Oʻzbekiston Respublikasining “Aholi bandligi toʻgʻrisida”gi Qonuni hamda “Nogironligi boʻlgan shaxslarning huquqlari toʻgʻrisida”gi Qonuni 43-moddasi, Oʻzbekiston Oʻzbekiston Respublikasi Vazirlar Mahkamasining 2017-yil 5-dekabrdagi 965-son qarori bilan tasdiqlangan Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zaxiraga qoʻyish tartibini yanada takomillashtirish chora-tadbirlari toʻgʻrisidagi nizomi, Oʻzbekiston Respublikasi Bandlik va mehnat munosabatlari vazirining 2019-yil 10-maydagi 19-2019-B-son (Adliya vazirligi tomonidan 2019-yil 31-mayda roʻyxatdan oʻtkazilgan, roʻyxat raqami 3163) buyrugʻi, shuningdek, Oʻzbekiston Respublikasi Prezidentining “Mehnat munosabatlari va kasbga tayyorlash tizimini takomillashtirish hamda ish beruvchilarni ragʻbatlantirishga oid qoʻshimcha chora-tadbirlar toʻgʻrisida” 2025-yil 4-avgustdagi PF-126-son Farmoniga muvofiq Yunusobod tumanida istiqomat qiluvchi ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun 2026-yilga moʻljallangan band qilinishi kerak boʻlgan ish oʻrinlari sonini va ularga qoʻyiladigan talablarini belgilash boʻyicha tuman maxsus komissiyasining 2025-yil 30-oktabrdagi № 1-sonli bayoni hamda Yunusobod tumani Kambagʻallikni qisqartirish va bandlikka koʻmaklashish boʻlimining 2025-yil 28-oktabrdagi 25/10-01/10/3068-sonli xatinini inobatga olib, qaror qilaman:

1. Yunusobod tumanida ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun tumandagi 257 ta korxona va tashkilotlarda aholining quyidagi toifalari uchun jami 861 ta ish oʻrinlari band qilib qoʻyilsin:

nogironligi boʻlgan shaxslar uchun – 26,01 % (224 kishi);

oilaviy (maishiy) zoʻravonlikdan jabrlangan shaxslar uchun – 4,76% (41 kishi);

kambagʻal oilalar reyestridagi oilalarning aʼzolari uchun – 57,03% (491 kishi);

muqobil joylashtirish shakllarida tarbiyalangan yetim shaxslar, ota-ona qaramogʻidan mahrum boʻlgan shaxslar uchun – 4,99% (43 kishi);

jazoni ijro etish muassasalaridan ozod qilingan shaxslar uchun – 6,97% (60 kishi);

odam savdosidan jabrlangan shaxslar uchun 0,23% (2 kishi) ish oʻrinlarining majburiy zaxiralarini shakllantirsin.

Yunusobod tumanida 2026-yilda aholining ijtimoiy ehtiyojmand toifalarini ishga joylashtirish uchun davlat tashkilotlari (budjet tashkilotlari va davlat ulushi 50 foizdan yuqori boʻlgan korxonalar) tomonidan majburiy zaxiraga qoʻyiladigan ish oʻrinlarining manzilli roʻyxati 1-ilovaga, aholining ijtimoiy ehtiyojmand toifalarini ishga joylashtirish uchun xodimlarining roʻyxatdagi oʻrtacha yillik soni yuz nafardan ortiqni tashkil etadigan xoʻjalik yurituvchi subyektlar (davlat ulushi 50 foizdan yuqori boʻlgan korxonalar bundan mustasno) tomonidan majburiy zaxiraga qoʻyiladigan ish oʻrinlarining manzilli roʻyxati 2-ilovaga muvofiq tasdiqlansin.

2. Ish oʻrinlarini band qiluvchi tashkilotlar rahbarlari:

ijtimoiy muhofazaga muhtoj va ish topishda qiynalayotgan shaxslarni ish bilan taʼminlash uchun 2025-yil yakunlanishidan 10 kun oldin band qilingan ish joylari umumiy miqdorining kamida 25 foizi uchun, 2026-yilning 10-yanvaridan kechikmay ish joylarining qolgan qismi 75 foizini barpo etish (ajratish yoki band qilib qoʻyish) toʻgʻrisidagi, yaʼni har bir toifa boʻyicha ish oʻrinlari band qilib qoʻyiladigan kasblar va lavozimlar, mutaxassisliklar kesimidagi maʼlumotlar va qaror boʻyicha chiqarilgan buyruq nusxalari tuman Kambagʻallikni qisqartirish va bandlikka koʻmaklashish boʻlimiga taqdim etilsin.

3. Yunusobod tuman Kambagʻallikni qisqartirish va bandlikka koʻmaklashish boʻlimi boshligʻi Sh. Ibragimova:

korxona va tashkilotlar rahbarlari tomonidan mazkur qarorning toʻliq bajarilishi yuzasidan qatʼiy nazorat oʻrnatilsin;

Oʻzbekiston Respublikasi Bandlik va mehnat munosabatlari vazirining 2019-yil 10-maydagi 19-2019-B-son (Adliya vazirligi tomonidan 2019-yil 31-mayda roʻyxatdan oʻtkazilgan, roʻyxat raqami 3163) buyrugʻiga asosan ijtimoiy ehtiyojmand aholi qatlamlariga mansub shaxslarni kvotalangan eng kam sondan ortiq miqdorda ishga qabul qilgan tashkilotlarga har bir xodim uchun 12 oy davomida har oyda eng kam oylik ish haqining 2 baravari miqdorida haq toʻlash toʻgʻrisidagi norma ish oʻrnini band qiluvchi tashkilot rahbarlari eʼtiboriga yetkazilsin.

Haq toʻlanadigan jamoat ishlariga yuborilgan va ish bilan taʼminlangan fuqarolar belgilangan tartibda hisobga olinsin.

4. Tuman hokimining matbuot kotibi – axborot siyosati masalalari boʻyicha maslahatchisi M. Darxanov:

ushbu qaror tuman hokimligining rasmiy sahifasi va ijtimoiy tarmoqlarida yoritilishini taʼminlasin.

5. Mazkur qaror rasmiy eʼlon qilingan kundan eʼtiboran kuchga kirishi belgilansin.

6. Yunusobod tumani hokimining 2024-yil 10-dekabrdagi “Yunusobod tumanida ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarini 2025-yil uchun band qilib qoʻyish toʻgʻrisida”gi 294-14-206-Q/24-son qarori oʻz kuchini yoʻqotgan deb hisoblansin.

7. Ushbu qarorning ijrosini nazorat qilish tuman hokimining birinchi oʻrinbosari A. Toʻlaganov zimmasiga yuklansin.