Bundan keyin Tomonlar deb ataluvchi Oʻzbekiston Respublikasi Hukumati va Turkmaniston Hukumati,

ikkala davlat oʻrtasidagi doʻstona munosabatlarni yanada mustahkamlash istagiga amal qilib,

Tomonlarning hukumat aloqasini saqlash va rivojlantirishdan manfaatdorligini hisobga olib,

quyidagilar toʻgʻrisida kelishib oldilar:

Ushbu Bitim maqsadlari uchun quyidagi atamalar qoʻllaniladi:

“vakolatli tashkilotlar” — Oʻzbekiston Respublikasi Vazirlar Mahkamasining Hukumat aloqasi xizmati va Turkmaniston Milliy xavfsizlik xizmati;

“hukumat aloqasi” — davlat boshqaruvi ehtiyojlari uchun maxsus aloqa;

“xalqaro hukumat aloqasi” — Oʻzbekiston Respublikasi va Turkmaniston hukumat aloqasi abonentlari oʻrtasida axborot almashish uchun belgilangan hukumat aloqasi tizimi;

“shifrlash vositalari” — maʼlumotlarni ishlab chiqishda ularni muhofaza etish, saqlash va aloqa vositalarida uzatish, shuningdek noqonuniy axborot olish, yolgʻon axborot yuborishdan himoyalash maqsadida maʼlumotlarni oʻzgartiruvchi kriptografik algoritmlarini tatbiq qiluvchi uskunaviy, reja-uskunaviy va reja vositalarini, qoʻl shifrlarini, kodlash hujjatlarini anglatadi.

Tomonlar muntazam ishlovchi xalqaro hukumat va shifrlangan hujjatlar aloqasini taʼminlaydilar va takomillashtiradilar.

Tomonlardan har biri ikkala Tomon manfaatlariga daxldor boʻlgan xalqaro hukumat aloqasini tashkil etish, texnikaviy foydalanish va xavfsizligini taʼminlash masalalarini hal qilishda teng huquqqa ega.

Xalqaro hukumat aloqasini tashkil etish, texnikaviy foydalanish, xavfsizligini taʼminlash va uzluksiz ishlash masalalari vakolatli tashkilotlar tomonidan hal qilinadi.

Tomonlardan har biri oʻz davlat hududida amal qilayotgan qonunchilikka muvofiq, oldindan berilgan soʻrov boʻyicha boshqa Tomon davlatining mansabdor shaxslari uchun hukumat aloqasini taqdim qiladi, agar Oʻzbekiston Respublikasi va Turkmaniston ishtirok etgan xalqaro shartnomalarda boshqasi nazarda tutilmagan boʻlsa.

Xalqaro hukumat aloqasini oʻz davlati hududida tashkil qilish, foydalanishga kiritish, texnikaviy ishlatish va yanada takomillashtirish boʻyicha xarajatlarni Tomonlardan har biri mustaqil qoplaydi.

Vakolatli tashkilotlar:

xalqaro hukumat aloqasining yangi tizimlari va vositalarini ishlab chiqish va ishlab chiqarish, shuningdek hukumat aloqasining milliy tarmoqlari sohasida oʻzaro manfaatdorlik sharti bilan ilmiy-tadqiqot va tajriba-konstruktorlik ishlarini birgalikda olib boradilar;

hukumat aloqasi vositalari ishlab chiqarish sohasida birgalikda harakat qiladilar;

hukumat aloqasi tizimlari va vositalarida axborotni himoya qilish sohasida birgalikda harakat qiladilar;

kadrlar malakasini oshirish boʻyicha birgalikda harakat qiladilar.

Oʻzbekiston Respublikasi va Turkmaniston hukumat aloqasi radioelektronika vositalarining elektromagnit mosligini taʼminlash maqsadida oʻz davlatlari hududida ularga ajratiladigan chastota spektridan foydalanish masalalari boʻyicha birgalikda harakat qiladilar.

Oʻzaro harakatning mazkur yoʻnalishlari boʻyicha hamkorlik vakolatli tashkilotlar oʻrtasida kelishilgan holda amalga oshiriladi.

Tomonlar ikkala davlatning qonunchiligiga muvofiq xalqaro hukumat aloqasini, va shuningdek hukumat aloqasining milliy tarmoqlarini tashkil qilish va ishlatish uchun zarur boʻlgan shifrlovchi vositalar, texnika va aloqa vositalari, jamlovchi buyumlar va ehtiyot qismlarini kelishilgan hajmlarda oʻzaro yetkazishni taʼminlash majburiyatini oladilar.

Oʻzbekiston Respublikasi va Turkmaniston oʻrtasida shifrlovchi vositalar, texnika va aloqa vositalari, jamlovchi buyumlar va ehtiyot qismlarni oʻzaro yetkazish, shuningdek taʼmirlash ishlarini tashkil etish va maxsus xizmatlarni taqdim etish shartnoma asosida amalga oshiriladi.

Tomonlar ushbu Bitimdan kelib chiqadigan majburiyatlarni bajarishda paydo boʻladigan masalalar boʻyicha ikki tomonlama muzokaralar (maslahatlashuvlar) oʻtkazish uchun vakolatli tashkilotlarga huquq beradilar.

Tomonlarning oʻzaro roziligi boʻyicha ushbu Bitimga oʻzgartishlar va qoʻshimchalar kiritilishi mumkin, ular alohida protokollar bilan rasmiylashtiriladi va uning ajralmas qismi hisoblanadi hamda ushbu Bitimning 13-moddasida nazarda tutilgan tartibda kuchga kiradi.

Ushbu Bitimdan kelib chiqadigan masalalarni hal qilish boʻyicha vakolatli tashkilotlarning oʻzaro harakat qilishida rus tili ishlatiladi.

Ushbu Bitimning qoidalarini talqin qilish va qoʻllashda yuzaga keladigan barcha munozaralar Tomonlar oʻrtasida muzokaralar va maslahatlashuvlar oʻtkazish yoʻli bilan hal qilinadi.

Ushbu Bitimning qoidalari Tomonlar ishtirok etadigan boshqa xalqaro shartnomalardan kelib chiqadigan majburiyatlarga daxl qilmaydi va boshqa davlatlarning manfaatlariga, xavfsizligiga, hududiy yaxlitligiga qarshi qaratilmagan.

Ushbu Bitim Tomonlar uning kuchga kirishi uchun zarur boʻlgan ichki davlat protseduralarini bajarganliklari toʻgʻrisida oxirgi yozma xabarnoma olingan sanadan boshlab kuchga kiradi va besh yil davomida amal qiladi.

Tomonlardan birontasi boshqa Tomonni ushbu Bitim faoliyatini toʻxtatish toʻgʻrisidagi niyatini navbatdagi besh yillik muddat tugashidan kamida olti oy ilgari yozma xabarnoma yubormasa, u oʻz oʻzidan keyingi besh yillik muddatlarga uzayaveradi.

Toshkent shahrida 2008-yil 10-martda (Navruz) ikki nusxada, har biri oʻzbek, turkman va rus tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelgan taqdirda Tomonlar rus tilidagi matnga amal qiladilar.