O‘zbekiston Respublikasi Prezidentining “Banklarning kapitallashuvini yanada oshirish va iqtisodiyotni modernizatsiyalashdagi investitsiya jarayonlarida ularning ishtirokini faollashtirish chora-tadbirlari to‘g‘risida” 2007-yil 12-iyuldagi PQ-670-son qaroriga muvofiq Vazirlar Mahkamasi qaror qiladi:

1. Vazirlar Mahkamasining “Plastik kartochkalar asosida hisob-kitob qilish tizimini yanada rivojlantirish chora-tadbirlari to‘g‘risida” 2004-yil 24-sentabrdagi 445-son qaroriga (O‘zbekiston Respublikasi QT, 2004-y., 9-son, 94-modda) ilovaga muvofiq o‘zgartirish va qo‘shimchalar kiritilsin.

2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov va O‘zbekiston Respublikasi Markaziy banki raisi F.M. Mullajonov zimmasiga yuklansin.

1. 7-bandda:

a) ikkinchi xatboshidagi “2005-yil 1-yanvardan boshlab 3 yil muddatga” so‘zlari “2005-yil 1-yanvardan 2010-yil 1-yanvargacha” so‘zlari bilan almashtirilsin;

b) uchinchi xatboshidagi “2007” raqami “2010” raqami bilan almashtirilsin;

v) quyidagi mazmundagi to‘rtinchi xatboshi qo‘shilsin:

“2007-yil 12-iyuldan boshlab 2010-yil 1-yanvargacha o‘ziga o‘zi xizmat ko‘rsatish axborot kiosklariga oid qismi bo‘yicha mulk solig‘idan, shuningdek ular import qilinganda bojxona to‘lovlari to‘lashdan”;

to‘rtinchi xatboshi beshinchi xatboshi deb hisoblansin.

2. Tijorat banklari va Yagona umumrespublika protsessing markazi tomonidan to‘lovlarni plastik kartochkalar bo‘yicha amalga oshirish uchun foydalaniladigan mol-mulkdan soliq to‘lash bo‘yicha imtiyozlarni qo‘llash tartibi to‘g‘risida Nizomda:

a) 1 va 2-bandlar quyidagi tahrirda bayon qilinsin:

“1. Mazkur Nizom tijorat banklari va Yagona umumrespublika protsessing markazi tomonidan bankomatlar, to‘lov terminallari, o‘ziga o‘zi xizmat ko‘rsatish axborot kiosklari, kommutatsiya uskunalaridan va to‘lovlarni plastik kartochkalar bo‘yicha amalga oshirish uchun foydalaniladigan boshqa uskunalardan mulk solig‘i bo‘yicha imtiyozlarni qo‘llash, shuningdek ularni buxgalteriya hisobida aks ettirish tartibini belgilaydi.

2. Tijorat banklari va Yagona umumrespublika protsessing markazi:

2005-yil 1-yanvardan boshlab 2010-yil 1-yanvargacha — bankomatlar, terminallar, kommutatsiya uskunalariga va to‘lovlarni plastik kartochkalar bo‘yicha amalga oshirish uchun foydalaniladigan boshqa uskunalarga, shuningdek dasturiy ta’minlashga oid qismi bo‘yicha;

2007-yil 12-iyuldan boshlab 2010-yil 1-yanvargacha — o‘ziga o‘zi xizmat ko‘rsatish axborot kiosklariga oid qismi bo‘yicha mulk solig‘i to‘lashdan ozod etilgan”;

b) 3-banddagi “terminallar” so‘zidan keyin “o‘ziga o‘zi xizmat ko‘rsatish axborot kiosklari” so‘zlari qo‘shilsin;

v) 4-bandga quyidagi mazmundagi to‘rtinchi xatboshi qo‘shilsin:

“o‘ziga o‘zi xizmat ko‘rsatish axborot kiosklari”;

g) 8-band quyidagi tahrirda bayon qilinsin:

“8. Bo‘shab qoladigan mablag‘larning buxgalteriya hisobi O‘zbekiston Respublikasi Moliya vazirligining 29-son, O‘zbekiston Respublikasi Davlat soliq qo‘mitasining 2005-25-son va Davlat bojxona qo‘mitasining 01-02/8-3-son qarori bilan tasdiqlangan (O‘zbekiston Respublikasi Adliya vazirligida 2005-yil 2-aprelda 1463 raqami bilan ro‘yxatdan o‘tkazilgan) Yuridik shaxslarga soliqlar, bojxona to‘lovlari va budjetga majburiy to‘lovlar bo‘yicha berilgan imtiyozlarni rasmiylashtirish va buxgalteriya hisobida aks ettirish tartibi to‘g‘risidagi Nizomga muvofiq amalga oshiriladi”;

d) tijorat banklari va Yagona umumrespublika protsessing markazining to‘lovlarni plastik kartochkalar bilan amalga oshirish uchun foydalanadigan mol-mulki ro‘yxatiga quyidagi mazmundagi band qo‘shilsin:

“9. O‘ziga o‘zi xizmat ko‘rsatish axborot kiosklari”.