Safarbarlik chaqiruvi rezervidagi xizmatga olingan shaxslarning harbiy hisobini yuritish boʻyicha mudofaa ishlari organlarining faoliyatini taʼminlash maqsadida Vazirlar Mahkamasi qaror qiladi:

1. Vazirlar Mahkamasining “Oʻzbekiston Respublikasi fuqarolarining safarbarlik chaqiruvi rezervidagi xizmatini tashkil etish chora-tadbirlari toʻgʻrisida” 2003-yil 22-fevraldagi 99-son qaroriga (Oʻzbekiston Respublikasi QT, 2003-y., 2-son, 17-modda) ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Mudofaa vazirligiga Oʻzbekiston Respublikasi Moliya vazirligining “Safarbarlik chaqiruvi rezervi mablagʻlari” Maxsus hisob raqamidagi mablagʻlar hisobidan safarbarlik chaqiruvi rezervi xizmatchilarining hisobini yuritish boʻyicha qoʻshimcha xodimlar soniga har yili ish haqi toʻlash huquqi berilsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. 2-bandda:

toʻrtinchi xatboshi quyidagi tahrirdagi uchta xatboshi sifatida bayon qilinsin:

“harbiy yigʻinlardan oʻtish davrida, ularni oʻtkazish joyiga borish va qaytishga ketadigan vaqtni qoʻshib hisoblaganda, safarbarlik chaqiruvi rezervi xizmatchilarining ish joylarida ularning ish oʻrni (lavozimi) saqlab turiladi. Harbiy yigʻinlarga yuborilganlik haqidagi maʼlumotnoma olingan kundan boshlab harbiy yigʻinlardan qaytgunga qadar boʻlgan davrda koʻrsatib oʻtilgan shaxslar bilan tuzilgan mehnat shartnomasi ish beruvchining tashabbusi bilan bekor qilinishi mumkin emas, korxonaning tugatilishi holatlaridan tashqari. Agar safarbarlik chaqiruvi rezervi xizmatchisi harbiy yigʻinlar vaqtida kasallanib qolgan boʻlib, ular tugagandan keyin ham tuzalmayotgan boʻlsa uning ish oʻrni (lavozimi) saqlab turiladi, harbiy yigʻinlar tugagan kundan boshlab esa qonun hujjatlariga muvofiq vaqtinchalik ishga yaroqsizligi boʻyicha nafaqa toʻlanadi;

safarbarlik chaqiruvi rezervidagi xizmat safiga olingan shaxslar tomonidan toʻlanadigan mablagʻlar Moliya vazirligining ochiladigan “Safarbarlik chaqiruvi rezervi mablagʻlari Maxsus hisob raqamida (keyingi oʻrinlarda Maxsus hisob raqami deb ataladi) jamlanadi hamda muddatli xizmat harbiy xizmatchilarining pul taʼminotini oshirishga, ularning yashash sharoitlarini yaxshilashga, safarbarlik chaqiruvi rezervi xizmatchilarining hisobini yurituvchi xodimlarning mudofaa ishlari organlaridagi taʼminotiga, shuningdek safarbarlik chaqiruvi rezervi safiga olingan shaxslar bilan harbiy yigʻinlar oʻtkazishga yoʻnaltiriladi;

mudofaa ishlari organlaridagi safarbarlik chaqiruvi rezervi xizmatchilarining hisobini yurituvchi qoʻshimcha xodimlar soni har yili Maxsus hisob raqamining balansi tasdiqlanayotganda belgilanadi. Bunda yangi moliya yilida Maxsus hisob raqamining balansi tasdiqlangunga qadar ularga ish haqi toʻlash oʻtgan moliya yilida belgilangan xodimlar soni doirasida amalga oshiriladi”;

beshinchi — sakkizinchi xatboshilar tegishli ravishda yettinchi — oʻninchi xatboshilar deb hisoblansin.

2. 4-bandda:

a) toʻrtinchi xatboshidagi “15-dekabrgacha” soʻzlari “15-martgacha” soʻzlari bilan almashtirilsin;

b) quyidagi mazmundagi beshinchi va oltinchi xatboshilar qoʻshilsin:

“har yili Maxsus hisob raqamining balansi tasdiqlangunga qadar kelgusi moliya yilining 25-dekabrigacha Maxsus hisob raqami mablagʻlaridan toʻlanadigan xarajatlarning vaqtinchalik smetalarini roʻyxatga olish nazarda tutilsin;

har yili Maxsus hisob raqami balansini tasdiqlash vaqtida Mudofaa vazirligining asoslangan hisob-kitoblari boʻyicha Maxsus hisob raqamidagi mablagʻlar hisobidan mudofaa ishlari organlaridagi safarbarlik chaqiruvi rezervi xizmatchilarining hisobini yurituvchi qoʻshimcha xodimlar soniga ish haqi toʻlash nazarda tutilsin”;

v) beshinchi xatboshi yettinchi xatboshi deb hisoblansin.

3. 1-ilovada:

a) 2-bandning ikkinchi xatboshidagi ikkinchi jumla quyidagi tahrirda bayon qilinsin:

“Bunda shartnomada koʻrsatilgan pul badalining miqdori oʻzgartirilmaydi”;

b) 9-banddagi ikkinchi xatboshi chiqarib tashlansin;

v) quyidagi mazmundagi 9¹, 9² va 9³-bandlar qoʻshilsin:

“9¹. Pul badallarini toʻlagan, biroq harbiy yigʻinlardan oʻtmagan safarbarlik chaqiruvi rezervi xizmatchisining toʻlagan pul badallari belgilangan tartibda quyidagi holatlarda qaytarib beriladi:

safarbarlik chaqiruvi rezervi xizmatchisi harbiy xizmatga yaroqsiz deb eʼtirof etilganda;

unga tibbiy-mehnat ekspertiza komissiyasi (TMEK) tomonidan I yoki II guruh nogironligi berilganda.

Safarbarlik chaqiruvi rezervi xizmatchisi vafot etgan taqdirda toʻlangan pul badallari uning yaqin qarindoshiga, merosxoʻriga, vasiysiga yoki homiysiga qaytariladi.

Ortiqcha toʻlangan, shuningdek Maxsus hisob raqamiga yanglish oʻtkazilgan pul badallari mazkur Nizomning 9² va 9³-bandlarida belgilangan tartibda qaytariladi.

Boshqa holatlarda Maxsus hisob raqamiga oʻtkazilgan pul badallari qaytarib berilmaydi.

9². TMEK tomonidan I yoki II guruh nogironi (layoqatsiz) deb topilgan safarbarlik chaqiruvi rezervi xizmatchisi yoki belgilangan tartibda berilgan ishonchnoma asosida uning nomidan ish koʻrayotgan safarbarlik chaqiruvi rezervi xizmatchisining layoqatsiz deb topilgan ishonchli vakili yoki vafot etgan (halok boʻlgan) safarbarlik chaqiruvi rezervi xizmatchisining yaqin qarindoshi (merosxoʻri, vasiysi yoki homiysi) TMEK xulosasining (oʻlganlik toʻgʻrisidagi guvohnomaning) nusxasi, Maxsus hisob raqamiga badallar oʻtkazish tartibi toʻgʻrisidagi tomonlarning imzolari qoʻyilgan shartnomaning, shuningdek yaqin qarindoshlik aloqalarini (merosxoʻrlik huquqini, vasiylikni yoki homiylikni) tasdiqlovchi tegishli hujjatlarning nusxalarini ilova qilgan holda (harbiy hisobga qoʻyilgan joyidagi) mudofaa ishlari boʻlimi boshligʻining nomiga toʻlangan pul badallarini qaytarish haqida (toʻlangan pul summasini koʻrsatgan holda) ariza beradi.

Maxsus hisob raqamiga pul badallarini toʻlagan safarbarlik chaqiruvi rezervi xizmatchisi toʻlangan pul badallari toʻgʻrisidagi kvitansiyalarning (toʻlov topshiriqnomasining) nusxalarini ilova qilgan holda (harbiy hisobga qoʻyilgan joyidagi) mudofaa ishlari boʻlimi boshligʻining nomiga ortiqcha toʻlangan pul badallarini qaytarish haqida (toʻlangan va ortiqcha toʻlangan pul summasini koʻrsatgan holda) ariza beradi.

Mudofaa ishlari boʻlimi toʻlangan pul badallarini qaytarish haqida berilgan arizani koʻrib chiqadi va arizada koʻrsatilgan pul summasini hisob maʼlumotlari bilan taqqoslaydi (arizada koʻrsatilgan pul summasi bilan hisob maʼlumotlari oʻrtasida tafovut mavjud boʻlgan hollarda mudofaa ishlari boʻlimi aniqlangan tafovut haqida ariza bergan shaxsni xabardor qiladi).

Arizada koʻrsatilgan pul summasini taqqoslab koʻrgandan soʻng mudofaa ishlari boʻlimi taqdim etilgan hujjatlarni uch ish kuni mobaynida mudofaa ishlari boshqarmasiga yuboradi.

Mudofaa ishlari boshqarmasi mudofaa ishlari boʻlimi taqdim etgan hujjatlarni koʻrib chiqqandan soʻng uch ish kuni mobaynida Oʻzbekiston Respublikasi Mudofaa vazirligiga toʻlangan pul badallarini qaytarish haqida iltimosnoma yuboradi.

Mudofaa vazirligi mudofaa ishlari boshqarmasi taqdim etgan hujjatlarni koʻrib chiqqandan soʻng uch ish kuni mobaynida Moliya vazirligiga tranzit hisob raqamiga toʻlangan pul badallarini qaytarish haqida xat yuboradi.

Moliya vazirligi Mudofaa vazirligi tomonidan taqdim etilgan hujjatlarni koʻrib chiqqandan soʻng uch kun muddatda arizada koʻrsatilgan pul summasini, toʻlov taqdimnomasining “Toʻlov tafsilotlari” satrida Mudofaa vazirligidan yuborilgan xatning sanasi va raqamini, tuzilgan shartnomaning raqamini, pul mablagʻlarini oluvchining familiyasi, ismi va otasining ismini koʻrsatgan holda Maxsus hisob raqamidagi pul mablagʻlarini saqlash uchun Mudofaa vazirligining depozit hisob raqamiga qaytaradi.

Mudofaa vazirligi arizada koʻrsatilgan pul mablagʻlari Moliya vazirligidan Maxsus hisob raqamiga kelib tushgandan soʻng ularni mansubligiga koʻra harbiy okrugning tegishli moliya xizmatiga yuboradi.

Harbiy okrugning moliya xizmati, Mudofaa vazirligidan Maxsus hisob raqamiga pul mablagʻlari kelib tushgandan soʻng, ularni mansubligiga koʻra tegishli mudofaa ishlari boshqarmasiga yuboradi.

Mudofaa ishlari boshqarmasi, harbiy okrugning moliya xizmatidan Maxsus hisob raqamiga pul mablagʻlari kelib tushgandan soʻng, ularni mansubligiga koʻra tegishli mudofaa ishlari boʻlimiga yuboradi.

Mudofaa ishlari boʻlimi, mudofaa ishlari boshqarmasidan Maxsus hisob raqamiga pul mablagʻlari kelib tushgandan soʻng uch kun muddatda:

ariza bergan shaxsga pul mablagʻlarini naqd pulda toʻlaydi yoki (ariza beruvchining roziligi bilan) plastik kartochkaga oʻtkazib beradi — pul badallari naqd pulda toʻlangan taqdirda;

pul mablagʻlarini ariza bergan shaxsning hisob raqamiga oʻtkazadi — pul badallari Maxsus hisob raqamiga jismoniy (yuridik) shaxslar tomonidan oʻtkazilgan taqdirda.

Mudofaa ishlari boʻlimi, uch ish kuni mobaynida, kvitansiyaning (toʻlov topshiriqnomasining) raqami va sanasini koʻrsatgan holda pul badallarining ariza bergan shaxsga toʻlanganligi (oʻtkazilganligi) haqida belgilangan tartibda mudofaa ishlari boshqarmasiga xabar qiladi hamda hisob maʼlumotlariga tegishli oʻzgartirishlar kiritadi.

9³. Maxsus hisob raqamiga pul mablagʻlarini yanglishib oʻtkazgan jismoniy (yuridik) shaxs, oʻtkazilgan pul mablagʻlari toʻgʻrisidagi kvitansiyani (toʻlov topshiriqnomasini) ilova qilgan holda, yanglishib oʻtkazgan pul mablagʻlarini qaytarish haqida (toʻlangan pul summasini koʻrsatib) tegishli mudofaa ishlari boʻlim boshligʻi nomiga ariza beradi.

Mudofaa ishlari boʻlimi yanglishib oʻtkazilgan pul mablagʻlarini qaytarish haqida berilgan arizani koʻrib chiqadi va arizada koʻrsatilgan pul summasini hisob maʼlumotlari bilan taqqoslab koʻradi (arizada koʻrsatilgan pul summasi bilan hisob maʼlumotlarining oʻrtasida tafovut mavjud boʻlgan hollarda mudofaa ishlari boʻlimi aniqlangan tafovut haqida ariza bergan shaxsga xabar qiladi).

Mudofaa ishlari boʻlimi, arizada koʻrsatilgan pul summasini taqqoslab koʻrgandan soʻng, uch ish kuni mobaynida mudofaa ishlari boshqarmasiga taqdim etilgan hujjatlarni yuboradi.

Mudofaa ishlari boshqarmasi, mudofaa ishlari boʻlimi tomonidan taqdim etilgan hujjatlarni koʻrib chiqib, uch ish kuni mobaynida yanglishib oʻtkazilgan pul mablagʻlarini qaytarish toʻgʻrisidagi iltimosnomani Oʻzbekiston Respublikasi Mudofaa vazirligiga yuboradi.

Mudofaa vazirligi, mudofaa ishlari boshqarmasi tomonidan taqdim etilgan hujjatlarni koʻrib chiqib, uch ish kuni mobaynida Moliya vazirligiga tranzit hisob raqamiga yanglishib oʻtkazilgan pul mablagʻlarini qaytarish haqida xat yuboradi.

Moliya vazirligi, Mudofaa vazirligi taqdim etgan hujjatlarni koʻrib chiqib, uch kun mobaynida arizada koʻrsatilgan pul summasini, toʻlov taqdimnomasining “Toʻlov tafsilotlari” satrida Mudofaa vazirligidan yuborilgan xatning raqami va sanasini, pul mablagʻlarini oluvchi jismoniy shaxsning familiyasi, ismi va otasining ismini (yoki yuridik shaxsning nomini) koʻrsatgan holda pul mablagʻlarini tranzit hisob raqamiga yanglishib oʻtkazilgan Xalq banki tegishli filialining alohida maxsus hisob raqamiga qaytaradi.

Xalq bankining tegishli filiali yanglishib oʻtkazilgan pul mablagʻlarini Moliya vazirligidan alohida maxsus hisob raqamiga qabul qilib:

pul mablagʻlari naqd pul bilan toʻlanganda — ularni ariza bergan shaxsga naqd pul mablagʻlari bilan toʻlaydi yoki (ariza bergan shaxsning roziligi bilan) plastik kartochkasiga oʻtkazadi;

pul mablagʻi jismoniy (yuridik) shaxslar tomonidan oʻtkazilganda — pul mablagʻlarini ariza bergan shaxsning bankdagi hisob raqamiga oʻtkazadi.”.

4. 2-ilovaning 13-bandi birinchi xatboshidagi “15-dekabrgacha” soʻzlari “15-martgacha” soʻzlari bilan almashtirilsin.

5. 3-ilovada:

a) 2.4-band quyidagi tahrirda bayon qilinsin:

“2.4. Badal summasi shartnoma imzolangan kunda Oʻzbekiston Respublikasida belgilangan eng kam oylik ish haqi miqdori asosida belgilanadi”;

b) 5.1-bandda:

“toʻrt” soʻzi “uch” soʻzi bilan almashtirilsin;

ikkinchi jumla chiqarib tashlansin;

v) 5.2-banddagi “notarial tasdiqlangan” soʻzlari “taraflar imzolagan” soʻzlari bilan almashtirilsin.