570-сон 08.09.2025. Sogʻliqni saqlash tizimini raqamlashtirish jarayonlarini yanada jadallashtirish boʻyicha qoʻshimcha chora-tadbirlar toʻgʻrisida

Oʻzbekiston Respublikasi Vazirlar Mahkamasining

qarori

Sogʻliqni saqlash tizimini raqamlashtirish jarayonlarini yanada jadallashtirish boʻyicha qoʻshimcha chora-tadbirlar toʻgʻrisida

Oʻzbekiston Respublikasi Prezidentining “Sogʻliqni saqlash tizimini raqamlashtirishni jadallashtirish hamda ilgʻor raqamli texnologiyalarni joriy etish boʻyicha qoʻshimcha chora-tadbirlar toʻgʻrisida” 2023-yil 28-dekabrdagi PQ-415-son qaroriga muvofiq sogʻliqni saqlash tizimini raqamlashtirish, tibbiy yordam samaradorligini oshirish, bemorlarning xavfsizligini taʼminlash, dori vositalari aylanmasini boshqarishning samarali tizimini yaratish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Prezidentining 2023-yil 28-dekabrdagi PQ-415-son qaroriga muvofiq Raqamli sogʻliqni saqlash platformasi ishlab chiqilishi, “Elektron retsept” tizimiga davlat va xususiy dorixonalarda “Elektron retsept” tizimini joriy etish belgilangani;

“Elektron sogʻliqni saqlash” axborot tizimlarining yagona kompleksini joriy etish doirasida “Elektron sogʻliqni saqlash” axborot tizimi va “Elektron poliklinika”, “Elektron shifoxona”, “Elektron tibbiy karta”, “Elektron retsept” modullari yaratilgani maʼlumot uchun qabul qilinsin.

2. Sogʻliqni saqlash vazirligi va Raqamli texnologiyalar vazirligining 2025-yil 10-dekabrdan boshlab Toshkent shahri hamda Oʻzbekiston Respublikasi Prezidentining “Respublikada sogʻliqni saqlash tizimini va aholiga tibbiy xizmat koʻrsatish tamoyillarini takomillashtirish orqali sohani isloh qilishni izchil davom ettirish chora-tadbirlari toʻgʻrisida” 2025-yil 19-maydagi PF-88-son Farmoniga muvofiq tajriba-sinov loyihasi amalga oshiriladigan 15 ta tuman (shahar)larda, 2026-yilning yakuniga qadar esa respublikaning barcha hududlarida quyidagilarni amalga oshirish toʻgʻrisidagi takliflariga rozilik berilsin:

barcha tibbiyot va farmatsevtika tashkilotlari Raqamli sogʻliqni saqlash platformasiga, ushbu platforma amaliyotga joriy etilgunga qadar Sogʻliqni saqlash vazirligining “Elektron sogʻliqni saqlash” axborot tizimiga integratsiya asosida ulanishini hamda “Elektron poliklinika”, “Elektron shifoxona”, “Elektron tibbiy karta”, “Elektron retsept” modullari bilan belgilangan maʼlumotlar real vaqt rejimida almashilishini litsenziya talablari va shartlaridan biri sifatida belgilash;

retsept bilan beriladigan dori vositalarini tayinlash va chakana realizatsiya qilishda zarur maʼlumotlarni integratsiya asosida majburiy tarzda “Elektron retsept” moduliga uzatish tartibini joriy etish.

3. Quyidagilarni nazarda tutuvchi Tibbiyot tashkilotlarida retsept bilan beriladigan dori vositalarini elektron retsept asosida tayinlash tartibi toʻgʻrisidagi nizom 1-ilovaga muvofiq tasdiqlansin:

retsept bilan beriladigan dori vositalarini bemorga elektron retsept asosida tayinlash;

elektron retsept orqali tayinlangan dori vositalarini rasmiylashtirish;

elektron retsept shakli va undagi maʼlumotlarni “Elektron retsept” moduliga uzatish tartibi;

tibbiyot tashkilotlarida retsept bilan beriladigan dori vositalarini elektron retsept asosida tayinlash tartibini buzganlik uchun javobgarlik.

4. Belgilansinki, 2025-yil 10-dekabrdan boshlab:

Toshkent shahri hamda Oʻzbekiston Respublikasi Prezidentining “Respublikada sogʻliqni saqlash tizimini va aholiga tibbiy xizmat koʻrsatish tamoyillarini takomillashtirish orqali sohani isloh qilishni izchil davom ettirish chora-tadbirlari toʻgʻrisida” 2025-yil 19-maydagi PF-88-son Farmoniga muvofiq tajriba-sinov loyihasi amalga oshiriladigan 15 ta tuman (shahar)lardagi barcha tibbiyot tashkilotlarida dori vositalarini bemorlarga tayinlashda dori vositalarining xalqaro patentlanmagan nomi boʻyicha (agar mavjud boʻlsa) elektron retsept rasmiylashtiriladi (alohida toifadagi kuchli taʼsir qiluvchi moddalar, tarkibida giyohvandlik vositalari va psixotrop moddalar saqlovchi dori vositalari hamda reimbursatsiya dasturi bilan bogʻliq jarayonlar bundan mustasno);

bemorlarga tayinlangan dori vositalari toʻgʻrisidagi maʼlumot (xalqaro patentlanmagan yoki original dori nomi, kunlik dozasi, qabul qilish yoki yuborish usuli, miqdori, davomiyligi) elektron retseptga bevosita shifokor tomonidan kiritiladi hamda elektron tasdiqlash usullari orqali tasdiqlanadi;

tibbiyot tashkilotlari va dorixonalarning mavjud axborot tizimlarini Sogʻliqni saqlash vazirligining Raqamli sogʻliqni saqlash platformasiga va axborot tizimiga ulash yoki ularning soʻroviga asosan ularda vazirlikning “Elektron sogʻliqni saqlash” axborot tizimi modullari bepul oʻrnatiladi;

tibbiyot va farmatsevtika tashkilotlari Sogʻliqni saqlash vazirligining “Elektron sogʻliqni saqlash” axborot tizimiga ulanish uchun zarur moddiy-texnik bazaga, barqaror Internet va elektr tarmogʻiga ega boʻlishlari shart.

5. Sogʻliqni saqlash vazirligi:

a) ikki oy muddatda:

dori vositalarini retsept bilan va retseptsiz beriladigan dori vositalari toifasiga kiritish mezonlarini qayta koʻrib chiqib, Jahon sogʻliqni saqlash tashkiloti roʻyxatiga kiritilgan tartibga soluvchi organlar (WNO Listed Authorities) va Jahon sogʻliqni saqlash tashkilotining Global taqqoslash vositasi (Global Benchmarking Tool) boʻyicha 4-darajali yetuklikka ega boʻlgan tartibga soluvchi organlar tajribasi asosida tasdiqlasin;

Davlat axborot tizimlarini yaratish va qoʻllab-quvvatlash boʻyicha yagona integrator — “UZINFOCOM” MCHJ bilan birgalikda “Elektron sogʻliqni saqlash” axborot tizimining boshqa axborot tizimlari bilan maʼlumotlar almashinuvini tartibga soluvchi texnologik yoʻriqnomani ishlab chiqsin hamda belgilangan tartibda tasdiqlasin;

“Elektron sogʻliqni saqlash” axborot tizimida yaratilgan “Elektron poliklinika”, “Elektron shifoxona”, “Elektron tibbiy karta”, “Elektron retsept” modullaridan foydalanish hamda ushbu modullarga tegishli maʼlumotlarni uzatish yoʻriqnomalarini belgilangan tartibda tasdiqlasin va amaliyotga joriy etsin;

b) 2027-yil 1-yanvarga qadar retsept bilan beriladigan dori vositalarini elektron retsept asosida tayinlash natijalaridan kelib chiqib, alohida toifadagi kuchli taʼsir qiluvchi moddalar, tarkibida giyohvandlik vositalari, psixotrop moddalarni saqlovchi dori vositalarini ham elektron retsept asosida berish yuzasidan takliflarni Vazirlar Mahkamasiga kiritsin.

6. Quyidagilar:

Dori vositalari aylanmasini boshqarishning samarali tizimini yaratish uchun “Elektron sogʻliqni saqlash” axborot tizimiga integratsiya asosida uzatiladigan maʼlumotlar roʻyxati 2-ilovaga muvofiq;

Tibbiyot va farmatsevtika tashkilotlarida elektron retseptni joriy etish boʻyicha ishchi guruh tarkibi 3-ilovaga muvofiq tasdiqlansin.

7. Raqamli texnologiyalar vazirligi Sogʻliqni saqlash vazirligi bilan birgalikda elektron retseptni joriy etish doirasida shaxsga doir va tibbiy sirni tashkil etadigan maʼlumotlar oshkor etilishining oldini olish, shuningdek, axborot tizimlari va resurslarning kiberxavfsizligini taʼminlash choralarini koʻrsin.

8. Vazirlar Mahkamasining 2022-yil 21-fevraldagi 80-son qarori bilan tasdiqlangan Maxsus elektron tizim orqali ayrim faoliyat turlarini litsenziyalash tartibi toʻgʻrisidagi yagona nizomga 4-ilovaga muvofiq qoʻshimchalar kiritilsin.

9. Sogʻliqni saqlash vazirligi:

Oʻzbekiston Milliy axborot agentligi va Oʻzbekiston Milliy teleradiokompaniyasi bilan birgalikda ushbu qarorning mazmun-mohiyati va ahamiyatini aholi oʻrtasida keng targʻib qilish choralarini koʻrsin;

manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

10. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.

11. Mazkur qarorning bajarilishini nazorat qilish Oʻzbekiston Respublikasi sogʻliqni saqlash vaziri A.A. Xudayarov hamda raqamli texnologiyalar vaziri Sh.X. Shermatov zimmasiga yuklansin.

Oʻzbekiston Respublikasi Bosh vaziri A. ARIPOV

Toshkent sh.,

2025-yil 8-sentabr,

570-son

Vazirlar Mahkamasining 2025-yil 8-sentabrdagi 570-son qaroriga
1-ILOVA

Tibbiyot tashkilotlarida retsept bilan beriladigan dori vositalarini elektron retsept asosida tayinlash tartibi toʻgʻrisida

NIZOM

1-bob. Umumiy qoidalar

1. Ushbu Nizom barcha tibbiyot tashkilotlarida bemorga retsept bilan beriladigan dori vositalarini elektron retsept asosida tayinlash tartibini belgilaydi.

2. Mazkur Nizom alohida toifadagi kuchli taʼsir qiluvchi moddalar, tarkibida giyohvandlik vositalari va psixotrop moddalarni saqlovchi dori vositalari muomalasiga nisbatan tatbiq etilmaydi.

Reimbursatsiya dasturi bilan bogʻliq jarayonlar Vazirlar Mahkamasining 2024-yil 2-oktabrdagi 619-son qarori talablari asosida amalga oshiriladi.

3. Ushbu Nizomda quyidagi asosiy tushunchalardan foydalaniladi:

bemorning qonuniy vakili — bemorning oila aʼzosi yoki bemorga vasiylik yoki homiylik qilishga tayinlangan shaxs;

dorixona — dori vositalarini va tibbiy buyumlarni chakana realizatsiya qilishni, shuningdek, ularni tayyorlash uchun tegishli litsenziyaga ega boʻlgan yuridik shaxs yoki yuridik shaxsning tarkibiy boʻlinmasi shaklida tashkil etilgan dorixonalarning filiallari, davolash-profilaktika muassasalarining dorixonalari;

dori vositalarining savdo nomi — “Oʻzbekiston Respublikasida tibbiyot amaliyotida qoʻllanilishiga ruxsat etilgan dori vositalari, tibbiy buyumlar va tibbiy texnika davlat reyestri”ga kiritilgan dori vositalarining savdo nomi;

dori vositalarining xalqaro patentlanmagan nomi (keyingi oʻrinlarda — XPN) — Jahon sogʻliqni saqlash tashkiloti tomonidan dori vositasi tarkibidagi faol dori moddasining (substansiyasining) qisqartirilgan nomini berish orqali dori vositasini identifikatsiya qilish;

retsept — shifokorning farmatsevt maʼlumotiga ega boʻlgan mutaxassisga dori preparatini tayyorlash va (yoki) berish hamda uning qoʻllanish usuli toʻgʻrisidagi yozma koʻrsatmasi;

elektron retsept — shifokorning farmatsevtik maʼlumotga ega boʻlgan mutaxassisga dori vositasi toʻgʻrisidagi maʼlumotlarni (xalqaro patentlanmagan yoki original nomi, tayyorlash, kunlik dozasi, qabul qilish yoki yuborish usuli, miqdori, davomiyligi) elektron shaklda qayd etilgan va tasdiqlangan koʻrsatmasi;

“Elektron retsept” moduli — elektron retsept bilan bogʻliq barcha jarayonlar (harakatlar)ni jamlash, maʼlumot almashish, tegishli hisobotlarni shakllantirish kabi funksiyalarni amalga oshiruvchi axborot dasturi;

xalqaro kasalliklar tasnifi (keyingi oʻrinlarda — XKT) — kasalliklar va sogʻliq bilan bogʻliq boshqa muammolarning xalqaro statistik tasnifi.

4. Elektron retsept asosida tayinlanadigan dori vositalari Oʻzbekiston Respublikasida roʻyxatdan oʻtgan boʻlishi kerak.

5. Tibbiyot tashkilotlari va dorixonalarning mavjud axborot tizimlari Sogʻliqni saqlash vazirligining Raqamli sogʻliqni saqlash platformasiga va axborot tizimiga ulash yoki ularning soʻroviga asosan ularda vazirlikning “Elektron sogʻliqni saqlash” axborot tizimi modullarini oʻrnatish ishlari bepul amalga oshiriladi.

Bunda:

a) Sogʻliqni saqlash vazirligining “Elektron sogʻliqni saqlash” axborot tizimidan foydalanishda koʻrsatilgan texnik xizmatlar xarajatlari Raqamli texnologiyalar vazirligi hamda Iqtisodiyot va moliya vazirligi bilan kelishilgan holda, Sogʻliqni saqlash vazirligi tomonidan tasdiqlanadigan tariflar asosida tibbiyot tashkilotlari va dorixonalar tomonidan qoplanadi;

b) davlat tibbiyot tashkilotlari “Elektron sogʻliqni saqlash” axborot tizimiga belgilangan tartibda ulanadi.

v) “Davlat axborot tizimlarini yaratish va qoʻllab-quvvatlash boʻyicha yagona integrator — “UZINFOCOM” MCHJ:

tibbiyot tashkilotlari va dorixonalarning mavjud axborot tizimlari “Elektron sogʻliqni saqlash” axborot tizimiga, keyinchalik Raqamli sogʻliqni saqlash platformasiga ularning elektron arizalariga asosan bir ish kuni muddatda integratsiya kaliti va texnologik yoʻriqnomasini elektron shaklda avtomatik taqdim etish orqali integratsiya qilinadi;

“Elektron sogʻliqni saqlash” axborot tizimining mobil ilovasini hamma uchun foydalanishga ochiq qilib, bepul yuklab olish imkoniyatini yaratadi.

6. Shifokor tomonidan amaldagi tashxis qoʻyish va davolash standartlari hamda milliy klinik protokollarga muvofiq bir yoki bir necha turdagi kasalliklarni davolash (profilaktikasi) yoki oqibatlarining oldini olish maqsadida muayyan bir bemorga buyuriladigan dori vositalariga (dori vositasining xalqaro patentlanmagan nomiga) elektron retsept rasmiylashtiriladi.

7. Dori vositalari bevosita bemor yoki bemorning qonuniy vakiliga “Elektron retsept” moduli bilan oʻrnatilgan tartibda zarur maʼlumotlar almashinuvi yoʻlga qoʻyilgan dorixonalar orqali beriladi.

8. Elektron retsept asosida beriladigan dori vositalari uchun toʻlovlar bemor yoki bemorning qonuniy vakili tomonidan toʻlanadi (reimbursatsiya dasturi asosida beriladigan dori vositalari bundan mustasno).

2-bob. Retsept bilan beriladigan dori vositalarini elektron retsept asosida tayinlash

9. Tibbiyot xodimlari tomonidan bemor maʼlumotlari tibbiyot tashkilotida joriy qilingan tibbiy axborot tizimiga kiritiladi hamda ushbu maʼlumotlar avtomatik tarzda “Elektron tibbiy karta” moduliga uzatiladi.

10. Bemorga dori vositalari tibbiyot tashkilotida joriy qilingan tibbiy axborot tizimida elektron retsept rasmiylashtirish orqali tayinlanadi va bevosita davolovchi shifokor tomonidan elektron tasdiqlash usullarida tasdiqlanib, QR kod avtomatik tarzda qoʻyiladi. Bunda elektron retseptga oid zarur maʼlumotlar avtomatik tartibda “Elektron retsept” moduliga uzatiladi.

11. Tibbiyot tashkilotida statsionar davolangan bemorlarga kasallik tarixi va uning koʻchirmasida tavsiya qilingan dori vositalari uchun shifokor tomonidan belgilangan muddatlarga elektron retsept rasmiylashtiriladi.

12. Elektron retseptni rasmiylashtirish orqali retsept bilan beriladigan dori vositalarini tayinlash va chakana realizatsiya qilish ushbu Nizomga ilovada keltirilgan sxemaga muvofiq amalga oshiriladi.

13. Tibbiyot tashkilotining shifokori oʻzining qabulida boʻlgan yoki statsionar sharoitda davolanayotgan bemorlarga elektron retsept rasmiylashtiradi va elektron tasdiqlash usullarida tasdiqlaydi.

14. Shifokorlarga oʻzlari tomonidan bemorga elektron retsept asosida tayinlangan va chakana realizatsiya qilingan dori vositalari harakati toʻgʻrisidagi maʼlumotlarni axborot tizimlari orqali kuzatib borish imkoniyati yaratiladi.

15. Elektron retseptlarda retsept bilan beriladigan dori vositalarini tayinlash va chakana realizatsiya qilishga oid maʼlumotlar belgilangan muddat davomida “Elektron sogʻliqni saqlash” axborot tizimida, keyinchalik Raqamli sogʻliqni saqlash platformasida saqlanadi.

3-bob. Elektron retsept orqali tayinlangan dori vositalarini rasmiylashtirish

16. Elektron retsept shakli va uning amal qilish muddati Sogʻliqni saqlash vazirligi tomonidan belgilanadi.

17. Tibbiyot tashkiloti shifokori XKT asosida belgilangan tashxisga muvofiq tasdiqlangan XPN roʻyxati boʻyicha kerakli dori vositalarini tibbiyot tashkilotida joriy qilingan tibbiy axborot tizimida elektron retseptni rasmiylashtirish orqali tayinlaydi va rasmiylashtirilgan elektron retsept maʼlumotlari “Elektron retsept” moduliga avtomatik tarzda uzatiladi.

Zaruratga koʻra (bemorning talabiga koʻra) shifokor rasmiylashtirilgan elektron retseptni bosmadan chiqarib, bemorga taqdim etadi.

Birlamchi tibbiy-sanitariya yordami muassasalarining shifokorlari hamda uy sharoitida koʻrilgan bemorlarga shifokor tomonidan elektron retsept tegishli tibbiy axborot tizimining mobil ilovasi orqali rasmiylashtirishi mumkin.

18. Dorixonaning farmatsevt maʼlumotiga ega xodimi bemorga yoki bemorning qonuniy vakiliga elektron retseptda koʻrsatilgan dori vositalarini qabul qilish vaqtini dori vositasining qadogʻiga belgilagan holda beradi va elektron retseptning dorixonaga taalluqli boʻlgan qismini toʻldiradi (dori vositasining nomi, yaroqlilik muddati va seriyasi, partiya raqami berilgan dori vositasiga mos boʻlishi kerak).

19. Elektron retseptdagi dori vositasi berilishi toʻgʻrisidagi maʼlumotlar, shu jumladan, farmatsevtning familiyasi, ismi, otasining ismi elektron raqamli imzosi va QR kod qoʻyilib, elektron shaklda dorixonada mavjud axborot tizimlari orqali “Elektron sogʻliqni saqlash” axborot tizimiga avtomatik yuboriladi.

20. Elektron retseptga oid boʻlgan barcha maʼlumotlar bemorning elektron tibbiy kartasida avtomatik tarzda qayd etib boriladi.

21. Elektron retseptda bir yoki bir nechta tashxis asosida 5 tagacha XPN koʻrsatilishi mumkin. Agar elektron retseptda 5 tadan ortiq XPN belgilanishi lozim boʻlsa, shifokor tomonidan qolganlari amaldagi tashxis qoʻyish va davolash standartlariga muvofiq qoʻshimcha asoslantiriladi.

22. Elektron retseptda dori vositasining XPN yoki original nomi, tayyorlash, kunlik dozasi, qabul qilish yoki yuborish usuli, miqdori, davolanish kursi davomiyligi, tayinlagan shifokor maʼlumotlari koʻrsatiladi.

23. Quyidagi hollarda shifokor tomonidan dori vositalariga elektron retsept rasmiylashtirilishi taqiqlanadi:

bemorning amaldagi tashxis qoʻyish va davolash standartlari va klinik protokollarga muvofiq tibbiy koʻrsatmasi boʻlmagan holatlarda;

Oʻzbekiston Respublikasida davlat roʻyxatidan oʻtkazilmagan dori vositalariga (orfan dori vositalari, davlat roʻyxatidan oʻtkazmasdan, majburiy sertifikatlash sharti bilan tibbiyot amaliyotida qoʻllash va olib kirishga ruxsat beriladigan, Oʻzbekiston Respublikasida davlat roʻyxatidan oʻtkazilgan analoglari mavjud boʻlmagan dori vositalari bundan mustasno);

narkoz vositasi sifatida ishlatiladigan dori vositalariga.

4-bob. “Elektron retsept” moduliga elektron retsept maʼlumotlarini uzatish

24. Elektron retsept tibbiyot tashkilotida joriy qilingan tibbiy axborot tizimida shifokor tomonidan tegishli qaydlari mavjud boʻlgan bemor uchun rasmiylashtiriladi.

25. Elektron retseptda quyidagi maʼlumotlar aks ettirilishi zarur:

tibbiyot tashkilotining nomi;

tibbiyot tashkiloti litsenziyasining tartib raqami, berilgan sanasi, amal qilish muddati, STIR raqami (nodavlat tibbiyot tashkilotlari uchun);

elektron retsept raqami va berilgan sana;

bemorning JSHSHIR, familiyasi, ismi va otasining ismi, tugilgan sanasi;

XKTga muvofiq qoʻyilgan tashxis;

dori vositasining XPN yoki original nomi, tayyorlash, kunlik dozasi, qabul qilish vaqti (muddati), qabul qilish yoki yuborish usuli, miqdori, davolanish kursi davomiyligi, dori vositasining raqami (elektron retsept raqamiga bogʻlangan holda);

shifokorning familiyasi, ismi va otasining ismi hamda telefon raqami.

26. Shifokor tomonidan elektron retsept rasmiylashtirilgandan soʻng ushbu retsept maʼlumotlari “Elektron retsept” moduliga uzatiladi hamda Sogʻliqni saqlash vazirligining axborot tizimiga integratsiya qilingan dorixonalarda elektron shaklda koʻrinadi.

5-bob. Yakunlovchi qoidalar

27. Elektron retseptning tibbiyot tashkilotlarida toʻgʻri yuritilishi Sogʻliqni saqlash vazirligi va uning hududiy boʻlinmalari tomonidan, uning dorixonalarda qoʻllanilishi Farmatsevtika mahsulotlari xavfsizligi markazi tomonidan nazorat qilinadi.

28. Sogʻliqni saqlash vazirligi elektron retsept asosida dori vositalarini tayinlashda yuzaga keladigan muammolarni hamda ushbu Nizomda tartibga solinmagan masalalarni hal qilish vakolatiga ega.

29. Tibbiyot tashkilotlari va dorixonalar rahbarlari elektron retseptni rasmiylashtirishda maʼlumotlarning toʻgʻri kiritilishi, tegishli tibbiy axborot tizimlaridan toʻgʻri va maqsadli foydalanishga, shuningdek, oʻz xodimlari tomonidan yoʻl qoʻyiladigan xatolik uchun javobgardir.

30. Ushbu Nizom talablari buzganlikda aybdor shaxslar qonunchilik hujjatlarida nazarda tutilgan tartibda javobgar boʻladi.

Tibbiyot tashkilotlarida retsept bilan beriladigan dori vositalarini elektron retsept asosida tayinlash tartibi toʻgʻrisidagi nizomga
ILOVA

Elektron retsept rasmiylashtirish orqali retsept bilan beriladigan dori vositalarini tayinlash va chakana realizatsiya qilish

SXEMASI

Bosqichlar	Subyektlar	Tadbirlar	Bajarish muddatlari
Bosqichlar	Subyektlar	Tadbirlar	Bajarish muddatlari

1-bosqich	Bemor	Shifokor tomonidan qabul qilinadi hamda amaldagi tashxis qoʻyish va davolash standartlari hamda klinik protokollarga muvofiq tibbiy xizmat koʻrsatiladi.	Bemor xohishiga koʻra hamda belgilangan muddatlarda
1-bosqich	Bemor		Bemor xohishiga koʻra hamda belgilangan muddatlarda

2-bosqich	Shifokor	1. Maʼlumotlarni bemorning elektron tibbiy kartasida shakllantirish uchun tibbiyot tashkilotida joriy qilingan tibbiy axborot tizimiga kiritadi. Uy sharoitida oʻtkazilgan koʻrik natijasida dorini tegishli tibbiy axborot tizimining mobil ilovasida tayinlaydi. 2. Bemor va tayinlanadigan dori vositalari toʻgʻrisidagi maʼlumotlarni (xalqaro patentlanmagan yoki original nomi, bir kunlik dozasi, qabul qilish yoki yuborish usuli, miqdori, davomiyligi) asosida elektron retsept rasmiylashtiriladi hamda “Elektron retsept” moduliga uzatiladi. Shuningdek, Sogʻliqni saqlash vazirligi tomonidan belgilangan hollarda va tartibda statsionar sharoitda davolanayotgan bemor uchun ham dori vositalarini elektron retsept orqali tayinlashi mumkin.	Real vaqt rejimida
2-bosqich	Shifokor		Real vaqt rejimida

3-bosqich	Bemor yoki uning qonuniy vakili	Dorixonaning farmatsevt maʼlumotiga ega xodimiga murojaat qiladi va dori vositasini olish uchun bemorning maʼlumotlarini taqdim etadi.	Elektron retseptning amal qilish muddatida
3-bosqich	Bemor yoki uning qonuniy vakili		Elektron retseptning amal qilish muddatida

4-bosqich	Dorixonaning farmatsevt maʼlumotiga ega xodimi	Bemor yoki uning qonuniy vakili tomonidan taqdim etilgan maʼlumotlar asosida elektron retseptda koʻrsatilgan dori vositalarini beradi hamda tegishli maʼlumotlarni dorixonada joriy etilgan axborot tizimiga kiritadi.	Bemor yoki uning qonuniy vakili murojaat qilganda
4-bosqich	Dorixonaning farmatsevt maʼlumotiga ega xodimi		Bemor yoki uning qonuniy vakili murojaat qilganda

Vazirlar Mahkamasining 2025-yil 8-sentabrdagi 570-son qaroriga
2-ILOVA

Dori vositalari aylanmasini boshqarishning samarali tizimini yaratish uchun “Elektron sogʻliqni saqlash” axborot tizimiga integratsiya asosida uzatiladigan maʼlumotlar

ROʻYXATI

T/r	Maʼlumot berish uchun masʼul vakolatli organ	Talab etiladigan maʼlumotlar
1.	Iqtisodiyot va moliya vazirligi huzuridagi Bojxona qoʻmitasi	Dori vositalari importi toʻgʻrisidagi maʼlumotlar
2.	Soliq qoʻmitasi	Dori vositalarini raqamli markirovkalash tizimidagi maʼlumotlar
3.	Kambagʻallikni qisqartirish va bandlik vazirligi	Yagona milliy mehnat tizimidagi maʼlumotlar
4.	Oʻzbekiston texnik jihatdan tartibga solish agentligi	Muvofiqlik sertifikatlari davlat reyestridagi maʼlumotlar
5.	Ichki ishlar vazirligi	Shaxsga doir maʼlumotlar
6.	Raqobatni rivojlantirish va isteʼmolchilar huquqlarini himoya qilish qoʻmitasi	Dori vositalarining referent narxlaridan yuqori boʻlgan narxlar toʻgʻrisidagi maʼlumotlar
7.	“Farmatsevtika mahsulotlari xavfsizligi markazi” davlat muassasasi	Tibbiyot amaliyotida qoʻllanilishiga ruxsat etilgan dori vositalari toʻgʻrisidagi maʼlumotlar
8.	Farmatsevtika tarmogʻini rivojlantirish agentligi	Ishlab chiqarilgan va xorijiy davlatlarga realizatsiya (eksport) qilingan dori vositalari toʻgʻrisidagi maʼlumotlar
9.	Davlat tibbiy sugʻurtasi jamgʻarmasi	Reimbursatsiya dasturi asosida beriladigan dori vositalari uchun rasmiylashtirilgan elektron retseptlar, mazkur elektron retseptlar asosida berilgan dori vositalari va boshqa jarayonlar toʻgʻrisidagi maʼlumotlar
10.	Adliya vazirligi	Qarindoshlik darajasini belgilash toʻgʻrisidagi maʼlumotlar

Izoh. Sogʻliqni saqlash vazirligi, zaruratga koʻra boshqa davlat tashkilotlarining axborot tizimlarini “Elektron sogʻliqni saqlash” axborot tizimga integratsiya qilishi mumkin.

Vazirlar Mahkamasining 2025-yil 8-sentabrdagi 570-son qaroriga
3-ILOVA

Tibbiyot va farmatsevtika tashkilotlarida elektron retseptni joriy etish boʻyicha ishchi guruh

TARKIBI

1.	A.A. Xudayarov	—	sogʻliqni saqlash vaziri, ishchi guruh rahbari
2.	Sh.X. Shermatov	—	raqamli texnologiyalar vaziri
3.	J.J. Xatamov	—	Iqtisodiy jinoyatlarga qarshi kurashish departamenti boshligʻi (kelishuv asosida)
4.	O.A. Pekos	—	raqamli texnologiyalar vazirining birinchi oʻrinbosari
5.	O.M. Omonov	—	sogʻliqni saqlash vaziri oʻrinbosari
6.	O.R. Fazilkarimov	—	iqtisodiyot va moliya vaziri oʻrinbosari
7.	Sh.M. Rabiyev	—	adliya vaziri oʻrinbosari
8.	M.M. Mirzayev	—	Soliq qoʻmitasi raisining birinchi oʻrinbosari
9.	A.A. Azizov	—	Farmatsevtika tarmogʻini rivojlantirish agentligi direktori
10.	A.S. Temirov	—	“Farmatsevtika mahsulotlari xavfsizligi markazi” davlat muassasasi direktori
11.	E.I. Gimranov	—	“Uzinfocom” MCHJ direktori
12.	Lavozimi boʻyicha	—	Qoraqalpogʻiston Respublikasi Vazirlar Kengashi Raisining, viloyatlar va Toshkent shahri hokimlarining ijtimoiy rivojlanish va maʼnaviy-maʼrifiy ishlar boʻyicha oʻrinbosarlari

Izoh. Ushbu ishchi guruh aʼzolari boshqa ishga oʻtgan taqdirda, ularning oʻrniga ushbu lavozimga yangidan tayinlangan yoki zimmasiga tegishli funksiyalarni bajarish yuklangan shaxslar kiritiladi.

Vazirlar Mahkamasining 2025-yil 8-sentabrdagi 570-son qaroriga
4-ILOVA

Vazirlar Mahkamasining 2022-yil 21-fevraldagi 80-son qarori bilan tasdiqlangan Maxsus elektron tizim orqali ayrim faoliyat turlarini litsenziyalash tartibi toʻgʻrisidagi yagona nizomga kiritilayotgan qoʻshimchalar

1. 27-ilovaning 9-pozitsiyasi uchinchi ustunining “v” kichik bandi quyidagi mazmundagi oʻn birinchi xatboshi bilan toʻldirilsin:

“Raqamli sogʻliqni saqlash” platformasiga ushbu platforma amaliyotga joriy etilgunga qadar Sogʻliqni saqlash vazirligining “Elektron sogʻliqni saqlash” axborot tizimiga integratsiya asosida ulanishni hamda “Elektron poliklinika”, “Elektron shifoxona”, “Elektron tibbiy karta”, “Elektron retsept” modullari bilan belgilangan maʼlumotlarni real vaqt rejimida almashilishini taʼminlash*”.

2. 29-ilovaning 9-pozitsiyasi uchinchi ustuni quyidagi tahrirdagi “o” kichik band bilan toʻldirilsin:

“o) “Raqamli sogʻliqni saqlash” platformasiga ushbu platforma amaliyotga joriy etilgunga qadar Sogʻliqni saqlash vazirligining “Elektron sogʻliqni saqlash” axborot tizimiga integratsiya asosida ulanishni hamda “Elektron retsept” moduli bilan belgilangan maʼlumotlarni real vaqt rejimida almashilishini taʼminlash*”.

Izoh. Mazkur ilovada belgilangan tartib Toshkent shahri hamda Oʻzbekiston Respublikasi Prezidentining “Respublikada sogʻliqni saqlash tizimini va aholiga tibbiy xizmat koʻrsatish tamoyillarini takomillashtirish orqali sohani isloh qilishni izchil davom ettirish chora-tadbirlari toʻgʻrisida” 2025-yil 19-maydagi PF-88-son Farmoniga koʻra tajriba-sinov loyihasi amalga oshiriladigan 15 ta tuman (shahar)larda 2025-yil 10-dekabrdan boshlab, respublikaning barcha hududlarida esa 2027-yil 1-yanvardan boshlab amalga kiritiladi.

(Qonunchilik maʼlumotlari milliy bazasi, 11.09.2025-y., 09/25/570/0822-son)