1. Oʻzbekiston Respublikasi Prezidentining “Mustaqil teleradio kanallarni isloh qilish va rivojlantirish chora-tadbirlari toʻgʻrisida” 2005-yil 8-noyabrdagi PF-3678-son Farmoni bilan tasdiqlangan Oʻzbekiston milliy teleradiokompaniyasi toʻgʻrisidagi nizomga ilovaga muvofiq oʻzgartirishlar kiritilsin.

2. Mazkur Farmon ijrosini nazorat qilish Oʻzbekiston Respublikasi Prezidentining Davlat maslahatchisi I.B. Abdullayev zimmasiga yuklansin.

20 — 23-bandlari quyidagi tahrirda bayon etilsin:

“20. Kompaniyada Kompaniya raisi (hayʼat raisi), rais oʻrinbosarlari (lavozimiga koʻra), Kompaniya faoliyatining asosiy yoʻnalishlarini muvofiqlashtiruvchi uning tarkibiy boʻlinmalarining rahbarlaridan iborat tarkibda hayʼat tashkil etiladi. Hayʼat tarkibiga Oʻzbekiston madaniyati va sanʼati vakillari kiritilishi mumkin.

Kompaniya hayʼatining aʼzolari soni va shaxsiy tarkibi Kompaniya raisining taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

21. Hayʼat:

teleradioeshittirish faoliyatini yanada isloh qilish va rivojlantirish, ijtimoiy-siyosiy va sotsial-iqtisodiy islohotlar amalga oshirilishi jarayonini keng yoritishda mamlakatimizning elektron ommaviy axborot vositalari rolini oshirish, aholi hamda jamiyatning xolis va har tomonlama axborotga boʻlgan talab-ehtiyojlarini qondirish boʻyicha mazkur Nizomda belgilangan Kompaniya faoliyatining asosiy yoʻnalishlarini tayyorlash va roʻyobga chiqarish;

Oʻzbekiston Milliy teleradiokompaniyasi nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidenti farmonlari, qarorlari va farmoyishlarida, Oʻzbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish yuzasidan ijro intizomini mustahkamlash, ularning oʻz vaqtida va sifatli amalga oshirilishi taʼminlanishi uchun Kompaniya rahbarlari va xodimlarining shaxsiy masʼuliyatini oshirish bilan bogʻliq masalalarni koʻrib chiqadi.

Hayʼat Kompaniya vakolatiga kiradigan boshqa masalalarni ham koʻrib chiqishga haqlidir.

Hayʼat majlislariga Kompaniya vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyat organlari, korxonalar, muassasalar, tashkilotlar rahbarlari taklif etilishi mumkin.

22. Hayʼat, agar uning majlisida oʻz tarkibining yarmidan ortigʻi hozir boʻlsa, huquqiy vakolatli boʻladi. Koʻrib chiqiladigan masalalar boʻyicha qarorlar oddiy koʻpchilik ovoz bilan qabul qilinadi.

23. Hayʼat qarorlari Kompaniya raisining buyruqlari bilan amalga oshiriladi. Rais bilan hayʼat aʼzolari oʻrtasida kelishmovchiliklar paydo boʻlgan taqdirda rais, paydo boʻlgan kelishmovchiliklar toʻgʻrisida Vazirlar Mahkamasiga axborot bergan holda, mustaqil ravishda qaror qabul qiladi. Hayʼat aʼzolari ham oʻz fikr-mulohazalarini Vazirlar Mahkamasiga maʼlum qilishlari mumkin.

Hayʼat faoliyati tartibi hayʼat tomonidan tasdiqlanadigan hayʼat reglamentida belgilanadi”.