Ўзбекистон Республикаси Президентининг
Фармони
Стратегик режалаштириш ва ривожланиш тизимини жорий этиш бўйича ташкилий чора-тадбирлар тўғрисида
Республикада стратегик режалаштириш ва ривожланишнинг ягона ва комплекс тизимини шакллантириш, стратегик аҳамиятга эга ҳужжатларни ишлаб чиқиш, амалга ошириш, мониторинг қилиш ва самарадорлигини баҳолашнинг барқарор ва самарали механизмларини жорий этиш, ушбу соҳада вазирликлар, идоралар, барча даражадаги маҳаллий ижро этувчи ҳокимият органлари, шунингдек, таҳлилий марказлар ва илмий-тадқиқот муассасаларининг келишилган ҳолда фаолиятини таъминлаш мақсадида қарор қиламан:
I. Мақсад ва вазифалар
1. 2025 йил 1 ноябрдан бошлаб «мақсад — ҳаракат — натижа» занжири асосида стратегик аҳамиятга эга ҳужжатларни ишлаб чиқиш, амалга ошириш, мониторинг қилиш ва баҳолашни ўз ичига олган стратегик режалаштириш ва ривожланиш тизими жорий этилсин.
2. Қуйидагилар стратегик режалаштириш ва ривожланиш тизимининг асосий вазифалари этиб белгилансин:
(а) стратегик аҳамиятга эга ҳужжатларни ишлаб чиқиш, амалга ошириш, мониторинг қилиш ва самарадорлигини баҳолашнинг барқарор ва самарали механизмини шакллантириш;
(б) стратегик режалаштириш ва ривожланиш ҳужжатларининг ягона иерархияси ва ўзаро мувофиқлигини таъминлаш;
(в) стратегик режалаштириш ва ривожланиш соҳасида вазирликлар, идоралар ва маҳаллий ижро этувчи ҳокимият органларининг ўзаро ҳамкорлиги тартиби, ваколатлари, функционал вазифалари ва жавобгарлик чегараларини белгилаш;
(г) чуқур илмий тадқиқотлар, тенденциялар ва прогнозларни холисона таҳлил қилиш асосида давлат сиёсатининг стратегик устуворликларини шакллантириш ва амалга ошириш;
(д) аниқ, шаффоф ва ўлчанадиган кўрсаткичларга асосланган стратегик мақсадларга эришиш самарадорлигини мониторинг қилиш ва баҳолаш тизимини жорий этиш;
(ж) соҳалар, тармоқлар ва ҳудудларни ривожлантиришга янгича ёндашувларни жорий этиш, замонавий форматлар ва инновацион усуллар асосида ишларни ташкил қилиш;
(з) стратегик таҳлил ва режалаштириш соҳасида юқори малакали кадрлар янги авлодини тайёрлашнинг интеграциялашган тизимини яратиш.
II. Стратегик режалаштириш ва ривожланиш тизимини жорий этиш
3. Стратегик режалаштириш ҳужжатларининг иерархияси қуйидаги тартибда белгилансин:
(а) биринчи даражали стратегик режалаштириш ҳужжатлари мамлакатни, унинг ҳудудларини ижтимоий-иқтисодий, ижтимоий-сиёсий ривожлантиришда давлат сиёсатини шакллантириш ва амалга ошириш билан боғлиқ устувор йўналишларни, бошқарувнинг концептуал ёндашувларини белгиловчи концепциялар шаклида қабул қилинади. Бунда концепция мувофиқлаштириш, ресурслар билан таъминлаш ва уларни амалга ошириш самарадорлигини баҳолашнинг умумий механизмларини ўз ичига олган муайян стратегияларни ишлаб чиқиш учун асос бўлиб ҳисобланади;
(б) иккинчи даражали стратегик режалаштириш ҳужжатлари ўрта ва узоқ муддатли истиқболда мамлакат, ҳудуд, тармоқ ёки давлат ва жамият ҳаётининг бошқа соҳасини ривожлантиришнинг мақсади, вазифалари, мақсадли кўрсаткичларига эришишга қаратилган ҳамда уларни амалга оширишнинг аниқ белгиланган механизмлари ва ресурсларини ўз ичига олган стратегиялар шаклида қабул қилинади;
(в) учинчи даражали стратегик режалаштириш ҳужжатлари стратегиянинг мақсад ва вазифаларига эришишга қаратилган ўзаро боғлиқ батафсил чора-тадбирлар мажмуини белгиловчи дастурлар («йўл хариталари», чора-тадбирлар режалари) шаклида қабул қилинади.
4. Белгилансинки:
(а) биринчи даражали стратегик режалаштириш ҳужжатлари 7 йилдан ортиқ муддатга ишлаб чиқилади ва қоида тариқасида Ўзбекистон Республикаси қонунлари билан тасдиқланади;
(б) иккинчи даражали стратегик режалаштириш ҳужжатлари 4 йилдан 7 йилгача бўлган муддатга ишлаб чиқилади ва Ўзбекистон Республикаси Президентининг ҳужжатлари билан тасдиқланади. Бунда «Ўзбекистон — 2030» стратегияси ва бошқа шу каби кенг қамровли стратегик режалаштириш ҳужжатлари нисбати бўйича муайян ёки бир неча соҳа, тармоқ ёки ҳудуд бўйича стратегик режалаштириш ҳужжатларидан юқори ҳисобланади;
(в) учинчи даражали стратегик режалаштириш ҳужжатлари 1 йилдан 3 йилгача бўлган муддатга ишлаб чиқилади ва қуйидаги тартибда тасдиқланади:
(i) «Ўзбекистон — 2030» стратегияси ва бошқа шу каби кенг қамровли стратегик режалаштириш ҳужжатларини амалга ошириш бўйича Ўзбекистон Республикаси Президентининг ҳужжатлари;
(ii) иккинчи даражали бошқа стратегик режалаштириш ҳужжатларини амалга ошириш бўйича Вазирлар Маҳкамасининг қарорлари қабул қилинади.
5. Стратегик режалаштириш ва ривожланиш тизимини жорий этишга қаратилган биринчи навбатдаги чора-тадбирларни амалга ошириш бўйича «йўл харитаси» 1-иловага мувофиқ тасдиқлансин.
III. Стратегик режалаштириш ва ривожланиш тизимини мувофиқлаштириш
6. Қуйидагилар:
(а) Таҳлилий ва тадқиқот тузилмалари фаолиятини ташкил қилиш бўйича мувофиқлаштирувчи кенгаш Ўзбекистон Республикаси Президенти ҳузуридаги Стратегик режалаштириш ва ривожланиш бўйича мувофиқлаштирувчи кенгаш (кейинги ўринларда — Мувофиқлаштирувчи кенгаш) этиб;
(б) Ўзбекистон Республикаси Президенти ҳузуридаги Стратегик ислоҳотлар агентлиги Ўзбекистон Республикаси Президенти ҳузуридаги Стратегик ривожланиш ва ислоҳотлар агентлиги (кейинги ўринларда — Агентлик) этиб;
(в) Ўзбекистон Республикаси Президенти ҳузуридаги Стратегик ислоҳотлар агентлигини қўллаб-қувватлаш жамғармаси Ўзбекистон Республикаси Президенти ҳузуридаги Стратегик ривожланиш ва ислоҳотлар агентлигини қўллаб-қувватлаш жамғармаси (кейинги ўринларда — Жамғарма) этиб қайта ташкил этилсин.
7. Мувофиқлаштирувчи кенгашга қуйидаги қўшимча вазифалар юклатилсин:
(а) ижтимоий-иқтисодий, ижтимоий-сиёсий, технологик, гуманитар, экологик ва бошқа соҳалардаги долзарб муаммолар ҳамда чақириқларни таҳлил қилиш, уларни ҳал этиш бўйича таклифлар ишлаб чиқиш, шунингдек, мамлакатни стратегик ривожлантириш бўйича ғоя ва ташаббусларни шакллантириш;
(б) «Ўзбекистон — 2030» стратегияси, концепциялар, стратегиялар ва дастурлар («йўл хариталари», чора-тадбирлар режалари) билан мувофиқлигини таъминлаш нуқтаи назаридан стратегик ташаббусларни ишлаб чиқиш ва экспертизадан ўтказишни мувофиқлаштириш;
(в) концепциялар, стратегиялар ва дастурларнинг («йўл хариталари», чора-тадбирлар режалари) «Ўзбекистон — 2030» стратегияси мақсадлари билан тўлиқ боғлиқлиги ва уйғунлигини таъминлаш, шунингдек, уларнинг амалга оширилиши самарадорлигини мониторинг қилиш ва баҳолаш;
(г) жамият ва давлат ҳаётининг турли соҳалари кесимида мамлакат ривожланишини узоқ муддатли режалаштириш бўйича фаолиятни ташкил этиш.
8. Белгилаб қўйилсинки:
(а) Мувофиқлаштирувчи кенгаш вазирлик ва идоралар, маҳаллий ижро этувчи ҳокимият органлари, шунингдек, давлат таҳлилий марказлари ва илмий-тадқиқот муассасаларининг стратегик режалаштириш ва ривожланиш соҳасидаги фаолиятини мувофиқлаштириш учун масъул бўлган идоралараро коллегиал орган ҳисобланади;
(б) Мувофиқлаштирувчи кенгаш мажлисларида мамлакатни ижтимоий-иқтисодий ривожлантириш ҳамда тегишли соҳаларда комплекс ислоҳотларни чуқурлаштириш ва либераллаштириш борасидаги стратегик масалалар юзасидан ишлаб чиқилган норматив-ҳуқуқий ҳужжатлар лойиҳаларининг мақсадга мувофиқлиги кўриб чиқилади;
(в) Мувофиқлаштирувчи кенгаш мажлисларида қабул қилинган қарорлар барча давлат органлари ва ташкилотлари томонидан бажарилиши мажбурий бўлган баённомалар билан расмийлаштирилади;
(г) Мувофиқлаштирувчи кенгаш биринчи ва иккинчи даражали стратегик режалаштириш ҳужжатлари лойиҳаларини уларни қабул қилишнинг мақсадга мувофиқлиги нуқтаи назаридан кўриб чиқади. Бунда маъқулланган лойиҳалар кўриб чиқиш учун Ўзбекистон Республикаси Президентига киритилади;
(д) Агентлик, шунингдек, мазкур Фармоннинг 2-иловасига мувофиқ рўйхатдаги таҳлилий марказлар ва илмий-тадқиқот муассасалари низомлари (уставлари) ва йиллик иш режалари, хорижий тадбирларда иштирок этиш дастурлари ҳамда тузилмалари Мувофиқлаштирувчи кенгаш билан келишилган ҳолда тасдиқланади;
(ж) Мувофиқлаштирувчи кенгаш Агентлик, шунингдек, мазкур Фармоннинг 2-иловасига мувофиқ рўйхатдаги таҳлилий марказлар ва илмий-тадқиқот муассасалари тузилмаларига ўзгартиришлар киритиш, шу жумладан, Мувофиқлаштирувчи кенгаш ҳузуридаги Тадқиқотларни қўллаб-қувватлаш жамғармаси, Стратегик ривожланиш ва ислоҳотлар агентлигини қўллаб-қувватлаш жамғармаси маблағлари, шунингдек, қонунчилик ҳужжатларида тақиқланмаган бюджетдан ташқари бошқа манбалар ҳисобидан молиялаштириладиган қўшимча штат бирликларини киритиш ҳуқуқига эга;
(з) давлат таҳлилий марказлари ва илмий-тадқиқот муассасаларига қонунчилик ҳужжатларида ҳамда уларнинг йиллик иш режаларида назарда тутилмаган бошқа вазифалар, функциялар ва топшириқлар юкланишига йўл қўйилмайди.
IV. Стратегик режалаштириш ва ривожланиш соҳасида бошқарув тизимини такомиллаштириш
9. Белгилансинки, Агентлик:
(а) стратегик режалаштириш ва ривожланиш тизимини ташкил этиш, уни самарали жорий қилишга қаратилган аниқ механизмларни ишлаб чиқиш, шунингдек, стратегик режалаштириш ҳужжатлари лойиҳаларини тайёрлашни тартибга солиш бўйича ваколатли давлат органи;
(б) Мувофиқлаштирувчи кенгашнинг ишчи органи ҳисобланади.
10. Агентликка 3-иловага мувофиқ қўшимча вазифалар юклатилсин.
11. Мувофиқлаштирувчи кенгашга Агентлик ҳузурида қуйидагиларни ташкил этиш бўйича қарорлар қабул қилиш ҳуқуқи берилсин:
(а) иқтисодиётнинг асосий тармоқлари, шунингдек, алоҳида соҳалар ва йўналишларда жорий ҳолатни ўрганиш ҳамда уларни модернизация қилиш, инновацион ва барқарор ривожлантиришга қаратилган стратегиялар, таклифлар ва ташаббусларни ишлаб чиқиш учун соҳалар ва тармоқларни ривожлантириш масалалари бўйича лойиҳа офислари;
(б) ҳудудларни комплекс ривожлантириш бўйича жорий ҳолатни ўрганиш ҳамда стратегиялар, таклифлар ва ташаббусларни ишлаб чиқиш, шунингдек, уларнинг ҳудудий режалаштириш билан мувофиқлигини таъминлаш учун ҳудудий ривожланиш масалалари бўйича лойиҳа офислари;
(в) Ўзбекистон Республикасининг ташқи алоқалари ва экспорт салоҳиятини ривожлантириш, инвестицияларни жалб этиш, шунингдек, халқаро ташкилотлар ва молия институтлари билан ўзаро ҳамкорлик қилиш соҳасидаги жорий ҳолатни ўрганиш ҳамда таклифлар ва ташаббусларни ишлаб чиқиш учун халқаро ҳамкорлик масалалари бўйича лойиҳа офислари.
12. Белгилансинки:
(а) тизимда, соҳада ёки тармоқда мавжуд моделни тубдан ўзгартириш, институционал, таркибий, ҳуқуқий ва функционал янгилаш орқали комплекс ва барқарор ривожланишни таъминлашга, бошқарувнинг, бозор механизмларининг ёки ижтимоий хизматларнинг сифат жиҳатидан янги моделини шакллантиришга қаратилган, стратегик режалаштириш ҳужжати ҳисобланмайдиган ҳужжатлар лойиҳалари мазкур Фармоннинг 4-иловасида белгиланган мезонларга мувофиқ стратегик ислоҳотларни назарда тутувчи норматив-ҳуқуқий ҳужжатлар лойиҳалари ҳисобланади;
(б) стратегик ислоҳотларни назарда тутувчи норматив-ҳуқуқий ҳужжатлар лойиҳалари ваколатли давлат органлари томонидан Ўзбекистон Республикаси Президенти Администрациясига киритилгунига қадар Агентлик билан келишилади, бунда ушбу тартибга риоя этмаган ҳолда киритилган лойиҳалар кўриб чиқилмайди;
(в) ҳуқуқий экспертиза якунлари бўйича стратегик ислоҳотларни назарда тутувчи норматив-ҳуқуқий ҳужжатлар лойиҳаларини Агентлик билан келишиш тўғрисида Адлия вазирлиги томонидан тавсиялар берилади;
(г) Агентлик таҳлилий марказлар ва илмий-тадқиқот муассасалари билан ҳамкорликда стратегик ислоҳотларни назарда тутувчи норматив-ҳуқуқий ҳужжатлар лойиҳаларини кўриб чиқади ва натижаларга кўра қуйидагилар бўйича хулоса беради:
(i) лойиҳани қабул қилишнинг асослантирилганлиги, белгиланган устувор йўналишлар ва мақсадларни амалга оширишга йўналтирилганлиги, «Ўзбекистон — 2030» стратегияси, шунингдек, бошқа тармоқ ва ҳудудий стратегияларга мувофиқлиги;
(ii) мақсадларнинг ва улар билан боғлиқ вазифалар, чора-тадбирлар, амалга ошириш механизмлари ва воситалари, амалдаги ва ўлчанадиган мақсадли кўрсаткичлар, шунингдек, муддатлар ва уларга эришиш учун масъулларнинг белгиланганлиги;
(iii) белгиланган вазифалар, кўрсаткичлар ва чора-тадбирларни амалга оширишда молиявий-иқтисодий, моддий-техник ва бошқа ресурсларнинг кўзда тутилганлиги;
(iv) рақамлаштириш, коррупциянинг олдини олиш ва бюрократияни камайтириш, очиқлик ва жамоатчилик иштирокини кенгайтириш, гендер тенглик, хусусий секторни жалб қилиш бўйича чора-тадбирлар қамраб олинганлиги;
(v) белгиланган вазифаларнинг амалга оширилишини мониторинг қилиш ва баҳолаш, ҳисобдорлик механизмлари мавжудлиги.
V. Стратегик режалаштириш ва ривожланиш тизимини илмий-услубий жиҳатдан ва кадрлар билан таъминлаш
13. Ўзбекистон Республикаси Президенти ҳузуридаги Қонунчилик ва ҳуқуқий сиёсат институтига (кейинги ўринларда — Институт) қуйидаги қўшимча вазифалар юклатилсин:
(а) стратегик режалаштириш ва ривожланишнинг илмий-услубий ва сиёсий-ҳуқуқий асосларини ишлаб чиқиш ва такомиллаштириш;
(б) таҳлилий марказлар ва илмий-тадқиқот муассасалари томонидан стратегик режалаштириш ва ривожланишнинг илмий-услубий ва сиёсий-ҳуқуқий асосларини такомиллаштириш соҳасида ўтказиладиган илмий ва таҳлилий тадқиқотларни мувофиқлаштириш;
(в) стратегик режалаштириш ва ривожланишнинг сиёсий-ҳуқуқий асослари соҳасида юқори малакали таҳлилчи-мутахассислар тайёрлаш.
VI. Ташкилий чора-тадбирлар
14. Белгилансинки:
(а) Агентлик вазирлик ва идораларнинг стратегик режалаштириш бўйича таркибий бўлинмалари, шунингдек, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг ахборот-таҳлил гуруҳлари фаолиятини мувофиқлаштиради;
(б) вазирлик ва идораларнинг стратегик режалаштириш бўйича таркибий бўлинмалари, шунингдек, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг ахборот-таҳлил гуруҳлари раҳбарларига тегишли идора раҳбари маслаҳатчиси мақоми берилади, уларни лавозимга тайинлаш ва лавозимидан озод этиш Агентлик билан мажбурий тартибда келишилади;
(в) вазирлик ва идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг бюджетдан ташқари маблағлари ҳисобидан стратегик режалаштириш бўйича таркибий бўлинмалар, шунингдек, ахборот-таҳлил гуруҳлари ходимлари йилига камида бир марта Давлат сиёсати ва бошқаруви академиясида стратегик режалаштириш ва ривожланиш, таҳлил ва натижадорликни бошқариш бўйича махсус ўқув курсларида ўқитилади.
15. Шундай тартиб ўрнатилсинки, унга мувофиқ 2026 йилдан бошлаб «Ўзбекистон — 2030» стратегиясини амалга оширишга оид қабул қилинадиган ҳар йилги давлат дастурига ишлаб чиқиладиган стратегик ислоҳотларни назарда тутувчи норматив-ҳуқуқий ҳужжатлар лойиҳалари рўйхати киритилади. Бунда Агентлик мазкур рўйхатдаги норматив-ҳуқуқий ҳужжатларни ишлаб чиқиш ва келишиш жараёнларини мувофиқлаштириб боради.
16. Агентлик Ўзбекистон Республикаси Президентининг стратегик ривожланиш бўйича маслаҳатчиси бўлинмалари билан биргаликда маҳаллий ва хорижий консультантларни жалб қилган ҳолда икки ой муддатда қуйидагиларни назарда тутувчи Ўзбекистон Республикаси Президентининг ҳужжати лойиҳасини киритсин:
(а) стратегик режалаштиришни ташкил этиш, стратегик режалаштириш ҳужжатларини ишлаб чиқиш, келишиш ва амалга оширилишини мониторинг қилиш тартиби;
(б) режалаштириш, маълумотларни тўплаш, асосий самарадорлик кўрсаткичларини (KPI) мониторинг қилиш, муаммоларни аниқлаш, прогнозли таҳлил ўтказиш ва стратегик режалаштириш ҳужжатларига тузатишлар киритиш имконини берувчи рақамли платформани (dashboard) ишлаб чиқиш;
(в) вазирлик ва идоралар томонидан ягона, комплекс ва тизимли ёндашув асосида стратегик режалаштириш ҳужжатларини ишлаб чиқиш, ҳисоботларни тақдим этиш ва уларнинг амалга оширилишини мониторинг қилиш, шунингдек, ушбу ҳужжатларнинг бажарилишини баҳолаш тизимини жорий этиш бўйича ташкилий чора-тадбирлар дастури;
(г) юклатилаётган қўшимча вазифаларни инобатга олган ҳолда Агентлик ва Жамғарма фаолиятини ташкил этиш тартиби;
(д) давлат бошқарувида стратегик режалаштириш ва ривожланиш соҳасида малакали кадрлар тайёрлаш тизимини йўлга қўйиш.
VII. Фармон ижросини ташкил қилиш, таъминлаш ва назорат
17. Ўзбекистон Республикаси Президентининг айрим ҳужжатларига 5-иловага мувофиқ ўзгартириш ва қўшимчалар киритилсин.
18. Адлия вазирлиги уч ой муддатда манфаатдор вазирлик ва идоралар билан биргаликда қонунчилик ҳужжатларига ушбу Фармондан келиб чиқадиган ўзгартириш ва қўшимчалар тўғрисида таклифлар киритсин.
19. Мазкур Фармоннинг ижросини назорат қилиш Ўзбекистон Республикаси Президентининг стратегик ривожланиш бўйича маслаҳатчиси С.У. Умурзаков зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2025 йил 30 октябрь,
ПФ-201-сон
Ўзбекистон Республикаси Президентининг 2025 йил 30 октябрдаги ПФ-201-сон Фармонига
1-ИЛОВА
Стратегик режалаштириш ва ривожланиш тизимини жорий этишга қаратилган биринчи навбатдаги чора-тадбирларни амалга ошириш бўйича
«ЙЎЛ ХАРИТАСИ»

Т/р

Чора-тадбир номи

Амалга ошириш механизми

Ижро муддати

Масъуллар

1.

Мамлакатда стратегик режалаштириш ва ривожланиш тизимини мувофиқлаштириш ҳамда ушбу тизимнинг самарадор механизмларини таъминлашга қаратилган ҳуқуқий асосларини яратиш.

Стратегик режалаштириш ва ривожланиш тизими жорий этилгани муносабати билан биринчи навбатдаги вазифаларни амалга ошириш чоралари бўйича қуйидагиларни назарда тутувчи Ўзбекистон Республикаси Президентининг қарори лойиҳасини киритиш:

стратегик режалаштириш тизимини ташкил этиш тартиби, стратегик режалаштириш ҳужжатларини ишлаб чиқиш, келишиш ва амалга оширилишини назорат қилиш;

режалаштириш жараёнини автоматлаштириш, маълумотларни тўплаш, асосий самарадорлик кўрсаткичларига (KPI) эришишни кузатиш, муаммоларни аниқлаш, прогнозли таҳлил ва стратегик режалаштириш ҳужжатларига тузатишлар киритиш имконини берувчи рақамли платформани (dashboard) ишлаб чиқиш;

вазирлик ва идоралар томонидан стратегик режалаштириш ҳужжатларини ягона, комплекс ва тизимли ёндашув асосида ишлаб чиқиш, ҳисоботларни тақдим этиш ва уларнинг амалга оширилишини мониторинг қилиш, шунингдек, стратегик режалаштириш ҳужжатининг бажарилишини баҳолаш тизимини жорий этиш бўйича чора-тадбирлар дастури;

Агентликка юклатилган қўшимча вазифаларни инобатга олган ҳолда ва унинг фаолиятини самарали ташкил этишга қаратилган Агентликнинг ва уни қўллаб-қувватлаш жамғармаси фаолиятининг ҳуқуқий асослари, тузилмаси ва лавозимлар рўйхати;

давлат бошқарувида стратегик режалаштириш ва ривожланиш соҳасида малакали кадрларни тайёрлаш тизимини йўлга қўйиш.

2025 йил ноябрь

Стратегик ривожланиш ва ислоҳотлар агентлиги

2.

Вазирлик ва идораларнинг стратегик режалаштириш бўйича таркибий бўлинмалари ходимлари фаолиятини мувофиқлаштириш тизимини яратиш.

Стратегик режалаштириш тизимини жорий этиш бўйича қуйидаги чораларни амалга ошириш:

вазирлик ва идораларнинг стратегик режалаштириш бўйича таркибий бўлинмаларининг ходимлари бўйича маълумотлар, шу жумладан ходимлар сони, соҳавий ҳисобдорлиги, малакаси, иш ҳақи миқдори ва вакант жойлар тўғрисидаги маълумотлар базасини шакллантириш;

2025 йил декабрь

Стратегик ривожланиш ва ислоҳотлар агентлиги,

Давлат сиёсати ва бошқаруви академияси,

вазирлик ва идоралар,

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари

вазирлик ва идораларнинг стратегик режалаштириш бўйича таркибий бўлинмалари ҳамда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг Ахборот-таҳлил гуруҳлари раҳбарларини лавозимга тайинлаш ва озод қилиш масалаларини мажбурий тартибда Стратегик ривожланиш ва ислоҳотлар агентлиги билан келишиш тартибини белгилаш;

2025 йил декабрь

вазирлик ва идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг бюджетдан ташқари маблағлари ҳисобидан стратегик режалаштириш бўйича таркибий бўлинмалар, ахборот-таҳлил гуруҳлари ходимларининг йилига камида бир марта Давлат сиёсати ва бошқаруви академиясида стратегик режалаштириш ва ривожланиш, таҳлил ҳамда натижадорликни бошқариш бўйича махсус ўқув курсларида таълим олишларини ташкил этиб бориш.

Доимий

3.

Стратегик режалаштириш ва ривожланиш соҳасида кадрларнинг малакаси ва касбий компетенциясини ошириб бориш чораларини кўриш.

Стратегик режалаштириш ва ривожланиш соҳасидаги мутахассисларнинг компетенцияларини оширишга қаратилган комплекс чора-тадбирлар режасини тасдиқлаш. Бунда қуйидагиларни назарда тутиш:

вазирлик ва идоралар, маҳаллий ҳокимликлар ходимларини ўқитиш;

стратегик режалаштириш бўйича масофавий ўқитиш тизимини жорий этиш;

стратегик режалаштириш соҳасида кадрлар тайёрлаш, малакасини ошириш ва сертификатлаш тизимини жорий этиш.

2026 йил март

Давлат сиёсати ва бошқаруви академияси,

Стратегик ривожланиш ва ислоҳотлар агентлиги,

Бошқарув самарадорлиги агентлиги,

Олий таълим, фан ва инновациялар вазирлиги

4.

Стратегик режалаштириш ва ривожланиш соҳасида педагог кадрларнинг профессионал корпусини яратиш.

1. Стратегик режалаштириш ва ривожланишга ихтисослашган илғор хорижий мамлакатларнинг илмий-тадқиқот муассасалари билан ҳамкорликни йўлга қўйиш.

2. Стратегик режалаштириш бўйича ўқув дастурларни шакллантириш учун малакали профессор-ўқитувчиларни ва мутахассисларни жалб этиш.

3. Хорижий экспертларни жалб этган ҳолда стратегик режалаштириш ва ривожланиш соҳасидаги юқори малакали педагогларни тайёрлаш.

2026 йил ноябрь

Давлат сиёсати ва бошқаруви академияси

5.

Стратегик ислоҳотларни назарда тутувчи норматив-ҳуқуқий ҳужжатлар лойиҳаларини келишиш жараёнларини рақамлаштириш.

Норматив-ҳуқуқий ҳужжатлар лойиҳасини ишлаб чиқиш ва келишишнинг ягона электрон тизимида стратегик ислоҳотларни назарда тутувчи масалалар акс этган қонунчилик ҳужжатлари лойиҳаларини Стратегик ривожланиш ва ислоҳотлар агентлиги билан мажбурий келишишни таъминлаш имкониятини яратиш.

2026 йил февраль

Адлия вазирлиги

6.

Стратегик режалаштириш ва ривожланиш тизимини жорий қилиш билан боғлиқ вазифаларнинг самарали бажарилишини таъминлаш мақсадида Стратегик ривожланиш ва ислоҳотлар агентлигининг моддий-техник базасини мустаҳкамлаш.

Агентликнинг янги юклатилган вазифаларини самарали бажарилишини таъминлаш учун моддий-техника жиҳозларига бўлган эҳтиёжини аниқлаш ва зарур компьютер техникаси, сервер қурилмалари, канцелярия воситалари, бошқа оргтехника жиҳозлари ҳамда автотранспорт воситаларини бюджет ва бюджетдан ташқари маблағлар ҳисобидан харид қилиш (ажратиш).

2025 йил декабрь

Стратегик ривожланиш ва ислоҳотлар агентлиги,

Иқтисодиёт ва молия вазирлиги

Ўзбекистон Республикаси Президентининг 2025 йил 30 октябрдаги ПФ-201-сон Фармонига
2-ИЛОВА
Ўзбекистон Республикаси Президенти ҳузуридаги Стратегик режалаштириш ва ривожланиш бўйича мувофиқлаштирувчи кенгаш томонидан фаолияти ташкиллаштириладиган таҳлилий марказлар ва илмий-тадқиқот муассасалари
рўйхати

1.

Ўзбекистон Республикаси Президенти ҳузуридаги Стратегик ва минтақалараро тадқиқотлар институти

2.

Ўзбекистон Республикаси Президенти ҳузуридаги Қонунчилик ва ҳуқуқий сиёсат институти

3.

Ўзбекистон Республикаси Президенти Администрацияси ҳузуридаги Иқтисодий тадқиқотлар ва ислоҳотлар маркази

4.

Олий Мажлис Қонунчилик палатаси ҳузуридаги Парламент тадқиқотлари институти

5.

Ўзбекистон Республикаси Вазирлар Маҳкамаси ҳузуридаги Макроиқтисодий ва ҳудудий тадқиқотлар институти

6.

Ўзбекистон халқаро исломшунослик академияси

7.

Марказий Осиё халқаро институти

8.

Ўзбекистон Республикаси Ташқи ишлар вазирлиги ҳузуридаги Халқаро муносабатлар ахборот-таҳлилий маркази

9.

Оила ва гендер илмий-тадқиқот институти

10.

Ўзбекистон Республикаси Криминология тадқиқот институти

Ўзбекистон Республикаси Президентининг 2025 йил 30 октябрдаги ПФ-201-сон Фармонига
3-ИЛОВА
Ўзбекистон Республикаси Президенти ҳузуридаги Стратегик ривожланиш ва ислоҳотлар агентлигига юклатиладиган қўшимча вазифалар
рўйхати
1. Тармоқлар ва ҳудудлар ривожланишининг жорий ҳолати, Ўзбекистон Республикасининг бошқа мамлакатлар ҳамда халқаро ташкилотлар ва институтлар билан ҳамкорлиги самарадорлиги тўғрисида ахборот тўплаш ва тизимли таҳлил қилиш, шунингдек, мамлакатнинг комплекс ва проактив ривожланишини таъминлашга қаратилган таклиф ва ташаббусларни ишлаб чиқиш.
2. Стратегик режалаштириш ҳужжатлари лойиҳаларини ишлаб чиқишда вазирликлар ва идораларни услубий қўллаб-қувватлаш, стратегик режалаштириш тизими бўйича тавсиялар ва услубий кўрсатмалар тайёрлаш.
3. Илғор халқаро тажриба ва давлат сиёсатининг устувор йўналишларини ҳисобга олган ҳолда стратегик режалаштириш ва ривожланиш тизимини такомиллаштириш бўйича таклифлар ишлаб чиқиш.
4. Вазирлик ва идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг стратегик режалаштириш ва ривожланиш ҳужжатларини қонунчилик ҳужжатлари талаблари ва иерархияга мувофиқ ишлаб чиқиш, амалга ошириш ва ижросини мониторинг қилиш соҳасидаги фаолиятини мувофиқлаштириш.
5. Стратегик режалаштириш ҳужжатларини амалга ошириш бўйича тақдим этилган ҳисоботларни текшириш йўли билан хулосалар бериш ва уларнинг бажарилишини назорат қилиш.
6. Стратегик режалаштириш ҳужжатларининг мақсадларига эришилишини мониторинг қилиш.
Ўзбекистон Республикаси Президентининг 2025 йил 30 октябрдаги ПФ-201-сон Фармонига
4-ИЛОВА
Стратегик ислоҳотларни назарда тутувчи норматив-ҳуқуқий ҳужжатлар лойиҳаларини фарқлаш
мезонлари

Т/р

Мезон

Стратегик ислоҳотларни назарда тутувчи норматив-ҳуқуқий ҳужжатлар

1.

Тушунчаси

Амалдаги тизим, соҳа ёки тармоқдаги моделни тубдан ўзгартириш, яъни институционал, таркибий, ҳуқуқий ва функционал янгиланиш орқали бошқарувнинг, бозор механизмларининг ёки ижтимоий хизматларнинг сифат жиҳатдан янги моделини шакллантиришни назарда тутувчи, кенг қамровли ва барқарор ривожланишга йўналтирилган ҳужжатлар

2.

Мазмуни

Тубдан ўзгартириш, яъни институционал (тузилма ўзгариши), таркибий (янги органлар яратиш), ҳуқуқий ва функционал (янги моделларни жорий этиш) ўзгаришлар орқали сифат жиҳатдан янги тизим яратиш

3.

Мақсади

Умуммиллий стратегик мақсадларга эришишни таъминлайдиган туб ўзгаришларни амалга ошириш

4.

Қамрови

Тармоқ ёки соҳавий

5.

Ҳужжат тури

Қонун ҳамда Ўзбекистон Республикаси Президентининг фармонлари ва қарорлари лойиҳалари

Изоҳ: Ўзбекистон Республикаси Президенти ҳузуридаги Стратегик режалаштириш ва ривожланиш бўйича мувофиқлаштирувчи кенгашга стратегик ислоҳотларни назарда тутувчи норматив-ҳуқуқий ҳужжатлар лойиҳаларини фарқлаш мезонларига ўзгартириш ва қўшимчалар киритиш ҳуқуқи берилади.
Ўзбекистон Республикаси Президентининг 2025 йил 30 октябрдаги ПФ-201-сон Фармонига
5-ИЛОВА
Ўзбекистон Республикаси Президентининг айрим ҳужжатларига киритилаётган ўзгартириш ва қўшимчалар
1. Ўзбекистон Республикаси Президентининг 2021 йил 19 июлдаги «Ўзбекистон Республикаси Стратегик ривожланиш агентлигини ташкил этиш чора-тадбирлари тўғрисида»ги ПФ-6264-сон Фармонида:
(а) 1-бандда «Стратегик ривожланиш агентлиги» сўзлари «Президенти ҳузуридаги Стратегик ривожланиш ва ислоҳотлар агентлиги» сўзлари билан алмаштирилсин;
(б) 2 — 4-бандлар ўз кучини йўқотган деб ҳисоблансин;
(в) 5-банднинг биринчи хатбошисида «Стратегик ривожланиш агентлигини» сўзлари «Президенти ҳузуридаги Стратегик ривожланиш ва ислоҳотлар агентлигини» сўзлари билан алмаштирилсин;
(г) 7 ва 9-бандлар ўз кучини йўқотган деб ҳисоблансин;
(i) иккинчи — бешинчи хатбошилар чиқариб ташлансин;
(ii) олтинчи-еттинчи хатбошилар тегишинча иккинчи-учинчи хатбошилар деб ҳисоблансин;
(iii) учинчи хатбошидаги «бош» сўзи чиқариб ташлансин;
(е) 1 — 3-иловалар ўз кучини йўқотган деб ҳисоблансин.
2. Ўзбекистон Республикаси Президентининг 2022 йил 8 сентябрдаги «Стратегик ислоҳотларни жадаллаштиришнинг қўшимча чора-тадбирлари тўғрисида»ги ПФ-216-сон Фармонида:
(а) 1-банддаги «Стратегик ислоҳотлар агентлиги» сўзлари «Стратегик ривожланиш ва ислоҳотлар агентлиги» сўзлари билан алмаштирилсин;
(б) 2-банд қуйидаги таҳрирда баён этилсин:
«2. Қуйидагилар Агентликнинг асосий вазифалари этиб белгилансин:
мамлакатда стратегик режалаштириш тизимини мувофиқлаштириш, стратегик режалаштириш ҳужжатлари лойиҳалари ишлаб чиқилишини ва уларнинг амалга оширилишини тартибга солиш;
ижтимоий соҳа, иқтисодиёт ва бошқа аҳамиятга эга бўлган йўналишларда яқин ва узоқ хориж мамлакатларида амалга оширилаётган ислоҳотлар, таркибий ўзгаришлар ва илгари сурилаётган ташаббусларни (шу жумладан, хорижий давлатлар раҳбарларининг чиқишлари ва нутқларини) ўрганишни ташкил қилиш, мамлакатимиздаги ишларнинг жорий ҳолатини таҳлил қилган ҳолда уларни Ўзбекистон шароитида имплементация қилиш бўйича таклифларни ишлаб чиқиш, мазкур масалалар бўйича форумлар ва бошқа тадбирларни ўтказиб бориш;
маҳаллий ва хорижий экспертларни жалб этган ҳолда алоҳида соҳа ва тармоқларни ислоҳ қилиш бўйича таклифлар ишлаб чиқиш, уларнинг амалга оширилишини ташкил этиш;
ҳудудларда очиқ мулоқотлар доирасида аҳолининг, шунингдек, тадбиркорлик субъектларининг билдирган фикр ва мулоҳазалари асосида ижтимоий-иқтисодий ривожлантириш, фойдаланилмаётган имкониятларни ишга солиш ҳамда фуқароларни қийнаётган муаммоларни ҳал этиш чоралари юзасидан таклиф ва ташаббусларни ишлаб чиқиш;
давлат органлари ва ташкилотлари томонидан таркибий ислоҳотларни амалга ошириш учун малакали хорижий консультант ва экспертларни, шу жумладан, халқаро молия институтлари ва хорижий ҳукумат молия ташкилотларини ҳамда консалтинг компанияларини жалб этиш жараёнини мувофиқлаштириш»;
(в) 3, 5 — 8-бандлар ўз кучини йўқотган деб ҳисоблансин;
(i) иккинчи хатбоши қуйидаги таҳрирда баён этилсин:
«Агентлик директори мақоми, моддий таъминоти, тиббий ва транспорт хизмати кўрсатиш шарт-шароитларига кўра Ўзбекистон Республикаси Президентининг маслаҳатчиси ўринбосарига тенглаштирилади»;
(ii) учинчи хатбошидаги «Президентининг ёрдамчиси» сўзлари «Президенти Администрацияси раҳбари» сўзлари билан алмаштирилсин;
(iii) тўртинчи хатбошидаги «Департамент раҳбари» сўзлари «Ўзбекистон Республикаси Президентининг стратегик ривожланиш бўйича маслаҳатчиси» сўзлари билан алмаштирилсин;
(iv) бешинчи хатбошида «Департамент» сўзи «Ўзбекистон Республикаси Президенти Администрацияси» сўзлари билан алмаштирилсин;
(д) 1-илова ўз кучини йўқотган деб ҳисоблансин.
3. Ўзбекистон Республикаси Президентининг 2023 йил 8 ноябрдаги «Ўзбекистон Республикаси Президенти ҳузуридаги Стратегик ислоҳотлар агентлиги фаолиятини янада такомиллаштириш чора-тадбирлари тўғрисида»ги ПФ-190-сон Фармонида:
(а) 1 — 3 бандлар ўз кучини йўқотган деб ҳисоблансин;
(б) 4-банд қуйидаги таҳрирда баён этилсин:
«4. Шундай тартиб ўрнатилсинки, унга мувофиқ:
а) республика ижро этувчи ҳокимият органлари ҳар ойда жалб қилинган хорижий экспертлар, консультантлар ва маслаҳатчилар томонидан бажарилган ишлар тўғрисида батафсил маълумотни Стратегик ривожланиш ва ислоҳотлар агентлигига тақдим қилиб боради;
б) Стратегик ривожланиш ва ислоҳотлар агентлиги жалб қилинган хорижий экспертлар, консультантлар ва маслаҳатчилар билан жорий масалаларни муҳокама қилиш ва ҳал қилишнинг мақбул йўлларини аниқлаш учун мунтазам равишда учрашувлар ташкил қилади ва тегишли таклифлар тайёрлайди;
в) истиқболли ташаббусларни ишлаб чиқиш мақсадида:
республика ижро этувчи ҳокимият органлари жалб қилинган халқаро ташкилотлар ва молия институтлари, консалтинг компаниялари, етакчи хорижий илмий-тадқиқот ва эксперт муассасалари ҳамда мутахассисларнинг улар фаолияти масалаларига оид расмий хулоса ва ҳисоботларини Стратегик ривожланиш ва ислоҳотлар агентлигига тақдим этиб боради;
республика ижро этувчи ҳокимият органлари ижтимоий соҳа, иқтисодиёт ва бошқа аҳамиятга эга бўлган йўналишларни ислоҳ қилиш бўйича ташкил қилинаётган халқаро конференциялар, давра суҳбатлари ва семинарларнинг дастурларини Стратегик ривожланиш ва ислоҳотлар агентлигига тақдим қилиб боради;
республиканинг хориждаги дипломатик ваколатхоналари ҳар ойда тегишли давлатларнинг илғор тажрибаси ва амалиёти тўғрисидаги батафсил маълумотни Стратегик ривожланиш ва ислоҳотлар агентлигига тақдим этиб боради»;
(в) 1-илова ўз кучини йўқотган деб ҳисоблансин.
4. Ўзбекистон Республикаси Президентининг 2024 йил 31 декабрдаги «Мамлакатнинг ижтимоий, сиёсий ва иқтисодий ривожланиш соҳаларидаги стратегик таҳлил ва тадқиқот қилиш фаолиятини самарали ташкил этиш чора-тадбирлари тўғрисида»ги ПФ-467-сон Фармонида:
(а) 1-бандда «Таҳлилий ва тадқиқот тузилмалар фаолиятини ташкил қилиш бўйича» сўзлари «Ўзбекистон Республикаси Президенти ҳузуридаги Стратегик режалаштириш ва ривожланиш бўйича» сўзлари билан алмаштирилсин;
(i) қуйидаги мазмундаги учинчи — олтинчи хатбошилар билан тўлдирилсин:
«ижтимоий-иқтисодий, ижтимоий-сиёсий, технологик, инсонпарварлик, экологик ва бошқа соҳалардаги долзарб муаммолар ҳамда чақириқларни таҳлил қилиш, уларни ҳал этиш бўйича таклифлар ишлаб чиқиш, шунингдек, мамлакатни стратегик ривожлантириш бўйича ғоя ва ташаббуслар яратиш;
«Ўзбекистон — 2030» стратегияси, концепциялар, стратегиялар ва дастурлар («йўл хариталари», чора-тадбирлар режалари) билан мувофиқлигини таъминлаш нуқтаи назаридан стратегик ташаббусларни ишлаб чиқиш ва экспертизадан ўтказишни мувофиқлаштириш;
концепциялар, стратегиялар ва дастурларнинг («йўл хариталари», чора-тадбирлар режалари) «Ўзбекистон — 2030» стратегияси мақсадлари билан тўлиқ боғлиқлиги ва уйғунлигини таъминлаш, шунингдек, уларнинг амалга оширилиши самарадорлигини мониторинг қилиш ва баҳолаш;
жамият ва давлат ҳаётининг турли соҳалари кесимида мамлакат ривожланишини узоқ муддатли режалаштириш бўйича фаолиятни ташкил этиш»;
(ii) учинчи — ўнинчи хатбошилар тегишинча еттинчи — ўн тўртинчи хатбошилар деб ҳисоблансин;
(в) 3-банд қуйидаги таҳрирда баён этилсин:
«3. Белгилансинки:
Мувофиқлаштирувчи кенгаш вазирлик ва идоралар, маҳаллий ижро этувчи ҳокимият органлари, шунингдек, давлат таҳлилий марказлари ва илмий-тадқиқот муассасаларининг стратегик режалаштириш ва ривожлантириш соҳасидаги фаолиятини мувофиқлаштириш учун масъул бўлган идоралараро-коллегиал орган ҳисобланади;
Мувофиқлаштирувчи кенгаш фаолиятини тўғри йўлга қўйиш, умумий мувофиқлаштириш ҳамда идоралараро ҳамкорликни таъминлаш Ўзбекистон Республикаси Президентининг стратегик ривожланиш бўйича маслаҳатчиси томонидан амалга оширилади;
Мувофиқлаштирувчи кенгаш биринчи ва иккинчи даражали стратегик режалаштириш ҳужжатлари лойиҳаларини уларни қабул қилишнинг мақсадга мувофиқлиги нуқтаи назаридан кўриб чиқади;
Мувофиқлаштирувчи кенгаш томонидан асосий вазирлик ва идоралар таҳлилий бўлинмаларининг (департамент, бошқармалар) фаолияти мувофиқлаштирилади;
республикани ривожлантириш бўйича стратегик ташаббуслар лойиҳаларини ишлаб чиқишга жалб қилинган асосий вазирлик ва идоралар раҳбарларининг биринчи ўринбосарлари тадқиқот марказларини ахборот-таҳлилий материаллар билан таъминлаш ҳамда Мувофиқлаштирувчи кенгаш билан ҳамкорлик қилишга масъул бўлади;
Мувофиқлаштирувчи кенгашнинг йиғилишлари ҳар чоракда оралиқ мажлислар шаклида ташкил этилади»;
(г) 1-илованинг матни қуйидаги таҳрирда баён этилсин:
«Ўзбекистон Республикаси Президенти ҳузуридаги Стратегик режалаштириш ва ривожланиш бўйича мувофиқлаштирувчи кенгаш
таркиби

1.

С.У. Умурзаков

—

Ўзбекистон Республикаси Президентининг стратегик ривожланиш бўйича маслаҳатчиси, Кенгаш раиси

2.

Э.Т. Арипов

—

Ўзбекистон Республикаси Президенти ҳузуридаги Хавфсизлик кенгаши котибининг биринчи ўринбосари — Стратегик ва минтақалараро тадқиқотлар институти директори, Кенгаш раиси ўринбосари

3.

М.М. Камилов

—

Ўзбекистон Республикаси Президенти маслаҳатчиси ўринбосари — Ўзбекистон халқаро исломшунослик академияси ректори

4.

Ж.А. Ваҳобов

—

Ўзбекистон Республикаси Президенти маслаҳатчисининг ўринбосари — Марказий Осиё халқаро институти директори

5.

М.Х. Рахманкулов

—

Қонунчилик ва ҳуқуқий сиёсат институти директори

6.

Лавозими бўйича

—

Иқтисодий тадқиқотлар ва ислоҳотлар маркази директори

7.

Б.Б. Рахматов

—

Стратегик ривожланиш ва ислоҳотлар агентлиги директори

8.

К.К. Мардонов

—

Ўзбекистон Республикаси Президенти Администрацияси департаменти бошлиғининг биринчи ўринбосари

9.

Р.Р. Мирзаев

—

Ўзбекистон Республикаси Президенти Администрацияси департаменти бошлиғининг ўринбосари

10.

М.Р. Абдуллаев

—

Ҳисоб палатаси раисининг биринчи ўринбосари

11.

Ш.А. Аюпов

—

Фанлар академияси президенти

12.

Б.О. Саидов

—

ташқи ишлар вазири

13.

Л.Ш. Кудратов

—

инвестициялар, саноат ва савдо вазири

14.

А.А. Абдухакимов

—

экология, атроф-муҳитни муҳофаза қилиш ва иқлим ўзгариши вазири

15.

И.Ю. Абдураҳмонов

—

қишлоқ хўжалиги вазири

16.

Ш.Р. Хамраев

—

сув хўжалиги вазири

17.

Ж.Т. Мирзамаҳмудов

—

энергетика вазири

18.

И.Р. Махкамов

—

транспорт вазири

19.

К.А. Шарипов

—

олий таълим, фан ва инновациялар вазири

20.

Ш.А. Вафаев

—

Тикланиш ва тараққиёт жамғармаси ижрочи директори

21.

Н.Н. Сайдуллаев

—

Марказий банк раисининг биринчи ўринбосари

22.

У.К. Абидхаджаев

—

иқтисодиёт ва молия вазири ўринбосари — Макроиқтисодий ва ҳудудий тадқиқотлар институти директори

23.

С.А. Валиев

—

Халқаро муносабатлар ахборот-таҳлилий маркази директори

24.

С.С. Сафоев

—

Жаҳон иқтисодиёти ва дипломатия университети ректори

25.

Б.С. Мирзаев

—

«Тошкент ирригация ва қишлоқ хўжалигини механизациялаш муҳандислари институти» миллий тадқиқот университети ректори

26.

Ш.А. Нуруллоев

—

Марказий Осиё атроф-муҳит ва иқлим ўзгаришини ўрганиш университети (Green University) ректори

27.

Э.С. Туляков

—

«Тараққиёт стратегияси» маркази ижрочи директори

28.

Б.М. Бекмуродов

—

«Юксалиш» умуммиллий ҳаракати раиси

29.

Ф.Ф. Каимбаев

—

Ўзбекистон Республикаси Президенти Администрацияси шўъба мудири, Кенгаш котиби

Изоҳ:
1. Кенгаш аъзолари бошқа ишга ўтган тақдирда, унинг таркибига ушбу лавозимга янги тайинланган ёки тегишли функцияларни бажариш зиммасига юкланган шахслар киритилади.
2. Кенгаш раисига зарур ҳолларда Кенгаш ишига вазирлик, идоралар ва таҳлилий муассасаларни жалб этиш ваколати берилади»;
(д) 6-илованинг матни қуйидаги таҳрирда баён этилсин:
«Ҳудудларни стратегик режалаштириш ва ривожлантириш бўйича таҳлилий ва тадқиқот тузилмалари фаолиятини ташкил қилиш бўйича ишчи гуруҳи
таркиби

1.

У.К. Абидхаджаев

—

Макроиқтисодий ва ҳудудий тадқиқотлар институти директори, Ишчи гуруҳ раҳбари

2.

И.И. Норқулов

—

иқтисодиёт ва молия вазирининг биринчи ўринбосари

3.

Лавозими бўйича

—

инвестициялар, саноат ва савдо вазирининг биринчи ўринбосари

4.

М.А. Омаров

—

транспорт вазирининг биринчи ўринбосари

5.

Б.Р. Маматкаримов

—

энергетика вазирининг биринчи ўринбосари

6.

Ф.Р.Хамидова

—

тоғ-кон саноати ва геология вазирининг биринчи ўринбосари

7.

О.А. Пекось

—

рақамли технологиялар вазирининг биринчи ўринбосари

8.

А.М. Қосимов

—

қишлоқ хўжалиги вазири ўринбосари

9.

Лавозими бўйича

—

сув хўжалиги вазирининг биринчи ўринбосари

10.

М.Ш. Истамов

—

адлия вазири ўринбосари

11.

Н.Д. Хусанов

—

Давлат активларини бошқариш агентлиги директорининг биринчи ўринбосари

12.

Ф.Ж. Пулатов

—

Кадастр агентлиги директори

13.

А.Х. Суванкулов

—

«Ўзсувтаъминот» АЖ раиси в.б.

14.

Д.А. Вахобов

—

Савдо-саноат палатаси раиси

15.

Лавозими бўйича

—

Қорақалпоғистон Республикаси Вазирлар Кенгаши Раисининг ҳамда вилоятлар ва Тошкент шаҳри ҳокимларининг биринчи ўринбосарлари

Изоҳ:
1. Ишчи гуруҳ аъзолари бошқа ишга ўтган тақдирда, унинг таркибига ушбу лавозимга янги тайинланган ёки тегишли функцияларни бажариш зиммасига юкланган шахслар киритилади.
2. Ишчи гуруҳ раҳбарига зарур ҳолларда Ишчи гуруҳ фаолиятига вазирлик, идоралар ва таҳлилий муассасаларни жалб этиш ваколати берилади».
5. Ўзбекистон Республикаси Президентининг 2025 йил 5 майдаги «Истиқболли кадрларни мақсадли тайёрлаш ҳамда уларни давлат бошқаруви ва хизматига самарали жалб этиш тизимини янада такомиллаштириш чора-тадбирлари тўғрисида»ги ПФ-78-сон Фармонининг 21-банди ва 22-бандининг «а»кичик бандидаги «Таҳлилий ва тадқиқот тузилмалари фаолиятини ташкил қилиш бўйича» сўзлари «Ўзбекистон Республикаси Президенти ҳузуридаги Стратегик режалаштириш ва ривожланиш бўйича» сўзлари билан алмаштирилсин.
6. Ўзбекистон Республикаси Президентининг 2025 йил 10 февралдаги «Таҳлилий ва тадқиқотчилик фаолиятини ташкил қилиш бўйича қўшимча чора-тадбирлар тўғрисида»ги ПҚ-48-сон қарорининг 1-бандидаги «Таҳлилий ва тадқиқот тузилмалари фаолиятини ташкил қилиш бўйича» сўзлари «Ўзбекистон Республикаси Президенти ҳузуридаги Стратегик режалаштириш ва ривожланиш бўйича» сўзлари билан алмаштирилсин.
(Қонунчилик маълумотлари миллий базаси, 01.11.2025 й., 06/25/201/1000-сон)