Hujjat kuchini yo‘qotgan 01.01.2025

Oʻzbekiston Respublikasi Prezidentining

2024-yilda rasmiy sanalarni nishonlash davrida qoʻshimcha ishlanmaydigan kunlarni belgilash va dam olish kunlarini koʻchirish toʻgʻrisida

2024-yilda fuqarolarning rasmiy sanalarni nishonlash davrida toʻliq dam olishi uchun shart-sharoitlar yaratish, “Oʻzbekiston boʻylab sayohat qil!” ichki turizmni rivojlantirish dasturi doirasida ichki va ziyorat turizmini yanada rivojlantirish uchun dam olish va bayram kunlaridan samarali foydalanishni taʼminlash maqsadida:

1. 2024-yilda quyidagi qoʻshimcha dam olish kunlari belgilansin:

barcha xodimlar uchun (ish haftasining turidan qatʼi nazar): 22-mart — juma, 11-aprel — payshanba, 18-iyun — seshanba, 3-sentabr — seshanba, 31-dekabr — seshanba;

olti kunlik ish haftasida ishlaydigan xodimlar uchun: 2-yanvar — seshanba, 23-mart — shanba, 12-aprel — juma, 31-avgust — shanba, 30-dekabr — dushanba.

2. Mehnat kodeksining 208-moddasiga muvofiq:

ishlanmaydigan bayram kunlari hisoblanuvchi “1-sentabr — Oʻzbekiston Respublikasi mustaqillik kuni”, “8-dekabr — Konstitutsiya kuni” bayramlari 2024-yilda yakshanba — dam olish kunlariga toʻgʻri kelishi munosabati bilan ushbu dam olish kunlari mos ravishda 2024-yil 2-sentabr va 9-dekabr — dushanba kunlariga koʻchirilishi;

bunda ishlab chiqarish-texnik va tashkiliy sharoitlar (mavjud uzluksiz ishlab chiqarish, aholiga har kuni xizmat koʻrsatish, navbatchilik asosida ishlash va boshqalar) tufayli ishlanmaydigan bayram kunlari toʻxtatib qoʻyish mumkin boʻlmagan ishlarni bajarishda dam olish kunlari koʻchirilmasligi maʼlumot uchun qabul qilinsin.

3. 2024-yilda besh kunlik ish haftasida ishlaydigan xodimlar uchun dam olish kunlari quyidagi tartibda koʻchirilsin:

6-yanvar — shanba kunidan 2-yanvar — seshanba kuniga;

13-aprel — shanba kunidan 12-aprel — juma kuniga;

14-dekabr — shanba kunidan 30-dekabr — dushanba kuniga.

4. Bayram (ishlanmaydigan) kunlarining uzaytirilishini hisobga olgan holda, respublika aholisining maroqli dam olishi uchun:

Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasi va Madaniy meros agentligi turizm namoyishi obyektlari (madaniy meros obyektlari, muzeylar) va mehmonxona xizmatlari uchun chegirmalar berilishi hamda aksiyalar oʻtkazilishini tashkil etsin;

Oʻzbekiston kasaba uyushmalari federatsiyasiga Sogʻliqni saqlash vazirligi, Yoshlar siyosati va sport vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda sanatoriylar va sogʻlomlashtirish muassasalari uchun chegirmalar berish hamda aksiyalar oʻtkazish tavsiya etilsin;

“Uzbekistan Airways” AJ, “Oʻzbekiston temir yoʻllari” AJga ichki transport qatnovlari uchun chegirmalar berish va aksiyalar oʻtkazish tavsiya etilsin.

5. Oʻzbekiston kasaba uyushmalari federatsiyasiga:

mehnat jamoalari oʻrtasida ushbu Farmonning maqsadi, mazmun-mohiyati toʻgʻrisida tushuntirish ishlarini tashkil etish;

uzaytirilgan bayram (ishlanmaydigan) kunlarida xodimlar va ularning oila aʼzolari maroqli dam olishini taʼminlash yuzasidan kasaba uyushmalari tashkilotlarining ishini faollashtirish tavsiya etilsin.

6. Oʻzbekiston Milliy teleradiokompaniyasi Oʻzbekiston Milliy axborot agentligi bilan birgalikda bayram kunlari oʻtkaziladigan tadbirlar toʻgʻrisida ommaviy axborot vositalari, shu jumladan Internet jahon axborot tarmogʻi orqali aholining keng xabardor qilinishini taʼminlasin.

7. Oʻzbekiston Respublikasi Prezidentining ayrim farmonlari ilovaga muvofiq 2024-yil 1-yanvardan eʼtiboran oʻz kuchini yoʻqotgan deb hisoblansin.

8. Belgilansinki, ushbu Farmon 2025-yil 1-yanvardan eʼtiboran oʻz kuchini yoʻqotadi.

9. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

2023-yil 22-dekabr,

Oʻzbekiston Respublikasi Prezidentining 2023-yil 22-dekabrdagi PF-213-son Farmoniga
ILOVA

Oʻzbekiston Respublikasi Prezidentining 2024-yil 1-yanvardan eʼtiboran oʻz kuchini yoʻqotgan deb eʼtirof etilayotgan ayrim farmonlari

1. Oʻzbekiston Respublikasi Prezidentining 2019-yil 14-noyabrdagi “2020-yilda rasmiy sanalarni nishonlash davrida qoʻshimcha ishlanmaydigan kunlarni belgilash va dam olish kunlarini koʻchirish toʻgʻrisida”gi PF-5875-son Farmoni.

2. Oʻzbekiston Respublikasi Prezidentining 2022-yil 30-apreldagi “Oʻzbekiston Respublikasi Prezidentining 2021-yil 20-dekabrdagi “2022-yilda rasmiy sanalarni nishonlash davrida qoʻshimcha ishlanmaydigan kunlarni belgilash va dam olish kunlarini koʻchirish toʻgʻrisida”gi PF-35-son Farmoniga oʻzgartirishlar kiritish toʻgʻrisida”gi PF-131-son Farmoni.

3. Oʻzbekiston Respublikasi Prezidentining 2023-yil 20-apreldagi “Oʻzbekiston Respublikasi Prezidentining 2022-yil 23-dekabrdagi “2023-yilda rasmiy sanalarni nishonlash davrida qoʻshimcha ishlanmaydigan kunlarni belgilash va dam olish kunlarini koʻchirish toʻgʻrisida”gi PF-270-son Farmoniga oʻzgartirishlar kiritish haqida”gi PF-58-son Farmoni.

4. Oʻzbekiston Respublikasi Prezidentining 2023-yil 12-iyundagi “Yoshlar siyosati va sport vazirligi tashkil qilinganligi munosabati bilan Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida”gi PF-92-son Farmoniga 1-ilovaning 21-bandi.

5. Oʻzbekiston Respublikasi Prezidentining 2023-yil 19-iyundagi “Oʻzbekiston Respublikasi Prezidentining 2022-yil 23-dekabrdagi “2023-yilda rasmiy sanalarni nishonlash davrida qoʻshimcha ishlanmaydigan kunlarni belgilash va dam olish kunlarini koʻchirish toʻgʻrisida”gi PF-270-son Farmoniga oʻzgartirishlar kiritish haqida”gi PF-100-son Farmoni.

(Qonunchilik maʼlumotlari milliy bazasi, 23.12.2023-y., 06/23/213/0956-son)