Shanxay hamkorlik tashkilotiga a’zo davlatlar hukumatlari, keyingi o‘rinlarda Tomonlar,

Tomonlar hududlarida terrorizm, separatizm va ekstremizm bilan samarali kurash olib borish maqsadida,

terroristik, separatistik va ekstremistik faoliyatlarga aloqador shaxslarning Tomonlar hududiga suqilib kirishi Tomonlar xavfsizligiga jiddiy tahdid solishini anglagan holda,

2002-yil 7-iyundagi Shanxay hamkorlik tashkiloti Xartiyasi qoidalari, 2001-yil 15-iyundagi terrorizm, separatizm va ekstremizmga qarshi kurashish to‘g‘risidagi Shanxay konvensiyasi hamda 2002-yil 7-iyundagi Shanxay hamkorlik tashkilotga a’zo davlatlar o‘rtasidagi Mintaqaviy aksilterror tuzilma to‘g‘risidagi Kelishuvga tayangan holda,

terrorizm, separatizm va ekstremizm bilan kurashishga qaratilgan samarali chora-tadbirlarni qabul qilishda o‘zaro manfaatdorlikdan kelib chiqqan xolda,

Tomonlar davlat qonunchiligi va umume’tirof etilgan xalqaro tamoyillar va xuquq me’yorlariga tayangan xolda,

quyidagilar to‘g‘risida kelishib olindi:

Mazkur Kelishuv maqsadlari uchun unda qo‘llanilgan tushunchalar quyidagilarni bildiradi:

“buzg‘unchilar” — 2001-yil 15-iyundagi terrorizm, separatizm va ekstremizmga qarshi kurashish to‘g‘risidagi Shanxay konvensiyasida belgilangan terroristik separatistik, ekstremistik harakatlarni sodir etganlik uchun yoki sodir etishda gumonlanayotgan, Shanxay hamkorlik tashkilotiga a’zo davlatlarning maxsus xizmatlari va huquqni muhofaza qiluvchi organlari tomonidan xalqaro qidiruv e’lon qilingan shaxslar;

“suqilib kirish kanallari” — buzg‘unchilarning Tomonlar hududiga qonuniy va noqonuniy suqilib kirishi yo‘llari.

Tomonlar, suqilib kirish kanallarini aniqlash va yopish bo‘yicha qo‘shma chora-tadbirlarini ishlab chiqish maqsadida, hamkorlik qiladilar va o‘z faoliyatlarini muvofiqlashtiradilar, davlat organlari, jamoatchilik va boshqa tashkilotlar, Tomonlar fuqarolari kuchlarini birlashtiradilar, shuningdek ko‘rsatilgan maqsadlarda ommaviy axborot vositalari imkoniyatlaridan foydalanadilar.

Tomonlar mazkur Kelishuv kuchga kirishi uchun zarur davlat ichki protsedurlarini bajarilgandan so‘ng, o‘ttiz kun ichida mazkur Kelishuvni tatbiq qilish uchun javobgar vakolatli organlari to‘g‘risida yozma shaklda depozitariyni xabardor qilishadi.

Tomonlar vakolatli organlari quyidagi asosiy yo‘nalishlar bo‘yicha suqilib kirish kanallarini aniqlash va yopish sohasida hamkorlik qilishadi:

suqilib kirish kanallarini aniqlash va yopish sohasida kelishilgan yondashuvlarni ishlab chiqish;

suqilib kirish kanallarini aniqlash, ularning ustidan nazorat o‘rnatish va yoki yopish;

Tomon davlatlari hududiga buzg‘unchilar tomonidan suqilib kirish uchun foydalaniladigan usullarini aniqlash;

buzg‘unchilarni aniqlash, ularni qo‘lga olish bo‘yicha kelishilgan chora-tadbirlarni amalga oshirish;

suqilib kirish kanallarini yopish va aniqlash bo‘yicha hamkorlik tadbirlarini o‘tkazishda muvofiqlashtirish va o‘zaro hamkorlik qilish;

suqilib kirish kanallarini aniqlash va yopish bo‘yicha hamkorlik rejalarini ishlab chiqish va tatbiq qilish;

suqilib qirish kanallarini aniqlash va yopish masalalari bo‘yicha Tomonlar davlat qonunchiligini muvofiqlashtirish;

suqilib kirish kanallarini aniqlash hamda yopish masalalari bo‘yicha mutaxassislarni tayyorlash, qayta tayyorlash va ularning malakasini oshirish;

suqilib kirish kanallarini aniqlash va yopish muammolari bo‘yicha hamkorlikdagi ilmiy tadqiqotlar o‘tkazish;

Suqilib kirish kanallarini aniqlash va yopish masalalari bo‘yicha xalqaro tashkilotlar va xalqaro forumlarda ishtirok etish uchun pozitsiyalarni kelishish;

Tomonlarning vakolatli organlari mazkur Kelishuv 4-moddasida ko‘rsatilgan quyidagi asosiy yo‘nalishlar bo‘yicha hamkorlik qilishadi:

Ko‘mak berish to‘g‘risida talabnomalarni bajarish (keyingi o‘rinlarda — talabnoma):

suqilib kirish kanallarini aniqlash va yopish bo‘yicha kelishilgan operativ-qidiruv tadbirlarini o‘tkazish;

buzg‘unchilarni qidiruvga berish va qo‘lga olish;

o‘zaro manfaatlar asosida boshqa tadbirlar o‘tkazish;

ma’lumot almashish:

Tomonlar davlatlari hududida terroristik, separatistik va ekstremistik harakatlarni sodir etish uchun suqilib kirish kanallaridan foydalanish to‘g‘risida;

suqilib kirish kanallaridan foydalanishga aloqadorlikda gumonlanayotgan shaxslar va tashkilotlar to‘g‘risida;

Tomonlar davlatlari hududiga buzg‘unchilar tomonidan suqilib kirish kanallaridan foydalanish bilan bog‘liq aniq faktlar va hodisalar to‘g‘risida;

suqilib kirish kanallaridan foydalanadigan alohida shaxslar va jinoiy guruhlar o‘rtasida bo‘lgan yoki taxminiy aloqalar to‘g‘risida;

suqilib kirish kanallaridan foydalanish bo‘yicha tashkilotlar va alohida shaxslar faoliyatining shakllari va usullari to‘g‘risida;

buzg‘unchilar tomonidan foydalaniladigan suqilib kirish kanallari to‘g‘risida;

suqilib kirish kanallarini moliyalashtirish manbalari to‘g‘risida;

suqilib kirish kanallarini aniqlash va yopish shakllari va usullari to‘g‘risida;

suqilib kirish kanallarini aniqlash va yopish masalalari bo‘yicha ma’lumotlarini Shanxay hamkorlik tashkiloti Mintaqaviy aksilterror tuzilmasining ma’lumotlar bankiga jo‘natish;

Tomonlar davlatlarining chegaralarini kesib o‘tishga huquq beruvchi hujjatlar namunalari bilan almashinish xamda Tomonlar davlatlari hududiga kirish, bo‘lish va chiqish uchun hujjatlarga oid shakl va talablarida o‘zgarishlar to‘g‘risida ma’lumot taqdim qilish;

ish tajribasi bilan almashinish, shu jumladan majlis, konferensiya va seminarlar o‘tkazish yo‘li bilan;

suqilib kirish kanallarini aniqlash va yopish masalalar bo‘yicha qonunchilik va boshqa me’yoriy huquqiy hujjatlar, materiallar bilan almashish;

Tomonlarning vakolatli organlari hamkorlikning boshqa o‘zaro maqbul shakllarini belgilab olishlari mumkin.

Ushbu Kelishuv doirasida Tomonlarning vakolatli organlari o‘rtasidagi hamkorlik talabnoma asosida ikki va ko‘p tomonlama hajmlarda, shuningdek Tomonlar davlatlaridan birining vakolatli organlarining tashabbusi bo‘yicha xabardor qilish yo‘li bilan amalga oshiriladi.

Talabnoma yoki ma’lumot yozma shaklda jo‘natiladi. Kechiktirib bo‘lmaydigan holatlarda talabnoma yoki ma’lumot og‘zaki tarzda yetkazilishi mumkin, ammo ular yetmish ikki soatdan kechiktirilmasdan yozma tarzda, zarurat tug‘ilganda matn uzatish texnik vositalaridan foydalangan xolda, rasmiylashtirilishi lozim.

Talabnoma yoki ma’lumot yoki ularning mazmuni haqiqiyligiga shubha yuzaga kelgan hollarda, ko‘rsatilgan hujjatlarni qo‘shimcha tasdiqlash yoki tushintirish talab qilinishi mumkin.

Talabnoma quyidagilarni o‘z ichiga olishi shart:

talabnoma yuborgan va olgan vakolatli organlarning nomi;

talabnoma maqsad va asoslari;

talab etiladigan ko‘mak mazmunini tavsiflash;

talabnomani o‘z vaqtida va tegishlicha bajarish uchun foydali bo‘lishi mumkin bo‘lgan boshqa ma’lumotlar;

agar zarur bo‘lsa, uning yopiqlik darajasini ko‘rsatish;

yozma shaklda jo‘natilgan talabnoma yoki ma’lumot jo‘natuvchi vakolatli organ rahbari yoki uning o‘rinbosarlari tomonidan imzolanadi va (yoki) ushbu vakolatli organ gerbli muhri bilan tasdiqlanadi.

Talabnoma olgan vakolatli organi talabnomani tez va imkon boricha to‘liqroq bajarilishini ta’minlash maqsadida barcha zarur chora-tadbirlarni qabul qiladi hamda u kelib tushgan kunidan boshlab o‘ttiz kun muddat ichida talabnoma yuborgan organni talabnomani ko‘rib chiqish natijalari to‘g‘risida xabardor qiladi.

Talabnomani bajarilishiga to‘sqinlik qiluvchi yoki sezilarli kechiktiruvchi holatlar to‘g‘risida talabnoma yuborgan vakolatli organi darhol xabardor qilinadi.

Agar talabnomani bajarish talabnoma olgan vakolatli organ vakolatiga kirmasa, unda u talabnomani bajarishga vakolati bo‘lgan o‘z davlatning boshqa vakolatli organiga jo‘natadi va bu to‘g‘risida talabnoma yuborgan vakolatli organga darhol xabar beradi.

Talabnoma olgan vakolatli organ talabnomani bajarish uchun, uning fikricha, zarur ma’lumotlarni talab qilishi mumkin.

Talabnomani bajarishda talabnoma olgan Tomon davlatning qonunchiligi qo‘llaniladi. Agar talabnoma olgan Tomonning qonunchiligi yoki xalqaro majburiyatlariga zid bo‘lmasa, unda talabnoma olgan vakolatli organ iltimosiga ko‘ra talabnoma yuborgan Tomon davlat qonunchiligi qo‘llanishi mumkin.

Talabnoma olgan vakolatli organ o‘z davlat hududida talabnoma yuborgan tomon vakillariga, agar bu uning davlat qonunchiligiga zid bo‘lmasa, talabnomani bajarishda qatnashishga ruxsat berishi mumkin.

Agar talabnoma olgan vakolatli organ talabnomani bajarish uning davlat suvereniteti, xavfsizligi, jamoat tartibiga yoki boshqa muhim manfaatlariga zarar yetkazadi deb hisoblasa yoki talabnoma olgan Tomon davlat qonunchiligi yoki xalqaro majburiyatlariga zid bo‘lsa, talabnoma ijrosi kechiktirilishi yoki uni bajarish to‘liq yoxud qisman rad qilinishi mumkin.

Agar ushbu moddaning 6- yoki 7- abzatslarga muvofiq talabnomani bajarilishi to‘liq yoki qisman rad etilsa yoki uning ijrosi kechiktirilsa, bu haqida vakolatli organga yozma shaklda xabar beriladi.

Agar olingan ma’lumot va hujjatlar yopiq xususiyatga ega bo‘lsa yoki yuborgan tomon ularni oshkor qilish nomaqbul deb hisoblasa, har bir tomon ularning maxfiyligini ta’minlaydi. Ma’lumot va hujjatlarning yopiqlik darajasi yuboruvchi tomonidan belgilanadi.

Mazkur Kelishuv asosida olingan ma’lumot yoki talabnomani bajarish natijalarini ularni taqdim qilgan Tomonning yozma roziligisiz boshqa maqsadlarda foydalanish mumkin emas.

Mazkur Kelishuv asosida bir Tomonning boshqa Tomondan olgan ma’lumot va hujjatlari ularni taqdim qilgan Tomonning oldindan yozma roziligisiz uchinchi tomonga yuborilishi mumkin emas.

Agar har bir aniq holatda oldindan boshqacha tartib kelishilmagan bo‘lsa, Tomonlar mazkur Kelishuvni bajarishda yuzaga keladigan xarajatlarni mustaqil qoplashadi.

Mazkur Kelishuv doirasidagi hamkorlik natijalarini tahlil qilish va baholash, shuningdek uni takomillashtirish yo‘llarini ishlab chiqish maqsadida, Tomonlar konsultatsiya va majlislar o‘tkazishlari mumkin.

Tomonlar mazkur Kelishuv qoidalarini izohlash yoki qo‘llash bilan bog‘liq bahsli masalalarni konsultatsiya va muzokaralar yo‘li bilan hal qilishadi.

Mazkur Kelishuv Tomonlarning ular a’zo bo‘lgan boshqa xalqaro shartnomalaridan kelib chiqadigan huquq va majburiyatlariga daxldor emas.

Mazkur Kelishuv doirasida hamkorlikni amalga oshirishda, Tomonlar ishchi tillari sifatida rus va xitoy tillaridan foydalanishadi.

Tomonlarning kelishuviga ko‘ra, ushbu Kelishuvning 15-moddasida o‘rnatilgan tartibda kuchga kiradigan bayonnomalar tuzish yo‘li bilan, mazkur Kelishuvga o‘zgartirishlar kiritilishi mumkin.

Mazkur Kelishuv noaniq muddatga tuziladi va uning kuchga kirishi uchun zarur davlat ichki protseduralarini Tomonlar orqali bajarish to‘g‘risida yozma shakldagi to‘rtinchi xabarni depozitariy olgan sanadan o‘ttizinchi kuni kuchga kiradi.

Mazkur Kelishuv depozitariysi Shanxay hamkorlik tashkiloti hisoblanadi va u Mazkur Kelishuv imzolanganidan so‘ng o‘n besh kun ichida Kelishuvning tasdiqlangan nusxalarini Tomonlarga jo‘natadi.

Depozitariy mazkur Kelishuvni tatbiq etish uchun,Tomonning javobgar vakolatli organlaridan xabar olingan kundan o‘n besh kun ichida bu to‘g‘risida boshqa Tomonlarga xabar beradi.

Mazkur Kelishuv 2001-yil 15-iyundagi terrorizm, separatizm va ekstremizmga qarshi kurashish to‘g‘risidagi Shanxay konvensiyasi a’zolari hisoblanadigan davlatlarning qo‘shilishi uchun ochiq. Mazkur Kelishuv qo‘shiladigan davlatlar uchun uning qo‘shilishi to‘g‘risidagi hujjat depozitariy tomonidan qabul qilingan kundan o‘ttizinchi kuni kuchga kiradi.

Mazkur Kelishuv 2001-yil 15-iyundagi terrorizm, separatizm va ekstremizmga qarshi kurashish to‘g‘risidagi Shanxay konvensiyasi a’zosi hisoblanadigan istalgan Tomonlar davlatiga nisbatan o‘z kuchida qoladi.

2006-yil 15-iyunda Shanxay shahrida, bitta asl nusxada rus va xitoy tillarida tuzildi va ikki matn ham bir xil kuchga ega hisoblanadi.