Ushbu Qonun O‘zbekiston Respublikasining xalqaro shartnomalarini tuzish, bajarish, to‘xtatish, to‘xtatib turish va denonsatsiya qilish tartibini belgilaydi.

O‘zbekiston Respublikasining xalqaro shartnomalari xalqaro huquqning umum e’tirof etilgan prinsiplari va normalariga, O‘zbekiston Respublikasi Konstitutsiyasiga, shuningdek ushbu Qonunga hamda shartnomaning o‘z qoidalariga muvofiq tuziladi, bajariladi, to‘xtatiladi, to‘xtatib turiladi va denonsatsiya qilinadi.

O‘zbekiston Respublikasining xalqaro shartnomalarini tuzish, bajarish, to‘xtatish, to‘xtatib turish va denonsatsiya qilishning ushbu Qonun bilan belgilangan tartibi ularning turi, shakli va nomlanishidan qat’i nazar, O‘zbekistonning barcha xalqaro shartnomalariga nisbatan qo‘llaniladi.

O‘zbekiston Respublikasining xalqaro shartnomasini bajarish maqsadida O‘zbekiston Respublikasi qonunini, Oliy Majlis qarorini qabul qilish, O‘zbekiston Respublikasi Prezidentining Farmonini yoki O‘zbekiston Respublikasi Hukumatining qarorini, farmoyishini chiqarish lozim bo‘lgan hollarda, manfaatdor vazirliklar va idoralar Adliya vazirligi va Tashqi ishlar vazirligi bilan kelishilgan holda shunday aktni qabul qilish to‘g‘risida belgilangan tartibda taklif kiritadilar.

O‘zbekiston Respublikasining xalqaro shartnomasi — respublikaning bir yoki bir necha davlat, xalqaro tashkilot yoxud xalqaro huquqning boshqa subyektlari bilan xalqaro munosabatlar sohasidagi huquq va majburiyatlariga doir teng huquqli va ixtiyoriy kelishuvidir.

Xalqaro shartnomalar: shartnoma, bitim, konvensiya, protokol, memorandum, deklaratsiya, xatlar va notalar almashuvi deb nomlanishi va shunday ko‘rinishda tuzilishi, shuningdek boshqacha nomlanishi mumkin.

Xalqaro shartnomalar unda ishtirok etuvchi subyektlarning soniga qarab ikki tomonlama va ko‘p tomonlama shartnomalar bo‘ladi. Xalqaro shartnomalar mazmuniga qarab iqtisodiy, siyosiy, huquqiy shartnomalar bo‘lishi, shuningdek boshqa masalalar bo‘yicha tuzilishi mumkin. Muddatiga qarab shartnomalar muddatli va muddatsiz bo‘ladi. Xalqaro shartnomalar boshqa turlarda ham tuzilishi mumkin.

O‘zbekiston Respublikasi xalqaro shartnomasining tili O‘zbekiston Respublikasining davlat tili va ahdlashayotgan boshqa tomonning (tomonlarning) tili hisoblanadi.

Xalqaro shartnoma subyektlarining kelishuviga muvofiq boshqa til shartnoma tili deb tanlanishi mumkin. Xalqaro shartnoma matni qaysi tilda tuzilgan bo‘lsa, u ushbu shartnoma matnida ko‘rsatiladi, uning autentikligi va rasmiyligi belgilanadi.

Xalqaro shartnomalar qoida tariqasida yozma shaklda tuziladi.

Davlatning siyosiy, iqtisodiy, ilmiy-texnikaviy, madaniy, huquqiy va boshqa sohalardagi faoliyati O‘zbekiston Respublikasi xalqaro shartnomasining obyekti bo‘lishi mumkin.

O‘zbekiston Respublikasining xalqaro shartnomalarini tuzish huquqi davlatga tegishlidir.

O‘zbekiston Respublikasining xalqaro shartnomalari quyidagicha tuziladi:

O‘zbekiston Respublikasi nomidan — davlatlararo shartnomalar;

O‘zbekiston Respublikasi Hukumati nomidan — hukumatlararo shartnomalar;

O‘zbekiston Respublikasi vazirliklari va idoralari nomidan — idoralararo shartnomalar.

O‘zbekiston Respublikasi nomidan xalqaro shartnomalarni tuzish to‘g‘risidagi takliflar — O‘zbekiston Respublikasi Prezidentiga, O‘zbekiston Respublikasi Hukumati tasarrufidagi masalalar bo‘yicha O‘zbekiston Respublikasi nomidan xalqaro shartnomalarni tuzish to‘g‘risidagi takliflar esa — O‘zbekiston Respublikasi Hukumatiga kiritiladi.

O‘zbekiston Respublikasi nomidan xalqaro shartnomalarni tuzish to‘g‘risidagi takliflar O‘zbekiston Respublikasi Prezidentiga Tashqi ishlar vazirligi tomonidan kiritiladi. Boshqa vazirliklar va idoralar o‘zlarining vakolatlariga kiradigan masalalar bo‘yicha O‘zbekiston Respublikasi nomidan xalqaro shartnomalar tuzish to‘g‘risidagi takliflarini Tashqi ishlar vazirligi bilan birga yoki u bilan kelishilgan holda O‘zbekiston Respublikasi Prezidentiga kiritadilar.

O‘zbekiston Respublikasi Hukumati nomidan O‘zbekiston Respublikasining xalqaro shartnomalarini tuzish to‘g‘risidagi takliflar O‘zbekiston Respublikasi Hukumatiga Tashqi ishlar vazirligi tomonidan kiritiladi.

Boshqa vazirliklar va idoralar O‘zbekiston Respublikasining xalqaro shartnomalarini tuzish to‘g‘risidagi takliflarini O‘zbekiston Respublikasi Hukumatiga Tashqi ishlar vazirligi bilan birga yoki u bilan kelishilgan holda, mustaqil ravishda esa ushbu Qonunda nazarda tutilgan hollardagina kiritadilar.

Vazirliklar va idoralar tomonidan idoralararo shartnomalar tuzish to‘g‘risida takliflar kiritish tartibini O‘zbekiston Respublikasi Hukumati belgilaydi.

O‘zbekiston Respublikasining xalqaro shartnomalarini tuzish to‘g‘risidagi takliflar O‘zbekiston Respublikasi Prezidentiga yoki O‘zbekiston Respublikasi Hukumatiga kiritilgunga qadar Adliya vazirligi, shuningdek boshqa manfaatdor vazirliklar va idoralar bilan kelishib olinadi.

Xalqaro shartnomani tuzish to‘g‘risidagi taklif shartnoma loyihasini yoki uning asosiy qoidalarini, uni tuzish maqsadga muvofiq ekanligining asoslarini, shuningdek zarurat bo‘lganda, shartnoma tuzishdan kelib chiqishi mumkin bo‘lgan moliyaviy-iqtisodiy oqibatlarga berilgan bahoni o‘z ichiga olishi kerak.

Zarur hollarda xalqaro shartnoma loyihasini tuzish yoki ko‘rib chiqish uchun manfaatdor vazirliklar va idoralarning vakillari, mutaxassislar va mustaqil ekspertlardan iborat komissiya tuziladi.

Tashqi iqtisodiy faoliyat masalalari bo‘yicha, shu jumladan savdo-iqtisodiy hamkorlik va texnikaviy yordam ko‘rsatish masalalari bo‘yicha O‘zbekiston Respublikasining xalqaro shartnomalarini tuzish to‘g‘risidagi takliflar O‘zbekiston Respublikasi Hukumatiga Tashqi savdo vazirligi va Investitsiyalar bo‘yicha davlat qo‘mitasi tomonidan mustaqil ravishda ayni bir paytning o‘zida Tashqi ishlar vazirligini ogohlantirgan holda, kiritiladi.

Boshqa vazirliklar va idoralar tashqi iqtisodiy faoliyat masalalari bo‘yicha xalqaro shartnomalar tuzish to‘g‘risidagi takliflarni O‘zbekiston Respublikasi Hukumatiga Tashqi savdo vazirligi va Investitsiyalar bo‘yicha davlat qo‘mitasi bilan birga yoki ular bilan kelishilgan holda kiritadilar.

O‘zbekiston Respublikasining xalqaro shartnomasini tuzish to‘g‘risidagi taklif O‘zbekiston Respublikasi Prezidenti yoki O‘zbekiston Respublikasi Hukumati tomonidan tegishli vazirliklar va idoralarning xulosalari mavjud bo‘lgan taqdirda ko‘rib chiqiladi.

Muzokaralar olib borish to‘g‘risidagi va O‘zbekiston Respublikasining xalqaro shartnomalarini imzolash to‘g‘risidagi qarorlar:

1) O‘zbekiston Respublikasi nomidan tuziladigan shartnomalarga nisbatan, — O‘zbekiston Respublikasi Prezidenti tomonidan, O‘zbekiston Respublikasi Hukumati tasarrufidagi masalalar bo‘yicha O‘zbekiston Respublikasi nomidan tuziladigan shartnomalarga nisbatan esa, — O‘zbekiston Respublikasi Hukumati tomonidan;

2) O‘zbekiston Respublikasi Hukumati nomidan tuziladigan shartnomalarga nisbatan, — O‘zbekiston Respublikasi Hukumati tomonidan;

3) idoralararo shartnomalarga nisbatan — O‘zbekiston Respublikasi Hukumati belgilaydigan tartibda qabul qilinadi.

Muzokaralar olib borish va O‘zbekiston Respublikasining xalqaro shartnomalarini imzolash vakolatlari:

1) O‘zbekiston Respublikasi nomidan tuziladigan shartnomalarga nisbatan, — O‘zbekiston Respublikasi Prezidenti tomonidan, O‘zbekiston Respublikasi Hukumati tasarrufiga tegishli masalalar bo‘yicha O‘zbekiston Respublikasi nomidan tuziladigan shartnomalarga nisbatan, — O‘zbekiston Respublikasi Hukumati tomonidan;

2) O‘zbekiston Respublikasi Hukumati nomidan tuziladigan shartnomalarga nisbatan, — O‘zbekiston Respublikasi Hukumati tomonidan;

3) idoralararo shartnomalarga nisbatan, — O‘zbekiston Respublikasi Hukumati belgilaydigan tartibda beriladi.

Muzokaralar olib borish va O‘zbekiston Respublikasining xalqaro shartnomalarini imzolash vakolatlari belgilangan yozma shaklda beriladi.

O‘zbekiston Respublikasining Prezidenti davlat boshlig‘i sifatida xalqaro munosabatlarda O‘zbekiston Respublikasi nomidan ish ko‘radi va xalqaro huquqiy normalar hamda O‘zbekiston Respublikasi Konstitutsiyasiga muvofiq maxsus vakolatlarsiz muzokaralar olib boradi va O‘zbekiston Respublikasining xalqaro shartnomalarini imzolaydi.

Tashqi ishlar vaziri ham maxsus vakolatlarsiz muzokaralar olib borishga va O‘zbekiston Respublikasining xalqaro shartnomalarini imzolashga haqli.

O‘zbekiston Respublikasining chet eldagi diplomatik vakolatxonasining boshlig‘i yoki O‘zbekiston Respublikasining xalqaro tashkilot yoki konferensiya qoshidagi vakolatxonasining boshlig‘i diplomatik vakolatxona joylashgan davlat bilan yoki shu xalqaro tashkilot, konferensiya doirasida maxsus vakolatlarsiz xalqaro shartnoma tuzish to‘g‘risida muzokaralar olib borishga haqli.

Vazir yoki idora rahbari o‘z vakolati doirasida maxsus vakolatlarsiz muzokaralar olib borish va idoralararo shartnomalarni imzolashga haqli.

O‘zbekiston Respublikasi Konstitutsiyasiga muvofiq O‘zbekiston Respublikasining xalqaro shartnomalari Oliy Majlis tomonidan ratifikatsiya qilinadi.

Quyidagilar: O‘zbekiston Respublikasining hamkorlik va o‘zaro yordam to‘g‘risidagi shartnomalari; davlatlararo munosabatlarning asoslari to‘g‘risidagi shartnomalar; O‘zbekiston Respublikasining mudofaa qobiliyatiga daxldor masalalar bo‘yicha shartnomalar; kuch ishlatishdan yoki kuch ishlatish bilan tahdid qilishdan o‘zaro voz kechish to‘g‘risidagi shartnomalar; tinchlik shartnomalari va kollektiv xavfsizlik to‘g‘risidagi shartnomalar; O‘zbekiston Respublikasining boshqa davlatlar bilan hududiy chegaralanishi to‘g‘risidagi shartnomalar; O‘zbekiston Respublikasining davlatlararo ittifoqlarda, xalqaro tashkilotlarda va boshqa birlashmalarda ishtiroki to‘g‘risidagi shartnomalar; ijrosi amaldagi qonunlarning o‘zgartirilishini yoki yangi qonunlar qabul qilinishini taqozo etadigan, shuningdek O‘zbekiston Respublikasining qonunlarida nazarda tutilganidan boshqacha qoidalarni belgilaydigan xalqaro shartnomalar ratifikatsiya qilinadi.

Tuzish vaqtida tomonlar kelgusida uni ratifikatsiya qilish to‘g‘risida kelishib olgan O‘zbekiston Respublikasining xalqaro shartnomalari ham xuddi shunday ratifikatsiya qilinadi.

Oliy Majlis O‘zbekiston Respublikasining boshqa xalqaro shartnomalarini ham ratifikatsiya qilishi mumkin.

O‘zbekiston Respublikasi Hukumati tomonidan yoki u vakolat bergan organlar tomonidan xalqaro moliya institutlari bilan tuzilgan O‘zbekiston Respublikasining xalqaro zayom va kafolatli shartnomalari ratifikatsiya qilinmaydi va O‘zbekiston Respublikasi uchun imzolangan paytdan e’tiboran kuchga kiradi.

O‘zbekiston Respublikasi Prezidentining qaroriga muvofiq imzolangan xalqaro shartnomalarni ratifikatsiya qilish to‘g‘risidagi takliflar Oliy Majlisga O‘zbekiston Respublikasi Prezidenti tomonidan kiritiladi.

O‘zbekiston Respublikasi Hukumatining qaroriga muvofiq imzolangan O‘zbekiston Respublikasining xalqaro shartnomalarini ratifikatsiya qilish to‘g‘risidagi takliflar Oliy Majlisga O‘zbekiston Respublikasi Hukumati tomonidan kiritiladi, bu haqda tegishli qaror qabul qilinadi.

O‘zbekiston Respublikasining xalqaro shartnomalarini ratifikatsiya qilishga kiritish to‘g‘risidagi takliflar Tashqi ishlar vazirligi tomonidan mustaqil ravishda yoki agar shartnoma boshqa vazirliklar va idoralarning vakolatlariga kiradigan masalalarga daxldor bo‘lsa, ular bilan kelishilgan holda O‘zbekiston Respublikasi Prezidenti yoki O‘zbekiston Respublikasi Hukumatiga kiritiladi.

O‘zbekiston Respublikasining xalqaro shartnomasini ratifikatsiya qilish to‘g‘risidagi Oliy Majlisning to‘xtami — qaror shaklida qabul qilinadi.

Ratifikatsiya yorlig‘i — Oliy Majlis xalqaro shartnomani ko‘rib chiqqanligidan guvohlik beruvchi va xalqaro shartnoma O‘zbekiston Respublikasi uchun majburiyligiga rozi ekanligini ifodalovchi maxsus hujjat.

Ratifikatsiya yorlig‘ining shakli Tashqi ishlar vazirligining taqdimnomasiga binoan O‘zbekiston Respublikasi Prezidenti tomonidan belgilanadi.

Ratifikatsiya yorlig‘i Oliy Majlisning xalqaro shartnomani ratifikatsiya qilish to‘g‘risidagi qaroriga asosan O‘zbekiston Respublikasi Prezidenti tomonidan imzolanadi, uning muhri va Tashqi ishlar vazirining imzosi bilan tasdiqlanadi.

Ratifikatsiya yorliqlarini almashish, O‘zbekiston Respublikasi xalqaro shartnomalarni ratifikatsiya qilganligi to‘g‘risidagi yorliqlarni saqlash uchun depozitariylarga topshirish Tashqi ishlar vazirligi tomonidan yohud uning topshirig‘iga binoan O‘zbekiston Respublikasi diplomatik vakolatxonasi yoki O‘zbekiston Respublikasining xalqaro tashkilot huzuridagi vakolatxonasi tomonidan amalga oshiriladi.

O‘zbekiston Respublikasining ratifikatsiya qilinmaydigan, lekin ularning tasdiqlanishini (qabul qilinishini) nazarda tutuvchi xalqaro shartnomalarni tasdiqlash (qabul qilish):

1) O‘zbekiston Respublikasi nomidan tuziladigan shartnomalarga nisbatan, — O‘zbekiston Respublikasi Prezidenti tomonidan, O‘zbekiston Respublikasi Hukumati tasarrufidagi masalalar bo‘yicha O‘zbekiston Respublikasi nomidan tuziladigan shartnomalarga nisbatan, — O‘zbekiston Respublikasi Hukumati tomonidan;

2) O‘zbekiston Respublikasi Hukumati nomidan tuziladigan shartnomalarga nisbatan, — O‘zbekiston Respublikasi Hukumati tomonidan;

3) idoralararo shartnomalarga nisbatan, — O‘zbekiston Respublikasi Hukumati belgilaydigan tartibda amalga oshiriladi.

O‘zbekiston Respublikasining xalqaro shartnomalarga qo‘shilishi to‘g‘risidagi qaror:

1) ratifikatsiya qilinadigan shartnomalarga nisbatan — Oliy Majlis tomonidan;

2) ratifikatsiya qilinmaydigan, ularga qo‘shilish O‘zbekiston Respublikasi nomidan amalga oshiriladigan shartnomalarga nisbatan, — O‘zbekiston Respublikasi Prezidenti tomonidan, ratifikatsiya qilinmaydigan, ularga qo‘shilish O‘zbekiston Respublikasi Hukumati tasarrufidagi masalalar bo‘yicha O‘zbekiston Respublikasi nomidan amalga oshiriladigan shartnomalarga nisbatan, — O‘zbekiston Respublikasi Hukumati tomonidan;

3) ratifikatsiya qilinmaydigan, ularga qo‘shilish O‘zbekiston Respublikasi Hukumati nomidan amalga oshiriladigan shartnomalarga nisbatan, — O‘zbekiston Respublikasi Hukumati tomonidan;

4) idoralararo shartnomalarga nisbatan, — O‘zbekiston Respublikasi Hukumati belgilaydigan tartibda qabul qilinadi.

O‘zbekiston Respublikasi xalqaro shartnomani yoki uning bir qismini u kuchga kirgunga qadar vaqtincha qo‘llashi mumkin, agar shartnomada bu hol nazarda tutilgan bo‘lsa yoki shartnomani imzolagan tomonlar bilan shunday shartlashuvga erishilgan bo‘lsa.

O‘zbekiston Respublikasi tomonidan xalqaro shartnomani yoki uning bir qismini vaqtincha qo‘llash to‘g‘risidagi qaror xalqaro shartnomani imzolash haqida qaror chiqargan organ tomonidan qabul qilinadi.

Xalqaro shartnomalar O‘zbekiston Respublikasi uchun ushbu Qonunga muvofiq shartnomada nazarda tutilgan yoki ahdlashuvchi tomonlar o‘rtasida kelishilgan tartibda va muddatlarda kuchga kiradi.

O‘zbekiston Respublikasining xalqaro shartnomalarini imzolash, ratifikatsiya qilish, tasdiqlash, qabul qilish yoki shartnomalarga qo‘shilish vaqtida shartnoma shartlari va xalqaro huquqning tegishli normalariga rioya qilingan holda shartnomalarga doir qo‘shimcha shartlar qo‘yilishi mumkin.

Qo‘shimcha shartlar qanday qo‘yilgan bo‘lsa, shunday tartibda istalgan vaqtda olib tashlanishi mumkin.

O‘zbekiston Respublikasining xalqaro shartnomalarini e’lon qilish tartibi O‘zbekiston Respublikasi Hukumati tomonidan belgilanadi.

O‘zbekiston Respublikasining xalqaro shartnomalari, ularning autentik matnlari chet tillarda tuzilgan bo‘lsa, davlat tilida e’lon qilinadi. O‘zbekiston Respublikasining xalqaro shartnomalari boshqa tillarda ham e’lon qilinishi mumkin.

O‘zbekiston Respublikasining xalqaro shartnomalari to‘plami O‘zbekiston Respublikasining xalqaro shartnomalari e’lon qilinadigan rasmiy manbadir.

O‘zbekiston Respublikasining xalqaro shartnomalarini Birlashgan Millatlar Tashkiloti Kotibiyatida va boshqa xalqaro tashkilotlarning tegishli organlarida ro‘yxatdan o‘tkazish Tashqi ishlar vazirligi tomonidan amalga oshiriladi.

O‘zbekiston Respublikasining xalqaro shartnomalariga O‘zbekiston Respublikasi xalqaro huquq normalariga muvofiq qat’iy va majburiy ravishda rioya etmog‘i lozim.

O‘zbekiston Respublikasi Prezidenti O‘zbekiston Respublikasi Konstitutsiyasiga muvofiq respublika tomonidan tuzilgan shartnomalarga, bitimlarga va u qabul qilgan majburiyatlarga rioya etilishini ta’minlaydi.

O‘zbekiston Respublikasi Hukumati O‘zbekiston Respublikasining xalqaro shartnomalarini bajarish chora-tadbirlarini ishlab chiqadi va O‘zbekiston Respublikasining xalqaro shartnomalari bo‘yicha majburiyatlarning bajarilishi uchun mas’uliyat yuklatiladigan vazirliklar, idoralar va mansabdor shaxslarni belgilaydi.

O‘zbekiston Respublikasi Hukumati, vazirliklar va idoralar, O‘zbekiston Respublikasining xalqaro shartnomalari bilan tartibga solinadigan masalalar vakolat doirasiga kiradigan boshqa davlat organlari shartnoma bo‘yicha O‘zbekiston tomonidan qabul qilingan majburiyatlarning bajarilishini ta’minlaydilar, bunday shartnomalardan kelib chiquvchi O‘zbekiston Respublikasiga tegishli huquqlarning amalga oshirilishini va shartnomalar boshqa ishtirokchilarining o‘z majburiyatlarini bajarishini kuzatib boradilar.

O‘zbekiston Respublikasi Hukumati O‘zbekiston Respublikasining xalqaro shartnomalari bo‘yicha majburiyatlarning bajarilishi ustidan nazoratni amalga oshiradi.

O‘zbekiston Respublikasi xalqaro shartnomalarining bajarilishini Tashqi ishlar vazirligi kuzatib boradi.

O‘zbekiston Respublikasi nomidan va O‘zbekiston Respublikasi Hukumati nomidan tuzilgan O‘zbekiston Respublikasi xalqaro shartnomalarining asl nusxalari (tasdiqlangan nusxalari, rasmiy tarjimalari) saqlash uchun ular imzolangan (tasdiqlangan nusxalari, rasmiy tarjimalari depozitariydan olingan) kundan e’tiboran ikki haftalik muddat ichida Tashqi ishlar vazirligiga topshiriladi, bu hujjatlarning nusxalarini esa ular kuchga kirgan kundan e’tiboran ikki haftalik muddat ichida Tashqi ishlar vazirligi tegishli vazirliklar va idoralarga yuboradi.

O‘zbekiston Respublikasi xalqaro shartnomalarining asl nusxalarini saqlash tartibini tashqi ishlar vaziri tasdiqlaydi.

Idoralararo shartnomalarning asl nusxalari tegishli vazirliklar, davlat qo‘mitalari va idoralarning idoraviy arxivlarida saqlanadi, bu shartnomalarning tasdiqlangan nusxalari ular imzolangan (tasdiqlangan nusxalari, rasmiy tarjimalari depozitariydan olingan) kundan e’tiboran ikki haftalik muddat ichida Tashqi ishlar vazirligiga yuboriladi.

Ko‘p tomonlama xalqaro shartnomalar depozitariysi vazifalarini, agar mazkur shartnomalarning shartlariga muvofiq bunday vazifa O‘zbekiston Respublikasiga yuklatilgan bo‘lsa, Tashqi ishlar vazirligi bajaradi.

Ko‘p tomonlama xalqaro shartnomalarning depozitariysi vazifasini bajaruvchi xorijiy davlat organlari, xalqaro tashkilotlar yoki ularning bosh ijrochi mansabdor shaxslari bilan yozishmalar Tashqi ishlar vazirligi tomonidan olib boriladi.

O‘zbekiston Respublikasi xalqaro shartnomalarining majburiyatlarini uning boshqa ishtirokchilari buzgan taqdirda Tashqi ishlar vazirligi yoki boshqa manfaatdor vazirliklar va idoralar Tashqi ishlar vazirligi bilan birga O‘zbekiston Respublikasi Prezidentiga yoki O‘zbekiston Respublikasi Hukumatiga xalqaro huquq normalariga muvofiq zarur choralarni ko‘rish to‘g‘risida takliflar taqdim etadilar.

O‘zbekiston Respublikasining xalqaro shartnomalarini uning boshqa ishtirokchilari jiddiy buzgan taqdirda, shuningdek xalqaro huquq normalarida nazarda tutilgan boshqa hollarda, bunday shartnoma ushbu Qonunning 38 — 43-moddalarida belgilangan tartibda to‘xtatilishi mumkin.

O‘zbekiston Respublikasining xalqaro shartnomalari xalqaro huquq normalarida nazarda tutilgan hollarda haqiqiy emas deb hisoblanishi mumkin.

Xalqaro shartnomani to‘xtatish yoki O‘zbekiston Respublikasining undan chiqishi:

1) shartnoma qoidalariga muvofiq;

2) shartnomaning boshqa ishtirokchilari bilan maslahatlashuvlar asosida istalgan vaqtda amalga oshirilishi mumkin.

O‘zbekiston Respublikasining xalqaro shartnomasida uni to‘xtatish to‘g‘risida qoida bo‘lmasa va uni denonsatsiya qilish yoki undan chiqish nazarda tutilmagan bo‘lsa, bu shartnoma denonsatsiya qilinmaydi va undan chiqishga yo‘l qo‘yilmaydi, agar:

1) xalqaro shartnoma ishtirokchilari shartnomani denonsatsiya qilish yoki undan chiqish imkoniyatini yaratish niyatida bo‘lganlari belgilab qo‘yilgan bo‘lsa;

2) shartnoma xususiyati uni denonsatsiya qilish yoki undan chiqish huquqini nazarda tutmaydigan bo‘lsa.

O‘zbekiston Respublikasi shartnomani denonsatsiya qilish yoki undan chiqish niyatini kamida o‘n ikki oy oldin xabar qiladi.

Xalqaro shartnomaning amal qilishi O‘zbekiston Respublikasi tomonidan shartnomaning hamma ishtirokchilariga yoki shartnomaning alohida ishtirokchisiga nisbatan to‘xtatib turish:

1) shartnoma qoidalariga muvofiq;

2) shartnomaning boshqa ishtirokchilari bilan maslahatlashuvlar asosida istalgan vaqtda amalga oshiriladi.

O‘zbekiston Respublikasining xalqaro shartnomasi, agar uning barcha ishtirokchilari xuddi shu masala bo‘yicha keyingi shartnomani tuzgan bo‘lsalar va:

1) ushbu masalaning keyingi shartnoma bilan tartibga solinishi shu shartnoma mazmunidan kelib chiqsa yoki shundayligi boshqacha tarzda belgilangan bo‘lsa;

2) O‘zbekiston Respublikasining keyingi shartnomasi qoidalari oldingi shartnoma qoidalariga zid bo‘lsa va ikkala shartnomani bir vaqtda qo‘llash mumkin bo‘lmasa, bekor qilingan hisoblanadi.

O‘zbekiston Respublikasi oldingi shartnomasining amal qilishi faqat to‘xtatib turilgan hisoblanadi, agar uning ishtirokchilari shunday niyatda ekanliklari keyingi shartnoma mazmunidan kelib chiqsa yoki shundayligi boshqacha tarzda belgilangan bo‘lsa.

O‘zbekiston Respublikasi xalqaro shartnomasining ushbu shartnoma ishtirokchilaridan birontasi tomonidan jiddiy buzilishi shartnomani butunlay yoki qisman amal qilishini to‘xtatish yoki to‘xtatib turish uchun O‘zbekiston Respublikasiga bu buzishni asos qilib ko‘rsatish huquqini beradi.

Xalqaro shartnomaning jiddiy buzilishi quyidagilardan iborat:

1) xalqaro huquq normalarida zid tarzda shartnomadan voz kechish;

2) shartnoma obyekti va maqsadining amalga oshishi uchun muhim ahamiyatga ega bo‘lgan qoidaning buzilishi.

O‘zbekiston Respublikasi nomidan, O‘zbekiston Respublikasi Hukumati nomidan tuzilgan O‘zbekiston Respublikasi xalqaro shartnomalarining amal qilishini to‘xtatish, denonsatsiya qilish yoki to‘xtatib turish to‘g‘risidagi takliflar tegishli tarzda Tashqi ishlar vazirligi tomonidan mustaqil ravishda yoki boshqa vazirliklar va idoralar bilan kelishilgan holda O‘zbekiston Respublikasi Prezidentiga yoki O‘zbekiston Respublikasi Hukumatiga kiritiladi. Tashqi iqtisodiy faoliyat masalalari bo‘yicha O‘zbekiston Respublikasi xalqaro shartnomalarining amal qilinishini to‘xtatish, denonsatsiya qilish yoki to‘xtatib turish to‘g‘risidagi takliflarni Tashqi savdo vazirligi va Investitsiyalar bo‘yicha davlat qo‘mitasi O‘zbekiston Respublikasi Hukumatiga kiritib, ayni bir paytning o‘zida Tashqi ishlar vazirligini xabardor qilishga haqlidir. Boshqa vazirliklar va idoralar xalqaro shartnomalarning amal qilishini to‘xtatish, denonsatsiya qilish yoki to‘xtatib turish to‘g‘risidagi takliflarni Tashqi ishlar vazirligiga kiritadilar.

O‘zbekiston Respublikasi nomidan tuzilgan O‘zbekiston Respublikasining xalqaro shartnomalarini to‘xtatish, denonsatsiya qilish O‘zbekiston Respublikasi Prezidentining taqdimnomasiga muvofiq, O‘zbekiston Respublikasi Hukumati tasarrufidagi masalalar bo‘yicha O‘zbekiston Respublikasi nomidan tuzilgan shartnomalar esa, O‘zbekiston Respublikasi Hukumatining taqdimnomasiga muvofiq Oliy Majlis tomonidan amalga oshiriladi.

O‘zbekiston Respublikasi Hukumati nomidan tuzilib, ratifikatsiya qilingan O‘zbekiston Respublikasining xalqaro shartnomalarini to‘xtatish, denonsatsiya qilish O‘zbekiston Respublikasi Hukumatining taqdimnomasiga muvofiq Oliy Majlis tomonidan amalga oshiriladi.

O‘zbekiston Respublikasi xalqaro shartnomasining to‘xtatilishi, denonsatsiya qilinishi, agar shartnomada boshqacha hol nazarda tutilmagan bo‘lsa yoki uning o‘zga ishtirokchilari bilan boshqacha kelishilmagan bo‘lsa, O‘zbekiston Respublikasini shartnomani bajarish majburiyatidan ozod qiladi va shartnomaning amal qilishi davomida paydo bo‘lgan O‘zbekiston Respublikasining huquq va majburiyatlariga ta’sir etmaydi.

O‘zbekiston Respublikasi Hukumati nomidan tuzilgan va ratifikatsiya qilinmaydigan xalqaro shartnomalarni, shuningdek Hukumatning qaroriga asosan qo‘shilingan shartnomalarni to‘xtatish, denonsatsiya qilish O‘zbekiston Respublikasi Hukumati tomonidan amalga oshiriladi.

O‘zbekiston Respublikasi xalqaro shartnomalarining amal qilishini to‘xtatib turish shartnomaning o‘zidan kelib chiqadigan shartlar va xalqaro huquq normalariga binoan O‘zbekiston Respublikasi uchun xalqaro shartnomaning majburiy ekanligiga rozilik to‘g‘risidagi qarorni qabul qilgan organ tomonidan amalga oshiriladi.

O‘zbekiston Respublikasi xalqaro shartnomasi amal qilishining to‘xtatib turilishi, agar shartnomada boshqacha hol nazarda tutilmagan yoki uning o‘zga ishtirokchilari bilan boshqacha kelishilmagan bo‘lsa, O‘zbekiston Respublikasini shartnoma to‘xtatib turilgan muddat davomida uni bajarishdan ozod qiladi.

Idoralararo shartnomalarning amal qilishini to‘xtatish va to‘xtatib turish O‘zbekiston Respublikasi Hukumati belgilaydigan tartibda amalga oshiriladi.

O‘zbekiston Respublikasi nomidan, O‘zbekiston Respublikasi Hukumati nomidan tuzilgan xalqaro shartnomalarning amal qilishini to‘xtatish, denonsatsiya qilish yoki to‘xtatib turish to‘g‘risidagi rasmiy axborot ushbu Qonunning 25-moddasida nazarda tutilgan tartibda e’lon qilinadi.