O‘zbekiston Respublikasining “O‘zbekiston Respublikasining Markaziy banki to‘g‘risida”gi, “Banklar va bank faoliyati to‘g‘risida”gi va “Aksiyadorlik jamiyatlari va aksiyadorlarning huquqlarini himoya qilish to‘g‘risida”gi Qonunlari hamda O‘zbekiston Respublikasi Vazirlar Mahkamasining 2019-yil 6-sentabrdagi 744-son “Bank faoliyati sohasida ruxsat berish tartib-taomillaridan o‘tish tartibi to‘g‘risidagi nizomga o‘zgartirishlar va qo‘shimcha kiritish haqida”gi qaroriga muvofiq O‘zbekiston Respublikasi Markaziy banki Boshqaruvi qaror qiladi:

1. O‘zbekiston Respublikasi Markaziy banki Boshqaruvining 2009-yil 15-avgustdagi 23/3-son qarori (ro‘yxat raqami 2014, 2009-yil 8-oktabr) (O‘zbekiston Respublikasi qonun hujjatlari to‘plami, 2009-y., 41-son, 447-modda) bilan tasdiqlangan Banklarni ro‘yxatga olish va ular faoliyatini litsenziyalash tartibi to‘g‘risidagi nizomga ilovaga muvofiq o‘zgartirish va qo‘shimchalar kiritilsin.

2. Mazkur qaror rasmiy e’lon qilingan kundan e’tiboran kuchga kiradi.

1. 32-band quyidagi tahrirda bayon etilsin:

“32. Aksiyadorlar umumiy yig‘ilishining vakolatiga kiruvchi masalalar bank kuzatuv kengashi yoki uning boshqaruviga topshirilmaydi, qonun hujjatlarida belgilangan hollar bundan mustasno.”.

2. 52-band quyidagi mazmundagi xatboshi bilan to‘ldirilsin:

“O‘zbekiston Respublikasining xalqaro shartnomalarida mazkur bandda nazarda tutilganidan farqli talab o‘rnatilishi mumkin.”.

3. 53-bandda:

“tashkil etilgan bankning aksiyalari” degan so‘zlar “tashkil etilgan bankning aksiyalari umumiy miqdorining besh foizi yoki undan ortig‘ini” degan so‘zlar bilan almashtirilsin;

quyidagi mazmundagi xatboshi bilan to‘ldirilsin:

“Mazkur bandning birinchi xatboshisida ko‘rsatilgan shaxslar O‘zbekiston Respublikasida tashkil etilgan bankning aksiyalari umumiy miqdorining besh foizidan kam bo‘lgan miqdorda aksiyalarini sotib olish, ularga egalik huquqini berish va shu kabi boshqa munosabatlar bo‘yicha kelishuvlar amalga oshirilganligi to‘g‘risida Markaziy bankka O‘zbekiston Respublikasi Vazirlar Mahkamasining 2014-yil 10-martdagi 56-son qarori bilan tasdiqlangan Bank faoliyati sohasida ruxsat berish tartib-taomillaridan o‘tish tartibi to‘g‘risidagi nizomga muvofiq shaklda kelishuv amalga oshirilgan kundan keyin bir kun ichida yozma ravishda xabarnoma yuboradi.”.

4. Quyidagi mazmundagi 111¹ va 111²-bandlar bilan to‘ldirilsin:

“111¹. Bank mijozlarga tezkor xizmat ko‘rsatish maqsadida bank xizmatlari ofislarini tashkil qilishga haqli.

Bank xizmatlari ofislarida, qoida tariqasida, depozit hisobvaraqlar ochish, omonatlar qabul qilish, to‘lovlarni va xalqaro pul o‘tkazmalarini amalga oshirish, valyuta ayirboshlash, iste’mol krediti va mikroqarz berish kabi bazaviy bank xizmatlari ko‘rsatiladi.

Bank xizmatlari ofislarida ular joylashgan hududdagi talabdan kelib chiqib yuqoridagi xizmatlarga qo‘shimcha ravishda boshqa bank xizmatlari ham ko‘rsatilishi mumkin.

Bank xizmatlari ofislari Markaziy bankda hisobga qo‘yiladi.

111². Bank xizmatlari ofisini hisobga qo‘yish uchun uni tashkil etish to‘g‘risida qaror qabul qilingan kundan boshlab bank 10 kun ichida Markaziy bankka ushbu qaror nusxasini va bank xizmatlari ofisi to‘g‘risidagi nizomni ilova qilgan holda yozma xabarnoma yuboradi.

Bank tomonidan bank xizmatlari ofisini tugatish to‘g‘risida qaror qabul qilinganda, bank ushbu qaror qabul qilingan kundan boshlab besh kun ichida Markaziy bankka tugatish sabablari va muddatlarini ko‘rsatgan holda yozma xabarnoma yuboradi. Xabarnomaga bank xizmatlari ofisini tugatish to‘g‘risidagi tegishli qarordan ko‘chirma ilova qilinadi.

Bank xizmatlari ofisini tugatish to‘g‘risidagi axborot uning tugatilishidan kamida o‘n besh kun oldin bankning veb-saytida yoki boshqa ommaviy axborot vositalarida e’lon qilinishi lozim.”.