Oʻzbekiston Respublikasi Hukumati va Braziliya Federativ Respublikasi Hukumati (bundan keyin Tomonlar deb ataluvchilar)

ikki mamlakat oʻrtasida doʻstlik va hamkorlik aloqalarini mustahkamlashga intilib,

diplomatik pasportlarga ega boʻlgan fuqarolarning oʻzaro safarlariga koʻmaklashish zaruratini tan olib,

kuyidagilar toʻgʻrisida kelishdilar:

Tomonlardan har birining amaldagi diplomatik pasportlarga ega boʻlgan, boshqa tomon hududida akkreditatsiyadan oʻtmagan fuqarolari kirgan sanadan boshlab 90 (toʻqson) kundan ortiq boʻlmagan davr davomida boshqa tomon davlati hududiga vizasiz kirishlari, tranzit oʻtishlari, boʻlishlari va chiqishlari mumkin.

1. Ushbu Bitimning 1-moddasida koʻrsatilgan muddat qabul qiluvchi mamlakatning vakolatli organi tomonidan akkreditatsiyadan oʻtgan davlat diplomatik vakolatxonasi yoki konsullik muassasasining yozma murojaati asosida uzaytiriladi.

2. Tomonlarning diplomatik vakolatxonasi yoki konsullik muassasasi mavjud boʻlmasa, diplomatik pasport egalari ular boʻlib turgan davlat Tashqi ishlar vazirligining konsullik boʻlimiga murojaat qilishlari lozim.

Tomonlardan har birining amaldagi diplomatik pasportlarga ega boʻlgan diplomatik vakolatxona yoki konsullik muassasasining aʼzosi boʻlgan, boshqa Tomon hududida akkreditatsiyadan oʻtgan fuqarolari, shuningdek ular bilan birga yashayotgan va amaldagi diplomatik pasportlarning egalari boʻlgan oila aʼzolari ularning rasmiy akkreditatsiya muddati davomida boshqa Tomon davlati hududiga vizasiz kirishlari, chiqishlari va tranzit oʻtishlari mumkin.

Ushbu Bitimda aytib oʻtilgan fuqarolar xalqaro yoʻlovchi tashishlar uchun ochilgan chegara nazorat-oʻtish punktlari orqali boshqa Tomon hududiga kirishlari, tranzit oʻtishlari va chiqishlari mumkin.

Tomonlardan har birining fuqarolari boshqa Tomon davlatining hududida boʻlgan vaqtda davlatning amaldagi milliy qonunchiligiga rioya qilishlari lozim.

Ushbu Bitim Tomonlardan har birining boshqa Tomonning nomaqbul deb hisoblanishi mumkin boʻlgan fuqarolarining kirishini rad qilish yoki boʻlish muddatini qisqartirish huquqlarini cheklamaydi.

1. Tomonlar ushbu Bitim imzolangan sanadan boshlab 30 (oʻttiz) kundan koʻp boʻlmagan muddatda diplomatik kanallar orqali ushbu Bitimda aytib oʻtilgan diplomatik pasportlar namunalari bilan almashadilar.

2. Tomonlar yangi diplomatik pasportlar joriy qilingan yoki amaldagilarga oʻzgartishlar kiritilgan hollarda bir-birlariga diplomatik kanallar orqali bunday pasportlar namunalarini va ulardan foydalanish tartibi toʻgʻrisidagi maʼlumotlarni ular joriy etilishidan 30 (oʻttiz) kun oldin yuboradilar.

Tomonlardan har biri milliy xavfsizlikni taʼminlash, jamoat tartibini saqlash yoki fuqarolar sogʻligʻini muhofaza qilish maqsadida ushbu Bitimning amal qilishini butunlay yoki qisman toʻxtatish huquqiga ega. Har qanday bunday choralar, shuningdek ularni toʻxtatish toʻgʻrisida boshqa Tomon qisqa vaqt ichida diplomatik kanallar orqali xabardor qilinishi lozim.

1. Ushbu Bitim Tomonlardan birining boshqa Tomonni ushbu Bitimning kuchga kirishi uchun zarur boʻlgan davlat ichki protseduralarni bajarganligi toʻgʻrisida diplomatik kanallar orqali soʻnggi yozma xabarnomani olgan kundan boshlab 30 (oʻttiz) kundan soʻng kuchga kiradi.

2. Tomonlarning oʻzaro xohishi asosida, ushbu Bitimga oʻzgartish yoki qoʻshimchalar kiritilishi mumkin. Oʻzgartish yoki qoʻshimchalar ushbu moddaning 1-bandida belgilangan tartibda kuchga kiradi.

3. Tomonlardan har biri istalgan vaqtda diplomatik kanallar orqali ushbu Bitimni bekor qilishi mumkin. Bekor qilish xabarnoma olingan sanadan boshlab 90 (toʻqson) kun oʻtgach kuchga kiradi.

4. Mazkur Bitimni talqin qilish yoki koʻllash bilan bogʻliq har qanday nizolar diplomatik kanallar orqali Tomonlar oʻrtasida toʻgʻridan toʻgʻri muzokaralar yoʻli bilan doʻstona hal etiladi.

Braziliya shahrida 2009-yil 28-may kuni ikki asl nusxada har biri oʻzbek, portugal va ingliz tillarida tuzildi, bunda barcha matnlar bir xil kuchga ega. Talqin qilishda ingliz tilidagi matn ustuvor hisoblanadi.