1.

Litsenziya nomi:

Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat uchun litsenziya

2.

Litsenziyalanadigan faoliyatning kichik turlari:

Giyohvandlik vositalari, psixotrop moddalar va prekursorlarni olib kirish (olib chiqish);

giyohvandlik vositalari, psixotrop moddalar va prekursorlarni saqlash hamda realizatsiya qilish (berish);

giyohvandlik vositalari, psixotrop moddalar va prekursorlarni saqlash hamda taqsimlash;

giyohvandlik vositalari, psixotrop moddalar va prekursorlarni tashish;

yangi giyohvandlik vositalari va psixotrop moddalarni ishlab chiqish hamda saqlash;

giyohvandlik vositalari, psixotrop moddalar va prekursorlarni ishlab chiqarish, tayyorlash va saqlash;

giyohvandlik vositalari, psixotrop moddalar va prekursorlarni yo‘q qilish;

giyohvandlik vositalari, psixotrop moddalar va prekursorlardan ilmiy va o‘quv maqsadlarida, ishlab chiqarish ehtiyojlari uchun, shu jumladan tibbiyotda hamda veterinariyada foydalanish va ularni saqlash;

tarkibida giyohvandlik moddalari bo‘lgan o‘simliklarni yetishtirish hamda saqlash.

3.

Ariza beruvchilar toifasi:

yuridik shaxs

4.

Litsenziyalovchi organ:

O‘zbekiston Respublikasi Sog‘liqni saqlash vazirligi

5.

Litsenziyani olish uchun taqdim qilinadigan hujjatlar:

a) ariza.

Arizada quyidagi ma’lumotlar ko‘rsatiladi:

yuridik shaxsning nomi va tashkiliy-huquqiy shakli, uning pochta manzili, faoliyatni amalga oshirish joyi, bank muassasasining nomi va bankdagi hisobvarag‘i, telefon raqami, STIR, elektron pochta manzili (agar mavjud bo‘lsa), filiallari mavjud bo‘lsa, har birining manzili alohida ko‘rsatilishi shart, litsenziyalanadigan faoliyatning kichik turlari bo‘yicha tanlash, ariza to‘ldirish sababi (yangi litsenziya olish, qayta rasmiylashtirish, litsenziyaning amal qilish muddatini uzaytirish), litsenziya talabgorining litsenziya talablari va shartlariga rioya qilishga roziligi;

giyohvandlik vositalari, psixotrop moddalarning muomalada bo‘lishi (saqlash, berish, sotish, tayyorlash, foydalanish, yo‘q qilish) sohasidagi mas’ul xodim — jismoniy shaxsning shaxsiy identifikatsiya raqami (JSH SHIR), oliy farmatsevtika ma’lumotli va tegishli malakaga ega mutaxassisni lavozimga tayinlaganligi;

litsenziyalanayotgan faoliyat turini amalga oshirish uchun mo‘ljallangan, o‘ziga mulk huquqi bilan yoki boshqa qonuniy asosda tegishli bo‘lgan va tegishli sanitariya qoidalari, normalari va gigiyena normativlariga, shuningdek, texnik jihatdan tartibga solish sohasidagi normativ hujjatlarga muvofiq bino va xonalarning mavjudligi;

b) litsenziya talablari va shartlariga muvofiq litsenziyalanadigan faoliyat kichik turlari bo‘yicha zarur bo‘lgan barcha ishlarni amalga oshirish uchun mo‘ljallangan moddiy-texnika bazasi to‘g‘risida ma’lumotlar (maxsus jihozlangan binolarni, inshootlarni, xonalarni foydalanishga qabul qilish dalolatnomasi yoki ularni ijara olish shartnomasi, qo‘riqlashning muhandislik-texnik vositalarini o‘rnatish, yong‘inga qarshi avtomatika va qo‘riqlash-yong‘in signalizatsiyasi vositalarini montaj qilish dalolatnomalari).

6.

Arizani ko‘rib chiqish uchun to‘lanadigan yig‘im miqdori:

bazaviy hisoblash miqdorining 5 baravari

7.

Litsenziya berilganligi uchun davlat boji miqdori:

bazaviy hisoblash miqdorining 5 baravari

8.

Arizani ko‘rib chiqish muddatlari:

15 ish kuni

9.

Litsenziya talablari va shartlari:

giyohvandlik vositalari, psixotrop moddalar va prekursorlar to‘g‘risidagi qonun hujjatlariga rioya etish*;

litsenziat shtatida tegishli mutaxassislik va malakaga ega bo‘lgan xodimlarning mavjud bo‘lishi*;

litsenziyalanadigan faoliyatning aniq turini amalga oshirish bo‘yicha, shu jumladan tegishli moddiy-texnik baza, asbob-uskunalar, boshqa texnik vositalar bo‘yicha belgilangan talablarga rioya etish;

litsenziyalanayotgan faoliyat turini amalga oshirish uchun foydalaniladigan binolar, inshootlar, muhandislik kommunikatsiyalari va texnologik asbob-uskunalarning mulk huquqi yoki boshqa qonuniy asosda mavjud bo‘lishi;

giyohvandlik vositalari, psixotrop moddalar va prekursorlarni olib kirish, olib chiqish va ularning tranzitini O‘zbekiston Respublikasining xalqaro majburiyatlarini hisobga olgan holda, O‘zbekiston Respublikasining “Giyohvandlik vositalari, psixotrop moddalar to‘g‘risida”gi Qonuni hamda BMTning tegishli konvensiyalarida nazarda tutilgan talablarga muvofiq amalga oshirish*;

litsenziyada ko‘rsatilgan faoliyatni, litsenziyada ko‘rsatilgan manzillar bo‘yicha amalga oshirish*;

giyohvandlik vositalari, psixotrop moddalar va prekursorlarni saqlash, tashish xavfsizligiga rioya etilishini ta’minlash*;

O‘zbekiston Respublikasi Sog‘liqni saqlash vazirligida belgilangan tartibda ro‘yxatdan o‘tkazilgan va vakolatli organ tomonidan berilgan ularning sifatini tasdiqlovchi hujjatga ega bo‘lgan giyohvandlik vositalari, psixotrop moddalar va prekursorlarni sotish*;

Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyatni amalga oshirish uchun nodavlat tibbiyot tashkilotlarida tibbiy faoliyat uchun amaldagi litsenziyaga ega bo‘lish;

Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyatga litsenziya olish uchun talabgor bo‘lgan dorixonalar, dori vositalarining ulgurji omborxonalari, dori vositalarini ishlab chiqarish korxonalari farmatsevtika faoliyati uchun amaldagi tegishli litsenziyaga hamda “Zarur amaliyotlar (GxP)”ning tegishli milliy talablariga muvofiqlik to‘g‘risida sertifikatga ega bo‘lish*.

10.

Litsenziya berishda kelishiladigan organlar:

Ichki ishlar vazirligining hududiy boshqarmalari — obyektlar (xonalar)ning giyohvandlik vositalarini, psixotrop moddalarni, ularning analoglarini va prekursorlarni saqlashga doir texnik talablarga muvofiqligi yuzasidan;

Sanitariya-epidemiologik osoyishtalik va jamoat salomatligi qo‘mitasining hududiy boshqarmalari — binolarning va (yoki) shart-sharoitlarning sanitariya qoidalari, normalari va gigiyena normativlariga muvofiqligi yuzasidan;

Ekologiya, atrof-muhitni muhofaza qilish va iqlim o‘zgarishi vazirligining hududiy boshqarmalari — ishlab chiqarish sharoitlarining ekologiya talablariga muvofiqligi yuzasidan (prekursorlar ishlab chiqarish bilan bog‘liq faoliyat amalga oshirilganda);

Veterinariya va chorvachilikni rivojlantirish qo‘mitasi — giyohvandlik vositalari, psixotrop moddalar va prekursorlardan veterinariyada foydalanilganda.

11.

Litsenziyaning amal qilish muddati:

5 yil

12.

Izoh:

Litsenziyalovchi organda litsenziyalar berish to‘g‘risidagi hujjatlarni ko‘rib chiqish, ularning muddatlarini uzaytirish, ular yuzasidan xulosalar tayyorlash uchun Ekspert komissiyasi tashkil etiladi. Ekspert komissiyasi to‘g‘risidagi nizom va uning shaxsiy tarkibi Giyohvandlik vositalari va psixotrop moddalar ustidan nazorat qilish bo‘yicha davlat komissiyasi bilan kelishgan holda litsenziyalovchi organ tomonidan tasdiqlanadi.

Ekspert komissiyasi tarkibiga majburiy tartibda O‘zbekiston Respublikasi Prezidenti Administratsiyasi huzuridagi Narkotiklarni nazorat qilish milliy markazi vakili kiritiladi.

Litsenziat shtatida surunkali ruhiy kasalliklar, narkomaniya, toksikomaniya, alkogolizm bo‘yicha dispanser hisobida turgan, shuningdek qasddan sodir etilgan jinoyati uchun sud hukmini o‘tamagan yoki sudlanganligi olib tashlanmagan, o‘z xizmat vazifalariga ko‘ra giyohvandlik vositalari va psixotrop moddalarni olishi mumkin bo‘lgan shaxslarning bo‘lishi mumkin emas.

Giyohvandlik vositalari, psixotrop moddalar va prekursorlardan ichki ishlar organlari, Davlat xavfsizlik xizmati va bojxona organlarining ekspertiza va tezkor-qidiruv faoliyatida, shuningdek, O‘zbekiston Respublikasi Adliya vazirligining sud-ekspertiza muassasalari faoliyatida foydalanish litsenziya olmasdan amalga oshiriladi.

* Qo‘pol ravishda buzish deb hisoblanadigan talab va shartlar

”.