Ushbu Qonunning maqsadi elektron raqamli imzodan foydalanish sohasidagi munosabatlarni tartibga solishdan iborat.

Elektron raqamli imzo to‘g‘risidagi qonunchilik ushbu Qonun va boshqa qonunchilik hujjatlaridan iboratdir.

O‘zbekiston Respublikasining Konstitutsiyaviy Qonuni bilan maxsus huquqiy rejim o‘rnatilgan hududda elektron raqamli imzodan foydalanish sohasidagi munosabatlar ushbu Qonunda belgilanganidan boshqacha qoidalar bilan tartibga solinadi.

Agar O‘zbekiston Respublikasining xalqaro shartnomasida O‘zbekiston Respublikasining elektron raqamli imzo to‘g‘risidagi qonunchiligida nazarda tutilganidan boshqacha qoidalar belgilangan bo‘lsa, xalqaro shartnoma qoidalari qo‘llaniladi.

Ushbu Qonunda quyidagi asosiy tushunchalar qo‘llaniladi:

elektron raqamli imzo — elektron hujjatdagi mazkur elektron hujjat axborotini elektron raqamli imzoning yopiq kalitidan foydalangan holda maxsus o‘zgarishlar natijasida hosil qilingan hamda elektron raqamli imzoning ochiq kaliti yordamida elektron hujjatdagi axborotda xatolik mavjud emasligini aniqlash va elektron raqamli imzo kalitining egasini identifikatsiya qilish imkonini beradigan imzo;

elektron raqamli imzoning yopiq kaliti — elektron raqamli imzo vositalaridan foydalangan holda hosil qilingan, faqat imzo qo‘yuvchi shaxsning o‘ziga ma’lum bo‘lgan va elektron hujjatda elektron raqamli imzoni yaratish uchun mo‘ljallangan belgilar ketma-ketligi;

elektron raqamli imzo kalitining sertifikati — elektron raqamli imzoning ochiq kaliti elektron raqamli imzoning yopiq kalitiga muvofiqligini tasdiqlaydigan elektron hujjat;

elektron raqamli imzo kalitining egasi — o‘ziga elektron raqamli imzo kalitining sertifikati berilgan jismoniy yoki yuridik shaxs;

elektron raqamli imzoning ochiq kaliti — elektron raqamli imzo vositalaridan foydalangan holda hosil qilingan, elektron raqamli imzoning yopiq kalitiga muvofiq bo‘lgan, axborot tizimining har qanday foydalanuvchisi uchun ochiq bo‘lgan va elektron hujjatdagi elektron raqamli imzoning haqiqiyligini tasdiqlash uchun mo‘ljallangan belgilar ketma-ketligi;

elektron raqamli imzoning haqiqiyligini tasdiqlash — elektron raqamli imzoning elektron raqamli imzo kalitining egasiga tegishliligini va elektron hujjatdagi axborotda xatolik mavjud emasligini tekshirishning ijobiy natijasi;

elektron hujjat — elektron shaklda qayd etilgan, elektron raqamli imzo bilan tasdiqlangan va elektron hujjatning uni identifikatsiya qilish imkonini beradigan boshqa rekvizitlariga ega bo‘lgan axborot.

Bir vaqtning o‘zida quyidagi shartlarga rioya etilgan taqdirda, elektron hujjatdagi elektron raqamli imzo qog‘oz hujjatga qo‘lda shaxsan qo‘yilgan imzo bilan bir xil ahamiyatga ega bo‘ladi, agar:

elektron raqamli imzoning haqiqiyligi tasdiqlangan bo‘lsa;

elektron raqamli imzo kalitining sertifikati elektron raqamli imzoning haqiqiyligini tasdiqlash paytida yoxud imzolash paytini belgilovchi dalillar mavjud bo‘lganda elektron hujjatni imzolash paytida amalda bo‘lsa;

elektron raqamli imzodan elektron raqamli imzo kalitining sertifikatida ko‘rsatilgan maqsadlarda foydalanilayotgan bo‘lsa.

Ushbu moddaning birinchi qismida ko‘rsatilgan shartlarga bir vaqtning o‘zida rioya etilgan taqdirda, yuridik shaxsning elektron raqamli imzosi bilan tasdiqlangan elektron hujjat yuridik shaxsning muhri bilan tasdiqlangan qog‘oz hujjatga tenglashtiriladi.

Elektron raqamli imzo vositalari elektron hujjatda elektron raqamli imzo yaratilishini, elektron raqamli imzoning haqiqiyligi tasdiqlanishini, elektron raqamli imzoning yopiq va ochiq kalitlari yaratilishini ta’minlaydigan texnik va dasturiy vositalar majmuidan iboratdir.

Elektron raqamli imzo vositalari qonunchilikda belgilangan tartibda axborot xavfsizligi talablariga muvofiq sertifikatlashtirilishi kerak.

Davlat organlari o‘rtasidagi idoralararo elektron hamkorlik milliy standartlar asosida ishlab chiqilgan elektron raqamli imzo vositalaridan foydalanilgan holda amalga oshiriladi.

Davlat xizmatlarini ko‘rsatish chog‘ida milliy va xalqaro (mintaqaviy) standartlar asosida ishlab chiqilgan elektron raqamli imzo vositalaridan foydalanishga yo‘l qo‘yiladi.

Elektron raqamli imzolar kalitlarini ro‘yxatga olish markazlarining “bulutli texnologiyalarida” (ishonchli saqlash tizimida) elektron raqamli imzo kalitlaridan foydalanish kamida ikki omilli autentifikatsiya qilish tartib-taomilidan foydalanilgan holda amalga oshiriladi.

Tarqatilishi cheklangan axborotni o‘z ichiga olgan elektron hujjatlar uchun elektron raqamli imzo kalitiga nisbatan qo‘shimcha talablar qo‘yilishi mumkin.

Elektron raqamli imzodan foydalanish sohasidagi davlat siyosatining asosiy yo‘nalishlari quyidagilardan iborat:

elektron raqamli imzodan foydalanish uchun huquqiy, iqtisodiy, tashkiliy, texnik va boshqa shart-sharoitlar yaratish;

elektron raqamli imzoning mavjud bo‘lishi talab qilinadigan elektron xizmatlar barcha turlarining ochiqligini va sifatini ta’minlash;

majburiy texnik talablar, normalar va qoidalarga rioya etilishi ustidan davlat nazoratini amalga oshirish;

elektron raqamli imzodan foydalanish sohasidagi ilmiy-texnik tadqiqotlarni rag‘batlantirish;

kadrlarni tayyorlash, qayta tayyorlash va ularning malakasini oshirish;

investitsiyalarni jalb etish uchun qulay shart-sharoitlar yaratish;

davlat-xususiy sheriklikni rivojlantirish;

ilg‘or innovatsion, axborot va kommunikatsiya texnologiyalarining joriy etilishiga ko‘maklashish;

xalqaro hamkorlikni rivojlantirish.

O‘zbekiston Respublikasi Vazirlar Mahkamasi:

elektron raqamli imzodan foydalanish sohasida yagona davlat siyosati amalga oshirilishini ta’minlaydi;

elektron raqamli imzodan foydalanish sohasidagi davlat dasturlarini tasdiqlaydi va ularning amalga oshirilishini ta’minlaydi;

elektron raqamli imzodan foydalanish sohasidagi normativ-huquqiy hujjatlarni o‘z vakolatlari doirasida qabul qiladi;

O‘zbekiston Respublikasining konsullik muassasalari, shuningdek O‘zbekiston Respublikasi diplomatik vakolatxonalarining konsullik bo‘limlari orqali elektron raqamli imzolar kalitlarining sertifikatlarini berish tartibini belgilaydi;

Ishonchli uchinchi taraf xizmatining faoliyati tartibini belgilaydi.

O‘zbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Axborot texnologiyalari va kommunikatsiyalarini rivojlantirish vazirligi elektron raqamli imzodan foydalanish sohasidagi vakolatli davlat organidir (bundan buyon matnda vakolatli davlat organi deb yuritiladi).

Vakolatli davlat organi:

elektron raqamli imzodan foydalanish sohasidagi standartlar, normalar va qoidalarni ishlab chiqadi;

elektron raqamli imzolar kalitlarini ro‘yxatga olish markazlarini akkreditatsiya qilishni va qayta akkreditatsiya qilishni amalga oshiradi;

elektron raqamli imzolar kalitlarini ro‘yxatga olish markazlariga elektron raqamli imzolar kalitlarining sertifikatlarini beradi, shuningdek Elektron raqamli imzolar kalitlarini ro‘yxatga olish markazlarining elektron raqamli imzolar kalitlari sertifikatlarining yagona davlat reyestrini yuritadi;

elektron raqamli imzolar kalitlarini ro‘yxatga olish markazlarining faoliyatini nazorat qiladi va kamchiliklar aniqlangan taqdirda ularni bartaraf etish to‘g‘risida ko‘rsatma beradi;

jismoniy va yuridik shaxslarning murojaatlariga ko‘ra ro‘yxatga olish markazlariga tegishli bo‘lgan elektron raqamli imzoning haqiqiyligini tasdiqlashni amalga oshiradi;

Ishonchli uchinchi taraf xizmatining faoliyatini tashkil etadi.

Vakolatli davlat organi qonunchilikka muvofiq boshqa vakolatlarni ham amalga oshirishi mumkin.

Qonunchilikda belgilangan tartibda akkreditatsiya qilingan va O‘zbekiston Respublikasi rezidenti bo‘lgan, elektron raqamli imzodan foydalanish sohasidagi faoliyatni amalga oshiradigan yuridik shaxs elektron raqamli imzolar kalitlarini ro‘yxatga olish markazidir (bundan buyon matnda ro‘yxatga olish markazi deb yuritiladi).

Ro‘yxatga olish markazi hamda jismoniy va yuridik shaxslar o‘rtasidagi elektron raqamli imzodan foydalanish sohasidagi munosabatlar shartnoma asosida amalga oshiriladi.

Ro‘yxatga olish markazlari tomonidan berilgan elektron raqamli imzo kalitiga ega bo‘lgan shaxslar elektron raqamli imzoning mavjud bo‘lishi talab qilinadigan davlat xizmatlarining barcha turlaridan erkin foydalanish imkoniyatiga ega bo‘ladi.

Ro‘yxatga olish markazi:

elektron raqamli imzoni yaratish va tekshirish uchun axborot xavfsizligi talablariga muvofiq sertifikatlashtirilgan apparat, dasturiy-apparat va dasturiy ta’minotga;

elektron raqamli imzolar kalitlarining sertifikatlarini tayyorlash, hisobga olish va saqlash uchun axborot xavfsizligi talablariga muvofiq sertifikatlashtirilgan apparat, dasturiy-apparat va dasturiy ta’minotga;

tarqatilishi cheklangan axborotning saqlanishini ta’minlaydigan shart-sharoitlarga;

axborot xavfsizligi, texnika xavfsizligi va yong‘in xavfsizligi talablariga javob beradigan zarur xonalarga ega bo‘lishi kerak.

Ro‘yxatga olish markazlarining axborot tizimlari va resurslari axborot tizimlaridagi hamda resurslaridagi ma’lumotlar qonunga xilof ravishda tarqatilishining, o‘g‘irlanishining, yo‘qolishining, yaxlitligi buzilishining, bloklanishining hamda qalbakilashtirilishining oldini olish maqsadida ruxsatsiz foydalanishdan (kirishdan) himoya qilingan bo‘lishi kerak.

Ro‘yxatga olish markazini ustav fondida (ustav kapitalida) chet davlat rezidentining ulushi o‘ttiz va undan ortiq foiz bo‘lgan yuridik shaxslar tomonidan tashkil etishga yo‘l qo‘yilmaydi.

Ro‘yxatga olish markazini akkreditatsiya qilish jarayoni quyidagilarni o‘z ichiga oladi:

akkreditatsiya qilish to‘g‘risidagi arizani ko‘rib chiqishni hamda akkreditatsiya qilish to‘g‘risida yoki akkreditatsiya qilishni rad etish haqida qaror qabul qilishni;

akkreditatsiya qilinganlik to‘g‘risida guvohnoma berishni;

elektron raqamli imzo kalitining sertifikatini berishni.

Akkreditatsiya qilinganlik to‘g‘risidagi guvohnoma va elektron raqamli imzo kalitining sertifikati elektron hujjat tarzida yaratiladi.

Ro‘yxatga olish markazini akkreditatsiya qilish to‘g‘risidagi ariza O‘zbekiston Respublikasining Yagona interaktiv davlat xizmatlari portali orqali vakolatli davlat organiga beriladi.

Ro‘yxatga olish markazini akkreditatsiya qilish to‘g‘risidagi arizada quyidagilar ko‘rsatiladi:

muassis to‘g‘risidagi ma’lumotlar;

ro‘yxatga olish markazining nomi, joylashgan yeri (pochta manzili), maqsadi va vazifalari.

Ro‘yxatga olish markazini akkreditatsiya qilish to‘g‘risidagi arizaga quyidagilar ilova qilinadi:

ro‘yxatga olish markazi muassisining ustavi (nizomi);

arizachi-tashkilotning rahbari to‘g‘risidagi ma’lumotlar;

vakolatli davlat organi bilan hamkorlik qilish uchun tanlangan shaxsga nisbatan ishonch xati;

elektron raqamli imzoning ochiq kaliti (mavjud bo‘lganda) va uning qo‘llanilishi to‘g‘risidagi ma’lumotlar.

Vakolatli davlat organi ro‘yxatga olish markazini akkreditatsiya qilish uchun boshqa vakolatli organlarda mavjud bo‘lgan zarur hujjatlarni va ma’lumotlarni axborot hamkorligi tizimi vositasida mustaqil ravishda oladi.

Ro‘yxatga olish markazini akkreditatsiya qilish to‘g‘risidagi arizani berish chog‘ida taqdim etilgan ma’lumotlar o‘zgargan taqdirda, arizachi bu haqda vakolatli davlat organini O‘zbekiston Respublikasining Yagona interaktiv davlat xizmatlari portali orqali uch ish kuni ichida xabardor qilishi kerak.

Vakolatli davlat organi ro‘yxatga olish markazini akkreditatsiya qilish to‘g‘risidagi ariza olingan kundan e’tiboran bir oylik muddatda arizani ko‘rib chiqadi hamda taqdim etilgan hujjatlar va ma’lumotlar asosida ro‘yxatga olish markazini akkreditatsiya qilish to‘g‘risida yoki akkreditatsiya qilishni rad etish haqida qaror qabul qiladi.

Ro‘yxatga olish markazi akkreditatsiya qilinganligi uchun haq undirilmaydi.

Ro‘yxatga olish markazini akkreditatsiya qilish to‘g‘risida qaror qabul qilingan taqdirda, akkreditatsiya qilinganlik to‘g‘risidagi guvohnoma ro‘yxatga olish markaziga O‘zbekiston Respublikasining Yagona interaktiv davlat xizmatlari portali orqali QR-kod (matrik shtrixli kod) qo‘yilgan holda, elektron tarzda vakolatli davlat organi tomonidan beriladi. Ro‘yxatga olish markazi akkreditatsiya qilinganligi to‘g‘risidagi guvohnoma vakolatli davlat organining axborot resursida saqlanadi.

Ro‘yxatga olish markazi akkreditatsiya qilinganligi to‘g‘risidagi guvohnoma ro‘yxatga olish markazining arizasiga asosan, amal qilishi besh yilgacha bo‘lgan muddatga beriladi.

Ro‘yxatga olish markazi akkreditatsiya qilinganligi to‘g‘risidagi guvohnoma yo‘qolgan taqdirda (yo‘qotilganda, yo‘q qilinganda va boshqa hollarda), uni tiklash ro‘yxatga olish markazining arizasiga asosan vakolatli davlat organi tomonidan amalga oshiriladi.

Ro‘yxatga olish markazini akkreditatsiya qilish quyidagi hollarda rad etilishi mumkin:

ushbu Qonunning 10-moddasida nazarda tutilgan talablar arizachi tomonidan bajarilmaganda;

agar ilgari xuddi shunday yoki shunga o‘xshash nomdagi boshqa ro‘yxatga olish markazi akkreditatsiya qilingan bo‘lsa.

Ro‘yxatga olish markazini akkreditatsiya qilish rad etilgan taqdirda, qaror qabul qilinganidan keyin uch ish kuni ichida arizachi bu haqda yozma shaklda, shuningdek O‘zbekiston Respublikasining Yagona interaktiv davlat xizmatlari portali orqali elektron shaklda xabardor qilinadi.

Yozma yoki elektron xabarnomada ro‘yxatga olish markazini akkreditatsiya qilishni rad etish sabablari, shuningdek arizachi rad etish sabablari bartaraf etilganidan keyin vakolatli davlat organiga takroran murojaat qilishi mumkin bo‘lgan muddat ko‘rsatiladi.

Arizachi vakolatli davlat organining ro‘yxatga olish markazini akkreditatsiya qilishni rad etish to‘g‘risidagi qarori ustidan sudga shikoyat qilishi mumkin.

Ro‘yxatga olish markazini qayta akkreditatsiya qilish quyidagi hollarda amalga oshiriladi:

ro‘yxatga olish markazining joylashgan yeri (pochta manzili) o‘zgarganda;

ro‘yxatga olish markazi akkreditatsiya qilinganligi to‘g‘risidagi guvohnomaning amal qilish muddati tugaganda.

Ro‘yxatga olish markazini qayta akkreditatsiya qilish ro‘yxatga olish markazini akkreditatsiya qilish qanday tartibda o‘tkazilgan bo‘lsa, xuddi shunday tartibda amalga oshiriladi.

Qayta akkreditatsiya qilish uchun ro‘yxatga olish markazi qayta akkreditatsiya qilish haqidagi arizani akkreditatsiya qilish markazi ro‘yxatga olinganligi to‘g‘risidagi guvohnomaning amal qilish muddati tugaguniga qadar kamida bir oy oldin yuboradi.

Ro‘yxatga olish markazi akkreditatsiya qilinganligi to‘g‘risidagi guvohnomaning amal qilishi quyidagi hollarda to‘xtatib turilishi mumkin:

ro‘yxatga olish markazi tomonidan qonunchilik, shuningdek axborot xavfsizligi standartlari, normalari va qoidalarining talablari buzilganligi aniqlanganda;

ro‘yxatga olish markazi tomonidan vakolatli davlat organining aniqlangan buzilishlarni bartaraf etish bo‘yicha majburiyatni uning zimmasiga yuklovchi talabi bajarilmaganda.

Ro‘yxatga olish markazi akkreditatsiya qilinganligi to‘g‘risidagi guvohnomaning amal qilishini o‘n kungacha bo‘lgan muddatga to‘xtatib turish vakolatli davlat organi tomonidan, o‘n kundan ko‘p muddatga, biroq ko‘pi bilan olti oy muddatga to‘xtatib turish esa sud tomonidan amalga oshiriladi.

Vakolatli davlat organining ro‘yxatga olish markazi akkreditatsiya qilinganligi to‘g‘risidagi guvohnomaning amal qilishini to‘xtatib turish haqidagi qarori qabul qilingan kundan e’tiboran bir ish kunidan kechiktirmay ro‘yxatga olish markaziga guvohnomaning amal qilishini to‘xtatib turish sabablari va qonunchilikning aniq normalari ko‘rsatilgan holda O‘zbekiston Respublikasining Yagona interaktiv davlat xizmatlari portali orqali elektron shaklda yetkaziladi.

Sudning ro‘yxatga olish markazi akkreditatsiya qilinganligi to‘g‘risidagi guvohnomaning amal qilishini to‘xtatib turish haqidagi qarori ro‘yxatga olish markaziga qonunchilikda belgilangan muddatlarda yetkaziladi.

Ro‘yxatga olish markazi akkreditatsiya qilinganligi to‘g‘risidagi guvohnomaning amal qilishini to‘xtatib turish muddati mazkur guvohnomaning amal qilish muddatidan oshmasligi kerak.

Ro‘yxatga olish markazi akkreditatsiya qilinganligi to‘g‘risidagi guvohnomaning amal qilishini to‘xtatib turishga olib kelgan holatlar ro‘yxatga olish markazi tomonidan bartaraf etilgan taqdirda, guvohnomaning amal qilishini to‘xtatib turish haqida qaror qabul qilgan vakolatli davlat organi yoki sud ko‘rsatilgan holatlar bartaraf etilganligi to‘g‘risidagi tasdiqnoma olingan kundan e’tiboran uch ish kuni ichida guvohnomaning amal qilishini qayta tiklash haqida qaror qabul qilishi shart.

Ro‘yxatga olish markazi akkreditatsiya qilinganligi to‘g‘risidagi guvohnomaning amal qilishini to‘xtatib turish davrida ro‘yxatga olish markazining elektron raqamli imzo kaliti sertifikatining amal qilishi ham to‘xtatib turiladi.

Vakolatli davlat organining yoki sudning ro‘yxatga olish markazi akkreditatsiya qilinganligi to‘g‘risidagi guvohnomaning amal qilishini to‘xtatib turish haqidagi qarori ustidan belgilangan tartibda shikoyat qilinishi mumkin.

Ro‘yxatga olish markazi akkreditatsiya qilinganligi to‘g‘risidagi guvohnomaning amal qilishi quyidagi hollarda vakolatli davlat organining qaroriga ko‘ra tugatilishi mumkin:

ro‘yxatga olish markazi ro‘yxatga olish markazi akkreditatsiya qilinganligi to‘g‘risidagi guvohnomaning amal qilishini tugatish haqidagi ariza bilan murojaat etganda;

ro‘yxatga olish markazi akkreditatsiya qilinganligi to‘g‘risidagi guvohnomaning amal qilish muddati tugaganda.

Ro‘yxatga olish markazi akkreditatsiya qilinganligi to‘g‘risidagi guvohnomaning amal qilishi quyidagi hollarda sud tomonidan tugatiladi:

ro‘yxatga olish markazi akkreditatsiya qilinganligi to‘g‘risidagi guvohnomaning amal qilishi to‘xtatib turilishiga olib kelgan holatlar ro‘yxatga olish markazi tomonidan vakolatli davlat organi yoki sud belgilagan muddatda bartaraf etilmaganda;

vakolatli davlat organining ro‘yxatga olish markazi akkreditatsiya qilinganligi to‘g‘risidagi guvohnomani berish haqidagi qarori qonunga xilof ekanligi aniqlanganda;

ro‘yxatga olish markazi tomonidan qonunchilik, shuningdek axborot xavfsizligi standartlari, normalari hamda qoidalarining talablari muntazam ravishda (bir yil davomida ikki va undan ortiq marotaba) yoki bir marotaba qo‘pol ravishda buzilganda, agar mazkur qoidabuzarliklar fuqarolarning hayoti va sog‘lig‘iga, jismoniy va yuridik shaxslarning huquqlari hamda qonuniy manfaatlariga, jamoat xavfsizligiga zarar yetkazilishiga olib kelgan bo‘lsa;

ro‘yxatga olish markazi akkreditatsiya qilinganligi to‘g‘risidagi guvohnoma qalbaki hujjatlardan foydalanilgan holda olinganligi fakti aniqlanganda.

Ro‘yxatga olish markazi akkreditatsiya qilinganligi to‘g‘risidagi guvohnomaning amal qilishini tugatish haqidagi ariza bilan sudga murojaat qilingan kundan e’tiboran bir ish kunidan kechiktirmay vakolatli davlat organi guvohnomaning amal qilishini tugatish haqidagi ariza bilan sudga murojaat qilish asoslarini ro‘yxatga olish markaziga qonunchilikning aniq normalarini ko‘rsatgan holda, O‘zbekiston Respublikasining Yagona interaktiv davlat xizmatlari portali orqali elektron shaklda yetkazadi.

Ro‘yxatga olish markazi akkreditatsiya qilinganligi to‘g‘risidagi guvohnomaning amal qilishi tugatilgan taqdirda, ro‘yxatga olish markazining elektron raqamli imzo kaliti sertifikatining ham amal qilishi tugatiladi.

Vakolatli davlat organining yoki sudning ro‘yxatga olish markazi akkreditatsiya qilinganligi to‘g‘risidagi guvohnomaning amal qilishini tugatish haqidagi qarori ustidan belgilangan tartibda shikoyat qilinishi mumkin.

Vakolatli davlat organi Ro‘yxatga olish markazlarining elektron raqamli imzolar kalitlari sertifikatlarining yagona davlat reyestrini (bundan buyon matnda Yagona davlat reyestri deb yuritiladi) yuritadi hamda jismoniy va yuridik shaxslarning undan erkin foydalanishini ta’minlaydi.

Yagona davlat reyestrida quyidagilar ko‘rsatiladi:

ro‘yxatga olish markazi to‘g‘risidagi ma’lumotlar (ro‘yxatga olish markazining nomi, joylashgan yeri (pochta manzili), telefon (faks) raqami, elektron pochta manzili, ro‘yxatga olish markazi akkreditatsiya qilinganligi to‘g‘risidagi guvohnomaning berilgan sanasi, seriya raqami va amal qilish muddati, uning amal qilishini to‘xtatib turish hamda qayta tiklash asoslari va sanalari);

ro‘yxatga olish markazining rahbari haqidagi ma’lumotlar;

ro‘yxatga olish markazining elektron raqamli imzo kaliti sertifikatining amal qilishini uzaytirish, to‘xtatib turish, qayta tiklash hamda tugatish asoslari va sanalari.

Ro‘yxatga olish markazlarining elektron raqamli imzolar kalitlari sertifikatlarining amal qilishi tugatilgan taqdirda, ular Yagona davlat reyestridan chiqariladi.

Ro‘yxatga olish markazining elektron raqamli imzo kaliti sertifikati Yagona davlat reyestridan chiqarilgan paytdan e’tiboran haqiqiy emas deb hisoblanadi.

Foydalanilayotgan elektron raqamli imzoning yopiq kalitiga ishonch yo‘qolgan taqdirda, ro‘yxatga olish markazi vakolatli davlat organini bu haqda yozma yoki elektron shaklda xabardor qiladi. Vakolatli davlat organi yozma yoki elektron xabarnoma olinganidan keyin sertifikatning amal qilishini darhol to‘xtatib turadi va mazkur ro‘yxatga olish markazining sertifikatini amal qilishi tugatilgan sertifikatlar ro‘yxatiga joylashtiradi.

Ro‘yxatga olish markazi quyidagi huquqlarga ega:

elektron raqamli imzoning ochiq va yopiq kalitlarini yaratish, elektron raqamli imzo kalitining sertifikatini ro‘yxatga olish hamda berish;

ushbu Qonunning 27-moddasida nazarda tutilgan hollarda, elektron raqamli imzo kalitlari sertifikatlarining amal qilishini to‘xtatib turish, tiklash va tugatish;

elektron raqamli imzolarning yopiq kalitlarini “bulutli texnologiyalarda” lozim darajada saqlashga doir tashkiliy-texnik tadbirlarni ishlab chiqish va amalga oshirish;

vaqt shtampini (imzolangan elektron hujjatning ko‘rsatilgan vaqtda mavjudligini tasdiqlovchi rekvizitni) qo‘yish bo‘yicha xizmat ko‘rsatish;

elektron raqamli imzolarning kalitlarini berish to‘g‘risida arizalar qabul qilish, ro‘yxatga olish markazi nomidan elektron raqamli imzolarning yopiq kalitlarini va elektron raqamli imzolar kalitlarining tegishli sertifikatlarini berish uchun hududiy bo‘linmalarga ega bo‘lish;

elektron raqamli imzolarning kalitlarini berish, ro‘yxatga olish markazi nomidan elektron raqamli imzolarning yopiq kalitlarini hamda elektron raqamli imzolar kalitlarining tegishli sertifikatlarini berish to‘g‘risidagi arizalarni qabul qilishga oid vakolatlarini shartnoma asosida boshqa yuridik shaxslarga topshirish.

Ro‘yxatga olish markazi:

elektron raqamli imzolarning yopiq kalitlarini yaratish va berish jarayoni xavfsizligiga ta’sir ko‘rsatishi mumkin bo‘lgan shart-sharoitlarning har qanday o‘zgarishlari to‘g‘risida vakolatli davlat organini yozma yoki elektron shaklda xabardor qilishi;

ro‘yxatga olish markazining elektron raqamli imzosining yopiq kalitidan faqat o‘zi bergan elektron raqamli imzolar kalitlarining sertifikatlarini imzolash uchun foydalanishi;

ro‘yxatga olish markazining elektron raqamli imzosining yopiq kalitini himoya qilish bo‘yicha choralar ko‘rishi, agar ushbu kalit boshqa shaxslar tomonidan foydalanilayotganligi yoki foydalanish rejimi buzilganligi ma’lum bo‘lib qolsa, bu haqda vakolatli davlat organini darhol xabardor qilishi;

elektron raqamli imzo kalitlarining egalari to‘g‘risidagi axborotni oshkor qilmasligi, bundan elektron raqamli imzolar kalitlarining sertifikatlarida ko‘rsatilgan axborot mustasno;

Jismoniy va yuridik shaxslarning elektron raqamli imzolari kalitlari sertifikatlarining reyestrini (bundan buyon matnda Reyestr deb yuritiladi) yuritishi, uning o‘z vaqtida yangilanishini hamda elektron raqamli imzolar kalitlarining amaldagi, amal qilishi to‘xtatib turilgan va tugatilgan sertifikatlari to‘g‘risidagi ma’lumotlardan jismoniy hamda yuridik shaxslarning erkin foydalanishi imkoniyatini ta’minlashi;

elektron raqamli imzolar kalitlari sertifikatlari seriya raqamlarining va elektron raqamli imzolar ochiq kalitlarining noyobligini ta’minlashi;

jismoniy va yuridik shaxslarga ro‘yxatga olish markazining ommaviy ofertasi bilan tanishish imkoniyatini berishi;

jismoniy va yuridik shaxslarning murojaatlariga ko‘ra elektron hujjatlardagi elektron raqamli imzoning haqiqiyligini tasdiqlashni amalga oshirishi shart.

Ro‘yxatga olish markazi qonunchilikka muvofiq boshqa huquqlarga ega bo‘lishi va uning zimmasida boshqa majburiyatlar ham bo‘lishi mumkin.

Ro‘yxatga olish markazi qonunchilikda belgilangan tartibda tugatilishi mumkin.

Ro‘yxatga olish markazi tugatish to‘g‘risida qaror qabul qilingan paytdan e’tiboran bir oy ichida bu haqda vakolatli davlat organiga, shuningdek sertifikatlari ushbu ro‘yxatga olish markazi tomonidan berilgan elektron raqamli imzolar kalitlarining barcha egalariga xabar qilishi shart.

Ro‘yxatga olish markazi tugatilgan taqdirda, ushbu ro‘yxatga olish markazi tomonidan berilgan elektron raqamli imzolar kalitlarining sertifikatlari elektron raqamli imzolar kalitlari egalarining roziligi bilan boshqa ro‘yxatga olish markazlariga topshirilishi mumkin.

Boshqa ro‘yxatga olish markazlariga topshirilmagan elektron raqamli imzolar kalitlarining sertifikatlari vakolatli davlat organiga saqlash uchun topshirilib, bu haqda mazkur elektron raqamli imzolar kalitlarining egalari yozma yoki elektron shaklda xabardor qilinadi. Bunda elektron raqamli imzolar kalitlarining sertifikatlari ularning amal qilish muddati tugaguniga qadar amal qiladi.

Elektron raqamli imzo kalitining sertifikati jismoniy yoki yuridik shaxsning elektron raqamli imzoning kalitini berish yoki elektron raqamli imzo kalitining sertifikatini ro‘yxatga olish to‘g‘risidagi arizasiga asosan beriladi.

Elektron raqamli imzoning kalitini berish yoki elektron raqamli imzo kalitining sertifikatini ro‘yxatga olish to‘g‘risidagi arizani ko‘rib chiqish muddati bir ish kunidan oshmasligi kerak. Elektron raqamli imzo kalitining sertifikati ro‘yxatga olish markazi tomonidan arizachining shaxsi tasdiqlanganidan keyin beriladi.

Ro‘yxatga olish markazlari tomonidan elektron raqamli imzo kalitini berish va elektron raqamli imzolar kalitlarining sertifikatlarini ro‘yxatga olish uchun:

jismoniy shaxslardan — shaxsini tasdiqlovchi hujjatni ko‘rsatish, jismoniy shaxsning shaxsiy identifikatsiya raqamini hamda elektron raqamli imzoning kalitidan foydalanish maqsadi haqidagi ma’lumotlarni taqdim etish;

yuridik shaxslardan — soliq to‘lovchi yuridik shaxsning identifikatsiya raqami to‘g‘risidagi ma’lumotlarni, yuridik shaxsning elektron raqamli imzosi kalitining sertifikatini oluvchi xodim ko‘rsatilgan ishonchnomani, ishonchnomada ko‘rsatilgan xodimning shaxsini hamda elektron raqamli imzoning kalitidan foydalanish maqsadlarini tasdiqlovchi hujjatni taqdim etish talab qilinadi.

Tarqatilishi cheklangan axborotni o‘z ichiga olgan elektron hujjatlar uchun elektron raqamli imzoning yopiq kalitini berish va elektron raqamli imzo kalitining sertifikatini ro‘yxatga olish uchun qo‘shimcha axborot talab qilinishi mumkin.

Ro‘yxatga olish markazining jismoniy va yuridik shaxslardan elektron raqamli imzo kalitlarining sertifikatlarini berish maqsadlariga muvofiq bo‘lmagan ma’lumotlarni so‘rab olishi taqiqlanadi.

Ariza berilguniga qadar arizachi elektron raqamli imzoning ochiq va yopiq kalitlarini mustaqil ravishda yaratishi hamda ro‘yxatga olish markaziga ochiq kalitni elektron raqamli imzo kalitining sertifikatini olish uchun taqdim etishi mumkin.

Jismoniy va yuridik shaxslar bir nechta elektron raqamli imzo kalitlariga ega bo‘lishi mumkin. Har bir elektron raqamli imzo kalitining sertifikatini ro‘yxatga olish belgilangan tartibda alohida amalga oshiriladi.

Elektron raqamli imzo kaliti sertifikatining amal qilish muddati elektron raqamli imzo kalitining sertifikati ro‘yxatga olingan paytdan e’tiboran yigirma to‘rt oydan oshmasligi kerak. Bunda elektron raqamli imzo kaliti sertifikatining amal qilish muddati ikki martadan ko‘p bo‘lmagan muddatga uzaytirilishi mumkin.

Elektron raqamli imzo kalitining sertifikati ro‘yxatga olish markazining elektron raqamli imzosi bilan tasdiqlanadi va Reyestrga kiritiladi.

O‘zbekiston Respublikasining xorijdagi fuqarolari, shuningdek chet el jismoniy va yuridik shaxslari hamda fuqaroligi bo‘lmagan shaxslar elektron raqamli imzo kalitining sertifikatini O‘zbekiston Respublikasining konsullik muassasalari, shuningdek O‘zbekiston Respublikasi diplomatik vakolatxonalarining konsullik bo‘limlari orqali olishi mumkin.

O‘zbekiston Respublikasining konsullik muassasalari, shuningdek O‘zbekiston Respublikasi diplomatik vakolatxonalarining konsullik bo‘limlari tomonidan elektron raqamli imzolar kalitlarining sertifikatlarini berish tartibi O‘zbekiston Respublikasi Vazirlar Mahkamasi tomonidan belgilanadi.

Elektron raqamli imzo kalitining sertifikatida quyidagilar ko‘rsatilishi kerak:

elektron raqamli imzo kalitining egasi bo‘lgan jismoniy shaxsning familiyasi, ismi, otasining ismi va shaxsiy identifikatsiya raqami;

elektron raqamli imzo kalitining egasi bo‘lgan soliq to‘lovchi yuridik shaxsning nomi, joylashgan yeri (pochta manzili) va identifikatsiya raqami;

elektron raqamli imzo kaliti sertifikatining seriya raqami va uning amal qilish muddati;

elektron raqamli imzoning ochiq kaliti;

elektron raqamli imzoning ochiq kalitidan qaysi elektron raqamli imzo vositalari yordamida foydalanish mumkin bo‘lsa, xuddi shunday vositalarning nomi;

mazkur sertifikatni bergan ro‘yxatga olish markazining nomi va joylashgan yeri (pochta manzili);

elektron raqamli imzo kalitidan foydalanish maqsadi to‘g‘risidagi ma’lumotlar;

elektron raqamli imzo kalitining mazkur sertifikati kiritilgan Reyestrning Internet jahon axborot tarmog‘idagi to‘liq manzili.

Elektron raqamli imzo kaliti egasining tashabbusiga ko‘ra elektron raqamli imzo kalitining sertifikatiga qonunchilikka muvofiq boshqa ma’lumotlar ham kiritilishi mumkin.

Elektron raqamli imzo kaliti sertifikatining amal qilishini to‘xtatib turish, tiklash va tugatish elektron raqamli imzo kaliti egasining arizasi asosida amalga oshiriladi.

Elektron raqamli imzo kaliti sertifikatining amal qilishini to‘xtatib turish, tiklash yoki tugatish to‘g‘risidagi ariza uning egasi tomonidan muddati ko‘rsatilgan holda yozma yoki elektron shaklda beriladi.

Elektron raqamli imzo kaliti sertifikatining amal qilishi to‘xtatib turilganda, tiklanganda va tugatilganda ro‘yxatga olish markazi Reyestrga tegishli yozuvni kiritadi hamda bu haqda elektron raqamli imzo kalitining egasini uch ish kuni ichida yozma yoki elektron shaklda xabardor qiladi.

Elektron raqamli imzo kaliti sertifikatining amal qilishi ro‘yxatga olish markazi tomonidan quyidagi hollarda ham elektron raqamli imzo kaliti egasining roziligidan qat’i nazar, tugatiladi:

mazkur sertifikatning amal qilish muddati tugaganda;

elektron raqamli imzo kalitining egasi ushbu Qonunning 27-moddasida nazarda tutilgan majburiyatlarni bajarmaganligi faktlari aniqlanganda;

elektron raqamli imzo kaliti sertifikatining amal qilishini to‘xtatib turish muddati tugaganda va uni tiklash uchun elektron raqamli imzo kaliti egasining arizasi mavjud bo‘lmaganda.

Elektron raqamli imzo kalitining sertifikatini ro‘yxatga olish markazida saqlash tartibi hamda muddati ro‘yxatga olish markazi va elektron raqamli imzo kalitining egasi o‘rtasidagi shartnoma bilan belgilanadi.

Elektron raqamli imzo kalitining sertifikatini saqlash muddati tugagach, u Reyestrdan chiqariladi va amal qilishi tugatilgan sertifikatlar arxiviga o‘tkaziladi.

Elektron raqamli imzo kalitining egasi quyidagi huquqlarga ega:

elektron raqamli imzo kalitining sertifikatini berish, ro‘yxatga olish, uning amal qilishini to‘xtatib turish, tiklash va tugatish to‘g‘risidagi ariza bilan ro‘yxatga olish markaziga murojaat etish;

elektron raqamli imzo kaliti sertifikatining amal qilish muddatini uzaytirish haqida so‘rov yuborish.

Ushbu modda birinchi qismining uchinchi xatboshisida nazarda tutilgan hollarda, elektron raqamli imzo kaliti sertifikatining amal qilish muddatini uzaytirish to‘g‘risidagi so‘rovni ro‘yxatga olish markaziga mazkur sertifikatning amal qilish muddati tugaguniga qadar kamida ikki hafta oldin yuborish kerak.

Elektron raqamli imzo kalitining egasi:

elektron raqamli imzoning yopiq kaliti xavfsizligini ta’minlash uchun barcha mumkin bo‘lgan choralarni ko‘rishi;

elektron raqamli imzoning kaliti boshqa shaxslar tomonidan foydalanilayotganligi yoki kirish rejimining buzilganligi aniqlangan taqdirda, elektron raqamli imzo kalitining sertifikatini bergan ro‘yxatga olish markazini darhol xabardor qilishi;

tarqatilishi cheklangan axborotni o‘z ichiga olgan elektron hujjatlarga imzo qo‘yish uchun mo‘ljallangan elektron raqamli imzoning kalitidan faqat tegishli maqsadlarda foydalanishi shart.

Agar elektron raqamli imzo kalitining egasi yuridik shaxs bo‘lsa, ushbu yuridik shaxsning rahbari elektron raqamli imzoning yopiq kalitidan foydalanilishi uchun mas’ul bo‘ladi.

Elektron raqamli imzo kalitining egasi bo‘lgan yuridik shaxsning rahbari ushbu moddaning uchinchi qismida ko‘rsatilgan majburiyatlardan tashqari:

yuridik shaxs qayta tashkil etilgan yoki tugatilgan taqdirda bu haqda ro‘yxatga olish markaziga xabar qilishi;

o‘zi bilan tuzilgan mehnat shartnomasi tugatilganda elektron raqamli imzoning kalitini belgilangan tartibda topshirishi shart.

Yuridik shaxsning yangi tayinlangan rahbari yuridik shaxsga tegishli bo‘lgan elektron raqamli imzoning kalitini belgilangan tartibda (“bulutli texnologiyalardan” foydalanilganda autentifikatsiya qilish omillarini almashtirish majburiyati bilan) qabul qilib oladi.

Elektron raqamli imzo kalitining egasi qonunchilikka va shartnomaga muvofiq boshqa huquqlarga ega bo‘lishi hamda uning zimmasida boshqa majburiyatlar ham bo‘lishi mumkin.

Ishonchli uchinchi taraf xizmati axborot va elektron hujjatlarni almashish chog‘ida ishonchni ta’minlash maqsadida elektron hujjatdagi elektron raqamli imzoning unga imzo qo‘ygan shaxsga tegishliligini tekshirishga doir faoliyatdir.

Ishonchli uchinchi taraf xizmatining vazifalarini amalga oshiradigan shaxs vakolatli davlat organi tomonidan tayinlanadi hamda idoralararo va transchegaraviy axborot hamkorligi jarayonida elektron hujjatlarning daxlsizligi hamda ishonchliligini saqlash kafolatlarini vaqtning muayyan paytida ta’minlash bo‘yicha axborot vositachisi sifatida ish yuritadi, shuningdek ularning yuridik kuchga ega ekanligini tasdiqlaydi.

Chet davlatlarning elektron raqamli imzo kalitlarining sertifikatlari O‘zbekiston Respublikasi hududida O‘zbekiston Respublikasining xalqaro shartnomalarida belgilangan tartibda yoki Ishonchli uchinchi taraf xizmati tomonidan haqiqiylikni tasdiqlash yo‘li bilan tan olinadi.

Ishonchli uchinchi taraf xizmati faoliyatining tartibi O‘zbekiston Respublikasi Vazirlar Mahkamasi tomonidan belgilanadi.

Elektron raqamli imzodan foydalanish sohasidagi nizolar qonunchilikda belgilangan tartibda hal etiladi.

Elektron raqamli imzo to‘g‘risidagi qonunchilikni buzganlikda aybdor shaxslar belgilangan tartibda javobgar bo‘ladi.

Quyidagilar o‘z kuchini yo‘qotgan deb topilsin:

1) O‘zbekiston Respublikasining 2003-yil 11-dekabrda qabul qilingan “Elektron raqamli imzo to‘g‘risida”gi 562-II-sonli Qonuni (O‘zbekiston Respublikasi Oliy Majlisining Axborotnomasi, 2004-yil, № 1-2, 12-modda);

2) O‘zbekiston Respublikasi Oliy Majlisining 2003-yil 11-dekabrda qabul qilingan “Elektron raqamli imzo to‘g‘risida”gi O‘zbekiston Respublikasi Qonunini amalga kiritish haqida”gi 563-II-sonli Qarori (O‘zbekiston Respublikasi Oliy Majlisining Axborotnomasi, 2004-yil, № 1-2, 13-modda);

3) O‘zbekiston Respublikasining 2015-yil 20-avgustda qabul qilingan “O‘zbekiston Respublikasining ayrim qonun hujjatlariga xususiy mulkni, tadbirkorlik subyektlarini ishonchli himoya qilishni yanada kuchaytirishga, ularni jadal rivojlantirish yo‘lidagi to‘siqlarni bartaraf etishga qaratilgan o‘zgartish va qo‘shimchalar kiritish to‘g‘risida”gi O‘RQ-391-sonli Qonunining (O‘zbekiston Respublikasi Oliy Majlisi palatalarining Axborotnomasi, 2015-yil, № 8, 312-modda) 29-moddasi;

4) O‘zbekiston Respublikasining 2018-yil 18-aprelda qabul qilingan “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘RQ-476-sonli Qonunining (O‘zbekiston Respublikasi Oliy Majlisi palatalarining Axborotnomasi, 2018-yil, № 4, 224-modda) 46-moddasi;

5) O‘zbekiston Respublikasining 2021-yil 21-aprelda qabul qilingan “O‘zbekiston Respublikasining ayrim qonun hujjatlariga o‘zgartishlar kiritish to‘g‘risida”gi O‘RQ-683-sonli Qonunining (O‘zbekiston Respublikasi Oliy Majlisi palatalarining Axborotnomasi, 2021-yil, 4-songa ilova) 156-moddasi.

O‘zbekiston Respublikasi Axborot texnologiyalari va kommunikatsiyalarini rivojlantirish vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlasin.

O‘zbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin.

Ushbu Qonun rasmiy e’lon qilingan kundan e’tiboran uch oy o‘tgach kuchga kiradi.