O‘zbekiston Respublikasi Prezidentining “Davlat soliq xizmati organlari faoliyatini tubdan takomillashtirish chora-tadbirlari to‘g‘risida” 2018-yil 26-iyundagi PQ-3802-son qarorini bajarish yuzasidan, shuningdek, davlat soliq xizmati organlari faoliyatini yanada takomillashtirish maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Soliq qo‘mitasi to‘g‘risidagi nizom 1-ilovaga muvofiq;

Yirik soliq to‘lovchilar bo‘yicha hududlararo soliq inspeksiyasi to‘g‘risidagi nizom 2-ilovaga muvofiq;

Raqamli markirovka qoidalariga rioya qilinishini nazorat qilish bo‘yicha hududlararo soliq inspeksiyasi to‘g‘risidagi nizom 2¹-ilovaga muvofiq;

O‘zbekiston Respublikasi davlat soliq xizmati organlarida xizmatni o‘tash to‘g‘risidagi nizom 3-ilovaga muvofiq tasdiqlansin.

2. O‘zbekiston Respublikasi davlat soliq xizmati xodimlari mehnatiga Yagona tarif setkasi bo‘yicha haq to‘lash bo‘yicha razryadlar 4 — 7-ilovalarga muvofiq belgilansin.

O‘zbekiston Respublikasi Davlat soliq qo‘mitasi Moliya vazirligi bilan birgalikda ikki hafta muddatda O‘zbekiston Respublikasi Davlat soliq qo‘mitasining xarajatlar smetasi va shtatlar jadvaliga tegishli qo‘shimcha va o‘zgartirishlar kiritsin.

3. O‘zbekiston Respublikasi Davlat soliq qo‘mitasi o‘n kun muddatda:

Qoraqalpog‘iston Respublikasi, viloyatlar va Toshkent shahar davlat soliq boshqarmalari to‘g‘risidagi nizomlarni;

tuman (shahar) davlat soliq inspeksiyalari to‘g‘risidagi namunaviy nizomni tasdiqlasin.

4. O‘zbekiston Respublikasi Hukumatining ayrim qarorlariga 8-ilovaga muvofiq o‘zgartirishlar kiritilsin.

5. O‘zbekiston Respublikasi Hukumatining ayrim qarorlari 9-ilovaga muvofiq o‘z kuchini yo‘qotgan deb hisoblansin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — moliya vaziri J.A. Qo‘chqorov va O‘zbekiston Respublikasi Davlat soliq qo‘mitasi raisi B.A. Musayev zimmasiga yuklansin.

1. Ushbu Nizom “Davlat soliq xizmati to‘g‘risida”gi O‘zbekiston Respublikasi Qonuniga, O‘zbekiston Respublikasining Soliq kodeksiga, O‘zbekiston Respublikasi Prezidentining “Soliq ma’muriyatchiligini tubdan takomillashtirish, soliqlar va boshqa majburiy to‘lovlarning yig‘iluvchanligini oshirish chora-tadbirlari to‘g‘risida” 2017-yil 18-iyuldagi PF-5116-son Farmoniga, O‘zbekiston Respublikasi Prezidentining “Respublika soliq organlari tizimini yanada modernizatsiya qilish chora-tadbirlari to‘g‘risida” 2010-yil 8-yanvardagi PQ-1257-son va “Davlat soliq xizmati organlari faoliyatini tubdan takomillashtirish chora-tadbirlari to‘g‘risida” 2018-yil 26-iyundagi PQ-3802-son qarorlariga muvofiq O‘zbekiston Respublikasi Soliq qo‘mitasining (keyingi o‘rinlarda Qo‘mita deb ataladi) maqomi, asosiy vazifalari, funksiyalari, huquqlari, majburiyatlari, faoliyatini tashkil etish tartibi va hisobotini, shuningdek, davlat soliq xizmati organlari rahbarlarining funksional majburiyatlari va javobgarliklarini belgilaydi.

2. Qo‘mita soliq to‘g‘risidagi qonun hujjatlariga rioya etilishini va davlatning iqtisodiy manfaatlari himoya qilinishini ta’minlash sohasidagi nazorat bo‘yicha respublika davlat boshqaruvi organi hisoblanadi.

Qo‘mita O‘zbekiston Respublikasi Vazirlar Mahkamasiga bo‘ysunadi.

3. Qo‘mita o‘z faoliyatida O‘zbekiston Respublikasi Konstitutsiyasiga va qonunlariga, O‘zbekiston Respublikasi Oliy Majlisi palatalari qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, shuningdek, ushbu Nizomga hamda boshqa qonun hujjatlariga amal qiladi.

4. Davlat soliq xizmati organlari tomonidan o‘z vakolatlari doirasida qabul qilingan qarorlar davlat va xo‘jalik boshqaruvi organlari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shuningdek, soliq to‘lovchilar, shu jumladan yuridik va jismoniy shaxslarning ijro etishi uchun majburiy hisoblanadi.

5. Qo‘mita, Qoraqalpog‘iston Respublikasi, viloyatlar va Toshkent shahar soliq boshqarmalari, tumanlar (shaharlar) soliq inspeksiyalari (keyingi o‘rinlarda — soliq xizmatining hududiy organlari), Yirik soliq to‘lovchilar bo‘yicha hududlararo soliq inspeksiyasi va Raqamli markirovka qoidalariga rioya qilinishini nazorat qilish bo‘yicha hududlararo soliq inspeksiyasi (keyingi o‘rinlarda — Hududlararo inspeksiyalar) yuridik shaxs hisoblanadi, O‘zbekiston Respublikasi Davlat gerbi tasviri tushirilgan hamda o‘z nomi davlat tilida yozilgan muhrga va blankalarga, O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasida shaxsiy g‘azna hisobvaraqlariga, shu jumladan, chet el valyutasidagi hisobvaraqlariga ega.

Qo‘mita tizimiga kiradigan tashkilotlar yuridik shaxs hisoblanadi, O‘zbekiston Respublikasi Davlat gerbi tasviri tushirilgan hamda o‘z nomi davlat tilida yozilgan muhrga va blankalarga, bank hisobvaraqlariga, shu jumladan, chet el valyutasidagi hisobvaraqlariga ega.

6. Davlat soliq xizmati organlari o‘z faoliyatini qonun hujjatlariga muvofiq, davlat boshqaruvi organlari, mahalliy davlat hokimiyati organlaridan mustaqil ravishda amalga oshiradilar.

7. Qo‘mitaning rasmiy nomi:

a) davlat tilida:

to‘liq nomi — O‘zbekiston Respublikasi Soliq qo‘mitasi, qisqartmasi — Soliq qo‘mitasi;

b) rus tilida:

to‘liq nomi — Nalogoviy komitet Respubliki Uzbekistan, qisqartmasi — Nalogoviy komitet;

v) ingliz tilida:

to‘liq nomi — Tax Committee of the Republic of Uzbekistan, qisqartmasi — Tax Committee.

8. Soliq qo‘mitasining joylashgan joyi (pochta manzili): Toshkent shahri, Abdulla Qodiriy ko‘chasi, 13A-uy, 100011.

9. Qo‘mita tuzilmasiga quyidagilar kiradi:

Qo‘mita markaziy apparati;

Qoraqalpog‘iston Respublikasi, viloyatlar va Toshkent shahar soliq boshqarmalari;

tumanlar (shaharlar) soliq inspeksiyalari;

Yirik soliq to‘lovchilar bo‘yicha hududlararo soliq inspeksiyasi;

Raqamli markirovka qoidalariga rioya qilinishini nazorat qilish bo‘yicha hududlararo soliq inspeksiyasi;

yuridik shaxs maqomiga ega bo‘lgan tasarrufidagi tashkilotlari (keyingi o‘rinlarda — tasarrufidagi tashkilotlar):

“Soliq-servis” AJ;

“Yangi texnologiyalar” ilmiy-axborot markazi” AJ;

“G‘azalkent sog‘lomlashtirish markazi” davlat muassasasi;

“Soliq ma’lumotlarini qayta ishlash markazi” MCHJ.

10. Quyidagilar Qo‘mitaning asosiy vazifalari hisoblanadi:

davlat soliq siyosatini amalga oshirish hamda soliq to‘g‘risidagi qonun hujjatlariga rioya etilishi, soliqlar va yig‘imlarning to‘g‘ri hisoblab chiqarilishi, to‘liq va o‘z vaqtida to‘lanishi yuzasidan nazoratni ta’minlash;

O‘zbekiston Respublikasi Davlat budjeti (keyingi o‘rinlarda Davlat budjeti deb ataladi) va davlat maqsadli jamg‘armalariga soliqlar va yig‘imlarning soliq to‘g‘risidagi qonun hujjatlariga muvofiq o‘z vaqtida va bir xildagi tushumini ta’minlash hisobiga Davlat budjeti va davlat maqsadli jamg‘armalarining daromad qismini barqaror shakllantirish;

soliq to‘lovchilar va soliq solish obyektlarining o‘z vaqtida hamda ishonchli hisobga olinishini ta’minlash, ularning to‘liq qamrab olinish mexanizmlarini soliq ma’muriyatchiligi jarayoniga ma’lumotlarni to‘liq yig‘ish va qayta ishlashni ta’minlaydigan zamonaviy axborot-kommunikatsiya texnologiyalari va ilg‘or avtomatlashtirilgan tahlil uslublarini keng joriy etish orqali takomillashtirish;

soliq solinadigan bazani kengaytirish bo‘yicha tahlil qilish va ta’sirchan choralar ishlab chiqish, shu jumladan makroiqtisodiy ko‘rsatkichlarning dinamikasi va hududlarning soliq salohiyatini tizimli tahlil qilish orqali ta’sirchan choralar ishlab chiqish, soliqlar yig‘ilishini oshirish bo‘yicha choralarni amalga oshirish, soliq nazoratini amalga oshirishning zamonaviy uslublarini joriy etish;

pul mablag‘larining g‘ayriqonuniy aylanishi manbalariga barham berish, aholi bilan pulli hisob-kitoblarni amalga oshiruvchi yuridik va jismoniy shaxslar tomonidan naqd pul tushumining to‘liq va o‘z vaqtida topshirilishi yuzasidan muntazam nazoratni ta’minlash;

bozorlar va savdo komplekslarining moliya-xo‘jalik faoliyati, ular tomonidan soliq to‘g‘risidagi qonun hujjatlariga rioya etilishi yuzasidan nazoratni amalga oshirish hamda ularning hududida aniqlangan huquqbuzarliklar bo‘yicha tergovga qadar tekshiruv o‘tkazib, jinoyat ishlarini tergovga tegishliligiga ko‘ra huquqni muhofaza qiluvchi organlarga topshirish;

soliq to‘lovchilar o‘z soliq majburiyatlarini ixtiyoriy bajarishi uchun maqbul shart-sharoitlar yaratish, har bir xodim tomonidan “Soliq xizmati –insofli soliq to‘lovchilarning ishonchli hamkori” degan maqsadli vazifani so‘zsiz bajarish;

soliq to‘lovchilarning huquqiy madaniyatini oshirish bo‘yicha ishlarni amalga oshirish, soliqqa oid huquqbuzarliklarning profilaktikasi, ularni aniqlash va bartaraf etish bo‘yicha kompleks tadbirlarni bajarish;

soliq to‘lovchilarga muloqotsiz elektron xizmat ko‘rsatishga to‘liq o‘tish yo‘li orqali soliq to‘lovchilar bilan ishlashni takomillashtirish;

qonun hujjatlarini takomillashtirish va soliq to‘lovchilarning faoliyatini rag‘batlantirish bo‘yicha takliflar kiritish;

kadrlarni tanlash va joy-joyiga qo‘yish, davlat soliq xizmati organlarini yuksak ma’naviy-axloqiy sifatlarga ega bo‘lgan malakali xodimlar bilan to‘ldirish, shuningdek, kadrlarni kasbga tayyorlash va qayta tayyorlash bo‘yicha tizimli ishlarni amalga oshirish;

davlat soliq xizmati organlari xodimlariga korporativ etikani singdirish, korrupsiya faktlariga keskin barham berish bo‘yicha ta’sirchan choralarni, shu jumladan xodimlar manfaatlarining to‘qnashuvini hal qilish yo‘li bilan amalga oshirish, ishga rasmiyatchilik bilan yondashishga barham berish, shuningdek, xodimlar o‘rtasida huquqbuzarliklar profilaktikasini ta’minlash, o‘z xizmat faoliyati samaradorligini oshirish motivatsiyasi tizimini joriy etish va ular uchun xizmatni o‘tashning munosib shart-sharoitlarini yaratish.

hududlarni kompleks ijtimoiy-iqtisodiy rivojlantirish bo‘yicha davlat soliq xizmati organlariga biriktirilgan sektorlarda soliq solish sohasidagi tizimli muammolarni o‘rganish va aniqlash hamda ularni bartaraf etish bo‘yicha takliflar ishlab chiqish.

11. Qo‘mita o‘ziga yuklangan vazifalarga muvofiq quyidagi funksiyalarni amalga oshiradi:

a) davlat soliq siyosatini amalga oshirish hamda soliq to‘g‘risidagi qonun hujjatlariga rioya etilishi, soliqlar va yig‘imlarning to‘g‘ri hisoblab chiqarilishi, to‘liq va o‘z vaqtida to‘lanishi yuzasidan soliq nazoratini ta’minlash sohasida:

soliqlar va yig‘imlarning Davlat budjetiga va davlat maqsadli jamg‘armalariga tushishi prognozini ishlab chiqishda qatnashadi;

soliq to‘lovchilar faoliyatining soliq tekshiruvlarini, shuningdek, soliq to‘lovchilar tomonidan fuqarolarning shaxsiy jamg‘arib boriladigan pensiya hisobvaraqlariga jamg‘arib boriladigan pensiya badallarining to‘g‘ri hisoblab chiqarilishi, to‘liq va o‘z vaqtida kiritilishi tekshiruvlarini belgilangan tartibda o‘tkazadi;

davlat soliq xizmati organlari tomonidan xo‘jalik yurituvchi subyektlar faoliyatini soliq tekshiruvi o‘tkazilishida qonun hujjatlarida belgilangan tartibiga rioya qilinishi yuzasidan nazoratni amalga oshiradi;

yuridik va jismoniy shaxslar tomonidan valyuta eksport-import operatsiyalarini amalga oshirishda qonun hujjatlariga rioya etilishini belgilangan tartibda nazorat qiladi;

soliq to‘lovchilardan yoki ularning mansabdor shaxslaridan tushuntirishlar oladi, soliq to‘lovchining mol-mulki mavjudligini tekshiradi, shuningdek, hududlarni, ishlab chiqarish, omborxona, savdo binolarini va boshqa binolarni, shu jumladan soliq to‘lovchilar tomonidan daromadlar olish uchun foydalaniladigan yoxud soliq solish obyektini saqlash bilan bog‘liq joylarni ko‘zdan kechiradi yoki tekshiradi;

xo‘jalik yurituvchi subyektlar tomonidan pul mablag‘lari va moddiy boyliklarning buxgalteriya hisobini yuritishning belgilangan tartibiga rioya qilinishini, korxonalar hududiga moddiy boyliklarni olib kirish va u yerdan olib chiqishda korxonalarda ruxsat berish tizimi ishlarining tashkil etilishi holatini tekshiradi;

soliq to‘lovchining moliya-xo‘jalik faoliyatini tekshirish (taftish qilish) jarayonida hisobotdagi ma’lumotlarning ishonchliligi va to‘g‘riligini aniqlash, davlat soliq xizmati organlariga taqdim etilgan moliyaviy hisobotlar va soliq hisob-kitoblarida faktlarning buzib ko‘rsatilishini aniqlash va ularni bartaraf etish uchun buxgalteriya hisoblarini va moliyaviy hisobotlarni tekshiradi;

soliq auditini o‘tkazish davomida xom ashyo, materiallar, yarim fabrikatlar va tayyor buyumlarni tortib ko‘radi va o‘lchaydi, ishlab chiqarilgan mahsulotning haqiqiy tannarxini va taqdim etilgan soliq hisob-kitoblarining to‘g‘riligini aniqlash uchun xomashyo va materiallar sarfi normalari, ularning mahsulot ishlab chiqarish uchun to‘g‘ri hisobdan chiqarilishini, tayyor mahsulotning to‘liq kirim qilinishini, mahsulot chiqishi normalari hamda moddiy boyliklarni saqlash va tashishda tabiiy yo‘qotishlar normalari to‘g‘ri belgilanishini aniqlash uchun xomashyo va materiallarni ishlab chiqarishda nazorat tariqasida ishlatib ko‘radi, xomashyo, materiallar va tayyor mahsulotlarni nazorat tariqasida tekshiradi;

yuridik shaxslar va yakka tartibdagi tadbirkorlar tomonidan tadbirkorlik faoliyatini amalga oshirishning qonun hujjatlarida belgilangan tartibiga rioya etilishini nazorat qiladi;

jismoniy va yuridik shaxslardan soliq to‘g‘risidagi qonun hujjatlarining buzilishi to‘g‘risida kelib tushgan murojaatlar, xabarlar va boshqa axborotlarni tekshiradi;

soliq to‘g‘risidagi qonun hujjatlarining buzilishi faktlarini tahlil qiladi hamda soliqqa oid huquqbuzarliklarga olib keladigan sabablar va shart-sharoitlarni bartaraf etish yuzasidan tegishli organlarga takliflar kiritadi;

huquqni muhofaza qiluvchi organlar bilan birgalikda soliqqa oid huquqbuzarliklarga qarshi kurashishning uzoq muddatli hamda joriy dasturlarini ishlab chiqadi va amalga oshiradi;

b) Davlat budjeti va davlat maqsadli jamg‘armalariga soliqlar va yig‘imlarning soliq to‘g‘risidagi qonun hujjatlariga muvofiq o‘z vaqtida va bir xildagi tushumini ta’minlash hisobiga Davlat budjeti va davlat maqsadli jamg‘armalarining daromad qismini barqaror shakllantirish sohasida:

soliq to‘lovchilarning majburiyatlari paydo bo‘lishi (to‘xtatilishi) to‘g‘risida axborot taqdim etadigan organlar va tashkilotlar bilan o‘zaro hamkorlik qiladi;

belgilangan tartibda soliq to‘lovchilar tomonidan taqdim etilgan moliya va soliq hisobotlarini, shuningdek, soliq to‘lovchilarning faoliyati to‘g‘risida soliq organlarining yagona integratsiyalashtirilgan axborot resurs bazasida yig‘ilgan boshqa hujjatlarni o‘rganish va tahlil qilish asosida kameral soliq tekshiruvini amalga oshiradi;

o‘zaro tuzilgan kelishuv asosida soliq monitoringida ishtirok etayotgan soliq to‘lovchi tomonidan soliq to‘g‘risidagi qonun hujjatlariga rioya etilishi, soliqlar va yig‘imlarning to‘g‘ri hisoblanishi, to‘liq va o‘z vaqtida to‘lanishi soliq monitoringini qonun hujjatlarida belgilangan tartibda amalga oshiradi;

davlat daromadiga o‘tkazilgan mol-mulkni sotishdan olingan pul mablag‘larining davlat daromadiga to‘liq va o‘z vaqtida tushishi nazoratini, shuningdek, davlat organlariga berilgan mol-mulkning hisobga olinishini ta’minlaydi;

soliqlar va yig‘imlarning tushumini ta’minlash, shu jumladan respublika va mahalliy budjetlar daromadlarini oshirishning qo‘shimcha zaxiralarini aniqlash bo‘yicha moliya organlari, manfaatdor vazirliklar va idoralar, shuningdek, mahalliy davlat hokimiyati organlari bilan hamkorlik qiladi;

v) soliq to‘lovchilar va soliq solish obyektlarining o‘z vaqtida hamda ishonchli hisobga olinishini ta’minlash, ularning to‘liq qamrab olinishi mexanizmlarini soliq ma’muriyatchiligi jarayoniga ma’lumotlarni to‘liq yig‘ish va qayta ishlashni ta’minlaydigan zamonaviy axborot-kommunikatsiya texnologiyalari va ilg‘or avtomatlashtirilgan tahlil usullarini keng joriy etish orqali takomillashtirish sohasida:

soliq to‘lovchilar, soliq solinadigan baza, shuningdek, soliq solish obyektlari va soliq solish bilan bog‘liq bo‘lgan obyektlarning to‘liq, o‘z vaqtida va ishonchli hisobga olinishini ta’minlaydi;

yuridik va jismoniy shaxslarga, ularni soliq to‘lovchining identifikatsiya raqamlari berilgan holda soliq to‘lovchilar sifatida hisobga qo‘yish to‘g‘risida hujjatlar berilishini qonun hujjatlarida belgilangan tartibda tashkil qiladi;

kelgusida tovar va xizmatlarning majburiy tasniflanishini joriy qilgan holda elektron hisobvaraq-fakturalari to‘liq kiritilishini ta’minlaydi;

O‘zbekiston Respublikasi soliq to‘lovchilarining yagona reyestrini shakllantiradi va yuritadi;

soliq organlarining yagona integratsiyalashtirilgan axborot resurs bazasida soliq to‘lovchilar bo‘yicha soliqlar va yig‘imlarning hisoblab chiqilishi va amaldagi tushumlari hisobini yuritadi;

soliqlar va yig‘imlar bo‘yicha imtiyozlar hisobini yuritadi;

banklar tomonidan tegishli axborot taqdim etilishiga ko‘ra bank hisobvaraqlari bo‘yicha olti oy mobaynida pul operatsiyalarini amalga oshirgan holda moliya-xo‘jalik faoliyatini yuritmayotgan, shuningdek, olti oy davomida elektron hisobvaraq-fakturalarni rasmiylashtirmagan, onlayn nazorat-kassa texnikalari, virtual kassa yoki marketpleys to‘lov tizimidan foydalanmagan, tashqi savdo operatsiyalarini amalga oshirmagan korxonalarni aniqlaydi;

tadbirkorlik faoliyatini amalga oshirayotgan yuridik va jismoniy shaxslarning davlat soliq xizmati organlarida hisobga turishdan bo‘yin tovlash mexanizmlarini o‘rganadi, aniqlaydi va bartaraf etadi;

axborot xavfsizligi ta’minlanishini hisobga olgan holda barcha soliq to‘lovchilar va soliq tushumlari bo‘yicha soliq organlarining yagona integratsiyalashtirilgan axborot resurs bazasini yaratadi;

soliq axborotlarini qabul qilib olish, qayta ishlash, uzatish va saqlash jarayonlarini avtomatlashtirish choralarini ko‘radi;

davlat soliq xizmati organlarida axborot xavfsizligini ta’minlashni hisobga olgan holda yagona axborot, dasturiy-texnik va telekommunikatsiya tizimi joriy etilishini tashkil qiladi;

soliq ma’muriyatchiligini takomillashtirish jarayonida davlat soliq xizmati organlari ishiga zamonaviy axborot-kommunikatsiya texnologiyalarini joriy etadi hamda xarajatlarni maqbullashtirish va resurs ta’minotini rivojlantirish uchun ularni texnologik jarayonlarni yuritishning zamonaviy tizimlari va boshqarishning tezkor vositalari bilan jihozlaydi;

davlat soliq xizmati organlarining butun vertikal bo‘ylab biznes jarayonlarini qayta tashkil etish va ularni parallel ravishda raqamlashtirish hamda kelgusida avtomatlashtirish bilan amalga oshiradi va shu asosda inson omili ta’sirini kamaytiradi.

g) soliq solinadigan bazani kengaytirish bo‘yicha tahlil qilish va ta’sirchan choralar ishlab chiqish, shu jumladan makroiqtisodiy ko‘rsatkichlarning dinamikasi va hududlarning soliq salohiyatini tizimli tahlil qilish orqali ta’sirchan choralar ishlab chiqish, soliqlar yig‘ilishini oshirish bo‘yicha choralarni amalga oshirish, soliq nazoratini amalga oshirishning zamonaviy uslublarini joriy etish sohasida:

soliq to‘lovchilarni “xavf-xatar” guruhi bo‘yicha segmentlashni amalga oshiradi;

soliqlar va yig‘imlarni to‘lashdan bo‘yin tovlash faktlarini aniqlaydi va tegishli choralar ko‘radi;

soliq nazoratini amalga oshirishda zamonaviy usullarni qo‘llaydi;

Qo‘mitaning texnik bazasini modernizatsiya qilish, mustahkamlash va yangilash bilan tashqi va ichki manbalardan kelib tushadigan ma’lumotlarni tahlil qilishning ilg‘or avtomatlashtirilgan usullarini joriy etadi;

makroiqtisodiy ko‘rsatkichlar dinamikasi va hududlarning soliq salohiyatini tizimli tahlil qilish orqali soliq solinadigan bazani kengaytirish bo‘yicha samarali chora-tadbirlarni amalga oshiradi;

O‘zbekiston Respublikasining Soliq kodeksiga hamda boshqa qonun hujjatlariga muvofiq Davlat budjetiga va davlat maqsadli jamg‘armalariga soliqlar va yig‘imlar bo‘yicha soliq qarzini undirishni belgilaydigan qonun hujjatlarida nazarda tutilgan chora-tadbirlarning tashkillashtirilishini va qo‘llanishini ta’minlaydi;

xo‘jalik yurituvchi subyektlar xodimlarining hisobotdagi va haqiqiy soni muvofiqligi yuzasidan monitoringni amalga oshiradi;

xo‘jalik yurituvchi subyektlar faoliyatida belgilangan tartibda xronometraj ko‘zdan kechirish o‘tkazadi;

soliq solinadigan bazaga tuzatishlar kiritish uchun qonun hujjatlarida belgilangan tartibda ko‘zdan kechirish hamda so‘rov o‘tkazishni amalga oshiradi;

ishlab chiqarish va daromadlar miqdorlarini yashirish, sotilgan mahsulotlar, ishlar va xizmatlar hajmlarini kamaytirib ko‘rsatish mexanizmlarini o‘rganish va aniqlashni tashkillashtiradi va amalga oshiradi, ko‘rsatib o‘tilgan mexanizmlarning qo‘llanishini bartaraf etish tadbirlarini ishlab chiqadi va amalga oshiradi;

aniq maqsad parametrlarini belgilash bilan yashirin iqtisodiyot darajasini pasaytirish strategiyasi, konsepsiyasi va dasturlarini ishlab chiqadi;

soliq ma’muriyatchiligi islohoti va rivojlanish strategiyasini ishlab chiqadi va uning ijrosi monitoringini amalga oshiradi.

d) mablag‘larning g‘ayriqonuniy aylanish manbalariga barham berish yuzasidan muntazam nazoratni ta’minlash sohasida:

savdo va xizmatlar ko‘rsatishni tashkil etishning qonun hujjatlariga muvofiqligi, shu jumladan, nazorat-kassa texnikalarini, qonun hujjatlarida nazarda tutilgan hollarda esa onlayn nazorat-kassa texnikalari yoki virtual kassalarni, plastik kartochkalardan to‘lovlarni qabul qilib olish bo‘yicha hisob-kitob terminallarini qo‘llash, alkogolli va tamaki mahsulotlarini sotish hamda markirovka qilish qoidalariga rioya etilishi yuzasidan nazoratni amalga oshiradi;

tadbirkorlik subyektlarida, shuningdek, bozorlar va savdo komplekslarida bir martalik yig‘imlar, bozorlar, savdo komplekslari va ularning filiallarida ko‘rsatilgan xizmatlar uchun ijara to‘lovlarining o‘z vaqtida va to‘liq undirilishi, savdo va xizmat ko‘rsatish qoidalari bajarilishi, naqd pul yoki plastik kartochkalar bo‘yicha to‘lov shakliga qarab narxlarning sun’iy ravishda oshirilishi yoki pasaytirilishi, nazorat-kassa texnikalarining yoki virtual kassalarning, to‘lov terminallarining qo‘llanilishi belgilangan tartibda talon va cheklarning berilishi bo‘yicha belgilangan tartibda sayyor soliq tekshiruvlarini o‘tkazadi;

e) bozorlar va savdo komplekslarining moliya-xo‘jalik faoliyati, ular tomonidan soliq to‘g‘risidagi qonun hujjatlariga rioya etilishi yuzasidan nazoratni amalga oshirish hamda ularning hududida aniqlangan huquqbuzarliklar bo‘yicha tergovga qadar tekshiruv o‘tkazib, jinoyat ishlarini tergovga tegishliligiga ko‘ra huquqni muhofaza qiluvchi organlarga topshirish sohasida:

bozorlar, savdo komplekslari hududlarida va ularga tutash bo‘lgan avtomobillarni vaqtinchalik saqlash joylarida moliyaviy-iqtisodiy hamda soliq sohasidagi jinoyatlar va boshqa huquqbuzarliklarni aniqlaydi, oldini oladi va bartaraf etadi;

bozorlar va savdo komplekslari hududlarida sifatsiz, qalbakilashtirilgan (yasama) yoki noqonuniy olib kirilgan tovarlarni tayyorlash va sotishga qarshi kurashadi;

bozorlar, savdo komplekslari, ularga tutash bo‘lgan avtomobil vositalarining to‘xtash joylari, shuningdek, ular hududida faoliyat ko‘rsatayotgan tadbirkorlik subyektlari faoliyatidan olingan pul oqimlari harakati monitoringini va mablag‘lar tushumi hisobining to‘liqligini ta’minlaydi;

bozorlar, savdo komplekslari, ularga tutash bo‘lgan avtotransport vositalarini vaqtincha saqlash joylari, shuningdek, ularning hududida faoliyatni amalga oshiruvchi tadbirkorlik subyektlari pul mablag‘lari tushumlari va tovar aylanmasi to‘g‘risida davlat soliq xizmati organlariga tushadigan ma’lumotlarning ishonchliligini tekshirish uchun banklar hamda statistika organlari bilan o‘zaro hamkorlik qiladi;

bozorlar, savdo komplekslari hududlarida, ularga tutash bo‘lgan avtomobil vositalarining to‘xtash joylarida moliyaviy-iqtisodiy va soliq sohalarida huquqni buzish sodir etilishi holatlari bo‘yicha tergovga qadar tekshiruvlarni tashkil etadi va olib boradi, jinoiy ishlar qo‘zg‘aydi, jinoyat ishlarini tergovga tegishliligiga ko‘ra huquqni muhofaza qiluvchi organlarga beradi;

soliqqa oid huquqbuzarliklar natijasida davlatga, yuridik va jismoniy shaxslarga yetkazilgan zararning belgilangan tartibda undirilishini ta’minlash choralarini ko‘radi;

j) soliq to‘lovchilar o‘z soliq majburiyatlarini ixtiyoriy bajarishi uchun maqbul shart-sharoitlar yaratish, har bir xodim tomonidan “Soliq xizmati — insofli soliq to‘lovchilarning ishonchli hamkori” degan maqsadli vazifani so‘zsiz bajarish sohasida:

soliq to‘lovchilarga soliq majburiyatlarini bajarishda har tomonlama ko‘maklashadi;

soliqlar va yig‘imlarning o‘z vaqtida va to‘liq to‘lanishini ta’minlash uchun soliq to‘lovchilarga xizmat ko‘rsatish sifatini oshirish bo‘yicha choralarni amalga oshiradi, shuningdek, zarur hollarda soliq to‘lovchilar o‘rtasida so‘rovnomalar o‘tkazadi;

qonun hujjatlarida belgilangan tartibda ayrim turdagi soliqlarni hisoblash tarzida soliq to‘lovchilarga servis xizmatlari ko‘rsatadi;

yuridik va jismoniy shaxslarning soliq sohasidagi huquqlari va qonun bilan muhofaza qilinadigan manfaatlari himoyalanishini ta’minlaydi;

davlat soliq xizmati organlari faoliyatining ochiqligi va shaffofligini ta’minlaydi;

soliq to‘lovchi to‘g‘risidagi ma’lumotlarning qonun hujjatlariga muvofiq sir tutilishiga rioya etish ishlarini tashkil qiladi;

z) soliq to‘lovchilarning huquqiy madaniyatini oshirish bo‘yicha ishlarni amalga oshirish, soliqqa oid huquqbuzarliklarning profilaktikasi, ularni aniqlash va bartaraf etish bo‘yicha kompleks tadbirlarni bajarish sohasida:

soliq solish masalalariga daxldor normativ-huquqiy hujjatlarni soliq to‘lovchilarga va aholiga o‘z vaqtida tanishtirish va yetkazish ishlarini tashkil etadi;

soliq sohasida amalga oshirilayotgan islohotlarning mazmun-mohiyati to‘g‘risida joylarda va ommaviy axborot vositalari orqali keng tushuntirish ishlarini olib boradi;

soliqqa doir qonun hujjatlarini nashr etish, ko‘paytirish va davlat soliq xizmatining hududiy organlariga yetkazish, maslahat xizmatlari ko‘rsatish, soliq to‘lovchilarni soliqlarni to‘g‘ri va o‘z vaqtida hisoblab chiqarishga, soliq hisobotlarini va soliqlar hamda yig‘imlarni hisoblab chiqish, to‘lash bilan bog‘liq bo‘lgan boshqa hujjatlarni taqdim etishga o‘qitish uchun servis-markazlar tashkil qiladi;

soliq to‘g‘risidagi qonun hujjatlari bo‘yicha normativ-huquqiy hujjatlar to‘plamlarini nashr etadi, davlat soliq xizmati organlarini qonun hujjatlari bilan ta’minlash choralarini ko‘radi;

jismoniy va yuridik shaxslarning soliq solish va soliq to‘g‘risidagi qonun hujjatlari buzilishi masalalari bo‘yicha murojaatlarini belgilangan tartibda ko‘rib chiqadi;

soliqqa oid huquqbuzarliklar profilaktikasi bo‘yicha davlat dasturlarini ishlab chiqish va amalga oshirishda ishtirok etadi;

soliqqa oid huquqbuzarliklar profilaktikasini amalga oshiradi, shu jumladan ularning sodir etilishi sabablarini aniqlaydi va bartaraf etadi;

huquqbuzarliklar profilaktikasini bevosita amalga oshiruvchi va unda ishtirok etuvchi boshqa organlar hamda muassasalar bilan o‘zaro hamkorlik qiladi;

aksizosti tovarlarini ishlab chiqarishda va aylanmasida huquqbuzarliklarni aniqlash, oldini olish va bartaraf etilishini belgilangan tartibda tashkillashtiradi va amalga oshiradi;

soliqqa oid huquqbuzarliklarni sodir qilgan shaxslarni qidirib topish uchun materiallarni huquqni muhofaza qiluvchi organlarga beradi, davlatga yetkazilgan zararni belgilangan tartibda undirishni ta’minlash choralarini ko‘radi;

ma’muriy huquqbuzarliklar bo‘yicha ishlarni yuritadi;

soliqqa oid huquqbuzarliklar sodir etgan jismoniy va yuridik shaxslarning hisobini yuritadi, mazkur ma’lumotlarning tahlilini amalga oshiradi;

soliqqa oid jinoyatlarning sodir etilishi holatlarini aniqlash uchun, surishtiruv, tergov va suddan yashirinib yurgan shaxslarni qidirib topish uchun ommaviy-axborot vositalari imkoniyatlaridan foydalanadi;

i) soliq to‘lovchilarga muloqotsiz elektron xizmat ko‘rsatishga to‘liq o‘tish yo‘li orqali soliq to‘lovchilar bilan ishlashni takomillashtirish sohasida:

soliq to‘lovchilar bilan ishlashda axborot-kommunikatsiya texnologiyalaridan keng foydalanilishini ta’minlaydi;

soliq to‘lovchilarga real vaqt rejimida keng ko‘lamli interaktiv xizmatlar ko‘rsatilishini tashkil etadi;

soliq to‘lovchilarga soliq to‘lovchining shaxsiy kabineti orqali, shu jumladan Yagona interaktiv davlat xizmatlari portali orqali elektron xizmat ko‘rsatilishini ta’minlaydi;

soliq to‘lovchilarni qonun hujjatlarida belgilangan tartibda ayrim soliqlar bo‘yicha hisoblab chiqarilgan soliqlar summasi haqida soliq to‘lovchining shaxsiy kabineti orqali xabardor qiladi;

k) qonun hujjatlarini takomillashtirish va soliq to‘lovchilarning faoliyatini rag‘batlantirish bo‘yicha takliflar kiritish sohasida:

soliq to‘g‘risidagi qonun hujjatlarini, shu jumladan tabiiy resurslardan ehtiyotlab va samarali foydalanishni rag‘batlantirishga yo‘naltirilgan soliqqa oid qonun hujjatlarini yanada takomillashtirish, soliqlar va yig‘imlarni birxillashtirish, soliq yukini qisqartirish, yuridik va jismoniy shaxslar faoliyatini rag‘batlantirish, ularga zarur imtiyozlar va preferensiyalar berish bo‘yicha takliflar tayyorlashda qatnashadi;

qonunlar va boshqa normativ-huquqiy hujjatlar loyihalarini ishlab chiqadi va ularni belgilangan tartibda ko‘rib chiqish uchun kiritadi;

O‘zbekiston Respublikasi Iqtisodiyot va moliya vazirligi hamda boshqa vazirliklar va idoralar bilan birgalikda qonun hujjatlarida belgilangan tartibda soliq solish masalalari bo‘yicha normativ-huquqiy hujjatlarni ishlab chiqadi va tasdiqlaydi;

soliq hisobotlari hamda soliqlar va yig‘imlarni hisoblab chiqarish, to‘lash bilan bog‘liq boshqa hujjatlar shakllarini O‘zbekiston Respublikasi Iqtisodiyot va moliya vazirligi bilan birgalikda ishlab chiqadi va belgilangan tartibda tasdiqlaydi;

O‘zbekiston Respublikasining xorijiy davlatlar bilan ma’lumotlarni almashish va soliq sohasida hamkorlik qilish masalalari bo‘yicha xalqaro shartnomalari loyihalarini ishlab chiqishda qatnashadi hamda ularning belgilangan tartibda O‘zbekiston Respublikasi Vazirlar Mahkamasiga kiritilishini ta’minlaydi;

l) kadrlarni tanlash va joy-joyiga qo‘yish, davlat soliq xizmati organlarini yuksak ma’naviy-axloqiy sifatlarga ega bo‘lgan malakali xodimlar bilan to‘ldirish, shuningdek, kadrlarni kasbga tayyorlash va qayta tayyorlash bo‘yicha tizimli ishlarni amalga oshirish sohasida:

qo‘yilgan talablarga muvofiq davlat soliq xizmati organlariga ma’naviy-axloqiy jihatdan yuqori malakali xodimlarni tanlash va to‘ldirish bo‘yicha ishlarni tashkil etadi;

belgilangan tartibda ta’lim muassasalari tashkil etish yo‘li bilan, davlat oliy ta’lim muassasalari imkoniyatlaridan foydalangan holda davlat soliq xizmati organlari kadrlarini tayyorlash, qayta tayyorlash va ularning malakasini oshirish ishlarining tizimli ravishda tashkil etilishini ta’minlaydi, shuningdek, rivojlangan xorijiy mamlakatlarning soliq organlari va o‘quv muassasalari bilan tajriba almashishning kengaytirilishini amalga oshiradi;

davlat soliq xizmati organlari xodimlari lavozimlarining malaka tavsifnomalarini ishlab chiqadi, rahbarlar va mutaxassislarni attestatsiyadan o‘tkazadi, ularga o‘z vakolatlari doirasida maxsus unvonlar beradi;

tegishli tanlovdan o‘tmagan yoki lavozim vazifalarini jiddiy buzganligi uchun ilgari davlat soliq xizmati organlaridan bo‘shatilgan shaxslarning ishga qabul qilinishiga yo‘l qo‘ymaslik yuzasidan nazoratni ta’minlaydi;

davlat soliq xizmati organlari kadrlarini tayyorlash bo‘yicha xizmat ko‘rsatishga yo‘naltirilgan tizimni joriy etadi, soliq to‘lovchilar bilan nizoli vaziyatlar yuzaga kelganda ularga stressga bardoshlilikni singdirish, shuningdek, xodimlarning axloqiy — psixologik holatini oshirish bo‘yicha psixologik treninglarni joriy qiladi;

m) davlat soliq xizmati organlari xodimlariga korporativ etikani singdirish, korrupsiya faktlariga keskin barham berish bo‘yicha ta’sirchan choralarni, shu jumladan xodimlar manfaatlarining to‘qnashuvini hal qilish yo‘li bilan amalga oshirish, ishga rasmiyatchilik bilan yondashishga barham berish, shuningdek, xodimlar o‘rtasida huquqbuzarliklar profilaktikasini ta’minlash, o‘z xizmat faoliyati samaradorligini oshirish motivatsiyasi tizimini joriy etish va ular uchun xizmatni o‘tashning munosib shart-sharoitlarini yaratish sohasida:

kadrlarni O‘zbekiston Respublikasiga sodiqlik, vatanparvarlik, halollik hamda huquqiy davlat g‘oyalari va asoslarini hurmat qilish ruhida tarbiyalash yuzasidan uzluksiz ishlarni amalga oshiradi;

davlat soliq xizmati organlari xodimlari tomonidan soliq to‘lovchilarga nisbatan g‘arazli maqsadlarda noqonuniy ta’sir ko‘rsatish holatlarini aniqlaydi va ularga barham beradi;

davlat soliq xizmati organlarida korrupsiya holatlarini aniqlashga, ularning oldini olishga, qarshi kurashishga va bartaraf etishga yo‘naltirilgan chora-tadbirlarni ishlab chiqadi, tashkil etadi va ularni amalga oshirishda qatnashadi;

davlat soliq xizmati organlarining xodimlari o‘rtasida huquqbuzarliklar profilaktikasi bo‘yicha chora-tadbirlarni amalga oshiradi;

xizmat vazifalarini bajarayotganda davlat soliq xizmati organlari xodimlarini noqonuniy tajovuzlardan himoya qilishni ta’minlash yuzasidan chora-tadbirlar kompleksini ishlab chiqadi va amalga oshiradi;

har ikki yilda ko‘pi bilan bir marta davlat soliq xizmatining hududiy organlari hamda Hududlararo inspeksiyalarning budjet va xo‘jalik faoliyati bo‘yicha xarajatlar smetalari ijrosi yuzasidan taftishni amalga oshiradi. Juda zarur bo‘lganda va moliya-xo‘jalik faoliyatida qonun buzilishlariga yo‘l qo‘yilgan holatlar to‘g‘risida ishonchli axborot mavjud bo‘lgan taqdirda navbatdan tashqari taftishlar o‘tkazilishi mumkin;

davlat soliq xizmatining hududiy organlari hamda Hududlararo inspeksiyalar tomonidan moddiy va pul resurslaridan oqilona foydalanish chora-tadbirlari bajarilishini ta’minlaydi, xo‘jasizlik, isrofgarchilik, davlat mablag‘larini va budjetdan tashqari mablag‘larni asossiz ravishda sarflash, smeta-shtat intizomini buzish hollariga barham beradi;

mamlakat iqtisodiy manfaatlarini himoya qilish borasida vijdonan xizmat qilayotgan xodimlarni ularning shaxsiy hissasidan kelib chiqqan holda rag‘batlantirish mexanizmlarini yaratadi.

n) hududlarni kompleks ijtimoiy-iqtisodiy rivojlantirish bo‘yicha davlat soliq xizmati organlariga biriktirilgan sektorlarda soliq solish sohasidagi tizimli muammolarni o‘rganish va aniqlash xamda ularni bartaraf etish bo‘yicha takliflar ishlab chiqish sohasida:

hududlarni ijtimoiy-iqtisodiy rivojlantirish va kambag‘allikni qisqartirish bo‘yicha loyihalarni amalga oshirishda davlat soliq xizmati organlarining ishtirokini faollashtiradi;

soliq solish sohasida ishlarni haqqoniy holatini chuqur va xar tomonlama o‘rganishni amalga oshiradi;

birinchi navbatda, uyma-uy yurish, jismoniy va yuridik shaxslarning murojaatlarini ko‘rib chiqish, aholining turli qatlamlari bilan to‘g‘ridan-to‘g‘ri muloqotni tashkil etish orqali to‘plangan muammolar va tizimli kamchiliklarni aniqlash bo‘yicha ishlarini amalga oshiradi;

soliq solish sohasidagi muammolarni bartaraf etish bo‘yicha maqsadli chora-tadbirlarni amalga oshiradi;

soliq to‘lovchilar o‘rtasida amalga oshirilayotgan islohotlarning mazmun va mohiyatini tushuntirish bo‘yicha ishlarni tashkil etadi.

12. Qo‘mita markaziy apparati, davlat soliq xizmatining hududiy organlarining funksiyalari Qo‘mita raisi tomonidan tasdiqlanadigan nizomlar bilan belgilanadi.

13. Qo‘mita xodimlarining huquqlari, majburiyatlari va javobgarligi O‘zbekiston Respublikasining “Davlat soliq xizmati to‘g‘risida”gi Qonuni, ushbu Nizom, shuningdek, O‘zbekiston Respublikasi davlat soliq xizmati organlarida xizmatni o‘tash to‘g‘risidagi nizom bilan aniqlanadi.

14. Qo‘mita o‘ziga yuklangan vazifa va funksiyalarni amalga oshirish uchun o‘z vakolatlari doirasida quyidagi huquqlarga ega:

1) O‘zbekiston Respublikasi Vazirlar Mahkamasi yoki O‘zbekiston Respublikasi Prezidenti Administratsiyasiga belgilangan tartibda me’yoriy-huquqiy hujjatlar loyihalari, shuningdek, Qo‘mitaga yuklangan vazifa va funksiyalarni bajarish bilan bog‘liq bo‘lgan boshqa hujjatlarni kiritish;

2) Qo‘mitaning vakolatiga kiradigan masalalarda davlat va xo‘jalik boshqaruvi organlari, mahalliy davlat hokimiyati organlari faoliyatini belgilangan tartibda muvofiqlashtirish;

3) Qo‘mitaning vakolatiga kiradigan masalalarni hal etish uchun zarur bo‘lgan axborotlarni, ma’lumotlarni, ma’lumotnomalarni davlat va xo‘jalik boshqaruvi organlari, mahalliy davlat hokimiyati organlari va boshqa tashkilotlardan bepul so‘rash va olish;

4) Qo‘mita va uning tasarrufidagi tuzilmalari o‘zining tashkiliy tuzilmasi doirasida davlat mulkini belgilangan tartibda bir tuzilmadan boshqa tuzilmaga tezkor boshqaruv huquqi asosida o‘tkazish;

5) Qo‘mita, davlat soliq xizmatining hududiy organlari, Hududlararo inspeksiyalari va tasarrufidagi tashkilotlar xodimlarini moddiy rag‘batlantirish, mukofotlash tartibi, miqdorlari va shartlarini belgilash;

6) Qo‘mitaning vakolatiga kiradigan masalalar bo‘yicha takliflarni O‘zbekiston Respublikasi Vazirlar Mahkamasi, davlat va xo‘jalik boshqaruvi organlariga, joylardagi mahalliy davlat hokimiyati organlariga ko‘rib chiqish uchun kiritish;

7) Qo‘mitaning vakolatiga kiradigan masalalar bo‘yicha idoralararo tusdagi xalqaro shartnomalarni belgilangan tartibda tuzish;

8) Qo‘mitaning vakolatiga kiradigan masalalar bo‘yicha xalqaro darajada O‘zbekiston Respublikasining manfaatini belgilangan tartibda ifoda etish;

9) soliq to‘lovchilarning moliyaviy hujjatlarini, shartnomalarini (kontraktlarini), rejalarini, smetalarini, daromadlari to‘g‘risidagi deklaratsiyalarini hamda soliqlar va yig‘imlarni hisoblab chiqish va to‘lash, fuqarolarning yakka tartibdagi jamg‘arib boriladigan pensiya hisob raqamlariga jamg‘arib boriladigan majburiy pensiya badallarini to‘lash bilan bog‘liq boshqa hujjatlarini, shu jumladan elektron hujjatlarini, shuningdek, eksport-import operatsiyalari bilan bog‘liq hujjatlarini belgilangan tartibda tekshirish;

10) o‘tkazilayotgan kameral soliq tekshiruvini xolisona amalga oshirish maqsadida qo‘shimcha ma’lumotlar olish zarurati yuzaga kelganda qonun hujjatlarida belgilangan tartibda sayyor soliq tekshiruvlarini amalga oshirish;

11) soliq tekshiruvlarini o‘tkazayotganda:

hududni, ishlab chiqarish, omborxona, savdo binolarini va boshqa binolarni (shuningdek, alohida rejimda ishlaydigan korxonalarni), shu jumladan soliq to‘lovchi tomonidan daromadlar olish uchun foydalaniladigan yoxud soliq solish obyektlarini saqlash bilan bog‘liq joylarni, ularning joylashgan joyidan qat’i nazar, tekshirish;

mol-mulklarni xatlovdan o‘tkazish va bajarilgan ishlarni, ko‘rsatilgan xizmatlarni nazorat tartibida o‘lchash;

kassalarni hamda tovar-moddiy boyliklar va hujjatlarni (shu jumladan elektron tarzidagi hujjatlarni) saqlash joylarini muhrlab qo‘yish;

soliqlar va yig‘imlarni hisoblab chiqish va to‘lash bilan bog‘liq hujjatlarni talab qilish;

hujjatlarni (nusxalarini, shuningdek, asl nusxalarini), shu jumladan elektron hujjatlarni, predmetlarni (tovarlar, buyumlar, xomashyolar, materiallar va yarim tayyor mahsulotlar namunalarini), shuningdek, huquqbuzarlik predmetlarini olib qo‘yish, olib qo‘yilishi soliq to‘lovchi faoliyatining to‘xtab qolishiga olib keladigan hujjatlar bundan mustasno. Soliq to‘lovchi faoliyatining to‘xtab qolishiga olib keladigan hujjatlar va predmetlarni olib qo‘yish faqat sud qarori asosida amalga oshiriladi;

soliq to‘lovchidan, shuningdek, soliq to‘lovchining rahbarlik funksiyalarini yoki buxgalteriya hisobi va moliyaviy boshqaruv funksiyalarini amalga oshirayotgan shaxslardan, boshqa moddiy javobgar xodimlardan tushuntirishlar olish;

tekshirilayotgan soliq to‘lovchilarning rahbarlaridan asosiy vositalar, tovar-moddiy boyliklar, pul mablag‘lari va hisob-kitoblarni xatlovdan o‘tkazishni talab qilish;

tarjimonni, ekspertni jalb etish va ekspertizani tayinlash;

aniqlangan soliq qonunchiligining buzilishlarini bartaraf etilishini talab qilish;

O‘zbekiston Respublikasining Soliq kodeksida va boshqa qonun hujjatlarida nazarda tutilgan boshqa xatti-harakatlarni amalga oshirish;

12) savdo, tovarlar sotish va pulli xizmatlar ko‘rsatish qoidalariga rioya etilishi, shuningdek, naqd pul yoki plastik kartochkalar bo‘yicha to‘lov shakliga qarab narxlarni sun’iy ravishda oshirish yoki pasaytirish, nazorat-kassa texnikalaridan, qonun hujjatlarida nazarda tutilgan hollarda esa onlayn nazorat-kassa texnikalari yoki virtual kassalardan, hisob-kitob terminallaridan foydalanish, belgilangan tartibda talonlar va cheklarni berish masalalari yuzasidan tekshiruvlarni belgilangan tartibga muvofiq o‘tkazish;

13) soliq nazoratini amalga oshirishda qonun hujjatlarida belgilangan tartibda fiskal xotirali nazorat-kassa mashinasida, onlayn nazorat-kassa mashinalari yoki virtual kassalarda saqlanayotgan ma’lumotlardan foydalanish;

14) soliq solinadigan bazani aniqlashtirish maqsadida xo‘jalik yurituvchi subyektlar xodimlarining hisobotdagi va haqiqiy sonining muvofiqligi yuzasidan monitoringni amalga oshirish;

15) soliq monitoringini amalga oshirishda soliq to‘lovchidan soliqlar va yig‘imlarning to‘g‘ri hisoblanishi, to‘liq va o‘z vaqtida to‘lanishi bilan bog‘liq zarur hujjatlar, ma’lumotlar, tushuntirishlarni talab qilib olish;

16) xo‘jalik yurituvchi subyektlar faoliyatida o‘tkazilgan xronometraj ko‘zdan kechirish natijalariga ko‘ra tovar (ish, xizmat)lar realizatsiyasidan kamaytirib ko‘rsatilgan tushumni qayta hisob-kitob qilgan holda soliqlarni hisoblashni amalga oshirish to‘g‘risida talabnoma yuborish;

17) davlat soliq xizmatlari organlarida soliq solish obyektlari va soliq solish bilan bog‘liq obyektlar to‘g‘risidagi mavjud ma’lumotlarni aniqlashtirish maqsadida, qonun hujjatlarida belgilangan tartibda, ko‘zdan kechirish hamda so‘rov olib borish;

18) belgilangan tartibda quyidagilarni:

banklardan va boshqa kredit-moliya tashkilotlaridan soliq to‘lovchilarning hisob-kitob hisobvaraqlarida yoki boshqa hisobvaraqlarida amalga oshirilgan operatsiyalar haqidagi, shuningdek, ushbu hisobvaraqlardagi mavjud pul mablag‘lari to‘g‘risidagi ma’lumotlarni;

bojxona organlaridan va boshqa vakolatli organlardan import-eksport operatsiyalari amalga oshirilganligi va soliq to‘lovchilar to‘g‘risidagi boshqa zarur ma’lumotlarni;

vazirliklar, idoralar va boshqa tashkilotlardan davlat soliq xizmati organlari mansabdor shaxslarining xizmat vazifalari masalalari bo‘yicha ma’lumotlarni olish;

19) belgilangan tartibda:

qurilish, montaj, ta’mirlash va boshqa ishlarni nazorat o‘lchovidan o‘tkazish uchun malakali mutaxassislarni jalb etish;

iqtisodiy jinoyatlar bilan kurashishda ilmiy-texnik vositalardan va usullardan foydalanish;

o‘tkaziladigan tekshirishlarda boshqa nazorat qiluvchi organlar, vazirliklar va idoralar bilan hamkorlik qilish;

mansabdor shaxslarni, fuqarolarni aniqlangan huquqbuzarlik faktlari bo‘yicha tushuntirishlar berish uchun davlat soliq xizmati organlariga taklif etish;

20) soliq to‘lovchi tomonidan hisobga olish hujjatlari yo‘qotib qo‘yilgan yoki yo‘q qilingan holatlarda Davlat budjetiga va davlat maqsadli jamg‘armalariga to‘lanishi kerak bo‘lgan soliqlar hamda yig‘imlar summasini soliq to‘lovchi to‘g‘risida o‘zida mavjud bo‘lgan axborotlar, shuningdek, boshqa ana shunday soliq to‘lovchilar to‘g‘risidagi ma’lumotlar asosida hisob-kitob qilish yo‘li bilan mustaqil ravishda belgilash;

21) soliq majburiyati bo‘yicha da’vo qilish muddati mobaynida soliqlar va yig‘imlarning hisoblab chiqilgan summasini hisoblab chiqarish yoki qayta ko‘rib chiqish;

22) soliqlar va yig‘imlarni undirish funksiyalarini amalga oshiruvchi davlat organlari va tashkilotlarni soliqlar va yig‘imlarning to‘g‘ri hisoblab chiqilganligi, to‘liq undirilganligi va Davlat budjetiga hamda davlat maqsadli jamg‘armalariga o‘z vaqtida o‘tkazilganligi yuzasidan nazorat qilish;

23) Soliq to‘lovchining (soliq agentining) bankdagi hisobvaraqlari bo‘yicha operatsiyalarni o‘n kundan ko‘p bo‘lmagan muddatga to‘xtatib turish. Soliq to‘lovchining (soliq agentining) bankdagi hisobvaraqlari bo‘yicha operatsiyalarni o‘n kundan ko‘p muddatga to‘xtatib turish bo‘yicha sud tartibida choralar ko‘rish (jinoiy faoliyatdan olingan daromadlarni legallashtirish hamda terrorizmni moliyalashtirish, shuningdek, mazkur kichik bandning ikkinchi xatboshida nazarda tutilgan holatlar bundan mustasno).

Yuridik shaxslar va yakka tartibdagi tadbirkorlarning bankdagi hisobvaraqlari bo‘yicha operatsiyalarni o‘n kundan ko‘p bo‘lmagan muddatga to‘xtatib turish soliq organi tomonidan mazkur soliq to‘lovchilarning (soliq agentlarining) soliq majburiyatlari bajarilishini ta’minlash uchun quyidagi hollarda qo‘llanilishi mumkin:

ushbu soliq to‘lovchi (soliq agenti) tomonidan soliq organiga moliyaviy va (yoki) soliq hisoboti bunday hisobotni taqdim etishning belgilangan muddati tugaganidan keyin o‘n kun ichida taqdim etilmaganda;

soliq to‘lovchi (soliq agenti) tomonidan soliq organining kameral soliq tekshiruvi natijalari bo‘yicha talabnomasiga tushuntirishlar va (yoki) tuzatishlar belgilangan muddatda taqdim etilmaganda, shuningdek soliq to‘lovchi tomonidan soliq organi talab qilgan hujjatlar taqdim etilmaganda;

soliq tekshiruvini o‘tkazayotgan soliq organlarining mansabdor shaxslarini ko‘rsatilgan hududga yoki binoga (bundan turar joylar mustasno) kirishiga to‘sqinlik qilishda. Soliq organi mansabdor shaxsining kirishiga to‘sqinlik qilinishi uning o‘zi va tekshirilayotgan shaxs tomonidan imzolanadigan dalolatnoma bilan rasmiylashtiriladi. Bunday dalolatnoma asosida soliq organi bankdagi hisobvaraqlar bo‘yicha operatsiyalarni to‘xtatib turadi;

soliq to‘lovchining (soliq agentining) o‘zi ko‘rsatgan manzilda yo‘qligida;

25) qonun hujjatlarida belgilangan tartibda:

soliqqa oid huquqbuzarliklar to‘g‘risidagi ishni ko‘rib chiqish va yuridik hamda jismoniy shaxslarga nisbatan moliyaviy sanksiyalarni qo‘llash;

ma’muriy huquqbuzarliklar to‘g‘risidagi ishlarni ko‘rib chiqish va ma’muriy jazolar qo‘llash;

26) aniqlangan soliqqa oid huquqbuzarliklar bo‘yicha tovar-moddiy boyliklarni qonun hujjatlarida belgilangan holatlarda va tartibda davlat daromadiga o‘tkazish. Soliq to‘lovchilar — yuridik shaxslar, yakka tartibdagi tadbirkorlarning tovar-moddiy boyliklarini davlat daromadiga o‘tkazish sud tartibida amalga oshiriladi;

27) soliq to‘lovchilar tomonidan noqonuniy olingan mablag‘larni davlat daromadiga undirish to‘g‘risida ularga nisbatan sudga da’volar taqdim etish;

28) o‘tkazilgan kameral nazorat natijalari bo‘yicha soliq to‘lovchi aniqlashtirilgan soliq hisobotini taqdim etmasa yoki aniqlangan tafovutlar bo‘yicha asosnomalarni taqdim etmasa yoxud taqdim etgan asosnomalar yetarli emas deb topilsa soliq organi soliq to‘lovchiga soliq auditini tayinlash;

29) davlat ulushlari bo‘yicha dividendlarni va davlat unitar korxonalarining sof foydasidan Davlat budjetiga ajratmalarni undirish;

30) soliq to‘lovchi majburiyatlarining bajarilishi zarurligi to‘g‘risida va soliq qarzini majburiy tartibda undirish bo‘yicha ko‘riladigan choralar to‘g‘risida soliq to‘lovchiga talabnoma yuborish;

31) soliq to‘lovchi soliq hisoboti taqdim etilgan sanadan e’tiboran o‘n kun mobaynida yozma ariza bermagan taqdirda, soliqlar va yig‘imlarning ortiqcha to‘langan summalarini soliq qarzini, shu jumladan, ular bo‘yicha penya va jarimalarni uzish hisobidan hisobga olish to‘g‘risida O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasiga mustaqil ravishda xulosa taqdim etish;

32) O‘zbekiston Respublikasining Soliq kodeksida belgilangan holatlarda hujjatlarni, agar ular chet tilda tuzilgan bo‘lsa, notarial tasdiqlagan holda davlat tiliga tarjima qilishni talab qilish;

33) yuridik shaxslarning mol-mulkiga solinadigan soliq, suv resurslaridan foydalanganlik uchun soliq bo‘yicha soliq davrida bo‘nak to‘lovlari summasi soliq hisobotida ko‘rsatilgan, budjetga to‘lanishi lozim bo‘lgan soliq summasiga nisbatan 10 foizdan ortiq kamaytirilgan taqdirda, bo‘nak to‘lovlarini soliqlarning haqiqiy summasidan kelib chiqib, penya hisoblagan holda qaytadan hisoblash;

34) bozorlarda, savdo komplekslarida va ularga tutash bo‘lgan avtotransport vositalarini vaqtincha saqlash joylarida bir martalik yig‘imning to‘liq tushganligini va uni topshirish hisobini, ijara to‘lovini, nazorat-kassa texnikalaridan, qonun hujjatlarida nazarda tutilgan hollarda esa onlayn nazorat-kassa texnikalari yoki virtual kassalardan foydalanilishini, hisob-kitob terminallarini, savdo va xizmatlar ko‘rsatish qoidalariga rioya etilishini belgilangan tartibda qisqa muddatli tekshirishlarni amalga oshirish, shu jumladan, naqd pul yoki plastik kartochkalar bo‘yicha to‘lov shakliga qarab narxlarni sun’iy ravishda oshirish yoki pasaytirish, shuningdek, belgilangan tartibda talonlar va cheklarni berish masalalari yuzasidan tekshiruvlar o‘tkazish;

35) bozorlar, savdo komplekslari hududlarida va ularga tutash bo‘lgan avtotransport vositalarini vaqtinchalik saqlash joylarida aniqlangan moliya-iqtisodiy va soliq sohalaridagi buzilishlar sodir etilganligi faktlari bo‘yicha tergovga qadar tekshiruvlar o‘tkazish, ular bo‘yicha jinoiy ishlar qo‘zg‘ash, keyinchalik ishlarni tergovga tegishliligiga qarab qonun hujjatlariga muvofiq huquqni muhofaza qiluvchi organlarga berish.

Davlat soliq xizmati organlari ushbu Nizomda va boshqa qonun hujjatlarida nazarda tutilgan boshqa huquqlarga ham egadir.

36) Soliq va yig‘imlarni yig‘ish maqsadida davlat soliq xizmati organlarining budjetdan tashqari mablag‘lari hisobidan to‘g‘ridan-to‘g‘ri shartnoma orqali qaytarish sharti bilan tijorat banklariga “0” foiz stavkada depozitga mablag‘ joylashtirish.

37) tijorat banklarida korporativ bank kartalarini ochish va ulardan nazorat xaridlarini amalga oshirish maqsadida foydalanish.

15. Ushbu Nizomning 14-bandida nazarda tutilgan huquqlar belgilangan vakolatlar doirasida:

ushbu Nizomning 14-bandidagi 9 — 22, 33 — 35-kichik bandlari — davlat soliq xizmati organlarining mansabdor shaxslariga beriladi;

ushbu Nizomning 14-bandidagi 1 — 8, 23 — 32 va 36-kichik bandlari — davlat soliq xizmati organlari boshliqlari va ularning o‘rinbosarlariga beriladi.

16. Qo‘mita markaziy apparati tarkibiy bo‘linmalari va davlat soliq xizmatining hududiy organlarining huquqlari Qo‘mita raisi tomonidan tasdiqlanadigan nizomlarda belgilanadi.

17. Qo‘mita:

yuklangan vazifa va funksiyalarni samarali amalga oshirish, shuningdek, soliq to‘g‘risidagi qonun hujjatlariga rioya etilishini ta’minlash sohasida davlat boshqaruvi nazoratini samarali bajarish;

Davlat budjetiga va davlat maqsadli jamg‘armalariga soliqlar va yig‘imlar tushumi prognoz ko‘rsatkichlariga erishilishini so‘zsiz ta’minlash;

O‘zbekiston Respublikasi Vazirlar Mahkamasi va O‘zbekiston Respublikasi Prezidenti Administratsiyasiga kiritiladigan, shuningdek, Qo‘mita tomonidan qabul qilinadigan normativ-huquqiy hujjatlar loyihalari va boshqa hujjatlarni amalga oshirish sifati, natijalari va yakuniy natijasi;

davlat soliq xizmati organlarini rivojlantirish, shuningdek, hududlarni ijtimoiy-iqtisodiy rivojlantirish va muammoli masalalarni hal etish bo‘yicha dasturlar, chora-tadbirlar rejalari, “yo‘l xaritasi” va boshqa dasturiy hujjatlarni samarali amalga oshirish;

fuqarolar va tadbirkorlik subyektlarining huquqlari va qonuniy manfaatlarini himoya qilish va rioya etilishini ta’minlash uchun javob beradi.

18. Qo‘mita markaziy apparati tarkibiy bo‘linmalari va davlat soliq xizmatining hududiy organlarining javobgarligi Qo‘mita raisi tomonidan tasdiqlanadigan nizomlarda belgilanadi.

19. Quyidagilar Qo‘mita raisining asosiy funksional majburiyatlari hisoblanadi:

1) O‘zbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya etish;

2) Qo‘mita faoliyatiga umumiy rahbarlik qilish, tegishli qonun hujjatlari bilan Qo‘mita zimmasiga yuklangan vazifa va funksiyalarning bajarilishini tashkil etish;

3) O‘zbekiston Respublikasi Prezidenti hujjatlari va O‘zbekiston Respublikasi Vazirlar Mahkamasining qarorlari bilan tasdiqlangan Qo‘mita faoliyatini yanada takomillashtirish bo‘yicha konsepsiyalar, kompleks dasturlar hamda kompleks tadbirlar ijrosini tanqidiy va chuqur tahlil qilish;

4) Davlat budjetiga, davlat maqsadli jamg‘armalariga soliqlar va yig‘imlar tushumi prognoz ko‘rsatkichlariga erishishni so‘zsiz ta’minlash bo‘yicha ta’sirchan choralarni ishlab chiqish va qabul qilish;

5) Qo‘mita faoliyati sohasiga kiruvchi masalalar bo‘yicha O‘zbekiston Respublikasi Prezidenti Administratsiyasining bo‘linmalari va O‘zbekiston Respublikasi Vazirlar Mahkamasi kotibiyatlari, shuningdek, tegishli vazirliklar va idoralar bilan o‘zaro hamkorlik qilish, O‘zbekiston Respublikasi Vazirlar Mahkamasi va uning Rayosati majlislarida masalalarni ko‘rib chiqishda ishtirok etish;

6) O‘zbekiston Respublikasi Prezidenti, O‘zbekiston Respublikasining Bosh vaziri va uning o‘rinbosarlarining topshiriqlarini ijro etish;

7) o‘z o‘rinbosarlari vakolatlarini belgilash, ular o‘rtasida vazifalarni taqsimlash, Qo‘mitaning boshqa mansabdor shaxslari vakolatlarini belgilash, Qo‘mita faoliyatining alohida uchastkalariga rahbarlik qilish uchun o‘z o‘rinbosarlari va boshqa mansabdor shaxslarning shaxsiy mas’uliyati darajasini belgilash;

8) Qo‘mita faoliyatini rejalashtirishni tashkil etish, Qo‘mita va o‘z o‘rinbosarlarining har choraklik ish rejalarini tasdiqlash, ularning bajarilishi yuzasidan nazoratni ta’minlash;

9) O‘zbekiston Respublikasi Prezidenti va O‘zbekiston Respublikasi Vazirlar Mahkamasi hujjatlari hamda topshiriqlari ijrosini tashkil etish va monitoringini olib borishning ta’sirchan tizimini yaratish, Qo‘mita faoliyatida ijro intizomini mustahkamlash bo‘yicha kompleks amaliy chora-tadbirlarni bajarish, qonun hujjatlarida belgilangan tartibda topshiriqlarning o‘z vaqtida va sifatli ijro etilishi uchun tarkibiy va hududiy bo‘linmalar, shuningdek, tasarrufidagi tashkilotlar rahbarlarining shaxsiy javobgarligini oshirish choralarini ko‘rish;

10) Qo‘mita xodimlarini qayta tayyorlash va ularning malakasini oshirishni tizimli tashkil etish;

11) Qo‘mita tizimida kadrlarni tanlash va joy-joyiga qo‘yish, ularning samarali faoliyati uchun zarur shart-sharoitlar yaratish, Qo‘mitaning kadrlar zaxirasini shakllantirish;

12) O‘zbekiston Respublikasi Prezidenti, O‘zbekiston Respublikasi Prezidenti Administratsiyasi va O‘zbekiston Respublikasi Vazirlar Mahkamasi nomenklaturasiga kiradigan vakant rahbar lavozimlarga taklif etilgan kadrlar, shuningdek, Qo‘mitaga ishga qabul qilinayotgan boshqa kadrlarning professionalligi, o‘z ishini bilishi, amaliy tajribasi, yuqori darajadagi ishchanlik va ma’naviy-axloqiy fazilatlari kafolatini ta’minlash;

13) faoliyat sohasiga kiradigan masalalar bo‘yicha normativ-huquqiy hujjatlar loyihalari sifatli ishlab chiqilishini, ularning qonun hujjatlarida belgilangan talablarga qat’iy muvofiq ravishda o‘z vaqtida O‘zbekiston Respublikasi Vazirlar Mahkamasiga kiritilishini tashkil etish;

14) qonun hujjatlarida belgilangan tartibda Qo‘mitaning qonun loyihalarini tayyorlash faoliyatini tashkil etish;

15) Qo‘mita vakolatiga kiruvchi masalalar bo‘yicha normativ-huquqiy hujjatlarni, zarurat bo‘lganda, boshqa vazirliklar va idoralar bilan birgalikda tegishli qarorlar qabul qilish;

16) Qo‘mitaga taqdim etilgan takliflar va normativ-huquqiy hujjatlar loyihalarining to‘liq hamda har tomonlama ko‘rib chiqilishini ta’minlash, ularni qonun hujjatlarida belgilangan muddatlarda kelishish (viza qo‘yish);

17) Qo‘mita rahbarlari va xodimlari xizmat safarlarini qonun hujjatlari talablariga to‘la muvofiq ravishda bajarish va tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanilishini ta’minlash;

18) o‘z o‘rinbosarlari hamda tarkibiy va davlat soliq xizmatining hududiy organlari rahbarlari faoliyati samaradorligi va natijadorligini tizimli tanqidiy tahlil qilish, Qo‘mitaning hay’ati majlislarida ularning shaxsiy hisobotlarini eshitish, yakunlari bo‘yicha zarur choralar ko‘rish;

19) Qo‘mita xodimlarini rag‘batlantirish va intizomiy javobgarlikka tortish masalalarini hal qilish, o‘z o‘rinbosarlarini rag‘batlantirish hamda intizomiy javobgarlikka tortish, shu jumladan, ularning egallab turgan lavozimida qolishi maqsadga muvofiqligiga doir masalalarni ko‘rib chiqish bo‘yicha takliflar kiritish, ularning shaxsiy javobgarligini oshirishga doir tizimli choralarni amalga oshirish;

20) Qo‘mita xodimlari tomonidan Qo‘mita tomonidan belgilangan tartibda tasdiqlanadigan xodimlarning odob-axloq qoidalari talablariga hamda ichki mehnat tartibi qoidalariga rioya etilishini ta’minlashni nazorat qilish;

21) qonun hujjatlarida belgilangan talablarga muvofiq Qo‘mita tizimida korrupsiya va boshqa huquqbuzarliklarning oldini olish choralarini ko‘rish, shuningdek, huquqni qo‘llash amaliyoti va qonun hujjatlarini takomillashtirish bo‘yicha chora-tadbirlarni ishlab chiqish hamda amalga oshirish yo‘li bilan ularning sodir etilishiga ko‘maklashuvchi sabablar va shart-sharoitlarni aniqlash, tahlil qilish, bartaraf etish;

22) Qo‘mita, Hududlararo inspeksiyalar, davlat soliq xizmatining hududiy organlari va tasarrufidagi tashkilotlar ishini tashkil etishning zamonaviy shakllari joriy etilishini ta’minlash;

23) aholi va tadbirkorlik subyektlari bilan o‘zaro hamkorlik qilishda, shu jumladan “yagona darcha” prinsipini joriy etish orqali davlat xizmatlari ko‘rsatish sifati va samaradorligini oshirish hamda ulardan erkin foydalanishni ta’minlash va O‘zbekiston Respublikasining “Elektron hukumat to‘g‘risida”gi Qonunini amalga oshirish doirasida zamonaviy axborot-kommunikatsiya texnologiyalaridan foydalanish;

24) jismoniy va yuridik shaxslarning murojaatlarini ko‘rib chiqish, aholi bilan bevosita va ochiq muloqotni yo‘lga qo‘yish, qonun hujjatlarida belgilangan muddatlarda va tartibda jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan sayyor qabullar o‘tkazish;

25) O‘zbekiston Respublikasi Prezidentining Xalq qabulxonalari bilan samarali hamkorlikni, ular faoliyatida Qo‘mita xodimlari hamda rahbarlarining faol ishtirok etishini tashkillashtirish, jismoniy va yuridik shaxslarning O‘zbekiston Respublikasi Prezidenti Virtual qabulxonasidan tushadigan murojaatlari o‘z vaqtida hamda to‘liq ko‘rib chiqilishini ta’minlash;

26) davlat sirlariga kiritilgan axborot va maxfiy axborot bilan ishlashda qonun hujjatlari talablariga rioya qilish;

27) zarur hollarda markaziy apparat va hududiy bo‘linmalar, Hududlararo inspeksiyalarning tasdiqlangan tuzilmalariga boshqaruv xodimlarining umumiy cheklangan soni va ish haqi fondi doirasida o‘zgartirishlar kiritish;

30) O‘zbekiston Respublikasi Prezidenti Administratsiyasi bilan kelishilgan holda O‘zbekiston Respublikasi Soliq qo‘mitasining Moddiy yordam, ijtimoiy himoya, soliq organlarini rivojlantirish va ko‘zda tutilmagan xarajatlar maxsus jamg‘armasi mablag‘lari hisobidan davlat soliq xizmati organlari boshqaruv xodimlari mutaxassislarining qo‘shimcha shtat birliklarini joriy etish;

31) Qo‘mita markaziy apparatining tarkibiy tuzilmalari, davlat soliq xizmatining hududiy organlari to‘g‘risidagi nizomlarni hamda tasarrufidagi tashkilotlar ustavlarini belgilangan tartibda tasdiqlash;

32) Qo‘mita markaziy apparati, Hududlararo inspeksiyalarning shtatlar jadvalini tasdiqlash;

33) Qo‘mita xodimlarini, Qoraqalpog‘iston Respublikasi, viloyatlar va Toshkent shahar soliq boshqarmalari boshliqlari o‘rinbosarlari, Qoraqalpog‘iston Respublikasi, viloyatlar va Toshkent shahar soliq boshqarmalari hamda Hududlararo inspeksiyalarning bo‘lim (shu’ba) boshliqlari, Qoraqalpog‘iston Respublikasi, viloyatlar va Toshkent shahar soliq boshqarmalari soliq organlari faoliyatini nazorat qilish va shaxsiy xavfsizlik bo‘limlari (shu’balari) xodimlarini, tuman (shahar) soliq inspeksiyalari boshliqlari, Hududlararo inspeksiyalar boshlig‘i va boshliq o‘rinbosarlari, Hududlararo inspeksiyalar shaxsiy xavfsizlik bo‘limlari xodimlarini lavozimga tayinlash va lavozimdan ozod qilish;

34) Qo‘mita hay’ati va markaziy apparati majlislarini boshqarish;

35) Qo‘mita va davlat soliq xizmatining hududiy organlari, Hududlararo inspeksiyalarning xodimlari tomonidan bajarilishi majburiy bo‘lgan buyruqlar chiqarish, yo‘riqnomalar, qoidalar, nizomlarni tasdiqlash hamda ko‘rsatmalar berish, shuningdek, ularning belgilangan tartibda ijro etilishini nazorat qilish;

36) davlat soliq xizmati organlari xodimlarini moddiy rag‘batlantirish, shu jumladan mukofotlash to‘g‘risida qarorlar qabul qilish;

37) davlat soliq xizmati organlari tizimidagi xodimlar va mutaxassislarni ularning ko‘p yillik va samarali faoliyati, alohida yutuqlari va xizmatlari uchun belgilangan tartibda O‘zbekiston Respublikasi davlat mukofotlariga bilan taqdirlashga taqdim qilish va tavsiyalar berilishini ta’minlash;

38) davlat organlari va boshqa tashkilotlarda, shuningdek, boshqa davlatlarning davlat soliq xizmati organlari bilan munosabatlarda davlat soliq xizmati organlarining manfaatlarini ifodalash.

39) bo‘ysunuvchi tashkilotlarning xodimlari sonini aniqlash, ularning tuzilmasi, shtat birligi, shu jumladan, boshqaruv xodimlari, ish haqi fondi, xarajatlar smetasi, transport vositalarining me’yorlarini tasdiqlash, shuningdek, ularning mol-mulkini tasarruf etish.

20. Quyidagilar Qo‘mita raisi o‘rinbosarlarining asosiy funksional vazifalari hisoblanadi:

1) O‘zbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya etish;

2) Qo‘mita raisi vaqtincha bo‘lmaganda tegishli buyruq asosida uning vazifalarini bajarish;

3) Qo‘mitaning mutasaddilik qilinadigan tarkibiy tuzilmalari faoliyatini muvofiqlashtirish, nazorat qilish va ularga bevosita rahbarlik qilish, ularning xodimlari o‘rtasida vazifalarni taqsimlash;

4) Qo‘mitaning mutasaddilik qilinadigan faoliyat yo‘nalishlari bo‘yicha O‘zbekiston Respublikasi Prezidenti hujjatlari va O‘zbekiston Respublikasi Vazirlar Mahkamasining qarorlari bilan tasdiqlangan Qo‘mita faoliyatini yanada takomillashtirish bo‘yicha konsepsiyalar, kompleks dasturlar hamda kompleks chora-tadbirlar ijrosini tanqidiy va chuqur tahlil qilish;

5) mutasaddilik qilinadigan tarkibiy tuzilmalar tomonidan prognoz ko‘rsatkichlariga erishishni so‘zsiz ta’minlash bo‘yicha ta’sirchan choralar ko‘rish, tuzilmalar rahbarlari hisobotlarini muntazam eshitish va qayd etilgan ko‘rsatkichlarga erishish uchun ularning shaxsiy javobgarligini oshirish;

6) mutasaddilik qilinadigan tarkibiy tuzilmalar rahbarlarining har choraklik rejalarini tasdiqlash, ularning bajarilishi ustidan nazoratni ta’minlash;

7) O‘zbekiston Respublikasi Prezidenti va O‘zbekiston Respublikasi Vazirlar Mahkamasi qarorlari hamda topshiriqlari ijrosini ta’minlash, Qo‘mitaning mutasaddilik qilinadigan tarkibiy tuzilmalarda ijro intizomini mustahkamlash bo‘yicha kompleks amaliy choralarni amalga oshirish, shuningdek, qonun hujjatlarida belgilangan tartibda topshiriqlarning o‘z vaqtida va sifatli ijro etilishi uchun tarkibiy tuzilmalar rahbarlarining shaxsiy javobgarligini oshirish choralarini ko‘rish;

8) Qo‘mita hay’ati qarorlari, Qo‘mita raisining buyruq va topshiriqlari o‘z vaqtida hamda sifatli bajarilishini ta’minlash;

9) mutasaddilik qilinadigan tarkibiy tuzilmalarda kadrlarni tanlash va joy-joyiga qo‘yish bo‘yicha Qo‘mita raisiga takliflar taqdim etish, ularning professionalligi, o‘z ishini bilishi, amaliy tajribasi, yuqori darajadagi ishchanlik va ma’naviy-axloqiy fazilatlari kafolatini ta’minlash, ularning kasbiy malakasini oshirish choralarini ko‘rish, mutasaddilik qilinadigan tarkibiy tuzilmalarda kadrlar zaxirasini shakllantirish;

10) normativ-huquqiy hujjatlar loyihalari mutasaddilik qilinadigan tarkibiy tuzilmalar tomonidan sifatli ishlab chiqilishini tashkil etish, Qo‘mitaning tarkibiy tuzilmalarida tayyorlangan hujjatlar loyihalarini ko‘rib chiqish va ular keyinchalik Qo‘mita raisi tomonidan ko‘rib chiqilishi, imzolanishi (viza qo‘yilishi) uchun viza qo‘yish, ularning qonun hujjatlari talablariga qat’iy muvofiq ravishda O‘zbekiston Respublikasi Vazirlar Mahkamasiga o‘z vaqtida kiritilishini ta’minlash;

11) Qo‘mitaga taqdim etilgan takliflar va normativ-huquqiy hujjatlar loyihalarini to‘liq va har tomonlama ko‘rib chiqish;

12) xizmat safarlarini qonun hujjatlari talablariga to‘liq muvofiq amalga oshirish va tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanilishini ta’minlash;

13) mutasaddilik qilinadigan tarkibiy tuzilmalar rahbarlari va xodimlari faoliyati samaradorligi hamda natijadorligini tizimli tanqidiy tahlil qilish, Qo‘mita hay’ati majlislarida ularning shaxsiy hisobotlarini eshitish, yakunlari bo‘yicha zarur choralar ko‘rish;

14) mutasaddilik qilinadigan tarkibiy tuzilmalarning faoliyat sohasiga tegishli bo‘lgan masalalar bo‘yicha Qo‘mita faoliyatini takomillashtirishga doir amaliy choralar ko‘rish, qonun hujjatlarini takomillashtirish yuzasidan takliflar ishlab chiqish hamda ularni Qo‘mita raisiga kiritish;

15) mutasaddilik qilinadigan tarkibiy tuzilmalar rahbarlari va xodimlarini rag‘batlantirish, moddiy rag‘batlantirish, mukofotlash hamda intizomiy javobgarlikka tortish, shu jumladan ularning egallab turgan lavozimida qolishi maqsadga muvofiqligi to‘g‘risidagi masalani ko‘rib chiqish bo‘yicha takliflarni Qo‘mita raisiga kiritish, funksional vazifalar va yuklangan vazifalar bajarilishi uchun ularning shaxsiy javobgarligini oshirish bo‘yicha tizimli choralarni amalga oshirish;

16) Qo‘mita tomonidan belgilangan tartibda tasdiqlangan xodimlarning odob-axloq qoidalari hamda ichki mehnat tartibi qoidalari talablariga rioya etish, ko‘rsatilgan qoidalar mutasaddilik qilinadigan tarkibiy tuzilmalar rahbarlari va xodimlari tomonidan rioya etilishini ta’minlash;

17) qonun hujjatlarida belgilangan talablarga muvofiq Qo‘mita tizimida korrupsiya va boshqa huquqbuzarliklarning oldini olish choralarini ko‘rish, shuningdek, huquqni qo‘llash amaliyoti va qonun hujjatlarini takomillashtirish bo‘yicha chora-tadbirlar ishlab chiqish hamda amalga oshirish yo‘li bilan ularning sodir etilishiga ko‘maklashuvchi sabablar va shart-sharoitlarni aniqlash, tahlil qilish, bartaraf etish;

18) Qo‘mita raisiga davlat xizmatlari samaradorligi, sifati va ulardan erkin foydalanishni oshirishga doir takliflar kiritish;

19) jismoniy va yuridik shaxslarning murojaatlarini ko‘rib chiqish bo‘yicha samarali ishlarni tashkil etish, aholi bilan bevosita va ochiq muloqotni yo‘lga qo‘yish, muntazam shaxsiy qabullar o‘tkazish, shu jumladan qonun hujjatlarida belgilangan muddatlarda va tartibda jismoniy shaxslarni va yuridik shaxslarning vakillarini sayyor qabul qilish;

20) O‘zbekiston Respublikasi Prezidentining Xalq qabulxonalari bilan samarali hamkorlik qilish, ular faoliyatida qonun hujjatlari talablariga muvofiq faol ishtirok etish, jismoniy va yuridik shaxslarning O‘zbekiston Respublikasi Prezidentining Virtual qabulxonasidan kelib tushadigan barcha murojaatlarini o‘z vaqtida hamda to‘liq ko‘rib chiqilishini ta’minlash;

21) davlat sirlariga kiritilgan axborot va maxfiy axborot bilan ishlashda qonun hujjatlari talablariga rioya qilish;

22) vazirliklar, idoralar, mahalliy ijro etuvchi organlar va boshqa tashkilotlarning soliq to‘g‘risidagi qonun hujjatlariga rioya etilishini ta’minlash sohasidagi ishlarni muvofiqlashtirishda ishtirok etish.

21. Qo‘mita markazi apparatining tarkibiy tuzilmalari va davlat soliq xizmatining hududiy organlari rahbarlarining asosiy funksional majburiyatlari Qo‘mita raisi tomonidan tasdiqlanadi.

22. Qo‘mita raisi:

1) Qo‘mitaga yuklangan vazifa va funksiyalarning bajarilishi;

2) Davlat budjeti va davlat maqsadli jamg‘armalariga tushumlar prognozining bajarilishi;

3) soliqlar va yig‘imlarning to‘liq va o‘z vaqtida tushishini ta’minlash yuzasidan lozim darajada nazorat o‘rnatilishi;

4) O‘zbekiston Respublikasi Prezidenti, O‘zbekiston Respublikasi Vazirlar Mahkamasining qarorlari, boshqa normativ-huquqiy hujjatlari talablarining o‘z vaqtida va sifatli bajarilishi;

5) davlat soliq xizmati organlariga yuqori ma’naviy-axloqiy sifatlarga ega malakali xodimlarni jalb etishga qaratilgan, kadrlarni tanlash, joy-joyiga qo‘yish va rag‘batlantirishning mutlaqo yangi tizimi yaratilishi;

6) xodimlarning xizmatga bo‘lgan munosabatini tubdan o‘zgartirish, qonun buzilishining barcha ko‘rinishlariga nisbatan murosasiz munosabatda bo‘lish muhiti yaratilishi, jamoada sog‘lom muhit shakllantirilishi;

7) davlat soliq xizmati organlari faoliyatining ochiqligi ta’minlanishi, soliq to‘lovchilar bilan to‘g‘ridan-to‘g‘ri aloqasiz muloqot o‘rnatilishi;

8) soliq ma’muriyatchiligining zamonaviy uslublarini joriy etish sohasida xalqaro ekspertlar, grantlarni jalb etish ishlari;

9) davlat soliq xizmati organlarining moddiy-texnika jihatdan ta’minlanishi;

10) ushbu Nizomning 17-bandida nazarda tutilgan Qo‘mitaning tegishli javobgarlik sohalari;

11) ushbu Nizomning 19-bandida nazarda tutilgan o‘z funksional majburiyatlarining sifatli bajarilishi uchun shaxsan javob beradi.

23. Qo‘mita raisining birinchi o‘rinbosari:

1) Davlat budjetiga va davlat maqsadli jamg‘armalariga soliqlar va yig‘imlar to‘liq va o‘z vaqtida tushishining ta’minlanishi;

2) soliq to‘g‘risidagi qonun hujjatlari va huquqni qo‘llash amaliyotini takomillashtirish bo‘yicha takliflar tayyorlanishi, soliq nazoratini amalga oshirishning zamonaviy uslublari joriy etilishi, soliq sohasidagi huquqbuzarliklarning kelib chiqish sabab va shart-sharoitlari tahlil qilinishi, ularga barham berish choralari ko‘rilishi;

3) soliq solish bazasini kengaytirish bo‘yicha, jumladan hududlarning makroiqtisodiy ko‘rsatkichlar dinamikasi va soliq salohiyatini tizimli tahlil qilish orqali kompleks choralar ko‘rilishi;

4) nazorat amalga oshirilishi va soliq qarzdorligi oshishiga yo‘l qo‘yilmasligi, xalqaro tajribani chuqur o‘rganish orqali soliq tizimining modernizatsiyalanishi;

5) Qo‘mitaga yuklangan vazifa va funksiyalarning Qo‘mita markaziy apparatining mutasaddilik qilinadigan tarkibiy tuzilmalarida bajarilishi;

6) mutasaddilik qilinadigan masalalar bo‘yicha ushbu Nizomning 17-bandida nazarda tutilgan Qo‘mitaning tegishli javobgarlik sohalari;

7) ushbu Nizomning 20-bandida nazarda tutilgan o‘z funksional majburiyatlarining sifatli ijro etilishi uchun shaxsan javob beradi.

24. Qo‘mita raisi o‘rinbosarlari:

1) soliq ma’muriyatchiligi samaradorligini oshirishga ko‘maklashuvchi soliq to‘g‘risidagi qonun hujjatlarini ishlab chiqish va qo‘llash metodologiyasining takomillashtirilishi;

2) Davlat budjeti daromadlari darajasini oshirish uchun zaxiralarni izlash va aniqlash bo‘yicha tizimli ishlar olib borilishi;

3) soliq majburiyatlarini o‘z vaqtida bajarganligi uchun tadbirkorlik subyektlarini rag‘batlantirish choralari ko‘rilishi;

4) soliq solish qismida iqtisodiyotning xufiyona sektorini legallashtirishga qaratilgan tizimli nazorat ta’minlanishi;

5) sifatsiz, qalbaki (yasama) va noqonuniy olib kirilgan tovarlar ishlab chiqarilishi, shuningdek, realizatsiya qilinishiga qarshi kurashishning holati va samaradorligi;

6) soliq ma’muriyatchiligi jarayoniga zamonaviy axborot-kommunikatsiya texnologiyalari va tahlilning ilg‘or avtomatlashtirilgan uslublari, elektron hisobvaraq-fakturalarni hisobga olish va onlayn nazorat-kassa mashinalarining avtomatlashtirilgan monitoringi bo‘yicha dasturiy mahsulotlar joriy etilishi hamda samarali faoliyat ko‘rsatishi;

7) jismoniy va yuridik shaxslarning murojaatlari puxta, har tomonlama, to‘liq va obyektiv ko‘rib chiqilishi, fuqarolarning shaxsan qabul qilinishi;

9) Qo‘mita vazifa va funksiyalarining Qo‘mitaning mutasaddilik qilinadigan tarkibiy tuzilmalarida bajarilishi;

10) mutasaddilik qilinadigan masalalar bo‘yicha ushbu Nizomning 17-bandida nazarda tutilgan Qo‘mitaning tegishli javobgarlik sohalari;

11) ushbu Nizomning 20-bandida nazarda tutilgan o‘z funksional majburiyatlarining sifatli ijro etilishi uchun shaxsan javob beradi.

25. Qo‘mitaning mansabdor shaxslari:

o‘zlarining funksional vazifalarini bajarmaganligi yoki zarur darajada bajarmaganliklari, ijro intizomini buzganliklari;

ushbu Nizom va O‘zbekiston Respublikasining boshqa qonun hujjatlari talablariga rioya qilmaganliklari;

noqonuniy xatti-harakatlar (harakatsizlik) tufayli soliq to‘lovchilarga moddiy va ma’naviy zarar yetkazganliklari;

o‘zlarining noqonuniy xatti-harakatlari (harakatsizligi) tufayli xo‘jalik yurituvchi subyektlarning ishlab chiqarish hajmlarini pasaytirganliklari va soliq solish bazasini kamaytirganliklari;

qonun hujjatlariga muvofiq bo‘lmagan qarorlar qabul qilganliklari;

qonun hujjatlarida nazarda tutilgan boshqa huquqbuzarliklar uchun qonun hujjatlarida belgilangan tartibda javob beradilar.

26. Davlat soliq xizmati organlari xodimlarining o‘z xizmat vakolatlari doirasidan chetga chiqqanligi, shuningdek, zimmasiga yuklangan xizmat vazifalarini bajarmaganligi qonun hujjatlarida belgilangan tartibda intizomiy, ma’muriy yoki jinoiy javobgarlikka sabab bo‘ladi.

27. Soliq nazoratini amalga oshirishda davlat soliq xizmati organlari mansabdor shaxslarining noqonuniy xatti-harakatlari (harakatsizligi) tufayli yetkazilgan zararlar qonunda belgilangan tartibda qoplanadi.

28. Soliq organlari soliq to‘lovchining aynan bitta davr uchun aynan bir xil soliqlar bo‘yicha bir martadan ortiq soliq auditini o‘tkazishga haqli emas, Soliq kodeksida belgilangan holatlar bundan mustasno.

29. Jismoniy va yuridik shaxslar o‘z huquq va erkinliklarini buzayotgan davlat soliq xizmati organlari mansabdor shaxslarining xatti-harakatlari (harakatsizligi) yoki qarorlari yuzasidan qonun hujjatlarida belgilangan tartibda Qo‘mita rahbariyatiga yoxud bevosita sudga shikoyatlar bilan murojaat qilishga haqlidirlar.

30. Qo‘mitaga O‘zbekiston Respublikasi Oliy Majlisi Qonunchilik palatasi ma’qullaganidan keyin kiritilgan O‘zbekiston Respublikasi Bosh vazirining taqdimnomasiga binoan O‘zbekiston Respublikasi Prezidenti tomonidan tasdiqlanadigan va lavozimidan ozod qilinadigan rais boshchilik qiladi.

31. Qo‘mita raisi o‘z maqomiga ko‘ra O‘zbekiston Respublikasi Vazirlar Mahkamasining a’zosi hisoblanadi.

32. Qo‘mita raisining O‘zbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan birinchi o‘rinbosari va o‘rinbosarlari bo‘ladi.

33. Qo‘mita raisi bo‘lmagan vaqtda uning vakolatlari vazifalar taqsimotiga binoan uning o‘rinbosarlari tomonidan bajariladi.

34. Qoraqalpog‘iston Respublikasi, viloyatlar va Toshkent shahar soliq boshqarmalariga O‘zbekiston Respublikasi Prezidenti tomonidan lavozimga tayinlanadigan va lavozimdan ozod etiladigan boshliqlar boshchilik qiladi.

Hududlararo inspeksiyalar, tuman (shahar) soliq inspeksiyalariga belgilangan tartibda Qo‘mita raisi tomonidan tayinlanadigan va lavozimdan ozod etiladigan boshliqlar boshchilik qiladi.

35. Qo‘mita markaziy apparatining tarkibiy tuzilmalari, hududiy soliq boshqarmalari to‘g‘risidagi nizomlar Qo‘mita raisi tomonidan, tumanlar (shaharlar) soliq inspeksiyalari to‘g‘risidagi nizomlar esa Qo‘mita raisi tomonidan tasdiqlanadigan tuman (shahar) soliq inspeksiyasi to‘g‘risidagi Namunaviy nizom asosida hududiy soliq boshqarmalari boshliqlari tomonidan tasdiqlanadi.

36. Qo‘mita markaziy apparati tarkibiy tuzilmalarining davlat soliq xizmatining hududiy organlari, Hududlararo inspeksiyalar va tasarrufidagi tashkilotlar bilan o‘zaro hamkorligining ta’minlanishi Qo‘mita markaziy apparati tarkibiy tuzilmalari rahbarlari tomonidan amalga oshiriladi.

37. Qo‘mita markaziy apparati tarkibiy tuzilmalari o‘z faoliyat yo‘nalishlari bo‘yicha davlat soliq xizmatining hududiy organlari, Hududlararo inspeksiyalar va tasarrufidagi tashkilotlar bilan o‘zaro hamkorlik qilib:

1) topshiriqlarni davlat soliq xizmatining hududiy organlari, Hududlararo inspeksiyalar va tasarrufidagi tashkilotlarga yetkazadi va ularning ijrosini nazorat qiladi;

2) davlat soliq xizmatining hududiy organlari, Hududlararo inspeksiyalar va tasarrufidagi tashkilotlarga bevosita tarkibiy tuzilmaning faoliyatiga oid masalalar bo‘yicha so‘rovnomalar yuboradi va ular ijrosini nazorat qiladi;

3) tekshiruvlar va o‘rganishlar o‘tkazadi, davlat soliq xizmatining hududiy organlari, Hududlararo inspeksiyalar va tasarrufidagi tashkilotlarning amaliy faoliyatini umumlashtiradi, uni takomillashtirishga qaratilgan chora-tadbirlarni ishlab chiqadi va qabul qiladi;

4) davlat soliq xizmatining hududiy organlari, Hududlararo inspeksiyalar va tasarrufidagi tashkilotlari faoliyatini tashkil etish va natijalari haqidagi hisobot va axborot materiallari, statistik va boshqa ma’lumotlarni o‘rganishni tashkil etadi;

5) davlat soliq xizmatining hududiy organlari, Hududlararo inspeksiyalar va tasarrufidagi tashkilotlari ish rejalarini tahlil qiladi, ularning faoliyatlarini rejalashtirishni takomillashtirish bo‘yicha choralarni ko‘radi;

6) davlat soliq xizmatining hududiy organlari, Hududlararo inspeksiyalar va tasarrufidagi tashkilotlardan kelib tushgan takliflarni ko‘rib chiqadi;

7) normativ-huquqiy hujjatlar loyihalarini tayyorlashda davlat soliq xizmatining hududiy organlari, Hududlararo inspeksiyalar va tasarrufidagi tashkilotlarning ishtirokini tashkil etadi, qonun hujjatlarini takomillashtirish bo‘yicha ulardan kelib tushgan takliflarni ko‘rib chiqadi.

38. Davlat soliq xizmatining hududiy organlari, Hududlararo inspeksiyalar va tasarrufidagi tashkilotlar Qo‘mita markaziy apparati tarkibiy tuzilmalari bilan o‘zaro hamkorlik qiladi, shu jumladan:

1) Qo‘mita rahbariyati topshiriqlarining ijrosi to‘g‘risida axborot beradi;

2) faoliyatning belgilangan sohasidagi qonun hujjatlari ijrosi yuzasidan faoliyat natijalari to‘g‘risida axborot taqdim qiladi;

3) ularning faoliyatini o‘rganish va tekshirish natijasida aniqlangan ishdagi kamchiliklar va qonunbuzilishlarini bartaraf etish natijalari to‘g‘risida axborot beradi;

4) o‘zining ish natijalari to‘g‘risidagi hisobotlarni belgilangan tartibda va muddatlarda taqdim etadi;

5) soliqqa tortish va soliq to‘g‘risidagi qonun hujjatlariga rioya etilishi sohasidagi muammolarni bartaraf etishga qaratilgan takliflarni taqdim etadi;

6) kompleks ijtimoiy-iqtisodiy rivojlantirish bo‘yicha sektorlar bilan o‘zaro hamkorlik natijalari to‘g‘risida hisobot beradi;

7) vakolatli organlar tomonidan o‘zining faoliyatida o‘tkazilgan tekshirish natijalari to‘g‘risida xabardor qiladi.

39. Qo‘mita markaziy apparati tarkibiy tuzilmalari hamda uning hududiy davlat soliq xizmati organlari, Hududlararo inspeksiyalar va tasarrufidagi tashkilotlarning o‘zaro hamkorligi jarayonida kelib chiqadigan kelishmovchiliklar Qo‘mita raisi topshirig‘iga binoan uning tegishli o‘rinbosarlari tomonidan ko‘rib chiqiladi. Agar ko‘rib chiqishdan keyin kelishmovchiliklar tartibga solinmasa, ular bo‘yicha qaror bevosita Qo‘mita raisi tomonidan qabul qilinadi.

40. Qo‘mita o‘z vazifalari va funksiyalarini amalga oshirishda boshqa davlat va xo‘jalik boshqaruvi organlari, mahalliy davlat hokimiyati organlari, fuqarolarning o‘zini o‘zi boshqarish organlari, huquqni muhofaza qiluvchi organlar, banklar va boshqa tashkilotlar bilan o‘zaro hamkorlik qiladi.

41. Hududlararo inspeksiyalar o‘z vazifalari va funksiyalarini amalga oshirishda boshqa davlat va xo‘jalik boshqaruvi organlari, mahalliy davlat hokimiyati organlari, fuqarolarning o‘zini o‘zi boshqarish organlari, huquqni muhofaza qiluvchi organlar, banklar va boshqa tashkilotlar bilan o‘zaro hamkorlik qiladi.

42. Davlat soliq xizmatining hududiy organlari o‘z vakolatlari doirasida boshqa hududiy davlat va xo‘jalik boshqaruvi organlari, mahalliy davlat hokimiyati organlari, fuqarolarning o‘zini o‘zi boshqarish organlari, huquqni muhofaza qiluvchi organlar, banklar va boshqa tashkilotlar bilan o‘zaro hamkorlik qiladi.

Davlat soliq xizmatining hududiy organlari tegishli hududlarni ijtimoiy-iqtisodiy rivojlantirish bo‘yicha “yo‘l xaritalari” ishlab chiqilishida va amalga oshirilishida kompleks ijtimoiy-iqtisodiy rivojlantirish bo‘yicha sektorlar bilan yaqindan hamkorlik qiladi.

43. Qo‘mitaning faoliyatiga O‘zbekiston Respublikasi Vazirlar Mahkamasining Makroiqtisodiy tahlil va prognozlashtirish, moliya va bank tizimlarini isloh qilish, xususiy tadbirkorlik va kichik biznesni rivojlantirish masalalari bo‘yicha Kompleks rahbari va O‘zbekiston Respublikasi Vazirlar Mahkamasining Makroiqtisodiy tahlil va prognozlashtirish, moliya va bank tizimlarini isloh qilish, xususiy tadbirkorlik va kichik biznesni rivojlantirish masalalari yig‘ma axborot-tahlil departamenti va O‘zbekiston Respublikasi Prezidenti bo‘linmalari mutasaddilik qiladi.

44. Qo‘mitada Qo‘mita raisi (hay’at raisi), raisning birinchi o‘rinbosari, rais o‘rinbosarlari (lavozimi bo‘yicha) va Qo‘mita faoliyatining asosiy yo‘nalishlarini muvofiqlashtiruvchi Qo‘mita tarkibiy tuzilmalari rahbarlari va Hududlararo inspeksiyalar boshlig‘idan iborat tarkibda hay’at tashkil etiladi.

Hay’atning soni va shaxsiy tarkibi Qo‘mita raisining taqdimiga binoan O‘zbekiston Respublikasi Vazirlar Mahkamasi tomonidan tasdiqlanadi.

45. Hay’atga quyidagi vazifalar yuklanadi:

Qo‘mita faoliyatining ushbu Nizomda belgilangan asosiy yo‘nalishlarini tayyorlash va amalga oshirish;

Qo‘mita tizimi rahbarlari va xodimlarining qonun hujjatlarida, O‘zbekiston Respublikasi Prezidenti hujjatlari va O‘zbekiston Respublikasi Vazirlar Mahkamasi qarorlarida belgilangan vazifalarning o‘z vaqtida va sifatli bajarilishini ta’minlash uchun shaxsiy javobgarligini oshirish choralarini ko‘rgan holda tarkibiy va davlat soliq xizmatining hududiy organlari, Hududlararo inspeksiyalar va tasarrufidagi tashkilotlar rahbarlarining hisobotlari muntazam ravishda eshitilishini tashkil qilish;

Qo‘mita faoliyati sohasida hududiy va tarmoq dasturlarini amalga oshirishning borishi natijadorligini har chorakda va tizimli ko‘rib chiqish;

joylarda Qo‘mita faoliyat sohasining dolzarb masalalarini muhokama qilishni ta’minlagan holda hay’atning kengaytirilgan ko‘chma majlislarini o‘tkazishni tashkil etish, shuningdek, yuzaga kelgan muammolarni bartaraf etish bo‘yicha tegishli qarorlarni ishlab chiqish va qabul qilish;

Qo‘mita markaziy apparati va uning tizimiga kiruvchi lavozimlar nomenklaturasini ko‘rib chiqish va tasdiqlash;

Qo‘mita nomenklaturasiga kiradigan lavozimlarga kadrlarni tanlash, joy-joyiga qo‘yish masalalarini ko‘rib chiqish;

Qo‘mita tizimidagi tashkilotlarning ustav kapitali miqdorini aniqlash va tasdiqlash;

O‘zbekiston Respublikasi Prezidenti va O‘zbekiston Respublikasi Vazirlar Mahkamasi qarorlari va topshiriqlarida belgilangan vazifalarni o‘z vaqtida va sifatli amalga oshirishni ta’minlash uchun ijro intizomini mustahkamlash va Qo‘mita rahbarlari va xodimlarining shaxsiy javobgarligini oshirish.

Hay’at, shuningdek, Qo‘mita vakolatiga taalluqli boshqa masalalarni ham ko‘rib chiqish huquqiga ega.

46. Hay’at majlisiga Qo‘mita vakolatiga kiradigan masalalar bo‘yicha boshqa vazirliklar, davlat qo‘mitalari, idoralar, mahalliy davlat hokimiyati organlari va tashkilotlar rahbarlari taklif etilishi mumkin.

47. Hay’at, agar uning majlisida tarkibining yarmidan ko‘pi qatnashgan taqdirda vakolatli bo‘ladi. Ko‘rib chiqilayotgan masalalar bo‘yicha qarorlar oddiy ko‘pchilik ovoz bilan qabul qilinadi.

48. Hay’at qarorlari Qo‘mita qarorlari va raisning buyruqlari bilan amalga oshiriladi.

49. Hay’at raisi va a’zolari o‘rtasida kelishmovchiliklar mavjud bo‘lgan taqdirda rais paydo bo‘lgan kelishmovchiliklar to‘g‘risida O‘zbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hay’at a’zolari ham o‘z fikr-mulohazalarini O‘zbekiston Respublikasi Vazirlar Mahkamasiga xabar qilishlari mumkin.

50. Hay’at faoliyati tartibi uning hay’at tasdiqlaydigan reglamentida belgilanadi.

51. Davlat soliq xizmatining hududiy organlari faoliyatining, shu jumladan, hay’at qarorlarini va Qo‘mita topshiriqlarini bajarish bilan bog‘liq eng muhim masalalarni hal etish uchun Qoraqalpog‘iston Respublikasi, viloyatlar va Toshkent shahar soliq boshqarmalarida kengashlar tashkil qilinadi. Qoraqalpog‘iston Respublikasi, viloyatlar va Toshkent shahar soliq boshqarmalari kengashlarining shaxsiy tarkibi tegishli hududiy soliq boshqarmasi boshlig‘ining taqdimiga binoan Qo‘mita raisi tomonidan tasdiqlanadi.

52. Soliqqa oid qonun hujjatlarini qo‘llashning eng murakkab va munozarali masalalari bo‘yicha qarorlar tayyorlash, yuqori malakali maslahatlashuvlar o‘tkazish uchun soliq boshqarmalarida maslahat-ekspert kengashlari tashkil etiladi.

53. Qo‘mitaga aholi o‘rtasida tushuntirish va profilaktika ishlarini amalga oshirish uchun qonun hujjatlariga muvofiq bosma va elektron ommaviy axborot vositalarini ta’sis etishi mumkin.

54. Qo‘mitaning samaradorligi muntazam ravishda baholanadi.

55. Qo‘mita faoliyatining samaradorligi va natijadorligini baholash quyidagi asosiy mezonlarga asoslanadi:

davlat soliq xizmati organlari ishining sifatini qoniqarli baholaydigan soliq to‘lovchilar, shuningdek, ularning harakatlari va qarorlari yuzasidan shikoyatlarning soni;

kameral soliq tekshiruvi natijasi bo‘yicha undirilgan soliqlar va yig‘imlarning umumiy summasi;

xronometraj ko‘zdan kechirish va soliq tekshiruvlari natijalari bo‘yicha aniqlangan davlat budjeti daromadlarini oshirish zaxiralari summasi va ularni undirish darajasi;

hisoblangan soliq va yig‘imlar undirilishining to‘liqligi va soliq qarzdorligining pasayish darajasi;

davlat soliq xizmati organlari bilan o‘zaro munosabatlarda “shaxsiy kabinet”dan foydalanish darajasi;

elektron hisobvaraq-fakturalarni hisobga olish va onlayn nazorat-kassa mashinalarini avtomatlashtirilgan monitoring qilish bo‘yicha dasturiy mahsulotlarni qo‘llayotgan soliq to‘lovchilarning qamrab olinishi.

Qo‘mita markaziy apparatining tarkibiy tuzilmalari, davlat soliq xizmatining hududiy organlari, Hududlararo inspeksiyalar va tasarrufidagi tashkilotlar faoliyatining samaradorligini baholashning qo‘shimcha mezonlarini belgilashi mumkin.

56. Qo‘mita faoliyatining samaradorligi va natijadorligini baholash yakunlari bo‘yicha:

davlat soliq xizmati organlarining rahbarlari va xodimlariga nisbatan rag‘batlantirish (mukofotlash) yoki intizomiy javobgarlik choralari;

Qo‘mitaning faoliyatida aniqlangan kamchiliklarni bartaraf etish va uning faoliyatini yanada takomillashtirish choralari qabul qilinadi.

57. Qo‘mita faoliyatining samaradorligi va natijadorligini baholash tartibi va metodikasi qonun hujjatlarida belgilanadi.

58. Qo‘mita, davlat soliq xizmatining hududiy organlari, Hududlararo inspeksiyalarning moliyalashtirilishi va moddiy-texnika ta’minoti, shu jumladan ularning xodimlari mehnatiga haq to‘lash budjetdan ajratiladigan mablag‘lar doirasida Davlat budjeti mablag‘lari, O‘zbekiston Respublikasi Soliq qo‘mitasining Moddiy yordam, ijtimoiy himoya, soliq organlarini rivojlantirish va ko‘zda tutilmagan xarajatlar maxsus jamg‘armasi mablag‘lari, shuningdek, qonun hujjatlarida taqiqlanmagan boshqa manbalar mablag‘lari hisobiga amalga oshiriladi.

59. Davlat soliq xizmati organlari xodimlarining mehnatga haq to‘lash fondi quyidagilardan iborat:

a) lavozim maoshi (davlat soliq xizmati organlari xodimlarining lavozim maoshini belgilashda Yagona tarif setkasi bo‘yicha mehnatga haq to‘lashning tasdiqlangan razryadlariga muvofiq tarif koeffitsiyenti 1,7 baravarga oshirilgan miqdorda);

b) quyidagi miqdordagi oylik ustamalar va boshqa to‘lovlar:

markaziy apparat va Hududlararo inspeksiyalar xodimlariga (texnik va xizmat ko‘rsatuvchi xodimlardan tashqari), alohida mehnat sharoitlari uchun lavozim ish haqiga (tarif stavkasiga) 20 foiz. Mazkur ustamalar qonun hujjatlarida belgilangan rag‘batlantiruvchi qo‘shimcha haq va ustamalarni hisoblashda davlat soliq xizmati organlari xodimlarining lavozim maoshi tarkibiga kiritiladi;

ish haqi fondining 15 foizi (budjet muassasalari va tashkilotlari xodimlarini moddiy rag‘batlantirish maxsus jamg‘armasidan shakllanadigan);

lavozim maoshiga nisbatan 40 foiz (mehnatni rag‘batlantirish koyeffitsiyenti);

maxsus unvon uchun 0,15 dan 0,65 gacha (rag‘batlantirish koeffitsiyentini hisobga olgan holda lavozim maoshiga nisbatan koeffitsiyentda);

uzoq muddat uzluksiz xizmati uchun 0,05 dan 0,6 gacha (rag‘batlantirish koeffitsiyentini hisobga olgan holda lavozim maoshiga nisbatan koeffitsiyentda);

ikki oylik mehnat haqi fondi miqdoridagi mukofot va bir oylik mehnat haqi miqdoridagi moddiy yordam to‘lovi;

qonunchilik hujjatlarida belgilangan boshqa to‘lovlar;

v) rag‘batlantiruvchi to‘lovlar;

boshqa to‘lovlar, shu jumladan:

ovqatlanish xarajatlarini qoplash uchun bazaviy hisoblash miqdorining ikki baravari miqdoridagi oylik to‘lovlar;

davlat soliq xizmati organlari xodimlarining transport harajatlarini qoplash uchun bazaviy hisoblash miqdorining ikki baravar miqdorida oylik to‘lovlar (xizmat transporti vositalari ajratilgan xodimlardan tashqari);

yiliga bir marta oylik mehnatga haq to‘lash fondi miqdorida moddiy yordam ko‘rsatish;

d) xodimning asoslantirilgan arizasiga asosan yuqori turuvchi tuzilma rahbarining roziligi bilan mehnatga haq to‘lash fondiga ajratilgan mablag‘lar doirasida quyidagi hollarda qo‘shimcha tarzda moddiy yordam ko‘rsatilishi mumkin:

yaqin qarindoshlari vafot etganda — o‘lim to‘g‘risidagi guvohnoma nusxasiga asosan;

alohida muhtojlik holatida (baxtsiz hodisa, to‘y va boshqa marosimlar munosabati bilan, uzoq muddatli kasallik sababli maxsus davolanish va sog‘liqni qayta tiklash uchun, shuningdek, oiladagi og‘ir moddiy ahvol sababli va boshqa holatlar);

qonun hujjatlarida nazarda tutilgan boshqa to‘lovlar.

Maxsus unvon va ko‘p yillik xizmati uchun beriladigan ustama miqdorini hisoblashda O‘zbekiston Respublikasi Davlat budjeti hisobidan to‘lanadigan lavozim maoshi va oylik ustamalarning birgalikdagi summalari hisobga olinadi.

Qo‘mita xodimlari lavozim maoshlariga har oylik ustamalar va qo‘shimcha to‘lovlar Qo‘mita raisi tomonidan tasdiqlanadigan nizomga muvofiq amalga oshiriladi.

59¹. Davlat soliq xizmati organlari xodimlariga mazkur nizomning 59-bandi a) va b) kichik bandlarida ko‘rsatilgan lavozim maoshi, ustama va boshqa to‘lovlarni moliyalashtirish budjet mablag‘lari hisobidan, v) kichik bandidagi boshqa to‘lovlarni moliyalashtirish O‘zbekiston Respublikasi Soliq qo‘mitasining Moddiy yordam, ijtimoiy muhofaza, soliq organlarini rivojlantirish hamda ko‘zda tutilmagan xarajatlar maxsus jamg‘armasi mablag‘lari hisobidan amalga oshiriladi.

60^1. Qo‘mita raisining maslahatchilari (shu jumladan, Jamoatchilik bilan aloqalar boshqarmasi boshlig‘i) mehnatga haq to‘lash, tibbiy va transport xizmati ko‘rsatish shartlariga ko‘ra Qo‘mita raisining o‘rinbosariga tenglashtiriladi.

62. Quyidagilar davlat soliq xizmati organlari xodimlarini moddiy rag‘batlantirishning asosiy turlari hisoblanadi:

davlat soliq xizmati organlari faoliyati samaradorligini baholash mezonlariga asosan va erishilgan yakuniy natijalardan kelib chiqib mukofotlash;

Davlat budjetiga to‘lovlar tushumlari prognozi bajarilganligi va ortig‘i bilan bajarilganligi uchun oy, chorak, yarim yillik ish yakunlari bo‘yicha mukofotlash;

alohida muhim topshiriqlar bajarilganligi uchun yakka tartibda mukofotlash;

xodimlarning lavozim maoshiga ish uchastkasining murakkabligi va muhimligi hamda mehnatda yuqori natijalarga erishganligi uchun ustamalar to‘lash;

xizmat vazifalarini bajarish chog‘idagi alohida xizmatlari uchun va pensiyaga chiqishi munosabati bilan qimmatbaho sovg‘alar bilan mukofotlash;

davlat soliq xizmati organlari xodimlarining lavozim maoshlariga ularning funksional vazifalarini bajarishlarini, bilimlari darajasini, soliq to‘lovchilar bilan ish olib borish kasbiy qobiliyatlarini har yili test sinovlaridan o‘tkazish asosida belgilanadigan maxsus rag‘batlantiruvchi ustamalar.

Davlat soliq xizmati organlari xodimlari O‘zbekiston Respublikasi Soliq qo‘mitasining Moddiy yordam, ijtimoiy himoya, soliq organlarini rivojlantirish va ko‘zda tutilmagan xarajatlar maxsus jamg‘armasi hisobidan ham quyidagi summalarning 10 foiziga qadar miqdorda mukofotlanadi:

kameral soliq tekshiruvi natijasi bo‘yicha undirilgan soliqlar va yig‘imlar;

xronometraj ko‘zdan kechirish natijalari bo‘yicha aniqlangan, soliq to‘lovchi to‘lab bergan soliqlar;

soliq tekshiruvlari natijasi bo‘yicha undirilgan soliqlar.

63. Davlat soliq xizmatining hududiy organlari xodimlarining funksional vazifalarini bajarishi, bilim darajasi, soliq to‘lovchilar bilan ish olib borish bo‘yicha kasbiy qobiliyatlarini test sinovidan o‘tkazish natijalari bo‘yicha beriladigan toifalarga qarab lavozim maoshlariga 10 foizdan 30 foizgacha miqdorda maxsus rag‘batlantiruvchi ustamalarni xar yili test sinovidan o‘tkazish asosida qo‘llash tartibi O‘zbekiston Respublikasi Iqtisodiyot va moliya vazirligi va Qo‘mita tomonidan tasdiqlanadi.

64. Davlat soliq xizmati organlari tuzilmalarining rahbar va inspektorlar tarkibi xodimlarini hamda mutaxassislarni (ishlab chiqarish xodimlari) oy, chorak, yarim yildagi ish yakunlari bo‘yicha mukofotlash respublika va mahalliy budjetlarga, davlat maqsadli jamg‘armalarga soliqlar va yig‘imlar tushumlari prognozi bajarilganligi va ortig‘i bilan bajarilganligi uchun hamda ular faoliyatini tavsiflovchi boshqa asosiy ko‘rsatkichlar bajarilganligi uchun Qo‘mita raisi tomonidan tasdiqlanadigan nizomga muvofiq, davlat soliq xizmati organlarining rahbarlari qarorlari asosida amalga oshiriladi.

65. Qo‘mitada, davlat soliq xizmatining hududiy organlarida va Hududlararo inspeksiyalarda O‘zbekiston Respublikasi Soliq qo‘mitasining Moddiy yordam, ijtimoiy himoya, soliq organlarini rivojlantirish va ko‘zda tutilmagan xarajatlar maxsus jamg‘armasi tashkil etiladi. O‘zbekiston Respublikasi Soliq qo‘mitasining Moddiy yordam, ijtimoiy himoya, soliq organlarini rivojlantirish va ko‘zda tutilmagan xarajatlar maxsus jamg‘armasi to‘g‘risidagi nizom O‘zbekiston Respublikasi Vazirlar Mahkamasi tomonidan tasdiqlanadi.

66. Budjetdan ajratiladigan mablag‘lar hisobiga shakllantiriladigan mehnatga haq to‘lash fondi mablag‘lari, shuningdek, O‘zbekiston Respublikasi Soliq qo‘mitasining Moddiy yordam, ijtimoiy muhofaza, soliq organlarini rivojlantirish hamda ko‘zda tutilmagan xarajatlar maxsus jamg‘armasi mablag‘lari davlat soliq xizmati organlari xodimlariga to‘lovlar, shu jumladan mukofotlar manbalari hisoblanadi.

67. Qo‘mita raisi O‘zbekiston Respublikasi Vazirlar Mahkamasi va O‘zbekiston Respublikasi Prezidenti oldida Qo‘mita faoliyati to‘g‘risida muntazam ravishda hisobot beradi.

68. O‘zbekiston Respublikasi Vazirlar Mahkamasining tegishli Kotibiyat rahbari Qo‘mita rahbarlariga yuklangan vazifalarni samarali bajarish bo‘yicha ular faoliyatining doimiy monitoringini olib boradi, Qo‘mita faoliyati samaradorligiga xolis baho beradi.

69. Monitoring va baholash yakunlari bo‘yicha davlat soliq xizmati organlarining alohida o‘rnak ko‘rsatgan rahbarlari va xodimlari rag‘batlantiriladi yoki yo‘l qo‘ygan jiddiy kamchiliklari uchun egallab turgan lavozimidan ozod etishgacha bo‘lgan javobgarlikka tortiladi.

70. Qo‘mitani qayta tashkil etish va tugatish qonun hujjatlarida belgilangan tartibda amalga oshiriladi.

1. Ushbu Nizom Yirik soliq to‘lovchilar bo‘yicha hududlararo soliq inspeksiyasi (keyingi o‘rinlarda Hududlararo inspeksiya deb ataladi) faoliyatini tashkil etish tartibini belgilaydi.

2. Hududlararo inspeksiya O‘zbekiston Respublikasi Soliq qo‘mitasining (keyingi o‘rinlarda Qo‘mita deb ataladi) mustaqil tarkibiy tuzilmasi hisoblanadi va bevosita Qo‘mita raisiga bo‘ysunadi.

3. Hududlararo inspeksiyaga joylashgan joyi va amalga oshirayotgan faoliyatidan qat’i nazar, yirik soliq to‘lovchilarning soliq ma’muriyatchiligini amalga oshirish vazifasi yuklanadi.

4. Soliq to‘lovchilarni yirik soliq to‘lovchilar toifasiga kiritish mezonlari Qo‘mita tomonidan belgilanadi.

5. Hududlararo inspeksiya o‘z faoliyatida O‘zbekiston Respublikasi Konstitutsiyasiga, O‘zbekiston Respublikasining Soliq kodeksiga, O‘zbekiston Respublikasining “Davlat soliq xizmati to‘g‘risida”gi Qonuniga va boshqa qonun hujjatlariga, O‘zbekiston Respublikasining Oliy Majlisi palatalari qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, Qo‘mita qarorlariga hamda ushbu Nizomga amal qiladi.

6. Hududlararo inspeksiya yuridik shaxs hisoblanadi, O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhr va blankaga, shuningdek, O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasida g‘aznachilik hisobraqamlariga, bank hisobraqamlariga, shu jumladan xorijiy valyutadagi hisobraqamlariga ega.

7. Hududlararo inspeksiyaning rasmiy nomi:

a) davlat tilida:

to‘liq — Yirik soliq to‘lovchilar bo‘yicha hududlararo soliq inspeksiyasi, qisqartirilgani — Yirik soliq to‘lovchilar bo‘yicha inspeksiya;

b) rus tilida:

to‘liq — Mejregionalnaya nalogovaya inspeksiya po krupnim nalogoplatelshikam, qisqartirilgani — Inspeksiya po krupnim nalogoplatelshikam;

v) ingliz tilida:

to‘liq — Interregional tax inspection for large taxpayers, qisqartirilgani — Inspection for large taxpayers.

8. Hududlararo inspeksiyaning joylashgan joyi (pochta manzili): Toshkent shahri, Abay ko‘chasi, 8-uy.

9. Hududlararo inspeksiya tomonidan qonun hujjatlarida belgilangan vakolatlari doirasida qabul qilingan qarorlar davlat va xo‘jalik boshqaruvi organlari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shuningdek, qonun hujjatlariga muvofiq ma’muriyatchiligi Hududlararo inspeksiya tomonidan amalga oshiriladigan soliq to‘lovchilar uchun bajarish majburiy hisoblanadi.

10. Quyidagilar Hududlararo inspeksiyaning asosiy vazifalari hisoblanadi:

yirik soliq to‘lovchilar hisobini tashkil etish va ulardan soliq to‘g‘risidagi qonun hujjatlarida ko‘zda tutilgan soliqlar va yig‘imlarning to‘liq tushishini ta’minlash;

yirik soliq to‘lovchilar faoliyatida soliq to‘g‘risidagi qonun hujjatlariga rioya qilinishi bo‘yicha soliq nazoratini tashkil etish;

yirik soliq to‘lovchilarga soliq majburiyatlarini bajarish bo‘yicha o‘zaro hamkorlik asosida servis-texnik xizmat ko‘rsatilishini amalga oshirish;

yirik soliq to‘lovchilar ma’muriyatchiligi doirasida soliqqa oid huquqbuzarliklarni profilaktika qilish, aniqlash va oldini olish bo‘yicha kompleks tadbirlarni amalga oshirish.

11. Hududlararo inspeksiya o‘ziga yuklangan vazifalarga muvofiq quyidagi funksiyalarni bajaradi:

a) yirik soliq to‘lovchilar hisobini tashkil etish va ulardan soliq to‘g‘risidagi qonun hujjatlarida ko‘zda tutilgan soliqlar va yig‘imlarning to‘liq tushishini ta’minlash sohasida:

qonun hujjatlarida belgilangan yirik soliq to‘lovchilar mezonlariga mos keladigan yuridik shaxslarni aniqlash va hisobga qo‘yish ishlarini yuritadi;

yuridik shaxslarga ular yirik soliq to‘lovchilar jumlasiga kiritilganligi va qonun hujjatlarida belgilangan tartibda hisobga qo‘yilganligi to‘g‘risida xabarnomalar yuboradi;

yirik soliq to‘lovchilar reyestrini shakllantiradi va yuritadi;

yirik soliq to‘lovchilar hisobotlarining qabul qilinishi va qayta ishlanishini amalga oshiradi;

yirik soliq to‘lovchilarning shaxsiy kartochkalari yuritilishini amalga oshiradi;

O‘zbekiston Respublikasi Davlat budjeti (keyingi o‘rinlarda Davlat budjeti deb ataladi) va davlat maqsadli jamg‘armalariga to‘lanishi lozim bo‘lgan va haqiqatda to‘langan soliqlar va yig‘imlar summalari, shu jumladan ular bo‘yicha imtiyozlar, shuningdek, yirik soliq to‘lovchilar bo‘yicha moliyaviy jarimalar summalari hisobini yuritadi;

Yirik soliq to‘lovchilar bo‘yicha Davlat budjeti va davlat maqsadli jamg‘armalariga soliqlar va yig‘imlar tushumi prognozining ishlab chiqilishida ishtirok etadi;

soliq to‘g‘risidagi qonun hujjatlarini va soliq ma’muriyatchiligini yanada takomillashtirish bo‘yicha takliflar tayyorlashda qatnashadi;

makroiqtisodiy ko‘rsatkichlar dinamikasining tizimli tahlili asosida soliq solinadigan bazani kengaytirish bo‘yicha samarali tadbirlarni amalga oshiradi;

b) yirik soliq to‘lovchilar faoliyatida soliq to‘g‘risidagi qonun hujjatlariga rioya qilinishi bo‘yicha soliq nazoratini tashkil etish sohasida:

kameral soliq tekshiruvi, shuningdek, yirik soliq to‘lovchi tomonidan taqdim etilgan ma’lumotlar ishonchliligini hamda soliq to‘lovchining hisobotlarida aks ettirilgan soliq va bojxona imtiyozlari qo‘llanilishining qonuniyligini tasdiqlash uchun qonunchilik hujjatlarida belgilangan tartibda joyiga chiqqan holda sayyor soliq tekshiruvlarini amalga oshiradi;

hisobotlarda ko‘rsatilgan ishchilar soni bilan haqiqatda ishlovchilar soni, shuningdek, ishlab chiqarish hajmlarining mos kelishi masalalari bo‘yicha yirik soliq to‘lovchilar faoliyati monitoringini olib boradi. Soliq to‘g‘risidagi qonun hujjatlari buzilganligi aniqlangan holatlarda qonun hujjatlarida belgilangan tartibda ularni oldini olish va bartaraf etish choralarini ko‘radi;

eksport-import operatsiyalari to‘g‘risidagi qonun hujjatlariga rioya qilinishi yuzasidan o‘z vakolatlari doirasida nazoratni amalga oshiradi;

qo‘shilgan qiymat solig‘i bo‘yicha nol darajali stavka qo‘llanilishining asosliligi yuzasidan nazoratni amalga oshiradi;

soliq nazoratini amalga oshirishda zamonaviy usullarni qo‘llaydi hamda tashqi va ichki manbalardan kelib tushadigan ma’lumotlarni tahlil qilishning ilg‘or avtomatlashtirilgan usullarini joriy etadi;

yirik soliq to‘lovchilar faoliyatining soliq tekshiruvlarini belgilangan tartibda o‘tkazadi

soliq to‘lovchilardan yoki ularning mansabdor shaxslaridan tushuntirishlar oladi, yirik soliq to‘lovchilarning mol-mulki mavjudligini tekshiradi, shuningdek, hududlarni, ishlab chiqarish, omborxona, savdo binolarini va boshqa binolarni, shu jumladan, yirik soliq to‘lovchi tomonidan daromadlar olish uchun foydalaniladigan yoxud soliq solish obyektini saqlash bilan bog‘liq joylarni ko‘zdan kechiradi yoki tekshiradi;

xo‘jalik yurituvchi subyektlar tomonidan pul mablag‘lari va moddiy boyliklarning buxgalteriya hisobini yuritishning belgilangan tartibiga rioya qilinishini, korxonalar hududiga moddiy boyliklarni olib kirish va u yerdan olib chiqishda korxonalarda ruxsat berish tizimi ishlarining tashkil etilishi holatini tekshiradi;

yirik soliq to‘lovchilarda soliq auditi o‘tkazish jarayonida soliqlar va yig‘imlarning to‘g‘ri hisoblanganligi va to‘langanligini, nazorati soliq organlari zimmasiga yuklatilgan qonunchilik hujjatlariga rioya qilinganligini soliq to‘lovchining buxgalteriya, moliya, statistika, bank hujjatlari hamda boshqa hujjatlarni, ma’lumotlarni o‘rganish va tahlil qilish yo‘li bilan tekshiradi;

soliq auditini o‘tkazish davomida xom ashyo, materiallar, yarim fabrikatlar va tayyor buyumlarni tortib ko‘radi va o‘lchaydi, ishlab chiqarilgan mahsulotning haqiqiy tannarxini va taqdim etilgan soliq hisob-kitoblarining to‘g‘riligini aniqlash uchun xom ashyo va materiallar sarfi normalari, ularning mahsulot ishlab chiqarish uchun to‘g‘ri hisobdan chiqarilishini, tayyor mahsulotning to‘liq kirim qilinishini, mahsulot chiqishi normalari hamda moddiy boyliklarni saqlash va tashishda tabiiy yo‘qotishlar normalari to‘g‘ri belgilanishini aniqlash uchun xom ashyo va materiallarni ishlab chiqarishda nazorat tariqasida ishlatib ko‘radi, xom ashyo, materiallar va tayyor mahsulotlarni nazorat tariqasida tekshiradi;

v) yirik soliq to‘lovchilarga soliq majburiyatlarini bajarish bo‘yicha o‘zaro hamkorlik asosida servis-texnik xizmat ko‘rsatilishini amalga oshirish sohasida:

soliq to‘lovchining shaxsiy kabineti, shu jumladan, Yagona interaktiv davlat xizmatlari portali orqali yirik soliq to‘lovchilarga elektron xizmatlar ko‘rsatilishini amalga oshiradi;

qonun hujjatlarida belgilangan tartibda o‘zaro tuzilgan kelishuv asosida, soliq monitoringida ishtirok etayotgan yirik soliq to‘lovchi tomonidan soliq to‘g‘risidagi qonun hujjatlariga rioya etilishi, soliqlar va yig‘imlarning to‘g‘ri hisoblanishi, to‘liq va o‘z vaqtida to‘lanishi yuzasidan soliq monitoringini amalga oshiradi;

soliq to‘g‘risidagi qonun hujjatlari normalari, shuningdek, elektron hisobvaraq-fakturalarni shakllantirishning axborot tizimlarini qo‘llash bo‘yicha yirik soliq to‘lovchilarga maslahat xizmatlari ko‘rsatadi;

qonun hujjatlarida belgilangan tartibda soliqlar va yig‘imlarning ayrim turlarini hisoblab chiqarishda yirik soliq to‘lovchilarga servis xizmatlari ko‘rsatadi;

soliq to‘lovchilar bilan ishlashda axborot-kommunikatsiya texnologiyalari keng qo‘llanilishini ta’minlaydi;

soliqlar va yig‘imlar, shuningdek, moliyaviy jarimalar bo‘yicha yirik soliq to‘lovchilarning ortiqcha to‘langan yoki ortiqcha undirilgan summalarini (nol darajali stavkani qo‘llash natijasida hosil bo‘lgan qo‘shilgan qiymat solig‘ining ortiqcha summasi bundan mustasno) qonun hujjatlarida belgilangan tartibda qaytarilishi yoki hisobga olinishini amalga oshiradi;

yirik soliq to‘lovchilarning soliq sohasidagi huquqlari va qonun bilan qo‘riqlanadigan manfaatlari himoyasini ta’minlaydi;

yirik soliq to‘lovchilar to‘g‘risidagi ma’lumotlarning qonun hujjatlariga muvofiq sir saqlanishi bo‘yicha ishlarni tashkil qiladi;

g) yirik soliq to‘lovchilarning ma’muriyatchiligi doirasida soliqqa oid huquqbuzarliklarni profilaktika qilish, aniqlash va oldini olish bo‘yicha kompleks tadbirlarni amalga oshirish sohasida:

hududiy davlat soliq xizmati organlari bilan o‘zaro hamkorlik qilish orqali yirik soliq to‘lovchilarning soliq solish bazasini, shuningdek, soliq solinadigan obyektlar va soliq solish bilan bog‘liq obyektlarning o‘z vaqtida, to‘liq va ishonchli hisobga olinishini ta’minlaydi;

soliqqa oid huquqbuzarliklar profilaktikasini amalga oshiradi, shu jumladan, ushbu huquqbuzarliklar sodir etilishi sabablarini aniqlaydi va bartaraf etadi, shuningdek, huquqbuzarliklar profilaktikasini bevosita amalga oshiradigan va ishtirok etadigan boshqa organlar va tashkilotlar bilan hamkorlik qiladi;

qonun hujjatlarida belgilangan tartibda ma’muriy huquqbuzarliklar bo‘yicha ishlarni yuritadi;

soliqqa oid huquqbuzarliklar sodir etgan yirik soliq to‘lovchilar hisobini yuritadi, ushbu ma’lumotlarni tahlil qiladi;

yirik soliq to‘lovchilarning soliq qarzini undirish bo‘yicha majburiy choralar qo‘llanilishini amalga oshiradi;

yirik soliq to‘lovchilarning majburiyatlari yuzaga kelganligi (bekor bo‘lganligi) to‘g‘risida ma’lumotlar taqdim etadigan organlar va tashkilotlar bilan o‘zaro hamkorlik qiladi;

boshqa vazirlik va idoralar bilan birgalikda yirik soliq to‘lovchilarning moliya-xo‘jalik faoliyati yuzasidan tahliliy o‘rganish o‘tkazadi va ushbu o‘rganish doirasida soliqqa oid huquqbuzarliklar bilan kurashish bo‘yicha uzoq muddatli va joriy dasturlarni ishlab chiqadi va amalga oshiradi;

yirik soliq to‘lovchilarning soliq solish masalalari va soliq to‘g‘risidagi qonun hujjatlari buzilishi to‘g‘risidagi murojaatlarini belgilangan tartibda ko‘rib chiqadi;

soliq solishga oid me’yoriy-huquqiy hujjatlarni ommaviy axborot vositalari va seminarlar, brifinglar, matbuot — konferensiyalar, “davra suhbatlari” va boshqa tadbirlarni tashkil etish orqali yirik soliq to‘lovchilarga yetkazish va tanishtirish bo‘yicha ishlarni amalga oshiradi.