O‘zbekiston Respublikasi Prezidentining “Malakali pedagog kadrlar tayyorlash hamda o‘rta maxsus, kasb-hunar ta’limi muassasalarini shunday kadrlar bilan ta’minlash tizimini yanada takomillashtirishga oid chora-tadbirlar to‘g‘risida” 2012-yil 28-maydagi PQ-1761-son qarorining 8-bandini bajarish yuzasidan Vazirlar Mahkamasi qaror qiladi:

1. Vazirlar Mahkamasining “O‘rta maxsus, kasb-hunar ta’limi muassasalari xodimlari mehnatiga haq to‘lashning takomillashtirilgan tizimini tasdiqlash to‘g‘risida” 2008-yil 1-avgustdagi 165-son qaroriga (O‘zbekiston Respublikasi QT, 2008-y., 8-son, 41-modda) ilovaga muvofiq o‘zgartirishlar va qo‘shimcha kiritilsin hamda ular 2012-yil 1-sentabrdan boshlab amalga kiritilsin.

2. O‘zbekiston Respublikasi Moliya vazirligi 2012/2013 o‘quv yilidan boshlab kasb-hunar kollejlari ishlab chiqarish ta’limi ustalarining bazaviy tarif stavkalari oshirilishi munosabati bilan qo‘shimcha xarajatlarning “Ta’lim” sohasiga ajratiladigan mablag‘lar doirasida moliyalashtirilishini ta’minlasin.

3. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S.Azimov va O‘zbekiston Respublikasi Bosh vazirining o‘rinbosari A.N.Aripov zimmasiga yuklansin.

1. 1-ilovaga quyidagi mazmundagi izoh qo‘shilsin:

“Izoh. Kasb-hunar kollejlarining birinchi malaka toifasiga, ikkinchi malaka toifasiga ega bo‘lgan va malaka toifasiga ega bo‘lmagan ishlab chiqarish ta’limi ustalarining bazaviy tarif stavkalari tegishli ravishda kasb-hunar kollejlarining katta o‘qituvchisi, oliy ma’lumotli o‘qituvchisi va o‘rta maxsus ma’lumotli o‘qituvchisining bazaviy tarif stavkalariga tenglashtiriladi”.

2. 2-ilovada:

3-band o‘z kuchini yo‘qotgan deb hisoblansin;

izoh chiqarib tashlansin.