“Toshkent traktor zavodi” ochiq aksiyadorlik jamiyatini barqaror rivojlantirish uchun qulay shart-sharoitlar yaratish, faoliyat koʻrsatayotgan ishlab chiqarishlarni xususiylashtirish, modernizatsiya qilish, texnik va texnologik jihatdan qayta jihozlash jarayoniga mamlakatimizdagi va xorijiy investorlarni jalb etish, shuningdek zamonaviy gʻildirakli traktorlar, tirkamalar, fermer xoʻjaliklari uchun mashinalar turkumini ishlab chiqarish boʻyicha yangi ishlab chiqarishlarni tashkil etish, ichki va tashqi bozorlarda raqobatga bardoshli mahsulotlar ishlab chiqarilishini taʼminlovchi tajriba-konstruktorlik bazasini rivojlantirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “2007—2010-yillarda xususiylashtirish jarayonlarini yanada chuqurlashtirish va xorijiy investitsiyalarni faol jalb qilish chora-tadbirlari toʻgʻrisida” 2007-yil 20-iyuldagi PQ-672-son qaroriga muvofiq “Toshkent traktor zavodi” ochiq aksiyadorlik jamiyati ustav fondining 82,75 foizi miqdoridagi aksiyalari davlat paketining xorijiy investorga ishlab chiqarishni modernizatsiya qilish, texnik va texnologik jihatdan qayta jihozlash, raqobatbardoshli, eksportga yoʻnaltirilgan mahsulot ishlab chiqarish boʻyicha aniq investitsiya majburiyatlari ostida, aksiyadorlik jamiyatini boshqarishda davlatning maxsus huquqini — “oltin aksiya”ni qoʻllagan holda sotilishi maʼlumot uchun qabul qilinsin.

2. Quyidagilar “Toshkent traktor zavodi” ochiq aksiyadorlik jamiyatini yanada rivojlantirishning asosiy vazifalari va yoʻnalishlari etib belgilansin:

loyihalashtirishning zamonaviy kompyuter texnologiyalarini qoʻllagan holda qishloq xoʻjaligi mashinasozligi sohasida konstruktorlik ishlari koʻlamini kengaytirish, innovatsiya faoliyatini amalga oshirish;

80, 100 va 120 ot kuchiga ega boʻlgan raqobatbardoshli gʻildirakli traktorlar, tirkamalar, ular bazasida turli modifikatsiyalardagi qishloq xoʻjaligi, transport, qurilish va kommunal xoʻjaligi mashinalari, fermer xoʻjaliklari uchun minitexnikalar ishlab chiqarishni rivojlantirish hamda isteʼmol tovarlari turlarini kengaytirish;

mamlakatimizdagi va xorijiy xaridorlarga mahsulotlar sotish tizimini takomillashtirish;

asosiy ishlab chiqarish bilan kooperatsiyalashgan holda ishlayotgan shuʼba korxonalar faoliyatini rivojlantirish, butlovchi buyumlar va ehtiyot qismlar ishlab chiqarish boʻyicha tarmoqlararo kooperatsiyani kengaytirish;

qishloq xoʻjaligi texnikasini sotish va ularga servis xizmati koʻrsatish boʻyicha korxonaning texnika markazlarini rivojlantirish.

3. “Toshkent traktor zavodi” ochiq aksiyadorlik jamiyatining korxona xodimlari umumiy sonini 365 nafarga, shu jumladan boshqaruv xodimlarini 145 nafarga qisqartirishni nazarda tutuvchi tashkiliy tuzilmasi hamda uning ijro etuvchi apparati tuzilmasi 1 va 2-ilovalarga muvofiq maʼqullansin.

“Toshkent traktor zavodi” ochiq aksiyadorlik jamiyati bosh direktoriga Kuzatuvchi kengash bilan kelishgan holda korxona ijro etuvchi apparatining tasdiqlangan tashkiliy tuzilmasiga xodimlarning shtatdagi belgilangan soni doirasida oʻzgartirishlar kiritishiga ruxsat berilsin.

4. Belgilansinki, ushbu qarorning 1-bandiga muvofiq aksiyalarning davlat paketi xorijiy investorga sotilgungacha boʻlgan davrda “Toshkent traktor zavodi” ochiq aksiyadorlik jamiyatining bosh direktori, bosh muhandisi, bosh direktori oʻrinbosarlari aksiyadorlarning umumiy yigʻilishida saylanadi va Oʻzbekiston Respublikasi Vazirlar Mahkamasi tomonidan lavozimga tayinlanadi.

5. Quyidagilar:

Vazirlar Mahkamasining “Toshkent traktor zavodi” ishlab chiqarish birlashmasini aksiyalashtirish toʻgʻrisida” 1996-yil 19-sentabrdagi 327-son qarori;

Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish va baʼzilarini oʻz kuchini yoʻqotgan deb hisoblash toʻgʻrisida” 2008-yil 13-martdagi 41-son qaroriga (Oʻzbekiston Respublikasi Prezidentining “Oʻzqishloqxoʻjalikmash-xolding” xolding kompaniyasini tugatish chora-tadbirlari toʻgʻrisida” 2007-yil 29-dekabrdagi PQ-766-son qarori) 1-ilovaning 1-bandi oʻz kuchini yoʻqotgan deb hisoblansin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Q.S. Sanaqulov zimmasiga yuklansin.