O‘zbekiston Respublikasi Prezidentining 2016-yil 9-fevraldagi PQ-2487-son “Sog‘lom ona va bola yili” Davlat dasturi to‘g‘risida”gi qaroriga asosan O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi, Mehnat vazirligi, Xalq ta’limi vazirligi qaror qiladi:

1. Yetim va ota-ona qaramog‘idan mahrum bo‘lgan, to‘liq davlat ta’minotida bo‘lmagan o‘rta maxsus va kasbiy ta’lim tashkilotlari bitiruvchilarini “Mahalla” xayriya jamoat fondi tomonidan tanlab olish hamda ularga nafaqa to‘lash tartibi to‘g‘risidagi nizom ilovaga muvofiq tasdiqlansin.

2. Mazkur qaror rasmiy e’lon qilingan kundan e’tiboran kuchga kiradi.

Mazkur Nizom yetim va ota-ona qaramog‘idan mahrum bo‘lgan, to‘liq davlat ta’minotida bo‘lmagan o‘rta maxsus va kasbiy ta’lim tashkilotlari (bundan buyon matnda ta’lim tashkiloti deb yuritiladi) bitiruvchilarini (bundan buyon matnda bitiruvchi deb yuritiladi) “Mahalla” xayriya jamoat fondi tomonidan tanlab olish hamda ularga nafaqa to‘lash tartibini belgilaydi.

1. Quyidagi toifadagi bitiruvchilar mazkur Nizomda belgilangan tartibda “Mahalla” xayriya jamoat fondi mablag‘lari hisobiga to‘lanadigan bazaviy hisoblash miqdorining yigirma baravari miqdorida bir yo‘la nafaqa (bundan buyon matnda nafaqa deb yuritiladi) olish uchun murojaat qilish huquqiga ega:

yetim bolalar — otasi ham, onasi ham vafot etgan yoki ular sud qaroriga binoan vafot etgan deb e’lon qilingan bolalar;

ota-ona qaramog‘idan mahrum bo‘lgan bolalar — ota-onasi ota-onalik huquqidan mahrum etilgan, ularning ota-onalik huquqi cheklangan, ular muomalaga layoqatsiz deb topilgan, kasal bo‘lgan, uzoq muddat bo‘lmagan, ota-ona bolalarni tarbiyalash yoki ularning huquq va manfaatlarini himoya qilishdan bo‘yin tovlagan, shu jumladan ota-ona tarbiya, davolash, aholini ijtimoiy himoyalash muassasalari va shunga o‘xshash boshqa muassasalardagi bolasini olishdan bosh tortgan, shuningdek boshqa sabablarga ko‘ra ota-ona qaramog‘idan mahrum bo‘lgan bolalar.

Bunda bitiruvchi ta’lim tashkilotida o‘qish davrida yetim bolalar va ota-ona qaramog‘idan mahrum bo‘lgan bolalar uchun mo‘ljallangan muassasalarga joylashtirilmagan va boshqa qonuniy vakillari — vasiysi, homiysi, tutingan ota-onasi (patronat) qaramog‘ida turgan bo‘lishi lozim.

2. Mazkur Nizom ta’lim tashkilotida o‘qish davrida to‘liq davlat ta’minotida bo‘lgan bolalarga nisbatan tatbiq etilmaydi.

3. Nafaqa bitta bitiruvchiga faqat bir marta, ya’ni ta’lim tashkilotini bitirib, ishga joylashganida beriladi.

4. “Mahalla” xayriya jamoat fondi 2015/2016 o‘quv yilidan boshlab muntazam ravishda bitiruvchilarga nafaqa to‘lash uchun mablag‘lar ajratishni rejalashtiradi. Nafaqa to‘lash uchun ajratiladigan mablag‘lar miqdori “Mahalla” xayriya jamoat fondining Vasiylik kengashi tomonidan tasdiqlanadi.

5. Bitiruvchi nafaqa olish uchun ta’lim tashkilotini bitirib, ishga joylashgandan keyin o‘zi tamomlagan ta’lim tashkiloti direktoriga nafaqa berilishini so‘rab ariza bilan murojaat qiladi. Arizaga quyidagi hujjatlar ilova qilinadi:

vasiy yoki homiy tayinlash haqida tuman (shahar) hokimi qarorining yoki bolani oilaga tarbiyaga olish (patronat) to‘g‘risidagi kelishuvning nusxasi;

yashash joyidagi fuqarolarning o‘zini o‘zi boshqarish organi tomonidan berilgan bitiruvchining oilaviy va mulkiy ahvoli haqida ma’lumotnoma.

Bunda, bitiruvchining tug‘ilganlik haqida guvohnomasi nusxasi, biometrik pasport yoki identifikatsiya ID-kartasi ma’lumotlari, mehnat daftarchasi nusxasi (mavjud bo‘lsa), soliq to‘lovchining identifikatsiya raqami (STIR), bitiruvchi yoki uning ota-onasida mulk huquqi asosida ko‘chmas mulk mavjudligi (mavjud emasligi) haqidagi Davlat kadastrlari palatasining Qoraqalpog‘iston Respublikasi, viloyatlar va Toshkent shahar boshqarmalari, tuman (shahar) filiallarining ma’lumotnomalari, bitiruvchining tibbiy-ijtimoiy ahvoli — nogironligi, uzoq muddat davolanishga muhtojligi yoki mehnatga vaqtincha layoqatsizligini tasdiqlovchi hujjatlar (mavjud bo‘lgan taqdirda) ta’lim tashkiloti tomonidan mas’ul davlat organlari va tashkilotlaridan “Elektron hukumat” tizimi idoralararo integratsiyalashuv platformasi orqali so‘rab olinadi.

6. Ta’lim tashkiloti direktori ariza va unga ilova qilingan hujjatlar, shuningdek ta’lim tashkiloti tomonidan so‘rab olingan mazkur Nizomning 5-bandi to‘rtinchi xatboshisida ko‘rsatilgan hujjatlarni bir ish kuni ichida kuzatuv xati bilan “Mahalla” xayriya jamoat fondining Qoraqalpog‘iston Respublikasi, viloyatlar va Toshkent shahar bo‘limiga (bundan buyon matnda “Mahalla” xayriya jamoat fondining hududiy bo‘limi deb yuritiladi) taqdim etadi.

7. Arizalarni ko‘rib chiqish uchun “Mahalla” xayriya jamoat fondining hududiy bo‘limi huzurida komissiya tashkil etiladi. Komissiya tarkibiga quyidagilar kiritiladi:

“Mahalla” xayriya jamoat fondining hududiy bo‘limi boshqaruvi raisi — komissiya raisi;

Qoraqalpog‘iston Respublikasi Kasbiy ta’lim agentligi, viloyatlar va Toshkent shahar kasbiy ta’lim boshqarmalari boshliqlari — komissiya a’zosi;

Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahri kambag‘allikni qisqartirish va bandlik boshqarmasi boshlig‘i — komissiya a’zosi;

“Mahalla” xayriya jamoat fondining hududiy bo‘limi boshqaruvining ijtimoiy himoya masalalari bo‘yicha yetakchi mutaxassisi — komissiya mas’ul kotibi.

Komissiya ishiga zaruratga qarab ta’lim tashkiloti direktorlari, vasiylik va homiylik organlari, “Mahalla” xayriya jamoat fondining tuman (shahar) bo‘linmasi boshqaruvi raislari ham ovoz berish huquqisiz jalb etilishi mumkin.

8. Arizalar komissiyaning navbatdagi majlisida ko‘rib chiqiladi. Komissiya majlislari komissiya raisi tomonidan zaruratga qarab, lekin har chorakda kamida bir marta chaqiriladi.

Komissiya majlisida komissiya a’zolarining barchasi ishtirok etishi shart.

9. Arizalarni ko‘rib chiqishda komissiya ta’lim tashkiloti tomonidan taqdim etilgan hujjatlar asosida quyidagi masalalarni o‘rganadi:

bitiruvchining ota-ona qarovisiz qolishiga asos bo‘lgan holatlar (ota-onasi vafot etgan, bedarak yo‘qolgan, ota-onalik huquqidan mahrum etilgan, uzoq muddat ishlash, o‘qish yoki boshqa maqsadlarda ketgan, ozodlikdan mahrum etilgan va h. k.);

bitiruvchining oilaviy va mulkiy ahvoli, turar joy bilan ta’minlanganlik darajasi;

bitiruvchining tibbiy-ijtimoiy ahvoli (nogironligi, uzoq muddat davolanishga muhtojligi yoki vaqtincha mehnatga layoqatsizligi).

10. Komissiya tomonidan mazkur Nizomning 9-bandida ko‘rsatilgan holatlarni o‘rganish natijasida quyidagi omillar yoki ulardan biri aniqlangan taqdirda, bitiruvchi nafaqa olishga muhtoj deb topiladi:

a) bitiruvchining ota-ona qarovisiz qolishiga asos bo‘lgan holatlarda (otasi ham, onasi ham vafot etgan yoki ular sud qaroriga binoan vafot etgan deb e’lon qilingan, ota-onasi ota-onalik huquqidan mahrum etilgan, ularning ota-onalik huquqi cheklangan, ular muomalaga layoqatsiz deb topilgan, kasal bo‘lgan, uzoq muddat bo‘lmagan, ota-ona bolalarni tarbiyalash yoki ularning huquq va manfaatlarini himoya qilishdan bo‘yin tovlagan, shu jumladan ota-ona tarbiya, davolash, aholini ijtimoiy himoyalash muassasalari va shunga o‘xshash boshqa muassasalardagi bolasini olishdan bosh tortgan, shuningdek boshqa sabablarga ko‘ra ota-ona qaramog‘idan mahrum bo‘lganda);

b) bitiruvchi turar joy bilan ta’minlanmaganda;

d) bitiruvchining tibbiy-ijtimoiy ahvoli og‘ir bo‘lganda (nogironligi, uzoq muddat davolanishga muhtojligi yoki vaqtincha mehnatga layoqatsizligi mavjud bo‘lganda).

11. Komissiya qarorlari komissiya a’zolaridan kamida uchtasining ovozi bilan qabul qilinadi. Komissiya qarori komissiya majlisi bayoni shaklida rasmiylashtiriladi va uning barcha a’zolari tomonidan imzolanadi.

12. Komissiya qaroriga ko‘ra nafaqa olishga muhtoj deb topilgan bitiruvchilar ro‘yxati uch ish kuni ichida tasdiqlash uchun bitiruvchining yashash joyidagi tuman (shahar) hokimligiga yuboriladi.

13. Nafaqa olishga muhtoj deb topilgan bitiruvchilar ro‘yxati besh ish kuni ichida vasiylik va homiylik organlari tomonidan ko‘rib chiqilib, tuman (shahar) hokimining qarori bilan tasdiqlanadi va “Mahalla” xayriya jamoat fondining hududiy bo‘limiga taqdim etiladi. “Mahalla” xayriya jamoat fondining hududiy bo‘limi ikki ish kuni ichida bitiruvchilarni ro‘yxatga kiritilganligi haqida xabardor qiladi.

14. Nafaqa bitiruvchiga xizmat ko‘rsatuvchi tijorat bankda ochilgan omonat (depozit) hisobvarag‘iga yoki bank plastik kartasiga “Mahalla” xayriya jamoat fondining hududiy bo‘limi tomonidan o‘tkazib beriladi.

15. Pul mablag‘lari bitiruvchi “Mahalla” xayriya jamoat fondining hududiy bo‘limiga o‘zining bank ma’lumotlarini taqdim etgan kundan boshlab ikki ish kuni ichida o‘tkazib beriladi.

16. Nafaqa summasi pul mablag‘i o‘tkazib berilayotgan kundagi bazaviy hisoblash miqdoridan kelib chiqib hisoblanadi.

Bitiruvchining so‘roviga ko‘ra “Mahalla” xayriya jamoat fondining hududiy bo‘limi tomonidan tegishli to‘lov topshiriqnomasining nusxasi taqdim etiladi.

17. Mazkur Nizom talablarining buzilishida aybdor bo‘lgan shaxslar qonunchilik hujjatlarida belgilangan tartibda javobgar bo‘ladi.

18. Ta’lim tashkiloti direktori Nizomning 5-bandida ko‘rsatilgan hujjatlarning haqiqiyligi uchun mas’ul hisoblanadi.

19. Komissiya raisi va a’zolari hujjatlarni ko‘rib chiqishning xolis bo‘lishi uchun mas’ul hisoblanadi.

20. Vasiylik va homiylik organlari hamda tuman (shahar) hokimi nafaqa tayinlanadigan bitiruvchining ta’lim tashkilotida o‘qish davrida to‘liq davlat ta’minotida bo‘lmaganligini, xususan yetim bolalar va ota-ona qaramog‘idan mahrum bo‘lgan bolalar uchun mo‘ljallangan muassasalarga joylashtirilmaganligi va boshqa qonuniy vakillari — vasiysi, homiysi, tutingan ota-onasi (patronat) qaramog‘ida turganligini tasdiqlash uchun mas’ul hisoblanadi.

21. “Mahalla” xayriya jamoat fondining hududiy bo‘limi pul mablag‘larining o‘z vaqtida va to‘liq o‘tkazilishi uchun mas’ul hisoblanadi.

22. Ta’lim tashkiloti direktori, komissiya, vasiylik va homiylik organlari hamda tuman (shahar) hokimining xatti-harakatlaridan (qarorlaridan) norozi bo‘lgan shaxslar qonunchilikda belgilangan tartibda yuqori turuvchi organga (mansabdor shaxsga) yoki sudga shikoyat qilishga haqli.

23. Mazkur Nizom “Mahalla” xayriya jamoat fondi bilan kelishilgan.