Oʻzbekiston Respublikasining “Baholash faoliyati toʻgʻrisida”gi Qonuniga va Oʻzbekiston Respublikasi Vazirlar Mahkamasining “Baholash faoliyatini litsenziyalash toʻgʻrisida” 2003-yil 8-maydagi 210-sonli qaroriga muvofiq, Oʻzbekiston Respublikasi Davlat mulkini boshqarish davlat qoʻmitasi qaror qiladi:

1. Professional baholovchiga qoʻyiladigan malaka talablari toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgandan soʻng oʻn kundan keyin kuchga kiradi.

Mazkur Nizom, Oʻzbekiston Respublikasining “Baholash faoliyati toʻgʻrisida”gi Qonuni va Oʻzbekiston Respublikasi Vazirlar Mahkamasining “Baholash faoliyatini litsenziyalash toʻgʻrisida”gi 2003-yil 8-maydagi 210-son qaroriga muvofiq, professional baholovchiga qoʻyiladigan malaka talablarini belgilaydi va professional baholovchi attestatini olish uchun attestatsiya (qayta attestatsiya)dan oʻtishga hujjatlarni taqdim etish paytida yuridik shaxslarning asosiy ish joyi boʻyicha shtatdagi xodimlari sifatida faoliyat yuritayotgan professional baholovchilarga hamda yakka tartibdagi tadbirkorlarga tatbiq etiladi.

1. Mazkur Nizomda quyidagi tushunchalardan foydalaniladi:

baholash tashkiloti — qonunchilikda belgilangan tartibda baholash faoliyatini amalga oshiruvchi yuridik shaxs;

professional baholovchi — baholanadigan obyekt qiymatini belgilashni bevosita amalga oshiradigan jismoniy shaxs;

baholash faoliyatini tartibga soluvchi vakolatli davlat organi — Oʻzbekiston Respublikasi Davlat mulkini boshqarish davlat qoʻmitasi;

oʻquv markazi — baholash faoliyatini tartibga soluvchi vakolatli davlat organi tomonidan tasdiqlangan baholash faoliyati sohasiga oid dasturlar boʻyicha mutaxassislarni tayyorlash (malakasini oshirish)ni amalga oshiruvchi tashkilot.

2. Professional baholovchi quyidagi malaka talablariga javob berishi kerak:

a) iqtisodiy, yuridik yoki texnik maʼlumotga hamda oxirgi oʻn yil ichida baholash faoliyati sohasida kamida bir yillik ish stajiga yoki buxgalteriya hisobi va auditorlik sohasida kamida ikki yillik ish stajiga ega boʻlishi;

yoxud oliy maʼlumotga hamda oxirgi oʻn yil ichida baholash faoliyati sohasida kamida ikki yillik ish stajiga yoki buxgalteriya hisobi va audit sohasida kamida uch yillik ish stajiga ega boʻlishi;

yoxud iqtisod, yuridik yoki texnik fanlari nomzodi (doktori) ilmiy darajalariga ega boʻlishi;

yakka tartibdagi tadbirkor uchun — iqtisodiyot mutaxassisligi boʻyicha oliy maʼlumotga ega boʻlishi hamda baholovchi sifatida kamida besh yil ish stajiga ega boʻlishi;

b) oʻquv markazlarida taʼlim olganligi, bunda oʻqish muddati tugagan sanadan boshlab uch yildan ortiq vaqt oʻtmagan boʻlishi kerak;

boshqa mamlakatlarda baholash boʻyicha tegishli kurslarni tugatganligi toʻgʻrisida chet el mamlakatining xalqaro darajadagi sertifikatlari mavjud boʻlsa va oʻqish muddati tugagan sanadan boshlab shu vaqtga qadar uch yildan ortiq muddat oʻtmagan taqdirda, oʻquv markazlarida taʼlim olgan boʻlishi shart emas;

v) professional baholovchi attestatiga ega boʻlgandan soʻng, keyingi yildan boshlab har yili oʻquv markazlarida malaka oshirish dasturlari asosida yillik hajmi oltmish soatdan kam boʻlmagan hajmdagi oʻquv kurslarda taʼlim olishi;

boshqa mamlakatlarda oʻquv kurslarining yillik hajmi oltmish soatdan kam boʻlmagan holda (professional baholovchi attestatiga ega boʻlgandan soʻng, keyingi yildan boshlab) malaka oshirish boʻyicha tegishli kurslarni tugatganligi toʻgʻrisida chet el mamlakatining xalqaro darajadagi sertifikatlariga ega boʻlgan taqdirda, oʻquv markazlarida malaka oshirish boʻyicha taʼlim olinishi shart emas;

g) baholash faoliyatini tartibga soluvchi vakolatli davlat organi tomonidan belgilangan tartibda beriladigan professional baholovchi attestatiga ega boʻlishi;

d) ishchanlik obroʻsiga putur yetmagan boʻlishi kerak.

Bunda, ishchanlik obroʻsiga putur yetganlar — korxona, muassasa va tashkilotlarda sud belgilagan muddat mobaynida baholash yoki moliyaviy-xoʻjalik faoliyati bilan shugʻullanish huquqidan, yoxud yakka tartibdagi tadbirkor sifatida faoliyat yuritish huquqidan mahrum boʻlgan shaxslar hisoblanadi.

3. Mazkur Nizomdan kelib chiqadigan nizolar qonunchilikda belgilangan tartibda hal etiladi.

4. Mazkur Nizom Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi bilan kelishilgan.