1999-yil paxta hosilini yig‘ishtirib olishni uyushqoqlik bilan o‘tkazish maqsadida Vazirlar Mahkamasi qaror qiladi:

1. Paxta terish mashinalarini, transport traktorlarini, paxta tashish uchun maxsus jihozlangan yuk avtomobillarini, paxta tozalash zavodlari va paxta tayyorlash punktlarini hamda quritish-tozalash sexlarini shu yil 1-sentabrgacha hozirlab qo‘yishni tugallash, shuningdek, xo‘jaliklarni talab qilingan miqdorda fartuklar, yig‘im-terimni qisqa muddatlarda va nobudgarchiliklarsiz nihoyasiga yetkazish uchun zarur bo‘lgan boshqa moddiy-texnika resurslari bilan ta’minlash O‘zbekiston Respublikasi Qishloq va suv xo‘jaligi vazirligi, “O‘zdavpaxtasanoatsotish” uyushmasi, “O‘zqishloqxo‘jalikta’minottuzatish” davlat-kooperativ qo‘mitasi, boshqa vazirliklar va idoralar, Qoraqalpog‘iston Respublikasi Vazirlar Kengashi, viloyatlar va tumanlar hokimliklari, qishloq xo‘jaligi korxonalari rahbarlari va mutaxassislarining eng muhim vazifalari hisoblansin.

2. Quyidagilar:

O‘zbekiston Respublikasi Prezidentining “1998 — 2000-yillardagi davrda qishloq xo‘jaligidagi iqtisodiy islohotlarni chuqurlashtirish dasturi to‘g‘risida” 1998-yil 18-martdagi PF-1978-son Farmoniga muvofiq yalpi paxta hosili 1999-yilda 4 mln tonna hajmida belgilanganligi;

Vazirlar Mahkamasining “1999-yilda paxta xomashyosi va boshoqli ekinlar doni xarid narxlari va ichki xo‘jalik iqtisodiy mexanizmini takomillashtirish chora-tadbirlari to‘g‘risida” 1999-yil 15-maydagi 248-son qarori bilan 1999-yil paxta hosilining xarid narxi 1 tonna uchun o‘rtacha 34800 so‘m miqdorida belgilanganligi ma’lumot uchun qabul qilinsin.

3. 1999-yil uchun paxta tolasi davlat xaridi uni ishlab chiqarish hajmining 30 foizi darajasida saqlab qolinsin. Belgilansinki, tasdiqlangan davlat xarid hajmidan ortiqcha paxta xomashyosidan ishlab chiqarilgan paxta tolasi xo‘jaliklar ixtiyorida qoladi va paxta tayyorlash topshirig‘i bajarilgan taqdirda ular tomonidan shartnoma narxlari bo‘yicha sotiladi.

4. O‘zbekiston Respublikasi Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi, viloyatlar va tumanlar hokimliklari Vazirlar Mahkamasining 1999-yil 15-maydagi 248-son qarorini bajarish maqsadida shirkat xo‘jaliklari va boshqa qishloq xo‘jaligi korxonalari har bir oila (jamoa) va boshqa ichki xo‘jalik bo‘linmalari bilan topshirilgan paxta xomashyosining amaldagi hajmi va sifati asosida hisob-kitob qilinishini, shuningdek, ayrim bo‘linmalar zararlari boshqa bo‘linmalar daromadlari hisobiga qoplanishiga yo‘l qo‘yilmasligini ta’minlasinlar.

5. O‘zbekiston Respublikasi Qishloq va suv xo‘jaligi vazirligi (Murodov), “O‘zqishloqxo‘jalikta’minottuzatish” davlat-kooperativ qo‘mitasi (Yusupov), “O‘zkimyosanoat” uyushmasi (Yusupbekov), Qoraqalpog‘iston Respublikasi Vazirlar Kengashi, viloyatlar hokimliklari:

g‘o‘za bargini to‘kish topshiriqlari agrotexnika talablariga muvofiq bajarilishini va paxta terish mashinalari paxta yig‘im-terimiga 1-ilovaga* muvofiq chiqarilishini ta’minlasinlar;

xo‘jaliklarga talab qilingan miqdorlarda defoliantlar yetkazib berishni va g‘o‘za bargini to‘ktirishni 1999-yil 20-sentabrdan kechiktirmasdan, Qoraqalpog‘iston Respublikasi va Xorazm viloyatida 1-oktabrgacha tugallagan holda eng qulay muddatlarda sifatli o‘tkazilishini tashkil etsinlar. G‘o‘za bargini to‘kishni yerda olib borish usuli bilan o‘tkazish uchun texnika vositalari va apparaturalar tayyorlab qo‘yilishiga birinchi darajali ahamiyat bersinlar;

paxtani mashinada terishni O‘zbekiston Respublikasi Qishloq va suv xo‘jaligi vazirligi, ilmiy-tadqiqot va konstruktorlik tashkilotlarining tavsiyanomalariga qat’iy rioya qilgan holda amalga oshirsinlar, dalalarni “Keys” gorizontal shpindelli mashinalar ishlashiga tayyorlashga alohida e’tibor bersinlar, har bir ana shunday mashina uchun kamida 180 gektar paxta maydoni ajratilishini ta’minlasinlar;

ko‘sak terish va ko‘sak chuvish mashinalarining ahvolini tekshirib chiqsinlar, ularni hozirlab qo‘yishni shu yil 15-sentabrgacha tugallash chora-tadbirlarini ko‘rsinlar.

“O‘zqishloqxo‘jalikta’minottuzatish” davlat-kooperativ qo‘mitasi (Yusupov), “O‘zqishloqxo‘jalikmash-xolding” xolding kompaniyasi (Matchonov) paxta terish mashinalari uchun dvigatellar, uzellar, agregatlar va boshqa materiallarning almashtirish fondlarini tashkil etsinlar, ularning belgilangan joylarga zudlik bilan yetkazib berilishini ta’minlasinlar.

6. “O‘zbekiston havo yo‘llari” milliy aviakompaniyasi (Ro‘zmetov) O‘zbekiston Respublikasi Qishloq xo‘jaligi vazirligi hamda “O‘zagrokimyota’minot” birlashmasining buyurtmanomalari bo‘yicha g‘o‘za bargini to‘ktirish uchun zarur bo‘lgan miqdorda samolyotlar ajratsin.

7. Andijon, Namangan va Farg‘ona viloyatlari hokimliklari ortiqcha mehnat resurslarini ushbu viloyatlar xo‘jaliklari bilan tuzilgan shartnomalarga ko‘ra Jizzax va Sirdaryo viloyatlariga safarbar qilishni 2-ilovaga* muvofiq tashkil etsinlar.

“O‘zbekiston temir yo‘llari” davlat-aksiyadorlik kompaniyasi, “O‘zavtotrans” davlat korporatsiyasi ko‘rsatib o‘tilgan terimchilarning belgilangan joygacha olib borilishini va qaytarib olib kelinishini ta’minlasinlar.

8. “O‘zdavpaxtasanoatsotish” uyushmasi, “O‘zavtotrans” davlat korporatsiyasi paxta tashish uchun yuk avtomashinalariga bo‘lgan talabni mamlakat mintaqalari bo‘yicha birgalikda o‘rganib chiqsinlar va ulardan foydalanish uchun tegishli shartnomalarni oldindan rasmiylashtirsinlar.

9. Paxta yig‘im-terimida moddiy rag‘batlantirishni kuchaytirish maqsadida xo‘jaliklarga paxta terimi uchun dalalardagi mavjud hosilga qarab tabaqalashtirilgan haq to‘lash tavsiya qilinsin.

Birinchi terimda:

terilgan 1 kilogramm o‘rta tolali nav paxta uchun — kamida 8 so‘m, ingichka tolali paxta uchun — 9 so‘m;

terilgan 1 kilogramm o‘rta tolali urug‘lik paxta uchun — kamida 10 so‘m, ingichka tolali paxta uchun — 12 so‘m haq to‘lansin.

Mashina-traktor parklari va xo‘jaliklar mexanik-haydovchilarga ikki qatorli vertikal shpindelli paxta terish mashinasida terilgan bir tonna paxta uchun — kamida 200 so‘m, to‘rt qatorli mashinada terilgan paxta uchun — 130 so‘m, ikki qatorli gorizontal shpindelli mashinada terilgan paxta uchun — kamida 100 so‘m miqdorida haq to‘laydilar.

Paxta terimi uchun hisob-kitob qilishda aniq narxnomalar har bir xo‘jalik bo‘yicha mahalliy sharoitlarni va xo‘jaliklarning o‘zlarining imkoniyatlarini hisobga olgan holda belgilansin.

Xo‘jaliklarga, ularda moliyaviy resurslar mavjud bo‘lganda, ayrim hollarda paxta yig‘im-terimi tugallanishi davrida mehnatga haq to‘lashning oshib boruvchi koeffitsiyentlarini belgilash huquqi berilsin.

Terimchilar va paxta terish mashinalarining mexanik-haydovchilari bilan har besh kunda hisob-kitob qilinsin.

10. O‘zbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xo‘jaligi mahsulotlarining hisob-kitob jamg‘armasi, Markaziy bank, “Paxta-bank” va boshqa tijorat banklari terimchilar va paxta terish mashinalarining mexanik-haydovchilari bilan, shuningdek, paxtani yuklash, tushirish, tayyorlash, transportda tashish, joylashtirish hamda ishlov berish, paxta terish texnikasiga texnika xizmati ko‘rsatish va tuzatishda band bo‘lgan xodimlar bilan o‘z vaqtida hisob-kitob qilish uchun xo‘jaliklarni, mashina-traktor parklarini, tayyorlov punktlarini, paxta tozalash zavodlarini mehnatga haq to‘lashning idora ichki normativlari bo‘yicha naqd pul bilan ta’minlasinlar.

11. “O‘zqishloqxo‘jalikmash-xolding” xolding kompaniyasi va “O‘zqishloqxo‘jalikta’minottuzatish” davlat-kooperativ qo‘mitasi paxta yig‘im-terimi mavsumida qatnashuvchi paxta terish mashinalari va boshqa texnikalarning uzluksiz ishlashi uchun paxta ekuvchi xo‘jaliklarga va mashina-traktor parklariga amaliy yordam ko‘rsatish maqsadida viloyatlarga sanoat korxonalarini 3-ilovaga* muvofiq biriktirib qo‘ysinlar.

12. “O‘zneftmahsulot” aksiyadorlik kompaniyasi (Ahmedov) yig‘im-terim ishlarini bajarish, paxtani transportda tashish va ishlov berish uchun xo‘jaliklarga, mashina-traktor parklariga va paxta tozalash sanoati korxonalariga zarur bo‘lgan miqdorda yonilg‘i-moylash materiallari uzluksiz yetkazib berilishini ta’minlasin.

13. “O‘zbekbirlashuv”, “O‘zbeksavdo” kompaniyalari, “O‘zdonmahsulot” davlat korporatsiyasi qishloq aholisini, ayniqsa, paxta yig‘im-terimi qatnashchilarini oziq-ovqat va boshqa xalq iste’moli tovarlari bilan ta’minlash masalalarini o‘z vaqtida hal qilsinlar.

14. O‘zbekiston Respublikasi Sog‘liqni saqlash vazirligi paxta yig‘im-terimida band bo‘lgan xodimlarga muntazam ravishda tibbiy yordam ko‘rsatishni ta’minlasin.

15. O‘zbekiston Respublikasi Madaniyat ishlari vazirligi hosil yig‘im-terimi davrida terimchilarga madaniy xizmat ko‘rsatishni tashkil etsin, san’at ustalari va adabiyot namoyandalarining xo‘jaliklarga borishlarini nazarda tutsin.

16. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B.M. Olimjonov zimmasiga yuklansin.