Oʻzbekiston Respublikasi Hukumati va Braziliya Federativ Respublikasi Hukumati, bundan keyin “Tomonlar” deb ataluvchilar,

Ikki mamlakat xalqlari oʻrtasidagi mavjud doʻstlik aloqalarini mustahkamlashga intilgan holda,

Ikki davlatning ijtimoiy va iqtisodiy rivojlanishiga hissa qoʻshilishida oʻzaro manfaatdorlikni inobatga olgan holda,

Tomonlar oʻrtasidagi barqaror rivojlanish hamkorligini qoʻllab-quvvatlash zarurligiga ishongan holda,

Umumiy manfaatdorlik sohalarida texnikaviy hamkorlikning oʻzaro ustuvorligini tan olgan holda, va

Texnikaviy taraqqiyotni ragʻbatlantiruvchi hamkorlikning rivojlanishini istab,

quyidagilar toʻgʻrisida kelishdilar:

Mazkur Bitimning maqsadi quyidagi muhim ahamiyatga ega sohalarda texnikaviy hamkorlikni ragʻbatlantirishdir:

a) taʼlim;

b) sogʻliqni saqlash;

v) tabiatni muhofaza qilish;

g) kommunal xoʻjaligi;

d) suv resurslarini boshqarish;

e) fan va innovatsiya texnologiyalari;

j) qishloq xoʻjaligi;

z) energetika;

i) telekommunikatsiyalar;

k) va boshqa Tomonlar tarafidan belgilangan sohalar.

Mazkur Bitimning maqsadlariga erishish uchun Tomonlar uch tomonlama hamkorlik mexanizmlaridan, uch tomonlama hamkorlik orqali boshqa davlatlar, xalqaro tashkilotlar va mintaqaviy agentliklar bilan hamkorlik qilishdan manfaat koʻrishlari mumkin.

1. Texnikaviy hamkorlik loyihalari Ijro dasturlari orqali amalga oshiriladi.

2. Yuqorida qayd etilgan loyihalarni amalga oshirishda zarur boʻlgan ijroiya va muvofiqlashtiruvchi muassasalar hamda boshqa omillar ham Ijro dasturlari orqali tashkil etiladi.

3. Davlat va xususiy muassasalar, shuningdek nodavlat tashkilotlar ham ushbu Bitimga koʻra ishlab chiqilgan va Ijro dasturlarida kelishilgan loyihalarda ishtirok etishlari mumkin.

4. Tomonlar, mamlakatlarining tegishli qonun va qoidalariga muvofiq, amalga oshirilishi zarur boʻlgan va Tomonlar tarafidan tasdiqlangan loyihalarni birgalikda yoki alohida moliyalashtirishlari mumkin, shuningdek ular xalqaro tashkilotlar, trast fondlari, mintaqaviy va xalqaro dasturlar va boshqa donorlar orqali ham manbalarni izlashlari mumkin.

1. Tomonlar vakillari oʻrtasidagi yigʻilishlar texnikaviy hamkorlik loyihalariga aloqador quyidagi masalalar yuzasidan choralar koʻrish uchun oʻtkazilib boriladi:

(a) texnikaviy hamkorlikni amalga oshirish uchun mos boʻlgan umumiy ustuvor sohalarni baholash va belgilash;

(b) Tomonlar oʻrtasida qabul qilinadigan mexanizmlar va tartiblarni oʻrnatish;

(v) ish rejalarini koʻrib chiqish va ularni tasdiqlash;

(g) hamkorlikning texnikaviy dasturlarini, loyihalarini va tadbirlarini amalga oshirilishini tahlil qilish, tasdiqlash va kuzatish;

(d) mazkur Bitimga muvofiq amalga oshiriladigan tadbirlar, loyihalar va dasturlarni amalga oshirish natijalarini baholash.

2. Tomonlar yigʻilishlar oʻtkazilish joyi va muddatini diplomatik kanallar orqali kelishib oladilar.

Tomonlar ushbu Bitimni amalga oshirish jarayonida olingan hujjatlarni, axborotlarni hamda maʼlumotlarni boshqa Tomonning oldindan yozma ravishda roziligi olinmagunga qadar chop etilmasligini yoki uchinchi tomonga tarqatilmasligini kafolatlaydilar.

Mazkur Bitimga koʻra har bir Tomon boshqa Tomon tarafidan yuborilgan personalni turarjoy bilan bogʻliq zaruriy logistik taʼminot bilan, transport qulayliklari bilan, Ijro dasturlarida belgilab qoʻyilgan majburiyatlarni bajarishda va tegishli Tomonlarning milliy qonun va qoidalariga muvofiq zarur boʻladigan maʼlumotlarga ega boʻlishlarini taʼminlaydi.

1. Oʻzaro manfaatdorlik asosida har bir Tomon oʻz hududida boshqa Tomon tarafidan tayinlangan personalga, shuningdek ularning qonuniy boʻysunuvchilariga, agar ular Tomonlar davlatlari hududida doimiy yashash joyiga ega boʻlgan xorijiy fuqarolar yoki Tomonlarning davlatlari fuqarolari boʻlmasalar oʻz xizmat vazifalarini amalga oshirishlari uchun quyidagilarni kafolatlaydilar:

a) Tomonlarning milliy qonunchiligiga muvofiq diplomatik kanallar orqali soʻralgan vizalarni berish;

b) personal yetib kelgan kundan boshlab dastlabki olti oy muddat ichida uning mulkidan olinadigan boj toʻlovlari, soliqlar va yigʻimlardan ozod etish, dastlabki joylashishni nazarda tutuvchi saqlash, tashish va boshqa shunga oʻxshash xizmatlarga oid soliqlar bundan mustasno; qabul qiluvchi davlatda qonuniy turish muddati bir yildan oshganda, personalning bunday mol-mulki dastlab ozod qilingan import soliqlari toʻlanmasa, xizmat missiyasining oxirida reeksport qilinadi;

v) agar yuqorida keltirilgan mulklar reeksport qilinsa, ushbu moddaning “b” bandida nazarda tutilgani kabi ozod etish va cheklash;

g) boshqa Tomon muassasalari tarafidan yuborilgan personallarni oʻz xizmat vazifalarini bajarish paytida personal maoshidan olinadigan soliq va daromad soligʻidan ozod qilish; muassasalar tomonidan mukofotlar va kunlik toʻlovlar berilganda, Tomonlar oʻrtasida imzolanishi mumkin boʻlgan ikki tomonlama soliqqa tortish toʻgʻrisidagi bitimlarga muvofiq. qabul qiluvchi davlatning qonuni qoʻllaniladi;

d) mazkur Bitimga muvofiq amalga oshiriladigan har qanday harakatga nisbatan sud tarkibidan immunitetga ega boʻlish;

e) inqiroz paytida vositalarni repatriatsiya qilish;

2. Personalning mol-mulki, shu jumladan avtomobili reeksport qilinmagan taqdirda, uning egalari olib kirishdagi boj toʻlovlari, soliq va boshqa yigʻimlarni toʻlashga majburdirlar.

3. Personal tanlovi yuboruvchi Tomon tarafidan oʻtkaziladi va qabul qiluvchi Tomondan maʼqullanishi shart.

Tomonlardan birining hududiga yuborilgan personal mazkur Bitimga koʻra har bir loyihaning muddati va shartlariga binoan ish olib boradi va qabul qiluvchi davlatning amaldagi qonun va qoidalariga boʻysunadi.

1. Tomonlar mazkur Bitimga va Ijro dasturlarida Tomonlar oʻrtasidagi kelishuviga muvofiq amalga oshiriladigan loyihalarni bajarish uchun olib kirilgan tovarlar, transport vositalari va uskunalarni boj toʻlovlari, soliq va boshqa yigʻimlardan Tomonlarning tegishli milliy qonunchiligiga asosan ozod qiladilar, saqlash, tashish va shu kabi xizmatlarga oid toʻlovlar bundan mustasno.

2. Loyihalar yakunida ularni amalga oshirish uchun vaqtincha olib kirilgan barcha tovarlar, transport vositalari va uskunalar reeksport qilinadi. Aks holda, yuboruvchi Tomon ularni olib kirilishi bilan bogʻliq boʻlgan tegishli boj toʻlovlari, soliq va boshqa yigʻimlarni toʻlaydi.

3. Ushbu Bitim doirasidagi loyihalarni amalga oshirish uchun ishlatiladigan tovarlar, transport vositalari hamda uskunalar import va eksport qilingan taqdirda, bu loyihalarni amalga oshirishga masʼul boʻlgan davlat organlari tovarlar, transport vositalari va uskunalarning bojxona rasmiylashtirilishini amalga oshirish uchun kerakli chora-tadbirlarni koʻradi.

Mazkur Bitimga Tomonlarning oʻzaro kelishuviga muvofiq istalgan vaqtda yozma va diplomatik notalar bilan oʻzgartish va qoʻshimchalar kiritilishi mumkin.

Mazkur Bitimni talqin qilish yoki qoʻllash bilan bogʻliq har qanday nizolar diplomatik kanallar orqali Tomonlar oʻrtasida toʻgʻridan toʻgʻri muzokaralar yoʻli bilan doʻstona hal etiladi.

1. Ushbu Bitim kuchga kirishi uchun bajarilishi lozim boʻlgan davlat ichki protseduralari Tomonlar tarafidan amalga oshirilganligi haqida diplomatik kanallar boʻyicha oxirgi yozma xabarnomalar olingan kundan boshlab kuchga kirgan hisoblanadi.

2. Mazkur Bitimning amal qilish muddati besh (5) yil. Ushbu muddat tugashidan olti (6) oy oldin Tomonlardan biri boshqa Tomonni ushbu Bitimning amal qilishini toʻxtatish haqida yozma ravishda xabardor etmasa, ushbu Bitimning amal qilish muddati oʻz-oʻzidan besh (5) yillik muddatga uzayaveradi.

3. Mazkur Bitim istalgan vaqtda Tomonlardan birining diplomatik kanallar orqali bergan yozma xabarnomasi orqali toʻxtalishi mumkin. Uchinchi davlatlar bilan uch tomonlama hamkorlikni hisobga olgan holda, mazkur Bitim faoliyati toʻxtatilganda, Tomonlar loyihalarni amalga oshirishni uzaytirish yoki uzaytirmaslikni hal qilib oladilar.

Braziliya shahrida 2009-yil 28-may kuni ikki nusxada, har biri oʻzbek, portugal va ingliz tillarida tuzildi, bunda barcha matnlar bir xil kuchga ega.

Mazkur Bitim qoidalarini talqin qilishda kelishmovchiliklar yuzaga kelsa, ingliz tilidagi matn ustuvor hisoblanadi.