O‘zbekiston Respublikasi Prezidentining “O‘zbekiston Respublikasida giyohvandlik vositalari va psixotrop moddalarning noqonuniy aylanmasiga chek qo‘yish orqali ularning aholi salomatligi va mamlakatimiz genofondiga salbiy ta’sirini bartaraf etish strategik chora-tadbirlari to‘g‘risida” 2024-yil 6-maydagi PF-73-son Farmoni ijrosini ta’minlash, shuningdek, Giyohvandlik vositalari va psixotrop moddalar ustidan nazorat qilish bo‘yicha davlat komissiyasi hamda uning hududiy komissiyalari faoliyatini samarali tashkil etish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “O‘zbekiston Respublikasida giyohvandlik vositalari va psixotrop moddalarning noqonuniy aylanmasiga chek qo‘yish orqali ularning aholi salomatligi va mamlakatimiz genofondiga salbiy ta’sirini bartaraf etish strategik chora-tadbirlari to‘g‘risida” 2024-yil 6-maydagi PF-73-son Farmoni bilan:

Giyohvandlik vositalari va psixotrop moddalar ustidan nazorat qilish bo‘yicha davlat komissiyasining (keyingi o‘rinlarda — Davlat komissiyasi) tarkibi hamda uning hududiy komissiyalari (keyingi o‘rinlarda — hududiy komissiyalar) namunaviy tarkibi tasdiqlanganligi;

O‘zbekiston Respublikasi Narkotik moddalarni nazorat qilish milliy axborot-tahlil markazi O‘zbekiston Respublikasi Prezidenti Administratsiyasi huzuridagi Narkotiklarni nazorat qilish milliy markazi (keyingi o‘rinlarda — Milliy markaz) etib qayta tashkil etilganligi ma’lumot uchun qabul qilinsin.

2. Quyidagilar:

Giyohvandlik vositalari va psixotrop moddalar ustidan nazorat qilish bo‘yicha davlat komissiyasi to‘g‘risidagi nizom 1-ilovaga muvofiq;

Giyohvandlik vositalari va psixotrop moddalar ustidan nazorat qilish bo‘yicha hududiy komissiya to‘g‘risidagi namunaviy nizom 2-ilovaga muvofiq tasdiqlansin.

3. Hududiy komissiyalar:

bir hafta muddatda ushbu qaror bilan tasdiqlangan namunaviy nizom asosida o‘zining nizomini ishlab chiqish va tasdiqlash;

bir oy muddatda giyohvandlik vositalari va psixotrop moddalar ustidan nazorat qilish bo‘yicha tuman (shahar) komissiyalari faoliyatini yo‘lga qo‘yish choralarini ko‘rsin.

4. O‘zbekiston Respublikasi Hukumatining 3-ilovaga muvofiq ayrim qarorlari o‘z kuchini yo‘qotgan deb hisoblansin.

5. Milliy markaz:

mutasaddi davlat organlari va tashkilotlari bilan birgalikda Davlat komissiyasi hamda uning hududiy komissiyalariga yuklangan vazifalarni amalga oshirishda ularga har tomonlama ko‘maklashsin;

manfaatdor vazirlik va idoralar bilan birgalikda ikki oy muddatda o‘zlari qabul qilgan normativ-huquqiy hujjatlarni ushbu qarorga muvofiqlashtirsin.

6. Mazkur qarorning bajarilishini nazorat qilish O‘zbekiston Respublikasi Prezidenti Administratsiyasi huzuridagi Narkotiklarni nazorat qilish milliy markazi direktori R.M. Mamatov zimmasiga yuklansin.

1. Mazkur Nizom Giyohvandlik vositalari va psixotrop moddalar ustidan nazorat qilish bo‘yicha davlat komissiyasining (keyingi o‘rinlarda — Davlat komissiyasi) maqomi, vazifalari va funksiyalari, huquq va majburiyatlarini hamda faoliyatini tashkil etish tartibini belgilaydi.

2. Ushbu Nizomning amal qilishi davlat organlari va tashkilotlari hamda mulkchilik shaklidan qat’i nazar, boshqa tashkilot va muassasalarga (keyingi o‘rinlarda — davlat organlari va tashkilotlar) nisbatan tatbiq etiladi.

3. O‘zbekiston Respublikasi Prezidenti Administratsiyasi huzuridagi Narkotiklar va o‘qotar qurollarni nazorat qilish agentligi (keyingi o‘rinlarda — Agentlik) Davlat komissiyasining muvofiqlashtiruvchi organi hisoblanadi hamda uning faoliyatini axborot-tahlil jihatdan ta’minlaydi.

4. Davlat komissiyasi giyohvandlik vositalari, psixotrop va kuchli ta’sir qiluvchi moddalar hamda prekursorlarning (keyingi o‘rinlarda — giyohvandlik vositalari) qonuniy muomalasi ustidan nazoratni o‘rnatish hamda noqonuniy muomalasi va suiiste’moliga qarshi kurashish sohasida davlat siyosati amalga oshirilishini ta’minlovchi idoralararo kollegial organ hisoblanadi.

5. Davlat komissiyasi o‘z faoliyatida O‘zbekiston Respublikasining Konstitutsiyasi va qonunlariga, O‘zbekiston Respublikasi Oliy Majlisi palatalari qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizom va boshqa qonunchilik hujjatlariga amal qiladi.

6. Agentlik giyohvandlik vositalarining qonuniy muomalasi ustidan nazoratni o‘rnatish hamda noqonuniy muomalasi va suiiste’moliga qarshi kurashish sohasida mutasaddi davlat organlari va tashkilotlari (keyingi o‘rinlarda — mutasaddi davlat organlari va tashkilotlari) hamda Giyohvandlik vositalar va psixotrop moddalar ustidan nazorat qilish bo‘yicha hududiy komissiyalar (keyingi o‘rinlarda — hududiy komissiyalar) hamda tuman (shahar) komissiyalari faoliyatini o‘rganib boradi, shuningdek, ularga tashkiliy va uslubiy yordam ko‘rsatadi.

7. Davlat komissiyasi quyidagi yo‘nalishlar bo‘yicha qaror qabul qilishda vakolatli hisoblanadi:

yangi paydo bo‘layotgan giyohvandlik vositalarining noqonuniy muomalasi va suiiste’molining barvaqt oldini olish maqsadida vaqtinchalik taqiq yoki cheklov (moratoriy) joriy etish;

zarur hollarda giyohvandlik vositalari muomalasi ustidan nazoratni ta’minlash va hududlarda narkovaziyatni sog‘lomlashtirish bo‘yicha qisqa muddatli dasturlarni tasdiqlash;

mutasaddi davlat organlari va tashkilotlari hamda hududiy komissiyalar faoliyatini muvofiqlashtirish;

giyohvandlik vositalari muomalasiga oid ilmiy tadqiqotlarni qo‘llab-quvvatlash;

giyohvandlik va narkojinoyatlarning oldini olish borasidagi vazifa va topshiriqlar ijrosini ta’minlashda mas’uliyatsizlikka yo‘l qo‘ygan davlat organlari va tashkilotlar rahbarlariga nisbatan tegishli chora ko‘rish.

8. Davlat komissiyasining o‘z vakolati doirasida qabul qilingan qarorlari davlat organlari va tashkilotlar tomonidan bajarilishi majburiy hisoblanadi.

9. Davlat komissiyasi o‘ziga yuklangan vazifalarni bajarishda hududiy komissiyalar, davlat organlari va tashkilotlar bilan o‘zaro hamkorlik qiladi.

10. Davlat komissiyasining tarkibi O‘zbekiston Respublikasi Prezidenti tomonidan tasdiqlanadi.

11. Quyidagilar Davlat komissiyasining asosiy vazifalari hisoblanadi:

O‘zbekiston Respublikasida giyohvandlik va narkojinoyatlarga qarshi kurashish bo‘yicha 2024 — 2028-yillarga mo‘ljallangan milliy strategiyaning (keyingi o‘rinlarda — Milliy strategiya) to‘liq, o‘z vaqtida va sifatli bajarilishini tashkil etish, uni amalga oshirish bo‘yicha yillik milliy dasturlarni tasdiqlash va ijrosini nazorat qilib borish, ushbu yo‘nalishda mutasaddi davlat organlari va tashkilotlari hamda hududiy komissiyalarning faoliyatini muvofiqlashtirish;

har chorakda Milliy strategiya va uni amalga oshirish bo‘yicha yillik milliy dastur ijrosining tanqidiy o‘rganilishini, belgilangan maqsad va vazifalarni ro‘yobga chiqarishga to‘sqinlik qilayotgan omillarni aniqlash va ularning oldini olishga qaratilgan aniq choralar ko‘rilishini ta’minlash;

respublikada giyohvandlik vositalarining noqonuniy aylanmasiga qarshi kurashishni muvofiqlashtirish, aholi orasida giyohvandlik va zaharvandlikning barvaqt profilaktikasi bo‘yicha samarali chora-tadbirlarni belgilash.

12. Davlat komissiyasi o‘ziga yuklangan vazifalarni bajarish uchun quyidagi funksiyalarni amalga oshiradi:

a) giyohvandlik vositalarining O‘zbekiston Respublikasi hududiga kirib kelishining barvaqt oldini olish va unga qarshi kurashish yo‘nalishida:

yangi paydo bo‘layotgan giyohvandlik vositalarining noqonuniy muomalasi va suiiste’molining barvaqt oldini olish maqsadida vaqtinchalik taqiqlash yoki cheklash (moratoriy) bo‘yicha choralar ko‘rish;

mutasaddi davlat organlari va tashkilotlari hamda hududiy komissiyalar tomonidan respublikadagi narkovaziyat bo‘yicha, Milliy strategiya va milliy dasturlar ijrosi yuzasidan yuboriladigan ma’lumotlar o‘z vaqtida taqdim etilishini tashkil etish;

giyohvandlik vositalari muomalasi ustidan nazorat qilish bo‘yicha qisqa muddatli dasturlarni tasdiqlash va ularning amalga oshirilishini nazorat qilib borish;

giyohvandlik vositalari noqonuniy aylanmasining yangi, shu jumladan, Internet jahon axborot tarmog‘idagi usullariga barham berish, bu boradagi tezkor-qidiruv, tergov va ekspert-kriminalistik choralar kompleksini rivojlantirishga ko‘maklashish;

mutasaddi davlat organlari va tashkilotlarining giyohvandlik vositalari qonuniy muomalasi ustidan nazorat o‘rnatish hamda noqonuniy muomalasi va suiiste’moliga qarshi kurashish bo‘yicha moddiy-texnik bazasini mustahkamlash hamda xodimlar salohiyatini oshirishga qaratilgan chora-tadbirlarni belgilash;

giyohvandlik vositalarining noqonuniy muomalasi va suiiste’moliga qarshi kurashishda mutasaddi davlat organlari va tashkilotlari mutaxassislari hamda hududiy komissiyalar mas’ullarining malakasini oshirish tadbirlarini belgilash;

b) aholi orasida giyohvandlikka qarshi immunitetni shakllantirish, giyohvandlik vositalari bilan bog‘liq vaziyatni hududlar kesimida ilmiy-amaliy jihatdan tahlil qilish va narkologik yordam ko‘rsatish yo‘nalishida:

hududiy komissiyalar tomonidan milliy dasturlar ijrosini ta’minlashga qaratilgan hududlar kesimida manzilli chora-tadbirlar (“yo‘l xaritalari”) ishlab chiqilishi hamda har chorakda Agentlikka amalga oshirilgan ishlar yuzasidan hisobotlar kiritilishini tashkil etish;

giyohvandlik vositalari bilan bog‘liq vaziyatning asosiy omillari hamda tendensiyalarini aniqlash va prognoz qilish orqali giyohvandlik va narkojinoyatlarning oldini olishga doir ta’sirchan choralarni belgilash;

aholi, ayniqsa, xotin-qizlar va yoshlarda “giyohvandlikka qarshi immunitet”ni, o‘quvchi va talabalar orasida psixotrop moddalarni iste’mol qilishga murosasiz munosabatni shakllantirish bo‘yicha manzilli chora-tadbirlarni belgilash;

mahalla, qishloq, ovul, chegara hududlari va ta’lim tashkilotlarida giyohvandlik vositalarining suiiste’moli va noqonuniy aylanishining oldini olish, aholi orasida giyohvandlik va zaharvandlik profilaktikasi bo‘yicha samarali chora-tadbirlarni belgilash;

aholiga sifatli narkologik yordam ko‘rsatish tizimini rivojlantirish, giyohvandlikning barvaqt profilaktikasi, diagnostikasi, davolash va tibbiy-ijtimoiy reabilitatsiya tizimini takomillashtirishga ko‘maklashish;

v) respublikada giyohvandlik vositalari bilan bog‘liq vaziyatni hududlar kesimida ilmiy-amaliy jihatdan tahlil qilish va ma’lumotlarni shakllantirish, shuningdek, ilmiy-tadqiqot yo‘nalishida:

respublikada giyohvandlik vositalari bilan bog‘liq vaziyatni hududlar kesimida ilmiy-amaliy va axborot-tahliliy jihatdan tizimli ravishda chuqur o‘rganib borish, asosiy omillar hamda tendensiyalarni aniqlash va prognoz qilishga ko‘maklashish;

giyohvandlikning oldini olish va giyohvandlik vositalarining noqonuniy aylanmasiga qarshi kurashish bo‘yicha metodika, taklif va tavsiyalarni ishlab chiqishga ko‘maklashish;

hududlar kesimida narkovaziyatni kompleks baholash va natijasi bo‘yicha vaziyatni sog‘lomlashtirishga doir chora-tadbirlarni belgilash;

giyohvandlik vositalari noqonuniy muomalasi ustidan nazorat qilish bo‘yicha respublika yagona idoralararo ma’lumotlar bazasini tashkil etishga ko‘maklashish;

xorijiy davlat tuzilmalari va xalqaro tashkilotlar bilan manzilli hamkorlikni o‘rnatish, O‘zbekiston Respublikasi tomonidan amalga oshirilayotgan ishlar yuzasidan BMTga yillik ma’ruzalar tayyorlashga ko‘maklashish;

g) giyohvandlik vositalarining qonuniy muomalasi ustidan ta’sirchan davlat nazoratini tashkil etish hamda bu boradagi qonunchilik va huquqni qo‘llash amaliyotini takomillashtirish yo‘nalishida:

giyohvandlik vositalarining qonuniy muomalasi ustidan ta’sirchan davlat nazoratini o‘rnatish bo‘yicha chora-tadbirlarni belgilash va takliflar ishlab chiqish;

giyohvandlik vositalarining qonuniy muomalasi bilan bog‘liq faoliyatni amalga oshiruvchi litsenziatlar ustidan samarali davlat nazoratini tashkil etish;

giyohvandlik vositalarini respublika hududiga olib kirish, undan olib chiqish va tranzit tarzida o‘tkazishga ruxsatnomalar rasmiylashtirilishi uchun tegishli qaror qabul qilish;

texnik kannabis o‘simligini giyohvandlik vositalari va psixotrop moddalar ishlab chiqarish hamda tayyorlash bilan bog‘liq bo‘lmagan sanoat maqsadlarida yetishtirish va undan foydalanish faoliyati ustidan davlat nazoratini tashkil etish;

tibbiyot muassasalari va dorixonalarning giyohvandlik vositalaridan foydalanish amaliyotini nazorat qilish, farmatsevtika korxonalari, giyohvandlik vositalarining ulgurji va chakana savdosi bilan shug‘ullanuvchi subyektlar mas’uliyatini oshirishning ta’sirchan mexanizmlarini yaratish;

giyohvandlik vositalarini nazorat qilish yo‘nalishida huquqni qo‘llash amaliyotini takomillashtirish bo‘yicha takliflar ishlab chiqishga ko‘maklashish;

hududiy komissiyalar, davlat organlari va tashkilotlarning giyohvandlik vositalarini nazorat qilish sohasiga oid tahliliy material va tavsiyalarini ko‘rib chiqish;

Milliy strategiya ijrosini samarali tashkil etishda respublika budjeti mablag‘lari va budjetdan tashqari mablag‘lari jalb etilishini ta’minlash choralarini ko‘rish.

13. Davlat komissiyasi o‘ziga yuklangan vazifalar va funksiyalarni amalga oshirish uchun quyidagi huquqlarga ega:

davlat organlari va tashkilotlardan giyohvandlikning holati, giyohvandlik vositalarining qonuniy va noqonuniy muomalasiga tegishli axborot, tahliliy va statistika ma’lumotlarini belgilangan tartibda bepul so‘rab olish;

giyohvandlikning holati, giyohvandlik vositalarining qonuniy va noqonuniy muomalasiga oid faoliyatni o‘rganishda mutaxassis jalb etish;

giyohvandlik vositalari bilan bog‘liq litsenziyaga ega yuridik shaxslar ustidan litsenziya talablariga rioya etish holatini o‘rganish jarayonida Agentlik ishtirokini ta’minlashga ko‘maklashish;

giyohvandlik vositalarining qonuniy muomalasi ustidan nazorat o‘rnatish, noqonuniy aylanmasiga qarshi kurashish faoliyatida asoslantirilgan taklif va tavsiyalarni ishlab chiqish maqsadida joylarda o‘rganishlarni tashkil etish;

giyohvandlik vositalarini nazorat qilish sohasiga oid normativ-huquqiy hujjatlar, yillik milliy dasturlar, Davlat komissiyasi qarorlari va bayonlarida belgilangan topshiriqlar ijrosidan kelib chiqib, davlat organlari va tashkilotlar rahbarlari va xodimlarini rag‘batlantirish yoki intizomiy choralar qo‘llash masalalarini ko‘rib chiqish.

14. Davlat komissiyasi o‘ziga yuklangan vazifa va funksiyalar o‘z vaqtida va sifatli bajarilishiga mas’uldir.

15. Davlat komissiyasi O‘zbekiston Respublikasi Prezidenti tomonidan tashkil etiladi va tugatiladi.

16. Davlat komissiyasiga O‘zbekiston Respublikasining Bosh vaziri raislik qiladi.

O‘zbekiston Respublikasining Bosh vaziri:

Davlat komissiyasiga yuklangan vazifalar bajarilishi bo‘yicha komissiya a’zolari ishini muvofiqlashtiradi;

Davlat komissiyasining kun tartibini belgilaydi va uning majlislarini chaqiradi;

Davlat komissiyasi qarorlari ijrosi ustidan nazoratni tashkil etadi.

17. Agentlik direktori Davlat komissiyasi raisining o‘rinbosari hisoblanadi.

18. Agentlik:

Davlat komissiyasi majlislariga zarur materiallar o‘z vaqtida tayyorlanishini tashkil etadi;

Davlat komissiyasining qarorlari bajarilishini nazorat qilishni va monitoring olib borilishini tashkil etadi va ularning natijalarini ko‘rib chiqish uchun Davlat komissiyasiga taqdim etadi;

har chorakda Milliy strategiyani amalga oshirish bo‘yicha milliy dasturlar ijrosi va respublikadagi giyohvandlik vositalari bilan bog‘liq vaziyat yuzasidan umumlashtirilgan hisobotni Davlat komissiyasiga kiritadi;

Davlat komissiyasi bayonnomalarini rasmiylashtiradi va tasdiqlangan bayonnomalarni Davlat komissiyasining a’zolariga tegishli qismi bo‘yicha tegishli davlat organlari va tashkilotlarga yuboradi;

davlat organlari va tashkilotlardan o‘ziga yuklangan vazifalarni bajarish uchun zarur bo‘lgan axborot va materiallarni belgilangan tartibda oladi;

Davlat komissiyasida ish yurituvini ta’minlaydi;

yil yakuni bo‘yicha Milliy strategiyaning ijrosi hamda respublikada giyohvandlik vositalari bilan bog‘liq vaziyatni yaxshilash bo‘yicha amalga oshirilgan ishlar natijalarini aks ettiruvchi yillik milliy ma’ruzani tayyorlaydi va O‘zbekiston Respublikasi Prezidenti huzurida muhokama qilish uchun kiritadi.

19. Davlat komissiyasi o‘z faoliyatini giyohvandlik holati, giyohvandlik vositalarining qonuniy va noqonuniy muomalasiga oid masalalar muhokamasiga bag‘ishlangan majlislarni tizimli asosda o‘tkazish yo‘li bilan amalga oshiradi.

Davlat komissiyasi majlislari mutasaddi davlat organlari va tashkilotlari, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari vakillari taklif etilgan holda zaruratga ko‘ra, biroq har chorakda kamida bir marotaba o‘tkaziladi.

Davlat komissiyasi majlisini komissiyasi raisi, u bo‘lmaganda komissiya raisi o‘rinbosari o‘tkazadi.

Davlat komissiyasi a’zolari giyohvandlik vositalari qonuniy muomalasi ustidan nazorat o‘rnatish, shuningdek, noqonuniy muomalasi va suiiste’moliga qarshi kurashishga oid chora-tadbirlar amalga oshirilishi yuzasidan Davlat komissiyasi ishiga ko‘maklashadilar.

20. Davlat komissiyasining qarorlari Davlat komissiyasining majlisida ishtirok etadigan a’zolarining oddiy ko‘pchilik ovozi bilan qabul qilinadi. Ovozlar teng bo‘lganda, raislik qiluvchining ovozi hal qiluvchi ovoz hisoblanadi.

21. Ko‘rib chiqilayotgan masalalar xususiyatidan kelib chiqqan holda Davlat komissiyasi majlisiga boshqa davlat organlari va tashkilotlari rahbarlari va mutaxassislari taklif etilishi mumkin.

22. Istisno hollarda, qarorlarni tezkorlik bilan qabul qilish zarurati yuzaga kelganda, Davlat komissiyasining raisi ayrim masalalar bo‘yicha komissiya qarorlarini so‘rov yo‘li bilan tasdiqlashga vakolatli hisoblanadi.

23. Davlat komissiyasi qarorlari bayonnoma shaklida rasmiylashtiriladi. Davlat komissiyasi majlisi bayonnomasiga uning barcha a’zolari tomonidan viza qo‘yiladi, mas’ul kotib tomonidan imzolanadi hamda Davlat komissiyasining raisi tomonidan tasdiqlanadi.

24. Davlat komissiyasi bayonnomasining asl nusxasi va unga ilova qilingan materiallar Agentlikda saqlanadi.

25. Davlat komissiyasi o‘z faoliyatini uning yangi tarkibi tasdiqlanguniga yoki O‘zbekiston Respublikasi Prezidentining uning faoliyatini to‘xtatish to‘g‘risidagi qarori qabul qilinguniga qadar amalga oshiradi.

1. Mazkur Namunaviy nizom Giyohvandlik vositalari va psixotrop moddalar ustidan nazorat qilish bo‘yicha hududiy komissiyaning (keyingi o‘rinlarda — hududiy komissiya) maqomi, vazifalari va funksiyalari, huquq va majburiyatlarini hamda faoliyatini tashkil etish tartibini belgilaydi.

2. Hududiy komissiya Giyohvandlik vositalari va psixotrop moddalar ustidan nazorat qilish bo‘yicha davlat komissiyasining (keyingi o‘rinlarda — Davlat komissiyasi) hududlardagi faoliyatini tashkil etuvchi va ishini ta’minlovchi hududiy idoralararo kollegial organ hisoblanadi.

3. Hududiy komissiya o‘z faoliyatida O‘zbekiston Respublikasining Konstitutsiyasi va qonunlariga, O‘zbekiston Respublikasi Oliy Majlisi palatalari qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, Davlat komissiyasi qarorlari, shuningdek, ushbu Nizomga amal qiladi.

4. Hududiy komissiya giyohvandlik vositalari va psixotrop moddalar ustidan nazorat qilish bo‘yicha tuman (shahar) komissiyalari (keyingi o‘rinlarda — tuman (shahar) komissiyalari), hududiy davlat organlari va tashkilotlarining sohaga oid faoliyatini o‘rganib, tahlil qilib boradi.

5. Hududiy komissiya o‘z faoliyatida Davlat komissiyasi oldida hisobdordir.

6. Hududiy komissiya quyidagi yo‘nalishlar bo‘yicha qaror qabul qilish vakolatiga ega:

hududiy komissiyaning namunaviy tarkibi asosida hududiy komissiya tarkibini shakllantirish, hududda giyohvandlik vositalarining suiiste’moli va noqonuniy aylanishiga qarshi kurashish;

tuman (shahar) kesimida giyohvandlik vositalari bilan bog‘liq vaziyatni chuqur o‘rganib borish va natijasidan kelib chiqib, uni sog‘lomlashtirish;

O‘zbekiston Respublikasi Prezidenti Administratsiyasi huzuridagi Narkotiklar va o‘qotar qurollarni nazorat qilish agentligi tomonidan kiritilgan taqdimnomalar bo‘yicha choralar ko‘rish;

yillik ish rejalar, hududiy komissiya qarorlari va bayonlarida belgilangan topshiriqlar ijrosidan kelib chiqib, hududiy davlat organlari va tashkilotlari rahbarlari va xodimlarini hamda tuman (shahar) komissiyalari mas’ullarini rag‘batlantirish yoki intizomiy chora qo‘llash masalalarini ko‘rib chiqish.

7. Hududiy komissiyaning o‘z vakolati doirasida qabul qilgan qarorlari hududiy davlat organlari va tashkilotlari hamda tuman (shahar) komissiyalari tomonidan bajarilishi majburiy hisoblanadi.

8. Hududiy komissiya o‘ziga yuklangan vazifalarni amalga oshirishda hududiy davlat organlari va tashkilotlari hamda tuman (shahar) komissiyalari bilan o‘zaro hamkorlik qiladi.

9. Hududiy komissiya:

giyohvandlik vositalari bilan bog‘liq vaziyatning asosiy omillari hamda tendensiyalarini aniqlash va prognoz qilish orqali, giyohvandlik va narkojinoyatlarning oldini olishga qaratilgan yillik va qisqa muddatli ish rejalarini ishlab chiqadi va ijrosini nazorat qilib boradi;

hududdagi narkovaziyatni kompleks baholash va natijasi asosida vaziyatni sog‘lomlashtirish bo‘yicha aniq chora-tadbirlarni amalga oshiradi;

aholi orasida giyohvandlik va zaharvandlikning barvaqt profilaktikasi bo‘yicha tuman (shahar) kesimida samarali chora-tadbirlarni belgilaydi;

giyohvandlik vositalari bilan bog‘liq vaziyatni tuman (shahar) kesimida ilmiy-amaliy va axborot-tahliliy jihatdan chuqur o‘rganadi hamda natijasi bo‘yicha tegishli tahliliy materiallar, taklif va tavsiyalar tayyorlaydi hamda Davlat komissiyasiga kiritadi;

hududdagi davlat organlari va tashkilotlari hamda tuman (shahar) komissiyasining giyohvandlik vositalarining noqonuniy muomalasi va suiiste’moliga qarshi kurashish faoliyatini muvofiqlashtiradi;

hududdagi davlat organlari va tashkilotlari hamda tuman (shahar) komissiyasi mas’ul rahbarlarining ish rejalari ijrosi yuzasidan hisobotlarini eshitish va tanqidiy muhokama qilib boradi;

aholi, ayniqsa, xotin-qizlar va yoshlarda “giyohvandlikka qarshi immunitet”ni, o‘quvchi va talabalar orasida psixotrop moddalarni iste’mol qilishga murosasiz munosabatni shakllantirish choralarini belgilaydi;

mahalla, qishloq, ovul, chegara hududlar va ta’lim muassasalarida giyohvandlik vositalarining suiiste’moli va noqonuniy aylanishining oldini olish, zaharvandlikning barvaqt aniqlash bo‘yicha tizimli choralar ko‘radi;

giyohvandlik vositalarining nazorat qilish samaradorligini oshirish yo‘nalishida milliy va xalqaro konferensiyalar hamda simpoziumlarni o‘tkazishga ko‘maklashadi;

hududdagi narkologiya muassasalari va huquqni muhofaza qilish organlarining moddiy-texnik bazasini rivojlantirishga ko‘maklashadi.

10. Hududiy komissiya o‘ziga yuklangan vazifa va funksiyalarni bajarish uchun quyidagi huquqlarga ega:

hududdagi davlat organlari va tashkilotlari hamda tuman (shahar) komissiyasidan narkovaziyatning holati, giyohvandlik vositalarining noqonuniy muomalasiga tegishli axborot, tahliliy va statistika ma’lumotlarini belgilangan tartibda bepul so‘rab olish;

giyohvandlik vositalarining noqonuniy aylanmasiga qarshi kurashishda asoslantirilgan taklif va tavsiyalarni ishlab chiqish maqsadida hududlarda o‘rganishlarni tashkil etish;

giyohvandlikning holati, giyohvandlik vositalarining qonuniy va noqonuniy muomalasiga oid faoliyatni o‘rganishda mutaxassis jalb etish.

11. Hududiy komissiya:

o‘ziga yuklangan vazifalar va funksiyalarning sifatli hamda o‘z vaqtida bajarishi;

Davlat komissiyasi tomonidan giyohvandlik vositalari bilan bog‘liq vaziyat yuzasidan beriladigan topshiriqlar ijrosini ta’minlashi;

hududda giyohvandlik va narkojinoyatlarga qarshi kurashish sohasida amalga oshirilgan ishlar yuzasidan Davlat komissiyasiga hisobot kiritib borishi;

hududdagi narkovaziyatni sog‘lomlashtirish bo‘yicha choralarni samarali tashkil etish yuzasidan mahalliy budjet va budjetdan tashqari mablag‘lar jalb etilishini ta’minlashi lozim.

12. Hududiy komissiyaning namunaviy tarkibi O‘zbekiston Respublikasi Prezidenti tomonidan tasdiqlanadi.

13. Hududiy komissiyaga tegishlicha Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari raislik qiladi.

Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlarining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari tegishli hududiy komissiya raisining o‘rinbosari hisoblanadi.

Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlarining huquqni muhofaza qilish organlari faoliyati, harbiy safarbarlik va favqulodda vaziyatlar masalalari guruhi rahbari hududiy komissiya kotibi vazifasini bajaradi.

14. Hududiy komissiya o‘z faoliyatini giyohvandlikning holati, giyohvandlik vositalarining noqonuniy muomalasiga oid masalalarning muhokamasiga bag‘ishlangan majlislarni tizimli asosda o‘tkazish yo‘li bilan amalga oshiradi.

15. Hududiy komissiya majlislari tegishli hududdagi davlat organlari va tashkilotlari hamda tuman (shahar) komissiya mas’ul rahbarlari taklif etilgan holda zaruratga ko‘ra, biroq har chorakda kamida bir marotaba o‘tkaziladi.

16. Majlisni hududiy komissiya raisi, u bo‘lmaganda hududiy komissiya raisining o‘rinbosari o‘tkazadi.

17. Hududiy komissiyaning qarorlari hududiy komissiyaning majlisida ishtirok etadigan a’zolarning oddiy ko‘pchilik ovozi bilan qabul qilinadi. Ovozlar teng bo‘lganda, raislik qiluvchining ovozi hal qiluvchi hisoblanadi.

18. Hududiy komissiyaning qarorlari uning majlisi bayonnomasi bilan rasmiylashtiriladi. Hududiy komissiya majlisi bayonnomasiga uning barcha a’zolari tomonidan viza qo‘yiladi, mas’ul kotib tomonidan imzolanadi, hududiy komissiya raisi tomonidan tasdiqlanadi.

1. Vazirlar Mahkamasining “Narkotik moddalar ustidan nazorat qilish bo‘yicha O‘zbekiston Respublikasi davlat komissiyasini tashkil etish to‘g‘risida” 1994-yil 30-apreldagi 229-son qarori.

2. Vazirlar Mahkamasining “Narkotik moddalarni nazorat qilish milliy axborot-tahlil markazini tashkil etish hamda narkotik moddalarning noqonuniy ishlatilishiga qarshi kurashuvchi huquqni muhofaza qilish organlari bo‘linmalarini mustahkamlash to‘g‘risida” 1996-yil 7-noyabrdagi 382-son qarori.

3. Vazirlar Mahkamasining “O‘zbekiston Respublikasi Vazirlar Mahkamasining 1994-yil 30-apreldagi 229-son va 1996-yil 7-noyabrdagi 382-son qaroriga o‘zgartirishlar kiritish to‘g‘risida” 1997-yil 6-oktabrdagi 467-son qarori.

4. Vazirlar Mahkamasining “Respublika komissiyalari va kengashlari tarkibini tasdiqlash to‘g‘risida” 2004-yil 26-iyuldagi 358-son qaroriga 3-ilova.

5. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida” 2005-yil 22-yanvardagi 28-son qaroriga ilovaning 1-bandi.

6. Vazirlar Mahkamasining “O‘zbekiston Respublikasi Hukumatining vazirliklar, davlat qo‘mitalari va idoralar to‘g‘risidagi nizomlarni tasdiqlash bo‘yicha ayrim qarorlariga o‘zgartirish va qo‘shimchalar kiritish haqida” 2010-yil 5-iyundagi 108-son qaroriga ilovaning 9-bandi.

7. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida (O‘zbekiston Respublikasi Prezidentining “O‘zbekiston Respublikasining Davlat xavfsizligi tizimini takomillashtirish chora-tadbirlari to‘g‘risida” 2018-yil 14-martdagi PF-5379-son Farmoni)” 2018-yil 29-maydagi 396-son qaroriga ilovaning 6 va 10-bandlari.

8. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida (Vazirlar Mahkamasining “O‘zbekiston Respublikasi Prezidenti Administratsiyasi huzuridagi Tibbiyot bosh boshqarmasi faoliyatini tashkil etish to‘g‘risida” 2019-yil 29-apreldagi 366-son qarori)” 2020-yil 20-yanvardagi 36-son qaroriga ilovaning 3-bandi.