Oʻzbekiston Respublikasining Budjet kodeksi va Oʻzbekiston Respublikasi Prezidentining 2009-yil 22-dekabrdagi PQ-1245-son “Oʻzbekiston Respublikasining 2010-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qaroriga muvofiq Oʻzbekiston Respublikasi Moliya vazirligi va Davlat soliq qoʻmitasi qaror qiladilar:

1. Yuqori budjetdan quyi budjetlarga oʻtkazib beriladigan daromadlarni rejalashtirish, ajratish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom yuqori budjetdan quyi budjetlarga mazkur hududlarda shakllangan oʻtkazib beriladigan daromadlarni rejalashtirish, ajratish tartibini belgilaydi.

1. Tegishli hududlarda shakllangan daromadlar summasini Oʻzbekiston Respublikasi respublika budjetidan tegishli budjetlarga oʻtkazib berilishi Oʻzbekiston Respublikasi Iqtisodiyot va moliya vazirligi tomonidan, Qoraqalpogʻiston Respublikasi respublika budjeti, viloyatlar budjetlari va Toshkent shahrining shahar budjetidan quyi budjetlarga esa, tegishli ravishda Qoraqalpogʻiston Respublikasi Iqtisodiyot va moliya vazirligi va viloyatlar hamda Toshkent shahar iqtisodiyot va moliya bosh boshqarmalari tomonidan amalga oshiriladi.

2. Oʻzbekiston Respublikasi respublika budjetidan mazkur hududlarda shakllangan daromadlar summasi beriladigan hududlar roʻyxati Oʻzbekiston Respublikasining navbatdagi yil uchun “Oʻzbekiston Respublikasining Davlat budjeti toʻgʻrisida”gi Qonuni bilan belgilangan tartibda tasdiqlanadi.

Oʻzbekiston Respublikasi respublika budjetidan tegishli budjetlarga berilayotgan tushumlarni tushirayotgan korxonalar roʻyxati Oʻzbekiston Respublikasi Iqtisodiyot va moliya vazirligi va Soliq qoʻmitasi tomonidan tasdiqlanadi.

3. Qoraqalpogʻiston Respublikasi respublika budjeti, viloyatlar budjetlari va Toshkent shahrining shahar budjetidan mazkur tuman (shahar)larda shakllangan daromadlar summasi beriladigan tuman (shahar)lar roʻyxati navbatdagi yil uchun Qoraqalpogʻiston Respublikasi budjeti, viloyatlar budjetlari va Toshkent shahrining shahar budjetini tasdiqlash jarayonida Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari tomonidan tasdiqlanadi.

4. Oʻtkazib beriladigan daromadlar summasi tegishli tuman (shahar)larda shakllangan, meʼyoriy ajratmalarga muvofiq Oʻzbekiston Respublikasining respublika budjetiga ajratma qilinadigan soliqlar va boshqa majburiy toʻlovlar summalaridan kelib chiqqan holda aniqlanadi. Koʻrsatilgan mablagʻlar tegishli ravishda Qoraqalpogʻiston Respublikasi respublika budjetidan, viloyatlar budjetlaridan va Toshkent shahrining shahar budjetidan ajratiladi. Bunda, oʻtkazib beriladigan daromadlar mazkur budjetlarda nazarda tutilgan barcha xarajatlarni qoplash uchun yetishmayotgan daromadlar hajmidan oshib ketishi mumkin emas.

5. Agarda ushbu tuman (shahar)larda shakllanayotgan budjetga soliq va boshqa majburiy toʻlovlar summalarini yetishmasligi sababli tuman (shahar)lar budjetlari daromadlarining barcha yetishmayotgan qismini oʻtkazib beriladigan daromad koʻrinishida oʻtkazib berishning imkoniyati boʻlmasa, yetishmayotgan qismi rejali dotatsiyalar koʻrinishida ajratiladi.

6. Agarda, tegishli budjetlarga tushgan soliqlar va boshqa majburiy toʻlovlar boʻyicha prognoz koʻrsatkichlari ortigʻi bilan bajarilganda, rejadagi va haqiqatdagi tushumlar oʻrtasidagi farq tegishli budjetlar daromadi boʻlib hisoblanadi va taqsimlanmaydi hamda quyi budjetlarga berilmaydi.

7. Oʻzbekiston Respublikasi respublika budjetidan tegishli budjetlarga oʻtkazib beriladigan daromadlarni ajratish Oʻzbekiston Respublikasi Iqtisodiyot va moliya vazirligi tomonidan respublika budjetining yagona gʻazna hisobvaragʻidan amalga oshiriladi, Qoraqalpogʻiston Respublikasi respublika budjetidan, viloyatlar budjetlaridan va Toshkent shahrining shahar budjetidan quyi budjetlarga esa, tegishlicha Qoraqalpogʻiston Respublikasi Iqtisodiyot va moliya vazirligi va viloyatlar (Toshkent shahri) iqtisodiyot va moliya bosh boshqarmalari tomonidan tegishli shaxsiy gʻazna hisobvaraqlaridan amalga oshiriladi.

8. Barcha tushumlardan kelib chiqqan holda har yilgi natijalar boʻyicha Qoraqalpogʻiston Respublikasi budjeti, viloyatlar va Toshkent shahrining shahar budjetlariga, shuningdek, tuman (shahar)lar budjetlariga oʻtkazib beriladigan daromadlarning tasdiqlangan rejasi kelib tushmagan soliqlar va boshqa majburiy toʻlov summalariga qayta koʻrib chiqiladi.

Bunda, turli darajadagi budjetlar oʻrtasida vujudga kelgan oʻzaro munosabatlar belgilangan tartibda oʻzaro hisob-kitoblar bilan tartibga solinadi.

9. Qoraqalpogʻiston Respublikasi budjeti, viloyatlar budjetlari va Toshkent shahrining shahar budjeti daromadlari va xarajatlarining oylar* (choraklar) boʻyicha taqsimlanishini tuzishda oʻtkazib beriladigan daromadlarning summasi budjetga kelib tushishi koʻzda tutilgan, ushbu hududlarda shakllangan, ammo Oʻzbekiston Respublikasi respublika budjetiga kelib tushayotgan soliqlar va boshqa majburiy toʻlovlar summalarini hisobga olgan holda nazarda tutiladi.

10. Oʻzbekiston Respublikasi Iqtisodiyot va moliya vazirligi har oy tasdiqlangan jadvalga muvofiq Qoraqalpogʻiston Respublikasi budjeti, viloyatlar va Toshkent shahrining shahar budjeti daromadlarining oylik (choraklik) rejasida koʻzda tutilgan mablagʻlarni tegishli hududiy gʻaznachilik hisobvaraqlariga oʻtkazadi.

11. Oʻzbekiston Respublikasi Iqtisodiyot va moliya vazirligi oʻtkazib beriladigan daromadlarni oʻtkazish bilan bir vaqtda har oy Qoraqalpogʻiston Respublikasi budjeti, viloyatlar va Toshkent shahrining shahar budjetlariga oʻtkazib beriladigan, respublika budjetiga haqiqatda kelib tushgan soliqlar va boshqa majburiy toʻlovlarning tushumlari summalarini Oʻzbekiston Respublikasi Soliq qoʻmitasi tomonidan taqdim qilinadigan maʼlumotlar asosida tahlil qiladi.

12. Agarda, Qoraqalpogʻiston Respublikasi budjeti, viloyatlar budjetlariga va Toshkent shahrining shahar budjetiga oʻtkazib beriladigan, respublika budjetiga soliqlar va boshqa majburiy toʻlovlar boʻyicha tushumlar mavjud boʻlmaganda yoki yetishmaganda, Oʻzbekiston Respublikasi Iqtisodiyot va moliya vazirligi hisobot oyidan keyingi ikkinchi oyida budjetga kelib tushmagan soliqlar va boshqa majburiy toʻlovlar summasi miqdorida budjet ssudasini rasmiylashtiradi.

Bunda, agar butun yil boʻyicha oʻtkazib beriladigan daromadlar rejasi bajarilishi yoki ortigʻi bilan bajarilishi taʼminlanganda, quyi budjetlarga oʻtkazib beriladigan daromadlar summasi oldin olingan budjet ssudalari summasiga koʻpayadi va yil oxirida yuqori budjet bilan oʻzaro hisob-kitoblar asosida qaytariladi.

13. Budjet ssudalarini berish va olingan budjet ssudalarini qaytarish Oʻzbekiston Respublikasi Budjet kodeksining 140-moddasiga muvofiq amalga oshiriladi.

14. Tuman (shahar) budjetlari daromadlari va xarajatlarining oylar (choraklar) boʻyicha taqsimlanishini tuzishda oʻtkazib beriladigan daromadlarning summasi Oʻzbekiston Respublikasi respublika budjetiga ajratma qilinadigan, ammo ushbu tuman (shahar)larda shakllanadigan soliqlar va boshqa majburiy toʻlovlar summalarini hisobga olgan holda koʻzda tutiladi.

15. Qoraqalpogʻiston Respublikasi, viloyatlar va Toshkent shahar boʻyicha Gʻaznachilik xizmati boshqarmalari har oyda iqtisodiyot va moliya bosh boshqarmalari tomonidan taqdim qilinadigan tasdiqlangan jadvalga asosan tegishli tumanlar (shaharlar) budjetlarining oylik (choraklik) daromadlari rejasida koʻzda tutilgan mablagʻlarni tegishli hududiy gʻaznachilik hisobvaraqlariga oʻtkazadilar.

16. Qoraqalpogʻiston Respublikasi Iqtisodiyot va moliya vazirligi, viloyatlar va Toshkent shahar iqtisodiyot va moliya bosh boshqarmalari oʻtkazib beriladigan daromadlarni oʻtkazish bilan bir vaqtda har oy, Oʻzbekiston Respublikasi respublika budjetiga ajratma qilingan va tegishli tumanlar (shaharlar) hududida shakllangan, Qoraqalpogʻiston Respublikasi budjetiga, viloyatlar budjetlariga va Toshkent shahrining shahar budjetiga soliqlar va boshqa majburiy toʻlovlarning haqiqiy tushumlari summalarini tegishli hududlar soliq boshqarmalarining maʼlumotlari asosida tahlil qiladi.

17. Agarda, tumanlar (shaharlar) budjetlariga oʻtkazib beriladigan, soliqlar va boshqa majburiy toʻlovlar boʻyicha tushumlar mavjud boʻlmaganda yoki yetishmaganda, Qoraqalpogʻiston Respublikasi Iqtisodiyot va moliya vazirligi, viloyatlar va Toshkent shahar iqtisodiyot va moliya bosh boshqarmalari hisobot oyidan keyingi ikkinchi oyda budjetga kelib tushmagan soliqlar va boshqa majburiy toʻlovlar summasi miqdorida budjet ssudasini rasmiylashtiradi.

Bunda, agar butun yil boʻyicha oʻtkazib beriladigan daromadlar rejasi bajarilishi yoki ortigʻi bilan bajarilishi taʼminlanganda, oʻtkazib beriladigan daromadlar summasi oldin olingan budjet ssudalari summasiga koʻpayadi va yil oxirida yuqori budjet bilan oʻzaro hisob-kitoblar asosida qaytariladi.

18. Budjet ssudalarini berish va olingan budjet ssudalarini qaytarish Oʻzbekiston Respublikasi Budjet kodeksining 140-moddasiga muvofiq amalga oshiriladi.

19. Oʻzbekiston Respublikasi respublika budjeti, Qoraqalpogʻiston Respublikasi respublika budjeti, viloyatlar budjetlari va Toshkent shahrining shahar budjeti hisobidan ajratilgan oʻtkazib beriladigan daromadlar Oʻzbekiston Respublikasi Davlat budjeti ijrosi toʻgʻrisidagi hisobotda Oʻzbekiston Respublikasi Davlat budjeti xarajatlar tasnifining tegishli boʻlim va paragraflari boʻyicha aks ettiriladi.

Qoraqalpogʻiston Respublikasi budjeti, viloyatlar va tuman (shahar)lar budjetlariga kelib tushgan oʻtkazib beriladigan daromadlar Oʻzbekiston Respublikasi Davlat budjeti ijrosi toʻgʻrisidagi hisobotda Oʻzbekiston Respublikasi Davlat budjeti daromadlari tasnifining tegishli boʻlim va paragraflari boʻyicha aks ettiriladi.