Oʻzbekiston Respublikasi Prezidentining 2006-yil 27-sentabrdagi PQ-475-sonli “Qimmatli qogʻozlar bozorini yanada rivojlantirish chora-tadbirlari toʻgʻrisida”gi Qarorini (Oʻzbekiston Respublikasi qonun hujjatlari toʻplami, 2006-yil 39-son, 387-modda, 51-52-son, 507-modda) ijrosini taʼminlash maqsadida, Oʻzbekiston Respublikasi Davlat mulkini boshqarish davlat qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi, Oʻzbekiston Respublikasi Davlat mulkini boshqarish davlat qoʻmitasi, Oʻzbekiston Respublikasi Moliya vazirligi va Oʻzbekiston Respublikasi Markaziy bank Boshqaruvi qaror qiladi:

1. Institutsional investorlar tomonidan korporativ qimmatli qogʻozlarga qilinadigan investitsiyalarning sifati va minimal darajasiga oʻrnatilgan meʼyoriy talablar toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiritilsin.

Mazkur Nizom Oʻzbekiston Respublikasi Prezidentining 2006-yil 27-sentabrdagi PQ-475-sonli “Qimmatli qogʻozlar bozorini yanada rivojlantirish chora-tadbirlari toʻgʻrisida”gi Qaroriga (Oʻzbekiston Respublikasi qonun hujjatlari toʻplami, 2006-yil 39-son, 387-modda, 51-52-son, 507-modda) muvofiq, institutsional investorlar tomonidan korporativ qimmatli qogʻozlarga qilinadigan investitsiyalarning sifati va minimal darajasiga oʻrnatilgan talablarni belgilab beradi.

1. Qimmatli qogʻozlar bozorida institutsional investor (keyingi oʻrinda – institutsional investor) boʻlib, investitsiya fondlari, sugʻurta kompaniyalari va tijorat banklari hisoblanadi.

2. Institutsional investorlar qimmatli qogʻozlar bilan operatsiyalarni qonunchilik hujjatlari talablariga muvofiq amalga oshiradilar.

3. Korporativ qimmatli qogʻozlarga qilinadigan investitsiyalarning sifatini taʼminlash maqsadida, institutsional investor uning boshqaruv organi tomonidan belgilangan tartibda tasdiqlanadigan investitsiya siyosati toʻgʻrisidagi nizomni ishlab chiqadi.

4. Institutsional investorning investitsiya siyosati toʻgʻrisidagi nizomida quyidagilar nazarda tutilishi lozim:

a) qimmatli qogʻozlar bilan operatsiyalarni amalga oshiradigan shaxslar uchun bitimlar boʻyicha qarorlar qabul qilish va cheklovlar oʻrnatish vakolatlari;

b) qimmatli qogʻozlar bilan operatsiyalarni amalga oshiradigan shaxslarga nisbatan qoʻyiladigan malaka talablari;

v) qimmatli qogʻozlar bilan amalga oshiriladigan operatsiyalar ustidan monitoring yuritadigan axborot tizimiga qoʻyiladigan talablar;

g) investitsion strategiyasi va maqsadlari (masalan, foyda olish, institutsional investorning aksiyadorlik jamiyatini boshqarishda ishtirok etishi, likvidlilikni saqlash, garov talablariga muvofiq kelish va h.k.);

d) institutsional investor mablagʻlarini investitsiya qilishni rejalashtirayotgan qimmatli qogʻozlarning xillari va turlari (toifalari), investitsiya muddatlari;

e) institutsional investor qanday usullar yordamida:

emitent va ularning faoliyat tarmoqlari boʻyicha aksiyalar konsentratsiyasini chegaralashni;

qimmatli qogʻozlarga qilingan qoʻyilmalarning xavfsizligini va ularning sifatini baholashni;

qimmatli qogʻozlar emitentlarining moliyaviy holatini va boshqarish tajribasini baholashni;

investitsiyalar diversifikatsiyasini amalga oshirishni rejalashtirmoqda;

j) korporativ qimmatli qogʻozlarga qilinadigan investitsiyalarning minimal darajasiga nisbatan meʼyoriy talablar.

5. Moliyaviy barqarorlikni taʼminlash maqsadida, institutsional investorlar oʻz aktivlarini ishonchlilik, diversifikatsiyalik, qaytarishlilik, foydalilik va likvidlilik tamoyillari asosida investitsiya qiladilar.

6. Institutsional investorning bitta korxona ustav kapitaliga, shuningdek, ushbu korxonaning boshqa qimmatli qogʻozlariga qilinadigan qoʻyilmalari, qonunchilik hujjatlariga hamda yuqorida keltirilgan investitsiya siyosati toʻgʻrisidagi nizomga muvofiq amalga oshiriladi.

7. Institutsional investor korporativ qimmatli qogʻozlarning xillari va turlarini hamda ularga rejalashtirayotgan investitsiyalarning minimal darajasi miqdorini mustaqil belgilaydi. Bunda, korporativ qimmatli qogʻozlarga investitsiyalarning minimal darajasi miqdori institutsional investorning vakolatli organi tomonidan uning investitsiya siyosati toʻgʻrisidagi nizomiga muvofiq amalga oshiriladi.

8. Mazkur Nizom talablarini buzgan aybdor shaxslar qonunchilik hujjatlarida belgilangan tartibda javobgar boʻladilar.

9. Mazkur Nizom Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi bilan kelishilgan.