Oʻzbekiston Respublikasi Vazirlar Mahkamasining 2011-yil 19-avgustdagi 236-son “Toshkent shahridagi Xalqaro Vestminster universitetining oʻquv-sport bazasini yanada mustahkamlash chora-tadbirlari toʻgʻrisida”gi qaroriga muvofiq, shuningdek, “Foton” AJ, “Oʻzeltexsanoat” uyushmasi tarkibidagi “Foton” tajriba-konstruktorlik byurosi (TKB) va “Kvark” ilmiy-ishlab chiqarish korxonasi (IICHK) davlat unitar korxonalarining asosiy fondlaridan samarali foydalanish, ishlab chiqarish quvvatlarini modernizatsiya qilish va texnik jihatdan qayta jihozlashni optimallashtirish maqsadida, Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi, “Oʻzeltexsanoat” uyushmasi hamda Toshkent shahar hokimligining “Foton” TKB va “Kvark” IICHK davlat unitar korxonalarini “Foton” AJ tarkibiga qoʻshish, shundan soʻng “Foton” AJni Toshkent shahri, I. Usmonov koʻchasi, 71-uyda joylashgan “Algoritm” AJning 2-sonli ishlab chiqarish va maʼmuriy binosi hamda unga tutash hududga koʻchirish toʻgʻrisidagi taklifiga rozilik berilsin.

2. Oʻzbekiston Respublikasi Davlat mulki qoʻmitasi, “Oʻzeltexsanoat” uyushmasi:

a) Toshkent shahar hokimligi bilan birgalikda ikki oy muddatda baholovchi tashkilot tomonidan belgilanadigan qiymatda “Foton” AJ ustav fondidagi davlat ulushini 51 foizdan kam boʻlmagan miqdorda saqlab qolgan holda, uning ustav fondiga “Foton” tajriba-konstruktorlik byurosi va “Kvark” ilmiy-ishlab chiqarish korxonasi davlat unitar korxonalarining mulkini, “Foton” AJ balansida boʻlgan davlat ijtimoiy infratuzilma obyektlarini, shuningdek “Algoritm” AJdan oʻtkazilayotgan ishlab chiqarish va maʼmuriy binosini oʻtkazilishini taʼminlasin.

b) manfaatdor vazirlik va idoralar bilan birgalikda belgilangan tartibda bir oy muddatda:

“Foton” AJ, “Foton” TKB va “Kvark” IICHK davlat unitar korxonalarining mulkini inventarizatsiya qilsin;

maʼnan eskirgan va keyingi ishlab chiqarish jarayonlarida talab qilinmaydigan uskunalar, mashinalar va mexanizmlarni belgilangan tartibda sotish, hisobdan chiqarish yoki utilizatsiya qilish choralarini koʻrsin.

3. Ushbu qarorning 2-bandiga muvofiq, maʼnan eskirgan va keyingi ishlab chiqarishda talab etilmaydigan uskunalar, mashinalar va mexanizmlarni sotishdan tushadigan mablagʻlar “Foton” AJni koʻchirish va modernizatsiya loyihalarini amalga oshirish xarajatlarini qoplashga yoʻnaltirilsin.

4. “Oʻzeltexsanoat” uyushmasiga bir oy muddatda “Foton” AJ ishlab chiqarishini modernizatsiya qilish boʻyicha, uning koʻchirilishi va ishlab chiqarish quvvatlarini optimallashtirishni inobatga olgan holda, takliflar kiritish topshirilsin.

6. Ushbu qaror ijrosini nazorat qilish Oʻzbekiston Respublikasi Bosh vazirining oʻrinbosarlari U.U. Roziqulov va A.N. Aripov zimmasiga yuklansin.