Oʻzbekiston Respublikasi Prezidentining “Davlat budjetining gʻazna ijrosi tizimini yanada rivojlantirish chora-tadbirlari toʻgʻrisida” 2007-yil 28-fevraldagi PQ-594-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Moliya vazirligining Gʻaznachiligi toʻgʻrisidagi nizom ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Mazkur Nizom “Davlat budjetining gʻazna ijrosi toʻgʻrisida”gi Oʻzbekiston Respublikasi Qonuniga, Oʻzbekiston Respublikasi Prezidentining “Davlat budjetining gʻazna ijrosi tizimini yanada rivojlantirish chora-tadbirlari toʻgʻrisida” 2007-yil 28-fevraldagi PQ-594-son qaroriga muvofiq ishlab chiqilgan hamda Oʻzbekiston Respublikasi Moliya vazirligi Gʻaznachiligining (keyingi oʻrinlarda Gʻaznachilik deb ataladi) asosiy vazifalari, funksiyalari, vakolatlari va javobgarligini belgilaydi.

2. Gʻaznachilik oʻzining hududiy boʻlinmalari bilan birgalikda Davlat budjetining gʻazna ijrosini amalga oshiradigan maxsus vakolatli moliya organi hisoblanadi.

3. Oʻzbekiston Respublikasi Moliya vazirligining Gʻaznachiligi tizimiga bevosita unga boʻysunadigan Qoraqalpogʻiston Respublikasi, viloyatlar va Toshkent shahri Gʻaznachilik boshqarmalari hamda tumanlar (shaharlar) Gʻaznachilik boʻlimlari kiradi.

4. Gʻaznachilik oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, mazkur Nizomga hamda oʻz faoliyatiga tegishli boʻlgan boshqa normativ-huquqiy hujjatlarga amal qiladi.

5. Gʻaznachilik oʻz faoliyatini davlat boshqaruvining boshqa organlari, mahalliy davlat hokimiyati organlari, Oʻzbekiston Respublikasi Markaziy banki, tijorat banklari, boshqa tashkilotlar bilan oʻzaro hamkorlikda bevosita va oʻzining hududiy boʻlinmalari orqali amalga oshiradi.

6. Gʻaznachilik faoliyatini moliyalashtirish respublika budjeti mablagʻlari hisobiga amalga oshiriladi.

7. Gʻaznachilik, Qoraqalpogʻiston Respublikasi, viloyatlar va Toshkent shahri Gʻaznachilik boshqarmalari hamda tumanlar (shaharlar) Gʻaznachilik boʻlimlari Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladi.

Qoraqalpogʻiston Respublikasi, viloyatlar va Toshkent shahri Gʻaznachilik boshqarmalari yuridik shaxslar hisoblanadi.

8. Quyidagilar Gʻaznachilikning asosiy vazifalari hisoblanadi:

Davlat budjetining kassa ijrosi, jumladan tushadigan daromadlarni turli darajadagi budjetlar oʻrtasida taqsimlash, budjetdan mablagʻ oluvchilarning xarajatlar smetalari ijrosi va Davlat budjeti ijrosi toʻgʻrisida hisobot tuzish;

Davlat budjeti mablagʻlarini yagona gʻaznachilik hisob raqami, shuningdek tegishli budjetlar daromadlari va xarajatlari oʻrtasidagi kassa uzilishlarining oldini olishni taʼminlaydigan hududiy gʻaznachilik hisob raqamlarini joriy etish orqali boshqarish;

budjet tashkilotlarining tovarlar yetkazib beruvchilar (ishlarni bajaruvchilar, xizmatlar koʻrsatuvchilar) bilan shartnomalarini, shuningdek Davlat budjeti mablagʻlari hisobidan kapital qurilish boʻyicha buyurtmachilarning shartnomalari (keyingi oʻrinlarda budjet tashkilotlari va buyurtmachilar shartnomalari deb ataladi) xarajatlar smetasida koʻrsatilgan summalar va maqsadlarga qatʼiy muvofiq ravishda tuzilishi ustidan qattiq nazorat oʻrnatish asosida mazkur shartnomalarni majburiy roʻyxatdan oʻtkazish tartibini joriy etish orqali budjet tashkilotlarining maqsadga nomuvofiq, asossiz xarajatlarining oldini olish;

budjet tashkilotlarini, shu jumladan mudofaa va xavfsizlik tuzilmalarini moliyalashtirishga yoʻnaltiriladigan budjet mablagʻlaridan foydalanishni maqbullashtirish yuzasidan monitoring olib borish, bunda ular tomonidan tuzilayotgan shartnomalarning sifati taʼminlanishini, ularning maqsadga muvofiqligi va narx-navo yechimini nazarda tutish hamda, qoidaga koʻra, vositachilik xizmatlaridan voz kechish;

xarajatlar smetasi va roʻyxatga olingan shartnomalarda nazarda tutilgan qatʼiy summalar doirasida tovarlar yetkazib beruvchilar (ishlarni bajaruvchilar, xizmatlar koʻrsatuvchilar)ning bevosita hisob raqamlariga budjetdan mablagʻ oluvchilar nomidan va ularning topshirigʻi boʻyicha toʻlovlarni amalga oshirish orqali toʻlov intizomiga soʻzsiz rioya etilishi ustidan taʼsirchan nazoratni taʼminlash;

Davlat budjeti gʻazna ijrosining buxgalterlik hisobi va hisobotini yuritish, Davlat budjeti ijrosi haqida axborotlarni toʻplash, qayta ishlash va tahlil qilish, shuningdek Oʻzbekiston Respublikasining davlat ichki va tashqi qarzlariga xizmat koʻrsatish, Oʻzbekiston Respublikasi kafolatlarini ijro etish;

9. Gʻaznachilik oʻziga yuklangan vazifalarga muvofiq quyidagi funksiyalarni bajaradi:

budjet tashkilotlari xodimlariga ish haqi va unga tenglashtirilgan boshqa toʻlovlar, shuningdek qonun hujjatlariga muvofiq budjet tashkilotlari tomonidan naqd pul mablagʻlari bilan toʻlanadigan boshqa toʻlovlarni toʻlash uchun Gʻaznachilikning bank hisob raqamlariga mablagʻlar oʻtkazadi;

Davlat budjetida ular uchun mablagʻlar nazarda tutilgan yuridik va jismoniy shaxslarning bank hisob raqamlariga sudning qarori boʻyicha yagona gʻaznachilik hisob raqamidan yoki Gʻaznachilikning boshqa hisob raqamlaridan mablagʻlar oʻtkazadi, shuningdek qonun hujjatlarida nazarda tutilgan tartibda davlat organlari yoki ushbu organlar mansabdor shaxslarining noqonuniy xatti-harakatlari yoki harakatsizligi natijasida fuqarolarga yoki yuridik shaxslarga yetkazilgan zararni qoplash uchun mablagʻlar oʻtkazadi;

Oʻzbekiston Respublikasi Moliya vazirligiga har kunlik asosida yagona gʻaznachilik hisob raqamida va hududiy gʻaznachilik hisob raqamlarida mablagʻlarning harakati toʻgʻrisidagi axborotni elektron shaklda taqdim etadi;

budjetdan mablagʻ oluvchilarga ular uchun Gʻaznachilikda yoki uning hududiy boʻlinmalarida ochilgan shaxsiy hisob raqamlaridan koʻchirmalar, ularning xarajatlarini qoplashga budjet mablagʻlari oʻtkazilganligini tasdiqlaydigan toʻlov hujjatlari va boshqa hujjatlarni taqdim etadi;

manbalar boʻyicha tegishli budjetlar daromadlari tushumi hisobini yuritadi;

Davlat budjeti ijrosi jarayonida respublika budjeti daromadlari tushumi va xarajatlarining qisqa muddatli prognozlarini tuzadi;

moliya organlarining topshirigʻi boʻyicha yuqori budjetlarda nazarda tutilgan rejali dotatsiyalar, subvensiyalar, budjet ssudalari summasini va boshqa toʻlovlarni quyi budjetlarning shaxsiy gʻaznachilik hisob raqamlariga oʻtkazadi;

budjet tashkilotlari va buyurtmachilarning shartnomalari xarajatlar smetasida koʻrsatilgan summalar doirasida va maqsadlarga muvofiq tuzilishi ustidan qattiq nazorat qilish asosida shartnomalarni roʻyxatdan oʻtkazadi;

budjetdan mablagʻ oluvchilar nomidan roʻyxatga olingan shartnomalarda yoki budjet mablagʻlarini yuridik va jismoniy shaxslarning hisob raqamlariga oʻtkazish majburiyatini yuklaydigan boshqa hujjatlarda nazarda tutilgan summalar doirasida tovarlarni yetkazib beruvchilar (ishlarni bajaruvchilar, xizmatlar koʻrsatuvchilar)ning bevosita bank hisob raqamlariga toʻlovlarni amalga oshiradi;

budjet tashkilotlarini, jumladan, mudofaa va xavfsizlik tuzilmalarini moliyalashtirishga yoʻnaltiriladigan budjet mablagʻlaridan foydalanishni maqbullashtirish yuzasidan monitoring olib boradi, bunda ular tomonidan tuzilayotgan shartnomalarning sifati taʼminlanishini, ularning maqsadga muvofiqligi va narx-navo yechimini hamda, qoidaga koʻra, vositachilik xizmatlaridan voz kechishni nazarda tutadi;

schyot-fakturalar va tovarlar yetkazib berilishi (ishlar bajarilishi, xizmatlar koʻrsatilishi) holatini tasdiqlaydigan yoki budjetdan mablagʻ oluvchilarga soliqlar, yigʻimlar hamda budjetga va budjetdan tashqari davlat maqsadli jamgʻarmalariga majburiy toʻlovlar uchun budjet mablagʻlarini oʻtkazish majburiyatini yuklaydigan boshqa hujjatlar asosida budjet mablagʻi oluvchilarning moliyaviy majburiyatlari hisobini yuritadi;

birlamchi hujjatlar asosida Davlat budjeti gʻazna ijrosining tahliliy va sintetik buxgalteriya hisobini yuritadi;

Davlat budjetining ijro etilishi haqida axborotlarni toʻplash, qayta ishlash va tahlil qilish asosida Davlat budjetining kassa ijrosi toʻgʻrisida hisobot tuzadi va ushbu hisobotni belgilangan muddatlarda Oʻzbekiston Respublikasi Moliya vazirligiga taqdim etadi;

qonun hujjatlarida belgilangan tartibda Oʻzbekiston Respublikasining ichki va tashqi qarzlariga xizmat koʻrsatadi, shuningdek Oʻzbekiston Respublikasi kafolatlarini ijro etadi;

oʻzining hududiy boʻlinmalari faoliyatini tahlil qiladi va muvofiqlashtiradi;

normativ-huquqiy hujjatlarni va metodologik materiallarni, shu jumladan Gʻaznachilik hamda uning hududiy boʻlinmalari tomonidan amalga oshiriladigan operatsiyalarni maqbullashtirish, Davlat budjeti ijrosi toʻgʻrisidagi buxgalteriya hisobini va hisobotlarni takomillashtirish masalalari boʻyicha normativ-huquqiy hujjatlarni va metodologik materiallarni ishlab chiqishda qatnashadi;

Gʻaznachilik va uning hududiy boʻlinmalari xodimlari malakasini oshirish ishlarini tashkil etadi va amalga oshiradi.

10. Gʻaznachilik quyidagi huquqlarga ega:

Oʻzbekiston Respublikasi Markaziy bankida va tijorat banklarida Gʻaznachilikning bank hisob raqamlarini ochish va yopish;

budjetdan mablagʻ oluvchilardan Davlat budjetini ijro etish jarayonidagi daromadlar va xarajatlarning qisqa muddatli prognozini tuzish uchun zarur boʻlgan hisobot maʼlumotlarini soʻrab olish;

budjet tashkilotlaridan ular tomonidan Gʻaznachilikka roʻyxatdan oʻtkazishga taqdim etiladigan shartnomalarning sifatini, maqsadga muvofiqligini va narx yechimlarini baholash uchun barcha zarur hujjatlarni belgilangan tartibda talab qilish;

Oʻzbekiston Respublikasi Moliya vazirligi rahbariyati topshirigʻiga binoan Davlat budjeti boʻsh mablagʻlarini bank depozitlariga va boshqa aktivlarga vaqtinchalik joylashtirish, shuningdek budjet ssudalarini Qoraqalpogʻiston Respublikasi budjetiga va mahalliy budjetlarga oʻtkazish;

budjet tashkilotlari va buyurtmachilarning tovarlar (ishlar, xizmatlar)ga moliya organlarida roʻyxatdan oʻtkazilgan xarajatlar smetalarida, qurilishlarning adresli va titul roʻyxatlarida koʻzda tutilgan mablagʻlar hajmidan oshib ketadigan hajmda budjet mablagʻlari hisobiga haq toʻlanishini nazarda tutuvchi shartnomalarini, shuningdek budjet tashkilotlari va buyurtmachilarning toʻlov jadvalisiz, sifati, maqsadga muvofiqligi va narx yechimlari boʻyicha belgilangan talablarga javob bermaydigan shartnomalarini roʻyxatdan oʻtkazishni rad etish;

budjetdan mablagʻ oluvchilar va buyurtmachilarning schyot-fakturalarsiz hamda tovarlar (ishlar, xizmatlar) yetkazib berish faktini tasdiqlovchi yoki budjetdan mablagʻ oluvchilar zimmasiga budjet mablagʻlarini oʻtkazishni yuklovchi boshqa hujjatlarsiz taqdim etilgan kapital qurilish yuzasidan majburiyatlari uchun Davlat budjeti mablagʻlari hisobidan pul toʻlamaslik;

budjetdan mablagʻ oluvchilar va buyurtmachilarning ularning tovarlar (ishlar, xizmatlar) yetkazib beruvchilar bilan Gʻaznachilikda (uning hududiy boʻlinmalarida) roʻyxatdan oʻtkazilmagan shartnomalaridan kelib chiqadigan kapital qurilish yuzasidan majburiyatlari toʻlovi boʻyicha toʻlov hujjatlarini ijro etish uchun qabul qilmaslik;

narxlarining asossiz ravishda oshirib yuborilishiga yoʻl qoʻyilgan tovarlar (ishlar, xizmatlar) uchun toʻlovni budjet tashkilotlari va buyurtmachilarning shartnomalarida nazarda tutilgan summa doirasida cheklash, shuningdek budjet tashkilotlari va buyurtmachilar shartnomalari predmetiga muvofiq boʻlmagan tovarlar (ishlar, xizmatlar) yetkazib berilgan hollarda toʻlovni toʻxtatib turish;

budjetdan mablagʻ oluvchilar tomonidan Oʻzbekiston Respublikasi Moliya vazirligi belgilagan hisobotlar taqdim etilmagan taqdirda ularning budjet mablagʻlari hisobiga amalga oshiriladigan xarajatlari toʻlovini moliya organlari topshirigʻiga binoan toʻxtatib qoʻyish, bu toʻgʻrida tegishli vazirliklar, idoralar, budjetdan mablagʻ oluvchilarni xabardor qilish;

budjet tashkilotlarining Gʻaznachilikda (uning boʻlinmalarida) roʻyxatdan oʻtkazilmagan shartnomalar boʻyicha moliyaviy majburiyatlarini hisobga qabul qilmaslik, qonun hujjatlariga muvofiq budjet tashkilotlari tomonidan boshqa yuridik yoki jismoniy shaxslar bilan shartnoma tuzilmasdan moliyaviy majburiyatlar qabul qilinishi mumkin boʻlgan hollar bundan mustasno;

korxonalar va tashkilotlardan bajarilmagan moliyaviy majburiyatlar boʻyicha budjetdan mablagʻ oluvchilardan toʻlov muddati oʻtgan qarzlar summasini budjetdan mablagʻ oluvchilarning bajarilmagan moliyaviy majburiyatlar mavjudligini tasdiqlovchi zarur hujjatlar ilova qilingan yozma murojaatlari asosida, qonun hujjatlarida belgilangan tartibda undirib olish;

11. Gʻaznachilik quyidagilarga majbur:

Davlat budjeti xarajatlarini yagona gʻaznachilik hisob raqamidan yoki Gʻaznachilikning boshqa bank hisob raqamlaridan belgilangan muddatlarda va tegishli ravishda respublika budjeti, Qoraqalpogʻiston Respublikasi budjeti, mahalliy budjetlar, davlat maqsadli jamgʻarmalari mablagʻlari qoldiqlari doirasida amalga oshirish;

tashkilotlar tomonidan budjet mablagʻlaridan noqonuniy foydalanilishi, budjetdan mablagʻ oluvchilar tomonidan sotib olinadigan tovarlar (ishlar, xizmatlar) narxlarining sunʼiy koʻpaytirilishi, budjetdan mablagʻ oluvchilar tomonidan kreditorlik qarzlar summasining asossiz oshirib yuborilishi hollari aniqlangan taqdirda mavjud materiallarni Oʻzbekiston Respublikasi Moliya vazirligining Nazorat-taftish bosh boshqarmasiga va uning hududiy boʻlinmalariga berish;

oʻziga berilgan huquqlardan qonun hujjatlariga muvofiq foydalanish hamda oʻz faoliyatida yuridik va jismoniy shaxslarning huquqlari va qonuniy manfaatlari kamsitilishiga yoʻl qoʻymaslik.

Gʻaznachilik qonun hujjatlariga muvofiq boshqa majburiyatlarga ham ega boʻlishi mumkin.

12. Gʻaznachilik xodimlari:

oʻzlarining funksional vazifalarini bajarmaganligi yoki zarur darajada ijro etmaganligi;

ushbu Nizom va Oʻzbekiston Respublikasining boshqa qonun hujjatlari talablariga rioya qilmaganligi;

Oʻzbekiston Respublikasi qonun hujjatlari normalariga muvofiq boʻlmagan qarorlar qabul qilganligi;

boshqa qonun buzilishlari uchun qonun hujjatlarida belgilangan tartibda javob beradilar.

13. Gʻaznachilik tuzilmasi Oʻzbekiston Respublikasi Prezidenti tomonidan tasdiqlanadi.

14. Gʻaznachilikni lavozimiga koʻra Oʻzbekiston Respublikasi Moliya vazirining oʻrinbosari hisoblanadigan boshliq boshqaradi.

Gʻaznachilik boshligʻi Oʻzbekiston Respublikasi Prezidenti bilan kelishgan holda, Oʻzbekiston Respublikasi Moliya vazirining taqdimiga koʻra Vazirlar Mahkamasi tomonidan lavozimga tayinlanadi va lavozimdan ozod qilinadi.

15. Gʻaznachilik boshligʻi oʻrinbosarlari Gʻaznachilik boshligʻining taqdimiga koʻra Oʻzbekiston Respublikasi Moliya vaziri tomonidan lavozimga tayinlanadilar.

16. Gʻaznachilikning hududiy boʻlinmalari boshliqlari Oʻzbekiston Respublikasi Moliya vazirligi tomonidan belgilangan tartibda Gʻaznachilik boshligʻi taqdimiga koʻra Oʻzbekiston Respublikasi Moliya vaziri tomonidan lavozimga tayinlanadi va lavozimdan ozod qilinadi.

17. Gʻaznachilikning hududiy boʻlinmalari toʻgʻrisidagi nizomlar Oʻzbekiston Respublikasi moliya vaziri tomonidan tasdiqlanadi.

18. Gʻaznachilik va uning hududiy boʻlinmalari yagona markazlashtirilgan tizimni tashkil qiladi hamda quyi boshliqlarning yuqori boshliqlarga va Oʻzbekiston Respublikasi moliya vaziriga boʻysunishi va hisobot berishi asosida faoliyat koʻrsatadi.

19. Gʻaznachilik oʻziga berilgan vakolatlarga muvofiq oʻz hududiy boʻlinmalari faoliyati ustidan tezkor boshqaruvni va nazoratni amalga oshiradi.