Oʻzbekiston Respublikasi Hukumati bilan Ozarbayjon Respublikasi Hukumati, bundan keyin “Tomonlar” deb ataluvchilar,

Oʻzbekiston Respublikasi bilan Ozarbayjon Respublikasi oʻrtasida doʻstlik va hamkorlik toʻgʻrisida 1996-yil 27-maydagi Shartnomaga, Oʻzbekiston Respublikasi Hukumati bilan Ozarbayjon Respublikasi Hukumati oʻrtasida erkin savdo toʻgʻrisida 1996-yil 27-maydagi Bitimga, Oʻzbekiston Respublikasi Hukumati bilan Ozarbayjon Respublikasi Hukumati oʻrtasida savdo-iqtisodiy va ilmiy-texnikaviy hamkorlikni yanada rivojlantirish chora-tadbirlari toʻgʻrisida 2008-yil 11-sentabrdagi Bitimga, shuningdek Tomonlar ishtirokchi boʻlgan boshqa xalqaro shartnomalarga amal qilib,

savdo-iqtisodiy va ishlab chiqarish munosabatlarini oʻzaro manfaatli, uzoq muddatli va barqarorlik asosida yanada rivojlantirish hamda mustahkamlashga intilib,

xalqaro huquqning umum eʼtirof etilgan normalari va prinsiplariga amal qilib,

quyidagilar toʻgʻrisida kelishib oldilar:

Tomonlar ushbu Bitimning ajralmas qismi hisoblanuvchi Oʻzbekiston Respublikasi Hukumati bilan Ozarbayjon Respublikasi Hukumati oʻrtasida 2011—2015-yillarga moʻljallangan Iqtisodiy hamkorlik dasturini (bundan keyin - Dastur) amalga oshiradilar.

Tomonlar iqtisodiy hamkorlikni xalqaro huquqning umum eʼtirof etilgan prinsiplariga rioya etish asosida, shu jumladan, davlat boshqaruvi organlari oʻrtasida, bevosita xoʻjalik yurituvchi subyektlar oʻrtasida, mulk shakli va tashkiliy jihatdan qarashliligidan qatʼi nazar, Tomonlar milliy qonunchiligiga rioya etib, shartnomalar tuzish yoʻli bilan amalga oshiradilar.

Olingan majburiyatlarni bajarish uchun shartnoma tuzgan xoʻjalik yurituvchi subyektlar javobgardirlar.

Tomonlar oʻz zimmalariga boshqa Tomon iqtisodiy manfaatlariga zarar yetkazmaslik majburiyatini oladilar.

Tomonlar Oʻzbekiston Respublikasi bilan Ozarbayjon Respublikasi oʻrtasidagi hamkorlik boʻyicha Hukumatlararo qoʻshma komissiyaga (bundan keyin - Komissiya) Dastur bajarilishini muvofiqlashtirish, uning amalga oshirilishini nazorat qilish va zaruriyat tugʻilganda unga oʻzgartirishlar kiritish boʻyicha takliflar ishlab chiqish vazifasini topshirishga kelishib oldilar.

Dasturni bajarish jarayoni Komissiya yigʻilishlarida yilda kamida bir marta koʻrib chiqiladi.

Mazkur Bitim qoidalarini talqin qilish va qoʻllash yuzasidan kelishmovchiliklar maslahatlashuv va muzokaralar orqali hal qilinishi lozim.

Tomonlarning oʻzaro kelishuviga koʻra, mazkur Bitimga uning ajralmas qismi boʻlib hisoblanadigan, bitimning 7-moddasiga muvofiq kuchga kiradigan alohida protokollar bilan rasmiylashtiriladigan oʻzgartish va qoʻshimchalar kiritilishi mumkin.

Mazkur Bitim Tomonlar ishtirokchi boʻlgan boshqa xalqaro shartnomalardan kelib chiqadigan huquq va majburiyatlarga daxl qilmaydi.

Mazkur Bitim Tomonlardan Bitimning kuchga kirishi uchun zarur boʻlgan davlat ichki protseduralari bajarilganini tasdiqlovchi oxirgi yozma xabarnoma diplomatik kanallar orqali olingan sanadan boshlab kuchga kiradi va 2015-yilning 31-dekabriga qadar amal qiladi.

Tomonlardan har biri boshqa Tomonga yozma xabarnoma yuborib, mazkur Bitim amal qilishini tugatishi mumkin. Bu holda Bitim bunday yozma xabarnoma olingan sanadan boshlab 6 (olti) oy oʻtgach, oʻz amal qilishini tugatadi.

Agar Tomonlar oʻzgacha kelishmagan boʻlsalar, mazkur Bitim amal qilishining tugatilishi, Bitim amal qilish muddati doirasida kuchga kirgan loyihalar va dasturlarning amalga oshirilishiga daxl qilmaydi.

Toshkent shahrida 2010-yil 27-sentabrda ikki asl nusxada, har biri oʻzbek, ozarbayjon va rus tillarida tuzildi, bunda barcha matnlar bir xil kuchga ega. Mazkur Bitim qoidalarini talqin qilishda kelishmovchiliklar yuzaga kelganda rus tilidagi matndan foydalaniladi.