O‘zbekiston Respublikasi Prezidentining “O‘zbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar to‘g‘risida” 2018-yil 13-apreldagi PQ-3666-son qarori ijrosini ta’minlash hamda davlat va xo‘jalik boshqaruvi organlarida talab yuqori bo‘lgan tor doiradagi va ixtisosli mutaxassisliklar bo‘yicha yuridik kadrlar tayyorlash tizimini yaratish, shuningdek, kasbiy yuridik ta’lim sifatini oshirish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “O‘zbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar to‘g‘risida” 2018-yil 13-apreldagi PQ-3666-son qarori bilan:

Adliya vazirligi tuzilmasida har bir hududda bittadan — 14 ta yuridik texnikum (keyingi o‘rinlarda yuridik texnikumlar deb ataladi) tashkil etilganligi;

yuridik texnikumlarning o‘quv-metodik jarayonini muvofiqlashtirish, ularga amaliy va axborot-resurs jihatidan ko‘maklashish Toshkent davlat yuridik universiteti (keyingi o‘rinlarda TDYU deb ataladi) tomonidan, ularning faoliyatiga rahbarlik qilish va nazoratni tashkil etish hamda tashkiliy-kadrlar bazasini mustahkamlash esa — hududiy adliya organlari tomonidan amalga oshirilishi ma’lumot uchun qabul qilinsin.

3. Quyidagilar yuridik texnikumlarning asosiy vazifalari etib belgilansin:

davlat va xo‘jalik boshqaruvi organlarining talab yuqori bo‘lgan tor doiradagi va ixtisosli mutaxassisliklar bo‘yicha tizimli fikrlash qobiliyati, ish yuritish, zamonaviy axborot-kommunikatsiya texnologiyalarini qo‘llashning amaliy ko‘nikmalariga ega bo‘lgan va xorijiy tillarni biladigan kasb-hunar ta’limi bo‘yicha yuridik kadrlarni tayyorlash;

ta’lim jarayonini o‘quv jarayoniga ilg‘or ta’lim standartlarini joriy etishga yo‘naltirilgan zamonaviy shakllar va usullar, innovatsion pedagogik texnologiyalar asosida tashkil etish;

o‘quv jarayoniga tegishli mutaxassislik va kasblar bo‘yicha boy ish tajribasiga ega bo‘lgan amaliyotchi mutaxassislarni keng jalb etgan holda yuridik ta’lim va huquqni qo‘llash amaliyotining o‘zaro yaqin hamkorligini ta’minlash;

zamonaviy innovatsion o‘quv loyihalarini birgalikda amalga oshirish, shuningdek, o‘quvchilar amaliyotini tashkil etish uchun tegishli hududlardagi davlat va xo‘jalik boshqaruvi organlari, sudlar va huquqni muhofaza qiluvchi organlar, boshqa tashkilotlar, ta’lim va ilmiy muassasalar bilan hamkorlikni har tomonlama rivojlantirish;

o‘quvchilar uchun mo‘ljallangan yangi avlod darsliklari, maxsus o‘quv-metodik adabiyotlar yaratishda ishtirok etish;

o‘quvchilarni ma’naviy-axloqiy tarbiyalash samaradorligini, ularning huquqiy madaniyati va huquqiy ongini oshirish, ularda vatanparvarlik, Vatan taqdiri va kelajagiga mas’ullik hamda daxldorlik tuyg‘usini shakllantirish va rivojlantirish choralarini amalga oshirish.

4. TDYUga quyidagi vazifalar yuklansin:

a) yuridik texnikumlarda o‘quv-metodik jarayonni muvofiqlashtirishning samarali mexanizmini yaratish bo‘yicha:

“yurisprudensiya” yo‘nalishi bo‘yicha zamonaviy standartlarni hisobga olgan holda o‘rta maxsus professional ta’lim mutaxassisliklari va kasblari bo‘yicha malaka talablari, o‘quv rejalari va fan dasturlarini ishlab chiqish va tasdiqlash, shuningdek, chet tillari bo‘yicha o‘quv mashg‘ulotlarini o‘tkazish uchun guruhlarda o‘quvchilar miqdorini belgilash;

yuridik texnikumlarni o‘quv-metodik jarayonni tashkil etish sohasidagi yangiliklar haqida, shu jumladan, sayyor maslahatlarni o‘tkazish orqali doimiy xabardor qilishni yo‘lga qo‘yish;

ta’lim jarayonida o‘quvchilarning mantiqiy va tizimli fikrlash, huquqiy hujjatlarni tuzish amaliy ko‘nikmalarini rivojlantirishga yo‘naltirilgan yuridik fanlarni o‘qitishning zamonaviy shakl va usullarini, pedagogik, axborot-kommunikatsiya, innovatsion texnologiyalarni qo‘llash;

o‘quvchilar bilimini noxolis baholash ehtimolini istisno qiladigan zamonaviy baholash tizimini joriy etish;

ta’lim mutaxassisliklari va kasblari doirasida o‘quvchilar amaliyotini tashkil etish va o‘tash mexanizmini takomillashtirish;

yuridik texnikumlar uchun mo‘ljallangan yangi avlod darsliklari, maxsus o‘quv-metodik adabiyotlarni yaratish bo‘yicha ishlarni tashkil etish;

b) yuridik texnikumlar o‘quvchilari bilim olishi va madaniyati darajasini oshirishning doimiy monitoringi olib borilishini nazarda tutadigan tizimni joriy etish bo‘yicha:

o‘quvchilarning klublar, to‘garaklar va sport seksiyalari shaklidagi ijtimoiy tadbirlarda ishtirok etishini tashkil etish va hisobga olish;

o‘quvchilarning yuridik texnikumlar axborot-resurs markazlaridan foydalanishini rag‘batlantirish;

yuridik texnikumlar faoliyatiga rahbarlik qilish va nazoratni tashkil etish bo‘yicha hududiy adliya organlariga doimiy asosda amaliy ko‘maklashish;

yuridik texnikumlarda o‘quv jarayonini tashkil etish, ularning faoliyati samaradorligini oshirish bo‘yicha normativ-huquqiy bazani takomillashtirish bo‘yicha O‘zbekiston Respublikasi Adliya vazirligiga takliflar kiritish.

5. TDYUga o‘quvchilarda ishga qabul qilishda talab qilinadigan bilim va ko‘nikmalarni shakllantirish uchun yuridik texnikumlarda umumiy o‘quv-metodik siyosatni ishlab chiqish bo‘yicha vakolatli organlar, ish beruvchilar va fuqarolik jamiyati institutlari vakillaridan iborat maslahat kengashini tuzish huquqi berilsin.

7. Davlat va xo‘jalik boshqaruvi organlari, mahalliy ijro etuvchi hokimiyat organlari yuridik texnikumlarga o‘quvchilarning amaliyot o‘tashini tashkil etishda har tomonlama ko‘maklashsinlar.

8. Belgilansinki, yuridik texnikumlarga xodimlarni ishga qabul qilish va davriy attestatsiyadan o‘tkazish adliya organlari va muassasalari uchun belgilangan tartibda amalga oshiriladi.

9. Yuridik texnikumlarga 2 tadan navbatchi yengil avtotransport vositasini saqlash uchun limit ajratilsin.

10. Belgilansinki:

TDYUning yuridik texnikumlar va TDYU qoshidagi akademik litseyda o‘quv-metodik jarayonini muvofiqlashtirish bo‘yicha faoliyatni tashkil etadigan tarkibiy bo‘linmasi xodimlarining shtatdagi cheklangan soni Adliya vazirligi tomonidan tasdiqlanadigan TDYU namunaviy shtatlari bilan aniqlanadi;

TDYU mazkur tarkibiy bo‘linmasi boshlig‘ining lavozim maoshi oliy ta’lim muassasasi dekanining bazaviy lavozim maoshiga, uning o‘rinbosari lavozim maoshi — oliy ta’lim muassasasi dekani o‘rinbosari bazaviy lavozim maoshiga tenglashtiriladi;

avtotransport vositalarini sotib olish va saqlash bilan bog‘liq xarajatlar yuridik texnikumlarning budjetdan tashqari mablag‘lari, budjetdan tashqari Adliya organlari va muassasalarini rivojlantirish jamg‘armasi mablag‘lari hamda adliya organlari va muassasalarining budjetdan tashqari boshqa mablag‘lari hisobiga amalga oshiriladi;

Yuridik texnikumlar va TDYU huzuridagi akademik litsey o‘quv-metodik jarayonini muvofiqlashtirish bo‘yicha faoliyatni tashkil etadigan TDYU tarkibiy bo‘linmasi shtat birliklarining soni ko‘paytirilishi bilan hamda mazkur tarkibiy bo‘linma boshlig‘ining lavozim maoshi oliy ta’lim muassasasi dekanining bazaviy lavozim maoshiga, uning o‘rinbosari lavozim maoshi — oliy ta’lim muassasasi dekani o‘rinbosari bazaviy lavozim maoshiga tenglashtirish bilan bog‘liq xarajatlar TDYU budjetdan tashqari mablag‘lari hisobiga amalga oshiriladi.

11. O‘zbekiston Respublikasi Iqtisodiyot va moliya vazirligi O‘zbekiston Respublikasi Davlat budjeti parametrlarida yuridik texnikumlarda kam ta’minlangan oilalar a’zolari bo‘lgan o‘quvchilar, Mehribonlik uyi, Bolalar shaharchasi va Oilaviy bolalar uyining bitiruvchilari, I guruh nogironligi bo‘lgan shaxslar hamda nogironligi bo‘lgan bolalar ta’lim olishi bilan bog‘liq xarajatlar uchun zarur mablag‘larni nazarda tutsin.

12. O‘zbekiston Respublikasi Adliya vazirligiga ta’lim xizmatlari sifatini oshirish maqsadida yuridik texnikumlaring boshqaruv, pedagog, o‘quv-yordamchi, texnik va xizmat ko‘rsatuvchi xodimlariga ustama haqlari va moddiy rag‘batlantirishning boshqa turlari miqdorlarini yuridik texnikumlarning to‘lov-kontraktdan kelib tushgan mablag‘lari (shu jumladan, tabaqalashtirilgan kontrakt) hisobidan hamda Adliya organlari va muassasalarini rivojlantirish jamg‘armasi mablag‘lari, adliya organlari va muassasalarining budjetdan tashqari boshqa mablag‘lari hisobidan mustaqil belgilash huquqi berilsin.

Yuridik texnikumlar xodimlariga har oylik ustamalarni belgilash mezonlari O‘zbekiston Respublikasi Adliya vazirligi tomonidan o‘rnatiladi.

13. Belgilansinki, 2019/2020 o‘quv yilidan boshlab O‘zbekiston Respublikasi Adliya vazirligi tuzilmasiga kirmagan kollejlarda va texnikumlarda “Yurisprudensiya”, “Huquqshunoslik”, “Ijtimoiy muhofaza qilish huquqshunosi” yo‘nalishlari va mutaxassisliklari bo‘yicha o‘quvchilarni tayyorlash to‘xtatiladi.

Belgilab qo‘yilsinki, ushbu yo‘nalishlar va mutaxassisliklar bo‘yicha 2-3-bosqich o‘quvchilari o‘qishni yuqorida ko‘rsatilgan ta’lim muassasalarida tamomlaydi va diplom oladi.

14. O‘zbekiston Respublikasi Adliya vazirligi manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

15. O‘zbekiston Respublikasi Hukumatining 4-ilovaga muvofiq ayrim qarorlariga qo‘shimchalar kiritilsin.

16. Mazkur qarorning bajarilishini nazorat qilish O‘zbekiston Respublikasi adliya vaziri R. Davletov zimmasiga yuklansin.

1. Vazirlar Mahkamasining “Umumiy o‘rta va o‘rta maxsus, kasb-hunar ta’limining davlat ta’lim standartlarini tasdiqlash to‘g‘risida” 2017-yil 6-apreldagi 187-son qarorida (O‘zbekiston Respublikasi QHT, 2017-y., 14-son, 230-modda):

a) 2-ilovada:

4-bobning 1-paragrafiga quyidagi mazmundagi 16¹-band qo‘shilsin:

“16¹. Ushbu paragraf qoidalari O‘zbekiston Respublikasi Adliya vazirligining yuridik kollejlariga nisbatan tatbiq etilmaydi”;

18-bandga quyidagi mazmundagi xatboshi qo‘shilsin:

“O‘zbekiston Respublikasi Adliya vazirligi yuridik kollejlarining malaka talablari Toshkent davlat yuridik universiteti tomonidan ishlab chiqiladi va tasdiqlanadi”;

b) 3-ilovaning 3-bandiga quyidagi mazmundagi xatboshi qo‘shilsin:

“O‘zbekiston Respublikasi Adliya vazirligi yuridik kollejlarining o‘quv dasturlari, davlat attestatsiyasi uchun umumta’lim fanlari bo‘yicha nazorat-baholash ko‘rsatkichlari Toshkent davlat yuridik universiteti tomonidan ishlab chiqiladi va tasdiqlanadi”.

2. Vazirlar Mahkamasining 2009-yil 11-fevraldagi 40-son qarori (O‘zbekiston Respublikasi QT, 2009-y., 2-son, 11-modda) bilan tasdiqlangan Kasb-hunar kollejlari o‘quvchilari tomonidan korxonalar, muassasalar va tashkilotlarda ishlab chiqarish amaliyotini o‘tash tartibi to‘g‘risidagi nizomning 1-bandiga quyidagi mazmundagi xatboshi qo‘shilsin:

“Ushbu Nizom O‘zbekiston Respublikasi Adliya vazirligining yuridik kollejlari o‘quvchilariga tatbiq etilmaydi”.