Toʻpolang suv ombori va gidroelektrostansiyasining foydalanishga topshirilishini taʼminlash maqsadida:

1. Oʻzbekiston Respublikasi Qishloq va suv xoʻjaligi vazirligining Toʻpolang suv ombori quvvatini 120 mln.kub.m suv hajmida belgilash toʻgʻrisidagi taklifiga rozilik berilsin.

Oʻzbekiston Respublikasi Qishloq va suv xoʻjaligi vazirligi “Davarxitektqurilish” qoʻmitasi bilan birgalikda, Toʻpolang suv omborining belgilangan quvvatidan kelib chiqqan holda, “Toʻpolang suv ombori qurilishi” va “Toʻpolang suv ombori qoshida GES qurilishi” ishchi loyihalarining oʻzgartirilishi va ekspertizasini taʼminlasin.

2. Oʻzbekiston Respublikasi Qishloq va suv xoʻjaligi vazirligi zimmasiga 2006-yilning birinchi yarim yilligida GESning ikkita kichik agregati, 2006-yilning III choragida esa suv ombori foydalanishga topshirilishini taʼminlab, suv omborining qurilishini yakunlashga ajratilayotgan kapital mablagʻlardan samarali va maqsadli foydalanish uchun javobgarlik yuklansin.

3. XXR Hukumatining ilgari Toʻpolang GESiga asbob-uskunalar sotib olish uchun moʻljallangan kreditini “Andijon GES-2” va “Ohangaron GES”lariga gidroturbinalar, shuningdek Andijon viloyatidagi “Ulugʻnor” va “Roish-Xakent-1” nasos stansiyalariga nasos-quvvat agregatlari yetkazib berish loyihalarini moliyalashtirishga yoʻnaltirish toʻgʻrisida Oʻzbekiston Respublikasi Qishloq va suv xoʻjaligi vazirligi, Tashqi iqtisodiy aloqalar, investitsiyalar va savdo vazirligi bilan XXR Tijorat vazirligi oʻrtasida erishilgan ahdlashuvga rozilik berilsin.

Oʻzbekiston Respublikasi Vazirlar Mahkamasi ikki oy muddatda melioratsiya va gidroenergetika qurilishi obyektlariga asbob-uskunalar yetkazib berish boʻyicha TIA ishlab chiqilishini taʼminlasin hamda belgilangan tartibda mazkur loyihalar amalga oshirilishini taʼminlash boʻyicha qaror loyihasini kiritsin.

4. Quyidagilar:

Oʻzbekiston Respublikasi Prezidentining “Xitoy Xalq Respublikasi Hukumati tomonidan beriladigan mablagʻlardan foydalanish chora-tadbirlari toʻgʻrisida” 2005-yil 23-maydagi PQ-82-sonli Qarori ilovasining 6-pozitsiyasi;

Oʻzbekiston Respublikasi Prezidentining “Oʻzbekiston Respublikasining 2006-yilgi Investitsiya dasturi toʻgʻrisida” 2005-yil 8-noyabrdagi PQ-216-sonli Qarori 5-ilovasining 4-pozitsiyasi;

Oʻzbekiston Respublikasi Vazirlar Mahkamasining “Xitoy Xalq Respublikasi bilan hamkorlikni yanada rivojlantirish chora-tadbirlari toʻgʻrisida” 2004-yil 19-iyuldagi 338-sonli Qarori ilovasining 22-pozitsiyasi;

Oʻzbekiston Respublikasi Vazirlar Mahkamasining 2005-yil 13-maydagi F-212-sonli farmoyishi oʻz kuchini yoʻqotgan deb hisoblansin.

5. Oʻzbekiston Respublikasi Bosh vaziri Sh.M. Mirziyoyev boshchiligida ilovaga muvofiq tarkibda maxsus komissiya tuzilsin.

Maxsus komissiya ikki hafta muddatda Toʻpolang GESi boʻyicha, shu jumladan xorijiy kreditlarni jalb etish hisobiga moliyalashtiriladigan loyihalar boʻyicha Investitsiya dasturiga jiddiy kamchiliklar natijasida asoslanmagan ishlar hajmining kiritilishi sabablarini aniqlasin, shuningdek bunga yoʻl qoʻygan mansabdor shaxslarning javobgarlik choralarini belgilasin. Olib borilgan ishlar natijasi toʻgʻrisida Oʻzbekiston Respublikasi Prezidenti Devoniga maʼlumot bersin.

6. Mazkur Qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.