Naqd pul mablagʻlari emissiyasi darajasini pasaytirish, respublika mintaqalarida pul muomalasini yaxshilash uchun rahbarlar va mansabdor shaxslarning javobgarligini oshirish maqsadida Vazirlar Mahkamasi qaror qiladi:

1. Qoraqalpogʻiston Respublikasida, viloyatlar, shaharlar va tumanlarda 1996-yilning ikkinchi yarim yilligida naqd pul mablagʻlari emissiyasi darajasini pasaytirish prognozlariga va kassa rejasiga 1, 2-ilovalarga* muvofiq rozilik berilsin.

Qoraqalpogʻiston Respublikasi Vazirlar Kengashi Raisi, viloyatlar, shaharlar va tumanlar hokimlari naqd pul mablagʻlari emissiyasi darajasini pasaytirish prognozlari va kassa rejalari bajarilishi ustidan bevosita va lavozimiga koʻra nazoratni taʼminlasinlar,

2. “Oʻzbeksavdo” davlat uyushmasi, “Oʻzmaishiyxizmatuyushma”, Oʻzbekbirlashuv, “Oʻzavtotrans” korporatsiyasi, Aloqa vazirligi, Kommunal xizmat koʻrsatish vazirligi, “Toshshaharyoʻlovchitrans” davlat uyushmasi, Oʻzbekiston Respublikasining aholiga pulli xizmatlar koʻrsatuvchi boshqa vazirliklari va idoralari hokimliklar bilan birgalikda joylarda xizmat koʻrsatish sohasini kengaytirish, kassa rejalari bajarilishini taʼminlash uchun mansabdor shaxslar va mutaxassislarning moddiy javobgarligi va ularni ragʻbatlantirish shakllari keng qoʻllanilishi yuzasidan aniq chora-tadbirlarni amalga oshirsinlar, kollegial organlar majlislarida ishlarning ahvolini har oyda koʻrib chiqsinlar.

Vazirlar Mahkamasi majmuilarining rahbarlari mazkur bandning bajarilishi uchun amaliy nazoratni taʼminlasinlar.

3. Oʻzbekiston Respublikasi Davlat soliq qoʻmitasi va bank muassasalari Markaziy bank boshqaruvi tomonidan 1996-yil 20-aprelda 9-son bilan tasdiqlangan Mulkchilik shakllaridan qatʼiy nazar xoʻjalik yurituvchi subyektlar tomonidan kassa operatsiyalarini yuritish tartibiga rioya etilishi ustidan nazoratni kuchaytirsinlar.

Oʻzbekiston Respublikasi Prokuraturasi (B. Mustafoyev) amaldagi Tartib buzilishi aniqlangan taqdirda xoʻjalik yurituvchi subyektlarning aybdor rahbarlariga nisbatan Oʻzbekiston Respublikasi Maʼmuriy javobgarlik kodeksining 175 va 264-moddalari talablari qoʻllanilishini taʼminlasin.

4 Respublika mintaqalarida naqd pul mablagʻlari emissiyasi darajasini pasaytirish prognozlari va kassa rejalari bajarilishi uchun rahbarlar va mansabdor shaxslarning javobgarligini oshirish va ularni ragʻbatlantirish tartibi toʻgʻrisidagi Nizom 3-ilovaga muvofiq tasdiqlansin

Bosh vazirning oʻrinbosarlari, Markaziy bank, Oʻzbekiston Respublikasi Davlat soliq qoʻmitasi, tijorat banklari rahbarlari, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari koʻrsatib oʻtilgan Nizomga muvofiq naqd pul mablagʻlari emissiyasi darajasini pasaytirish prognozlari va kassa rejalari bajarilishini taʼminlamayotgan mansabdor shaxslarni javobgarlikka tortsinlar Buning ustidan muntazam nazorat oʻrnatsinlar.

5. Pul-kredit siyosati boʻyicha respublika komissiyasi har bir oy yakunlari boʻyicha mazkur qaror bandlari bajarilishini koʻrib chiqsin va tegishli takliflar kiritsin. Shaxsan nazorat qilish Bosh vazirning oʻrinbosari, Moliya vaziri V. Hamidov, Markaziy bank boshqaruvi raisi F. Mullajonov zimmasiga yuklansin.

6. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

1. Respublika mintaqalarida naqd pul mablagʻlari emissiyasi darajasi prognozlari va kassa rejalari bajarilishi uchun ragʻbatlantirish va moddiy javobgarlik tizimi quyidagi rahbarlar va mansabdor shaxslar uchun belgilanadi:

Qoraqalpogʻiston Respublikasi Vazirlar Kengashi Raisi, viloyatlar, shaharlar va tumanlarning hokimlari, shuningdek ularning mintaqalarni iqtisodiy rivojlantirish va isteʼmol bozorining ahvoli uchun javob beruvchi oʻrinbosarlari (hokimlarning iqtisodiyot boʻyicha, xalq isteʼmol mollari, savdo va pulli xizmatlar boʻyicha oʻrinbosarlari);

tijorat banklarining respublika Qoraqalpogʻiston Respublikasi, viloyat, shahar, tuman boʻlinmalari va filiallarining rahbarlari va pul muomalasi hamda kassa operatsiyalari boʻlimlarining boshliqlari, pul muomalasi boʻyicha mutaxassislari;

Oʻzbekiston Respublikasi Markaziy bankining hududiy bosh boshqarmalari rahbarlari va pul muomalasi boʻlimlarining boshliqlari;

respublika Qoraqalpogʻiston Respublikasi , viloyat, shahar, tuman soliq organlarining rahbarlari hamda savdo korxonalari va xizmat koʻrsatish sohasini nazorat qilish boʻlimlari boshliqlari va mutaxassislari uchun-kassa rejalarining bajarilishi qismi boʻyicha.

2. Naqd pul mablagʻlari emissiyasi darajasi prognozlari va kassa rejalari oʻz vaqtida bajarilganligi va oshirib bajarilganligi uchun mazkur Nizomning 1-bandida nazarda tutilgan mansabdor shaxslar:

oylik prognozlar bajarilganligi va oshirib bajarilganligi uchun — lavozim maoshining 30 foizigacha miqdorda;

yil choragi prognozlari bajarilganligi va oshirib bajarilganligi uchun — lavozim maoshining 50 foizigacha miqdorda mukofotlanadilar

3. Naqd pul mablagʻlari emissiyasi darajasining belgilangan prognozlari va kassa rejalari bajarilmaganligi uchun mazkur Nizomning 1-bandida koʻrsatib oʻtilgan mansabdor shaxslarga Oʻzbekiston Respublikasi Mehnat kodeksining 181-moddasiga muvofiq:

belgilangan oylik va yil choragi prognozlari bajarilmaganligi uchun — oʻrtacha oylik ish haqining 10 foizidan 20 foizigacha miqdorda jarima solinadi.

4. Mazkur Nizomning bajarilishini Pul-kredit siyosati boʻyicha respublika komissiyasi nazorat qiladi va u har oyda oʻzining majlislarida ushbu qaror talablariga muvofiq respublika mintaqalaridagi ishlarning ahvolini koʻrib chiqadi va Vazirlar Mahkamasiga tegishli takliflar kiritadi.

5. Jarimalar:

Qoraqalpogʻiston Respublikasi Vazirlar Kengashining Raisiga, viloyatlar va Toshkent shahar hokimlariga hamda ularning tegishli oʻrinbosarlariga — Pul-kredit siyosati boʻyicha respublika komissiyasining taqdimnomasiga koʻra Oʻzbekiston Respublikasi Vazirlar Mahkamasining Raisi tomonidan;

shaharlar va tumanlarning hokimlariga va ularning tegishli oʻrinbosarlariga — tegishli ravishda Qoraqalpogʻiston Respublikasi Vazirlar Kengashining yoki yuqori turuvchi hokimning qarori bilan;

bank muassasalari hamda soliq organlarining rahbarlariga va tegishli boʻlimlarining boshliqlari va mutaxassislariga — ularning yuqori turuvchi organlari tomonidan solinadi.

Jarimalar Oʻzbekiston Respublikasi Mehnat kodeksining 182-moddasida nazarda tutilgan tartibda solinadi.