Ushbu Qonunning maqsadi reklamani tayyorlash, joylashtirish va tarqatish (bundan buyon matnda reklamaning aylanishi deb yuritiladi) sohasidagi munosabatlarni tartibga solishdan iborat.

Ushbu Qonunning amal qilishi reklama tayyorlangan joydan qatʼi nazar, agar mazkur reklama Oʻzbekiston Respublikasi hududida foydalanishga va tarqatishga qaratilgan boʻlsa, reklamaning aylanishi sohasidagi barcha munosabatlarga nisbatan tatbiq etiladi.

Ushbu Qonunning amal qilishi:

1) saylovoldi tashviqoti materiallariga;

2) oshkor etilishi yoki tarqatilishi yoxud reklamadan foydalanuvchiga yetkazilishi qonunchilikka muvofiq majburiy boʻlgan axborotga;

3) tovarni bozorda ilgari surish asosiy maqsadi boʻlmagan va ijtimoiy axborot hisoblanmaydigan maʼlumot-axborot materiallariga hamda tahliliy materiallarga (ichki va tashqi bozorlarning sharhlariga, ilmiy tadqiqotlar hamda sinovlar natijalariga);

4) reklama xususiyatidagi maʼlumotlarni oʻz ichiga olmagan peshlavhalar va koʻrsatkichlar axborotiga;

5) jismoniy yoki yuridik shaxslarning tadbirkorlik faoliyatini amalga oshirish bilan bogʻliq boʻlmagan eʼlonlariga;

6) tovarda yoki uning oʻramida joylashtirilgan, tovar, uni ishlab chiqaruvchi, import qiluvchi yoki eksport qiluvchi toʻgʻrisidagi axborotga;

7) tovarda yoki uning oʻramida joylashtirilgan va boshqa tovarga taalluqli boʻlmagan tovar bezagining har qanday qismlariga;

8) ilm-fan, adabiyot yoki sanʼat asarlariga uzviy ravishda uygʻunlashtirilgan va oʻz holicha reklama xususiyatidagi maʼlumotlar hisoblanmaydigan, tovar, uni individuallashtirish vositalari, tovarni ishlab chiqaruvchi yoki sotuvchi toʻgʻrisidagi eslatmalarga;

9) ishlab chiqarilayotgan yoki realizatsiya qilinayotgan tovarlar haqida tovarlarni ishlab chiqaruvchilarning va (yoki) sotuvchilarning saytlariga yoki ijtimoiy tarmoqlardagi sahifalarga joylashtirilgan Internet jahon axborot tarmogʻidagi axborotga, agar koʻrsatilgan maʼlumotlar saytga yoki ijtimoiy tarmoqdagi sahifaga kiruvchilarni realizatsiya qilinayotgan tovarlar, ularning assortimenti, ulardan foydalanish qoidalari va boshqa xususiyatlar (xossalar) toʻgʻrisida xabardor qilish uchun moʻljallangan boʻlsa;

10) Internet jahon axborot tarmogʻining axborot-qidiruv tizimlaridagi soʻrovlar boʻyicha berilgan natijalarga nisbatan tatbiq etilmaydi.

Reklama toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Agar Oʻzbekiston Respublikasining xalqaro shartnomasida Oʻzbekiston Respublikasining reklama toʻgʻrisidagi qonunchiligida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

Reklama toʻliq yoki qisman mualliflik huquqi va turdosh huquqlar obyekti boʻlishi mumkin. Bu holda mualliflik huquqi hamda turdosh huquqlar mualliflik huquqi va turdosh huquqlar toʻgʻrisidagi qonunchilikka hamda Oʻzbekiston Respublikasining xalqaro shartnomalariga muvofiq himoya qilinishi lozim.

Ushbu Qonunda quyidagi asosiy tushunchalar qoʻllaniladi:

aksilreklama — notoʻgʻri (insofsiz, bila turib yolgʻon) reklama keltirib chiqargan yoki keltirib chiqarishi mumkin boʻlgan oqibatlarni tugatish maqsadida tarqatiladigan raddiya;

axloqsiz reklama — shaxslarning jinsi, irqi, millati, tili, dini, eʼtiqodi, ijtimoiy kelib chiqishi, ijtimoiy mavqeyiga daxldor boʻlgan haqoratli soʻzlar, tasvirlar hamda oʻxshatishlardan, haqorat qiluvchi tasvirlardan foydalanish orqali insoniylik va axloqning umumqabul qilingan normalarini buzuvchi, milliy yoki jahon madaniy boyligini tashkil etadigan sanʼat obyektlariga, tarixiy va arxitektura yodgorliklariga tajovuz qiluvchi, Oʻzbekiston Respublikasining davlat ramzlarini (bayrogʻini, gerbini, madhiyasini), milliy valyutasini tahqirlovchi reklama;

ijtimoiy axborot — tarqatilishi bevosita yoki bilvosita foyda (daromad) olishni maqsad qilib olmagan, nomuayyan shaxslar doirasiga yoʻnaltirilgan hamda xayriya va sogʻliqni saqlash, atrof-muhitni muhofaza qilish, energetika resurslarini saqlash, huquqbuzarliklar profilaktikasi, aholini ijtimoiy himoya qilish va uning xavfsizligi, maʼnaviyat va maʼrifat, jamiyat va davlat manfaatlarini taʼminlash sohalarida ijtimoiy foydali maqsadlarga erishishga qaratilgan axborot, shuningdek notijorat xususiyatidagi boshqa axborot;

nomaqbul reklama — notoʻgʻri, axloqsiz, yashirin reklama, shuningdek ushbu Qonun talablariga mos kelmaydigan boshqa reklama;

notoʻgʻri (insofsiz, bila turib yolgʻon) reklama — noaniqligi, bir xil maʼnoli boʻlmaganligi, boʻrttirib yuborilishi, yashirib ketilishi, tarqatilish vaqti, joyi va usuliga nisbatan talablarning hamda qonunchilikda nazarda tutilgan boshqa talablarning buzilishi natijasida reklamadan foydalanuvchilarni chalgʻitadigan yoki chalgʻitishi mumkin boʻlgan, yuridik va jismoniy shaxslarga, shuningdek jamiyat hamda davlat manfaatlariga moddiy zarar va maʼnaviy ziyon yetkazishi mumkin boʻlgan reklama;

ragʻbatlantiruvchi aksiya — reklamadan foydalanuvchilarni muayyan harakatlarni bajarishga undaydigan tadbir, tanlov, oʻyin oʻtkazish shaklida amalga oshiriladigan, shu jumladan ularda ishtirok etish sharti reklama qilinayotgan tovarlarni olishdan iborat boʻlgan reklama;

reklama — har qanday reklama vositalaridan foydalangan holda tarqatiladigan, mazmuni Oʻzbekiston Respublikasi hududida boʻlgan reklamadan foydalanuvchilarga qaratilgan va reklama obyektiga eʼtiborni jalb qilish, unga boʻlgan qiziqishni shakllantirish yoki qoʻllab-quvvatlash, shuningdek uni bozorda bevosita yoki bilvosita foyda (daromad) olish maqsadida ilgari surish uchun moʻljallangan maxsus axborot;

reklama beruvchi — reklama qilinadigan tovarni ishlab chiqarishni yoki sotishni amalga oshiruvchi, Oʻzbekiston Respublikasining rezidenti yoxud norezidenti boʻlgan jismoniy yoki yuridik shaxs yoxud reklama obyektini va (yoki) reklama mazmunini belgilab bergan boshqa shaxs, shu jumladan homiy;

reklama vositalari — reklamadan foydalanuvchiga reklamani yetkazish uchun foydalaniladigan vositalar;

reklama joyi (tashqi reklama va axborot obyekti (konstruksiyasi) oʻrnatiladigan joy) — tashqi reklama va axborot obyekti (konstruksiyasi) oʻrnatiladigan maxsus ajratilgan va (yoki) berilgan hudud (yer, asfalt, yashil hudud va boshqalar), bino, inshoot sirtqi qismining muayyan yuzasi;

reklama joyining pasporti — Qoraqalpogʻiston Respublikasi Vazirlar Kengashi, viloyatlar hamda Toshkent shahar hokimliklari tomonidan beriladigan hujjat boʻlib, ushbu hujjat yuridik va jismoniy shaxslarning tashqi reklama va axborot obyektlarini (konstruksiyalarini) unda koʻrsatilgan yer uchastkasiga, binoga yoki inshootga, mulk shaklidan qatʼi nazar, oʻrnatish huquqini tasdiqlaydi;

reklama joyi pasportining egasi — davlat mulki boʻlgan yer uchastkasiga, binoga yoki inshootga yagona elektron savdo maydonchasi orqali ochiq elektron auksion asosida yoxud xususiylashtirilgan yer uchastkalariga, shuningdek xususiy mulk boʻlgan binolarga yoki inshootlarga — xususiylashtirilgan yer uchastkasining, binoning yoxud inshootning mulkdori bilan tuzilgan shartnoma asosida tashqi reklama va axborot obyektini (konstruksiyasini) oʻrnatish huquqini olgan yuridik yoki jismoniy shaxs;

reklama obyekti — eʼtiborni jalb etish uchun reklama oʻziga nisbatan yoʻnaltirilgan tovar, shu jumladan tadbirlar, texnologiyalar, individuallashtirish vositalari, intellektual faoliyat natijalari, shuningdek jismoniy yoki yuridik shaxslar toʻgʻrisidagi axborot;

reklamaga oid faoliyat — reklamaning aylanishi sohasida ishlar hamda xizmatlarni bajarish bilan bogʻliq faoliyat;

reklama tayyorlovchi — reklamani tarqatish (joylashtirish) uchun axborotni toʻliq yoxud qisman tayyor shaklga keltirishni amalga oshiradigan, Oʻzbekiston Respublikasining rezidenti yoki norezidenti boʻlgan jismoniy yoki yuridik shaxs;

reklama tarqatuvchi — reklama vositalari orqali reklama tarqatishni amalga oshiradigan, Oʻzbekiston Respublikasining rezidenti yoki norezidenti boʻlgan jismoniy yoki yuridik shaxs;

reklamadan foydalanuvchi — reklama oʻziga nisbatan yoʻnaltirilgan shaxs yoki shaxslar guruhi;

tashqi reklama — nomuayyan shaxslar doirasi koʻrishi uchun moʻljallangan, tashqi reklama va axborot obyektlarida (konstruksiyalarida) joylashtiriladigan grafikli, matnli yoki boshqa reklama;

tashqi reklama va axborot obyektlarini (konstruksiyalarini) oʻrnatish chizmasi — oʻrnatilishiga yoʻl qoʻyiladigan tashqi reklama va axborot obyektlarini (konstruksiyalarini) oʻrnatish joylarini belgilaydigan, ularning turlari, shakllari, texnik tavsiflari, axborot maydonlarining sathi koʻrsatilgan holdagi maʼlumotlarni oʻz ichiga olgan hamda hududiy rejalashtirish chizmasi asosida ishlab chiqiladigan hujjat;

tovar — faoliyatning sotish, ayirboshlash yoki boshqa yoʻl bilan muomalaga kiritish uchun moʻljallagan mahsuli (shu jumladan ish, xizmat);

uygʻunlashtirilgan reklama — tovarlarning kino, audio va video mahsulotlardagi, telekoʻrsatuvlar va radioeshittirishlar efiridagi, sanʼat asarlaridagi, tasvirlardagi, kompyuter oʻyinlaridagi hamda mavjud tovarga muvofiq boʻlgan asosiy yoki ikkinchi darajali rekvizit, tovar belgisining (xizmat koʻrsatish belgisining) tasviri yoki u haqida har qanday shakldagi eslatma tarzida boshqa asarlardagi reklamasi;

yashirin reklama — reklamadan foydalanuvchining idrokiga uning oʻzi anglamagan holda maxsus videoilovalardan (qoʻsh ovozli yozuvdan) foydalanish yoʻli bilan hamda boshqa usullar bilan taʼsir oʻtkazadigan reklama;

qiyosiy reklama — raqobatchini yoki raqobatdosh tovarni bevosita yoki bilvosita identifikatsiyalovchi reklama;

homiy — sport tadbirini, madaniy yoki boshqa tadbirni tashkil etish va (yoki) oʻtkazish, telekoʻrsatuvni yoki radioeshittirishni yaratish va (yoki) namoyish etish (eshittirish) yoxud ijodiy faoliyatning boshqa natijasini yaratish va (yoki) undan foydalanish uchun mol-mulkni, pul mablagʻlarini, intellektual faoliyat natijalarini taqdim etish, xizmatlar koʻrsatish, ishlarni bajarish tarzida hissa qoʻshishni amalga oshiruvchi jismoniy yoki yuridik shaxs;

homiylik reklamasi — muayyan shaxsni majburiy tarzda homiy sifatida eslatib oʻtish sharti bilan tarqatiladigan reklama.

Oʻzbekiston Respublikasi hududida reklama Oʻzbekiston Respublikasining davlat tilida tarqatiladi.

Reklama mazmunining tarjimasi quyidagi talablarga rioya etgan holda boshqa tillarda takror berilishi mumkin:

reklama mazmunining boshqa tillardagi tarjimasi matni uning Oʻzbekiston Respublikasi davlat tilidagi asosiy maʼnosini buzib koʻrsatmasligi kerak;

tashqi reklama orqali joylashtiriladigan reklamaning boshqa tillardagi tarjimasi matni Oʻzbekiston Respublikasi davlat tilidagi reklama matnining pastki qismida gorizontal holda joylashtirilishi va umumiy reklama maydonining qirq foizidan oshmasligi kerak;

reklamaning boshqa tillardagi tarjimasi matni harfining oʻlchami Oʻzbekiston Respublikasi davlat tilidagi reklama matni harfining oʻlchamidan kichik boʻlishi kerak;

tele- va radiokanallarda, shuningdek bosma nashrlarda tarqatiladigan reklamaning boshqa tillardagi tarjimasi har kungi umumiy reklama hajmining yigirma foizidan oshmasligi kerak.

Ushbu modda birinchi va ikkinchi qismlarining amal qilishi:

faqat chet tillarda eʼlon qilinadigan bosma nashrlarda va noshirlik mahsulotining boshqa turlarida joylashtiriladigan reklamaga;

koʻrsatuvni (eshittirishni) chet tillarda amalga oshiruvchi ommaviy axborot vositalarining tele-, radio-, video-, kinoxronikal dasturlarini namoyish etish (eshittirish) jarayonida joylashtiriladigan reklamaga;

Internet jahon axborot tarmogʻidagi materiallarni faqat chet tillarda joylashtiradigan veb-saytlarning axborot resurslariga joylashtiriladigan reklamaga nisbatan tatbiq etilmaydi.

Belgilangan tartibda roʻyxatga olingan tovar belgilari (xizmat koʻrsatish belgilari), bosma usulda terilgan boʻgʻinli belgilar (logotiplar) asli qaysi tilda boʻlsa, shu tilda keltirilishi mumkin.

Oʻzbekiston Respublikasi Vazirlar Mahkamasi:

reklamaning aylanishi sohasida yagona davlat siyosati amalga oshirilishini taʼminlaydi;

tashqi reklamani tayyorlash va joylashtirish tartibini belgilaydi;

tashqi reklamani joylashtirish huquqi uchun yigʻimlarning tabaqalashtirilgan miqdorlarini aniqlash tartibini belgilaydi;

Tashqi reklama va axborot obyektlari (konstruksiyalari) xavfsizligining umumiy texnik reglamentini tasdiqlaydi.

Oʻzbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi reklamaning aylanishi sohasidagi vakolatli davlat organidir (bundan buyon matnda vakolatli davlat organi deb yuritiladi).

Vakolatli davlat organi:

reklamaning aylanishi sohasidagi yagona davlat siyosatini amalga oshiradi;

reklama toʻgʻrisidagi qonunchilikning ijrosini taʼminlaydi;

reklamaning aylanishi sohasidagi davlat dasturlarini ishlab chiqadi va ularning amalga oshirilishini tashkil etadi;

reklamaning aylanishi sohasida davlat va xoʻjalik boshqaruvi organlarining, mahalliy davlat hokimiyati organlarining faoliyatini muvofiqlashtiradi;

reklamaning aylanishi sohasidagi normativ-huquqiy hujjatlarni ishlab chiqishda ishtirok etadi;

reklama toʻgʻrisidagi qonunchilikni qoʻllash masalalari boʻyicha tushuntirishlar beradi;

reklamaning aylanishi sohasida mahalliy va xorijiy ilmiy-tadqiqot muassasalari hamda taʼlim tashkilotlari bilan hamkorlikni amalga oshiradi;

Tashqi reklama va axborot obyektlari (konstruksiyalari) xavfsizligining umumiy texnik reglamentini ishlab chiqadi;

reklamaga oid faoliyat subyektlariga reklama axboroti bilan bogʻliq hujjatlar va materiallarni belgilangan muddatlarda taqdim etishga doir soʻrov yuboradi;

reklamaga oid faoliyat subyektlari tomonidan reklama toʻgʻrisidagi qonunchilik talablarining buzilishi hollarini aniqlaydi va ularni bartaraf etish choralarini koʻradi;

zarur hollarda reklama toʻgʻrisidagi qonunchilik talablari buzilishi holatlarini aniqlash maqsadida xulosalar va izohlar olish uchun ekspertlar hamda mutaxassislarni jalb qiladi;

reklamaga oid faoliyat subyektlariga nisbatan moliyaviy sanksiyalar qoʻllash haqida qonunchilikda belgilangan tartibda qarorlar qabul qiladi;

reklamaga oid faoliyat subyektlarining birlashmalari va fuqarolik jamiyatining boshqa institutlari bilan birgalikda Oʻzbekiston Respublikasida halol raqobat hamda qonuniylikka rioya etish prinsiplariga asoslangan reklama bozorini rivojlantirish uchun qulay shart-sharoitlar yaratishga, shuningdek reklamaning aylanishi sohasida oʻzini oʻzi tartibga solish mexanizmlarini joriy etishga koʻmaklashadi;

reklamaning aylanishi sohasida xalqaro hamkorlikni amalga oshiradi.

Vakolatli davlat organi qonunchilikka muvofiq boshqa vakolatlarni ham amalga oshirishi mumkin.

Vakolatli davlat organining oʻz vakolatlari doirasida qabul qilingan qarorlari davlat va xoʻjalik boshqaruvi organlari, mahalliy davlat hokimiyati organlari, xoʻjalik yurituvchi subyektlar, shu jumladan reklamaga oid faoliyat subyektlari tomonidan ijro etilishi majburiydir.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tegishli maʼmuriy-hududiy birliklar doirasida:

reklamaning aylanishi sohasidagi yagona davlat siyosatini amalga oshirishda vakolatli davlat organiga koʻmaklashadi;

reklamaning aylanishi sohasidagi davlat dasturlarini amalga oshirishda ishtirok etadi;

tashqi reklama va axborot obyektlarini (konstruksiyalarini) oʻrnatish uchun taklif etilayotgan yer uchastkalarining, binolarning va inshootlarning roʻyxatlarini shakllantiradi;

davlat mulki boʻlgan yer uchastkalariga, binolarga hamda inshootlarga tashqi reklama va axborot obyektlarini (konstruksiyalarini) oʻrnatish huquqini olish uchun yagona elektron savdo maydonchasi orqali ochiq elektron auksionlar asosida tanlovlar oʻtkazadi;

reklamaga oid faoliyat subyektlariga tashqi reklama obyektlaridan foydalanish bilan bogʻliq hujjatlar va materiallarni belgilangan muddatlarda taqdim etishga doir soʻrov yuboradi;

qonunchilikka muvofiq tashqi reklama va axborot obyektlarining (konstruksiyalarining) reklama joylari pasportini beradi hamda mulkchilik shaklidan qatʼi nazar yer uchastkalariga, binolarga va inshootlarga, tashqi reklama hamda axborot obyektlarini (konstruksiyalarini) oʻrnatish uchun shartnomalar tuzadi.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari qonunchilikka muvofiq boshqa vakolatlarni ham amalga oshirishi mumkin.

Qonunda belgilangan tartibda roʻyxatga olingan, reklamaga oid faoliyat subyektlarini birlashtiruvchi nodavlat notijorat tashkiloti reklamaga oid faoliyat subyektlarining birlashmasidir.

Reklamaga oid faoliyat subyektlarining birlashmasi Oʻzbekiston Respublikasida halol raqobat va qonuniylikka rioya etish prinsiplariga asoslangan reklama bozorini rivojlantirish uchun qulay sharoitlar yaratishga, shuningdek reklamaga oid faoliyat subyektlarining kasbiy manfaatlarini himoya qilishga koʻmaklashishga qaratilgandir.

Reklamaga oid faoliyat subyektlarining birlashmasi:

oʻz aʼzolarining huquqlari va qonuniy manfaatlarini himoya qilishga qaratilgan chora-tadbirlarni amalga oshiradi;

reklamaga oid faoliyatni rivojlantirishga qaratilgan tashabbuslar bilan chiqadi, davlat hokimiyati va boshqaruvi organlariga, mahalliy davlat hokimiyati organlariga tegishli takliflar kiritadi;

marketing hamda reklamaga oid faoliyatni yuritishning yuksak axloqiy mezonlarini qoʻllab-quvvatlash boʻyicha talablarni belgilaydigan qoidalar toʻplamidan iborat boʻlgan reklama amaliyoti kodekslarini Oʻzbekiston Respublikasining qonunchiligi asosida, oʻzini oʻzi tartibga solish mexanizmlaridan foydalangan holda ishlab chiqadi va qabul qiladi;

reklamaning aylanishi sohasidagi jamoatchilik monitoringiga va hisobga olishga doir tadbirlarni tashkil qilishda ishtirok etadi;

vakolatli davlat organining soʻroviga koʻra reklamaning qonunchilik talablariga mosligi haqida xulosa va izohlar taqdim etadi;

reklama toʻgʻrisidagi qonunchilikni takomillashtirish boʻyicha takliflar tayyorlaydi;

reklamaga oid faoliyat subyektlari birlashmasi aʼzolarining reyestrlarini yuritadi va ularni oʻz rasmiy veb-saytiga joylashtiradi;

zarur hollarda, reklamaning aylanishi sohasidagi ixtisoslashtirilgan tadbirlarni (koʻrgazmalar, yarmarkalar, konferensiyalar va boshqalarni) tashkil qiladi hamda ularda ishtirok etadi, shu jumladan xalqaro tadbirlarda ham ishtirok etadi.

Reklamaga oid faoliyat subyektlarining birlashmasi qonunchilikka muvofiq boshqa funksiyalarni ham amalga oshirishi mumkin.

Reklama beruvchilar, reklama tayyorlovchilar, shuningdek reklama tarqatuvchilar reklamaga oid faoliyat subyektlaridir.

Reklama beruvchi quyidagi huquqlarga ega:

reklama toʻgʻrisida shartnoma tuzish haqida oshkora taklif (ommaviy oferta) kiritish, shu jumladan uni elektron shaklda kiritish;

reklama vositalarini, shuningdek reklama materiallarining hajmlarini va ushbu materiallarni yetkazib berish shakllarini mustaqil ravishda belgilash, bundan qonunda belgilangan hollar mustasno.

Reklama beruvchi:

zarur boʻlgan taqdirda, reklama tayyorlovchining va (yoki) tarqatuvchining talabiga koʻra reklama axborotining ishonchliligini tasdiqlovchi hujjatlarni taqdim etishi;

agar reklama qilinayotgan faoliyat litsenziyalanishi lozim boʻlsa yoki uning yuritilishi tegishli ravishda ruxsat etish xususiyatiga ega hujjat olishni talab qilsa, reklama ishlab chiqaruvchi va tarqatuvchiga tegishli litsenziya yoki ruxsat etish xususiyatiga ega hujjatni taqdim etishi, shuningdek majburiy sertifikatlashtirilishi lozim boʻlgan tovar reklama qilingan taqdirda, sertifikatni taqdim etishi;

reklama toʻgʻrisidagi qonunchilik buzilganligi vakolatli davlat organi tomonidan aniqlangan taqdirda, vakolatli davlat organining qaroriga koʻra u koʻrsatgan muddatda aksilreklamani amalga oshirishi;

vakolatli davlat organining soʻroviga koʻra reklama axborotiga doir hujjatlar va materiallarni belgilangan muddatda taqdim etishi;

Qoraqalpogʻiston Respublikasi Vazirlar Kengashining, viloyatlar va Toshkent shahri hokimlarining soʻroviga koʻra tashqi reklama obyektlaridan foydalanish bilan bogʻliq hujjatlar hamda materiallar taqdim etishi shart.

Reklama beruvchi qonunchilikka muvofiq boshqa huquqlarga ega boʻlishi va uning zimmasida oʻzga majburiyatlar ham boʻlishi mumkin.

Reklama tayyorlovchi va tarqatuvchi reklamaga oid faoliyatdagi oʻz tovarlarini (ishlarini, xizmatlarini) bozor konyunkturasidan kelib chiqib mustaqil ravishda belgilanadigan narxlar va tariflar boʻyicha yoki shartnoma asosida realizatsiya qilish huquqiga ega, bundan qonunchilikda nazarda tutilgan hollar mustasno.

Reklama tayyorlovchi va tarqatuvchi:

reklama beruvchidan ushbu Qonun 12-moddasi ikkinchi qismining uchinchi xatboshisida nazarda tutilgan hollarda tegishli litsenziyani, ruxsat etish xususiyatiga ega hujjatni va muvofiqlik sertifikatini talab qilishi;

reklamaga oid faoliyatning boshqa subyektlaridan maxfiylik shartlari asosida olingan axborotning oshkor qilinmasligini taʼminlashi;

vakolatli davlat organining soʻroviga koʻra reklama axborotiga doir hujjatlar va materiallarni u belgilagan muddatda taqdim etishi;

Qoraqalpogʻiston Respublikasi Vazirlar Kengashining, viloyatlar va Toshkent shahri hokimlarining soʻroviga koʻra tashqi reklama obyektlaridan foydalanish bilan bogʻliq hujjatlar hamda materiallar taqdim etishi shart.

Reklama tayyorlovchi va tarqatuvchi qonunchilikka muvofiq boshqa huquqlarga ega boʻlishi va ularning zimmasida oʻzga majburiyatlar ham boʻlishi mumkin.

Reklamaga oid faoliyat subyektlari vakolatli davlat organining, shuningdek Qoraqalpogʻiston Respublikasi Vazirlar Kengashining, viloyatlar va Toshkent shahar hokimliklarining asoslantirilgan talabiga koʻra ishonchli hujjatlarni hamda ogʻzaki yoki yozma shakldagi tushuntirishlarni, video- va audioyozuvlarni, shuningdek ushbu organlar mazkur Qonunda nazarda tutilgan vakolatlarini amalga oshirishi uchun zarur boʻlgan boshqa axborotni bunday talab kelib tushgan kundan eʼtiboran yetti kunlik muddatda taqdim etishi shart.

Reklama axborotiga doir hujjatlar va materiallar reklamani tayyorlashga, tarqatishga (joylashtirishga), reklamaning natura holidagi va pulda ifodalangan miqdoriga, bosma materiallar va nashr etilgan materiallarning (reklamaning), namunalarning, video- va audiomateriallarning, shuningdek yozib olingan boshqa vositalarning miqdoriga oid shartnomalardan iboratdir.

Reklamaga oid faoliyat subyektlari reklama axborotiga doir hujjatlar va materiallarni yoki ularning koʻchirma nusxalarini, shu jumladan ularga kiritiladigan keyingi barcha oʻzgartishlarni reklama oxirgi marta eʼlon qilingan (uzatilgan, tarqatilgan) kundan eʼtiboran uch yil mobaynida (bundan qonunchilikda reklamaga doir hujjatlar va materiallarni saqlashning uzoqroq muddatlari nazarda tutilgan hollar mustasno), reklamaga nisbatan nizo yuzaga kelgan taqdirda esa ushbu nizo qonunchilikda nazarda tutilgan tartibda hal qilinguniga qadar saqlashi shart.

Nomaqbul reklamaga yoʻl qoʻyilmaydi.

Agar reklama beruvchi reklama qilinayotgan qiyoslash ishonchliligining faktik dalillarini taqdim etishi mumkin boʻlsa, agar bunda reklama foydalanuvchisini reklama chalgʻitib qoʻymasa va chalgʻitib qoʻyishi mumkin boʻlmasa, raqobatchining ishchanlik obroʻsiga yoki uning tovar belgisiga (xizmat koʻrsatish belgisiga), firma nomiga, tovariga yoki faoliyatiga putur yetkazmasa, qiyosiy reklamaga yoʻl qoʻyiladi.

Reklamada quyidagilar taqiqlanadi:

jinsi, irqi, millati, tili, dini, eʼtiqodi, ijtimoiy kelib chiqishi, ijtimoiy mavqeyiga qarab, boshqa holatlarga koʻra kamsitish yoki oʻzga shaxslarning tovarlarini badnom qilish;

qonunchilikning buzilishiga olib kelishi mumkin boʻlgan, fuqarolarning hayotiga yoki sogʻligʻiga va atrof-muhitga zarar yetkazuvchi yoxud zarar yetkazishi mumkin boʻlgan, shuningdek xavfsizlik vositalariga eʼtiborsiz boʻlishga undovchi harakatlarga daʼvat qilish;

agar mualliflik huquqi va turdosh huquqlar toʻgʻrisidagi qonunchilikda boshqacha qoida nazarda tutilmagan boʻlsa, boshqa tovar reklamasida qoʻllaniladigan yoki video va kino mahsulotlarida, shuningdek boshqa ilm-fan, adabiyot va sanʼat asarlarida (mualliflik huquqi), efir yoki kabel orqali koʻrsatuvlar (eshittirishlar) beruvchi tashkilotlarning ijrolarida, fonogrammalarida foydalaniladigan umumiy yechimni, matnni, tasvirni, musiqali yoki ovozli effektlarni aynan takrorlash;

jismoniy shaxsning nomidan yoki tasviridan uning roziligisiz foydalanish;

pornografiya tusidagi axborotdan foydalanish;

axborot mazmunining buzilishiga olib kelishi mumkin boʻlgan chet el soʻzlari va iboralaridan foydalanish;

tovar davlat organlari yoki ularning mansabdor shaxslari tomonidan maʼqullanganligini koʻrsatish;

tovar belgilari (xizmat koʻrsatish belgilari) reklama qilinishi taqiqlangan yoxud reklama qilinishiga nisbatan tegishli cheklovlar yoki talablar belgilangan tovarning tovar belgilari (xizmat koʻrsatish belgilari) bilan adashtirib yuborish darajasida bir xil yoxud unga aynan oʻxshash boʻlgan boshqa tovarning reklamasi koʻrinishida tovarni reklama qilish;

davlat ramzlaridan, xususan Oʻzbekiston Respublikasining Davlat gerbi, Oʻzbekiston Respublikasining Davlat bayrogʻi tasviridan hamda Oʻzbekiston Respublikasining Davlat madhiyasi ohangidan foydalanish yoki ularni aynan takrorlash;

maktabgacha taʼlimda hamda tarbiyada, umumiy oʻrta, oʻrta maxsus va professional taʼlimda foydalaniladigan bosma nashrlarda (darsliklarda, maktab kundaliklarida, maktab daftarlarida va boshqalarda) tovarlarni reklama qilish;

narxlarni (tariflarni) chet el valyutasida koʻrsatish;

bolalarni ularning sogʻligʻiga zarar yetkazuvchi axborotdan himoya qilish toʻgʻrisidagi qonunchilikda nazarda tutilgan hollarda axborot mahsulotini yosh tasnifini koʻrsatmasdan reklama qilish;

tovar toʻgʻrisidagi, uni olish yoki undan foydalanish shartlari haqidagi muhim maʼlumotlarni yashirish va (yoki) oʻqish uchun farqlab olishni qiyinlashtiradigan qilib tasvirlash, agar bunda axborotning mazmuni buzib koʻrsatilsa va reklamadan foydalanuvchilarni chalgʻitsa;

milliy va oilaviy anʼanalarga, shuningdek axloq va maʼnaviyatning umum qabul qilingan normalariga zid boʻlgan shakllar, iboralar va obrazlardan foydalanish.

Quyidagilarni:

ishlab chiqarilishi yoki realizatsiya qilinishi qonunda taqiqlangan tovarlarni;

ishlab chiqarilishi va (yoki) realizatsiya qilinishi uchun tegishli sertifikatlari va litsenziyalari, majburiy sertifikatlashtirish guvohnomalari yoki maxsus ruxsatnomalari mavjud boʻlmagan tovarlarni;

giyohvandlik vositalarini yoki psixotrop va (yoki) kuchli taʼsir qiluvchi moddalarni;

pornografiya mahsulotlarini reklama qilish taqiqlanadi.

Ayrim turdagi tovarlar reklamasiga nisbatan mazkur reklamaga qoʻshimcha axborot va (yoki) ogohlantirishlarni ilova qilish zarurligi toʻgʻrisida talablar belgilanishi mumkin.

Reklama beruvchi va reklama tarqatuvchi bir vaqtning oʻzida Oʻzbekiston Respublikasining norezidentlari boʻlgan taqdirda, reklamani tarqatishga yoʻl qoʻyilmaydi.

Voyaga yetmaganlarni ularning ishonchini va tajribasi yetishmasligini suiisteʼmol qilishlardan himoya etish maqsadida reklamada quyidagilar taqiqlanadi:

voyaga yetmaganlarning isteʼmol qilishi taqiqlangan tovarlarni isteʼmol qilayotgan yoki ulardan foydalanayotgan voyaga yetmaganlarning tasvirlaridan foydalanish;

xavfli vaziyatlarda, shu bilan birga ularning hayoti va (yoki) sogʻligʻiga tahdid soluvchi xatti-harakatlarni sodir etishga, shu jumladan oʻz sogʻligiga zarar yetkazishga undovchi vaziyatlarda voyaga yetmaganlarni namoyish etishdan foydalanish;

voyaga yetmaganlarni tovarlarni olishga daʼvat qilish yoki reklama qilinayotgan tovarlarni olishni iltimos qilib uchinchi shaxslarga murojaat etishga undash;

haqiqiy yoki oʻyinchoq quroldan foydalanish;

ota-onalar va tarbiyachilarni obroʻsizlantirish, voyaga yetmaganlarning ularga boʻlgan ishonchiga putur yetkazish;

voyaga yetmaganlar olishi yoki isteʼmol qilishi taqiqlangan tovarlarni voyaga yetmaganlar uchun moʻljallangan telekanallarda, telekoʻrsatuvlar va radioeshittirishlarda reklama qilish.

Reklama, tarqatilish shakllaridan yoki vositalaridan qatʼi nazar, uni reklama sifatida identifikatsiya qilish mumkin boʻladigan tarzda boshqa axborotdan ajratilgan boʻlishi kerak. Mazkur talab uygʻunlashtirilgan reklamaga nisbatan tatbiq etilmaydi.

Televideniye va radiodagi reklama boshqa dasturlardan oʻzining boshlanishi va oxirida audio-, video-, aralash vositalar yoki boshlovchilarning sharhlari yordamida ajratib qoʻyilishi kerak.

Bosma nashrlardagi reklama boshqa axborotdan “Reklama” degan soʻz koʻrsatilgan holda ajratilgan boʻlishi kerak.

Reklama beruvchi tomonidan bevosita yoki bilvosita foyda (daromad) olish maqsadida eʼlon qilingan, tovarga qiziqishni shakllantirish va uni realizatsiya qilishga koʻmaklashish uchun tovarning muayyan markasiga (nomiga, modeliga, artikuliga) yoxud uni ishlab chiqaruvchiga reklamadan foydalanuvchilarning eʼtiborini atayin jalb etadigan yoki mazkur tovarni ishlab chiqaruvchi yoki tarqatuvchi shaxsning nashrga oid maʼlumotlarini (rekvizitlarini) oʻz ichiga olgan axborot materiali, mualliflik va tahririyat materiali reklama deb hisoblanadi hamda u “Reklama” rukni ostida joylashtirilgan boʻlishi kerak.

Telekoʻrsatuvlarni, radioeshittirishlarni yaratishda, televideniye va radioda namoyish etiladigan konsert-tomosha, sport tadbirlarini hamda boshqa tadbirlarni tashkil qilishda homiylar va sheriklar ishtirok etishi mumkin.

Namoyish qilinayotgan telekoʻrsatuvlar, radioeshittirishlarning homiylari va sheriklari toʻgʻrisidagi axborot dastur boshida hamda oxirida qisqa va aniq koʻrsatilishi kerak. Homiyning nomi (nomlanishi) yonida uning tovar belgisi (xizmat koʻrsatish belgisi) koʻrsatilishi mumkin.

Homiylik va sheriklik belgilari “Dastur homiysi” va (yoki) “Dastur sherigi” shaklida homiy va (yoki) sherik haqidagi qaydni oʻz ichiga olgan boʻlishi mumkin.

Telekanallarda homiylik va sheriklik belgilarining xronometraji besh soniyadan, radiokanallarda esa yigirma soniyadan oshishi mumkin emas.

Reklamaning aylanishi uchun belgilangan barcha talablar ijtimoiy axborotning aylanishiga nisbatan qoʻllaniladi.

Davlat hokimiyati va boshqaruvi organlari, shuningdek jismoniy va yuridik shaxslar ijtimoiy axborotning reklama beruvchilari boʻlishi mumkin.

Jismoniy va yuridik shaxslarning ijtimoiy axborotni bepul asosda tayyorlash hamda tarqatishga (joylashtirishga), oʻz mol-mulkini (shu jumladan pul mablagʻlarini) ijtimoiy axborot tayyorlash va tarqatish (joylashtirish) uchun boshqa shaxslarga berishga doir faoliyati homiylik faoliyati deb eʼtirof etiladi. Bunday shaxslar qonunchilikda nazarda tutilgan imtiyozlardan foydalanadi.

Ijtimoiy axborotda tovarlarning muayyan markalari (nomlari, modellari, artikullari), ishlab chiqaruvchilarning tovar belgilari (xizmat koʻrsatish belgilari) hamda ularning boshqa individuallashtirish vositalari toʻgʻrisidagi eslatmaga, shuningdek bevosita yoki bilvosita foyda (daromad) olish maqsadlarini koʻzlashga yoʻl qoʻyilmaydi.

Radio va teledasturlarda tarqatiladigan ijtimoiy axborotda homiylar toʻgʻrisidagi eslatma uch soniyadan oshishi mumkin emas va bunday eslatmaga kadr maydonining koʻpi bilan yetti foizi ajratilishi, boshqa vositalar orqali tarqatiladigan ijtimoiy axborotda esa reklama maydonining (sathining) koʻpi bilan besh foizi ajratilishi kerak.

Ommaviy axborot vositalari, tashqi reklama va axborotni tarqatuvchilar reklama uchun ajratilgan efir vaqti, nashr yoki reklama maydoni umumiy oylik hajmining besh foizidan kam boʻlmagan hajmda ijtimoiy axborotni joylashtirishi shart. Bunda faoliyati Oʻzbekiston Respublikasi Davlat budjeti mablagʻlari hisobidan toʻliq moliyalashtiriladigan va (yoki) oʻz ustav fondida (ustav kapitalida) davlat ulushi ellik foiz hamda undan ortiq boʻlgan reklama tarqatuvchilar davlat boshqaruvi organlarining va mahalliy davlat hokimiyati organlarining buyurtmasiga koʻra ijtimoiy axborotni bepul joylashtiradi.

Qimmatbaho sovrinlar tarqatiladigan va (yoki) oʻynaladigan ragʻbatlantiruvchi aksiyalarni yoxud ushbu aksiyalarda ishtirok etish uchun reklamadan foydalanuvchi tomonidan biror-bir harakatlar amalga oshirilishini nazarda tutadigan ragʻbatlantiruvchi aksiyalarni oʻtkazish chogʻida reklama beruvchi ragʻbatlantiruvchi aksiyani oʻtkazish boshlanguniga qadar ommaviy axborot vositalarida va (yoki) erkin foydalaniladigan Internet jahon axborot tarmogʻidagi axborot resurslarida aksiyada ishtirok etish shartlarini eʼlon qilishi shart.

Ragʻbatlantiruvchi aksiyalarni oʻtkazish shartlarining eʼloni quyidagilarni oʻz ichiga olishi kerak:

ragʻbatlantiruvchi aksiyani oʻtkazish qoidalarini, uni oʻtkazish muddatlari, sovrinlar va yutuqlarning nomi, miqdori, ularni olish joyi hamda tartibi koʻrsatilgan holda, shuningdek ragʻbatlantiruvchi aksiyani oʻtkazish shartlariga taalluqli boshqa har qanday axborotni;

reklama beruvchining nomini, manzilini, aloqa bogʻlashga doir maʼlumotlarini (telefon raqami, elektron pochta manzili va boshqa maʼlumotlarni);

ragʻbatlantiruvchi aksiya tashkilotchisining yuridik nomini, joylashgan yerini (pochta manzilini), aloqa bogʻlashga doir maʼlumotlarini (telefon raqami, elektron pochta manzili va boshqa maʼlumotlarni).

Ishtirok etish shartlari Internet jahon axborot tarmogʻidagi axborot resurslarida eʼlon qilingan taqdirda, eʼlon ragʻbatlantiruvchi aksiya tugaganidan keyin kamida olti oy davomida erkin foydalanish uchun ochiq boʻlishi kerak.

Ragʻbatlantiruvchi aksiyalar tovarlarni bepul tarqatish va raqobatdosh tovarlarga (bundan ushbu Qonunda reklama qilinishi taqiqlangan tovarlar mustasno) ayirboshlash yoki xizmatlar koʻrsatish bilan birga amalga oshirilishi mumkin.

Ragʻbatlantiruvchi aksiyalar doirasida qimmatbaho sovrinlar oʻynalishi quyidagi hollarda lotereya hisoblanmaydi, basharti:

mukofot fondi, shuningdek ragʻbatlantiruvchi aksiya oʻtkazilishini tashkil etish xarajatlari ragʻbatlantiruvchi aksiya ishtirokchilarining toʻgʻridan-toʻgʻri pul badallari hisobiga yoki chiptalar sotish va reklama beruvchining reklama qilinayotgan tovari bilan bogʻliq boʻlmagan boshqa nominal birliklar hisobidan shakllantirilmagan boʻlsa;

ragʻbatlantiruvchi aksiyada ishtirok etish faqat reklama xususiyatiga va reklama beruvchining reklama qilinayotgan tovari sotilishini koʻpaytirish maqsadiga ega boʻlsa.

Ragʻbatlantiruvchi aksiyalar oʻtkazilishi toʻgʻrisidagi axborotda yutuqni olish ehtimolini oshirib koʻrsatuvchi iboralar boʻlmasligi kerak.

Tegishli mukofot fondi mavjud boʻlmagan holda ragʻbatlantiruvchi aksiyalarni tashkil etish va oʻtkazish taqiqlanadi.

Reklama toʻgʻrisidagi qonunchilik buzilganligi vakolatli davlat organi tomonidan aniqlangan taqdirda, qonunbuzar mazkur organning qaroriga binoan va u koʻrsatgan muddatda aksilreklamani amalga oshirishi shart.

Aksilreklama ixtiyoriy ravishda yoki vakolatli davlat organining qarori yoxud sudning qaroriga binoan amalga oshirilishi mumkin.

Agar qonunbuzar aksilreklamani belgilangan muddatda amalga oshirmasa, vakolatli davlat organi qonunbuzarning reklamasini u aksilreklamani amalga oshirguniga qadar toʻliq yoki qisman toʻxtatib turish toʻgʻrisida qaror qabul qilishga hamda bu haqda reklama toʻgʻrisidagi qonunchilikni buzgan shaxs bilan shartnoma tuzgan taraflarni xabardor qilishga haqlidir.

Aksilreklama raddiya berilayotgan reklama qaysi reklama vositalarida amalga oshirilgan boʻlsa, ayni oʻsha reklama vositalarida, ayni oʻsha davomiylik, makon, joy va tartibdan foydalangan holda amalga oshiriladi.

Aksilreklamaning mazmuni qonunbuzarlik holatini aniqlagan va uni tuzatish toʻgʻrisida qaror qabul qilgan vakolatli davlat organi bilan kelishiladi. Ayrim hollarda aksilreklama amalga oshiriladigan reklama vositasini, davomiylikni, joyni va tartibni ushbu organning qaroriga koʻra oʻzgartirishga yoʻl qoʻyilishi mumkin;

Aksilreklamani amalga oshirish bilan bogʻliq barcha xarajatlarning oʻrni qonunbuzar tomonidan qoplanadi.

Tashqi reklamani joylashtirish (tarqatish) uchun maxsus ishlab chiqilgan va qoʻllaniladigan vositalar, shuningdek axborotni aholiga yetkazish vazifasini bajaruvchi texnik vositalar (konstruksiyalar) (pilonlar, koʻchma reklama konstruksiyalari (ustun, plakat), prizmatronlar, proyeksiyaviy konstruksiyalar, bilbordlar, videoekranlar, elektron displeylar va boshqa texnik vositalar) tashqi reklama va axborot obyektlaridir (konstruksiyalaridir).

Tashqi reklama va axborot obyektlari (konstruksiyalari):

yer uchastkalariga;

binolarning, inshootlarning yoki ular majmualarining sirtiga (tomiga, old tomoniga, devorlariga);

koʻpriklarga va yoʻl oʻtkazgichlarga;

jamoat transporti bekatlariga, shahar muhiti elementlariga (parkinglar, tumbalar, taksofonlarga va boshqalarga);

muayyan hududdagi (shahar muhiti) tashqi infratuzilmaning boshqa obyektlariga oʻrnatilishi mumkin.

Aholining shahar doirasidagi yashash va (yoki) faoliyat yuritish muhiti shahar muhiti jumlasiga kirib, u ishlab chiqarish, ijtimoiy, muhandislik, transport infratuzilmalarining moddiy obyektlarini, havo va yer osti makonini (metropoliten infratuzilmasidan tashqari) oʻz ichiga oladi hamda tashqi reklama va axborot obyektlarini (konstruksiyalarini) oʻrnatish maqsadlari uchun tijorat ahamiyatiga ega boʻladi.

Tashqi reklama va axborotni joylashtirish (tarqatish) uchun maxsus moʻljallangan hamda foydalaniladigan texnik vositalarni oʻrnatish yoki tashqi reklama va axborotni joylashtirish uchun maxsus moʻljallanmagan texnik vositalarga joylashtirish (tarqatish) tashqi reklama va axborot obyektini (konstruksiyasini) oʻrnatish hisoblanadi.

Qoraqalpogʻiston Respublikasi Vazirlar Kengashi, viloyatlar hamda Toshkent shahar hokimliklari tashqi reklama va axborot obyektlarini (konstruksiyalarini) joylashtirish uchun yer uchastkasining tijorat qiymatini aks ettiruvchi hududlarning zonalar boʻyicha taqsimotini, oʻrnatiladigan tashqi reklama va axborot obyektlari (konstruksiyalari) orasidagi masofalar normativlarini tasdiqlaydi, yuqori texnologiyali tashqi reklama va axborot obyektlarining (konstruksiyalarining) yangi turlari oʻrnatilishi hamda ulardan foydalanilishini ragʻbatlantirish tartibini belgilaydi, tashqi reklamani oʻrnatganlik uchun yigʻimlar toʻlanishi ustidan nazoratni, reklama joylari pasportlarining reyestri yuritilishini amalga oshiradi.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tashqi reklama va axborot obyektlarini (konstruksiyalarini), mulk shaklidan qatʼi nazar, yer uchastkalariga, shuningdek binolarga yoki boshqa koʻchmas mulkka oʻrnatish chizmalarini tasdiqlaydi.

Tashqi reklama va axborot obyektlarini (konstruksiyalarini) oʻrnatish chizmasi shaharsozlik rejalashtirish hujjatlariga muvofiq boʻlishi hamda mavjud binolarning tashqi meʼmoriy qiyofasiga, shaharsozlik normalari va qoidalariga, xavfsizlik talablariga rioya etilishini taʼminlashi hamda reklama konstruksiyalarining turlari va shakllari, axborot maydonlarining sathi hamda reklama konstruksiyalarining texnik tavsiflari koʻrsatilgan holda reklama konstruksiyalarini oʻrnatish xaritalarini oʻz ichiga olgan boʻlishi kerak.

Tashqi reklama va axborot obyektlarini (konstruksiyalarini) oʻrnatish chizmasi va unga kiritiladigan oʻzgartishlar vakolatli davlat organi bilan oldindan kelishib olinishi lozim.

Tashqi reklama va axborot obyektlarini (konstruksiyalarini) oʻrnatish chizmasi hamda unga kiritiladigan oʻzgartishlar Qoraqalpogʻiston Respublikasi Vazirlar Kengashining, viloyatlar va Toshkent shahar hokimliklarining Internet jahon axborot tarmogʻidagi rasmiy veb-saytlarida eʼlon qilinishi lozim.

Yer uchastkalariga, binolarga hamda inshootlarga tashqi reklama va axborot obyektlarini (konstruksiyalarini) oʻrnatishga boʻlgan huquq yuridik yoki jismoniy shaxslarga berilishi mumkin.

Davlat mulki boʻlgan yer uchastkalariga, binolarga hamda inshootlarga tashqi reklama va axborot obyektlarini (konstruksiyalarini) oʻrnatishga boʻlgan huquq yagona elektron savdo maydonchasi orqali ochiq elektron auksionlar asosida beriladi, bundan ushbu moddaning uchinchi qismida nazarda tutilgan hollar mustasno.

Ushbu Qonun kuchga kirguniga qadar oʻziga reklama joyining pasporti berilgan paytda amalda boʻlgan qonunchilikka muvofiq mazkur pasport berilgan yuridik va jismoniy shaxslar yer uchastkalariga, binolarga hamda inshootlarga tashqi reklama va axborot obyektlarini (konstruksiyalarini) yagona elektron savdo maydonchasi orqali ochiq elektron auksionlarni oʻtkazmasdan oʻrnatish huquqiga ega boʻladi. Reklama joyi pasporti muddati oʻtganidan keyin yuridik yoki jismoniy shaxslar tashqi reklama va axborot obyektlarini (konstruksiyalarini) yagona elektron savdo maydonchasi orqali ochiq elektron auksion yakunlari boʻyicha oʻrnatish huquqiga ega boʻlishi mumkin.

Xususiylashtirilgan yer uchastkalariga, shuningdek xususiy mulk boʻlgan binolarga hamda inshootlarga tashqi reklama va axborot obyektlarini (konstruksiyalarini) oʻrnatishga boʻlgan huquq xususiylashtirilgan yer uchastkalarining, binolarning hamda inshootlarning mulkdorlari bilan tuzilgan shartnomalar asosida yuridik yoki jismoniy shaxslarga berilishi mumkin.

Yuridik yoki jismoniy shaxslar yagona elektron savdo maydonchasi orqali ochiq elektron auksion yakunlariga koʻra yer uchastkalaridagi reklama joyining pasportini oʻn yil muddatga, davlat mulki boʻlgan binolardagi va inshootlardagi reklama joyining pasportini esa besh yil muddatga olish huquqiga ega boʻladi.

Yuridik yoki jismoniy shaxslar xususiylashtirilgan yer uchastkalaridagi, shuningdek xususiy mulk boʻlgan binolar va inshootlardagi reklama joyining pasportini xususiylashtirilgan yer uchastkalarining, binolarning hamda inshootlarning mulkdorlari bilan tuzilgan shartnomalar asosida olish huquqiga ega boʻladi. Bunda reklama joyining pasporti ushbu shartnomalarda belgilangan muddatga beriladi, biroq bu muddat oʻn yildan oshishi mumkin emas.

Tashqi reklama va axborot obyektini (konstruksiyasini) davlat mulki boʻlgan yer uchastkasiga oʻrnatish uchun reklama joyining pasporti egasiga tegishli yer uchastkasi ijara huquqi asosida beriladi, davlat mulki boʻlgan binoga yoki inshootga tashqi reklama va axborot obyektini (konstruksiyasini) oʻrnatish uchun esa reklama joyi pasportining egasi bilan ijara shartnomasi tuziladi.

Tashqi reklama va axborot obyektlarini (konstruksiyalarini) oʻrnatish uchun reklama joyining pasportida koʻrsatilgan, davlat mulki boʻlgan yer uchastkasidan, binodan yoki inshootdan vaqtinchalik foydalanish imkoni boʻlmagan taqdirda (yer uchastkasida qurilish ishlari olib borilishi, binolar hamda inshootlar rekonstruksiya qilinishi hamda taʼmirlanishi va boshqalar) Qoraqalpogʻiston Respublikasi Vazirlar Kengashining, viloyatlar hamda Toshkent shahar hokimliklarining qaroriga koʻra reklama joyi pasportining egasiga tashqi reklama va axborot obyektini (konstruksiyasini) montaj qilganlik (oʻrnatganlik), demontaj qilganlik hamda koʻchirib oʻtkazganlik uchun kompensatsiya toʻlangan holda teng qimmatli joy beriladi, yer uchastkasi, bino yoki inshoot berilmagan taqdirda esa tashqi reklama hamda axborot obyektini (konstruksiyasini) oʻrnatish va demontaj qilish, elektron auksion orqali tashqi reklama va axborot obyektini (konstruksiyasini) oʻrnatish huquqini olish, konstruksiyaning baholash qiymati bilan bogʻliq xarajatlar kompensatsiya qilinadi.

Agar hududlarda qurilish, obodonlashtirish ishlarini, binolarni (inshootlarni) qurish, rekonstruksiya qilish yoki taʼmirlash hamda boshqa ishlarni olib borish tugallanganidan soʻng tashqi reklama va axborot obyektini (konstruksiyasini) avvalgi joyiga oʻrnatish imkoniyati mavjud boʻlsa, Qoraqalpogʻiston Respublikasi Vazirlar Kengashining, viloyatlar va Toshkent shahar hokimliklarining qaroriga koʻra reklama joyi pasportining avvalgi egasiga oʻsha reklama joyi uchun pasport uning amal qilish muddati bungacha amal qilgan reklama joyining pasporti bekor qilingan vaqtga mutanosib ravishda uzaytirilgan holda beriladi hamda tashqi reklama va axborot obyektini (konstruksiyasini) montaj qilganlik (oʻrnatganlik) va demontaj qilganlik uchun ushbu Qonunga muvofiq kompensatsiya toʻlanadi.

Reklama joyining pasporti mavjud boʻlmagan yer uchastkalariga, binolarga hamda inshootlarga oʻrnatilgan tashqi reklama va axborot obyektlari (konstruksiyalari) vakolatli davlat organining qaroriga muvofiq demontaj qilinishi lozim.

Tashqi reklama va axborot obyektlari (konstruksiyalari):

Tashqi reklama va axborot obyektlari (konstruksiyalari) xavfsizligining umumiy texnik reglamentida nazarda tutilgan talablarga muvofiq boʻlishi;

reklama joyining pasportiga muvofiq faqat reklama tarqatish maqsadida foydalanilishi;

reklama joyining pasporti berilgan kundan eʼtiboran olti oy ichida oʻrnatilishi;

tashqi reklama va axborot obyektlarini (konstruksiyalarini) oʻrnatish chizmasiga muvofiq boʻlishi kerak.

Tashqi reklama va axborot obyektlarini (konstruksiyalarini) yoʻlning qatnov qismiga chiqarib oʻrnatish taqiqlanadi.

Tashqi reklamani moddiy madaniy meros obyektlariga, yoʻl belgilariga va svetoforlarga, ularning tirgaklariga yoki harakatni tartibga solish uchun moʻljallangan boshqa har qanday qurilmaga oʻrnatish, shuningdek tutash hududdagi obodonlashtirish elementlarini buzgan holda oʻrnatish taqiqlanadi.

Reklama joyi pasportining egalari oʻrnatilgan tashqi reklama va axborot obyektlari (konstruksiyalari) uchun toʻlovni oʻz vaqtida amalga oshirishi shart.

Reklama joyi pasportining egasi tomonidan ushbu moddada nazarda tutilgan talablarga rioya etilmasligi reklama joyi pasportini bekor qilish uchun asos boʻladi. Reklama joyi pasporti bekor qilingan taqdirda, reklama joyining pasportida koʻrsatilgan, davlat mulki boʻlgan yer uchastkalariga, binolarga hamda inshootlarga tashqi reklama va axborot obyektlarini (konstruksiyalarini) oʻrnatishga boʻlgan huquq yagona elektron savdo maydonchasi orqali ochiq elektron auksionda sotuvga qoʻyiladi.

Telekanallar efirida, tele-, video-, kinoxronikali dasturlarda tarqatilayotgan reklamaning (shu jumladan teledoʻkon reklamasi kabi reklamaning) umumiy davomiyligi koʻrsatuv vaqtining bir soati davomida yigirma foizdan, biroq bir sutkada koʻrsatuv vaqtining oʻn besh foizidan oshishi mumkin emas. Ushbu talab faqat reklama teledasturlariga ixtisoslashtirilgan telekanallarga nisbatan tatbiq etilmaydi.

Davomiyligi oʻn daqiqadan kam boʻlgan telekoʻrsatuvlarni reklama bilan uzib qoʻyishga va reklama bilan birga namoyish etishga yoʻl qoʻyilmaydi.

Sport musobaqasining (shu jumladan sport bellashuvlari, oʻyinlari, janglari, poygalarining) jonli efirdagi yoki yozib olingan holdagi namoyishi, agar telekanalning huquq egasi bilan tuzilgan shartnomasida boshqacha qoida nazarda tutilmagan boʻlsa, faqat sport musobaqalari jarayonidagi tanaffuslarda yoki ular toʻxtatib turilgan vaqtda reklama bilan, shu jumladan homiylik reklamasi bilan uzib qoʻyilishi mumkin.

Quyidagilar taqiqlanadi:

reklama joylashtirish maqsadida davlat tadbirlari va marosimlarining namoyishini uzib qoʻyish;

reklama va reklama haqidagi anons, shu jumladan teledastur anonsi tovushining balandligi darajasini reklama va reklama haqidagi anons bilan uzib qoʻyilgan teledastur va telekoʻrsatuv tovushiga nisbatan balandroq qilib belgilash;

telekoʻrsatuvlar namoyish qilinayotganda reklama maqsadlarida harakatlanuvchi satrdan foydalanish, bundan reklama bloki vaqtida foydalanish mustasno;

telekoʻrsatuvlarga videoplashkalarni (telekoʻrsatuv namoyishi vaqtida koʻrinib qoladigan tijorat axborotini) joylashtirish, bundan reklamaning oʻzini, shuningdek reklama huquqi asosida efirga chiqariladigan koʻrsatuvni namoyish etish vaqti mustasno. Bunda videoplashka oʻlchami ekran sathining oʻn foizidan oshmasligi va uning pastki qismida gorizontal holatda joylashtirilgan boʻlishi kerak.

Ushbu modda birinchi va ikkinchi qismlarining talablari:

tegishli telekanalda namoyish qilinayotgan telekoʻrsatuvlar toʻgʻrisidagi teledasturlarda joylashtiriladigan axborotga;

teledasturning logotipiga va mazkur teledastur haqidagi axborotga nisbatan tatbiq etilmaydi.

Chet el telekanallari retranslyatsiya qilinayotganda tarqatiladigan reklama axborotining ushbu Qonunning 16-moddasida nazarda tutilgan talablarga muvofiqligini taʼminlash imkoni boʻlmagan taqdirda, bunday kanallarning dasturlari reklamadan foydalanuvchilarga reklama axborotisiz taqdim etiladi.

Radioda tarqatilayotgan reklamaning, radiodasturlarni reklama bilan uzib qoʻyishning umumiy davomiyligi eshittirish vaqtining bir soati davomida yigirma foizdan, biroq bir sutkada eshittirish vaqtining oʻn besh foizidan oshishi mumkin emas. Ushbu talab eshittirishlari faqat reklama radiodasturlariga ixtisoslashtirilgan radiokanallarga nisbatan tatbiq etilmaydi.

Sport musobaqasining (shu jumladan sport bellashuvlari, oʻyinlari, janglari, poygalarining) jonli efirdagi yoki yozib olingan holdagi namoyishi, agar radiokanalning huquq egasi bilan tuzilgan shartnomasida boshqacha qoida nazarda tutilmagan boʻlsa, faqat sport musobaqalari jarayonidagi tanaffuslarda yoki ular toʻxtatib turilgan vaqtda reklama bilan, shu jumladan homiylik reklamasi bilan uzib qoʻyilishi mumkin.

Quyidagilar taqiqlanadi:

reklama joylashtirish maqsadida davlat tadbirlari va marosimlarining namoyishini uzib qoʻyish;

reklama va uning anonsi, shu jumladan radioeshittirishlar haqidagi anons tovushining balandligi darajasini reklama va radioeshittirishlar reklamasi haqidagi anons bilan uzib qoʻyilgan eshittirish tovushiga nisbatan balandroq qilib belgilash.

Chet el radiokanallari retranslyatsiya qilinayotganda tarqatiladigan reklama axborotining ushbu Qonunning 16-moddasida nazarda tutilgan talablarga muvofiqligini taʼminlash imkoni boʻlmagan taqdirda, bunday kanallarning dasturlari reklamadan foydalanuvchilarga reklama axborotisiz taqdim etiladi.

Bosma ommaviy axborot vositalaridagi reklamaning hajmi davriy nashr bir soni hajmining qirq foizidan oshib ketmasligi kerak. Ushbu talab faqat reklamaga ixtisoslashtirilgan bosma ommaviy axborot vositalariga nisbatan tatbiq etilmaydi.

Telekommunikatsiyalar xizmatlarini koʻrsatish chogʻida reklamani tarqatishga faqat, basharti abonent oldindan rozilik bersa, yoʻl qoʻyiladi.

Maʼlumotlar beruvchi telefon xizmati koʻrsatishda reklama faqat soʻralgan axborot berilganidan keyin taqdim etilishi kerak. Bunda reklama taqdim etish vaqti xizmat narxini belgilashda hisobga olinmasligi kerak.

Mahalliy, shaharlararo yoki xalqaro tovushli telefon aloqasidan foydalangan holda oʻziga reklama taqdim etiladigan reklamadan foydalanuvchi:

taqdim etiladigan axborot reklama ekanligi toʻgʻrisida;

reklama axborotini taqdim etishning pulli yoki tekinligi va uning narxi haqida;

reklama qilinayotgan tovarga nisbatan qonunchilikda va xizmatlar koʻrsatuvchi tomonidan belgilangan yoshga doir hamda boshqa cheklovlar toʻgʻrisida oldindan xabardor qilinishi kerak.

Shoshilinch tezkor xizmatlarning (yongʻindan saqlash, ichki ishlar organlari, tez tibbiy yordam, gaz tarmogʻining avariya xizmati va boshqalarning) raqamlaridan reklama tarqatish uchun foydalanish taqiqlanadi.

Internet jahon axborot tarmogʻi vositasida tarqatiladigan reklama ushbu Qonunning 16-moddasida nazarda tutilgan reklamaga qoʻyiladigan asosiy talablarga, shu jumladan reklama beruvchi va reklama tarqatuvchi bir vaqtning oʻzida Oʻzbekiston Respublikasining norezidentlari boʻlgan taqdirda reklamani tarqatishga yoʻl qoʻyilmasligi toʻgʻrisidagi talabga muvofiq boʻlishi kerak.

Qonunchilikda Internet jahon axborot tarmogʻining “UZ” domen zonasidagi axborot resurslarida reklamaning aylanishiga nisbatan qoʻshimcha talablar belgilanishi mumkin.

Binolarning ichiga joylashtiriladigan reklama ichki reklamadir.

Ichki reklamani joylashtirish oʻlchamlari u joylashtirilgan joyning egasi tomonidan belgilanadi.

Ichki reklamani davlat organlarining va fuqarolar oʻzini oʻzi boshqarish organlarining, maktabgacha taʼlim tashkilotlarining, umumiy oʻrta, oʻrta maxsus va professional taʼlim tashkilotlarining binolariga joylashtirish taqiqlanadi, bundan ijtimoiy axborot va qonunchilikda nazarda tutilgan hollar mustasno.

Reklamani transport vositalariga joylashtirish yoʻl harakati xavfsizligi qoidalariga rioya etilgan holda, transport vositalari egalari va transport vositalariga nisbatan boshqa ashyoviy huquqlarga ega boʻlgan shaxslar bilan tuzilgan shartnomalar asosida amalga oshiriladi.

Reklamani umumiy foydalanishdagi transport vositalarida, metropoliten bekatlarida, vokzallarda, portlar va aeroportlarda yoʻlovchilarga xabar beruvchi ovozli tarmoqlar orqali tarqatish taqiqlanadi.

Quyidagi dori vositalarini reklama qilish taqiqlanadi:

faqat shifokorning retsepti boʻyicha tarqatiladigan dori vositalarini;

tarkibida giyohvandlik vositalari yoki psixotrop va (yoki) kuchli taʼsir qiluvchi moddalar mavjud boʻlgan dori vositalarini;

Oʻzbekiston Respublikasida tibbiyotda qoʻllanish uchun ruxsat etilmagan dori vositalarini;

Oʻzbekiston Respublikasi Sogʻliqni saqlash vazirligida davlat roʻyxatdan oʻtkazilmagan dori vositalarini.

Dori vositalarini reklama qilishda quyidagilar taqiqlanadi:

taniqli shaxslarning, tibbiyot xodimlarining yoki tashqi koʻrinishi shifokorlarning tashqi koʻrinishiga oʻxshash shaxslarning ishtirok etishi. Mazkur talab foydalanuvchilari faqat tibbiyot va farmatsevtika xodimlari boʻlgan reklamaga, tibbiyot yoki farmatsevtika koʻrgazmalari, seminarlari, konferensiyalari va boshqa shunga oʻxshash tadbirlar oʻtkaziladigan joylarda tarqatiladigan reklamaga, shuningdek bosma nashrlarga joylashtirilgan reklamaga nisbatan tatbiq etilmaydi;

olimlarning, tibbiyot xodimlarining tavsiyalaridan, xuddi shuningdek alohida shaxslarning minnatdorchiligidan, tavsiyalaridan va reklama qilinayotgan dori vositalarining taʼsiri haqidagi hikoyalaridan iborat boʻlgan tavsiyalardan foydalanish;

kasallik (jarohat) va (yoki) dori vositalarining inson organizmiga taʼsiri natijasida inson organizmida yuz beradigan oʻzgarishlar toʻgʻrisidagi videolavhadan, tasvirdan yoki vizual namoyishdan foydalanish. Mazkur talab taʼsiri klinik jihatdan tasdiqlangan, inson organizmidagi dori vositasini qabul qilish yoki isteʼmol qilish bilan bogʻliq boʻlgan va inson organizmidagi tasvirlanayotgan oʻzgarishlar jarayoni dori vositasining inson organizmiga klinik jihatdan tasdiqlangan taʼsirini aniq koʻrsatadigan oʻzgarishlar haqidagi tasvirga yoki vizual namoyishga taalluqli emas;

dori vositalarini haddan ziyod va notoʻgʻri ishlatishga undash;

shifokor maslahatini olmasdan mustaqil ravishda davolanish yoki jarrohlik aralashuvini amalga oshirish imkoniyati toʻgʻrisida taassurot (ishonch) uygʻotish;

dori vositalari muvaffaqiyatli qoʻllanilganligiga doir muayyan hollarga havola qilinadigan reklama.

Retseptsiz beriladigan dori vositalarining reklamasi:

dori vositasini nojoʻya taʼsirlar mavjud emasligi jihatidan noyob, eng samarali, eng xavfsiz deb taqdim etmasligi;

dori vositasining tarkibiga, kelib chiqishiga, yangiligiga yoki patentlanganligiga nisbatan yanglishishlarga olib kelmasligi;

dori vositasi ovqatga qoʻshiladigan biologik faol qoʻshimcha, kosmetik mahsulot yoki gigiyena vositasi yoxud boshqa har qanday turdagi tovar ekanligini taʼkidlamasligi;

reklama taʼsirini kuchaytirish maqsadida boshqa dori vositalari bilan notoʻgʻri taqqoslashlarga yoʻl qoʻymasligi;

mazkur dori vositasining taʼsiri kafolatlanganligi toʻgʻrisidagi tasdiqni oʻz ichiga olmasligi;

inson salomatligi dori vositasini qabul qilmaslik oqibatida yomonlashishi mumkinligini uqtirmasligi kerak.

Retseptsiz beriladigan dori vositalarining reklamasi har bir holda ularni qoʻllashga va ulardan foydalanishga qarshi koʻrsatmalar mavjudligi, qoʻllashga doir yoʻriqnoma bilan tanishish yoki mutaxassislar maslahatini olish zarurligi toʻgʻrisidagi ogohlantirish bilan birga berilishi kerak.

Dori vositalarining reklamasi sohasida ragʻbatlantiruvchi aksiyalar oʻtkazish taqiqlanadi.

Tibbiyot xodimlari va tibbiyot muassasalari uchun moʻljallangan dori vositalarining reklamasi dori vositalari toʻgʻrisidagi ilmiy maʼlumotlar roʻyxatiga toʻliq mos kelishi hamda unda quyidagi maʼlumotlar boʻlishi kerak:

faol moddaning nomi;

har bir doza uchun faol moddaning miqdori (chiqarilish shakli);

nojoʻya holatlar va asosiy nomaqbul taʼsirlar;

qarshi koʻrsatmalar, ogohlantirishlar va mazkur dori vositasini ehtiyotkorlik bilan qoʻllash kerak boʻlgan hollarga doir axborot;

boshqa dori vositalari bilan oʻzaro taʼsiri;

tegishli ilmiy manbalarga, shuningdek qoʻshimcha axborot olish imkoniyati va manbaiga havola;

mazkur reklamadan foydalanuvchilar faqat tibbiyot va farmatsevtika xodimlari ekanligi toʻgʻrisidagi axborot.

Ovqatga qoʻshiladigan biologik faol qoʻshimchalarning va oziq-ovqat qoʻshimchalarining reklamasi:

ular dori vositalari hisoblanadi va (yoki) davolash xossalariga ega degan taassurotni uygʻotmasligi;

ularni qoʻllash natijasida odamlar davolanganligiga, ularning ahvoli yaxshilanganligiga doir muayyan hollarga havolalarni oʻz ichiga olmasligi;

ularning qoʻllanilganligi munosabati bilan jismoniy shaxslar tomonidan bildirilgan minnatdorchilik izhorini oʻz ichiga olmasligi;

sogʻlom ovqatlanishni rad etishga undamasligi;

ovqatga qoʻshiladigan biologik faol qoʻshimchalarning va oziq-ovqat qoʻshimchalarining tadqiqotlar oʻtkazilganligi, davlat roʻyxatiga olinganligi toʻgʻrisidagi faktlarga havolalar qilish, shuningdek boshqa tadqiqotlar natijalaridan ularni qoʻllash uchun toʻgʻridan-toʻgʻri tavsiya shaklida foydalanish orqali dori vositalariga nisbatan afzalliklari haqidagi taassurotni yuzaga keltirmasligi;

voyaga yetmaganlar olishi yoki isteʼmol qilishi taqiqlangan ovqatga qoʻshiladigan biologik faol qoʻshimchalar va oziq-ovqat qoʻshimchalari reklamasida bolalar tasviridan foydalanilmasligi kerak.

Ovqatga qoʻshiladigan biologik faol qoʻshimchalar va oziq-ovqat qoʻshimchalari reklamasi har bir holda reklama obyekti dori vositasi emasligi toʻgʻrisidagi ogohlantirish bilan birga berilishi kerak.

Ovqatga qoʻshiladigan biologik faol qoʻshimchalar va oziq-ovqat qoʻshimchalari reklamasi boʻyicha ragʻbatlantiruvchi aksiyalar oʻtkazish taqiqlanadi.

Ona sutining oʻrnini bosuvchi mahsulotlarni reklama qilish taqiqlanadi.

Energetik ichimliklarning reklamasida, har bir holda, bunday ichimliklarni haddan ziyod isteʼmol qilishning zarari toʻgʻrisidagi ogohlantirish, shuningdek bunday ichimliklarni isteʼmol qilish tavsiya etilmaydigan shaxslar haqidagi axborot mavjud boʻlishi kerak.

Energetik ichimliklarning reklamasi:

energetik ichimliklarni isteʼmol qilish jarayonlarini namoyish etmasligi;

sportda yutuqlarga erishgan insonlarning tasvirini oʻz ichiga olmasligi;

energetik ichimliklarni isteʼmol qilish reklamadan foydalanuvchilarning ijtimoiy va sportga oid muvaffaqiyatga erishishi yoki jismoniy hamda ruhiy holati yaxshilanishi uchun muhim ahamiyatga ega degan taassurotni yuzaga keltirmasligi kerak.

Quyidagilar taqiqlanadi:

soat 7.00 dan soat 22.00 ga qadar energetik ichimliklarni televideniye va radio orqali reklama qilish;

tashqi reklama va axborot obyektlari (konstruksiyalari) orqali energetik ichimliklarni reklama qilish;

energetik ichimliklar namunalarini voyaga yetmaganlar oʻrtasida reklama qilish maqsadida bepul tarqatish;

voyaga yetmaganlarga energetik ichimliklarni reklama qilish;

asosan voyaga yetmaganlar uchun moʻljallangan tadbirlarga homiylik qilish, agar bunda energetik ichimliklarning nomidan, tovar belgisidan (xizmat koʻrsatish belgisidan) yoki tasviridan foydalaniladigan boʻlsa;

voyaga yetmaganlar orasida energetik ichimliklarning nomidan, tovar belgisidan (xizmat koʻrsatish belgisidan) yoki tasviridan foydalanilgan tovarlarni (futbolkalar, bosh kiyimlar, oʻyinlarni va boshqalarni) tarqatish, shu jumladan sotish;

asosan bolalar va oʻsmirlar uchun moʻljallangan bosma nashrlarda, shuningdek tibbiyot, sport va taʼlim muassasalarida hamda tashkilotlarida energetik ichimliklarni reklama qilish;

energetik ichimliklardan foydalanilgan holda ragʻbatlantiruvchi aksiyalar oʻtkazish.

Har qanday quvvatdagi alkogol mahsulotlarining reklamasiga yoʻl qoʻyilmaydi, bundan ushbu Qonunning 39-moddasida nazarda tutilgan hollar mustasno.

Alkogol mahsulotlarini sotishni quyidagi yoʻllar orqali ragʻbatlantirish taqiqlanadi:

alkogol mahsulotlari namunalarini bepul tarqatish;

alkogol mahsulotlarining nomidan, tovar belgisidan (xizmat koʻrsatish belgisidan) yoki tasviridan foydalaniladigan tadbirlarga homiylik qilish;

alkogol mahsulotlarining nomidan, tovar belgisidan (xizmat koʻrsatish belgisidan) yoki tasviridan foydalanilgan tovarlarni (futbolkalar, bosh kiyimlar, oʻyinlarni va boshqalarni), shuningdek bolalar oʻyinchoqlariga, shirinliklarga yoki bolalarga moʻljallangan boshqa tovarlarga oʻxshatib chiqarilgan alkogol mahsulotlarini tarqatish, shu jumladan sotish;

boshqa har qanday turdagi ragʻbatlantiruvchi aksiyalar oʻtkazish.

Boshqa har qanday tovarlar reklamasida alkogol mahsulotlarini isteʼmol qilish jarayonini namoyish etishga, shuningdek ushbu jarayon reklamadan foydalanuvchilarning ijtimoiy va sportga oid muvaffaqiyatga erishishi yoki jismoniy hamda ruhiy holati yaxshilanishi uchun muhim ahamiyatga ega degan taassurotni yuzaga keltirishga yoʻl qoʻyilmaydi.

Pivoni, tabiiy va koʻpiklanadigan vinolarni reklama qilishga quyidagi hollarda yoʻl qoʻyiladi:

mehmonxonalarda, savdo va umumiy ovqatlanish korxonalarining savdo zallarida, shuningdek bunday mahsulotlarni namoyish qilish va tatib koʻrish joylarida;

pivoni, tabiiy va koʻpiklanadigan vinolarni ishlab chiqaruvchilarning hamda realizatsiya qilishni amalga oshiruvchi shaxslarning Internet jahon axborot tarmogʻidagi rasmiy veb-sahifalarida, axborot mahsulotining yoshga oid tasnifini koʻrsatgan holda;

temir yoʻl va havo transporti vositalarida;

televideniye va radio orqali mahalliy vaqt bilan soat 23.00 dan soat 07.00 ga qadar.

Pivoning, tabiiy va koʻpiklanadigan vinolarning reklamasi:

bunday mahsulotlarni haddan ziyod isteʼmol qilishning zarari haqida reklamaning asosiy maydoni va vaqtining kamida oʻn foizini tashkil qiluvchi ogohlantirish hamda ushbu mahsulotni isteʼmol qilishi tavsiya etilmaydigan shaxslar toʻgʻrisidagi axborot bilan birga berilishi;

bunday mahsulotlarni isteʼmol qilish jarayonlarini namoyish etmasligi, bu jarayonlar ijtimoiy va sportga oid muvaffaqiyatga erishish yoki jismoniy va ruhiy holatni yaxshilash uchun muhim ahamiyatga ega degan taassurotni yuzaga keltirmasligi;

shaxsda ularni isteʼmol qilishning zararsizligi haqidagi tasavvurni shakllantiruvchi gʻoyalar, qarashlar va badiiy obrazlarni ochiq yoki yashirin shaklda tarqatishga qaratilgan harakatlardan iborat boʻlmasligi;

unda inson obrazidan foydalanilmagan boʻlishi kerak.

Pivoni, tabiiy va koʻpiklanadigan vinolarni reklama qilishda:

ragʻbatlantiruvchi aksiyalar yoki shunga oʻxshash boshqa tadbirlar oʻtkazishga;

madaniy-koʻngilochar, ommaviy va sport tadbirlariga homiylik qilishga yoʻl qoʻyilmaydi.

Tamaki mahsulotlarini hamda tamakini va nikotinni isteʼmol qilish moslamalarini reklama qilishga yoʻl qoʻyilmaydi.

Tamaki mahsulotlarini hamda tamakini va nikotinni isteʼmol qilish moslamalarini sotishni quyidagi yoʻllar orqali ragʻbatlantirishga yoʻl qoʻyilmaydi:

tamaki mahsulotlarining hamda tamakini va nikotinni isteʼmol qilish moslamalarining namunalarini bepul tarqatish, shuningdek ularga nisbatan chegirmalar qoʻllash;

tamaki mahsulotlarining hamda tamakini va nikotinni isteʼmol qilish moslamalarining nomidan, tovar belgisidan (xizmat koʻrsatish belgisidan) yoki tasviridan foydalaniladigan tadbirlarga homiylik qilish;

tamaki mahsulotlarining hamda tamakini va nikotinni isteʼmol qilish moslamalarining nomidan, tovar belgisidan (xizmat koʻrsatish belgisidan) yoki tasviridan foydalanilgan tovarlarni (futbolkalar, bosh kiyimlar, oʻyinlarni va boshqa shu kabilarni), shuningdek bolalar oʻyinchoqlariga, shirinliklarga yoki bolalarga moʻljallangan boshqa tovarlarga oʻxshatib chiqarilgan tamaki mahsulotlarini hamda tamakini va nikotinni isteʼmol qilish moslamalarini tarqatish, shu jumladan sotish;

savdo obyektlarining old tomonida, kirish (chiqish) joylarida, rastalarida, tashqariga olib chiqiladigan predmetlarida hamda boshqa joylarida tamaki mahsulotlarining hamda tamakini va nikotinni isteʼmol qilish moslamalarining tasvirlarini, nomlarini hamda ular haqidagi boshqa axborotni joylashtirish;

tamaki mahsulotlari, tamakini va nikotinni isteʼmol qilish moslamalari boʻlmagan boshqa turdagi tovarlarni ishlab chiqarayotganda tamaki mahsulotlariga, tamakini va nikotinni isteʼmol qilish moslamalariga, mazkur moslamalarning ashyolariga yoki alohida qismlariga oʻxshatiladigan har qanday atamalar, taʼriflar, belgilar, ramzlar, tasvirlardan yoki boshqa alomatlardan foydalanish;

ragʻbatlantiruvchi aksiyalar yoki shunga oʻxshash boshqa tadbirlar oʻtkazish.

Boshqa har qanday tovarlarning reklamasida tamaki mahsulotlarini isteʼmol qilish hamda tamakini va nikotinni isteʼmol qilish moslamalaridan foydalanish jarayonini namoyish etishga, shuningdek ushbu jarayon reklamadan foydalanuvchilarning ijtimoiy va sportga oid muvaffaqiyatga erishishi yoki jismoniy hamda ruhiy holati yaxshilanishi uchun muhim ahamiyatga ega degan taassurotni yuzaga keltirishga yoʻl qoʻyilmaydi.

Pirotexnika vositalarini, qurollarning barcha turlarini va uning oʻq-dorilarini, ularning tarkibiy qismlarini, portlovchi moddalarni va moslamalarni, texnikani, harbiy maqsadga moʻljallangan mahsulotni reklama qilish taqiqlanadi, bundan saqlash hamda foydalanishga ruxsat berilgan ov va sport qurollari mustasno.

Ov va sport qurollarini reklama qilish faqat ixtisoslashtirilgan nashrlarda, shuningdek bevosita bunday qurolni realizatsiya qiladigan savdo tashkilotlarining xonalarida yoki tegishli koʻrgazmalarda (tadbirlarda) amalga oshiriladi.

Ov va sport qurollari reklamasi:

voyaga yetmaganlarga qaratilmagan boʻlishi;

unda voyaga yetmaganlarning tasviridan foydalanilmagan boʻlishi kerak.

Qimmatli qogʻozlar va aholi mablagʻlarini jalb etish bilan bogʻliq xizmatlar (bank, sugʻurta xizmatlari va koʻrsatilishi litsenziya yoki ruxsat etish xususiyatiga ega hujjatlarni olishni talab qiladigan faoliyat bilan bogʻliq boshqa xizmatlar) yoki ushbu xizmatlarni koʻrsatuvchi shaxslar faqat shunday faoliyat turini amalga oshirish huquqini tasdiqlovchi tegishli litsenziya yoki ruxsat etish xususiyatiga ega hujjat mavjud boʻlgan taqdirda reklama qilinishi mumkin.

Qimmatli qogʻozlarning va aholi mablagʻlarini jalb etish bilan bogʻliq xizmatlarning (bundan bank omonatlari mustasno) yoki ushbu xizmatlarni koʻrsatuvchi shaxslarning reklamasida quyidagilar taqiqlanadi:

reklama qilinayotgan xizmatlarga yoki qimmatli qogʻozlarga bevosita aloqasi boʻlmagan axborotni koʻrsatish;

oddiy aksiyalar boʻyicha daromad olishni va dividendlar miqdorini kafolatlash;

kutilayotgan daromad miqdorlari va istiqboldagi foyda (daromad) toʻgʻrisidagi axborotni maʼlum qilish;

emissiyasi roʻyxatdan oʻtkazilmagan, shuningdek emissiyasi toʻxtatib turilgan yoki amalga oshmagan deb topilgan qimmatli qogʻozlarni reklama qilish.

Qimmatli qogʻozlarning va aholi mablagʻlarini jalb etish bilan bogʻliq xizmatlarning (bundan bank omonatlari mustasno) yoki ushbu xizmatlarni koʻrsatuvchi shaxslarning reklamasida mazkur xizmatlardan foydalanish sarmoya yoʻqotilishiga olib kelishi mumkinligi haqidagi ogohlantirish boʻlishi kerak.

Moliyaviy xizmatlar reklamasi yoki ular haqidagi reklama tarzidagi axborot:

reklamadan foydalanuvchining ishonchini suiisteʼmol qilmaydigan va (yoki) reklamadan foydalanuvchining tajribasi va bilimi yetishmasligidan foydalanish niyatini koʻzlamaydigan usulda taqdim etilishi;

reklama qilinayotgan xizmatlarga bevosita aloqador boʻlmagan axborotga ega boʻlmasligi kerak;

ushbu moliyaviy xizmatlar koʻrsatish uchun shartnomalarning muhim shartlarini ochib berishi kerak.

Konsert-tomosha tadbirlarida fonogrammadan foydalanilganda ushbu tadbir reklamasida fonogrammadan foydalanish darajasi toʻgʻrisidagi axborot keltirilishi kerak.

Tashqi reklama orqali joylashtiriladigan konsert-tomosha tadbiri reklamasida fonogrammadan foydalanish darajasi toʻgʻrisidagi axborot umumiy reklama maydonining (sathining) kamida oʻn foizini tashkil etishi kerak.

Konsert-tomosha tadbiri tashkilotchilari bevosita tomosha boshlanishidan oldin fonogrammadan foydalanilish darajasi toʻgʻrisidagi axborotni oʻz ichiga olgan audioxabar tarqatilishini taʼminlaydi.

Xalq tabobati tovarlari reklamasi:

xalq tabobati tovarlarini qoʻllash natijasida kasalliklardan tuzalganlikning, inson sogʻligʻi holati yaxshilanganligining muayyan hollariga havolalarni oʻz ichiga olmasligi;

shifokorga murojaat etish kerak emasligi toʻgʻrisida taassurot uygʻotmasligi;

xalq tabobati tovarlarini dori vositalari, ovqatga qoʻshiladigan biologik faol qoʻshimchalar va oziq-ovqat qoʻshimchalari sifatida taqdim etmasligi;

sogʻlom odamda xalq tabobati tovarlarini qoʻllash zarurligi toʻgʻrisida taassurot uygʻotmasligi;

voyaga yetmaganlarga qaratilmasligi;

xalq tabobati tovarlarini davlat roʻyxatidan oʻtkazish uchun majburiy boʻlgan tadqiqotlar olib borilganligi faktiga havola qilish yoʻli bilan xalq tabobati tovarlarining afzalliklari toʻgʻrisida tasavvur hosil qilmasligi;

reklamadan foydalanuvchilarning sogʻligʻida muammolar va (yoki) kasalliklari mavjudligi haqidagi taʼkidlarni oʻz ichiga olmasligi;

xalq tabobati tovarlarining ijobiy taʼsirini, xavfsizligini, samaradorligini va nojoʻya taʼsirlari mavjud emasligini kafolatlamasligi;

xalq tabobati tovarlarining xavfsizligi va (yoki) samaradorligi ularning tabiiy kelib chiqishi bilan kafolatlanganligi toʻgʻrisidagi taʼkidlarni oʻz ichiga olmasligi kerak.

Xalq tabobati tovarlari reklamasi har bir holda ularni qoʻllashga va ulardan foydalanishga qarshi koʻrsatmalar mavjudligi, qoʻllashga doir yoʻriqnoma bilan tanishish yoki mutaxassislardan maslahatlar olish zarurligi toʻgʻrisidagi ogohlantirish bilan birga berilishi kerak.

Xalq tabobati yoʻnalishida ruxsat etilmagan usullarni qoʻllagan holda fuqarolarga tibbiy tashxis qoʻyish va ularni davolash xizmatlarini reklama qilish taqiqlanadi.

Xalq tabobati tovarlari reklamasi boʻyicha ragʻbatlantiruvchi aksiyalarni oʻtkazish taqiqlanadi.

Qimor oʻyinlari va tavakkalchilikka asoslangan boshqa oʻyinlar, shu jumladan telekommunikatsiya tarmoqlaridan, shuningdek Internet jahon axborot tarmogʻidan foydalangan holda tashkil etiladigan qimor oʻyinlari va tavakkalchilikka asoslangan boshqa oʻyinlar reklamasiga yoʻl qoʻyilmaydi.

Lotereyalar reklamasi har bir holda voyaga yetmaganlarning lotereyalarda ishtirok etishiga yoʻl qoʻyilmasligi toʻgʻrisidagi ogohlantirish bilan birga berilishi kerak.

Reklama toʻgʻrisidagi qonunchilikni buzganlik uchun moliyaviy sanksiyalar quyidagi miqdorlarda pul undirish (jarimalar) tarzida qoʻllaniladi:

ishlab chiqarilishi, realizatsiya qilinishi yoki reklama qilinishi qonunchilikda taqiqlangan yoki cheklangan mahsulot toʻgʻrisida reklama tarqatganlik — bazaviy hisoblash miqdorining yuz baravari miqdorida jarima solishga sabab boʻladi;

nomaqbul reklama berganlik, aksilreklamani berishni rad etganlik — bazaviy hisoblash miqdorining yetmish baravari miqdorida jarima solishga sabab boʻladi;

energetik ichimliklar, alkogolli ichimliklar, tamaki mahsulotlarini hamda tamakini va nikotinni isteʼmol qilish moslamalari, pirotexnika vositalari, qurol va uning oʻq-dorilari, harbiy maqsaddagi mahsulotlar reklamasiga doir talablarni buzganlik, shuningdek tashqi reklama va axborotni joylashtirish tartibini buzganlik — bazaviy hisoblash miqdorining ellik baravari miqdorida jarima solishga sabab boʻladi;

voyaga yetmaganlar uchun moʻljallangan reklamaga, dori vositalari, biologik faol va oziq-ovqat qoʻshimchalari, shuningdek bolalar oziq-ovqat mahsulotlari reklamasiga doir talablarni buzganlik — bazaviy hisoblash miqdorining oʻttiz baravari miqdorida jarima solishga sabab boʻladi.

Reklamaga oid faoliyat subyektlari boʻlgan yuridik shaxslar reklama toʻgʻrisidagi qonunchilik sohasidagi aniqlangan huquqbuzarliklardagi aybini tan olgan taqdirda moliyaviy sanksiyalarni qoʻllash vakolatli davlat organi tomonidan amalga oshiriladi, nizo mavjud boʻlgan taqdirda esa moliyaviy sanksiyalarni qoʻllash toʻgʻrisidagi masala sud tartibida hal etiladi.

Moliyaviy sanksiyalarni qoʻllash reklamaga oid faoliyat subyektlari boʻlgan yuridik shaxslarni vakolatli davlat organining qarorini yoki koʻrsatmasini bajarish yoxud reklama toʻgʻrisidagi qonunchilikda nazarda tutilgan boshqa harakatlarni bajarish majburiyatidan ozod etmaydi.

Reklamaning aylanishi sohasida yuzaga keladigan nizolar qonunchilikda belgilangan tartibda hal etiladi.

Reklama toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

Reklama beruvchi reklama toʻgʻrisidagi qonunchilikning reklama tayyorlash uchun taqdim etiladigan axborot mazmuniga doir qismi buzilganligi uchun, agar ushbu qonunbuzarlik reklama tayyorlovchining yoki reklama tarqatuvchining aybi bilan yuz berganligi isbotlanmasa, javobgar boʻladi.

Reklama tayyorlovchi reklama toʻgʻrisidagi qonunchilikning reklama tayyorlashga doir qismi buzilganligi uchun javobgar boʻladi.

Reklama tarqatuvchi reklama toʻgʻrisidagi qonunchilikning reklamani tarqatish vaqti, joyi va vositalariga doir qismi buzilganligi uchun javobgar boʻladi.

Quyidagilar oʻz kuchini yoʻqotgan deb topilsin:

1) Oʻzbekiston Respublikasining 1998-yil 25-dekabrda qabul qilingan “Reklama toʻgʻrisida”gi 723-I-sonli Qonuni (Oʻzbekiston Respublikasi Oliy Majlisining Axborotnomasi, 1999-yil, № 1, 14-modda);

2) Oʻzbekiston Respublikasi Oliy Majlisining 1998-yil 25-dekabrda qabul qilingan “Reklama toʻgʻrisida”gi Oʻzbekiston Respublikasi Qonunini amalga kiritish haqida”gi 724-I-sonli Qarori (Oʻzbekiston Respublikasi Oliy Majlisining Axborotnomasi, 1999-yil, № 1, 15-modda);

3) Oʻzbekiston Respublikasining 2002-yil 30-avgustda qabul qilingan “Reklama toʻgʻrisida”gi Oʻzbekiston Respublikasi Qonuniga oʻzgartishlar va qoʻshimchalar kiritish haqida”gi 404-II-sonli Qonuni (Oʻzbekiston Respublikasi Oliy Majlisining Axborotnomasi, 2002-yil, № 9, 164-modda);

4) Oʻzbekiston Respublikasining 2003-yil 25-aprelda qabul qilingan “Oʻzbekiston Respublikasining ayrim qonun hujjatlariga oʻzgartishlar va qoʻshimchalar kiritish toʻgʻrisida”gi 482-II-sonli Qonunining (Oʻzbekiston Respublikasi Oliy Majlisining Axborotnomasi, 2003-yil, № 5, 67-modda) XXV boʻlimi;

5) Oʻzbekiston Respublikasining 2005-yil 19-dekabrda qabul qilingan “Baʼzi davlat boshqaruv organlarining qayta tashkil etilganligi munosabati bilan Oʻzbekiston Respublikasining ayrim qonun hujjatlariga oʻzgartishlar kiritish toʻgʻrisida”gi OʻRQ-14-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2005-yil, № 12, 413-modda) 5-moddasi;

6) Oʻzbekiston Respublikasining 2006-yil 4-aprelda qabul qilingan “Tadbirkorlik faoliyatini amalga oshirish uchun ruxsat berish tartib-taomillari turlari qisqartirilganligi hamda soddalashtirilganligi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-28-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2006-yil, № 4, 154-modda) 5-moddasi;

7) Oʻzbekiston Respublikasining 2006-yil 10-oktabrda qabul qilingan “Tadbirkorlik subyektlarini huquqiy himoya qilish tizimi takomillashtirilganligi hamda ularning moliyaviy javobgarligi erkinlashtirilganligi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-59-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2006-yil, № 10, 536-modda) 23-moddasi;

8) Oʻzbekiston Respublikasining 2008-yil 10-aprelda qabul qilingan “Reklama toʻgʻrisida”gi Oʻzbekiston Respublikasi Qonunining 16-moddasiga oʻzgartish kiritish haqida”gi OʻRQ-150-sonli Qonuni (Oʻzbekiston Respublikasi Oliy Majlisi palatalarining Axborotnomasi, 2008-yil, № 4, 186-modda);

9) Oʻzbekiston Respublikasining 2010-yil 17-sentabrda qabul qilingan “Reklama toʻgʻrisida”gi Oʻzbekiston Respublikasi Qonuniga hamda Oʻzbekiston Respublikasi Maʼmuriy javobgarlik toʻgʻrisidagi kodeksining 178¹-moddasiga oʻzgartish va qoʻshimchalar kiritish haqida”gi OʻRQ-259-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2010-yil, № 9, 339-modda) 1-moddasi;

10) Oʻzbekiston Respublikasining 2010-yil 6-oktabrda qabul qilingan “Monopoliyaga qarshi davlat organi qayta tashkil etilishi munosabati bilan Oʻzbekiston Respublikasining ayrim qonun hujjatlariga oʻzgartishlar kiritish toʻgʻrisida”gi OʻRQ-264-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2010-yil, № 10, 380-modda) 3-moddasi;

11) Oʻzbekiston Respublikasining 2013-yil 30-aprelda qabul qilingan “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-352-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2013-yil, № 4, 98-modda) 28-moddasi;

12) Oʻzbekiston Respublikasining 2013-yil 7-oktabrda qabul qilingan “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish, shuningdek ayrim qonun hujjatlarini oʻz kuchini yoʻqotgan deb topish toʻgʻrisida”gi OʻRQ-355-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2013-yil, № 10, 263-modda) 23-moddasi;

13) Oʻzbekiston Respublikasining 2014-yil 20-yanvarda qabul qilingan “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-365-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2014-yil, № 1, 2-modda) 19-moddasi;

14) Oʻzbekiston Respublikasining 2018-yil 3-yanvarda qabul qilingan “Ayrim davlat organlari faoliyati takomillashtirilishi, shuningdek fuqarolarning huquqlari va erkinliklarini himoya qilish kafolatlarini taʼminlashga doir qoʻshimcha chora-tadbirlar qabul qilinishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-456-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2018-yil, № 1, 1-modda) 21-moddasi;

15) Oʻzbekiston Respublikasining 2018-yil 18-aprelda qabul qilingan “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-476-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2018-yil, № 4, 224-modda) 34-moddasi;

16) Oʻzbekiston Respublikasining 2019-yil 9-yanvarda qabul qilingan “Oʻzbekiston Respublikasining ayrim qonun hujjatlariga jamoat tartibini taʼminlash mexanizmlarini takomillashtirishga qaratilgan oʻzgartish va qoʻshimchalar kiritish toʻgʻrisida”gi OʻRQ-514-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2019-yil, №1, 3-modda) 6-moddasi;

17) Oʻzbekiston Respublikasining 2019-yil 23-mayda qabul qilingan “Oʻzbekiston Respublikasining ayrim qonun hujjatlariga jinoyat protsessi ishtirokchilarining huquqlari himoya qilinishini taʼminlash bilan bogʻliq oʻzgartish va qoʻshimchalar kiritish toʻgʻrisida”gi OʻRQ-542-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2019-yil, № 5, 267-modda) 17-moddasi;

18) Oʻzbekiston Respublikasining 2021-yil 21-aprelda qabul qilingan “Oʻzbekiston Respublikasining ayrim qonun hujjatlariga oʻzgartishlar kiritish toʻgʻrisida”gi OʻRQ-683-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2021-yil, 4-songa ilova) 100-moddasi.

Oʻzbekiston Respublikasi Monopoliyaga qarshi kurashish qoʻmitasi ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

Ushbu Qonun rasmiy eʼlon qilingan kundan eʼtiboran uch oy oʻtgach kuchga kiradi.