250-сон 01.05.2017. Oʻzbekiston Respublikasi Prezidentining “Yuridik xizmat faoliyatini tubdan takomillashtirish chora-tadbirlari toʻgʻrisida” 2017-yil 19-yanvardagi PQ-2733-son qarorini amalga oshirish chora-tadbirlari haqida

Hujjat 14.02.2018 sanasi holatiga
Amaldagi versiyaga o‘tish

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Yuridik xizmat faoliyatini tubdan takomillashtirish chora-tadbirlari toʻgʻrisida” 2017-yil 19-yanvardagi PQ-2733-son qarorini amalga oshirish chora-tadbirlari haqida

1. Oʻzbekiston Respublikasi Prezidentining “Yuridik xizmat faoliyatini tubdan takomillashtirish chora-tadbirlari toʻgʻrisida” 2017-yil 19-yanvardagi PQ-2733-son qaroriga asosan:

davlat organlari, xoʻjalik boshqaruvi organlari, davlat korxonalari, muassasalari va tashkilotlarida (keyingi oʻrinlarda davlat organlari va tashkilotlari deb ataladi), shu jumladan ularning hududiy boʻlinmalarida majburiy tartibda yuridik xizmatlar tashkil etilishi;

davlat organlari va tashkilotlarining yuridik xizmatlari xodimlariga adliya organlari xodimlariga belgilangan martaba darajalarini berish, uzoq muddat xizmat qilganligi uchun ustamalarni toʻlash tartibi tatbiq etilishi;

xodim boshqa davlat organlariga, shu jumladan huquqni muhofaza qiluvchi va nazorat organlariga ishga oʻtganda yuridik xizmat xodimi sifatidagi mehnat staji martaba darajalari uchun ustamalarni va uzoq muddat xizmat qilganligi uchun qoʻshimcha haqlarni hisoblab chiqish va toʻlash uchun ish stajiga qoʻshib hisoblanishi;

yuridik xizmat xodimlari har chorakda sudgacha va sud tartibida davlat organi va tashkiloti foydasiga hal qilingan nizolar yuzasidan undirilgan mablagʻning 5 foizi, biroq qonun hujjatlarida belgilangan tartibda eng kam oylik ish haqining 50 barobaridan koʻp boʻlmagan miqdorda mukofotlanishi belgilanganligi maʼlumot uchun qabul qilinsin.

Keyingi tahrirga qarang.

2. Quyidagilar:

respublika, hududiy (viloyat) va tuman (shahar) darajasidagi davlat organlari va tashkilotlarining yuridik xizmatlari xodimlari mehnatiga haq toʻlash boʻyicha lavozim razryadlari 1, 1a va 1b-ilovalarga muvofiq;

davlat organlari va tashkilotlari yuridik xizmatlarining martaba darajalariga ega boʻlgan xodimlariga uzoq muddat xizmat qilganligi uchun beriladigan har oylik ustama haq miqdorlari (lavozim maoshiga nisbatan foizlarda) 2-ilovaga muvofiq;

davlat organlari va tashkilotlari yuridik xizmatlari xodimlarining lavozim maoshlariga martaba darajalari uchun qoʻshiladigan har oylik ustamalar miqdorlari 3-ilovaga muvofiq;

davlat organlari va tashkilotlarida yuridik xizmatlarni tashkil etish shakllari 4-ilovaga muvofiq;

davlat organlari va tashkilotlarida yuridik xizmatlar tashkil etishning minimal normativlari va mezonlari 5-ilovaga muvofiq;

Sudgacha va sud tartibida davlat organi va tashkiloti foydasiga hal qilingan nizolar yuzasidan undirilgan mablagʻlar hisobidan yuridik xizmat xodimlarini mukofotlash tartibi toʻgʻrisidagi nizom 6-ilovaga muvofiq tasdiqlansin.

3. Davlat organlari va tashkilotlari hamda ularning tarkibiy va hududiy boʻlinmalari rahbarlariga:

boshqaruv xodimlarining belgilangan soni va mehnatga haq toʻlash fondi doirasida oʻz yuridik xizmatlarini mazkur qarorga 5-ilovaga muvofiq tasdiqlangan yuridik xizmatlar tashkil etishning minimal normativlari va mezonlariga muvofiqlashtirish;

yuridik xizmatlar faoliyatini tartibga soluvchi qonun hujjatlari talablariga soʻzsiz rioya etilishini taʼminlash, yuridik xizmatlar faoliyati samaradorligini oshirish boʻyicha taʼsirchan choralarni amalga oshirish;

Keyingi tahrirga qarang.

har yili koʻrsatib oʻtilgan organlar va tashkilotlar faoliyatida qonun ustuvorligi va qonuniylikni taʼminlash boʻyicha ishlar toʻgʻrisida yuridik xizmatning hisobotini eshitish boʻyicha shaxsiy javobgarlik yuklansin.

4. Oʻzbekiston Respublikasi Adliya vazirligi:

davlat organlari va tashkilotlarining yuridik xizmatlari tomonidan yuridik xizmatlar faoliyatini tartibga soluvchi qonun hujjatlari talablariga rioya etilishining muntazam ravishda hamda har tomonlama monitoringi olib borilishini va tahlil qilinishini taʼminlasin;

Keyingi tahrirga qarang.

zarurat boʻlganda yuridik xizmatlar toʻgʻrisidagi qonun hujjatlarini yanada takomillashtirishga qaratilgan takliflarni belgilangan tartibda kiritsin;

Keyingi tahrirga qarang.

yuridik xizmatlar faoliyatini tartibga soluvchi qonun hujjatlari talablarining yuridik xizmat xodimlari va boshqa mansabdor shaxslar tomonidan buzilishi holatlarini belgilangan tartibda bartaraf etishga qaratilgan choralarni koʻrsin.

Keyingi tahrirga qarang.

5. Belgilansinki:

ushbu qaror talablari davlat organlari va tashkilotlari uchun majburiy boʻlib, boshqa tashkilotlar uchun tavsiya tusiga ega;

Oldingi tahrirga qarang.

Vazirlar Mahkamasi Apparati boshqaruvchisining huquqiy ekspertiza masalalari boʻyicha oʻrinbosariga, uning apparati yetakchi mutaxassisiga va Oʻzbekiston Respublikasi Vazirlar Mahkamasining Huquqiy ekspertiza, xalqaro shartnomalar va tashqi aloqalarni rivojlantirish boshqarmasi xodimlariga uzoq muddat xizmat qilganligi uchun ustamalar va martaba darajalari uchun lavozim maoshlariga har oylik qoʻshimcha haq Oʻzbekiston Respublikasi Davlat budjeti mablagʻlari hisobidan adliya organlari xodimlari uchun belgilangan tartibda va miqdorlarda toʻlanadi;

(5-bandning uchinchi xatboshisi Oʻzbekiston Respublikasi Vazirlar Mahkamasining 2018-yil 12-fevraldagi 107-sonli qarori tahririda — Qonun hujjatlari maʼlumotlari milliy bazasi, 14.02.2018-y., 09/18/107/0697-son)

Keyingi tahrirga qarang.

Oʻzbekiston Respublikasi Oliy Majlisining Qonunchilik palatasi va Senatiga oʻz yuridik xizmatlari xodimlariga adliya organlari uchun belgilangan uzoq muddat xizmat qilganligi uchun ustamalarni va martaba darajalari uchun lavozim maoshlariga har oylik qoʻshimcha haqni Oʻzbekiston Respublikasi Davlat budjeti mablagʻlari hisobidan toʻlash masalasini koʻrib chiqish tavsiya etilsin.

6. Oʻzbekiston Respublikasi Hukumatining 7-ilovaga muvofiq ayrim qarorlariga qoʻshimcha va oʻzgartirishlar kiritilsin.

7. Oʻzbekiston Respublikasi Hukumatining 8-ilovaga muvofiq baʼzi qarorlari oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasining Bosh vaziri oʻrinbosari R.S. Azimov va Oʻzbekiston Respublikasi adliya vaziri M.M. Ikramov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 1-may,

250-son

Vazirlar Mahkamasining 2017-yil 1-maydagi 250-son qaroriga
1-ILOVA

Respublika darajasidagi davlat organlari va tashkilotlarining yuridik xizmati xodimlari mehnatiga haq toʻlash boʻyicha

LAVOZIM RAZRYADLARI

T/r	Lavozim	Yagona tarif setkasi boʻyicha mehnatga haq toʻlash razryadi
1.	Yuridik departament yoki yuridik boshqarma boshligʻi	16
2.	Yuridik boʻlim yoki yuridik byuro boshligʻi	14
3.	Bosh yuriskonsult	12
4.	Yetakchi yuriskonsult, katta yuriskonsult va yuriskonsult	11
5.	Yordamchi yuriskonsult	9

Izoh:

1. Qonun hujjatlarida respublika darajasidagi ayrim davlat organlari va tashkilotlari uchun yuridik xizmat xodimlari mehnatiga haq toʻlashning ushbu ilovada belgilangan razryadlardan yuqoriroq razryadlari belgilangan taqdirda, mehnatga haq yuqori belgilangan razryadlar boʻyicha toʻlanadi.

Keyingi tahrirga qarang.

2. Bitta shtat birligidan iborat respublika darajasidagi davlat organlari va tashkilotlari yuridik xizmati xodimlari mehnatga haq toʻlash razryadlari yuridik boʻlim boshligʻi uchun belgilangan darajada belgilanadi.

Keyingi tahrirga qarang.

Vazirlar Mahkamasining 2017-yil 1-maydagi 250-son qaroriga
1a-ILOVA

Hududiy(viloyat) darajadagi davlat organlari va tashkilotlarining yuridik xizmati xodimlari mehnatiga haq toʻlash boʻyicha

LAVOZIM RAZRYADLARI

T/r	Lavozimning nomi	Yagona tarif setkasi boʻyicha mehnatga haq toʻlash razryadi
		hududiy (viloyat) darajasidagi davlat organlari va tashkilotlari
		guruhdan tashqari	1-guruh	2-guruh	3-guruh
1.	Yuridik boʻlim yoki yuridik byuro boshligʻi	14	13	12	11
2.	Bosh yuriskonsult	12	11	10	9
3.	Yetakchi yuriskonsult, katta yuriskonsult va yuriskonsult	11	10	9	8
4.	Yordamchi yuriskonsult	9	8	7	6

Izoh:

1. Qonun hujjatlarida hududiy (viloyat) darajasidagi ayrim davlat organlari va tashkilotlari uchun yuridik xizmat xodimlari mehnatiga haq toʻlashning ushbu ilovada belgilangan razryadlardan yuqoriroq razryadlari belgilangan taqdirda, mehnatga haq yuqori belgilangan razryadlar boʻyicha toʻlanadi.

Keyingi tahrirga qarang.

2. Bitta shtat birligidan iborat hududiy (viloyat) darajasidagi davlat organlari va tashkilotlari yuridik xizmati xodimlari mehnatga haq toʻlash razryadlari bosh yuriskonsult uchun belgilangan darajada belgilanadi.

Vazirlar Mahkamasining 2017-yil 1-maydagi 250-son qaroriga
1b-ILOVA

Tuman (shahar) darajasidagi davlat organlari va tashkilotlarining yuridik xizmati xodimlari mehnatiga haq toʻlash boʻyicha

LAVOZIM RAZRYADLARI

T/r	Lavozimning nomi	Yagona tarif setkasi boʻyicha mehnatga haq toʻlash razryadi
		tuman (shahar) darajasidagi davlat organlari va tashkilotlarida
		1-guruh	2-guruh
1.	Bosh yuriskonsult	9	8
2.	Yetakchi yuriskonsult, katta yuriskonsult yoki yuriskonsult	8	7
3.	Yuriskonsultning yordamchisi	7	6

Izoh:

1. Qonun hujjatlarida tuman (shahar) darajasidagi ayrim davlat organlari va tashkilotlari uchun yuridik xizmat xodimlari mehnatiga haq toʻlashning ushbu ilovada belgilangan razryadlardan yuqoriroq razryadlari belgilangan taqdirda, mehnatga haq yuqori belgilangan razryadlar boʻyicha toʻlanadi.

Keyingi tahrirga qarang.

2. Bitta shtat birligidan iborat tuman (shahar)darajasidagi davlat organlari va tashkilotlari yuridik xizmati xodimlari mehnatga haq toʻlash razryadlari bosh yuriskonsult uchun belgilangan darajada belgilanadi.

Vazirlar Mahkamasining 2017-yil 1-maydagi 250-son qaroriga
2-ILOVA

Davlat organlari va tashkilotlari yuridik xizmatlarining martaba darajalariga ega boʻlgan xodimlariga uzoq muddat xizmat qilganligi uchun beriladigan har oylik

ustamalar miqdorlari
(lavozim maoshiga nisbatan foizlarda)


Yuridik xizmat xodimi sifatidagi mehnat staji:
2 yildan 5 yilgacha boʻlganda	—	5%
5 yildan 10 yilgacha boʻlganda	—	10%
10 yildan 15 yilgacha boʻlganda	—	15%
15 yildan 20 yilgacha boʻlganda	—	20%
20 yildan 25 yilgacha boʻlganda	—	25%
25 yildan ortiq boʻlganda	—	30%

Izoh:

1. Davlat organlari va tashkilotlari yuridik xizmatlarining martaba darajalariga ega boʻlgan xodimlariga ushbu ilova bilan belgilangan uzoq muddat xizmat qilganligi uchun har oylik ustamalar miqdorlari tizimida harbiy va maxsus unvonlar (malaka toifalari, diplomatik daraja va boshqalar) berishning boshqacha tartibi amal qiladigan alohida davlat organlariga tatbiq qilinmaydi.

2. Davlat organlari va tashkilotlari yuridik xizmatlarining martaba darajalariga ega boʻlgan xodimlariga uzoq muddat xizmat qilganligi uchun beriladigan har oylik ustamalarni hisoblashda, ularning adliya organlari va muassasalaridagi faoliyatining, shuningdek davlat organlari va tashkilotlarida yuridik xizmat xodimi sifatida ishlagan barcha davri hisobga olinadi.

Vazirlar Mahkamasining 2017-yil 1-maydagi 250-son qaroriga
3-ILOVA

Davlat organlari va tashkilotlari yuridik xizmatlari xodimlarining lavozim maoshlariga martaba darajalari uchun qoʻshiladigan qoʻshimcha haq

miqdorlari

Nomi	Lavozim maoshlariga foizlarda qoʻshimcha haq miqdori
3-darajali yurist	15
2-darajali yurist	16
1-darajali yurist	16
3-darajali adliya maslahatchisi	17
2-darajali adliya maslahatchisi	17
1-darajali adliya maslahatchisi	18

Izoh: Davlat organlari va tashkilotlari yuridik xizmatlari xodimlarining lavozim maoshlariga ushbu ilova bilan belgilangan martaba darajalari uchun qoʻshiladigan qoʻshimcha haq miqdorlari tizimida harbiy va maxsus unvonlar (malaka toifalari, diplomatik daraja va boshqalar) berishning boshqacha tartibi amal qiladigan alohida davlat organlariga tatbiq qilinmaydi.

Vazirlar Mahkamasining 2017-yil 1-maydagi 250-son qaroriga
4-ILOVA

Davlat organlari va tashkilotlarining yuridik xizmatlarini tashkil etish

shakllari

T/r	Yuridik xizmatning nomi	Belgilangan shtatlar miqdori
1.	Yuridik departament	8 va undan ortiq
2.	Yuridik boshqarma	5 — 7
3.	Yuridik boʻlim	3-4
4.	Yuridik byuro	2
5.	Bosh, yetakchi, katta yuriskonsult yoki yuriskonsult	1

Keyingi tahrirga qarang.

Vazirlar Mahkamasining 2017-yil 1-maydagi 250-son qaroriga
5-ILOVA

Davlat organlari va tashkilotlarining yuridik xizmatlarini tashkil etishning

MINIMAL NORMATIVLARI VA MEZONLARI

I. Respublika darajasidagi davlat organlari va tashkilotlari

Mavjud shtat birliklari			Tuzilmadagi alohida tashkilotlar soni	Yillik koʻrsatkich				Har bir ustun boʻyicha hisoblanadigan koeffitsiyent miqdori	Yuridik xizmatlarning minimal shtat birliklari soni
Respublika darajasidagi davlat organlari va tashkilotlari	Hududiy (viloyat) darajasidagi davlat organlari va tashkilotlari	Tuman (shahar) darajasidagi davlat organlari va tashkilotlarida	Tuzilmadagi alohida tashkilotlar soni	Ishlab chiqilgan va ekspertizadan oʻtkazilgan normativ-huquqiy hujjat loyihalari	Qabul qilingan buyruq, farmoyish, shartnoma va yuridik xususiyatga ega boʻlgan boshqa hujjatlar	Davlat organlari va tashkilotlari ishtirokidagi sud jarayonlari	Davlat organlari va tashkilotlarining qarori yoki mansabdor shaxslarining harakati yoki harakatsizligi ustidan tushgan shikoyatlar	Har bir ustun boʻyicha hisoblanadigan koeffitsiyent miqdori	Yuridik xizmatlarning minimal shtat birliklari soni
50 tagacha	140 tagacha	193 tagacha	28 tagacha	50 tagacha	500 tagacha	50 tagacha	50 tagacha	0,12	1
50-100	140-170	193-386	28-56	50–100	500–1000	50–100	50–100	0,25	2
100-200	170-200	386-579	56-84	100–200	1000–1500	100–200	100–150	0,38	3
200-400	200-230	579-772	84-112	200–300	1500–2000	200–300	150–200	0,63	5
400 ta dan ortiq	230 ta dan ortiq	772 ta dan ortiq	112 ta dan ortiq	300 ta dan ortiq	2000 ta dan ortiq	300 ta dan ortiq	200 ta dan ortiq	1,00	8

II. Hududiy(viloyat) darajadagi davlat organlari va tashkilotlari

Mavjud shtat birliklari		Tuzilmadagi alohida tashkilotlar soni	Yillik koʻrsatkich			Har bir ustun uchun hisoblanadigan koeffitsiyent miqdori	Yuridik xizmatlarning belgilanadigan minimal shtat birliklari soni
Hududiy darajadagi davlat organlari va tashkilotlari	Tuman (shahar) darajasidagi davlat organlari va tashkilotlari	Tuzilmadagi alohida tashkilotlar soni	Qabul qilingan yuridik hujjatlar, buyruqlar, farmoyishlar, shartnomalar va boshqa hujjatlar	Davlat organi va tashkiloti ishtirokidagi sud jarayonlari	Davlat organlari va tashkilotlarining qarori yoki ular mansabdor shaxslarining harakati yoki harakatsizligi ustidan tushgan shikoyatlar	Har bir ustun uchun hisoblanadigan koeffitsiyent miqdori
50 tagacha	50 tagacha	14 tagacha	500 tagacha	50 tagacha	50 tagacha	0,08	0.5
50–75	50–100	14-28	500–1000	50–100	50–100	0,17	1
75–100	100–150	28-42	1000–1500	100–200	100–150	0,34	2
100 ta dan ortiq	150 ta dan ortiq	42 ta dan ortiq	1500 ta dan ortiq	200 ta dan ortiq	150 ta dan ortiq	0,50	3

III. Tuman (shahar) darajasidagi davlat organlari va tashkilotlari*

Tuman (shahar) darajasidagi davlat organlari va tashkilotlaridagi mavjud shtat birliklari	Tuzilmadagi alohida tashkilotlar soni	Bir yillik koʻrsatkich			Har bir ustun uchun hisoblanadigan koeffitsiyent miqdori	Yuridik xizmatlarning minimal shtat birliklari
	Tuzilmadagi alohida tashkilotlar soni	Qabul qilingan yuridik hujjatlar, buyruqlar, farmoyishlar, shartnomalar va boshqa hujjatlar	Davlat organlari va tashkilotlari ishtirokidagi sud jarayonlari	Davlat organlari va tashkilotlarining qarori yoki ular mansabdor shaxslarining harakati yoki harakatsizligi ustidan tushgan shikoyatlar	Har bir ustun uchun hisoblanadigan koeffitsiyent miqdori	Yuridik xizmatlarning minimal shtat birliklari
40 tagacha	5 tagacha	500 tagacha	50 tagacha	50 tagacha	0,10	0,5
40 ta dan ortiq	5 ta dan ortiq	500 ta dan ortiq	50 ta dan ortiq	50 ta dan ortiq	0,20	1

* Tuman (shahar) xalq taʼlimi muassasalari faoliyatini metodik taʼminlash va tashkil etish boʻlimlari va tibbiyot birlashmalarining yuridik xizmatlari xodimlari tuman (shahar) xalq taʼlimi muassasalari faoliyatini metodik taʼminlash va tashkil etish boʻlimlari va tibbiyot birlashmalari tizimiga kiruvchi tashkilotlarga yuridik xizmatlar koʻrsatadi.

Koʻrsatilgan normativlar va mezonlar tuman (shahar) xalq taʼlimi muassasalari faoliyatini metodik taʼminlash va tashkil etish boʻlimlari va tibbiyot birlashmalari tizimiga kiruvchi budjet muassasalariga tatbiq qilinmaydi.

Keyingi tahrirga qarang.

Izoh.

1. Davlat organlari va tashkilotlarining yuridik xizmatlari minimal shtat birliklari ushbu jadvalda koʻrsatilgan koeffitsiyentlarni qoʻshish orqali aniqlanadi.

Bunda hosil boʻlgan son 0,50 dan (1,50, 2,55 va hokazo) ortiq boʻlganda ushbu son 1 gacha, 0,25 (1,26, 2,27 va hokazo)dan ortiq boʻlganda ushbu son 0,50 gacha yaxlitlanadi, agar 0,25 dan (1,23, 2,24 va hokazo) past boʻlsa (0,25 ning oʻzi ham) hisobga olinmaydi.

Davlat organlari va tashkilotlarida yuridik xizmatlar tashkil etishning minimal normativlarini hisoblash boʻyicha shartli misol:

Masalan: hududiy (viloyat) darajasidagi davlat organi yoki tashkilotida 80 kishi ishlaydi. Ushbu tashkilotning tuman (shahar)lar darajasidagi tuzilmalari soni 13 tani tashkil etib, ularda 160 kishi ishlaydi. 1 yilda oʻrtacha 1200 tagacha buyruq, farmoyish, shartnoma va yuridik xususiyatga ega boʻlgan boshqa hujjatlar qabul qilinadi. Shuningdek, 195 ta sud majlislarida ishtirok etiladi. Davlat organi va tashkilotining qarori yoki mansabdor shaxsining harakati (harakatsizligi) ustidan tushgan shikoyatlar soni yiliga oʻrtacha 150 tani tashkil etadi. Bunda: 0,34+0,08+0,50+0,34+0,34+0,50=2,1. Yaʼni ushbu tashkilotda yuridik xizmat uchun belgilanadigan minimal shtat birliklari soni 2 tani tashkil etadi.

2. Viloyatlar va Toshkent shahri hokimliklarida 2 tadan, tumanlar va shaharlar hokimliklarida 1 tadan yuridik xizmat uchun minimal shtat birliklari belgilanadi.

3. Davlat organlari va tashkilotlari rahbarlari xodimlarning belgilangan umumiy soni doirasida oʻzlarining yuridik xizmatlari uchun ushbu minimal normativlar va mezonlarda nazarda tutilganidan koʻproq shtat birliklarini belgilashi mumkin.

Vazirlar Mahkamasining 2017-yil 1-maydagi 250-son qaroriga
6-ILOVA

Sudgacha va sud tartibida davlat organi va tashkiloti foydasiga hal qilingan nizolar yuzasidan undirilgan mablagʻlar hisobidan yuridik xizmat xodimlarini mukofotlash tartibi toʻgʻrisida

NIZOM

1-bob. Umumiy qoidalar

1. Ushbu Nizom sudgacha va sud tartibida davlat organi va tashkiloti foydasiga hal qilingan nizolar yuzasidan undirilgan mablagʻlar hisobidan yuridik xizmat xodimlarini mukofotlash tartibini belgilaydi.

2. Ushbu Nizom talablari davlat organlari, xoʻjalik boshqaruvi organlari, davlat korxonalari, muassasalari va tashkilotlarining (keyingi oʻrinlarda davlat organlari va tashkilotlari deb ataladi) yuridik xizmatlariga nisbatan tatbiq etiladi.

Boshqa tashkilotlar uchun ushbu Nizom talablari tavsiya tusiga ega.

3. Ushbu Nizomning maqsadlari uchun quyidagi asosiy tushunchalardan foydalaniladi:

mukofot puli — yuridik xizmat xodimlari tomonidan sudgacha va sud tartibida davlat organi va tashkiloti foydasiga hal qilingan nizolar yuzasidan undirilgan summaning 5 foizi, biroq eng kam oylik ish haqining 50 barobaridan koʻp boʻlmagan miqdorda yuridik xizmat xodimlariga beriladigan choraklik mukofot;

Keyingi tahrirga qarang.

undirilgan mablagʻlar — sudgacha va sud tartibida davlat organi va tashkiloti foydasiga hal qilingan nizolar yuzasidan davlat organi va tashkilotining hisob raqamlariga yoki shaxsiy gʻaznachilik hisobvaraqlariga tushgan pul mablagʻi.

4. Yuridik xizmat xodimlari tomonidan undirilgan quyidagi mablagʻlar davlat organlari va tashkilotlari tomonidan mukofot pulini toʻlashda hisobga olinadi:

davlat organlari va tashkilotlari tomonidan toʻliq yoki qisman tan olingan daʼvolar boʻyicha undirilgan mablagʻlar;

hakamlik sudining qarorlari asosida undirilgan mablagʻlar;

fuqarolik ishlari va iqtisodiy nizolar boʻyicha sudlarning hal qiluv qarorlari, ajrimlari va qarorlari bilan undirilgan mablagʻlar;

jinoyat ishlari boʻyicha sudlarning hukmlari, ajrimlari va qarorlarining mulkiy undirishga oid qismi bilan undirilgan mablagʻlar;

maʼmuriy huquqbuzarliklar toʻgʻrisidagi ishlar boʻyicha undirilgan mablagʻlar;

notariuslarning ijro xatlariga asosan undirilgan mablagʻlar;

boshqa undirilgan mablagʻlar.

2-bob. Undirilgan mablagʻlar hisobidan yuridik xizmat xodimlarini mukofotlash tartibi

5. Yuridik xizmat xodimlari har chorakda sudgacha va sud tartibida davlat organi va tashkiloti foydasiga hal qilingan nizolar yuzasidan undirilgan summaning 5 foizi, biroq eng kam oylik ish haqining 50 barobaridan koʻp boʻlmagan miqdorda mukofotlanadi.

Keyingi tahrirga qarang.

Mukofot puli davlat organlari va tashkilotlari foydasiga hal qilingan nizolar boʻyicha davlat organi va tashkilotining hisob raqamlariga yoki shaxsiy gʻaznachilik hisobvaraqlariga tushgan umumiy mablagʻlardan hisoblab chiqariladi.

Hal etilgan nizolar boʻyicha undirilgan mablagʻlarning bir qismi keyingi chorak davomida davlat organi va tashkiloti hisob raqamiga yoki shaxsiy gʻaznachilik hisobvaraqlariga tushgan taqdirda, mukofot pulining qolgan qismi ushbu chorak yakuni boʻyicha toʻlanadi.

Mukofot puli mablagʻlar davlat organi va tashkiloti hisob raqamlariga yoki shaxsiy gʻaznachilik hisobvaraqlariga tushgandan soʻng toʻlanadi.

6. Sudgacha va sud tartibida davlat organi va tashkiloti foydasiga hal qilingan nizolar yuzasidan undirilgan mablagʻlar hisobidan yuridik xizmat xodimlarini mukofotlash boshqa mukofotlar va mehnat haqi tizimida nazarda tutilgan boshqa toʻlovlar toʻlanishini istisno qilmaydi.

7. Mukofot pulini toʻlash haqida buyruq (farmoyish) chiqarilishiga yuridik xizmat rahbarining bildirgisi asos boʻladi.

Shtat birligida bitta yuridik xizmat xodimi nazarda tutilgan hollarda mukofot pulini toʻlash haqida buyruq (farmoyish) chiqarilishiga ushbu xodimning bildirgisi va unga ilova qilingan davlat organi va tashkiloti foydasiga undirilgan mablagʻni tasdiqlovchi hujjatlar asos boʻladi.

8. Yuridik xizmat tomonidan hal etilgan nizolar boʻyicha mablagʻlar davlat organlari va tashkilotlari hisob raqamlariga yoki shaxsiy gʻaznachilik hisob raqamlariga tushganligi davlat organlari va tashkilotlari buxgalteriyasi va/yoki mablagʻlarning tushishini hisobga olish vazifasi yuklangan tarkibiy boʻlinmalar (xodim) tomonidan berilgan maʼlumotnoma asosida tasdiqlanadi. Bunda maʼlumotnoma yuridik xizmat rahbarining yozma soʻroviga muvofiq uch ish kuni ichida beriladi.

Shtatda faqat bitta yuridik xizmat xodimi nazarda tutilgan hollarda maʼlumotnoma ushbu xodimning yozma soʻroviga asosan beriladi.

3-bob. Mukofot pulini yuridik xizmat xodimlari oʻrtasida taqsimlash tartibi

9. Mukofot puli yuridik xizmat rahbari tomonidan yuridik xizmatning har bir xodimining ish faoliyati natijalari samaradorligiga qarab har chorak yakuni boʻyicha taqsimlanadi.

Mukofot pulini xodimlarga taqsimlash mukofot pulini toʻlash toʻgʻrisida buyruq (farmoyish) chiqarish uchun yuridik xizmat rahbari tomonidan beriladigan bildirgida koʻrsatilishi lozim.

Agar mukofot pulini toʻlash toʻgʻrisida buyruq (farmoyish) chiqarish toʻgʻrisida yuridik xizmat rahbari tomonidan beriladigan bildirgida mukofot pulini xodimlarga taqsimlash tartibi koʻrsatilmagan boʻlsa, mukofot puli yuridik xizmat xodimlariga teng taqsimlanadi.

Davlat organi va tashkiloti rahbari davlat organi va tashkiloti foydasiga hal qilingan nizolar yuzasidan mablagʻ undirishdagi xizmatini inobatga olgan holda mukofot pulini yuridik xizmatning bir yoki bir necha xodimiga toʻlash toʻgʻrisida buyruq (farmoyish) chiqarishga haqli.

Bunday hollarda mukofot pulini taqsimlash yuridik xizmat xodimiga undirilgan mablagʻ hisobiga mukofot puli toʻlash toʻgʻrisidagi buyruq (farmoyish)da asoslanishi lozim.

10. Mukofot puli toʻgʻri va oʻz vaqtida taqsimlanishini nazorat qilish davlat organi va tashkilot rahbari tomonidan amalga oshiriladi.

4-bob. Yakunlovchi qoidalar

11. Nizo belgilangan tartibda qayta koʻrib chiqilishi natijasida undirilgan mablagʻ qaytarilgan taqdirda, yuridik xizmat xodimlariga toʻlangan mukofot puli belgilangan tartibda qaytarilishi lozim.

12. Yuridik xizmat xodimlarini mukofotlash bilan bogʻliq nizolar qonun hujjatlarida belgilangan tartibda hal etiladi.

Keyingi tahrirga qarang.

13. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradilar.

Keyingi tahrirga qarang.

Vazirlar Mahkamasining 2017-yil 1-maydagi 250-son qaroriga
7-ILOVA

Oʻzbekiston Respublikasi Hukumatining ayrim qarorlariga kiritilayotgan

oʻzgartirish va qoʻshimchalar

1. Vazirlar Mahkamasining “Yuridik xizmatlar xodimlarini attestatsiyadan oʻtkazish va ularning malakasini oshirish tartibi toʻgʻrisidagi Nizomni tasdiqlash haqida” 2007-yil 22-noyabrdagi 244-son qarorida (Oʻzbekiston Respublikasi QT, 2007-y., 11-son, 65-modda):

a) muqaddima quyidagi tahrirda bayon etilsin:

“Oʻzbekiston Respublikasi Prezidentining “Yuridik xizmat faoliyatini tubdan takomillashtirish chora-tadbirlari toʻgʻrisida” 2017-yil 19-yanvardagi PQ–2733-son qaroriga muvofiq Vazirlar Mahkamasi qaror qiladi”;

b) ilovada:

1-banddagi “Oʻzbekiston Respublikasi Vazirlar Mahkamasi tomonidan tashkil etiladigan” degan soʻzlar chiqarib tashlansin;

3-bandning birinchi xatboshidagi “besh yilda” degan soʻzlar “uch yilda” degan soʻzlar bilan almashtirilsin;

4-bandning uchinchi xatboshidagi “besh yil” degan soʻzlar “uch yil” degan soʻzlar bilan almashtirilsin;

7-banddagi “Davlat boshqaruvi” degan soʻzlar “Davlat va xoʻjalik boshqaruvi” degan soʻzlar bilan almashtirilsin;

25 va 34-bandlarning ikkinchi xatboshidagi “besh yil” degan soʻzlar “uch yil” degan soʻzlar bilan almashtirilsin;

35-bandning toʻrtinchi xatboshi quyidagi tahrirda bayon etilsin:

“Yuridik xizmatlar xodimlari malakasini oshirish dasturlari Oʻzbekiston Respublikasi Prezidentining “Yuridik xizmat faoliyatini tubdan takomillashtirish chora-tadbirlari toʻgʻrisida” 2017-yil 19-yanvardagi PQ-2733-son qarori bilan belgilangan yuridik xizmatlarning asosiy faoliyat yoʻnalishlariga muvofiq boʻlishi kerak”.

Oldingi tahrirga qarang.

(2-band Oʻzbekiston Respublikasi Vazirlar Mahkamasining 2017-yil 25-sentabrdagi 762-sonli qaroriga asosan oʻz kuchini yoʻqotgan)

3. Vazirlar Mahkamasining “Ayrim budjet tashkilotlari xodimlari baʼzi toifalarining lavozim razryadlarini belgilash toʻgʻrisida” 2013-yil 7-fevraldagi 33-son qarorida (OʻR QHT, 2013-yil, 6-son, 71-modda):

a) muqaddimadagi “, iqtisodchilari va yuriskonsultlari (yuristlari)ning” degan soʻzlar “va iqtisodchilarining” degan soʻzlar bilan almashtirilsin;

b) 1-banddagi “, iqtisodchilari va yuriskonsultlari (yuristlari)” degan soʻzlar “va iqtisodchilari” degan soʻzlar bilan almashtirilsin;

v) 2-bandning birinchi xatboshidagi “, iqtisodchilar va yuriskonsultlar (yuristlar)ga” degan soʻzlar “va iqtisodchilarga” degan soʻzlar bilan almashtirilsin;

g) ilovada:

ilovaning nomidagi “, iqtisodchilari va yuriskonsultlari (yuristlari)” degan soʻzlar “va iqtisodchilari” degan soʻzlar bilan almashtirilsin;

1-banddagi “, yuriskonsult (yurist)” degan soʻzlar chiqarib tashlansin;

3-banddagi “, katta yuriskonsult (yurist)” degan soʻzlar chiqarib tashlansin;

4-banddagi “, yetakchi yuriskonsult (yurist)” degan soʻzlar chiqarib tashlansin;

izohning 3-bandidagi “iqtisodchilar, yuriskonsultlar (yuristlar)ga” degan soʻzlar “iqtisodchilarga” degan soʻzlar bilan almashtirilsin.

Vazirlar Mahkamasining 2017-yil 1-maydagi 250-son qaroriga
8-ILOVA

Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan baʼzi qarorlari

ROʻYXATI

1. Vazirlar Mahkamasining 2007-yil 24-avgustdagi “Davlat va xoʻjalik boshqaruvi organlari, mahalliy davlat hokimiyati organlari, davlat korxonalari, muassasalari va tashkilotlari faoliyatini huquqiy taʼminlash darajasini yanada oshirish chora-tadbirlari toʻgʻrisida”gi 182-son qarori (Oʻzbekiston Respublikasi QT, 2007-y., 8-son, 51-modda);

2. Vazirlar Mahkamasining 2012-yil 13-sentabrdagi “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida” 2011-yil 23-avgustdagi PQ-1602-son qarori)” 2012-yil 13-sentabrdagi 268-son qaroriga 1-ilovaning 8-bandi (Oʻzbekiston Respublikasi QT, 2012-y., 9-son, 66-modda);

Keyingi tahrirga qarang.

3. Vazirlar Mahkamasining 2013-yil 7-dekabrdagi “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (“Normativ-huquqiy hujjatlar toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida” Oʻzbekiston Respublikasining 2012-yil 24-dekabrdagi OʻRQ-342-son Qonuni)” 2013-yil 7-dekabrdagi 323-son qaroriga ilovaning 5-bandi (Oʻzbekiston Respublikasi QT, 2013-y., 12-son, 88-modda);

4. Vazirlar Mahkamasining 2015-yil 4-iyundagi “Davlat va xoʻjalik boshqaruvi organlari, mahalliy davlat hokimiyati organlari yuridik xizmatlari faoliyatining yanada takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2015-yil 4-iyundagi 149-son qaroriga ilovaning 1-bandi (Oʻzbekiston Respublikasi QT, 2015-y., 6-son, 43-modda).

(Oʻzbekiston Respublikasi qonun hujjatlari toʻplami, 2017-y., 18-son, 323-modda; Qonun hujjatlari maʼlumotlari milliy bazasi, 14.02.2018-y., 09/18/107/0697-son; 30.09.2019-y., 09/19/822/3840-son, 29.12.2019-y., 09/19/1046/4242-son; 27.06.2020-y., 09/20/411/1000-son; Qonunchilik maʼlumotlari milliy bazasi, 05.04.2022-y., 09/22/153/0266-son; 10.04.2023-y., 09/23/147/0203-son; 29.12.2023-y., 07/23/422/0994-son; 07.05.2024-y., 09/24/266/0329-son)