Oʻzbekiston Respublikasi Prezidentining 2023-yil 21-dekabrdagi “Mahalla institutining jamiyatdagi rolini tubdan oshirish va uning aholi muammolarini hal etishda birinchi boʻgʻin sifatida ishlashini taʼminlashga qaratilgan chora-tadbirlar toʻgʻrisida”gi 209-sonli farmoni, 2023-yil 21-dekabrdagi “Oʻzbekiston mahallalari uyushmasi faoliyatini yoʻlga qoʻyish va mahallalarda boshqaruv tizimini takomillashtirishga oid qoʻshimcha chora-tadbirlar toʻgʻrisida”gi 402-sonli qarori hamda Vazirlar Mahkamasining “Shaharlar, shaharchalar, qishloqlar va ovullarning mahallalarini tuzish, birlashtirish, boʻlish va tugatish, shuningdek, ularning chegaralarini belgilash va oʻzgartirish, ularga nom berish va ularning nomini oʻzgartirish tartibi toʻgʻrisidagi nizomni tasdiqlash haqida” 2014-yil 4-martdagi 48-sonli qaroriga oʻzgartirish va qoʻshimchalar kiritish toʻgʻrisida”gi 2024-yil 20-maydagi 294-sonli qarori talablari asosida, viloyat hokimining 2024-yil 2-iyul kungi 243-1-0-1-Q/24-sonli qarori bilan Andijon viloyati hokimligi huzuridagi Mahallalarni tuzish, birlashtirish, boʻlish va tugatish, shuningdek, ularning chegaralarini belgilash va oʻzgartirish masalalari boʻyicha idoralararo doimiy komissiyasining xulosasi, Oʻzbekiston mahallalari uyushmasi Andijon viloyati boshqarmasining 2025-yil 1-aprel kungi xati hamda Oʻzbekiston Respublikasi “Mahalliy davlat hokimiyati toʻgʻrisida”gi qonunning 6-, 24-moddalariga asosan xalq deputatlari Andijon viloyati Kengashi qaror qiladi:

1. Andijon viloyati hokimligi huzuridagi mahallalarni tuzish, birlashtirish, boʻlish va tugatish, shuningdek, ularning chegaralarini belgilash va oʻzgartirish masalalari boʻyicha idoralararo doimiy komissiyaning xulosasi bilan berilgan takliflar maʼqullansin.

2. Andijon viloyati boʻyicha birlashtiriladigan mahallalarning taklifiy roʻyxati ilovaga muvofiq tasdiqlansin.

3. Oʻzbekiston mahallalari uyushmasining Andijon viloyati boshqarmasi (M.Nishanov), “Mahalla yettiligi”ning viloyat boshqarma boshliqlari hamda tuman (shahar) hokimlari bilan birgalikda:

Andijon viloyatidagi ayrim mahallalar birlashtirilishining mazmun mohiyati toʻgʻrisida aholi orasida tushuntirish ishlarini olib borish;

birlashtirilayotgan mahallalarni nomlashda aholining fikrini inobotga olgan holda oʻrnatilgan tartib boʻyicha hujjatlarni rasmiylashtirish;

mahallalarni birlashtirish hisobiga boʻshayotgan mahalla fuqarolar yigʻini balansidagi binolaridan samarali foydalanish choralarni koʻrish;

bunda, boʻshayotgan binolarda aholi uchun guzarlar, kutubxonalar va boshqa madaniy maskanlar faoliyatini yoʻlga qoʻyish;

mahallaning ijtimoiy-iqtisodiy muammolarini hal etish jamgʻarmasiga foyda keltirish maqsadida binoni hududiy tadbirkorlarga ijaraga berish va ish oʻrinlarini yaratish;

mahalliy hokimliklar bilan birgalikda fuqarolarni roʻyxatga olish bilan bogʻliq masalalarda hamkorlik qilish choralarini koʻrsin.

4. Oʻzbekiston mahallalari uyushmasining Andijon viloyati boshqarmasi (M.Nishanov), viloyat Adliya boshqarmasi (O.Bozarov), viloyat Davlat soliq boshqarmasi (L.Qurbonov)lar, tuman (shahar) hokimlari bilan birgalikda:

Mahalla boshqarmasi, tuman (shahar) boʻlimlari qoshida viloyat Adliya va Davlat soliq boshqarmasi hamda hududiy boʻlimlaridan masʼul biriktirilgan holda mahallalarni tugatish komissiyalarini tuzish;

komissiya tomonidan belgilangan tartibda ixchamlashtirilayotgan (birlashayotgan) mahalla fuqarolar yigʻinlarining hujjatlarini rasmiylashtirish choralarini koʻrsin.

5. Oʻzbekiston mahallalari uyushmasining Andijon viloyati boshqarmasi (M.Nishanov), “Oʻzarxiv” agentligining Andijon viloyati Arxiv ishi hududiy boshqarmasi, viloyat Ichki ishlar boshqarmasi (S.Djabarov)lar, tuman (shahar) hokimlari bilan birgalikda:

Ixchamlashtirilayotgan mahalla fuqarolar yigʻinlarining tegishli hujjatlarini Arxivga qabul qilish choralarini koʻrish;

shuningdek, ixchamlashtirilayotgan mahalla fuqarolar yigʻinlarining muhr va shtamplarni ichki ishlar boʻlimlari tomonidan belgilangan tartibda rasmiylashtirsin.

6. Kadastr agentligining viloyat boshqarmasi boshligʻi (F.Berdiqulov), Davlat kadastrlar palatasi viloyat boshqarmasi boshligʻi (D.Akbarov)ga:

birlashtirilgan mahallalar chegaralarini aks ettirgan va tavsiflagan holda, ularni birlashtirish boʻyicha xaritalarini chizish hamda fuqarolarning kadastr hujjatlarini rasmiylashtirish;

ixchamlashtirilayotgan mahalla fuqarolar yigʻini inshootlarni birlashtirilgan mahalla fuqarolar yigʻinlariga balansiga berish choralarini koʻrsin.

7. Oʻzbekiston mahallalari uyushmasining Andijon viloyati boshqarmasi (M.Nishanov), viloyat Kambagʻallikni qisqartirish va bandlik boshqarmasi (S.Raxmanov), viloyat Oila va xotin-qizlar boshqarmasi (G.Ahmedova), Yoshlar ishlari agentligining viloyat boshqarmasi (A.Tangirqulov), Ijtimoiy himoya milliy agentligining viloyat boshqarmasi (A.Toʻlanov), viloyat ichki ishlar boshqarmasi (S.Djabarov), viloyat Davlat soliq boshqarmasi (L.Qurbonov), Markaziy bankning viloyat bosh boshqarmasi v.b (A.Rahmonberdiyev), tuman (shahar) hokimlari bilan birgalikda:

ixchamlashtirilayotgan mahalla fuqarolar yigʻinlarining hodimlariga belgilangan tartibda ogohlantirish xatlarini berish, shuningdek, amaldagi qonunchilikka muvofiq kompensatsiya pullarini ajratish;

ixchamlashtirilgandan soʻng mahalla hodimlarini birlashtirilgan mahallaga belgilangan tartibda tanlov asosida ishga qabul qilish va qolgan hodimlarini esa bandligini taʼminlash choralarini koʻrsin.

8. Viloyat hokimligi huzuridagi mahallalarni tuzish, birlashtirish, boʻlish va tugatish, shuningdek, ularning chegaralarini belgilash va oʻzgartirish masalalari boʻyicha idoralararo doimiy komissiyasiga:

Mahallalarni tuzish, birlashtirish, boʻlish, tugatish va ularning chegaralarini belgilash hamda bir-biriga qoʻshilib ketayotgan mahallaning birini nomini saqlab qolinishi yoki yangi nom berilishida mahalla aholisining takliflari inobatga olinsin.

Mahallalarni tuzish, birlashtirish, boʻlish, tugatish va ularning chegaralarini belgilash jarayonida mahalla aholisi tomonidan kelib chiqadigan nizoli masalalarni qonunchilikda belgilangan tartibda koʻrib chiqish vazifasi yuklatilsin.

9. Ushbu qaror rasmiy eʼlon qilingan kundan kuchga kiradi.

10. Viloyat hokimining matbuot kotibi, axborot siyosati masalalari boʻyicha maslahatchisi (R.Eshonov) ushbu qarorni matbuotda eʼlon qilsin hamda viloyat hokimligining rasmiy veb-saytiga joylashtirsin.

11. Mazkur qaror ijrosini nazorat qilish xalq deputatlari Andijon viloyat Kengashining Korrupsiyaga qarshi kurashish va xavfsizlik masalalari boʻyicha doimiy komissiya (M.Gʻaniyeva) zimmasiga yuklansin.