Oʻzbekiston Respublikasi Oliy Majlisi Qonunchilik palatasining “Toshkent viloyatining Yangiyoʻl shahri va Yangiyoʻl tumani hududlarini birlashtirish hamda Yangiyoʻl shahrini tuman boʻysunuvidagi shaharlar turkumiga kiritish toʻgʻrisida” 2010-yil 19-noyabrdagi 199–II-sonli va Oʻzbekiston Respublikasi Oliy Majlisi Senatining “Toshkent viloyatining Yangiyoʻl shahri va Yangiyoʻl tumani hududlarini birlashtirish hamda Yangiyoʻl shahrini tuman boʻysunuvidagi shaharlar turkumiga kiritish toʻgʻrisida” 2010-yil 4-dekabrdagi 136–II-sonli qarorlarining amalga oshirilishini taʼminlash maqsadida Vazirlar Mahkamasi qaror qiladi:

1. Toshkent viloyatining Yangiyoʻl shahri va Yangiyoʻl tumani hududlarini birlashtirish hamda Yangiyoʻl shahrini tuman boʻysunuvidagi shaharlar turkumiga kiritish bilan bogʻliq tashkiliy masalalarni hal etish boʻyicha Respublika komissiyasi 1-ilovaga* muvofiq tarkibda tashkil etilsin.

2. Respublika komissiyasi (Gʻ.I.Ibragimov):

ikki oy muddatda Toshkent viloyatining Yangiyoʻl shahri va Yangiyoʻl tumani hududlarini birlashtirish hamda Yangiyoʻl shahrini tuman boʻysunuvidagi shaharlar turkumiga kiritish bilan bogʻliq zarur tashkiliy-texnik tadbirlar kompleksini ishlab chiqish va amalga oshirishni taʼminlasin;

ikki hafta muddatda Toshkent viloyati hokimligi, Oʻzbekiston Respublikasi Iqtisodiyot vazirligi, Moliya vazirligi, Mehnat va aholini ijtimoiy muhofaza qilish vazirligi, boshqa manfaatdor vazirliklar va idoralar bilan birgalikda Yangiyoʻl tumani davlat boshqaruvi organlari hududiy boʻlinmalari xodimlarining cheklangan umumiy sonini, tuzilmasi va mehnatga haq toʻlash fondlarini aniqlashga doir tashkiliy masalalarni hal etsin;

bir oy muddatda Oʻzbekiston Respublikasi Iqtisodiyot vazirligi, Moliya vazirligi va Toshkent viloyati hokimligi bilan birgalikda Yangiyoʻl tumani budjetining va ijtimoiy - iqtisodiy rivojlantirishning prognoz parametrlarini belgilasin;

Toshkent viloyati hokimligi bilan birgalikda tashkiliy davrda iqtisodiyot tarmoqlarining aniq, barqaror va bir maromda ishlashini, shuningdek yuzaga keladigan ijtimoiy masalalarning oʻz vaqtida hal etilishini taʼminlasin.

3. Toshkent viloyati Yangiyoʻl tumani hokimligi boshqaruv apparati xodimlarining cheklangan umumiy soni 21 nafardan iborat boʻlgan tuzilmasi 2-ilovaga muvofiq tasdiqlansin.

4. Toshkent viloyati hokimligi:

Oʻzbekiston Respublikasi Mehnat va aholini ijtimoiy muhofaza qilish vazirligi bilan birgalikda Toshkent viloyati Yangiyoʻl shahrini viloyat boʻysunuvidagi shaharlar turkumidan tuman boʻysunuvidagi shaharlar turkumiga kiritilishi munosabati bilan davlat va xoʻjalik boshqaruvi organlari hududiy boʻlinmalari tugatilishi va ular sonining qisqarishi natijasida boʻshab qolayotgan shaxslarni ishga joylashtirish chora-tadbirlarini koʻrsin, zaruriyat boʻlganda ularni qayta tayyorlash va malakasini oshirish tadbirlari amalga oshirilishini taʼminlasinlar;

ikki oy muddatda Oʻzbekiston Respublikasi Iqtisodiyot vazirligi hamda boshqa manfaatdor vazirliklar va idoralar bilan birgalikda Yangiyoʻl tumanini yanada ijtimoiy-iqtisodiy rivojlantirish boʻyicha tadbirlar kompleksini ishlab chiqsinlar.

5. Oʻzbekiston Respublikasi Davlat statistika qoʻmitasi Toshkent viloyati Yangiyoʻl tumanining maʼmuriy hududi kengayishi munosabati bilan statistika koʻrsatkichlariga tegishli oʻzgartirishlar kiritsin.

6. Oʻzbekiston Respublikasi “Yergeodezkadastr” davlat qoʻmitasi Toshkent viloyati Yangiyoʻl tumanining maʼmuriy hududi kengayishi munosabati bilan yer hisobotlariga tegishli oʻzgartirishlar kiritsin.

7. Toshkent viloyatining Yangiyoʻl shahri va Yangiyoʻl tumani hududlari birlashtirilishi hamda Yangiyoʻl shahrining tuman boʻysunuvidagi shaharlar turkumiga kiritilishi munosabati bilan:

Yangiyoʻl shahar va Yangiyoʻl tumani ichki ishlar boʻlimlari xodimlarining shtatdagi soni, Yangiyoʻl tumani ichki ishlar boʻlimiga berilgan holda, Oʻzbekiston Respublikasi Ichki ishlar vazirligida;

Yangiyoʻl shahar va Yangiyoʻl tumanida faoliyat koʻrsatayotgan fuqarolik holati dalolatnomalarini yozish organlari va davlat notarial idoralari ularga tartib raqami berilgan holda hamda sud ijrochilari Yangiyoʻl shahar va Yangiyoʻl tuman boʻlimlari xodimlarining shtatdagi soni, sud ijrochilari Yangiyoʻl tuman boʻlimiga berilgan holda Oʻzbekiston Respublikasi Adliya vazirligida saqlab qolinsin.

8. Oʻzbekiston Respublikasi Bosh prokuraturasiga Oʻzbekiston Respublikasi Moliya vazirligi bilan birgalikda Yangiyoʻl shahar va Yangiyoʻl tumani prokuraturasi, shu jumladan Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti boʻlimlari xodimlarining shtatdagi sonini Toshkent viloyati Yangiyoʻl tumanining tegishli boʻlinmalarga berish tavsiya etilsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.