O‘zbekiston Respublikasi Prezidentining “Davlat budjetining g‘azna ijrosi tizimini yanada rivojlantirish chora-tadbirlari to‘g‘risida” 2007-yil 28-fevraldagi PQ-594-son qarorini bajarish yuzasidan hamda moliya organlari xodimlarini tayyorlash, qayta tayyorlash va ularning malakasini oshirish tizimini takomillashtirish, shuningdek budjet tashkilotlarining moliya-hisob xodimlarini davlat budjetining g‘azna ijrosi sharoitlarida ishlashga qayta tayyorlash maqsadida Vazirlar Mahkamasi qaror qiladi:

1. O‘zbekiston Respublikasi Iqtisodiyot va moliya vazirligi huzurida yuridik shaxs maqomiga ega bo‘lgan Moliya organlari hamda budjet tashkilotlarining moliya-hisob bo‘linmalari xodimlarini tayyorlash va qayta tayyorlash o‘quv markazi (keyingi o‘rinlarda Markaz deb ataladi) tashkil etilsin.

2. Quyidagilar Markazning asosiy vazifalari hisoblansin:

moliya organlari, shu jumladan O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasi va uning hududiy bo‘linmalari xodimlarini tayyorlash, qayta tayyorlash va ularning malakasini oshirish, shuningdek budjet tashkilotlarining moliya-hisob bo‘linmalari xodimlarini zamonaviy pedagogika va axborot texnologiyalaridan foydalangan holda o‘qitish dasturlari asosida Davlat budjetining g‘azna ijrosi sharoitlarida ishlashga qayta tayyorlash;

moliya organlari hamda budjet tashkilotlarining moliya-hisob bo‘linmalari xodimlarini tayyorlash, qayta tayyorlash va ularning malakasini oshirish bo‘yicha o‘quv jarayonining metodik va axborot bazasini yaratish, takomillashtirish va yangilab borish;

davlat mablag‘larini boshqarish va Davlat budjetining g‘azna ijrosi sohasida ilmiy-tadqiqot ishlarini bajarish, shuningdek Davlat budjetining g‘azna ijrosi hamda davlat mablag‘larini boshqarish masalalari bo‘yicha darsliklar, o‘quv qo‘llanmalari va ilmiy-metodik ishlanmalarni tayyorlash va tarqatish;

o‘quv jarayoniga yuqori malakali professor-o‘qituvchi kadrlarni, xorijiy maslahatchilarni, ekspertlarni va moliya organlarida amaliy ish tajribasiga ega bo‘lgan mutaxassislarni jalb etish;

davlat mablag‘larini boshqarish hamda Davlat budjetining g‘azna ijrosi masalalari bo‘yicha ilmiy konferensiyalar va seminarlar tashkil etish va o‘tkazish.

davlat organlari va boshqa tashkilotlar xodimlarining davlat xaridlari sohasida malakasini oshirish bo‘yicha maxsus qisqa muddatli ta’lim dasturlari va o‘quv rejalarini belgilangan tartibda manfaatdor vazirlik, idora va boshqa tashkilotlar bilan kelishilgan holda ishlab chiqish va tasdiqlash;

davlat xaridlari bo‘yicha o‘quv qo‘llanmalari, o‘quv adabiyoti va boshqa materiallar tayyorlash;

davlat xaridlari bo‘yicha davlat organlari va boshqa tashkilotlar xodimlarining malakasini oshirish maqsadida o‘quv jarayoniga sohadagi yetakchi mutaxassislarni keng jalb qilgan holda maxsus kurslar tashkil qilish;

ichki audit milliy malaka sertifikatiga ega bo‘lgan shaxslar uchun malaka oshirish kurslarini tashkil etish;

respublika va mahalliy ijro etuvchi hokimiyat organlarining ichki nazorat tizimi va xavflarni boshqarish faoliyatini amalga oshiruvchi xodimlarini o‘qitish va ularning malakasini oshirish kurslarini tashkil etish.

3. Markazning tuzilmasi ilovaga muvofiq tasdiqlansin.

Markaz direktori O‘zbekiston Respublikasi iqtisodiyot va moliya vaziri tomonidan tasdiqlanishi belgilab qo‘yilsin.

4. Belgilab qo‘yilsinki:

Markazning professor-o‘qituvchilariga va ilmiy xodimlariga oliy o‘quv yurtlari hamda ilmiy muassasalarning tegishli xodimlari uchun belgilangan mehnatga haq to‘lash shartlari, qolgan xodimlarga esa — moliya organlari xodimlari uchun belgilangan mehnatga haq to‘lash shartlari tatbiq etiladi;

Markaz tinglovchilari uchun o‘qish davrida asosiy ish joyi bo‘yicha o‘rtacha ish haqi va egallab turgan lavozimi saqlanib qoladi;

respublikaning Toshkent shahridan boshqa hududlaridan tinglovchilarga ularni yuborgan tashkilot tomonidan turar joy ijarasi hamda o‘qish joyiga kelish va ketish yo‘l kira xarajatlari qoplanadi, xizmat safarlari to‘g‘risidagi qonunchilikda belgilangan normalarga muvofiq va tartibda sutkalik puli to‘lanadi;

Markazda o‘qishni muvaffaqiyatli tugatgan tinglovchilarga belgilangan namunadagi sertifikat beriladi.

5. O‘zbekiston Respublikasi Iqtisodiyot va moliya vazirligi:

bir oy muddatda Markaz to‘g‘risidagi nizomni tasdiqlasin, unda o‘quv jarayoni sifati va tinglovchilarning kelgusidagi professional faoliyati yuzasidan monitoring olib borilishini nazarda tutsin, shuningdek Markazning qonun hujjatlarida belgilangan tartibda davlat ro‘yxatidan o‘tkazilishini ta’minlasin;

O‘zbekiston Respublikasi Oliy va o‘rta maxsus ta’lim vazirligi bilan birgalikda bir oy muddatda Markazning o‘quv rejalari va dasturlarini tasdiqlasin;

2007-yildan boshlab, har yili, Markazning asoslangan hisob-kitoblari bo‘yicha Davlat budjetidan Markaz faoliyatini ta’minlash, shu jumladan Markaz xodimlarining xalqaro ilmiy-amaliy anjumanlarda qatnashishi, davriy nashrlar, darsliklar va o‘quv qo‘llanmalarini, shu jumladan xorijda nashr etiladigan davriy nashrlar, darsliklar va o‘quv qo‘llanmalarini sotib olish uchun zarur mablag‘lar ajratsin, shuningdek budjet tashkilotlarining ular xodimlarining Markazda o‘qishi bilan bog‘liq xarajatlarini moliyalashtirsin;

Markazning faoliyatini va kelgusidagi rivojlanishini ta’minlash uchun xalqaro moliya institutlari va boshqa tashkilotlarning grant mablag‘larini jalb etish chora-tadbirlarini ko‘rsin;

2007-yil yakunlariga ko‘ra joylarda Markaz filiallarini tashkil etish bo‘yicha takliflarni ishlab chiqsin va, zarurat bo‘lganda, kiritsin;

Markazga bitta yengil avtomobil xarajatlariga limit ajratsin.

6. O‘zbekiston Respublikasi Oliy va o‘rta maxsus ta’lim vazirligi moliya va iqtisodiyot ixtisosligi mutaxassislarini tayyorlash o‘quv rejalariga “Davlat budjetining g‘azna ijrosi” fanini o‘rganishni kiritsin.

7. Markaz Toshkent shahri Mirzo Ulug‘bek tumani Darxontepa ko‘chasi 7-uydagi binoga joylashtirilsin.

8. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.