O‘zbekiston Respublikasining “Sudlar to‘g‘risida”gi Qonuni, O‘zbekiston Respublikasi Jinoyat-protsessual kodeksi va Fuqarolik protsessual kodeksi, shuningdek O‘zbekiston Respublikasi Prezidentining 2006-yil 31-avgustdagi PQ-458-son “O‘zbekiston Respublikasi Adliya vazirligi huzuridagi Sud qarorlarini ijro etish, sudlar faoliyatini moddiy-texnika jihatidan va moliyaviy ta’minlash departamenti faoliyatini yanada takomillashtirish chora-tadbirlari to‘g‘risida”gi qaroriga muvofiq, O‘zbekiston Respublikasi Adliya vazirligi va Ichki ishlar vazirligi qaror qiladi:

1. Sudga kelishdan bosh tortgan shaxslarni majburiy keltirish bo‘yicha sud topshiriqlarini ijro etish tartibi to‘g‘risidagi Yo‘riqnoma ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilganidan so‘ng o‘n kundan keyin kuchga kiradi.

Mazkur Yo‘riqnoma, O‘zbekiston Respublikasining “Sudlar to‘g‘risida”gi Qonuni, O‘zbekiston Respublikasining Jinoyat-protsessual kodeksi va Fuqarolik protsessual kodeksi, shuningdek O‘zbekiston Respublikasi Prezidentining 2006-yil 31-avgustdagi PQ-458-son “O‘zbekiston Respublikasi Adliya vazirligi huzuridagi Sud qarorlarini ijro etish, sudlar faoliyatini moddiy-texnika jihatidan va moliyaviy ta’minlash departamenti faoliyatini yanada takomillashtirish chora-tadbirlari to‘g‘risida”gi qaroriga muvofiq, sudga kelishdan bosh tortgan shaxslarni majburiy keltirish bo‘yicha sud topshiriqlarini ijro etish tartibini belgilaydi.

1. Sudga kelishdan bosh tortgan shaxslarni keltirish Jinoyat-protsessual kodeksi va Fuqarolik protsessual kodeksiga muvofiq majburlov chorasi hisoblanadi.

2. Sudga kelishdan bosh tortgan shaxslarni majburiy keltirish bo‘yicha sud topshiriqlarini ijro etish, vakolatli davlat organlari tomonidan shaxsning sudga ixtiyoriy kelishidan bosh tortganida qo‘llaniladigan choralarni amalga oshirishdan iborat.

3. Sudga kelishdan bosh tortgan shaxslarni majburiy keltirish bo‘yicha sud topshiriqlarini ijro etish O‘zbekiston Respublikasi ichki ishlar organlari xodimlari(keyingi o‘rinlarda matnda ichki ishlar organlari xodimlari deb ataladi) tomonidan amalga oshiriladi.

4. Sudning ajrimi shaxsni majburiy keltirish uchun asos bo‘lib hisoblanadi.

5. Shaxsni majburiy keltirish to‘g‘risidagi sudning ajrimi u chiqarilgan kundan boshlab bir kun davomida ish ko‘riladigan joy bo‘yicha ichki ishlar organlariga ijro uchun beriladi(jo‘natiladi).

Ajrimda quyidagilar ko‘rsatilishi shart:

majburiy keltirilishi lozim bo‘lgan shaxsning familiyasi, ismi, otasining ismi;

uning protsessual mavqeyi;

majburiy keltirilishi lozim bo‘lgan shaxsning yashash yoki ish joyi;

majburiy keltirishni qo‘llash uchun asos;

majburiy keltirilishi lozim bo‘lgan shaxsning qayerga va qachon olib borilishi lozimligi;

majburiy keltirishni amalga oshirish kimga topshirilayotganligi.

6. Ichki ishlar organlarining bo‘lim boshliqlari majburiy keltirish to‘g‘risidagi sudning kelib tushgan ajrimini zudlik bilan ko‘rib chiqadi va uning aniq va o‘z vaqtida ijrosini tashkil etadi. Ichki ishlar organlari bo‘lim boshliqlari yo‘q bo‘lgan paytda sud ajrimining ijrosini uning o‘rinbosarlaridan biri amalga oshiradi.

7. Majburiy keltirish to‘g‘risidagi ajrim u kelib tushgan kundan boshlab bir kun ichida maxsus jurnalda ro‘yxatga olinadi va ichki ishlar organlari xodimlariga ijro uchun imzo chektirilib, topshiriladi.

8. Majburiy keltirish soat 6-00 dan 22-00 gacha amalga oshiriladi, kunning boshqa paytlarida qonunda belgilangan hollarda amalga oshiriladi.

9. Ichki ishlar organlari xodimi yoki xodimlari guruhi majburiy keltirilish kunida shaxsning haqiqiy turgan joyiga boradi.

Ichki ishlar organlari xodimi majburiy keltirilishi lozim bo‘lgan shaxsni topganida, uni sudga majburiy keltirish to‘g‘risidagi ajrim bilan tanishtirib, imzo chektiradi. Bunda shaxs topilgan joy va vaqt, shaxsni yetkazish vaqti, shuningdek majburiy keltirishi lozim bo‘lgan shaxsning ariza, shikoyat va iltimosnomalari haqida dalolatnoma tuziladi.

10. Ichki ishlar organlari xodimi shaxsning qochib ketganligi, ta’tildaligi, safardaligi, og‘ir kasalligi yoki boshqa sabablar (tabiiy ofatlar, kichik yoshdagi farzandlarining mavjudligi va ularni parvarishlashni boshqa birovga topshirishning iloji bo‘lmaganda, transport harakatida uzoq muddatli tanaffus va h.k) tufayli keltirishning imkoni yo‘qligini belgilagach, dalolatnoma tuzadi va u fuqarolar yig‘ini raisi tomonidan imzolanadi. Dalolatnomaga ichki ishlar organlari bo‘lim boshlig‘i tomonidan tasdiqlangan bildirgi va uzrli sabablarni tasdiqlovchi hujjatlar nusxasi ilova qilinadi.

Dalolatnoma, ilova qilingan tegishli hujjatlar bilan birga, sud raisiga yoki majburiy keltirish to‘g‘risida ajrim chiqargan sudyaga topshiriladi.

11. Ichki ishlar organlari xodimlari majburiy keltirishni amalga oshirayotganda, sudga keltirilayotgan shaxsning huquq va qonuniy manfaatlariga amal qilishga, ularning sha’ni va qadr-qimmatini hurmat qilishga majbur.

12. Qonuniy talablarga qarshilik ko‘rsatilganda yoki ashaddiy bo‘ysunmaslik holatlarida ichki ishlar organlari xodimlari “Ichki ishlar organlari to‘g‘risida”gi O‘zbekiston Respublikasi Qonuniga muvofiq jismoniy kuch, maxsus vosita va o‘qotar qurolni qo‘llash huquqiga ega. Mazkur holda bayonnoma tuziladi va unda huquqbuzarlikning xususiyati, vaqti va joyi hamda shaxsga nisbatan qo‘llanilgan choralar ko‘rsatiladi. Bayonnoma qonunda nazarda tutilgan choralar qo‘llanilganligi to‘g‘risidagi bildirgi bilan birga ichki ishlar organi bo‘lim boshlig‘iga taqdim etiladi. Bu haqda ajrimi bo‘yicha majburiy keltirish amalga oshirilgan sudya xabardor qilinadi.

Jismoniy kuch ishlatilganligi va maxsus vositalar qo‘llanilganligi natijasida jismoniy yoxud yuridik shaxslarning hayotiga, sog‘lig‘iga yoki mol-mulkiga zarar yetkazilgan har bir holat haqida, shuningdek o‘qotar qurol qo‘llanilgan barcha hollar to‘g‘risida prokurorga darhol xabar beriladi.

13. Boshqa shaharda, tumanda yoki viloyatda yashovchi shaxsga nisbatan majburiy keltirish sudning ajrimiga binoan, shaxslarning yashash joyidan qat’i nazar, ish yurituvi joyidagi ichki ishlar organlari xodimlari tomonidan amalga oshiriladi. Boshqa viloyatda yashovchi shaxsni majburiy keltirish Ichki ishlar vazirligi tomonidan belgilangan tartibda amalga oshiriladi.

14. Voyaga yetmagan shaxslarni majburiy keltirish ularning ota-onalari yoki ularning qonuniy vakillari orqali amalga oshiriladi. Ichki ishlar organi xodimi majburiy keltirishni amalga oshirayotganida keltirilishi lozim bo‘lgan voyaga yetmagan shaxsning ota-onasini majburiy keltirish to‘g‘risidagi sud ajrimi bilan tanishtirib, bu haqda imzo chektiradi.

15. Sudga majburiy tartibda keltirilgan shaxs ichki ishlar organlari xodimining bildirgisi bilan ajrim chiqargan sudyaga topshiriladi. Bildirgi ajrim chiqargan sudya tomonidan imzolanadi.

16. Ichki ishlar organlari xodimi sudya talabiga muvofiq, so‘nggi sud harakatlari bajarilguniga qadar majburiy keltirilgan shaxsni nazorat qilishi shart.

17. Sud ajrimini bajarmagan shaxs qonunchilikka muvofiq javobgar bo‘ladi.

18. Majburiy keltirish bilan bog‘liq bo‘lgan xarajatlarni qoplash qonunchilikda belgilangan tartibda amalga oshiriladi.

19. Ushbu Yo‘riqnoma O‘zbekiston Respublikasi Oliy sudi bilan kelishilgan.