“Pochta aloqasi toʻgʻrisida”gi Oʻzbekiston Respublikasi Qonunini amalga oshirish maqsadida Vazirlar Mahkamasi qaror qiladi:

1. Quyidagilar:

Pochta aloqasi xizmatlaridan foydalanishda afzalliklar beriladigan foydalanuvchilarning ayrim toifalari roʻyxati 1-ilovaga muvofiq;

Pochta aloqasi xizmatlaridan foydalanishda afzalliklar beriladigan foydalanuvchilarning ayrim toifalariga pochta aloqasi xizmatlari koʻrsatish tartibi toʻgʻrisidagi Nizom 2-ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N.Aripov zimmasiga yuklansin.

Oʻzbekiston Respublikasi Oliy Majlisining Qonunchilik palatasi

Oʻzbekiston Respublikasi Oliy Majlisining Senati

Oʻzbekiston Respublikasi Prezidentining Administratsiyasi

Oʻzbekiston Respublikasi Vazirlar Mahkamasi

Qoraqalpogʻiston Respublikasi Joʻqorgʻi Kengesi

Qoraqalpogʻiston Respublikasi Vazirlar Kengashi

Viloyatlar va Toshkent shahar hokimliklari

Oʻzbekiston Respublikasi Konstitutsiyaviy sudi

Oʻzbekiston Respublikasi Oliy sudi

Oʻzbekiston Respublikasi Markaziy saylov komissiyasi

Oʻzbekiston Respublikasi Bosh prokuraturasi

1. Ushbu Nizom pochta aloqasi xizmatlaridan foydalanishda afzalliklar beriladigan foydalanuvchilarning ayrim toifalariga pochta aloqasi xizmatlari koʻrsatish tartibini belgilaydi.

2. Ushbu Nizomning amal qilishi pochta aloqasi xizmatlari koʻrsatuvchi “Oʻzbekiston pochtasi” ochiq aksiyadorlik jamiyati, uning mintaqaviy (viloyat) pochta aloqasi tashkilotlari (keyingi oʻrinlarda mintaqaviy pochta aloqasi tashkilotlari deb ataladi), pochta aloqasi obyektlari, “Xalqaro pochtamt” ixtisoslashtirilgan filiali tomonidan bajariladigan pochta aloqasi xizmatlaridan foydalanishda afzalliklar beriladigan foydalanuvchilar ayrim toifalarining pochta joʻnatmalariga tatbiq etiladi.

Pochta aloqasi xizmatlaridan foydalanishda afzalliklar beriladigan foydalanuvchilarning ayrim toifalari (keyingi oʻrinlarda foydalanuvchilarning ayrim toifalari deb ataladi) roʻyxati Oʻzbekiston Respublikasi Vazirlar Mahkamasi tomonidan belgilanadi.

3. Foydalanuvchilarning ayrim toifalari tomonidan joʻnatiladigan pochta joʻnatmalariga joʻnatuvchidan adresatgacha boʻlgan butun oʻtish yoʻli davomida “HUKUMATGA OID” belgisi bilan ishlov beriladi, joʻnatiladi va topshiriladi.

4. Quyidagilar “HUKUMATGA OID” belgisiga ega pochta joʻnatmalari boʻlishi mumkin:

xatlar (oddiy, buyurtma, qiymati eʼlon qilingan);

banderollar (oddiy, buyurtma, qiymati eʼlon qilingan);

posilkalar (oddiy, qiymati eʼlon qilingan).

“HUKUMATGA OID” belgisiga ega pochta joʻnatmalari pochta aloqasining hududiy tashkilotlari yoki pochta aloqasi bogʻlamalari, pochtamtlarning buyruqlari bilan belgilangan ajratilgan pochta aloqasi boʻlimlari tomonidan qabul qilinadi.

“HUKUMATGA OID” belgisiga ega pochta joʻnatmalariga boshqa pochta joʻnatmalaridan alohida, yirik pochta aloqasi boʻlimlarida esa — maxsus ish joylarida ishlov beriladi va belgilangan manzil boʻyicha eng tez usulda joʻnatiladi.

5. “HUKUMATGA OID” belgisiga ega pochta joʻnatmalari faqat ushbu Roʻyxatga kiritilgan foydalanuvchilarning rahbarlari nomiga va rahbarlari nomidan joʻnatiladi.

6. “HUKUMATGA OID” belgisiga ega pochta joʻnatmalarini qabul qilish, ularga ishlov berish, ularni tashish va yetkazib berish (topshirish) ushbu Nizomda nazarda tutilgan talablarni hisobga olgan holda pochta joʻnatmalarining tegishli turlari uchun belgilangan tartibda amalga oshiriladi.

7. “HUKUMATGA OID” belgisiga ega pochta joʻnatmalarining oʻlchami, ogʻirligi va oʻrovi pochta joʻnatmalarining tegishli turlari uchun Pochta aloqasi xizmatlari koʻrsatishning amaldagi qoidalarida belgilangan talablarga muvofiq boʻlishi kerak.

8. “HUKUMATGA OID” belgisiga ega pochta joʻnatmalari joʻnatuvchilardan belgilangan shakldagi roʻyxatlar boʻyicha yopiq holda qabul qilinadi.

Oddiy yozma xat-xabarlarni joʻnatish uchun roʻyxatlar bir nusxada, roʻyxatga olinadigan pochta joʻnatmalarini joʻnatish uchun — ikki nusxada toʻldiriladi.

9. Roʻyxatga olinadigan pochta joʻnatmalarini qabul qilishda roʻyxatlarda quyidagilar koʻrsatiladi: pochta joʻnatmasining belgilangan manzili, adresatning familiyasi (nomi), ogʻirligi, joʻnatish uchun toʻlov va kvitansiya daftari boʻyicha pochta joʻnatmasining raqami. “HUKUMATGA OID” belgisiga ega oddiy yozma xat-xabarlarni qabul qilishda — roʻyxatlarda xatlarning konvertlarda koʻrsatilgan chiqish raqamlari koʻrsatiladi.

10. “HUKUMATGA OID” belgisiga ega pochta joʻnatmalarini joʻnatish uchun toʻlov tegishli pochta joʻnatmalarini qabul qilish vaqtida amalda boʻlgan tariflar boʻyicha toʻlanadi.

11. “HUKUMATGA OID” belgisiga ega oddiy va buyurtma xatlar, oddiy va buyurtma banderollar hattoki bunday belgiga ega bir dona pochta joʻnatmasi mavjud boʻlganda ham boshqa xat-xabarlardan alohida yigʻindilarga joylanadi.

12. “HUKUMATGA OID” belgisiga ega yozma xat-xabarli yigʻindilar, miqdoridan qatʼi nazar, barcha oʻtish bosqichlarida alohida qoplarda joʻnatiladi.

13. “HUKUMATGA OID” belgisiga ega pochta joʻnatmalari barcha mumkin boʻlgan usullar va vositalar bilan eng qisqa muddatlarda yetkazib beriladi.

14. “HUKUMATGA OID” belgisiga ega oddiy pochta joʻnatmalari belgilangan shakldagi hujjatlarga imzo qoʻygan holda belgilangan tartibda topshiriladi, bu hujjatlarda quyidagilar koʻrsatiladi: qabul qilingan joyi, pochta joʻnatmasining qobigʻiga qoʻyilgan birinchi chiqish raqami (raqami boʻlmaganda “r/y” deb koʻrsatiladi) va adresat nomi.

15. Ushbu Nizom talablarini bajarmaganlik yoki zarur darajada bajarmaganlik uchun aloqa xodimlari qonunchilikka muvofiq javob beradilar.