O‘zbekiston Respublikasi Vazirlar Mahkamasi qayd etadiki, Markaziy bank, Qoraqalpog‘iston Respublikasi Vazirlar Kengashi, viloyatlar, shaharlar va tumanlar hokimliklari, tijorat banklari, soliq organlari hamda pulli xizmatlar ko‘rsatuvchi boshqa vazirliklar va idoralar tomonidan O‘zbekiston Respublikasi Vazirlar Mahkamasining “Naqd pul mablag‘lari emissiyasini qisqartirish chora-tadbirlari to‘g‘risida” 1996-yil 2-iyuldagi 230-son qarori bilan belgilangan parametrlarni bajarishga oid izchil chora-tadbirlar amalga oshirildi. Umuman respublika va Toshkent shahri bo‘yicha naqd pul mablag‘lari emissiyasi darajasini pasaytirishning prognoz ko‘rsatkichlarini bajarishga erishildi.

Shu bilan birga, Qoraqalpog‘iston Respublikasi va ko‘pgina viloyatlar hokimliklari naqd pul mablag‘lari emissiyasi darajasini pasaytirishga doir belgilangan prognozlarning bajarilishini ta’minlay olmadilar.

Ko‘rsatib o‘tilgan qarorning 4-bandiga va “Respublika mintaqalarida naqd pul mablag‘lari emissiyasi darajasini pasaytirish prognozlari va kassa rejalari bajarilishi uchun rahbarlar va mansabdor shaxslarning javobgarligini oshirish va ularni rag‘batlantirish tartibi to‘g‘risida Nizom”ga muvofiq kassa prognozlarining 1996-yil iyul oyidagi bajarilish natijalari yuzasidan Vazirlar Mahkamasi qaror qiladi:

1. O‘zbekiston Respublikasi Markaziy banki, tijorat banklari va Davlat soliq qo‘mitasining o‘z mintaqaviy bo‘linmalari mansabdor shaxslariga nisbatan ko‘rsatib o‘tilgan Nizomga muvofiq tegishli choralar ko‘rish to‘g‘risidagi qarorlari ma’lumot uchun qabul qilinsin.

2. Toshkent shahar hokimi K.N. To‘laganov, uning o‘rinbosarlari — R.F. Fayzullayev va R.M. Shoabdurahmonov 1996-yilning iyul oyidagi kassa rejasi hamda naqd pul emissiyasi darajasini pasaytirish prognozlarini oshirib bajarganliklari uchun oylik lavozim maoshining 30 foizi miqdorida mukofotlansinlar.

3. Qoraqalpog‘iston Respublikasi Vazirlar Kengashining Raisi va uning o‘rinbosarlariga, shuningdek viloyatlarning hokimlari va ularning o‘rinbosarlariga naqd pul mablag‘lari emissiyasi darajasining hamda kassa rejalarining belgilangan prognozlarini bajarmaganliklari uchun oylik lavozim maoshiga nisbatan ilovaga muvofiq miqdorlarda jarima solinsin.

4. Qoraqalpog‘iston Respublikasi Vazirlar Kengashi Raisining, viloyatlar, shaharlar va tumanlar hokimlarining, shuningdek “O‘zbeksavdo”, “O‘zmaishiyxizmat”, O‘zbekbirlashuv uyushmalari, “O‘zavtotrans” korporatsiyasi, Aloqa vazirligi, Kommunal xizmat ko‘rsatish vazirligi, “Toshshaharyo‘lovchitrans” uyushmasi hamda O‘zbekiston Respublikasi boshqa vazirliklari va idoralari rahbarlarining e’tibori joylardagi iste’mol bozorini kundalik ehtiyoj tovarlari bilan to‘ldirish, pulli xizmatlar ko‘rsatish sohasini kengaytirish va naqd pullarning aylanishini jadallashtirish hisobiga aholiga joriy to‘lovlarni ta’minlash bo‘yicha ishlarning qoniqarsizligiga qaratilsin.

5. Pul-kredit siyosati bo‘yicha respublika komissiyasi (F.M. Mullajonov) va Davlat soliq qo‘mitasi (Sh.K. Gataulin) viloyatlar, shaharlar va tumanlarda emissiya darajasini pasaytirish prognozlarining izchil bajarilishi ustidan nazoratni kuchaytirsinlar. Naqd pullarning bankdan tashqari muomalada bo‘lishini keskin kamaytirish, xo‘jalik yurituvchi subyektlarga tushumlarni to‘liq va o‘z vaqtida inkassatsiya qilish bo‘yicha qo‘shimcha rag‘batlar yaratish yuzasidan aniq chora-tadbirlarni o‘n kun muddatda ishlab chiqsinlar.

6. Mazkur qarorning bajarilishini nazorat qilish O‘zbekiston Respublikasi Prezidentining Davlat maslahatchisi T.A. Alimov zimmasiga yuklansin.