Oʻzbekiston Respublikasi Vazirlar Mahkamasining 2007-yil 24-avgustdagi 182-son “Davlat va xoʻjalik boshqaruvi organlari, mahalliy davlat hokimiyati organlari, davlat korxonalari, muassasalari va tashkilotlari faoliyatini huquqiy taʼminlash darajasini yanada oshirish chora-tadbirlari toʻgʻrisida”gi hamda 2015-yil 4-iyundagi 149-son “Davlat va xoʻjalik boshqaruvi organlari, mahalliy davlat hokimiyati organlari yuridik xizmatlari faoliyatining yanada takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida”gi qarorlariga muvofiq buyuraman:

1. Davlat va xoʻjalik boshqaruvi organlari, mahalliy davlat hokimiyati organlari hamda boshqa davlat tashkilotlari yuridik xizmatlari xodimlarining adliya organlarida stajirovka oʻtash tartibi toʻgʻrisidagi nizom ilovaga muvofiq tasdiqlansin.

2. Mazkur buyruq davlat roʻyxatidan oʻtkazilsin va bu haqda Idoraviy normativ-huquqiy hujjatlarni davlat roʻyxatidan oʻtkazish boshqarmasi (O. Hakimov) Idoraviy normativ-huquqiy hujjatlarning davlat reyestriga tegishli yozuv kiritsin.

3. Qonun hujjatlarini turkumlash va huquqiy axborot boshqarmasi (D. Ibragimova) mazkur idoraviy normativ-huquqiy hujjatni “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Tashkiliy-nazorat va tahlil boshqarmasi (M. Ishbekov) mazkur idoraviy normativ-huquqiy hujjatni barcha manfaatdor shaxslarga yetkazilishini taʼminlasin.

5. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Vazirlar Mahkamasining 2007-yil 24-avgustdagi 182-son “Davlat va xoʻjalik boshqaruvi organlari, mahalliy davlat hokimiyati organlari, davlat korxonalari, muassasalari va tashkilotlari faoliyatini huquqiy taʼminlash darajasini yanada oshirish chora-tadbirlari toʻgʻrisida”gi hamda 2015-yil 4-iyundagi 149-son “Davlat va xoʻjalik boshqaruvi organlari, mahalliy davlat hokimiyati organlari yuridik xizmatlari faoliyatining yanada takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida”gi qarorlariga muvofiq davlat va xoʻjalik boshqaruvi organlari, mahalliy davlat hokimiyati organlari hamda boshqa davlat tashkilotlari (bunday buyon matnda tashkilot deb yuritiladi) yuridik xizmatlari xodimlarining adliya organlarida stajirovka oʻtash tartibini belgilaydi.

1. Mazkur Nizomda quyidagi tushunchalardan foydalaniladi:

adliya organlari — Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari;

stajirovka — amaliy va nazariy tayyorgarlik natijasida olingan kasbiy bilim, oʻquv va amaliy koʻnikmalarni mustahkamlash va shakllantirishga, shuningdek ishning oʻziga xosligi, tayinlanayotgan lavozim boʻyicha funksional vazifalarni bajarish, kasbiy yoʻnaltirish uchun ilgʻor tajribani oʻrganishga yoʻnaltirilgan malaka oshirish shakllaridan biri;

stajirovka oʻtaydigan shaxs (stajor) — yuridik xizmat xodimi lavozimiga birinchi marta tayinlangan shaxslar.

2. Stajirovka yuridik xizmat xodimi lavozimiga birinchi marta tayinlangan shaxslarning kasbiy bilimlari, oʻquv va amaliy koʻnikmalarini mustahkamlash va shakllantirish, shuningdek ishning oʻziga xosligi, tayinlanayotgan lavozimi boʻyicha funksional vazifalarini sifatli bajarishi uchun ilgʻor tajribani egallab olishini taʼminlash maqsadida oʻtaladi.

3. Yuridik xizmat xodimi lavozimiga birinchi marta tayinlangan shaxs adliya organlarida stajirovka oʻtaydi. Bunda:

davlat va xoʻjalik boshqaruvi organlari markaziy apparatlari, shuningdek Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari yuridik xizmati xodimi lavozimiga birinchi marta tayinlangan shaxs stajirovkani Oʻzbekiston Respublikasi Adliya vazirligida;

davlat boshqaruvi organlari hududiy boʻlinmalarining, tumanlar va shaharlar hokimliklari hamda boshqa davlat tashkilotlarining yuridik xizmati xodimi lavozimiga birinchi marta tayinlangan shaxs stajirovkani tegishlicha Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalarida oʻtaydi.

4. Tashkilot rahbari yuridik xizmat xodimi lavozimiga birinchi marta tayinlangan shaxsni stajirovkadan oʻtkazishni soʻrab u lavozimga tayinlagan kundan eʼtiboran oʻn kun ichida tegishli adliya organiga murojaat etishi lozim.

Adliya organi murojaat kelib tushgandan soʻng uni koʻrib chiqib, ikki oy ichida stajirovka oʻtashni tashkil qilishi va uni oʻtash boʻyicha aniq muddatni koʻrsatgan holda tashkilot rahbarini stajirovka boshlanishidan kamida bir hafta oldin yozma ravishda xabardor qilishi kerak.

5. Stajorni belgilangan muddatda stajirovka oʻtash uchun yuborish majburiyati tashkilot rahbari zimmasiga yuklatiladi.

6. Stajirovka oʻtashni tashkil qilish adliya organlarining yuridik xizmatlar faoliyatini muvofiqlashtirishga masʼul tarkibiy boʻlinmasi (bundan buyon matnda masʼul boʻlinma deb yuritiladi) zimmasiga yuklatiladi.

7. Stajorga metodik yordam koʻrsatish hamda uning amaliy koʻnikmalarini shakllantirish uchun adliya organlarining malakali va tajribali mutaxassislari orasidan stajirovka rahbari tayinlanadi.

Stajirovka rahbari etib stajorga yaqin qarindosh hisoblangan shaxslar tayinlanishiga yoʻl qoʻyilmaydi.

8. Stajirovka rahbari kamida ikki yillik ish stajiga ega boʻlishi kerak.

9. Stajirovka rahbari tomonidan masʼul boʻlinmaning funksional vazifalaridan kelib chiqib, har bir stajor uchun u tomondan bajariladigan ishlar mazmuni va muddati koʻrsatilgan stajirovka oʻtash rejasi ishlab chiqiladi.

Stajirovka oʻtash rejasi masʼul boʻlinma rahbari tomonidan tasdiqlanadi.

10. Stajirovka oʻtash rejasida stajor tomonidan yuridik xizmat xodimining funksional vazifalari va ularni bajarishda bilishi lozim boʻlgan normativ-huquqiy hujjatlar roʻyxati, norma ijodkorligi va huquqni qoʻllash amaliyoti, normativ-huquqiy hujjatlarning turkumlashtirilgan hisobini yuritish, shartnomaviy-huquqiy va daʼvo ishlarni yuritish, jismoniy va yuridik shaxslarning murojaatlarini koʻrib chiqish, shuningdek mamlakatda amalga oshirilayotgan siyosiy, ijtimoiy-iqtisodiy islohotlarning mazmun-mohiyatini oʻrganish bilan bogʻliq tadbirlar belgilanishi lozim.

11. Stajirovka oʻtash muddati ikki haftani tashkil etadi.

12. Stajirovkani oʻtashdan ozod qilishga yoʻl qoʻyilmaydi.

13. Stajirovkani oʻtashning birinchi kunida stajirovka rahbari stajorni stajirovka oʻtash rejasi, stajirovka oʻtash muddatlari, ichki mehnat tartib va kasb etikasi hamda texnika va yongʻin xavfsizligi qoidalari, shuningdek ish rejimining xususiyatlari bilan tanishtiradi hamda stajorga stajirovkani oʻtashi uchun zarur sharoitlar yaratadi.

14. Stajirovka rahbari stajirovka davomida:

stajorga stajirovka oʻtash rejasida belgilangan tadbirlarni bajarish bilan bogʻliq materiallardan foydalanish imkoniyatini taʼminlaydi;

stajorning kasbiy bilimi va amaliy koʻnikmalarini shakllantirish uchun unga tegishli tavsiyalar beradi;

stajirovka oʻtash rejasida belgilangan tadbirlarning bajarilishi va sifatini muntazam ravishda nazorat qilib boradi;

stajorning ish vaqtidan samarali foydalanishini taʼminlaydi.

15. Stajor stajirovka oʻtash davomida:

stajirovka boʻyicha uslubiy va koʻrsatma materiallar bilan tanishishi;

stajirovkani tashkil etish va oʻtashni nazorat qilish bilan bogʻliq tadbirlarda ishtirok etishi;

stajirovka oʻtash rejasida nazarda tutilgan barcha tadbirlarni stajirovka uchun belgilangan muddat ichida, toʻliq hajmda va sifatli bajarishi;

keyingi amaliy faoliyatda foydalanilishi mumkin boʻlgan hujjatlar namunalari va boshqa muhim materiallar toʻplamini yuritishi;

stajirovkani oʻtash yakunlari boʻyicha hisobot tayyorlashi;

adliya organlarida oʻrnatilgan tartib qoidalarga rioya qilishi shart.

16. Stajor stajirovka oʻtash rejasida belgilangan tadbirlarni bajarib boʻlgach, u boʻyicha yozma hisobot tayyorlaydi. Hisobot stajor tomonidan imzolanadi hamda stajirovka rahbari tomonidan qabul qilinadi va tasdiqlanadi.

17. Stajirovka rahbari tomonidan hisobotni qabul qilishda stajorning kasbiy bilim va amaliy koʻnikmalarni qanchalik oʻzlashtirganligini baholash uchun u bilan masʼul boʻlinma xodimlari ishtirokida suhbat oʻtkaziladi va uning hisoboti muhokama qilinadi. Muhokama jarayonida stajorga zimmasiga yuklatilgan uning kasbi bilan bogʻliq vazifalarni amaliyotda qoʻllashga doir tavsiyalar beriladi.

Muhokama natijasi masʼul boʻlinma tomonidan rasmiylashtiriladigan bayonnomada aks ettiriladi.

18. Stajirovka muddati tugaganidan keyin stajirovka rahbari tomonidan stajorga nisbatan tavsifnoma tuziladi va unda stajorning stajirovka oʻtash rejasida nazarda tutilgan tadbirlarni qanchalik oʻzlashtirganligi, tartib-intizomi, stajirovka davomida u tomonidan egallab olingan kasbiy bilim va amaliy koʻnikmalar aks ettirilgan boʻlishi kerak.

Stajorning adliya organida belgilangan tartib qoidalarga rioya qilmaganligi, stajirovka oʻtash rejasida koʻrsatilgan tadbirlarni toʻliq bajarmaganligi, stajirovkaga uzrsiz sabablarga koʻra kelmaganligi ham tavsifnomada aks ettiriladi.

19. Tavsifnoma masʼul boʻlinma rahbari tomonidan imzolanadi va adliya organining yoʻllanma xati orqali stajorni yuborgan tashkilotga joʻnatiladi.

20. Adliya organlari masʼul boʻlinmasi xodimlari tomonidan stajorga stajirovka oʻtash rejasi bilan bogʻliq boʻlmagan vazifa va topshiriqlar berilishi taqiqlanadi.

21. Stajirovka oʻtagan shaxslarning hisobi masʼul boʻlinma tomonidan yuritiladi va stajirovka oʻtash bilan bogʻliq barcha hujjatlar ushbu boʻlinmada saqlanadi.