Mazkur Tartib O‘zbekiston Respublikasining 1995-yil 22-dekabrdagi “Muddatida to‘lanmagan soliq va boshqa majburiy to‘lovlarni undirish to‘g‘risida”gi, “Davlat soliq xizmati to‘g‘risida”gi va O‘zbekiston Respublikasi “Banklar va bank faoliyati to‘g‘risida”gi Qonunlari, O‘zbekiston Respublikasi Prezidentining 1998-yil 4-fevraldagi “Hisob-kitob mexanizmini takomillashtirish hamda respublika budjeti va mahalliy budjetlarga to‘lovlar tushishini rag‘batlantirish chora-tadbirlari to‘g‘risida”gi Farmoni, O‘zbekiston Respublikasining Soliq kodeksi, O‘zbekiston Respublikasi Fuqarolik kodeksi va boshqa me’yoriy hujjatlari asosida ishlab chiqilgan bo‘lib, O‘zbekiston Respublikasi hududida joylashgan xo‘jalik yurituvchi subyektlarning debitor va kreditor qarzlarini kamaytirish hamda budjet oldidagi boqimandalarini undirish tartibini belgilaydi.

1. Yuridik shaxslar, O‘zbekiston Respublikasi Soliq kodeksida belgilangan muddatda soliq va majburiy to‘lovlarni davlat budjetiga o‘tkazmasa, O‘zbekiston Respublikasining 1995-yil 22-dekabrdagi “Muddatida to‘lanmagan soliq va boshqa majburiy to‘lovlarni undirish to‘g‘risida”gi Qonunining 8-moddasi 1-bandiga asosan so‘zsiz ravishda inkasso topshiriqnomasini soliq to‘lovchining bankdagi hisobraqamiga qarzlarni undirish uchun qo‘yiladi.

2. O‘zbekiston Respublikasi Adliya vazirligidan 1999-yil 30-yanvarda 615-son bilan davlat ro‘yxatidan o‘tgan “Xo‘jalik yurituvchi subyektlarning banklardagi hisobvaraqlaridan pul mablag‘larining to‘lash tartibi to‘g‘risida”gi Yo‘riqnomasiga asosan xo‘jalik yurituvchi subyektlarning milliy valyutadagi mablag‘lari birinchi navbatdagi to‘lovlar bo‘yicha qilingan talablarni qoplash uchun yetarli bo‘lmasa, u holda xizmat ko‘rsatuvchi bank tomonidan soliq xizmati organlarining yozma ravishdagi ko‘rsatmasiga asosan xo‘jalik yurituvchi subyektning qo‘yilgan talablarni qondirish uchun kerakli bo‘lgan ularning hisobvaraqlaridagi chet el valyutasini Respublika valyuta birjasiga sotish uchun qo‘yiladi.

3. Soliq to‘lovchining hisobraqamida va valyuta hisobvarag‘ida mablag‘ bo‘lmaganda inkasso topshiriqnomasi O‘zbekiston Respublikasi Adliya vazirligidan 1998-yil 8-oktabrda 496-son bilan davlat ro‘yxatidan o‘tkazilgan “O‘zbekiston Respublikasida naqd pulsiz hisob-kitoblar to‘g‘risida”gi Nizomga asosan, 2-kartotekada to‘lovni kutayotgan hujjatlar qatoriga joylashtiriladi.

4. Soliq to‘lovchilarning banklardagi barcha hisobvaraqlarida mablag‘i bo‘lmasa, u holda soliq to‘lovchilar joylardagi Davlat soliq xizmati organlariga “Davlat soliq xizmati to‘g‘risida”gi Qonunning 5 va 6-moddasiga asosan oyiga bir marta keyingi oyning 10 sanasidan kechiktirmasdan kreditor va debitor qarzi to‘g‘risidagi ma’lumotnomani 1-ilovaga muvofiq taqdim etadilar.

5. Bundan tashqari budjet oldida boqimandasi bor korxonalar debitor qarzdor korxonalar bilan solishtirma dalolatnomani tuzadi va debitor qarzlari ro‘yxati bilan birgalikda oyiga bir marta keyingi oyning 10 sanasiga o‘zi ro‘yxatdan o‘tgan davlat soliq xizmati organiga topshiradilar.

6. Joylardagi tijorat banklari Davlat soliq organlarining so‘rovnomasiga asosan so‘ralgan xo‘jalik yurituvchi subyektlarning budjet oldidagi boqimandasini, debitor va kreditor qarzlarni kamaytirish maqsadida, O‘zbekiston Respublikasi Fuqarolik kodeksining 786-moddasi, “Davlat soliq xizmati to‘g‘risida”gi va O‘zbekiston Respublikasi “Banklar va bank faoliyati to‘g‘risida”gi Qonunlari va O‘zbekiston Respublikasi Vazirlar Mahkamasining 1999-yil 30-martdagi 146-son qaroriga asosan ularning barcha hisobvaraqlarida pul mablag‘lari qoldig‘i bo‘yicha ma’lumotni DBF faylda yoki ruxsat berilgan tartibda, keyinchalik elektron pochta orqali kunlik ma’lumot beradi.

7. Joylardagi soliq organlari banklardan olgan ma’lumotlarni o‘z hududiga joylashgan xo‘jalik yurituvchi subyektlarga tegishli bo‘lganini tahlil qilish bilan birga o‘sha kuni umumlashtirish uchun viloyat Davlat soliq boshqarmasiga elektron pochta orqali beradilar.

8. Viloyat Davlat soliq boshqarmasi o‘z navbatida olgan ma’lumotni viloyat bo‘yicha umumlashtirib, 3 kun ichida o‘z hududidagi DSIlariga va viloyat hududidan tashqaridagi korxonalarga qarashli ma’lumotlarni boshqa viloyatlarga O‘zbekiston Respublikasining 1995-yil 22-dekabrdagi “Muddatida to‘lanmagan soliq va boshqa majburiy to‘lovlarni undirish to‘g‘risida” Qonunining 8-moddasi ijrosini ta’minlash uchun elektron pochta orqali yuboradi.

9. O‘zbekiston Respublikasi budjeti daromadlari prognoz ko‘rsatkichlarini o‘z vaqtida bajarilishini ta’minlash uchun, ushbu ma’lumotlarni joylardagi soliq xizmati organlari tahlil qiladi va mablag‘lari mavjud debitor xo‘jalik yurituvchi subyektlarning hisobvarag‘iga budjet oldida boqimandasi bor korxona nomidan o‘z vaqtida inkasso topshiriqnomalarini qo‘yadi.

10. Budjet oldida boqimandasi bor korxonalarning debitor qarzi uchun solishtirma dalolatnomasi asosida qo‘yilgan inkasso topshiriqnomasi O‘zbekiston Respublikasi Prezidentining 1998-yil 4-fevraldagi “Hisob-kitoblar mexanizmini takomillashtirish hamda respublika budjeti va mahalliy budjetlarga to‘lovlar tushishini rag‘batlantirish chora-tadbirlari to‘g‘risida”gi Farmoni asosida ishlab chiqilib, O‘zbekiston Respublikasi Adliya vazirligidan 1999-yil 30-yanvarda 615-son bilan davlat ro‘yxatidan o‘tkazilgan “Xo‘jalik yurituvchi subyektlarning banklardagi hisobvaraqlaridan pul mablag‘larini o‘chirish tartibi to‘g‘risida”gi Yo‘riqnomaga asosan ijro etiladi.

11. O‘zbekiston Respublikasi Vazirlar Mahkamasining 1996-yil 8-noyabrdagi 387-son qarori bilan tasdiqlangan Nizomga asosan soliqlar va budjetga majburiy to‘lovlar bo‘yicha muddatida to‘lanmagan soliqlarni korxonalar va tashkilotlar mol-mulklari hisobidan undirib olinadi.

12. Qarzdor korxonaning budjetdan qarzini bir oy muddatda to‘lamasa, mulki hisobidan undirish uchun xo‘jalik sudiga murojaat qilishi haqida ogohlantiradi.

13. Qarzdor korxonaga ogohlantirish talabnomasi berilganidan keyin bir oy muddat o‘tgach, korxona qarzini qisman to‘lagan yoki to‘lamagan holda uning qarzini mol-mulki hisobidan undirish uchun xo‘jalik sudiga da’vo arizasi beriladi.

14. Xo‘jalik sudiga da’vo ariza berishda so‘nggi hisobot davri uchun korxona balans nusxasi, budjetdan bo‘lgan qarzlarini tasdiqlovchi solishtiruv dalolatnomalari, qarzdorning hisob-kitob, joriy, valyuta hisobraqamlarida mablag‘i yo‘qligi haqida bank ma’lumotnomasi, shaxsiy hisobraqamlardan ko‘chirmalar taqdim etiladi.

15. Tijorat banklari, xo‘jalik yurituvchi subyektlar va Davlat soliq xizmati organlarining mas’ul xodimlari ushbu tartibni to‘g‘ri va o‘z vaqtida bajarilishi bo‘yicha O‘zbekiston Respublikasida amal qilayotgan qonunlarda belgilangan tartibda javobgardir.