Tanlov savdolarini o‘tkazish mexanizmini yanada takomillashtirish, qishloq joylarda yangilangan namunaviy loyihalar bo‘yicha arzon uy-joylar qurish uchun pudrat tashkilotlarini hamda qurilish materiallari va asbob-uskunalarini yetkazib beruvchilarni aniqlashda raqobat muhitini ta’minlash maqsadida Vazirlar Mahkamasi qaror qiladi:

1. Qishloq joylarda yangilangan namunaviy loyihalar bo‘yicha arzon uy-joylar qurish uchun pudrat tashkilotlarini hamda qurilish materiallari va asbob-uskunalarni yetkazib beruvchilarni aniqlash yuzasidan tanlov savdolari o‘tkazish tartibi to‘g‘risidagi nizom ilovaga muvofiq tasdiqlansin.

2. “Qishloq qurilish invest” injiniring kompaniyasi” MChJ O‘zbekiston Respublikasi Iqtisodiyot vazirligi, Moliya vazirligi, “Davarxitektqurilish” qo‘mitasi, Davlat raqobat qo‘mitasi, boshqa vazirliklar, idoralar va moliyalashtiruvchi tijorat banklari bilan birgalikda ushbu qaror bilan tasdiqlangan nizom talablariga muvofiq bir oy muddatda:

qishloq joylarda yangilangan namunaviy loyihalar bo‘yicha “tayyor holda topshirish” shartlari asosida arzon uy-joylar qurish uchun pudrat tashkilotlarini aniqlash yuzasidan namunaviy tanlov hujjatlarini;

qishloq joylarda yangilangan namunaviy loyihalar bo‘yicha arzon uy-joylar qurish uchun qurilish materiallari va asbob-uskunalarni yetkazib beruvchilarni aniqlash yuzasidan namunaviy tanlov hujjatlarini ishlab chiqsin.

3. Qoraqalpog‘iston Respublikasi Vazirlar Kengashi va viloyatlar hokimliklari “Davarxitektqurilish” qo‘mitasi va “Qishloq qurilish invest” injiniring kompaniyasi” MChJ bilan birgalikda qishloq joylarda yangilangan namunaviy loyihalar bo‘yicha “tayyor holda topshirish” shartlari asosida arzon uy-joylar qurish uchun pudrat tashkilotlarini aniqlash yuzasidan bir oy muddatda hududiy tanlov komissiyalarini tashkil etsinlar.

“Qishloq qurilish invest” injiniring kompaniyasi” MChJ O‘zbekiston Respublikasi Davlat raqobat qo‘mitasi, Iqtisodiyot vazirligi, Moliya vazirligi, boshqa vazirliklar, idoralar va tijorat banklari bilan birgalikda qishloq joylarda yangilangan namunaviy loyihalar bo‘yicha arzon uy-joylar qurish uchun qurilish materiallari va asbob-uskunalarni yetkazib beruvchilarni aniqlash yuzasidan bir oy muddatda tanlov komissiyasi tashkil etsin.

4. Vazirlar Mahkamasining “Qishloq joylarda namunaviy loyihalar bo‘yicha “tayyor holda topshirish” shartlari asosida yakka tartibda uy-joy qurish uchun pudrat tashkilotlarini aniqlash yuzasidan tanlov savdolari o‘tkazish tartibi to‘g‘risidagi nizomni tasdiqlash haqida” 2012-yil 13-fevraldagi 37-son qarori (O‘zbekiston Respublikasi QT, 2012-y., 2-son, 9-modda) o‘z kuchini yo‘qotgan deb hisoblansin.

5. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — “O‘zbekiston temir yo‘llari” AJ boshqaruvi raisi A.J. Ramatov zimmasiga yuklansin.

1. Ushbu Nizom qishloq joylarda yangilangan namunaviy loyihalar bo‘yicha arzon uy-joylar qurish uchun pudrat tashkilotlarini hamda qurilish materiallari va asbob-uskunalarni yetkazib beruvchilarni aniqlash yuzasidan tanlov savdolari o‘tkazish tartibini belgilaydi.

Ushbu Nizom talablari, moliyalashtirish manbalaridan qat’i nazar, qishloq joylarda yangilangan namunaviy loyihalar bo‘yicha arzon uy-joylar qurish ishtirokchilari tomonidan bajarilishi majburiy hisoblanadi.

Agar xalqaro moliya tashkilotlari, xorijiy kreditorlar va grant beruvchilarning kreditlar (qarzlar) va grantlar berish shartlarida ushbu Nizomda nazarda tutilganlardan boshqacha qoidalar belgilangan bo‘lsa, u holda xalqaro moliya tashkilotlari, xorijiy kreditorlar va grant beruvchilarning tegishli hujjatlarida belgilangan qoidalar qo‘llanadi.

2. Qishloq joylarda yangilangan namunaviy loyihalar bo‘yicha arzon uy-joylar qurish uchun tovarlarni va ishlarni (xizmatlarni) xarid qilish faqat xarid predmeti tegishli hujjatlar (kredit shartnomasi, qarz bitimi, qurilishlarning manzilli ro‘yxati va boshqalar) bilan tasdiqlangan moliyaviy resurslar bilan ta’minlangan taqdirdagina amalga oshiriladi.

3. Ushbu Nizomda quyidagi asosiy tushunchalardan foydalaniladi:

buyurtmachi — “Qishloq qurilish invest” injiniring kompaniyasi” MChJ;

tanlov savdolari tashkilotchisi — buyurtmachi yoki buyurtmachi tomonidan tanlov savdolarini tashkil etish va o‘tkazish bo‘yicha shartnoma asosida jalb etiladigan yuridik shaxs;

tanlov savdolari predmeti — qishloq joylarda yangilangan namunaviy loyihalar bo‘yicha arzon uy-joylar qurish uchun buyurtmachi tomonidan belgilanadigan xarid qilinadigan tovarlar va ishlar (xizmatlar) ro‘yxati;

tovarlar (qurilish materiallari va asbob-uskunalar) — xom ashyo, buyumlar, konstruksiyalar, asbob-uskunalarga butlovchi buyumlar, qattiq, suyuq yoki gaz holatidagi predmetlar, energiyaning barcha turlari, shuningdek yetkazib beriladigan tovarlarga qo‘shimcha xizmatlar, agar ularning qiymati tovarning o‘z qiymatida ortiq bo‘lmasa;

lot — tanlov savdolarining bo‘linmaydigan predmeti;

namunaviy tanlov hujjatlari — belgilangan tartibda tasdiqlanadigan hujjatlar, ularning tarkibiga quyidagilar kiradi: tanlov savdolariga taklifnoma, savdo qatnashchilariga qo‘yiladigan malaka talablari, tanlov takliflarini baholash mezonlari va ularni baholash shakllari, kontrakt shakllari, tovarlar va ishlar (xizmatlar) spetsifikatsiyasi namunalari;

tanlov hujjatlari — namunaviy tanlov hujjatlari asosida ishlab chiqilgan, tanlov savdolari predmetining texnik, moliyaviy, tijorat, tashkiliy va boshqa tavsiflari to‘g‘risidagi, tanlov savdolarini tashkil etish shartlari va o‘tkazish tartib-qoidasi haqidagi boshlang‘ich ma’lumotlardan iborat bo‘lgan hujjatlar turkumi;

tanlov komissiyasi — ushbu Nizomga va tanlov hujjatlari talablariga muvofiq pudrat tashkilotlarini yoki tovarlar yetkazib beruvchilarni aniqlash funksiyalarini bajarish uchun tashkil etiladigan organ;

talabgor — taklif etilgan shartlar asosida tanlov savdolarida qatnashish to‘g‘risidagi o‘z istagini bildirgan hamda uning ofertasi tanlov savdolari tashkilotchisi tomonidan ro‘yxatdan o‘tkazilgungacha tanlov hujjatlarini sotib olgan yuridik shaxs;

oferent — tanlov hujjatlari shartlariga muvofiq tayyorlangan va tanlov savdolari tashkilotchisi tomonidan ro‘yxatdan o‘tkazilgan o‘z ofertasini taqdim etgan talabgor;

oferta — talabgorning tanlov hujjatlarida belgilangan shartlarga muvofiq taqdim etilgan tanlov savdolari predmetiga nisbatan taklifi;

baholash guruhi — tushgan ofertalarni mufassal o‘rganish va taqqoslash uchun tanlov komissiyasi tuzadigan vaqtinchalik organ;

baholash mezonlari — ofertalarni baholash, talabgorlarni tanlab olish va tanlov savdolari g‘olibini tanlab olish uchun foydalaniladigan ko‘rsatkichlar;

ofertaning ta’minlanishi to‘g‘risidagi deklaratsiya — oferentning ofertadagi barcha talablar va shartlarga rioya etish yuzasidan so‘zsiz majburiyati;

avans kafolati — buyurtmachining talabi bo‘yicha ko‘rsatilgan muddat doirasida avans summasiga ekvivalent bo‘lgan kafolat summasi doirasida pul summasini to‘lash to‘g‘risida bankning so‘zsiz majburiyati;

kontraktning bajarilishi kafolati — kontrakt bo‘yicha majburiyatlarning bajarilishiga nisbatan tanlov savdolari g‘olibiga berilgan bankning so‘zsiz kafolati;

kontrakt — buyurtmachi va tanlov savdolari g‘olibi o‘rtasida tuziladigan tovar yetkazib berish yoki pudrat shartnomasi.

4. Tovarlar va ishlarni (xizmatlarni) xarid qilish quyidagi prinsiplar asosida amalga oshiriladi:

tejamkorlik — narxlar va sifatning maqbul nisbatlaridan kelib chiqib taqdim etilgan ofertalarning eng yaxshisini tanlash;

samaradorlik — xaridlar summasi bilan xaridlarni o‘tkazishga xarajatlar o‘rtasidagi maqbul nisbatni ta’minlash, xaridlarda harakatlarning bir-birini takrorlashini bartaraf etish, xaridlarni belgilangan muddatlarda amalga oshirish;

shaffoflik — xaridlarga talabgorlarni qo‘yish, qonunchilikda belgilangan hollar bundan mustasno, xaridlar o‘tkazilganligi to‘g‘risida ommaviy e’lon qilish, xaridlarni o‘tkazish shartlari, ularga qo‘yiladigan talablar va amalga oshirilgan xaridlarning natijalari to‘g‘risida axborot taqdim etish;

halol raqobat — talabgorlarning keng doirasi ishtirok etishi, xarid qatnashchilari o‘rtasida til biriktirish shartlarini istisno etish, narxlari asoslanmagan va sun’iy ravishda pasaytirilgan g‘arazli takliflarga yo‘l qo‘ymaslik (demping), shuningdek xaridlar qatnashchilarida manfaatlar nizosi namoyon bo‘lishiga qarshi kurashish;

xolislik — kamsitmaydigan shart-sharoitlar, jamoatchilik tomonidan xaridlarni o‘tkazish tartib-qoidasiga ishonchni ta’minlash uchun talabgorlar va qatnashchilarga nisbatan adolat va xolislikni yaratish.

5. Buyurtmachi, tanlov savdolari tashkilotchisi, hududiy tanlov komissiyasi va oferentlar tanlov savdolarining qatnashchilari hisoblanadi.

6. Qishloq joylarda “tayyor holda topshirish” shartlarida yangilangan namunaviy loyihalar bo‘yicha arzon uy-joylar qurish uchun pudrat tashkilotlarini aniqlash bo‘yicha hududiy tanlov komissiyalari (keyingi o‘rinlarda hududiy tanlov komissiyalari deb ataladi) Qoraqalpog‘iston Respublikasi Vazirlar Kengashi va viloyatlar hokimlarining qarorlari bilan tashkil etiladi.

Hududiy tanlov komissiyasiga Qoraqalpog‘iston Respublikasi Vazirlar Kengashi Raisining o‘rinbosari va viloyat hokimlarining sanoatni rivojlantirish, kapital qurilish, kommunikatsiyalar va kommunal xo‘jaligi masalalari bo‘yicha o‘rinbosarlari (keyingi o‘rinlarda viloyatlar hokimlarining o‘rinbosarlari deb ataladi) boshchilik qiladi.

7. Hududiy tanlov komissiyalari tarkibiga quyidagilarning:

“Qishloq qurilish invest” injiniring kompaniyasi” MChJ hududiy bo‘linmalari;

Qoraqalpog‘iston Respublikasi Iqtisodiy taraqqiyot va kambag‘allikni qisqartirish vazirligi, viloyatlar hokimliklarining moliya bosh boshqarmalari;

Qoraqalpog‘iston Respublikasi Moliya vazirligi, viloyatlar hokimliklarining moliya bosh boshqarmalari;

O‘zbekiston Respublikasi Monopoliyaga qarshi kurashish qo‘mitasining hududiy bo‘linmalari;

Qoraqalpog‘iston Respublikasi Qurilish vazirligining, Toshkent shahar va viloyatlar qurilish bosh boshqarmalari;

qurilish sohasida hududiy nazorat inspeksiyalari;

davlat soliq xizmatining hududiy organlari;

moliyalashtiruvchi tijorat banklari;

“Qishloq qurilish loyiha” MChJ filiallari;

Qoraqalpog‘iston Respublikasi va viloyatlarning tegishli tumanlari hokimliklari vakillari kiritiladi.

8. Tanlov savdolarining shaffofligini ta’minlash maqsadida hududiy tanlov komissiyalari majlislarida hududiy xotin-qizlar jamoatchilik kengashi, Yoshlar ittifoqi, O‘zbekiston “Mahalla” xayriya jamoat fondi va O‘zbekiston faxriylarining ijtimoiy faoliyatini qo‘llab-quvvatlash “Nuroniy” jamg‘armasi vakillari kuzatuvchilar sifatida ishtirok etishi mumkin.

9. Hududiy tanlov komissiyasi toq sonli a’zolardan iborat bo‘lishi va, agar, komissiya a’zolarining kamida to‘rtdan uch qismi uning majlisida qatnashsa o‘z funksiyalarini amalga oshirishga huquqiy vakolatli hisoblanadi.

10. Hududiy tanlov komissiyasi tarkibida buyurtmachining vakillari soni uning umumiy sonining to‘rtdan bir qismidan ortiq bo‘lmasligi kerak.

11. Quyidagilar hududiy tanlov komissiyasining asosiy funksiyalari hisoblanadi:

qishloq joylarda “tayyor holda topshirish” shartlarda yangilangan namunaviy loyihalar bo‘yicha arzon uy-joylar qurish uchun pudrat tashkilotlarini aniqlash bo‘yicha tanlov savdolarini o‘z vaqtida sifatli o‘tkazish ishlarini tizimli tashkil etish;

ish reglamentini, tanlov hujjatlarini va talabgorlarga qo‘yiladigan tanlov takliflarini baholash mezonlarini tasdiqlash;

tanlov hujjatlarida qayd etilgan tanlov savdolarida qatnashishga buyurtmanomani ta’minlash shaklini tasdiqlash;

ofertani qabul qilishning oxirgi kuni va vaqtini, konvertlarni ochish vaqtini va joyini belgilash;

oferentlarning malaka, texnik va tijorat takliflarini o‘rganish bo‘yicha baholash guruhlari tarkibini tasdiqlash;

oferta solingan konvertlarni ochish, konvertlarni ochish to‘g‘risidagi protokolni tasdiqlash;

tanlov takliflarini ko‘rib chiqish va baholash muddatlarini tasdiqlash;

tanlov hujjatlarida ko‘rsatilgan mezonlarga muvofiq ofertani o‘rganish, tahlil qilish va ko‘rib chiqish;

tanlov savdolari g‘olibini aniqlash yoki boshqa qaror qabul qilish;

tanlov savdolarini o‘tkazish davomida yuzaga keladigan nizolar va kelishmovchiliklarni ko‘rib chiqish, tartibga solish, ular bo‘yicha tegishli xulosalar qabul qilish.

12. Hududiy tanlov komissiyalari oferentlarning texnik va tijorat takliflarini o‘rganish bo‘yicha baholash guruhlari tashkil etadilar.

13. Oferentlarning tijorat takliflarini o‘rganish bo‘yicha baholash guruhlarining tarkibi:

buyurtmachining (baholash guruhining rahbari);

davlat qurilish sohasida hududiy nazorat inspeksiyalarining, Qoraqalpog‘iston Respublikasi Iqtisodiy taraqqiyot va kambag‘allikni qisqartirish vazirligining, O‘zbekiston Respublikasi viloyatlari iqtisodiy taraqqiyot va kambag‘allikni qisqartirish bosh boshqarmalarining;

Qoraqalpog‘iston Respublikasi Moliya vazirligining, viloyatlar hokimliklarining moliya bosh boshqarmalarining;

davlat soliq xizmati hududiy organlarining vakillaridan;

Qoraqalpog‘iston Respublikasi va viloyatlar tegishli tumanlari hokimliklari vakillaridan shakllantiriladi.

14. Oferentlarning tijorat takliflarini o‘rganish bo‘yicha baholash guruhlari tarkibi:

buyurtmachining (baholash guruhining rahbari);

O‘zbekiston Respublikasi Monopoliyaga qarshi kurashish qo‘mitasi hududiy bo‘linmalarining;

“Qishloq qurilish loyiha” MChJ filiallarining;

moliyalashtiruvchi tijorat banklarining;

Qoraqalpog‘iston Respublikasi va viloyatlarning tegishli tumanlari hokimliklari vakillaridan shakllantiriladi.

15. Zarurat bo‘lganda hududiy tanlov komissiyalari oferentlarning tanlov takliflarini baholash uchun ekspert va maslahat tashkilotlarining vakillarini jalb etishi mumkin.

16. Oferentlarning texnik va tijorat takliflarini baholash bo‘yicha baholash guruhlarining huquqlari va vazifasi hududiy tanlov komissiyalarining ishlar reglamentida belgilanadi.

17. Aniq uy-joy massivi (lot, qurilish uchastkasi) bo‘yicha tanlov savdolari o‘tkazish to‘g‘risidagi e’lon joylashtirilgunga qadar uy-joylar massivining (keyingi o‘rinlarda massiv deb ataladi) tayyorligi belgilangan tartibda tugallangan bo‘lishi kerak.

18. Massivning tayyorligi mezoni namunaviy tender hujjatlarida va hududiy tanlov komissiyalarining namunaviy ish reglamentida ko‘rsatiladi.

19. Agar tanlov savdolari o‘tkazishga xarajatlar tanlov savdolari predmetining boshlang‘ich qiymatiga nisbatan iqtisodiy jihatdan foydali bo‘lmasa, bunday obyektlar buyurtmachining qarori bilan lotlarga bo‘lingan holda bitta tanlov savdosiga birlashtirilishi mumkin.

20. Tanlov savollarini o‘tkazishga tayyorgarlik davomida tanlov savdolari tashkilotchisi buyurtmachining buyurtmanomalari bo‘yicha hududiy tanlov komissiyasi tomonidan belgilangan muddatda ommaviy axborot vositalarida tanlov savdolari o‘tkazish to‘g‘risida e’lon beradi.

E’lon respublika va mahalliy gazetalardan birida e’lon qilinadi, shuningdek buyurtmachining, tanlov savdolari tashkilotchisining, O‘zbekiston Respublikasi Qurilish vazirligining, Qoraqalpog‘iston Respublikasi Vazirlar Kengashi va viloyatlar hokimliklarining veb-saytida joylashtiriladi.

21. Tanlov savdolari o‘tkazish to‘g‘risidagi e’londa quyidagi ma’lumotlar bo‘lishi kerak:

buyurtmachining nomi, joylashgan joyi va elektron manzili;

tanlov savdolari predmetini moliyalashtirish manbalari;

tanlov savdolari predmetining tavsifi va u amalga oshiriladigan joy;

tanlov savdolari predmetini amalga oshirish muddati;

talabgorlarga qo‘yiladigan asosiy shartlar;

tanlov hujjatlarini sotib olish joyi va uning uchun to‘lov miqdori;

oferta taqdim etiladigan joy, taqdim etishning oxirgi kuni va vaqti;

ofertani ochish joyi, kuni va vaqti;

buyurtmachining boshqa talablari.

22. Tanlov hujjatlari, qoidaga ko‘ra, uchta asosiy qismdan: ruxsat beruvchi, texnik va tijorat qismlaridan iborat bo‘ladi.

23. Tanlov hujjatlarining ruxsat beruvchi qismi quyidagilardan iborat bo‘ladi:

buyurtmachining tanlov savdolari o‘tkazish to‘g‘risidagi farmoyishi;

tanlov komissiyasi tarkibini tasdiqlovchi hujjat;

hududiy tanlov komissiyasining ish reglamenti va hududiy tanlov komissiyasining uni tasdiqlash bo‘yicha majlisi protokoli.

ishchi loyiha va tanlov savdolari predmetining smeta qiymati bo‘yicha davlat ekspertiza organlarining ijobiy xulosasi;

ommaviy axborot vositalarida e’lon qilinadigan tanlov savdolari o‘tkazish to‘g‘risidagi e’lonning matni.

Tanlov hujjatlarining ruxsat beruvchi qismiga kiradigan hujjatlar talabgorlarga berilmaydi.

24. Tanlov hujjatlarining texnik qismi quyidagilardan iborat bo‘ladi:

talabgorlarning tanlov savdolarida qatnashish uchun buyurtmanomasi shakli;

talabgorning malakasi hamda uning texnik va moliyaviy holatiga baho berishga qo‘yiladigan talablar va mezonlar, takliflarni moliyaviy baholash va tanlov g‘olibini aniqlash mezonlari, tanlov savdolarining tartib-qoidasiga tegishli bo‘lgan boshqa hujjatlardan iborat yo‘riqnoma;

xarajatlar smetasi va tovarlarning texnik spetsifikatsiyalari;

ofertani tayyorlash uchun talab etiladigan hujjatlar va shakllar ro‘yxati.

25. Tanlov hujjatlarining tijorat qismi quyidagilarni o‘z ichiga oladi:

ilova qilinadigan xatning shakli;

tanlov taklifini ta’minlash to‘g‘risida kafolat shakli (deklaratsiyalar, bank kafolatlari yoki bo‘naklar tarzida);

oferent tanlov savdolarining g‘olibi deb e’tirof etilgan taqdirda avans to‘lovi kafolati miqdori va kontraktni ijro etish kafolati;

talab etiladigan pudrat ishlari hajmlari bo‘yicha ko‘rsatkich;

tijorat taklifi;

kontraktning loyihasi.

26. Ofertani taqdim etish tartibi tanlov hujjatlarida belgilanadi. Taqdim etiladigan oferta tanlov hujjatlari va shartlari talablariga muvofiq bo‘lishi kerak.

27. Tanlov hujjatlariga, ofertani o‘rab-joylashga va markirovka qilishga, takliflarni texnik va moliyaviy baholash mezonlariga qo‘yiladigan shartlar va talablar hududiy tanlov komissiyalari tomonidan ko‘rib chiqiladi va tasdiqlanadi.

Ofertani taqdim etish muddati tamom bo‘lgunga qadar tanlov savdolari tashkilotchisi buyurtmachining yoki hududiy tanlov komissiyasining talabiga ko‘ra tanlov hujjatlariga o‘zgartirish va qo‘shimchalar kiritish, bu to‘g‘rida tanlov hujjatlarini sotib olgan talabgorlarni darhol xabardor qilish, ofertaga tuzatish kiritish uchun yetarli bo‘lgan vaqtda ofertaning taqdim etish muddatini uzaytirish huquqiga ega.

28. Tanlov hujjatlari ular uchun to‘lov to‘langandan beriladi.

To‘lov miqdori tanlov hujjatlari nusxalari ko‘paytirilishi va tarqatilishi qiymatidan kelib chiqib buyurtmachi va/yoki tanlov savdolari tashkilotchisi tomonidan belgilanadi.

29. Tanlov savdolarida qatnashish uchun talabgorga quyidagi malaka talablari qo‘yiladi:

tanlov savdolariga qo‘yilgan obyektlarga o‘xshash obyektlarda ish tajribasining mavjudligi;

oldin o‘z kuchi bilan bajarilgan ishlar hajmi to‘g‘risidagi ma’lumotlar;

miqdori tanlov hujjatlarida aniqlanadigan asosiy va aylanma mablag‘larning mavjudligi;

qurilishni amalga oshirish uchun zarur bo‘lgan moddiy-texnik baza va mehnat resurslarining mavjudligi;

Texnik takliflarning barcha malaka talablari “muvofiq/muvofiq emas” prinsipiga asosan baholanadi.

30. Tanlov savdolarida qatnashish uchun talabgorlarga qo‘yiladigan malaka talablari bo‘yicha mezonlar hududiy tanlov komissiyalarining ish reglamentida va namunaviy tanlov hujjatlarida keltiriladi.

31. Ta’sis hujjatlari, moliyaviy qatnashish, xolding shaklida va boshqa shakllarda ifodalangan bir-biriga bevosita tashkiliy-huquqiy yoki moliyaviy bog‘liqlikda bo‘lgan qurilish tashkilotlarining tanlov savdolarida qatnashishi taqiqlanadi.

32. Qayta tashkil etish (ajratib chiqarish, bo‘lib yuborish), tugatish bosqichidagi yoki mol-mulki xatlangan to‘lovga qobiliyatsizlik jarayonidagi talabgorlar tanlov savdolarida ishtirok etishga qo‘yilmaydi.

33. Talabgorning imzosi bilan tasdiqlangan oferta tanlov savdolari tashkilotchisiga yelimlangan konvertda yuboriladi.

34. Ofertalarni taqdim etish muddati ommaviy axborot vositalarida e’lon berilgan kundan boshlab kamida 30 kunni tashkil etishi kerak.

35. Ofertani taqdim etish muddati tamom bo‘lgandan keyin taqdim etilgan talabgorlarning ofertalari qabul qilinmaydi.

Ofertani taqdim etish sanasi tanlov savdolari tashkilotchisining, oferta pochta bildirishnomasi olinganligi to‘g‘risidagi qaydi bo‘yicha yoki tanlov savdolari tashkilotchisining oferentga berilgan oferta olinganligi to‘g‘risidagi bildirishnomasi sanasi bo‘yicha (oferta chopar orqali yetkazilgan taqdirda) aniqlanadi.

36. Ofertalarni berish muddati tamom bo‘lgandan keyin hududiy tanlov komissiyasi tushgan va ro‘yxatdan o‘tkazilgan ofertalarni oferentlarning vakillari ishtirokida ochadi, butligini tekshiradi, oferentlarning nomlarini e’lon qiladi, tanlov hujjatlari talablariga muvofiq hujjatlarning taqdim etilgan turkumlari mazmunini tekshiradi.

Hududiy tanlov komissiyasi majlisining natijalari to‘g‘risidagi axborot qatnashmagan oferentga yozma shaklda yetkaziladi.

Hududiy tanlov komissiyasining majlisi boshqa muddatga ko‘chirilgan taqdirda, tanlov savdolari tashkilotchisi buyurtmachining yoki hududiy tanlov komissiyasining talabiga ko‘ra tanlov hujjatlarini sotib olgan talabgorlarga ofertani taqdim etish muddati uzaytirilganligi to‘g‘risida bildirishnoma yuboradi.

37. Ofertaning mazmunini uni hududiy tanlov komissiyasi majlisida ko‘rib chiqish davomida oferentlarga tushuntirish berishga yo‘l qo‘yiladi.

Bunda ofertaning mazmunini o‘zgartiradigan, shu jumladan narxini yoki ijro etish muddatini o‘zgartiradigan tushuntirish berishga yo‘l qo‘yilmaydi.

38. Tanlov savdolarining g‘olibini aniqlash hududiy tanlov komissiyasining yopiq majlisida o‘tkaziladi.

Hududiy tanlov komissiyasi g‘oliblarni eng raqobatli narxlar, ishlarni (xizmatlarni) bajarish shartlari, to‘lov va tanlov hujjatlarida belgilangan boshqa mezonlar bo‘yicha aniqlaydi.

39. Ofertalarni ko‘rib chiqish, baholash va taqqoslash natijalari to‘g‘risidagi axborot oshkor qilinmaydi, qonunchilik nazarda tutilgan hollar bundan mustasno.

40. Hududiy tanlov komissiyasining har bir majlisida protokol yuritiladi.

Qoidaga ko‘ra, bular tanlov savdolarini o‘tkazish tartib-qoidasi bilan bog‘liq konvertlarni ochish, tanlov savdolari g‘olibini aniqlash protokollari va boshqa protokollar.

41. Tanlov savdolari tashkilotchisi tanlov savdolari g‘olibiga kontraktlarni berish to‘g‘risida qaror qabul qilingandan keyin besh kundan kech bo‘lmagan muddatda yozma bildirishnoma yuboradi.

Tanlov savdolarini tashkil etish va o‘tkazish sxemasi ushbu Nizomga 1-ilovada keltirilgan.

42. G‘olib bilan kontrakt tuzilgandan va ommaviy axborot vositalarida buyurtmachi tomonidan tanlov savdolari natijalari (predmet, g‘olib, shartnomaviy narx va investitsiya loyihasini amalga oshirish muddati) to‘g‘risida e’lon berilgandan keyin tanlov savdolari tugallangan deb hisoblanadi.

43. O‘tkazilgan tanlov savdolari natijalari bo‘yicha vakolatli organlar tomonidan hududiy tanlov komissiyalarining hisobotlarni (texnik, shuningdek oferentlarning tijorat takliflari asosida ishlab chiqilgan moliyaviy) taqdim etish tartibi hududiy tanlov komissiyalarining ish reglamentida belgilanadi.

44. Tanlov savdolari g‘olibi qonunchilikda belgilangan tartibda obyekt qurilishi sug‘urta qilinishini ta’minlaydi.

45. Quyidagi hollarda, agar:

birorta ham buyurtma tushmasa;

oferta tanlov hujjatlari shartlariga muvofiq bo‘lmasa;

oferentlar tomonidan taklif etilgan narxlar tanlov savdolari predmetining budjet qiymatidan ancha ortiq bo‘lsa, tanlov savdolari o‘tkazilmagan deb e’lon qilinadi.

46. Tanlov savdolarini o‘tkazilmagan deb e’lon qilish uning asosiy qatnashchilaridan birortasini mulkiy yoki boshqa javobgarlikka olib kelmaydi.

47. Agar tanlov savdolari o‘tkazilmagan deb e’tirof etilsa, takroriy tanlov savdolari o‘tkaziladi, bunda tanlov hujjatlari shartlarini qayta ko‘rib chiqishga yo‘l qo‘yiladi.

48. Tanlov savdolari g‘olibi shartnoma tuzishni rad etgan yoki kontrakt belgilangan muddatda ijro etilishi kafolati taqdim etilmagan taqdirda, buyurtmachi hududiy tanlov komissiyasi bilan birgalikda ikkinchi o‘rinni olgan ofirentni e’tirof etishi yoxud takroriy tanlov savdolari o‘tkazilishini tayinlashi mumkin.

49. Pudrat tashkiloti tomonidan kontrakt shartlariga rioya etilmaganligi tufayli kontrakt muddatidan oldin bekor qilingan hollarda qurilishi tugallanmagan obyektlar bo‘yicha takroriy tanlov savdolari o‘tkazilishiga yo‘l qo‘yiladi.

Bunda buyurtmachining qaroriga ko‘ra bekor qilingan kontrakt bo‘yicha tugallanmagan ishlar hajmini aniqlash maqsadida nazorat o‘lchovi o‘tkazadi.

50. Hajm va qiymat ko‘rsatkichlari aniqlangandan, shuningdek davlat ekspertiza organlarining qo‘shimcha ijobiy xulosasi olingandan keyin buyurtmachi predmeti tugallanmagan ishlar hajmi hisoblangan tanlov savdolarini e’lon qiladi.

51. Qurilishi tugallanmagan obyekt bo‘yicha o‘tkazilgan tanlov savdolari yakunlari bo‘yicha g‘olib bilan ishlarning tugallanmagan qismini bajarish yuzasidan kontrakt tuziladi.

52. Tanlov savdolari 400 mln.so‘mga teng bo‘lgan summadan ortiqqa bitta kontrakt bo‘yicha uy-joylar qurish uchun bosh pudrat tashkilotlariga markazlashtirilgan tartibda buyurtmachi tomonidan yetkazib beriladigan qurilish materiallari va asbob-uskunalarni (keyingi o‘rinlarda tovarlar deb ataladi) xarid qilishda o‘tkaziladi.

4 mln. so‘mdan 400 mln. so‘mga teng summaga bitta kontrakt bo‘yicha tovarlarni xarid qilishda xaridlar eng yaxshi takliflarni tanlash asosida tanlov savdolari o‘tkazilmasdan buyurtmachi tomonidan tashkil etiladigan maxsus komissiyaning qarori bilan amalga oshiriladi.

53. Buyurtmachi (tanlov savdolari tashkilotchisi), tanlov komissiyasi va tovarlarni yetkazib beruvchilar (oferentlar) tanlov savdolari qatnashchilari hisoblanadi.

54. Tovarlarni yetkazib beruvchilarni aniqlash bo‘yicha tanlov komissiyasi buyurtmachi (keyingi o‘rinlarda tanlov komissiyasi deb ataladi) tomonidan tashkil etiladi. Tanlov komissiyasiga buyurtmachi boshchilik qiladi.

Tanlov komissiyasi tarkibiga:

buyurtmachining (tanlov komissiyasi raisi);

O‘zbekiston Respublikasi Moliya vazirligining;

O‘zbekiston Respublikasi Iqtisodiy taraqqiyot va kambag‘allikni qisqartirish vazirligining;

O‘zbekiston Respublikasi Monopoliyaga qarshi kurashish qo‘mitasining;

“Qishloq qurilish loyiha” MChJning;

xizmat ko‘rsatuvchi tijorat bankining;

davlat soliq xizmati organlarining vakillari kiritiladi.

55. Buyurtmachining vakillari soni tanlov komissiyasi tarkibida 30 foizdan oshmasligi kerak. Tanlov komissiyasi toq sonli a’zolardan iborat bo‘lishi kerak.

Tanlov komissiyasi, agar uning majlisida komissiya a’zolarining kamida 70 foizi ishtirok etsa, o‘z funksiyalarini amalga oshirishga huquqiy vakolatli bo‘ladi.

56. Quyidagilar tanlov komissiyasining asosiy funksiyalari hisoblanadi:

tovarlarni yetkazib beruvchilarni aniqlash bo‘yicha tanlov savdolarini o‘z vaqtida va sifatli o‘tkazish bo‘yicha tizimli ishlarni tashkil etish;

ish reglamentini, tanlov hujjatlarini va talabgorlarga qo‘yilgan tanlov takliflarini baholash mezonlarini tasdiqlash;

tanlov hujjatlarida qayd etilgan tanlov savdolarida ishtirok etishga buyurtmanomani ta’minlashning kafolati shakli va miqdorini tasdiqlash;

ofertani qabul qilishning oxirgi kuni va vaqtini, konvertlarni ochish vaqti va joyini belgilash;

oferentlarning malaka, texnik va tijorat takliflarini o‘rganish bo‘yicha baholash guruhlarining tarkibini tasdiqlash;

oferta solingan konvertlarni ochish, konvertlar ochilganligi to‘g‘risidagi protokolni tasdiqlash;

tanlov takliflarini ko‘rib chiqish va baholash muddatlarini tasdiqlash;

tanlov hujjatlarida ko‘rsatilgan mezonlarga muvofiq ofertalarni o‘rganish, tahlil qilish va ko‘rib chiqish;

tanlov savdolari g‘olibini aniqlash yoki boshqa qaror qabul qilish;

tanlov savdolari o‘tkazish davomida yuzaga keladigan nizolar va kelishmovchiliklarni ko‘rib chiqish, tartibga solish, ular bo‘yicha tegishli xulosalar qabul qilish.

57. Tushgan ofertalarni ochish muddatlari, tartibi, ularni batafsil o‘rganish, baholash va qiyoslash, tanlov savdolari g‘olibini e’lon qilish, shuningdek tanlov komissiyasining vazifalari, huquqlari va javobgarligi tanlov komissiyasining ish reglamentida belgilanadi.

58. Tanlov komissiyasi o‘z a’zolari tarkiblarida oferentlarning texnik va tijorat takliflarini o‘rganish bo‘yicha baholash guruhlarini tashkil etadi.

Zarurat bo‘lganda tanlov komissiyasi oferentlarning tanlov takliflarini baholash uchun ekspert va maslahat tashkilotlarining vakillarini jalb etishi mumkin.

59. Baholash guruhlariga umumiy rahbarlik qilish, faoliyatini muvofiqlashtirishni buyurtmachi amalga oshiradi.

60. Oferentlarning (tovarlarni yetkazib beruvchilarning) texnik va tijorat takliflarini baholash bo‘yicha baholash guruhlarining huquqlari va vazifalari tanlov komissiyasining ish reglamentida belgilanadi.

61. Tovarlarni yetkazib beruvchilarni aniqlash ommaviy axborot vositalarida e’lon berish yoxud xarid qilinadigan tovarlarning tavsifi, spetsifikatsiyasi, miqdori, bajarish muddati va tovarni yetkazib berish punkti ko‘rsatilgan holda talabgorlarga so‘rov yuborish yo‘li bilan amalga oshiriladi.

62. Tanlov savdolarida ishtirok etish uchun talabgorlarga qo‘yiladigan malaka talablari bo‘yicha mezonlar namunaviy tanlov hujjatlarida ko‘rsatiladi.

63. Ta’sis hujjatlari, moliyaviy qatnashish, xolding shaklida va boshqa shakllarda ifodalangan bir-biriga bevosita tashkiliy-huquqiy yoki moliyaviy bog‘liqlikda bo‘lgan tovarlarni yetkazib beruvchilarning tanlov savdolarida ishtirok etishi taqiqlanadi.

64. Qayta tashkil etish (ajratib chiqarish, qo‘shib yuborish), tugatish bosqichidagi yoki mol-mulki xatlangan to‘lovga qobiliyatsizlik jarayonidagi talabgorlar tanlov savdolarida ishtirok etishga qo‘yilmaydi.

65. Oferta shaklidagi tijorat taklifi buyurtmachiga tanlov hujjatlarida nazarda tutilgan talablarga muvofiq yelimlangan konvertda taqdim etiladi.

66. Ofertalarni taqdim etish muddati ommaviy axborot vositalarida e’lon berilgan kundan boshlab kamida 30 kunni tashkil etishi kerak.

67. Ofertani taqdim etish muddati tamom bo‘lgandan keyin tushgan oferta ko‘rib chiqilmaydi.

Ofertani taqdim etish sanasi buyurtmachining, oferta pochta bildirishnomasi olinganligi to‘g‘risidagi qaydi bo‘yicha yoki buyurtmachining oferentga berilgan oferta olinganligi to‘g‘risidagi bildirishnomasi sanasi bo‘yicha (oferta chopar orqali yetkazilgan taqdirda) aniqlanadi.

68. Tanlov komissiyasining majlisi boshqa muddatga ko‘chirilgan taqdirda, tanlov savdolari tashkilotchisi buyurtmachining yoki tanlov komissiyasining talabiga ko‘ra tanlov hujjatlarini sotib olgan talabgorlarga ofertalarni taqdim etish muddati uzaytirilganligi to‘g‘risida bildirishnoma yuboradi.

69. Ofertalarni berish muddati tamom bo‘lgandan keyin tanlov komissiyasi tushgan va ro‘yxatdan o‘tkazilgan ofertalarni oferentlarning vakillari ishtirokida ochadi, oferentlarning nomlarini, malaka ma’lumotlarini, taklif etilgan narxlarni va bajarish muddatlarini, shuningdek tovarlarni yetkazib beruvchilar tomonidan kiritilgan qo‘shimcha takliflarni o‘qiydi, tanlov hujjatlari talablariga muvofiq hujjatlarning taqdim etilgan turkumlari butligini va mazmunini tekshiradi.

70. Tijorat takliflarini tanlov komissiyasi majlisida ko‘rib chiqish davomida uning mazmuni talabgorlar tomonidan tushuntirilishiga yo‘l qo‘yiladi.

71. Tanlov komissiyasi majlisining natijalari to‘g‘risidagi axborot qatnashmagan oferentga yozma shaklda yetkaziladi.

72. Hujjatlarning va ofertada taqdim etilgan axborotning ishonchliligi uchun yetkazib beruvchilar javob beradi.

73. Tanlov komissiyasi ofertani ko‘rib chiqish, baholash va taqqoslash yo‘li bilan eng raqobatli narxlar, ishlarni (xizmatlarni) bajarish shartlari, to‘lov va tanlov hujjatlarida belgilangan boshqa mezonlar bo‘yicha yopiq majlislarda g‘olibni aniqlaydi.

74. G‘olibni e’lon qilish oferentlar ishtirokida o‘tkaziladi, qatnashmagan oferentlar belgilangan tartibda xabardor qilinadi.

75. Ofertani ko‘rib chiqish, baholash va taqqoslash natijalari to‘g‘risidagi axborot oshkor qilinmaydi, qonunchilikda nazarda tutilgan hollar bundan mustasno.

76. Tanlov komissiyasining har bir majlisida protokol yuritiladi.

Qoidaga ko‘ra, bular konvertlarni ochish, tanlov savdolari g‘olibini aniqlash protokollari va tanlov savdolarini o‘tkazish tartib-qoidasi bilan bog‘liq boshqa protokollar.

77. Buyurtmachi kontraktlarni berish to‘g‘risida qaror qabul qilingandan keyin besh kundan kech bo‘lmagan muddatda tanlov savdolari g‘olibiga yozma bildirishnoma yuboradi.

Tanlov savdolarini tashkil etish va o‘tkazish sxemasi ushbu Nizomga 2-ilovada keltirilgan.

78. Tanlov savdolari g‘oliblar va buyurtmachi bilan kontrakt tuzilgandan keyin tugallangan deb hisoblanadi.

79. Quyidagi hollarda, agar:

birorta ham buyurtma tushmasa;

oferta tanlov hujjatlari shartlariga muvofiq bo‘lmasa;

oferentlar tomonidan taklif etilgan narxlar tanlov savdolari predmetining budjet qiymatidan ancha ortiq bo‘lsa, tanlov savdolari o‘tkazilmagan deb e’lon qilinadi.

80. Tanlov savdolarini o‘tkazilmagan deb e’lon qilish uning asosiy qatnashchilaridan birortasini mulkiy yoki boshqa javobgarlikka olib kelmaydi.

81. Agar tanlov savdolari o‘tkazilmagan deb e’tirof etilsa, takroriy tanlov savdolari o‘tkaziladi, bunda tanlov hujjatlari shartlarini qayta ko‘rib chiqishga yo‘l qo‘yiladi.

82. Tanlov savdolari g‘olibi kontrakt tuzishni rad etgan yoki kontrakt belgilangan muddatda ijro etilishi kafolati taqdim etilmagan taqdirda, buyurtmachi tanlov komissiyasi bilan birgalikda ikkinchi o‘rinni olgan oferentni g‘olib deb e’tirof etishi yoxud takroriy tanlov savdolari o‘tkazilishini tayinlashi mumkin.

83. To‘g‘ridan-to‘g‘ri shartnomalar tuzilgan holda xarid qilish quyidagi istisno hollarda amalga oshirilishi mumkin:

O‘zbekiston Respublikasi Vazirlar Mahkamasining tegishli qarori mavjud bo‘lganda;

agar xarid qilinadigan tovar, ish (xizmat) yagona yetkazib beruvchi (pudratchi) tomonidan ishlab chiqarilsa (sotilsa);

qurilish materiallari va asbob-uskunalar birjalar orqali xarid qilinganda;

yetkazib beruvchilar yo‘qligi yoki iqtisodiy foyda yo‘qligi, qiymat oshib ketishi aniqlangan kontraktdan ularning manfaatdor emasligi sababli takroran o‘tkazilgan tanlov savdolari o‘tkazilmagan deb e’tirof etilishi natijasida.

84. Pudrat ishlari bo‘yicha kontrakt majburiyatlari bajarilishi monitoringi buyurtmachining texnik nazorat va pudrat tashkilotlari bo‘yicha vakili tomonidan taqdim etiladigan kontrakt shartlari bajarilishi to‘g‘risidagi har oylik axborotni tahlil qilish yo‘li bilan buyurtmachi tomonidan amalga oshiriladi.

85. Tovarlarni yetkazib berish bo‘yicha kontrakt majburiyatlari bajarilishi monitoringi buyurtmachining tegishli bo‘linmasi tomonidan taqdim etiladigan axborotni tahlil qilish yo‘li bilan buyurtmachi tomonidan amalga oshiriladi.

86. Monitoring natijalarini umumlashtirish buyurtmachi tomonidan amalga oshiriladi.

87. Buyurtmachi tovarlar va ishlarni (xizmatlarni) xarid qilish bo‘yicha tanlov savdolariga tegishli barcha tegishli hujjatlar ichki tartib hujjatlari talablariga muvofiq tanlov savdolari tugallangandan keyin kamida uch yil mobaynida saqlanishini ta’minlashi shart.

88. Tanlov savdolari tartib-qoidasidan kelib chiqadigan kelishmovchiliklar va nizolar, buyurtmachi, tanlov savdolari tashkilotchisi yoki tanlov savdolarining boshqa qatnashchilarining xatti-harakati (harakatsizligi) va qarorlari yuzasidan shikoyatlar qonunchilikda belgilangan tartibda ko‘rib chiqiladi.

Arizalar, murojaatlar va shikoyatlarni ko‘rib chiqishning batafsil mexanizmi tanlov komissiyalari ishi reglamentlarida va namunaviy tanlov hujjatlarida keltirilgan bo‘lishi kerak.

89. Xorijiy kreditorlar va grant beruvchilarning tegishli amal qiluvchi hujjatlarida tanlov savdolarining ayrim bosqichlarini xorijiy kreditorlar va (yoki) grant beruvchilar bilan kelishish zarurligi nazarda tutilgan hollarda buyurtmachi bunday kelishuvlar amalga oshirilishini ta’minlaydi.