Kelajak avlodning salomatligini ta’minlash, onalik va bolalikni muhofaza qilish, bolalarning jismoniy, aqliy va ma’naviy kamol topishi uchun qulay shart-sharoit yaratish maqsadida va mehnat jamoalari, sanoat korxonalari, jamoat tashkilotlari, bir qancha xorijiy kompaniyalar va firmalarning ko‘pdan ko‘pmurojaatlarini e’tiborga olib:

1. Hukumatga qarashli bo‘lmagan “Sog‘lom avlod uchun” xalqaro xayriya jamg‘armasi tashkil etilsin.

2. Belgilab qo‘yilsinki, mazkur jamg‘armani ro‘yxatdan o‘tkazish va uning faoliyat tartibi O‘zbekiston Respublikasining amaldagi qonunlari bilan belgilanadi.

Jamg‘arma barcha yuridik va jismoniy shaxslar, jumladan xorijiy fuqarolar, tashkilotlar, firmalar va uyushmalar uchun ochiq deb hisoblansin.

Vazirliklar, idoralar, konsernlar va hokimliklar “Sog‘lom avlod uchun” jamg‘armasining faoliyatiga butun choralar bilan ko‘maklashsinlar.

Barcha viloyat markazlarida va Toshkent shahrida jamg‘armaning filiallari va bo‘linmalarini ochish maqsadga muvofiq deb topilsin.

3. Quyidagilar:

— tug‘uruqqa yordam va bolalar muassasalarining moddiy-texnikaviy bazasini mustahkamlashga, ularni zamonaviy uskunalar bilan jihozlashga, yangi, samarali davolash vositalari bilan ta’minlashga;

— jamoatchilik va davlat tuzilmalarining jahon tajribasini hisobga olgan holda kelajak avlod naslini yaxshilashga qaratilgan kuch-g‘ayratlarini muvofiqlashtirishga keng ko‘lamda ko‘maklashish jamg‘armaning asosiy vazifalari deb hisoblansin.

4. “Sog‘lom avlod uchun” jamg‘armasining yuksak ijtimoiy maqomi va nufuzi ta’minlansin. “Sog‘lom avlod uchun” ordeni bilan mukofotlash chog‘ida jamg‘arma boshqaruvi taqdimnomalarning hal qiluvchi ahamiyati e’tirof etilsin.

5. O‘zbekiston Respublikasining Vazirlar Mahkamasi bir oy muddat ichida “Sog‘lom avlod uchun” jamg‘armasi faoliyatini tashkil etish haqida qaror qabul qilsin va jamg‘arma to‘g‘risidagi Nizomni tasdiqlasin.