Oʻzbekiston Respublikasi Prezidentining “Oʻzbekipaksanoat” uyushmasi faoliyatini tashkil etish chora-tadbirlari toʻgʻrisida” 2017-yil 29-martdagi PQ-2856-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirishlar va qoʻshimcha kiritilsin.

2. Vazirliklar va idoralar bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — qishloq va suv xoʻjaligi vaziri Z.T. Mirzayev zimmasiga yuklansin.

1. Vazirlar Mahkamasining “Respublikada yetishtirilgan pilladan foydalanish mexanizmini kuchaytirish chora-tadbirlari toʻgʻrisida” 2000-yil 4-martdagi 77-son qarorida:

a) 2-bandning ikkinchi xatboshidagi “Oʻzbekyengilsanoat” davlat-aksiyadorlik kompaniyasi ipakchilik sanoati korxonalarining” soʻzlari “Oʻzbekipaksanoat” uyushmasi tarkibiga kiruvchi tashkilotlarning” soʻzlari bilan almashtirilsin;

b) 3-band oʻz kuchini yoʻqotgan deb hisoblansin;

v) 4-bandning birinchi xatboshidagi “Qishloq va suv xoʻjaligi vazirligi” soʻzlari “Qishloq va suv xoʻjaligi vazirligi, “Oʻzbekipaksanoat” uyushmasi” soʻzlari bilan almashtirilsin;

g) 5-bandning birinchi xatboshidagi “Oʻzbekyengilsanoat” davlat-aksiyadorlik kompaniyasi ipakchilik sanoati korxonalariga” soʻzlari “Oʻzbekipaksanoat” uyushmasi tarkibiga kiruvchi tashkilotlarga” soʻzlari bilan almashtirilsin.

2. Vazirlar Mahkamasining “Pillachilikning ozuqa bazasini mustahkamlash va ipakchilik mahsulotlari yetishtirish hajmlarini koʻpaytirish chora-tadbirlari toʻgʻrisida” 2000-yil 15-martdagi 96-son qarorida:

a) 3-bandda:

birinchi xatboshidagi “Oʻzbekiston Respublikasi Qishloq va suv xoʻjaligi vazirligi” soʻzlari chiqarib tashlansin;

ikkinchi xatboshi chiqarib tashlansin;

b) 8-bandning birinchi xatboshidagi “Oʻzbekyengilsanoat” davlat-aksiyadorlik kompaniyasi Oʻzbekiston Respublikasi Xususiylashtirish, monopoliyadan chiqarish va raqobatni rivojlantirish davlat qoʻmitasi” soʻzlari “Oʻzbekipaksanoat” uyushmasi Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi” soʻzlari bilan almashtirilsin;

v) 9-bandning ikkinchi xatboshidagi “Oʻzbekiston Respublikasi Qishloq va suv xoʻjaligi vazirligining pilla tayyorlash va “Oʻzbekyengilsanoat” davlat-aksiyadorlik kompaniyasining ipak yigirish korxonalariga” soʻzlari “Oʻzbekipaksanoat” uyushmasi tarkibiga kiruvchi tashkilotlarga” soʻzlari bilan almashtirilsin.

3. Vazirlar Mahkamasining “Oʻzbekiston Respublikasi pillachilik sohasini yanada rivojlantirish chora-tadbirlari toʻgʻrisida” 2002-yil 5-apreldagi 118-son qarorida:

a) 2-bandning ikkinchi xatboshidagi “Oʻzbekiston Respublikasi Qishloq va suv xoʻjaligi vazirligi hamda “Oʻzbekyengilsanoat” davlat-aksiyadorlik kompaniyasi korxonalari” soʻzlari “Oʻzbekipaksanoat” uyushmasi tarkibiga kiruvchi tashkilotlar” soʻzlari bilan almashtirilsin;

b) 3-banddagi “2002-yildan boshlab har yili Oʻzbekiston Respublikasi Qishloq va suv xoʻjaligi vazirligi hamda “Oʻzbekyengilsanoat” davlat-aksiyadorlik kompaniyasi korxonalariga” soʻzlari “har yili “Oʻzbekipaksanoat” uyushmasi tarkibiga kiruvchi tashkilotlarga” soʻzlari bilan almashtirilsin;

v) 5-band oʻz kuchini yoʻqotgan deb hisoblansin.

4. Vazirlar Mahkamasining “Oʻzbekiston Respublikasi Qishloq va suv xoʻjaligi vazirligi faoliyatini tashkil etishni takomillashtirish toʻgʻrisida” 2003-yil 28-iyundagi 290-son qaroriga 2-ilovaning 31-bandi (Oʻzbekiston Respublikasi QT, 2003-y., 6-son, 51-modda) oʻz kuchini yoʻqotgan deb hisoblansin.

5. Vazirlar Mahkamasining “Pillachilik sohasi korxonalarining moliyaviy faoliyatini barqarorlashtirish chora-tadbirlari toʻgʻrisida” 2003-yil 9-sentabrdagi 390-son qarorida (Oʻzbekiston Respublikasi QT, 2003-y., 9-son, 82-modda):

a) 3-bandda:

birinchi xatboshidagi “Oʻzbekyengilsanoat” davlat-aksiyadorlik kompaniyasi korxonalarini” soʻzlari “Oʻzbekipaksanoat” uyushmasi tarkibiga kiruvchi tashkilotlarni” soʻzlari bilan almashtirilsin;

ikkinchi xatboshidagi “2003-yildan boshlab, tegishli ravishda “Oʻzbekyengilsanoat” davlat-aksiyadorlik kompaniyasi hamda Oʻzbekiston Respublikasi Qishloq va suv xoʻjaligi vazirligi korxonalariga” soʻzlari “Oʻzbekipaksanoat” uyushmasi tarkibiga kiruvchi tashkilotlarga” soʻzlari bilan almashtirilsin;

b) 4-bandda:

birinchi xatboshidagi “2004-yil hosilidan boshlab” soʻzlari chiqarib tashlansin;

ikkinchi xatboshidagi “Oʻzbekiston Respublikasi Qishloq va suv xoʻjaligi vazirligi korxonalari” soʻzlari “Oʻzbekipaksanoat” uyushmasi tarkibiga kiruvchi tashkilotlar” soʻzlari bilan almashtirilsin;

beshinchi xatboshidagi “Oʻzbekiston Respublikasi Qishloq va suv xoʻjaligi vazirligi korxonalarining” soʻzlari “Oʻzbekipaksanoat” uyushmasi tarkibiga kiruvchi tashkilotlarning” soʻzlari bilan almashtirilsin.

6. Vazirlar Mahkamasining 2011-yil 8-sentabrdagi 252-son qarori (Oʻzbekiston Respublikasi QT, 2011-y., 9-son, 75-modda) bilan tasdiqlangan Davlat pensiyalarini tayinlash va toʻlash tartibi toʻgʻrisidagi Nizomning 5-ilovasiga quyidagi mazmundagi 3-band qoʻshilsin:

“3. Ipakchilik tarmogʻi korxonalaridagi ishlar:

a) tut urugʻi tayyorlash;

b) tut nihollari va tut koʻchatlari yetishtirish;

v) tut ipak qurti urugʻlarini inkubatoriyalarda jonlantirish;

g) tut ipak qurti parvarishlash;

d) tirik va quriq pillani saralash;

e) tirik pillani quritish;

j) pillani qoʻl kuchi yordamida tashish;

z) pilladan namunalar olish (laboratoriyada saralash uchun);

i) urugʻchilik korxonalarida kapalaklarni jinslarga ajratish;

k) tut ipak qurti urugʻlarini mikrotahlildan oʻtkazish;

l) tut ipak qurti urugʻlariga ishlov berish;

m) tut ipak qurti urugʻlarini qishlash davridagi ishlar;

n) tut ipak qurti urugʻlarini qadoqlash va yorliqlash”.

7. Vazirlar Mahkamasining “Qashqadaryo viloyatining Qarshi shahrida tugatilgan “Qarshi 16-son avtobus saroyi” ochiq aksiyadorlik jamiyatining mulkiy kompleksi negizida xom ipakni qayta ishlaydigan zamonaviy ishlab chiqarishni tashkil etish chora-tadbirlari toʻgʻrisida” 2012-yil 5-noyabrdagi 315-son qarorida (Oʻzbekiston Respublikasi QHT, 2012-y., 45-son, 513-modda):

3-bandda:

a) birinchi xatboshidagi “Oʻzbekiston Respublikasi Davlat mulki qoʻmitasi” soʻzlari “Oʻzbekiston Respublikasi Davlat raqobat qoʻmitasi” soʻzlari bilan almashtirilsin;

b) uchinchi xatboshidagi “Oʻzbekiston Respublikasi Tashqi iqtisodiy aloqalar, investitsiyalar va savdo vazirligi va “Oʻzbekyengilsanoat” davlat-aksiyadorlik kompaniyasi” soʻzlari “Oʻzbekiston Respublikasi Tashqi savdo vazirligi va “Oʻzbekipaksanoat” uyushmasi” soʻzlari bilan almashtirilsin.