O‘zbekiston Respublikasining “O‘zbekiston Respublikasining Markaziy banki to‘g‘risida”gi, “Sudlar to‘g‘risida”gi O‘zbekiston Respublikasi Qonuniga, “O‘zbekiston Respublikasining Fuqarolik protsessual va Xo‘jalik protsessual kodekslariga o‘zgartish va qo‘shimchalar kiritish haqida”gi qonunlariga hamda O‘zbekiston Respublikasi Vazirlar Mahkamasining 2017-yil 9-fevraldagi 66-son “O‘zbekiston Respublikasi Prezidentining “Tadbirkorlik subyektlarini davlat ro‘yxatidan o‘tkazish va hisobga qo‘yish tizimini takomillashtirish to‘g‘risida” 2016-yil 28-oktabrdagi PQ–2646-son qarorini amalga oshirish chora-tadbirlari to‘g‘risida”gi qaroriga muvofiq O‘zbekiston Respublikasi Markaziy banki Boshqaruvi qaror qiladi:

1. O‘zbekiston Respublikasi Markaziy banki Boshqaruvining 2008-yil 23-avgustdagi 18/6-son qarori (ro‘yxat raqami 1863, 2008-yil 27-sentabr) (O‘zbekiston Respublikasi qonun hujjatlari to‘plami, 2008-y., 40-41-son, 414-modda) bilan tasdiqlangan O‘zbekiston Respublikasi bank depozitorlarining Milliy axborotlar bazasi va unda mijozlarga xos raqam berish hamda bank hisobvaraqlari ro‘yxatini yuritish tartibi to‘g‘risidagi nizomga ilovaga muvofiq o‘zgartirishlar kiritilsin.

2. Mazkur qaror rasmiy e’lon qilingan kundan e’tiboran kuchga kiradi.

1. 61-bandning birinchi xatboshisi quyidagi tahrirda bayon etilsin:

“61. 9-so‘rov turi — bank tomonidan yuridik shaxslar faoliyatini tugatish vaqtida shakllantiriladi. Bunday hollarda, banklar tadbirkorlik subyekti bo‘lmagan mijozlardan olingan davlat reyestridan/ro‘yxatidan chiqarilganligi haqidagi qaror nusxasiga hamda tadbirkorlik subyektlari bo‘yicha esa davlat reyestridan/ro‘yxatidan chiqarilganligi haqidagi “Tadbirkorlik subyektlarini davlat ro‘yxatidan o‘tkazish va hisobga qo‘yishning avtomatlashtirilgan tizimi”dagi ma’lumotlarga asosan mijozning xos raqami faolligini to‘xtatadi va ushbu holat BDMABda qayd etiladi.”.

2. 1-ilovada:

oltinchi va o‘n oltinchi xatboshilardagi “Xo‘jalik sudining” degan so‘zlar “Sudning” degan so‘z bilan almashtirilsin;

to‘qqizinchi, o‘n uchinchi va o‘n to‘qqizinchi xatboshilardagi “xo‘jalik sudining” degan so‘zlar “sudning” degan so‘z bilan almashtirilsin;

yigirma uchinchi va yigirma to‘rtinchi xatboshilar quyidagi tahrirda bayon etilsin:

“21” belgi — O‘zbekiston Respublikasining Soliq kodeksi 96-moddasida belgilangan asoslarda davlat soliq xizmati organining arizasiga ko‘ra sud qaroriga muvofiq ushbu soliq to‘lovchining banklardagi hisobvaraqlari bo‘yicha operatsiyalar to‘xtatib turilgan hollarda asosiy depozit hisobvaraqqa xizmat ko‘rsatuvchi bank tomonidan BDMAB orqali Davlat soliq qo‘mitasiga va barcha ikkilamchi hisobvaraq ochgan banklarga uzatiladi.

“22” belgi — O‘zbekiston Respublikasining Soliq kodeksi 96-moddasida belgilangan asoslarda davlat soliq xizmati organining arizasiga ko‘ra sud qaroriga muvofiq ushbu soliq to‘lovchining banklardagi hisobvaraqlari bo‘yicha operatsiyalar to‘xtatib turilgan hisobvaraqlari sud qarori asosida qayta harakatga keltirilgan hollarda asosiy depozit hisobvaraqqa xizmat ko‘rsatuvchi bank tomonidan BDMAB orqali Davlat soliq qo‘mitasiga va barcha ikkilamchi hisobvaraq ochgan banklarga uzatiladi.”.