2018-yillarda Jizzax va Sirdaryo viloyatlari fermer xoʻjaliklari uchun — 12 yilgacha, 2017-2018-yillarda Jizzax va Sirdaryo viloyatlarining “Agroservis MTP” MChJlari uchun — 10 yilgacha, Qoraqalpogʻiston Respublikasi va Xorazm viloyati mashina-traktor parklari uchun — 10 yilgacha, qolgan lizing oluvchilar uchun – 7 yil”;

g) 1-ilovada:

3-banddagi “Jamgʻarma Oʻzbekiston Respublikasi Moliya vazirligi bilan birgalikda” soʻzlaridan keyin “har yili 1-noyabrgacha” soʻzlari qoʻshilsin;

4-banddagi “hisobga olgan holda” soʻzlaridan keyin “har yili 1-noyabrgacha” soʻzlari qoʻshilsin;

6-band quyidagi tahrirda bayon qilinsin:

“6. Buyurtmaga muvofiq “Oʻzagrolizing” AJ har yili 1-dekabrgacha keyingi yilda sotib olish maqsadida zamonaviy qishloq xoʻjaligi texnikasini yetkazib berishga, uning haqini toʻlash va yetkazib berish muddatlarini koʻrsatgan holda, ishlab chiqaruvchi korxonalar yoki ularning rasmiy distribyutorlari bilan oldi-sotdi shartnomalari tuzadi (shartnoma kompaniyasi)”;

9-bandning toʻrtinchi xatboshi quyidagi tahrirda bayon qilinsin:

“zamonaviy qishloq xoʻjaligi texnikasining qoplanmagan qiymatini, shuningdek lizing beruvchining daromad foizini lizing muddati mobaynida (fermer xoʻjaliklari — 10 yil, Jizzax va Sirdaryo viloyatlari fermer xoʻjaliklari 2017-2018-yillarda tuzilgan lizing shartnomalari boʻyicha — 12 yilgacha, Jizzax va Sirdaryo viloyatlarining “Agroservis MTP” MChJlari 2017-2018-yillarda tuzilgan lizing shartnomalari boʻyicha — 10 yilgacha, Qoraqalpogʻiston Respublikasi va Xorazm viloyatining mashina-traktor parklari — 10 yilgacha, qolgan lizing oluvchilar — 7 yil) “Oʻzagrolizing” AJga toʻlaydilar”.

2. Vazirlar Mahkamasining 2012-yil 14-iyuldagi 217-son qarori (Oʻzbekiston Respublikasi QT, 2012-y., 7-son, 55-modda) bilan tasdiqlangan Qishloq xoʻjaligi texnikasini xarid qilish uchun har yillik shartnoma kampaniyasini oʻtkazish tartibi toʻgʻrisidagi nizomda:

a) 4-banddagi “Oʻzbekiston Respublikasi Moliya vazirligi huzuridagi Qishloqni qishloq xoʻjaligi texnikasi bilan jihozlashni davlat tomonidan ragʻbatlantirish jamgʻarmasi” soʻzlari “Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasi” soʻzlari bilan almashtirilsin;

b) 8-banddagi “1-oktabrgacha” soʻzlari “1-dekabrgacha” soʻzlari bilan almashtirilsin;

v) 10-bandning ikkinchi xatboshidagi “Oʻzbekiston Respublikasi Moliya vazirligi huzuridagi Qishloqni qishloq xoʻjaligi texnikasi bilan jihozlashni davlat tomonidan ragʻbatlantirish jamgʻarmasi” soʻzlari “Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasi” soʻzlari bilan almashtirilsin;

g) Nizomning ilovasidagi “2-bosqich” pozitsiyasining “Muddatlar” ustuni blokidagi “1-oktabrgacha” soʻzlari “1-dekabrgacha” soʻzlari bilan almashtirilsin.