Oʻzbekiston Respublikasining Soliq kodeksi, Oʻzbekiston Respublikasining “Davlat soliq xizmati toʻgʻrisida”gi, “Elektron raqamli imzo toʻgʻrisida”gi, “Elektron hujjat aylanishi toʻgʻrisida”gi qonunlari va Oʻzbekiston Respublikasi Vazirlar Mahkamasining 2006-yil 4-avgustdagi 157-son “Soliq toʻlovchilarga axborot xizmati koʻrsatish va davlat soliq xizmati organlarining axborot tizimini yanada takomillashtirish toʻgʻrisida”gi qaroriga muvofiq Oʻzbekiston Respublikasi Davlat soliq qoʻmitasi qaror qiladi:

1. Moliyaviy va soliq hisobotlarini aloqaning telekommunikatsiya kanallari vositasida davlat soliq xizmati organlariga taqdim etish tartibi toʻgʻrisidagi nizom ilovaga muvofiq tasdiqlansin.

2. Quyidagilar oʻz kuchini yoʻqotgan deb hisoblansin:

Oʻzbekiston Respublikasi Davlat soliq qoʻmitasining 2007-yil 18-dekabrdagi 2007-65-son “Moliyaviy hisobotlar va soliq hisob-kitoblarini almashtiriladigan magnit (elektron, optik) manbalarda yoki aloqaning telekommunikatsiya kanallari vositasida taqdim etishning tartibi toʻgʻrisidagi vaqtinchalik nizomni tasdiqlash haqida”gi qarori (roʻyxat raqami 1756, 2008-yil 3-yanvar) (Oʻzbekiston Respublikasi qonun hujjatlari toʻplami, 2008-y., 1-2-son, 3-modda);

Oʻzbekiston Respublikasi Davlat soliq qoʻmitasining 2013-yil 18-martdagi 2013-14-son “Moliyaviy hisobotlar va soliq hisob-kitoblarini almashtiriladigan magnit (elektron, optik) manbalarda yoki aloqaning telekommunikatsiya kanallari vositasida taqdim etishning tartibi toʻgʻrisida”gi Vaqtinchalik nizomga oʻzgartirish kiritish haqida”gi qarori (roʻyxat raqami 1756-1, 2013-yil 1-aprel) (Oʻzbekiston Respublikasi qonun hujjatlari toʻplami, 2013-y., 14-son, 186-modda).

3. Mazkur qaror rasmiy eʼlon qilingan kundan eʼtiboran kuchga kiradi.

Ushbu Nizom Oʻzbekiston Respublikasining Soliq kodeksi, Oʻzbekiston Respublikasining “Elektron raqamli imzo toʻgʻrisida”gi, “Elektron hujjat aylanishi toʻgʻrisida”gi qonunlari va Oʻzbekiston Respublikasi Vazirlar Mahkamasining 2006-yil 4-avgustdagi 157-son “Soliq toʻlovchilarga axborot xizmati koʻrsatish va davlat soliq xizmati organlarining axborot tizimini yanada takomillashtirish toʻgʻrisida”gi qaroriga muvofiq moliyaviy va soliq hisobotlarini (bundan buyon matnda hisobot deb yuritiladi) aloqaning telekommunikatsiya kanallari vositasida davlat soliq xizmati organlariga taqdim etish tartibini belgilaydi.

1. Ushbu Nizomni amalda qoʻllash maqsadida quyidagi asosiy tushunchalardan foydalaniladi:

elektron raqamli imzo — elektron hujjatdagi mazkur elektron hujjat axborotini elektron raqamli imzoning yopiq kalitidan foydalangan holda maxsus oʻzgartirish natijasida hosil qilingan hamda elektron raqamli imzoning ochiq kaliti yordamida elektron hujjatdagi axborotda xatolik yoʻqligini aniqlash va elektron raqamli imzo yopiq kalitining egasini identifikatsiya qilish imkoniyatini beradigan imzo;

elektron hujjat — elektron shaklda qayd etilgan, elektron raqamli imzo bilan tasdiqlangan hamda elektron hujjatning uni identifikatsiya qilish imkonini beradigan boshqa rekvizitlariga ega boʻlgan axborot.

axborot vositachisi — elektron hujjat aylanishi bilan bogʻliq xizmatlarni shartnoma asosida koʻrsatuvchi yuridik yoki jismoniy shaxs.

soliq toʻlovchining shaxsiy kabineti — Oʻzbekiston Respublikasi Davlat soliq qoʻmitasining rasmiy veb-saytiga joylashtirilgan, soliq toʻlovchilar va davlat soliq xizmati organlarining soliq toʻgʻrisidagi qonun hujjatlarida nazarda tutilgan huquq va majburiyatlari amalga oshirilishi bilan bogʻliq boʻlgan oʻzaro munosabatlarni elektron tarzda amalga oshirishni taʼminlaydigan axborot resursi.

2. Hisobotni elektron hujjat tarzida taqdim etishda elektron hujjat aylanishining ishtirokchilari boʻlib quyidagilar hisoblanadi:

soliq toʻlovchi — hisobotni elektron hujjat tarzida joʻnatuvchi;

hisobotni elektron hujjat tarzida qabul qiluvchi va ularga ishlov beruvchi davlat soliq xizmati organlari — hisobotni qabul qiluvchi.

Elektron hujjat aylanishida axborot vositachilari ham ishtirok etishlari mumkin.

3. Hisobotni elektron hujjat tarzida taqdim etish soliq toʻlovchining xohishiga koʻra tegishli dasturiy taʼminotdan foydalangan holda amalga oshiriladi.

Bunda, tadbirkorlik subyektlari hisobotni telekommunikatsiya kanallari orqali elektron hujjat tarzida taqdim etadi.

4. Hisobotni elektron hujjat tarzida taqdim etmaydigan soliq toʻlovchilar uchun hisobotni qogʻozda taqdim etish tartibi saqlanib qoladi.

Elektron hujjat tarzidagi taqdim etilgan hisobot, soliq toʻlovchining elektron raqamli imzosi bilan tasdiqlanadi.

5. Hisobotni elektron hujjat tarzida taqdim etishda tegishli dasturiy taʼminot:

davlat soliq xizmati organiga joʻnatish uchun hisobotni elektron hujjat tarzida shakllantirish;

hisobotni elektron hujjat tarzida joʻnatishda shifrlash va qabul qilib olishda shifrdan yechish;

elektron raqamli imzoni shakllantirish va uni qabul qilib olishda elektron raqamli imzo vositalari yordamida tekshirish;

hisobotni elektron hujjat tarzida telekommunikatsiya kanallari orqali joʻnatish imkoniyatiga ega boʻlishi kerak.

6. Hisobotni elektron hujjat tarzida taqdim etishga:

moliyaviy va soliq hisobotining majburiy rekvizitlari mavjud boʻlganda;

elektron hujjat tarzidagi hisobotlarda elektron raqamli imzo mavjud boʻlganda;

elektron hujjat tarzidagi hisobotlar belgilangan shaklda taqdim etilganda ruxsat beriladi.

7. Elektron hujjat tarzidagi hisobotdagi axborotlarni muhofaza qilish maqsadida axborotni uzatishda elektron hujjat aylanishining ishtirokchilari axborotni kriptografik muhofaza qilish vositalarini qoʻllaydilar.

8. Hisobot elektron hujjat tarzida qabul qilib olinganda, davlat soliq xizmati organlarining dasturiy-apparat vositalari hisobotni avtomatik tarzda qabul qilinishini, shuningdek soliq toʻlovchiga elektron tarzidagi hisobot qabul qilib olinganligi toʻgʻrisida tasdiqnomani yuborilishini taʼminlaydi.

Hisobot dastlabki tarzda kameral nazorat qilinmasdan va uning mazmuni muhokama etilmasdan qabul qilinadi.

Belgilanmagan shakldagi hisobot taqdim etilganda davlat soliq xizmati organi hisobot olingan kundan eʼtiboran uch kun ichida bu haqda soliq toʻlovchiga yozma, shu jumladan soliq toʻlovchining shaxsiy kabineti orqali bildirish yuboradi va aniq fikr-mulohazalarni koʻrsatgan holda uni maromiga yetkazish uchun qaytaradi.

9. Hisobot elektron hujjat tarzida taqdim etilganda, soliq toʻlovchi va davlat soliq xizmati organlari uni qonunchilikda belgilangan tartib va muddatlarda elektron koʻrinishda saqlanishini taʼminlaydilar.

10. Hisobotni elektron hujjat tarzida saqlashda elektron hujjat aylanishining ishtirokchilari tomonidan hisobotning qogʻoz nusxalarini berish va ulardan foydalana olish imkoniyatlari koʻzda tutilgan boʻlishi lozim.

11. Hisobotning elektron hujjat tarzida saqlanish muddatlari qogʻozdagi hisobotlar uchun oʻrnatilgan muddatlardan kam boʻlmasligi lozim.

12. Soliq toʻlovchi elektron hujjat tarzidagi hisobotni qonunchilikda belgilangan muddatlarda taqdim etadi.

13. Elektron hujjat tarzidagi hisobotni qabul qilib olishda, Oʻzbekiston Respublikasi Davlat soliq qoʻmitasining dasturiy-apparat vositalari mazkur hisobotni qabul qilib olganligi toʻgʻrisida, qabul qilib olingan sanasi koʻrsatilgan holda, avtomatik tarzda tasdiqlanishni taʼminlaydi.

14. Elektron hujjat tarzidagi hisobot, agar u bevosita soliq toʻlovchi tomonidan yoki uning axborot vositachisi orqali joʻnatilgan boʻlsa, joʻnatilgan deb hisoblanadi.

15. Elektron hujjat tarzidagi hisobotni taqdim etish sanasi elektron hujjatning davlat soliq xizmati organining elektron manziliga kelib tushgan sanasi hisoblanadi.

16. Elektron hujjat tarzidagi hisobot quyidagi hollarda davlat soliq xizmati organiga taqdim etilmagan deb hisoblanadi, agar unda:

soliq toʻlovchining identifikatsiya raqami koʻrsatilmagan yoki notoʻgʻri koʻrsatilgan boʻlsa;

soliq davri va (yoki) soliq yoki boshqa majburiy toʻlov summasi koʻrsatilmagan boʻlsa;

Soliq kodeksining 43 va 44-moddalarida soliq hisobotini tuzishga doir belgilangan talablar buzilgan boʻlsa.

17. Hisobotni elektron hujjat tarzida joʻnatishda elektron raqamli imzodan foydalanish tartibi Davlat va xoʻjalik boshqaruvi organlari, mahalliy davlat hokimiyati organlari hamda tijorat banklari tomonidan koʻrsatiladigan barcha turdagi xizmatlarda elektron raqamli imzodan foydalanish qoidalari (roʻyxat raqami 2727, 2015-yil 13-noyabr) bilan tartibga solinadi.

18. Hisobotni elektron hujjat tarzida taqdim etuvchi soliq toʻlovchi hisobotdagi maʼlumotlarning oʻz vaqtida va toʻla taqdim etilishiga javobgar hisoblanadi.

19. Elektron hujjat tarzidagi hisobotni qabul qiluvchi va unga ishlov beruvchi davlat soliq xizmati organlarining mansabdor shaxslari keyingi foydalanish uchun qabul qilinib olinayotgan axborotga oʻz vaqtida ishlov berilishiga shaxsan javobgardirlar.

20. Mazkur Nizom Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi va Moliya vazirligi bilan kelishilgan.