O‘zbekiston Respublikasi Hukumati bilan Qozog‘iston Respublikasi Hukumati, bundan keyin Tomonlar deb ataluvchilar,

aloqa sohasida hamkorlikni rivojlantirish istagida,

radioaloqa, televideniye va radioeshittirish xizmatlariga talab darajasini hisobga olib,

Tomonlar davlatlari radioxizmatlarining o‘zaro zararli xalaqitlarni oldini olish maqsadida 30.0 — 1000.0 MGts radiochastotalar polosasidagi radiochastota o‘zlashtiruvlarini muvofiqlashtirish zarur deb hisoblab,

Xalqaro Elektraloqa Ittifoqi (XEI)ning Radioaloqa reglamentiga muvofiq faoliyat yuritib,

Ushbu Bitim maqsadlarida quyidagi atamalar:

“chegaraoldi hudud” — bir Tomonning davlat radioelektron vositalari boshqa Tomon davlat hududida, televideniye va radioeshittirishdan tashqari, ushbu Bitimda ko‘rsatilgan xalaqitlarni keltirib chiqarishi mumkin bo‘lgan O‘zbekiston Respublikasi bilan Qozog‘iston Respublikasi o‘rtasidagi chegaraning har ikki tomonida kengligi 50 km bo‘lgan Tomonlar davlatlarining hududini;

“maxfiy axborot” — radiochastota o‘zlashtiruvlarini muvofiqlashtirish jarayonida ishtirok etayotgan vakolatli davlat organlari bilan ruxsati chegaralangan, Tomonlarning davlat siriga taalluqli bo‘lmagan ma’lumotlarni;

“radiochastota o‘zlashtiruvlarini muvofiqlashtirish” — radioelektron vositalarni ishga tushirish va foydalanish uchun ushbu radioelektron vositalarning radiochastota o‘zlashtiruvlari xususiyatlariga muvofiq Tomonlar roziligini olish jarayonini anglatadi.

Tomonlarning hamkorligi xalqaro huquqning umum e’tirof etilgan me’yorlari, Tomonlar davlatlarining milliy qonun hujjatlari va ushbu bitim qoidalari bilan tartibga solinadi.

Ushbu Bitimni bajarish bo‘yicha nazorat qilish va harakatlarni muvofiqlashtirishni amalga oshirish bo‘yicha Tomonlarning vakolatli organlari quyidagilar hisoblanadi:

O‘zbekiston tomonidan — O‘zbekiston aloqa va axborotlashtirish agentligi;

Qozog‘iston tomonidan — Axborotlashtirish va aloqa bo‘yicha Qozog‘iston Respublikasi agentligi.

Tomonlar vakolatli organlarining qayta tashkil etilishida rasmiy nomi o‘zgargan holda ular bu haqda bir-birlarini diplomatik kanallar orqali kechiktirmasdan xabardor etadilar.

Tomonlarning vakolatli organlari:

ushbu Bitim doirasida zarur axborot almashuvini amalga oshiradilar;

xalaqitlar paydo bo‘lgan holda, ularni aniqlaydilar va chora ko‘radilar;

ushbu Bitimni qo‘llash doirasida jarayon mexanizmlarini belgilaydilar va qabul qiladilar, muvofiqlashtirish hududini o‘rnatadilar;

ushbu Bitim doirasida texnik asosda radioxizmatlarning radiochastota o‘zlashtiruvlarini muvofiqlashtirish yoki alohida radiochastota polosalaridan foydalanish bo‘yicha bitimlarni tuzishga oid takliflarni Tomonlar davlatlarining milliy qonun hujjatlarida ko‘rsatilgan tartibda kiritadilar.

Tomonlar chegaraoldi hududlarda radioxizmatlarning turli xil stansiyalarining 30.0 — 1000.0 MGts radiochastota polosasida radiochastotalardan foydalanishni muvofiqlashtirish masalalari bo‘yicha ushbu Bitim qoidalariga muvofiq hamkorlik qiladilar.

1. Ushbu Bitimga muvofiq quruqlikdagi harakatchan, qayd qilingan, radioeshittirish va boshqa radioxizmatlar stansiyalarining radiochastota o‘zlashtiruvlarini muvofiqlashtirish amalga oshiriladi.

Tomonlar vakolatli organlarining mas’uliyatiga kirmaydigan radioxizmatlar stansiyalarining radiochastota o‘zlashtiruvlarini muvofiqlashtirish ushbu Bitimning ajralmas qismi bo‘lgan tegishli bayonnomalar tuzilmagunga qadar ushbu Bitim qoidalari bilan tartibga solinmaydi.

2. 5-moddada ko‘rsatilgan radiochastotalar polosasida, davlatlarning chegaraoldi hududlarida joylashgan stansiyalar, shuningdek Tomonlarning vakolatli organlari tomonidan tuziladigan muvofiqlashtiruvning texnik asoslari bo‘yicha qo‘shimcha bitimda tegishli xizmatlarga belgilangan darajadan yuqori bo‘lgan xalaqitlarni chegaraoldi hududda hosil qilgan taqdirda chegaraoldi hududlar tashqarisidagi alohida stansiyalarning radiochastota o‘zlashtiruvlari muvofiqlashtiriladi.

3. Chegaraoldi hududlardagi qabul qiluvchi stansiyalarning radiochastota o‘zlashtiruvlarini muvofiqlashtirish ularni xalaqitlardan muhofaza etish zaruriyati yuzaga kelgan holda amalga oshirilishi mumkin.

1. Tomonlar quyidagi radiochastota toifalarini belgilaydilar:

aloqa tarmoqlari (uyali aloqa, radioeshittirish tarmoqlari, radiorele liniyalari va boshqalar)ni rivojlantirish uchun Tomonlar davlatlarining vakolatli organlari muvofiqlashtirishi lozim bo‘lgan rejalashtirilgan aloqa tarmoqlari radiochastota. Bunday tarmoqlar katta mablag‘larni talab qilishi, ularni ishga tushirishda uzoq muddatlar sarflanishi mumkin va faqat muvofiqlashtirilgan va tasdiqlangan chastota-hududiy rejalar natijasida yaratilishi mumkin;

Tomonlar muvofiqlashtirgan va foydalanish uchun kelishilgan muvofiqlashtirilgan radiochastota.

Muvofiqlashtirilgan radiochastotani tayinlash (o‘zlashtirish) boshqa Tomon bilan oldindan muvofiqlashtirilgan shartlar asosida amalga oshiriladi.

2. Muvofiqlashtirilganlar toifasidagi radiochastota ro‘yxatiga kirgan radiochastota o‘zlashtiruvlari Tomonlar o‘zaro kelishuv asosida amalga oshirgan deb hisoblanadi.

Har bir Tomonning barcha radiochastota o‘zlashtiruvlari muvofiqlashtirilgan deb quyidagilar hisoblanadi:

1991-yilgacha markazlashtirilgan sobiq Sovet Ittifoqi aloqa ma’muriyati tomonidan belgilangan bo‘lsa;

ushbu Bitim kuchga kirish davrigacha ikkala Tomon aloqa ma’muriyatlari tomonidan muvofiqlashtirilgan bo‘lsa;

Xalqaro Elektraloqa Ittifoqining Butunjahon va Mintaqaviy radioaloqa konferensiyalarida qabul qilingan Rejalarga kiritilgan Tomonlarning radiochastota o‘zlashtiruvlari bo‘lsa.

Bitim imzolanishi davrida XEI Haftalik sirkulyarining birinchi qismida chop etilgan Tomonlarning radiochastota o‘zlashtiruvlariga berilgan talabnomalar ushbu Bitim qoidalariga ko‘ra muvofiqlashtirilishi lozim.

3. Tomonlarning har biri yuqorida ko‘rsatilgan toifadagi radiochastotalar ro‘yxatiga ega bo‘lishi va ularni o‘tkazilgan muvofiqlashtirish asosida to‘ldirib borishi lozim.

Tomonlar muvofiqlashtirilgan radiochastotalar (stansiyalar) ro‘yxatlari bilan kelishilgan shaklda almashadilar. Ro‘yxatlarga faqat chegaraoldi hududlarda joylashgan yoki bu hududlarda xalaqitlarni yuzaga keltirayotgan stansiyalarning tavsifi kiritiladi.

Tomonlar radiochastotalarining ro‘yxatlari, qoidaga ko‘ra, har yili Tomonlar ekspertlarining yig‘ilishlarida aniqlashtiriladi.

4. Ushbu Bitimning 5-moddasida ko‘rsatilgan radiochastotalar polosasidagi Tomonlarning amaldagi stansiyalari orasida yuzaga kelishi mumkin bo‘lgan xalaqit vaziyatlarini Tomonlar ko‘rib chiqadilar va ularni bartaraf etish choralarini ko‘radilar.

Xalaqit sifatida radioaloqa xizmatining sifatini jiddiy yomonlashuviga olib keluvchi yoki bir necha bor uzuvchi yoxud muvofiqlashtiruvning texnik asoslari bo‘yicha qo‘shimcha bitimda belgilangan xalaqitning maksimal yo‘l qo‘yilgan kuchlanishlar maydoni darajasining oshishi sababli uning faoliyatini tugatuvchi har qanday nurlanishlar deb hisoblanishi kerak.

1. Tomonlar o‘rtasida axborot almashish tartibi, axborotning maxfiylik darajasi va uning muhofazasi, shuningdek har bir muayyan holatda axborotni berishda maxfiylikni buzganligi uchun mas’uliyat ushbu Bitim va Tomonlar davlatlarining milliy qonun hujjatlari asosida aniqlanadi.

2. Tomonlar davlatlarining milliy qonun hujjatlarida o‘rnatilgan tartibda chegaraoldi hududlarda joylashgan fuqarolik maqsadida ishlayotgan radioelektron vositalar bo‘yicha Tomonlar faoliyati uchun zarur bo‘lgan hujjatlarni Tomonlar bir-biriga topshirish majburiyatini oladilar.

3. Tomonlar o‘z faoliyatlarida foydalanish uchun olgan maxfiy axborotga ega bo‘lgan zarur ma’lumotlarni qat’iyan maqsadli holda ishlatishlari shart. Maxfiy axborotdan foydalanish huquqiga ega bo‘lgan mutaxassislar doirasi Tomonlar davlatlarining milliy qonun hujjatlariga muvofiq, aniqlanadi. Bunda Tomonlar chastota o‘zlashtiruvlarining xalqaro muvofiqlashtiruviga mas’ul shaxslardan zarur minimal soni maxfiy axborotdan foydalanish huquqiga ega bo‘lish zaruriyatidan kelib chiqadilar.

4. Maxfiy axborotdan foydalanish huquqiga ega bo‘lgan shaxslar maxfiy axborot bilan ishlashda Tomonlar davlatlarida o‘rnatilgan talablarga rioya qilishga majburlar.

5. Tomonlar sir saqlash va olingan axborotni oshkora qilmaslik bo‘yicha barcha choralarni ko‘rish majburiyatini oladilar.

6. Berilayotgan axborot maxfiyligining darajasini axborotni berayotgan Tomon belgilaydi.

1. Tomonlarning vakolatli organlari aloqa texnikasining tez rivojlanishi va ko‘rsatilgan protseduralarini o‘z vaqtida o‘zgartirishlar kiritish zaruriyati yuzaga kelgani sababli texnik vositalar va boshqa masalalarda qo‘llaniladigan muvofiqlashtirishni o‘tkazish protseduralarini ishlab chiqish va tasdiqlashga mas’ul ekspertlarni tayinlaydilar.

2. Aloqa texnikasi taraqqiyotini hisobga olib, Tomonlar muvofiqlashtiruvning texnik asoslarini aniqlash va kelgusida rivojlantirish maqsadida ekspertlar yig‘ilishlarini o‘tkazadilar.

1. Bir Tomon uning uchun radiochastotalar ro‘yxatlarida belgilanmagan yangi radiochastota o‘zlashtiruvidan foydalanishdan oldin yoki muvofiqlashtirilganlar toifasiga kiruvchi radiochastotalar ro‘yxatiga o‘zgartish kiritishni xohlasa, u XEI Radioaloqa reglamenti talablariga asosan muvofiqlashtirishni o‘tkazishi kerak.

2. Muvofiqlashtirish uchun so‘rovnoma yuborilgan Tomon uni ko‘rib chiqishi va 60 kun ichida asoslangan yozma javob yuborishi lozim. Agar u so‘ralayotgan radiochastota o‘zlashtiruvidan foydalanishga rozi bo‘lmasa, muammoni qoniqarli tarzda hal etish uchun o‘z takliflarini berishi kerak.

3. Agar muvofiqlashtirish uchun yozma so‘rov xatini yuborgan Tomon 90 kun ichida yozma tarzda javob olmasa, u boshqa Tomonning so‘ralayotgan radiochastota o‘zlashtiruvidan foydalanishga e’tirozi yo‘q deb hisoblaydi, uni muvofiqlashtirilgan radiochastotalar ro‘yxatiga kiritadi va bu haqda boshqa Tomonni yozma ravishda xabardor etadi.

4. Quyidagi hollarda radiochastota o‘zlashtiruvlarini muvofiqlashtirish talab qilinmaydi:

1) agar muvofiqlashtirilgan radiochastota o‘zlashtiruvidan foydalanuvchi stansiyada boshqa Tomon davlati hududida xalaqit paydo bo‘lishiga olib kelmaydigan tavsiflargina o‘zgargan bo‘lsa;

2) agar ilgari muvofiqlashtirilgan radiochastotada ishlaydigan qo‘shimcha stansiyaning ishga tushirilishi boshqa Tomon davlati hududida xalaqit paydo bo‘lishiga olib kelmasa.

5. Muvofiqlashtirilgan radiochastota o‘zlashtiruvidan foydalanuvchi asosiy stansiyaning ishi to‘xtatilsa, boshqa Tomonga uning o‘rniga ishga tushirilgan stansiyaning texnikaviy tavsifi xabar qilinadi.

6. Barcha hollarda, Tomonlardan biri muvofiqlashtirilgan radiochastota o‘zlashtiruvlari ro‘yxatiga muvofiqlashtirishni talab qilmaydigan o‘zgartirishlar kiritsa, jumladan muvofiqlashtirilgan stansiyadan foydalanishni to‘xtatgan holda ham, u bunday o‘zgartirishlar to‘g‘risida boshqa Tomonga xabar beradi.

Xalaqitlarni sezayotgan qabul qiluvchi stansiyasiga ega bo‘lgan Tomon hududida xalaqitlarni yuzaga keltiruvchi uzatgich stansiyalar joylashgan boshqa Tomonni bu haqda xabardor qiladi. Tomonlar xalaqitlarga tegishli masalalarni o‘zaro hamjihatlik va hamkorlik asosida hal etish uchun barcha kerakli choralarni ko‘radilar.

1. Ushbu Bitimda ko‘zda tutilmagan barcha masalalar bo‘yicha Tomonlar Radioaloqa Butunjahon konferensiyalari qoidalari, Radioaloqa xalqaro reglamenti va Xalqaro Elektraloqa Ittifoqining tavsiyalariga amal qiladilar.

2. Ushbu Bitim Tomonlar ishtirok etgan xalqaro bitimlarni va Tomonlarning har birida radiochastotalardan foydalanishni tartibga soladigan milliy qonun hujjatlarining Tomonlar bajarishiga to‘sqinlik qilmaydi.

Ushbu Bitim qoidalarini talqin qilish yoki qo‘llashda nizo va kelishmovchiliklar yuzaga kelgan holda Tomonlar ularni maslahatlashuv va muzokaralar yo‘li bilan hal etadilar.

Tomonlar ekspertlar uchrashuvlari xususida oldindan kelishib oladilar, tashkiliy masalalar uchrashuv o‘tkaziladigan davlat hududidagi Tomon hal qiladi, moliyaviy masalalar har bir Tomon zimmasiga yuklatiladi.

Ushbu Bitimga muvofiq Tomonlarning o‘zaro hamkorligida rus tilidan foydalaniladi.

Ushbu Bitimga Tomonlarning o‘zaro kelishuviga ko‘ra ushbu Bitimning ajralmas qismlari hisoblangan alohida bayonnomalar bilan rasmiylashtiriladigan o‘zgartish va qo‘shimchalar kiritilishi mumkin.

Tomonlarning aloqa ma’muriyatlari XEI Bosh kotibini ushbu Bitim tuzilganligi va uning mazmuni to‘g‘risida xabardor etadilar.

Ushbu Bitim uning kuchga kirishi uchun zarur bo‘lgan davlat ichki protseduralarini Tomonlar bajarganligi to‘g‘risida oxirgi yozma xabarnoma olingan sanadan boshlab kuchga kiradi.

Bitim noaniq muddatga tuziladi va Tomonlardan biri uning amal qilishini to‘xtatish niyati to‘g‘risida boshqa Tomonga yozma xabarnomani yuborgan sanadan olti oy o‘tgunga qadar o‘z kuchini saqlab qoladi.

Toshkent shahrida 2006-yil 20-martda ikki asl nusxada, o‘zbek, qozoq va rus tillarida tuzildi, bunda barcha matnlar bir xil kuchga ega.

Ushbu Bitimni talqin qilishda kelishmovchiliklar yuzaga kelgan holda Tomonlar rus tilidagi matnga murojaat qiladilar.