Республикада яшил иқтисодиёт тамойилларини жорий этиш, шунингдек, иссиқхоналарни табиий-иқлим шароитига қулай бўлган ҳудудларда агропарк усулида ривожлантириш орқали энергия ресурсларини тежаш мақсадида қарор қиламан:

1. Қуйидагилар 2026 — 2027 йилларда республикада иссиқхоналар фаолиятини ривожлантиришнинг асосий мақсадли кўрсаткичлари этиб белгилансин:

(а) Сурхондарё вилояти Шеробод туманида камида 940 гектар майдонда замонавий иссиқхона мажмуаларини жойлаштириш;

(б) энергия тежамкор ва муқобил энергия манбаларига асосланган иситиш тизимлари улушини камида 50 фоизга етказиш;

(в) атмосфера ҳавосига зарарли ташламалар ташлаётган тадбиркорлик субъектлари фаолиятини босқичма-босқич камайтириш.

2. Қишлоқ хўжалиги вазирлиги, Экология ва иқлим ўзгариши миллий қўмитаси (кейинги ўринларда — Экология қўмитаси) ҳамда Сурхондарё вилояти ҳокимлигининг Сурхондарё вилояти табиий-иқлим шароитларидан унумли фойдаланиш мақсадида:

(а) мазкур қарорга иловага мувофиқ Сурхондарё вилояти Шеробод туманида «Сурхон-Агро» эркин иқтисодий зонасини (кейинги ўринларда — «Сурхон-Агро» зонаси) ташкил этиш;

(б) «Сурхон-Агро» зонасини ривожлантириш ва бошқариш учун давлат муассасаси шаклида «Сурхон-Агро» эркин иқтисодий зонаси дирекцияси (кейинги ўринларда — Дирекция) фаолиятини йўлга қўйиш тўғрисидаги таклифларига розилик берилсин.

3. Белгилансинки:

(а) «Сурхон-Агро» зонасининг фаолият кўрсатиш муддати кейинчалик узайтириш имконияти билан 30 йилни ташкил этади;

(б) «Сурхон-Агро» зонасининг фаолият кўрсатиш муддати мобайнида унинг иштирокчиларига эркин иқтисодий зоналар иштирокчилари учун белгиланган алоҳида солиқ, божхона имтиёзлари ва бошқа преференциялар татбиқ этилади.

(в) «Сурхон-Агро» зонасининг ҳудудига киритилган ер участкалари Сурхондарё вилояти ҳокимининг қарорига асосан Дирекцияга доимий фойдаланиш ҳуқуқи билан ажратиб берилади. Бунда ер фонди тоифаси ўзгартириладиган ер участкалари, белгиланган тартибда ер фонди тоифаси ўзгартирилгандан сўнг ажратилади;

(г) «Сурхон-Агро» зонаси ҳудудининг мастер режаси (кейинги ўринларда — мастер режа) Дирекция буюртмачилигида ишлаб чиқилади;

(д) мастер режага асосан:

(i) умумий фойдаланишдаги ер участкалари Дирекциянинг доимий фойдаланишида қолади;

(ii) иссиқхоналар жойлаштирилиши назарда тутилган ер участкалари аукцион савдоларига чиқарилишидан олдин туман ҳокимлиги тасарруфига қайтарилади ва «Ўздаверлойиҳа» давлат илмий лойиҳалаш институти томонидан Ўзбекистон Республикаси Президентининг 2026 йил 24 апрелдаги ПФ-68-сон Фармонининг 2-бандига мувофиқ электрон онлайн аукцион савдоларига чиқарилади, ушбу ерларда тасдиқланган мастер режада назарда тутилган иссиқхоналарни капитал иншоотлар ёки енгил турдаги қурилмалар (конструкциялар) шаклида қуришга (жойлаштиришга) ва ушбу иссиқхона мажмуаларидан ер участкасининг ижара ҳуқуқи билан бирга гаров таъминоти сифатида фойдаланишга рухсат берилади;

(ж) Кадастр агентлиги ва Қишлоқ хўжалиги вазирлигига мастер режага асосан «Сурхон-Агро» зонаси ҳудудига киритилган ерларнинг контурлари сони, контур чегараси ва ер турига суғориладиган ерларнинг умумий ҳажмини сақлаб қолган ҳолда ўзгартириш киритиш ва ушбу ўзгартиришларни Ер ресурсларининг ҳолати бўйича миллий ҳисоботга киритиш ҳуқуқи берилади;

(з) ҳар бир лот бўйича электрон онлайн аукцион савдолари дастлаб Вазирлар Маҳкамасининг қарорида белгиланган тартибда Тошкент шаҳри ва Тошкент вилояти ҳудудларидаги иссиқхона хўжаликлари эгалари иштирок этадиган танлов асосидаги аукцион шаклида ўтказилади, ушбу савдоларда ўн беш кун ичида ғолиб аниқланмаган тақдирда, лотлар барча иштирок этадиган очиқ электрон онлайн аукцион савдоларига ўтказилади;

(и) электрон онлайн аукцион ғолиби Дирекция билан тўғридан-тўғри инвестиция битими тузиш ҳуқуқига эга бўлади, инвестиция битими тузилган пайтдан бошлаб ушбу битимнинг амал қилиш муддатига қадар «Сурхон-Агро» зонаси иштирокчиси мақомига эга бўлади, инвестиция битимида Дирекция билан умумий фойдаланишдаги ҳудудлар ва объектларни сақлаш учун қиймати халқ депутатлари Сурхондарё вилояти Кенгаши қарори билан белгиланадиган миқдордаги йиғимни Дирекцияга тўлаш мажбурияти назарда тутилади, ушбу шартлар электрон онлайн аукцион натижалари бўйича тузиладиган ер ижараси шартномасида кўрсатилади;

(к) «Сурхон-Агро» зонаси иштирокчиларига иссиқхоналарни саноатлаштирилган плантациялар шаклида ташкил этишда Ўзбекистон Республикаси Президентининг 2026 йил 24 апрелдаги ПФ-68-сон Фармонида белгиланган саноатлашган плантацияларни қўллаб-қувватлаш чоралари тўлиқ татбиқ этилади.

4. Қуйидагилар Дирекция фаолиятининг устувор йўналиши ва асосий вазифалари этиб белгилансин:

(а) иссиқхоналарда замонавий, энергия тежамкор ва рақамли агротехнологияларни жорий этиш, автоматлаштирилган бошқарув тизимлари, томчилатиб суғориш ва қайта тикланувчи энергия манбаларидан фойдаланишни кенгайтириш;

(б) тўғридан-тўғри хорижий инвестицияларни жалб қилиш, давлат-хусусий шериклик асосида кластер ва кооперация моделини ривожлантириш ҳамда молиявий қўллаб-қувватлаш механизмларини такомиллаштириш бўйича таклифлар киритиш;

(в) иссиқхона хўжаликларига «ягона дарча» тамойили асосида муҳандислик тармоқларига уланиш, экспорт ҳужжатларини расмийлаштириш ҳамда давлат субсидияларини олиш жараёнларини тўлиқ амалга ошириш;

(г) талабгор тадбиркорлар томонидан маҳсулотларни саралаш, қадоқлаш ва совитиш омборларини ўз ичига олган замонавий агрологистика марказини ташкил этиш лойиҳалари амалга оширилишига кўмаклашиш.

5. Белгилансинки, Қишлоқ хўжалиги вазирлиги Дирекция фаолиятини мувофиқлаштириш бўйича масъул орган ҳисобланади.

6. Дирекция фаолиятини ташкил этиш учун зарур бўлган иш ҳақи ва унга тенглаштирилган тўловлар, асбоб-ускуналар, махсус техника ва автотранспорт воситалари билан таъминлаш ҳамда биносини жиҳозлаш, мастер режа ишлаб чиқиш мақсадида Вазирлар Маҳкамасининг захира жамғармаси ва Умуммиллий экологик муаммоларни бартараф этиш давлат мақсадли жамғармасидан 5 миллиард сўмдан маблағлар ажратилсин. Бунда Дирекциянинг ташкилий тузилмаси, ходимларнинг чекланган сони ва низоми Сурхондарё вилояти ҳокими томонидан тасдиқланади.

7. Дирекция иссиқхоналарда ўрнатилган иситиш тизимларининг экологик нормаларга мослигини доимий мониторинг қилиш ҳамда носоз иситиш ускуналаридан фойдаланишни чеклаш бўйича Экология қўмитасига таклифлар киритиб борилишини таъминласин.

8. Белгилансинки, Дирекция доимий тарзда ўзини ўзи молиялаштириш тамойили асосида ташкил этилади ва унинг даромадлари қуйидаги манбалар ҳисобидан шакллантирилади:

(а) иссиқхона хўжаликларига кўрсатиладиган агротехник, етиштирилган маҳсулотларни бозорларга етказиш (саралаш, қадоқлаш, совитиш омборларида сақлаш) ва консалтинг хизматлари учун тўловлар;

(б) етиштирилган маҳсулотни ички ва ташқи бозорларда сотишдан олинадиган воситачилик (дистрибьюторлик) ажратмалари;

(в) Дирекция балансидаги бино ва иншоотларни ҳамда ер майдонларини ижарага бериш ва муҳандислик-коммуникация тармоқларини бошқаришдан тушадиган тушумлар;

(г) халқаро молия институтлари ва хорижий донор ташкилотларнинг грантлари ҳамда техник кўмак маблағлари;

(д) Дирекциянинг вақтинча бўш турган маблағларини тижорат банклари депозитларига жойлаштиришдан олинган фоизлар;

(ж) 2027 йилдан бошлаб Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури доирасида ажратиладиган маблағлар;

(з) қонунчилик билан тақиқланмаган бошқа манбалар.

9. Сурхондарё вилояти ҳокимлиги Вазирлар Маҳкамаси ҳузуридаги Агросаноат мажмуи устидан назорат қилиш инспекцияси, Урбанизация ва уй-жой бозорини барқарор ривожлантириш миллий қўмитаси ҳузуридаги Кадастр агентлиги билан биргаликда:

(а) икки ой муддатда мазкур қарорга иловада назарда тутилган ҳудудда жойлашган қишлоқ хўжалигига мўлжалланган суғориладиган ерлар тоифасига кирувчи жами 940 гектар ер майдонини хатловдан ўтказсин;

(б) уч ой муддатда «Сурхон-Агро» зонаси таркибига киритиладиган ерларнинг чегаралари аниқ белгиланишини ва белгиланган тартибда ажратилишини таъминласин.

10. Сурхондарё вилояти ҳокимлиги бир ой муддатда Сурхондарё вилояти эркин иқтисодий зоналар ва кичик саноат зоналари маъмурий кенгаши билан биргаликда Дирекция фаолиятини ташкил этиш чораларини кўрсин.

11. Сурхондарё вилояти ҳокимлиги, Қишлоқ хўжалиги вазирлиги 2026 йил 1 апрелдан бошлаб «Сурхон-Агро» зонаси ҳудудидаги ер майдонларини текислаш ва тизимли равишда агротехник ишлов бериш ҳамда ирригация тармоқларини созлаш чораларини кўрсин.

12. Белгилансинки, «Сурхон-Агро» зонаси ҳудудида фаолият олиб борадиган иссиқхона хўжаликларига қуйидаги имтиёз ва преференциялар берилади:

(а) ер участкалари тадбиркорларга электрон онлайн аукцион орқали ижарага берилганда 5 йил давомида ижара тўловининг ноль ставкаси қўлланади;

(б) иссиқхоналарни суғориш ва технологик жараёнлар учун ишлатиладиган оқова ва ерости сувлари учун тўловлардан 3 йил муддатга озод этилади;

(в) аномал совуқ об-ҳаво шароитлари даврида (Гидрометеорология хизмати агентлигининг ҳаво ҳарорати кескин пасайиши тўғрисидаги маълумотлари асосида), истисно тариқасида, белгиланган экологик талабларга риоя қилган ҳолда кўмир ёқишга рухсат этилади.

13. Сурхондарё вилояти ҳокимлиги уч ой муддатда белгиланган тартибда захирага қайтарилган ер участкалари доимий фойдаланиш ҳуқуқи билан Дирекцияга ажратилишини таъминласин.

14. Белгилансинки:

(а) 2026 йил 1 июндан бошлаб 2028 йил 1 июнга қадар ишлаб чиқарилган маҳсулотни «Сурхон-Агро» зонаси иштирокчилари ўртасида кооперация асосида кафолатли сотиш ҳамда муҳандислик инфратузилмасига уланиш тўловларсиз амалга оширилади;

(б) Тошкент шаҳри ва Тошкент вилоятидаги тадбиркорлик субъектларига ижара ҳуқуқи асосида тегишли бўлган ер участкалари ихтиёрий равишда туман ҳокимлигининг тасарруфидаги бўш турган ер участкаси сифатида ҳисобга олинганда ушбу ер участкалари Ўзбекистон Республикаси Президентининг 2025 йил 3 февралдаги «Қишлоқ хўжалиги экин майдонлари унумдорлигини ошириш, тармоққа инвестициялар жалб қилиш учун қулай шарт-шароит яратиш бўйича навбатдаги чора-тадбирлар тўғрисида»ги ПФ-18-сон Фармонига асосан белгиланган тартибда электрон онлайн аукцион савдоларига чиқарилади.

15. Иқтисодиёт ва молия вазирлиги уч ой муддатда 2027 йил 1 январдан бошлаб «Сурхон-Агро» зонаси ҳудудида етиштирилган қишлоқ хўжалиги маҳсулотларини дастлабки уч йил давомида Сурхондарё вилоятидан республиканинг бошқа ҳудудларига автомобиль ва темир йўл транспорти орқали ташиш ҳамда кейинги уч йил муддатда эса, белгиланган тарифларга 50 фоиз миқдорида чегирма қўллаш бўйича асослантирилган таклифларни Вазирлар Маҳкамасига киритсин.

16. Сурхондарё вилояти ҳокимлиги «Ҳудудий электр тармоқлари» АЖ, «Ўзсувтаъминот» АЖ ҳамда Тоғ-кон саноати ва геология вазирлиги билан биргаликда икки ой муддатда:

(а) мазкур қарорнинг иловаси билан тасдиқланган ҳудуд доирасида жойлаштириладиган объектларни ташқи муҳандислик-коммуникация тармоқларига улаш учун техник шартлар (рухсатномалар)ни қонунчиликда белгиланган тартибда қисқа муддатларда бериш;

(б) муҳандислик-коммуникация тармоқларига уланиш имкони мавжуд бўлмаган иссиқхоналар учун Ўзбекистон Республикасининг Давлат бюджети маблағлари ҳисобидан «Сурхон-Агро» зонаси ҳудудига ташқи муҳандислик-коммуникация инфратузилмасини ўтказиш бўйича тезкор чораларни кўрсин.

17. Сурхондарё вилояти ҳокимлиги Тоғ-кон саноати ва геология вазирлиги, Сув хўжалиги вазирлиги, «Ўзсувтаъминот» АЖ билан биргаликда уч ой муддатда:

(а) Дирекция тасарруфига ажратиладиган 940 гектар ҳудудни сув билан таъминлаш учун мақбул ерусти сув манбасини танлаб олиш орқали қонунчиликда белгиланган тартибда сув олиш ҳуқуқини берувчи техник шартлар (рухсатномалар) расмийлаштирилишини;

(б) ҳудудда сув олиш иншоотларини (қудуқларни) бурғилаш учун махсус рухсатномалар соддалаштирилган тартибда 5 иш куни муддатида расмийлаштирилиши таъминлансин.

18. Сурхондарё вилояти ҳокимлиги, Қишлоқ хўжалиги вазирлиги бир ой муддатда мастер режага асосан агрологистика маркази, ишчилар учун турар жой объектлари ҳамда умумий фойдаланишдаги инфратузилма объектларини барпо этиш учун зарур ер участкаларининг ер фонди тоифасини ўзгартириш бўйича таклифларни Қишлоқ хўжалигига мўлжалланган ва ўрмон фонди ерларининг ер фонди тоифаларини ўзгартириш масалаларини кўриб чиқиш бўйича Ҳукумат комиссиясига белгиланган тартибда киритсин. Бунда ушбу ер участкалари учун қишлоқ хўжалиги ва ўрмон хўжалиги ишлаб чиқариши нобудгарчиликларининг ўрнини қоплаш бўйича тўловларни ўн йил давомида тенг улушларда бўлиб тўлашга рухсат берилади.

19. «Ҳудудий электр тармоқлари» АЖ, «Ҳудудгазтаъминот» АЖ уч ой муддатда «Сурхон-Агро» зонасини энергия ресурслари билан узлуксиз таъминлаш, шунингдек, уни муҳандислик-коммуникация тармоқларига улаш ва фойдаланишга топшириш чораларини кўрсин. Бунда «Сурхон-Агро» зонасини электр энергияси ва табиий газ билан таъминловчи тармоқларни қуриш учун талаб этиладиган маблағлар Ўзбекистон Республикасининг республика бюджетидан ажратилади.

20. Сурхондарё вилояти ҳокимлиги Транспорт вазирлиги, Автомобиль йўллари қўмитаси ҳамда «Ўзбекистон темир йўллари» АЖ билан биргаликда 2026 йил 1 августга қадар «Сурхон-Агро» зонасини асосий транспорт магистраллари билан боғловчи автомобиль йўлларини қуриш ва мавжуд йўлларни реконструкция қилиш чораларини кўрсин.

21. Божхона қўмитаси Ўсимликлар карантини ва ҳимояси агентлиги билан биргаликда «Сурхон-Агро» зонасида экспорт операцияларини жадаллаштириш мақсадида 2026 йил якунига қадар «яшил йўлак» тамойили асосида фаолият юритувчи фитосанитария марказини ташкил этсин.

22. Қишлоқ хўжалиги вазирлиги Ташқи ишлар вазирлиги, Савдо-саноат палатаси, Қорақалпоғистон Республикаси Вазирлар Кенгаши, вилоятлар ҳокимликлари билан биргаликда:

(а) икки ой муддатда Нидерландиянинг «World Horti Center» инновация ва билим маркази билан ҳамкорлик ўрнатиш мақсадида марказ вакиллари билан учрашувларни ташкил этсин ва ҳамкорлик алоқаларини йўлга қўйсин ҳамда Дирекция ҳудудига кўчирилаётган тадбиркорлар учун иссиқхона хўжалиги юритишнинг илғор стандартлари бўйича махсус ўқув дастурини Ўзбекистонда жорий этсин;

(б) жорий йил якунига қадар Нидерландиянинг «World Horti Center» инновация ва билим марказига камида маҳаллий 20 нафар ҳамда Дирекциянинг 10 нафар мутахассис ва агрономларини олиб бориб, иссиқхона хўжалиги соҳасидаги илғор инновация ва тажрибаларни ўргатишни ташкил этсин. Бунда мазкур тадбирлар билан боғлиқ харажатлар «Ўзсаноатқурилишбанк» АТБ маблағлари ҳисобидан қопланади.

23. Ўзбекистон Миллий телерадиокомпанияси, Ўзбекистон Миллий ахборот агентлиги, Оммавий ахборот воситалари учун контент тайёрлаш маркази оммавий ахборот воситалари билан биргаликда тизимли равишда «Сурхон-Агро» зонасида иссиқхона хўжаликлари учун берилаётган имтиёзлар ва шарт-шароитларни кенг ёритиб борсин.

24. Қишлоқ хўжалиги вазирлиги манфаатдор вазирлик ва идоралар билан биргаликда икки ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

25. Мазкур қарорнинг ижросини самарали ташкил қилишга масъул ва шахсан жавобгар этиб Бош вазири ўринбосар Ж.А. Ходжаев, қишлоқ хўжалиги вазири И.Ю. Абдураҳмонов ҳамда Тошкент шаҳар ҳокими Ш.Б. Умурзаков, Тошкент вилояти ҳокими З.Т. Мирзаев ва Сурхондарё вилояти ҳокими У.Б. Қосимов белгилансин.

26. Қарор ижросини таъминлаш юзасидан назорат ўрнатиш ҳамда ижро учун масъул идоралар фаолиятини мувофиқлаштириш Ўзбекистон Республикаси Бош вазири А.Н. Арипов зиммасига юклансин.